مسلسل اشجان الحلقة الخامسة والسادسة والعشرون

الحلقة 25

وصل على ومراته بيت حكمت…بعد مكالمة زينة

حاولوا اقناع زينة انها متتسرعش وده قرار صعب

لانها لو اتطلقت هتبقى مطلقة وهى لسه صغيرة

“خلاص ده قرار وانا بفكر فيه من زمان ووصلت لاخرى”

واتصل على بتامر علشان يتفاهموا على الانفصال

جه ابو تامر… هو اللى بيتكلم وتامر لا وجود له

على”خلاص ياحاج احنا نطلع بالمعروف وكل واحد يروح لحاله”

ابو تامر”انت كمان هتسمع كلامها”

على”هو الموضوع اسمع كلامها ومسمعوش اتنين مخطوبين ومحصلش بينهم اتفاق يبقى ينفصلوا وكل شئ نصيب”

ابو تامر”بس دول مش مخطوبين دول مكتوب كتابهم وبنتكم متدلعة اوى ده انا كنت فاكرها من بعد كتب الكتاب هتبقى عندنا على طول تشوف حماتها وطلباتها”

اشجان”لا طبعا انا موديش بنتى فى بيت عريسها وهى لسه مخطوبة”

ابو تامر “متقوليش مخطوبة ده جوزها”

اشجان”انا عندى كتب الكتاب خطوبة”

على”احنا دلوقتى بتكلم اننا ننهى الموضوع ده ودى”

ابو تامر”والمصاريف اللى ابنى صرفها”

اشجان”مصاريف ايه؟؟ هو فى السنتين جاب لها طقم خروج وبيجامتين ودول اتلبسوا ومينفعش ياخدهم انما شبكته ياخدها”

ابو تامر”والفرح اللى عمله”

اشجان”انتوا اللى قلتوا عايزين فرح وعملتوه… دى مصاريف اتصرفت ماانا كمان اتكلفت فى الخطوبة ..بس خلاص عوضى على الله”

ابو تامر”لا خلاص لما تبقى تدفعيله اللى صرفه على بنتك يبقى يطلق”

وده كان اخر كلام قبل مايمشى…واشجان قالت لعلى انها مش معاها فلوس تدفعهاله وهو عارف كده وبيعجزها

 

الايام بتمر ومفيش حاجة بتحصل

وبهاء ولا كأن له بنت عندها مشكلة كبيرة ولا حتى بيسأل هتعملوا ايه ولا بيحاول يتفاهم مع تامر

 

وبعد كام يوم فوجئت زينة وهى خارجة من الكلية ب2 اصحاب تامر تعرفهم بس عمرها ما كلمتهم ولا كلموها…بينادوا عليها

وقفت معاهم وكانوا جايين يتكلموا معاها للصلح بينها وبين تامر

ردها كان واضح وحازم معاهم

“انا اخدت القرار خلاص… انا مش عايزة اخسره يعنى احنا جيران وامهاتنا اصحاب من قبل مااحنا نتولد احنا مش نافعين اننا نتجوز المفروض خلاص كل واحد يشوف حياته ونفضل على علاقة طيبة ببعض انما كده هو بيسد كل الطرق بيننا…مين عارف مش يمكن لما نسيب بعض شوية كل واحد فينا يعرف قيمة التانى…انما بالعافية وبالتهديد انا مصرة على موقفى”

ومعرفوش يردوا عليها لانها حكت مواقف كتير من تامر محدش يرضى بيها لاخته

اسبوع مر واتصل بيهم واحد قريب تامر… دكتور وله شخصية بيحترمها الجميع وطلب انه يقابل زينة

استقبلوه اشجان وزينة فى البيت… اكتر من ساعتين وكل كلمة بيقولها الدكتور…زينة بترد عليه بثبات بكلام مقنع

الدكتور”طيب ممكن يا مدام اقعد مع زينة بس لوحدنا اقولها كلمتين”

اشجان”مفيش مانع″

وقامت اشجان وهى عارفة ان زينة هتحكيلها عن كل اللى هيتقال

“طبعا يا زينة انتى عارفة ان تامر غالى عليا اوى وانتى كمان طبعا وعايزك تعتبرينى زى اخوكى الكبير وتكلمينى بصراحة”

“طبعا انا معنديش حاجة اخبيها”

“انا حاسس انك مخبية حاجة ومقلتيش كل الحقيقة …ايه السبب اللى مخليكى عايزة تسيبى تامر”

“كل اللى قلته مش كفاية”

“ماانتى كنتى راضية ايه اللى اتغير فجاة..انا هسألك سؤال وتجاوبينى بصراحة”

“اتفضل”

“انتى فيه حد تانى فى حياتك علشان كده عايزة تسيبى تامر”

“لا خالص طبعا… مفيش اى حاجة من دى انا بس حسيت اننا طباعنا مش هتتفق مع بعض ولو اتجوزنا عمرنا ماهنرتاح مع بعض”

“بس انتى عارفة انك كده هتبقى مطلقة ويتكتب فى بطاقتك مطلقة”

“عارفة…ومش مهم يتكتب مطلقة احسن مااعيش طول عمرى تعيسة وحتى لو اتكتب فى البطاقة انا مش ماشية معلقة البطاقة “

“يعنى مش خايفة من كلام الناس لما يقولوا مطلقة”

“و فى دماغى كلام الناس ده خااااااالص”

“وافرضى مرضيش يطلقك”

“خلاص خليه ميطلقش وانا هدعى ربنا بس لان ربنا عارف انى مظلمتوش وهو اللى ظالمنى…انا بقوله ياخد الشبكة واى حاجة جابهالى وانا مستعملتهاش ياخدها ويطلقنى”

“هو عايز فلوس”

“يبقى انا كده اتاكدت ان قرارى صح وهو انسان غير امين عليا”

“مش يمكن بيعمل كده علشان بيحبك”

“بس كده انا بكرهه من عمايله دى… انا لحد دلوقتى مكرهتوش ومش عايزة اكرهه…كل اللى طالباه كل واحد يروح لحاله”

وانتهت المقابلة من غير جدوى

 

وكل ما على يبعت حد لتامر ولا ابوه… الرد واحد

10 الاف جنيه ونطلق

وييجى على يحكى لاشجان وزينة اللى حصل

زينة”انا عايزة افهم نطلق دى بناءا على انى على ذمة الاتنين مثلا”

على”واضح ان ابوه مسيطر عليه سيطرة تامة”

زينة”علشان تعرفوا ان عندى حق”

اشجان”الحمدلله ان ربنا نجاكى منهم”

على “طيب هنتصرف ازاى دلوقتى”

زينة”انا سامعة فى التليفزيون بيتكلموا عن قانون جديد اسمه الخلع بس مش عارفة ده للمتجوزين بس ولا ينفع لى انا كمان”

اشجان”دول بيقولوا اللى عايزة تتطلق تدفع…انا مش معايا فلوس″

زينة”خلاص نرفع قضية طلاق”

على”وتقعدى سنين لحد ما يتحكم فيها”

زينة”وهو انا ورايا ايه؟؟ انا مش عايزة اتجوز فعادى تتحكم فيها اى وقت”

اشجان”بس انا خايفة يطلبها فى بيت الطاعة”

على”لالا مفيش طاعة للبنت..الطاعة للمتجوزة بس″

زينة”بصوا بقى انا مش عايزة حد يروح له ولا يكلمه سيبوه كده محدش يعبره هو فاكر انه ماسكنا من ايدنا اللى بتوجعنا…ينسى”

على”وتتعلقى كده”

زينة”انا داخلة على امتحانات ودى اول امتحانات هذاكر فيها بحرية… لما اخلص يبقى ربنا يحلها”

 

عام 2000
خلصت زينة امتحانات 3 كلية

وخلصت مى 2 تجارة

وبهاء غرقان فى اللى هو فيه…نازل طالع يدخل ياخد الحقنة

ولما يكون مش معاه فلوس يشترى ولا اشجان معاها فلوس

ينام فى البيت ويبقى مزاجه وحش عليهم

وفى يوم واشجان لسه مرجعتش من الشغل… والبنات فى البيت

اتأخر بهاء فى الحمام… واتأخر

مى”زينة انا خايفة يكون بابا حصل له زى المرة اللى فاتت”

زينة”متخافيش…استنى كده”

وراحت زينة بصت من تحت الباب…وشافته واقع على الارض

بكل هدوء”واقع يامى على الارض”

مى بتوتر”هنتصرف ازاى”

راحت زينة اتصلت باشجان فى بيت حكمت…وحكت لها

“اوعى يا زينة تصوتوا وتعملوا فضايح”

“متخافيش تعالى انتى بس بسرعة وانا هحاول اتصرف”

قفلت زينة… وراحت خبطت على باب الحمام…حاولت تفتحه اتفتح معاها لانه مكنش مقفول من جوا

حاولت زينة تفوقه… رد عليها وهو مش واعى بالدنيا

حاله زى السكران بالظبط… سندوه البنات ودخلوه ع السرير

وجت اشجان”هو فين”

مى”نايم”

زينة”دلوقتى يفوق…هو مدروخ بس″

 

6شهور فاتوا وزينة زى ماهى…لا اتصالحت مع تامر

ولا فى نية عنده للطلاق الا بعد ما ياخد 10 الاف جنيه

وفى يوم جمعة… وعز الضهر

قام بهاء يطلب فلوس من اشجان… قالتله انها مش معاها

قعد يزعق ويشتم.. شتيمة لا يتحملها بشر

صرخت اشجان فى وشه”انا تعبت منك…انا الحياة دى متنفعنيش”

“اخرسى وهاتى فلوس بقولك”

حاول يهجم عليها…شدوه البنتين

مسك مى لانها الاصغروهجم عليها يضربها… زنقها فى ركن وكانت مش عارفة غير تصرخ

نانسى بتعيط وماسكة فى اشجان

اول ما شافت زينة مى بتتضرب كده

هجمت عليه من ضهره…شدته من على اختها بكل قوته

اتدور لها … زقها… وقعت واتخبطت فى دماغها فى ايد الكنبة

داخت شوية… هجم على رقبتها يخنقها… كانت قواها خارت نهائيا

اشجان ومى مقدروش يفكوا ايده من على رقبتها

فتحوا الباب للجيران اللى بتخبط على صوت الصراخ

شاب جارهم هجم على ايد بهاء وفكها من رقبة زينة

قامت زينة وهى مش مصدقة اللى حصل كله

اشجان بتزعق وبتشتم فى بهاء

الجيران بيقولوا”كان هيموت بنته”

اشجان”منك لله… انت ولا تعبت ولا ربيت جاى تموتهالى بسهولة كده”

كل ده وزينة مش بتتكلم… دخلت بصت على نفسها فى المراية

شافت مكان ضوافره مغروز فى رقبتها

ودماغها بتوجعها…مسكت راسها من ورا…حست بحاجة متورمة ومؤلمة… اصوات كتير اشجان بتزعق وتعيط

مى ونانسى بيعيطوا

الجيران مقسومين…الستات بيهدوا اشجان

والرجالة بتزعق لبهاء وتلومه

لحظات…لبست زينة هدومها… ونزلت تجرى من البيت

واشجان تنادى عليها

“رايحة فين يا زينة…يا زينة ردى عليا”

وزينة بتعيط… ونزلت وهى مش عارفة رايحة فين؟

الحلقة 26

قعدت اشجان بعد مانزلت زينة… تعيط

وتقول”يا ترى يازينة روحتى فين”

واتصلت بمامتها… تسألها

ردت”لا زينة مش عندى”

“طيب لو جت لك كلمينى”

واستنت اشجان ان زينة ترجع او تروح لحكمت

انتظار…دون جدوى

 

نزلت زينة ومشيت وهى بتعيط…مش عارفة تروح فين

فكرت لو راحت لحكمت يبقى خلاص هتزعل شوية ويرجع كل شئ زى ماكان

ومش هتقدر تعيش مع حكمت… اكيد تامر هيضايقها هناك

هتروح لمين؟؟ تروح فين؟؟

ولازم يكون فيه حل مش غضب وخلاص

فضلت ماشية ماشية ومش عارفة هى رايحة فين؟؟

ماشية ودموعها على خدها فكرت تروح ل على؟؟

مشيت حوالى ساعة لقت نفسها قريب من بيت عمها

فكرت…تطلع له…ماهو برضه عمها…بس ياترى البيت فين بالظبط

حاولت تفتكر البيت اللى مراحتوش غير مرة واحدة قبل كده

وتوكلت على الله انها تكون صح… وطلعت وخبطت

فتحت مرات عمها الباب… كانوا بيتغدوا

اتفاجئوا بيها… واستغربوا

مرات العم”زينة؟؟ تعالى ادخلى مالك”

دخلت زينة بعد ما سلمت على مرات عمها… وشافها عمها قام من على السفرة

“مالك يا زينة؟؟ انتى معيطة؟؟”

وعيطت زينة.. وهى بتحكى اللى حصل

وقلعت حجابها علشان عمها يشوف رقبتها

مرات العم”كده؟؟؟ ينفع كده رقبة البنت هو اخوك ده ايه؟؟ معندوش دم دايما معندوش مسئولية”

العم”انا كلمته كتير وكل ما اشجان بتكلمنى علشان اتدخل فى مشاكلهم بتدخل واقول اللى يمليه عليا ضميرى… انا مش عارف هو بيفكر ازاى”

زينة”ياعمو مش كفاية احنا راضيين بحاله وساكتين… وكمان لما ميشربش يقوم يتجن علينا… انا مش راجعة البيت طول ماهو فيه”

مرات العم”متزعليش …تعالى بس اتغدى وشوية نبقى نشوف هنعمل ايه”

زينة”لا شكرا…كملوا غدا انتوا بس… انا عايزة اكلم ماما اطمنها انا نزلت من زمان وهى زمانها قلقانة اوى”

العم”اتكلمى براحتك… هخلص غدا واجى معاكى اشوف اللى يرضيكم ايه”

 

اشجان قاعدة تدعى ان زينة تكون بخير…

بهاء فى اوضته ولا كأنه عمل حاجة

رن التليفون

“ماما… متبينيش انى انا اللى ع التليفون”

“انتى فين”

“متقلقيش انا بطمنك انا عند عمو وشوية وهو جاى معايا… هو عندك؟؟”

“اااه جوا كالعادة… ولا كأنه عمل حاجة”

“بصى الموضوع كده زاد اوى بقى وانا مش هعيش معاه فى بيت واحد”

“هو فعلا فاق الحد…وانا اتصلت بعلى وزمانه جاى”

“ماشى …بس النهاردة بقى المشكلة مش مشكلة مصروف يعنى لما نتكلم مش عايزينه معانا مش زى كل مرة يقول هزود المصروف وتصدقيه وهو زى ماهو مبيتغيرش”

“ربنا يحلها من عنده… وهو هيرضى يمشى بسهولة”

“ربنا معانا”

 

لما اتجمعوا فى بيت اشجان

حكمت وعلى وزينة وعمها… واشجان ومى

وبعد ما فضل اخوه وعلى يزعقوا

بهاء”هما اللى خرجونى عن شعورى…عموما خلاص خلاص”

زينة بمنتهى العصبية”مفيش خلاص وقدامكم اهو يا انا ياهو فى البيت… والله العظيم لو قعد لامشى انا ومش هروح عند حد… وما حد هيعرف لى طريق”

بهاء”ايه الكلام ده… هى دى اللى هتخرجنى من بيتى”

اشجان”مش بيتك ده بيتى انا وبيت بناتى وهى تقعد وانت تمشى”

بهاء”شوف يا عم على الكلام”

على زعق فى وشه”اومااااااال انت فاكر ايه؟؟ انت كمان ليك عين تتكلم”

العم”بصراحة يا بهاء انت مخلينى مش قادر اتكلم…كل مرة اتدخل فى مشكلة اقول لاشجان هيتغير هيتغير وانت كل مرة بتصغرنى”

بهاء”انا مش همشى”

زينة”اختارى ياماما… يا انا يا هو”

اشجان”هو انا مستغنية عنكم… هو يطلع بره”

العم”قوم معايا يا بهاء”

بهاء”انا مش خارج بقولك”

العم”تعالى عند ماما كام يوم لحد اعصابهم ما تهدا”

وقام بهاء مع اخوه ونزلوا… واشجان والبنات مش مصدقين

على”هتعملى ايه يااشجان دلوقتى؟؟هو نازل على رجوع″

اشجان”لالالا رجوع ايه خلاص انا ماصدقت”

على”يعنى هتتطلقوا”

اشجان”مش عارفة..بص ياعلى ماهو انا لو اتطلقت لا هاخد نفقة ليا ولا لزينة علشان هى ع الورق متجوزة…يعنى هاخد لمى ونانسى بس وانا مرتبى ميكفيش انى اصرف على البيت من كله وكمان دراسة البنات حتى الصغيرة ليها مصاريف”

على”وكمان عايز اقولك حاجة…شكل الادمان عميه خالص يعنى ممكن فى لحظة وفى جرعة من اللى بياخدها يموت ولو متطلقة مش هيبقى لك معاش”

اشجان”خلاص…وانا يعنى هعوز الطلاق فى ايه؟؟.. بس اسمع ياعلى هتقولى لوحدك هتقولى معاكى بنات انا مش هخرج من بيتى”

على “انتى حرة”

 

عدت الايام وكل ما بهاء يبعت حد يتكلم فى رجوع

اشجان والبنات يرفضوا تمامااااا

وكانت حكمت كمان بتشجعهم انهم ميرجعوش بهاء تانى

وخصوصا بعد الاصابات اللى استمرت فى زينة

وبعد فترة قصيرة

اشجان”انا مش عارفة اتصرف واصرف منين عليكم… وابوكم ما صدق انه حتى ال200 او 300 جنيه اللى كنت باخدهم منه مش هيدفعهم”

زينة”وانا كمان يا ماما من ساعة ما سيبت تامر من 6 شهور ومحصلش جديد خالص…يعنى هو فعلا معلقنى “

اشجان”طيب ابوكم وممكن ارفع عليه نفقة..انما تامر ده مش عارفة هنعمل معاه ايه”

زينة”خلاص احنا نروح لمحامى وهو اللى يقولنا بدل مااحنا قاعدين كده ومش بنتحرك”

اشجان”ومصاريف المحامى”

زينة”فاكرة المحامى بتاع زمان…كان طيب ومش بياخد فلوس كتير وممكن يستنى علينا يعنى”

اشجان”طيب قومى نروح له”

وقامت اشجان وزينة راحوا للمحامى

لما دخلوا المكتب…كان فاضى لا موكلين ولا سكرتارية

الا اوضة المكتب بس مفتوحة

دخلوا…لقوا شاب قاعد على المكتب

اشجان”سلامو عليكم…هو الاستاذ مش موجود”

“لا والله الاستاذ فى اجازة”

“وهيرجع امتى”

“كمان اسبوع”

وبصت اشجان وزينة لبعض…حيرانين

المحامى”اؤمرى حضرتك”

اشجان”هو انت محامى هنا ولا..”

المحامى”ايوه انا محامى فى المكتب “

ومالت زينة على اشجان”اسأليه بقى يمكن يفيدنا”

المحامى… اللى كانت عينه على زينة… وزينة طبعا لاحظت

“اتفضلوا اقعدوا”

وقعدوا… وبدأت اشجان تحكى الحكاية كلها

حكايتها مع بهاء من اول الطلاق اللى فات

وبعدين حكاية زينة وتامر

ولما قالت ان زينة مكتوب كتابها

نظرات سريعة من الاستغراب من حسن لزينة

وزينة نظرة ارتباك وخجل من حكايتهم

نظرات سريعة صامتة بينهم… وكملت اشجان الحكاية

حسن”طيب هنبتدى بقضية مين”

زينة”الاتنين مع بعض…بس قضيتى سهلة ولا صعبة”

حسن”متخافيش… انتى هرفعلك خلع″

اشجان”بيقولوا ان الزوجة هى اللى تدفع″

حسن”انتوا اخدتوا مهر؟؟”

اشجان”لا … احنا كنا متفقين اننا هنجهز اللى علينا وهما اللى عليهم ومكناش هناخد مهر اصلا”

حسن”خلاص هنبعتله الجنيه المهر الصورى اللى بيكون فى القسيمة وبعدها اجراءات هتاخد وقت مش اكتر… ومدام اشجان هنرفع نفقة”

اشجان “مطلوب منى ايه”

حسن”مش هنختلف خالص… بس اهم حاجة نتقابل فى الشهر العقارى علشان تعملولى التوكيلات اللى هرفع بيها القضايا”

اشجان”ان شاءالله”

وقامت اشجان…ومعاها زينة

وقام معاهم حسن يوصلهم لحد باب المكتب

وهما نازلين…مد حسن ايده يسلم على زينة

“اشوفكم فى الشهر العقارى”

ومدت ايدها زينة تسلم عليه بارتباك وخجل

“ان شاءالله”

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: دينا عماد

 

 

 

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *