قصة ..ليه سيبتني ؟؟؟.. الجزء الأول

ليه سيبتني ؟؟؟

 

الجزء الأول

فتحت منى عينيها لقيت نفسها نايمه في سريرها فمدت دراعها عشان تصحي سامي جوزها ملقيتوش جنبها فبصت حواليها ملقيتوش … قامت بصت عليه في الحمام برده ملقيتوش.. دخلت المطبخ وكل الاوض برده مش موجود … قعدت عالانتريه تفكر يا ترى راح فين ؟؟؟؟؟؟؟

فكرت مقعول مرجعش من امبارح لما خرج وهو زعلان منها !!!!!!!
بس ده عمره ما بات بعيد عنها … يا ترى لسه زعلان مني يا سامي؟؟؟؟
بصت في الساعه لقيت نفسها اتأخرت عالشغل فقامت لبست هدومها ونزلت من غير فطار عشان مش متعوده تفطر من غيره .

وصلت شغلها في مكتب الترجمه وقعدت تشتغل وعينيها عالموبايل مستنيه سامي يكلمها يطمنها على مكانه…. بس الموبايل مرنش, فكرت تكلمه عند مامته بس رجعت في كلامها عشان مش بتحب حد يعرف عنهم اي حاجه وطبعا مقالتش لمامتها حاجه لما اتصلت بيها بالعكس ردت عادي جدا:

منى:صباح الخير يا ماما عامله ايه؟
الام:صباح الخير يا حبيبتي , ها فطرتي؟
منى:طبعا يا حبيتي الحمد لله
الام:قربتي تخلصي شغلك؟
منى:قربت خلاص ان شاء الله ساعه واكون فالبيت
الام:طيب يا حبيبتي لما توصلي كلميني
منى:حاضر يا ماما

قفلت منى مع مامتها وخلصت شغلها و روحت البيت بسرعه عشان تطمن على سامي ………
فتحت باب الشقه برده مش موجود استغربت اوي و سألت نفسها معقول لسه زعلان مني من امبارح ولسه مخاصمني وقعدت عالكرسي تفتكر اللي حصل امبارح…………

رجعت منى من الشغل ودخلت المطبخ تحضر الغدا وبعديها بنص ساعه وصل سامي ودخل المطبخ باسها في خدها وقالها:
سامي:يلا يا حبيبتي انا ميت من الجوع
منى كانت تعبانه جدا فقالت وهي مدايقه: والله ده بدل ما تيجي تساعدني
سامي وهو بيضحك:بس كده من عينيا هاتي اقطع انا السلطه
وقعد سامي على ترابيزة المطبخ وابتدى يقطع السلطه وبعد ما خلص رصت منى الاطباق وقعدوا يتغدوا وكل واحد يحكي اللي حصله في طول اليوم وبعد ما خلصوا غدا قامت منى تغسل الاطباق وسامي ابتدى يعمل الشاي وهما بيشربوا الشاي سامي قالها:
سامي:حبيبتي انا هنزل اقابل اصحابي عالقهوه عشان في مباراه مهمه انهارده
منى وهي متغاظه منه:واشمعنى دلوقتي قادر تنزل ما انا كل ما اطلب منك نخرج تقولي تعبان فالشغل
سامي:ما انا ببقى فعلا تعبان يا منى
منى:و اشمعنى اصحابك بتقابلهم وانت مش تعبان
سامي:انتي عايزه تتخانقي وخلاص
منى:ما انت اللي بتعصبني كل حاجه اصحابك او اهلك وانا آخر حاجه بتفكر فيها
سامي بصلها نظرة عتاب:كده برده يا منى ده رأيك فيا
منى بعناد:ايوه انت انسان اناني مبتفكرش غير في نفسك
سامي دخل ينام وهو زعلان منها وبالليل قام استحمى ولبس هدومه وخد اللاب توب بتاعه ونزل وقبل ما ينزل قرب منها وحضنها من ورا وباس راسها وقالها:
سامي:نامي انت احتمال اتأخر
منى وهي بتعيط:براحتك يا سامي براحتك

وخرج سامي ونامت منى وهي بتعيط ………………………….

فاقت منى من سرحانها على موبايلها بيرن ردت بسرعه:
منى:الو؟؟؟
مامتها:الو يا منى
منى:ايوه يا ماما
مامتها:مش قلتلك تكلميني اول ما توصلي البيت
منى:معلش يا ماما نسيت
مامتها:طيب يا حبيبتي يلا قومي اتغدي
منى:حاضر

و قفلت التليفون ودخلت غيرت هدومها و فتحت التلاجه عملت ساندويتش وقعدت تاكله لوحدها والاكل كان طعمه وحش و بيتبلع بصعوبه ولقيت دموعها بتنزل فقامت وسابت الاكل ودخلت الانتريه شغلت الTV وفتحته على قناة الافلام ولقيت فيلم لعادل امام سامي بيحبه اوي فقعدت تتفرج عليه وبعد شويه نامت وهي عالكنبه وحست ان في حد بيحضنها من ورا جامد فضحكت وهي نايمه عشان سامي رجع ولفت عشان تحضنه.. قربت منه عشان تبوسه.. فتحت عينيها .. لقيت نفسها لوحدها وسامي لسه مرجعش فقعدت تعيط…………………………………

 

 

 

————–





قامت منى من على الكنبه ودخلت اوضة المكتب فتحت اللاب توب بتاعها وفتحت الايميل بتاعها وقررت تكتب ايميل اسامي عشان تصالحه خصوصا انه علطول فاتح الايميل بتاعه وابتدت تكتب:






جوزي وحبيب عمري:
انا عارفه انك زعلان مني .. بس مش معنى كده انك تبات بره البيت يمكن اكون غلطانه بس كل حاجه ممكن تتحل بالمناقشه .. انا هبدأ معاك من اول يوم شوفنا بعض هههههههه هحكيلك حكايتنا زي ما كنت دايما بتطلب مني .. فاكر لما كنت بتحط راسك على رجلي وتقولي احكيلي حكايتنا ……


كان يا ما كان يا سعد يا اكرام في سالف العصر والاوان ما يحلى الكلام اللي بذكر النبي عليه الصلاة والسلام………
كان في بنوته اموره في كلية آداب وكانت علطول بتضحك وفرحانه وكان عندها اصحاب كتير ولاد وبنات بس كان في ولد علطول واقف بعيد بيبص عليها وفضل عالحال ده كل يوم لغاية ما صاحباتها سموه مجنون منى ههههههههههه ( يا ترى لسه مجنون منى) والولد ده متكلمش معاها غير بعد سنه
لما كانوا واقفين بيصوروا ورق وكان في ملزمه مراجعه مش موجوده مع اي حد وهي بتسأل عليها راح الولد ده قرب منها وقالها بأحن صوت سمعته في حياتها:
الولد:اتفضلي
منى:متشكره,هصورها وارجعهالك علطول
الولد ابتسم:براحتك يا منى
منى:انت عارف اسمي؟
الولد:ايوه بسمع صاحباتك بيندهولك
منى و هي بتضحك:طيب وانت بقى اسمك ايه؟
الولد:سامي
منى بهزار:تشرفنا يا فندم
سامي ضحك ومقالش حاجه
منى:انا خلصت تصوير اتفضل الملزمه بتاعتك
سامي:شكرا
منى:انت واقف ليه؟ مش هتدخل الجامعه؟
سامي بصوت واطي:اوكيه




وفضلت ارغي معاك من عند المكتبه لغاية الكليه وانت مبتردش غير بآه و لأ و اوكيه ولما وصلنا لاصحابي قلتلك:
منى:مش هتيجي تتعرف على اصحابي؟
سامي:لا خليكي معاهم
منى وهي حزينه:وانت هتقف لوحدك؟
سامي:عادي , مستني واحد صاحبي
ورجعت لاصحابي بس كنت مش منى اللي سيبتهم من ساعه كنت انسانه تانيه في انسان لمس قلبها بحنانه ورقته وبقت بتفكر فيه علطول………….


وابتدينا نتكلم كل يوم شويه ومع الوقت بقينا بنتكلم من اول ما نوصل الجامعه لغاية ما نروح بيوتنا
وكل ده وانت مقلتليش بحبك ولا حتى لمحتلي ولو من بعيد وحتى متكلمناش فالتليفون ولا مره………
و اتخرجنا و معرفتش عنك اي حاجه لمدة سنه واشتغلت وبقيت بفتكرك كل كام يوم واقول لنفسي يا ترى بيعمل ايه دلوقت؟؟؟؟؟؟؟؟؟؟؟؟




و في يوم رجعت من الشغل وكنت ميته من الجوع ودخلت بيتنا وقعدت اقول بصوت عالي :
منى:ماما انا جعانه موووووووووووووت حضريلي الاكل بسرعه
وببص لقيت ماما قاعده في الصالون مع بابا ومعاهم شاب مش باصص ناحيتي فاتكسفت ودخلت اوضتي اجري وبعد شويه ماما دخلت عليه وقالتلي:
الام:مش تيجي تسلمي
منى:مين ده؟
الام:ده عريس
منى:عريس لمين؟
الام بتريقه:ليه انا
منى:الف مبروك يا ماما
الام:يلا يا بنت بابا مستنيكي
منى:انا مش عايزه اتجوز هو بالعافيه
الام:طيب شوفيه يا بنتي يمكن يعجبك
منى:مش هخرج……….
الام:طيب انا هبعتلك ابوكي يتصرف معاكي
منى:يييييييييييييه خلاص هطلع بس هطفشه عشان تبقي عارفه
الام وهي بتضحك:لما نشوف
و خرجت وانا متنرفزه جدا ودخلت الصالون وقلت :
منى:مساء الخير
راح العريس وقف وببص لقيتك واقف ادامي كان هيغمى عليه بس مسكت نفسي وقربت مني ومديت ايدك وسلمت عليه:
سامي:ازيك يا منى
منى:انت!!!!!!
الام:ها يا منى لسه عايزه تطفشيه برده؟؟؟؟؟؟؟؟
الاب:تطفشه ليه ؟ ايه الحكايه ؟


وخرج بابا وماما من الاوضه وسابونا لوحدنا ولاول مره لقيتك بتتكلم كتير و انا بس بسمع:
سامي: انا جيت اتقدملك يا منى لما بقيت مستعد اتجوزك, وقررت ابعد عنك لغاية ما اكون جاهز اتجوزك وقلت لنفسي لو اتقدملها حد غيري ووافقت تبقى مش نصيبي وفضلت اسأل عليكي من بعيد و عرفت انك لسه متخطبتيش وفضلت اشتغل وادخل جمعيات عشان اكون مبلغ ولما دفعت مقدم الشقه قررت اتقدملك و احتمال نتخطب سنه وبعد كده نتجوز ها ايه رأيك؟


منى فضلت باصاله وهي حاسه انها بتحلم .. معقول كان بيحبها طول الفتره ده .. واستحمل يبعد عني عشان يكون نفسه يجي يتقدملي.. معقول ؟
سامي وهو خايف:منى مردتيش عليه ليه؟ انت مش موافقه نتخطب ولا ايه؟

 

**********************************







كملت منى الايميل اللي بتبعته لسامي عشان يصالحها ويرجع البيت:


وبعد ما سألتني انا موافقه ولا لأ بصيتلك وقلتلك:
منى:انت كل ده مش حاسس انا بحبك قد ايه؟؟؟؟؟؟؟؟؟؟؟؟؟
سامي وشه احمر:بت..بت..بتحبيني
منى:ايوه
سامي:يااااااااااااه يا منى بقالي سنين بحلم اسمع الكلمه ده منك
منى:بجد يا سامي
سامي:ده انا هعمل المستحيل عشان نتجوز بسرعه وتكوني معايا علطول




وفعلا ابتدينا نحوش سوا وندخل جمعيات وحددنا معاد الفرح بعد 6 شهور من الخطوبه وانت جيبتلي دبله ومحبس وخاتم شبكه و فرشنا شقتنا حته حته بحاجات بسيطه وفاتوا ال6 شهور بسرعه وجه يوم الفرح………..
(فاكر ولا نسيت؟؟؟؟؟؟؟؟)
يوم فرحنا كان احلى يوم في حياتنا وكنا مش حاسين بكل اللي حوالينا وكنا بنتكلم من غير كلام كنا بس بنبص في عيونا ونضحك ولما الفرح خلص ودخلنا شقتنا حضنتي جامد وشيلتني وفضلت تلف بيا وانا اضحك واقولك نزلني وانت مش سامعني من كتر فرحتك ولما نزلتني بصيتلي وقلتلي:
سامي:انا كده ربنا حققلي كل اللي بتمناه و لو مت مش هبقى زعلان
منى حطت ايدها على شفايفه:بعد الشر عليك اوعى تقول كده تاني




و اول ليله في جوازنا عرفت انت حنين قد ايه وبتحبني قد ايه…. ياااااااااااه كان يوم جميل…..


وابتدت المشاكل البسيطه تظهر بينا بعد الاسبوعين الاجازه و رجوعنا الشغل …. فاكر يا سامي:
منى:ايه يا سامي انت ليه بترمي هدومك عالارض
سامي و هو مكسوف:معلش يا حبيبتي
منى:طيب يلا عشان توصلني الشغل
سامي:طيب دقيقه هلبس
وفضلت ساعه تستعد عشان تنزل واخرتني عالشغل وانا من يومها بروح لوحدي عشان انت بطئ.


و موضوع القهوه واصحابك اللي مبتقدرش تبعد عنهم ابدا وكنت بتسيبني بالساعات لوحدي وترجع تهزر و تقولي ايه يا حبيبتي زعلانه ليه؟؟
كنت زعلانه عشان بتحب تقعد مع اصحابك اكتر مني .. كنت زعلانه عشان يوم الخميس اللي المفروض تقضيه معايا كنت بقضيه لوحدي وانت بترجع 5 او 6 الصبح طبعا مرهق و تعبان وتصحى تصلي الجمعه و تاخدني عند مامتك وهناك تسيبني و تروح لاصحابك تاني و ترجع نتغدى مع مامتك ونروح لماما ساعه ونروح ننام عشان الشغل تاني يوم……. فاكر يا سامي؟




و حتى الاعياد كنا بنقضيها كلها عند مامتك وكنت بتصمم نبات عندها وانا مش باخد راحتي هناك وببقى نفسي ارتاح في البيت يوم الاجازه و ياما طلبت منك نبات في بيتنا ونتغدى عند مامتك وانت كنت بترفض….. فاكر يا سامي؟




و كمان كنت بزعل منك لما كنت بتستخدم في اليوم الواحد اربع او خمس فوط و لما اقولك ليه كده تقولي انا متعود على كده وطبعا كنت بقعد اغسل كل يومين كل الفوط اللي عندنا…. فاكر؟




و برغم اني كنت بشارك معاك في مصاريف البيت الا انك كنت مش بتوافق اني اشتري اي حاجه نفسي فيها عشان مش مهمه مع اني ببقى نفسي فيها ومحتاجاها وهشتريها من مرتبي بس برده بترفض
زي المكنسه الكهربائيه وحاجات تانيه كتير….. فاكر يا سامي؟






و لما كنت بترفض ازور قرايبي او احضر افراح صاحباتي وتقولي اصلي بغير عليكي يا حبيبتي وانا افضل احاول اقنعك وانت بترفض…..فاكر يا سامي؟

 يتبع………………

 

الرد

لن يتم نشر عنوان بريدك الإلكتروني. الحقول الإلزامية مشار إليها بـ *