مسلسل لست خائنة الحلقة الأولى والثانية

(1)


جلست دينا على احدى الطاولات بالنادي تشرب فنجانا من القهوه منتظره انتهاء تدريب السباحه الخاص بابنتها الوحيده يارا و قبل ان تنتهي من قهوتها جاءت يارا تركض باتجاهها قائله:
يارا:مامي.. مامي.. انا عمت لوحدي من غير بورد
دينا و هي تحتضن ابنتها:برافو يا حبيبة مامي
يارا:انا جعانه اوي
دينا:تعالي خدي شاور و غيري هدومك ونطلب الغدا
يارا:اوكيه
انطلقت يارا باتجاه غرف تبديل الملابس و خلفها دينا مبتسمه لكنها ابتسامه حزينه………………
بعد تناول الغداء اصطحبت دينا ابنتها و ذهبتها الى المنزل ابدلت دينا ملابس ابنتها و قامت بعمل الواجب المدرسي معها و قامت بتحضير حقيبتها و طلبت منها شرب كوبا من الحليب و غسل اسنانها و الذهاب للنوم :
دينا:يلا يا حبيبتي اشربي اللبن واغسلي سنانك و على السرير
يارا:مش هنام غير لما تحكيلي حدوته
دينا ضاحكه:بس كده حاضر عايزه حدوته ايه؟
يارا مفكره:مممممممممم ممكن سنو وايت
دينا :حاضر

و بعد مرور ساعه خلدت يارا الى النوم وذهبت دينا لغسل بعض الاكواب و الصحون وتجفيفها ثم قامت بترتيب المنزل و نظرت الى ساعة الحائط فقالت بصوت خافت:
دينا:عشر دقايق
دقت الساعة معلنة انها التاسعة مساءا فابتسمت دينا و توجهت الى جهاز الكومبيوتر الخاص بها و فتحته و على الفور جاءها اتصالا من حبيبها فؤاد……………….


(2)
أجابت دينا على اتصال فؤاد بها وهي تبتسم ابتسامه هادئه:
دينا:ايوه يا فؤاد
فؤاد:ازيك يا دينا عامله ايه؟
دينا:الحمد لله, اخبار الشغل ايه؟
فؤاد:زي كل يوم , يارا نامت؟
دينا:ايوه الحمد لله
فؤاد:عملت ايه في تدريب السباحه؟
دينا:انهارده عامت من غير بورد
فؤاد:ما شاء الله
دينا:اتغديت؟
فؤاد:ايوه طلبنا أكل فالمكتب , و انتي؟
دينا:اتغدينا بيتزا فالنادي
فؤاد:قولي الحقيقه كلتي ولا بس اكلتي يارا؟
دينا:صدقني كلت
فؤاد:طيب احكيلي عملتي ايه انهارده؟
دينا:عادي وديت دينا المدرسة و روحت اشتريت طلبات البيت و بعد كده روحت جبتها من المدرسة و
طلعنا عالنادي خلصنا و رجعنا عملت الواجب و اتعشت ونامت وانا خلصت شغل البيت وقعدت
استناك عشان اطمن عليك.
فؤاد:و انا كمان والله عمال استنى الساعه تيجي 9 عشان اكلمك …. وحشتيني اوي
دينا: وانت كمان
و بدأت دينا في البكاء بصوت منخفض حتى لا يسمعها فؤاد………….
فؤاد:انتي بتعيطي ؟؟؟؟؟؟؟؟؟
دينا تحاول التماسك:لا ابدا
فؤاد:متضحكيش عليا
دينا:اصلي كنت مخنوقه شويه
فؤاد:اتكلمي معايا قوليلي ايه اللي حصل
دينا:تعبت يا فؤاد تعبت
فؤاد:معلش يا دينا عشان خاطر يارا استحملي
دينا:احساس الوحده احساس بشع
فؤاد:انا عارف و الله بس ادينا بنتكلم عالنت كل يوم مرتين
دينا:و هي حياتي هتبقى عالنت بس؟؟؟؟؟؟؟؟
فؤاد:هو ده قدرنا و لازم نقبله
دينا:بس انا تعبانه بجد
فؤاد:طيب افتحي الكاميرا
دينا:مش هينفع
فؤاد:ارجوكي يا دينا عايز اشوفك
دينا:مش هفتحها يا فؤاد
فؤاد:خلاص زي ما تحبي
دينا:هترجع البيت امتى؟
فؤاد:مش طايق ارجع خالص
دينا:ليه بس ؟
فؤاد:ما انتي عارفه الأرف اللي انا فيه
دينا:في مشكله جديده؟
فؤاد:ييييييه كتير بس المهم خلينا فيكي انت
دينا:انا خلاص بقيت كويسه
فؤاد:طب قولي بحبك
دينا:و بعدين معاك بقى؟
فؤاد:يعني مش هتقولي ؟
دينا بدلال انثوي رقيق:لأ مش قايله
فؤاد وهو يتنهد:بحبك يا دينا بحبك اوي
دينا بصدق:و انا كمان بحبك يا فؤاد بحبك اكتر من نفسي

ظلت دينا تحادث فؤاد حتى الساعة الحادية عشر وانهت الاتصال حتى تجبر فؤاد ان يذهب الى المنزل لينام فهو يخرج يوميا من الساعة السابعة صباحا و يعود عصرا ساعتين ثم يعود لمكتبه مرة اخرى حتى الساعة العاشرة فعمله مرهق للغايه و وافق فؤاد على انهاء الاتصال على وعد بأن يتحادثا مجددا الساعة التاسعة صباحا كالمعتاد…………………
ظلت دينا تتابع قناة اخبارية و هي تفكر في فؤاد و كيف احبته و تعلقت به و……….. سمعت دينا باب شقتها يفتح فاعتدلت في جلستها و جاءها صوت من بعيد يقول:

دينا انتي نمتي؟؟؟؟؟؟؟

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: نهلة أبو شهبة

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *