ترفيهمسلسل غريبه في عالمك

مسلسل غريبه في عالمك الحلقة التاسعة والعاشرة

الحلقة التاسعة  

*أنا ملاذك*
كان عبدالرءوف الكامل يجلس أمام مكتب يوسف الذي جلس خلف مكتبه ويستمع الى عبدالرءوف وهو يشكره: اللي عملته دة يابني يبين أد ايه انت انسان أصيل ويخليني متأكد أكتر ان اختياري كان في محله
فرد يوسف مبتسما: الموضوع ما يستاهلش كل دة يا عمي.
كان عبدالرءوف قد بدأ يعتاد على لقب عمي من يوسف بعد كتب كتابه على مريم فكان هذا هو اللقب الوحيد الذي يتناسب مع الوضع الجديد, فقال عبد الرءوف بنبرة بها بعض الحزن: لا يا بني يستاهل . انت ما تعرفش مدى ارتباط مريم بصاحبتها حياة . هي تقريبا أول واحدة تتعرف عليها من أول ما جات مصر وخصوصا بعد ما فشلت محاولاتي في التقريب بينها وبين عمتها. معرفتها بحياة فرقت معاها كتير أوي وخصوصا ان البنت فعلا كويسة ومحترمة وكان غيابها يوم الفرح ممكن يأثر كتير على مريم.
قال يوسف محاولا تغيير دفة الحديث: المهم. هما خلاص سافروا؟
عبدالرءوف: أه وزمانهم قربوا يوصلوا . انا طلبت من مريم انها تكلمني أول ما توصل.
يوسف: طب وحضرتك؟ هتسافر امتى؟
عبدالرءوف: انا هخرج من عندك وأطلع ع المستشفى هقابل الدكتور جمال وبعدين هسافر على طول.
يوسف بقلق: انت نويت خلاص؟
عبدالرءوف: بعد الفرح على طول ان شاء الله وأول ما اطمن على مريم. أرجوك يا يوسف خلي بالك منها.
فوضع يوسف يده على كف عبدالرءوف ليطمئنه وهو يقول: ما تقلقش . بس انت لسة مصر ع الموضوع دة؟
فهم عبدالرءوف ما يرمي اليه يوسف فقال: دة الحل الوحيد اللي أدامي عشان أبقا مطمن على مريم وكمان على وردة عمتها. انت عارف اني لو سبت الامور زي ما هية عايمة كدة مش بعيد أرجع والاقي كل حاجة خربت . وكمال بقا يعمل ما بداله.
يوسف: اللي تشوفه.
في تلك اللحظة سمع الاثنان طرقا على الباب فقال يوسف: ادخل
دخل وليد وقد ابتسم فور رؤيته لعبدالرءوف: أنا أسف كنت فاكرك لوحدك. ازيك يا عبد الرءوف بيه.هبقا أجيلك بعدين بقا يا يوسف.
وقبل أن يتوجه مرة أخرى ناحية الباب أوقفه صوت يوسف: استنى يا وليد. مفيش حد غريب . تقدر تقول اللي عندك.
فقال عبد الرءوف لوليد باسما: جرى ايه يا باشمهندس؟ مش عاوز تقعد معايا ولا ايه؟
فقال وليد محرجا: يا خبر. ودي معقولة بردو؟ انا قلت انكم ممكن تكونوا بتتكلموا في موضوع مهم ولا حاجة.
عبدالرءوف: لا يا سيدي, أنا خلاص كنت ماشي.
وليد ضاحكا: ليه بس؟ هو زي ما بيقولوا ولا ايه. اذا حضرت الشياطين يعني؟
عبدالرءوف وهو ينهض من كرسيه: ما تقولش كدة يابني. ربنا يبارك فيكم. انا فعلا كنت ماشي دلوقت عشان عندي شوية مشاوير وبعديها سفر للبلد. أستأذن أنا بقا دلوقت واسيبكم تكملوا شغلكم.
ونهض عبدالرءوف من كرسيه وكذلك فعل يوسف الذي كان يستعد لمصافحته وتوديعه وهو يقول: أوك, بس ما تنساش تبقا تتصل بيا وتطمني.
فأوميء عبدالرءوف برأسه موافقا ثم غادر المكان . وعندما اطمأن يوسف أنه أصبح هو وأخوه وليد وحدهما بالمكتب, جلس يوسف على كرسيه ونظر الى أخيه مستفسرا: خير ياسي وليد؟
وليد: انا سمعت انك اديت أجازة اسبوع لاستاذ محمود البدري مدير الحسابات.مع انك عارف كويس احنا اد ايه محتاجينه في الفترة دي.
يوسف: معلش يا وليد خلي مدحت يحل محله الاسبوع دة.
وليد بقلق: ماشي. بس ممكن اعرف ايه السبب؟ يعني هو عنده ظروف للدرجادي تستدعي الاجازة دي؟
يوسف: لا يا سيدي. انا عطيته الاجازة عشان خاطر بنته.
وليد بلهفة: حياة! مالها.
لاحظ يوسف مدى اهتمام أخيه ولهفته وقرر أن يسجل ذلك في ذاكرته, ثم أجاب وليد متعمدا ان يبدي عدم اهتمامه: ملهاش يا سيدي, كل ما في الأمر ان مريم كانت عاوزة حياة تحضر معاها الفرح ولان ابوها عمره ما كان هيرافق انه يسيب بنته تسافر لوحدها فاديتله هو كمان اجازة اسبوع ,ويا سيدي اهي مرة من نفسه.مانت عارف ان اديله كتير مش بياخد اجازات.
وليد بابتسامة ودون ان يدري فلت منه السؤال: يعني حياة دلوقت في البلد؟
فقال يوسف وهو يحاول أن يكتم ضحكته: اه يا سيدي. ليه كنت عاوزها في حاجة؟
أفاق وليد من شروده وعلم مدى الخطأ الذي أوقع نفسه فيه: هه,لالالا. أنا بس كنت بسأل احنا امتى هنسافر؟
يوسف متصنعا جهله بالامر: هنسافر فين وليه؟
وليد: جرى ايه يا عم يوسف؟ البلد طبعا. هو انت مش عندك فرح هتجهزله ولا ايه؟
يوسف: انا مش هروح غير يوم الحنة . واعمامك هيقوموا بالواجب. وانت كمان لو شايف ان مش وراك شغل مهم ممكن تسافر من النهاردة ع الاقل تكون متابع معاهم وانا اكون مطمن.
فهب وليد واقفا: طب عن اذنك بقا.
يوسف: على فين؟
وليد: ع البلد طبعا.هو انت غيرت رأيك ولا ايه؟
يوسف: لا يا كبير. بس يبقا طمني لما توصل وبلغني بالجديد.
وليد وهو يغادر: اوك يا boss سلام
يوسف: سلام.
وبعد مغادرة وليد قال يوسف محدثا نفسه بصوت عال نسبيا وهويبتسم: ربنا يسعدك يا صاحبي.
في فيلا عبدالرءوف الكامل بالصعيد كانت مريم تقف مع صديقتها حياة في الصالون لاستقبال ضيوفها وهن هادية وزوجتي أخويها وابنتها هدى فقالت مريم وهي تمد يدها لمصافحة هادية : أهلا وسهلا. ازي حضرتك
صافحتهاهادية وهي تدقق النظر اليها من قمة رأسها الى أخمص قدميها وهي تقول لها من بين أسنانها : اهلا بيكي يا بنيتي. نورتي البلد. انا هادية عمة يوسف ودي سعاد مراة أخوي حسين والتانية جميلة مراة أخوي سليمان
صافحت مريم الامرأتان ولم تغادر الابتسامة وجهها ,وعندما وصلت الى هدى بدأت هادية في تقديم ابنتها وهي تقول بتفاخر: ودي بجا بنتي هدى واللي ان شاء الله هتبجا سلفتك.
صافحت مريم الفتاة وقد لمست منها نفس موقف والدتها العدائي وهي تقول بعدم فهم: سلفتي؟!
هادية موضحة: ايوة, اصلها من زمان وهية مكتوبة على اسم ولد خالها وليد, وبعد ما تخلص علامها هنزفهم طوالي.
مريم: اااه. الف مبروك وربنا يتمم بخير.
حاولت جميلة تهدئة الأمور بين الاثنتين فسألت مريم بعد أن عادت من الخارج حيث ذهبت لتطلب لهم بعض المشروبات: الا جوليلي يا بنيتي .هية فين عمتك؟ مش المفروض انها تكون جنبك دلوجيت؟
فردت مريم بتوتر: هية هتوصل ان شاء الله بعد يومين. اصلها مشغولة شوية. وكمان انا معايا حياة مش بتسيبني خالص تقريبا,غير ساعة او اتنين بس عشان تروح تشوف باباها ومامتها.وعمتي بقا ربنا يكون في عونها. أكيد اول ما هتفضي هتيجي.
هادية: صحيح, ع الاجل عمتك مفيش لوم عليها. اللوم كله على الام اللي سايبة بتها اكدة لوحدها يوم فرحها.
ترقرقت الدموع في عيون مريم ولم تستطع الرد,وكالعادة تولت جميلة مهمة تغيير وجهة الحديث فقالت وهي تنظر ناحية حياة: الا جوليلي يا بنيتي ,مش انتي برديك بنت الاستاذ محمود البدري؟
حياة بابتسامة رقيقة: ايوة يا طنط
جميلة: بسم الله ما شاء الله.تبارك الله فيما خلج. والله كبرتي يا حياة وبجيتي عروسة زي الجمر.
حياة باستحياء: متشكرة يا طنط.
لم يعجب هادية طريقة جميلة في تغيير الحديث فأعادت الكرة مرة أخرى في مضايقة مريم وسألتها: وياترى بجا يا مريم انتي طالعة حلوة اكدة لامك.
مريم باحراج: فعلا يا طنط انا فيا شبه كبير أوي من ماما.
هادية بشماتة واضحة: ع العموم يا بنيتي ماهي مش بالحلاوة برديك. انا عرفت ان ابوكي طلج امك بعد جوازهم بتلات سنين. يعني الموضوع ما كنش يستاهل انه يعادي أهله لاجل خاطرها .
مريم بصوت هادىء في محاولة مستميتة لتجنب الشجار معها: ع العموم,دة كان قسمة ونصيب يا طنط, واللي حصل حصل. وما حدش يقدر يغيره.
وقبل ان تبدأ هادية من جديد في محاولة استفزاز مريم قالت سعاد وهي تهم بالوقوف: طب يا بنيتي , نستأذن احنا بجا , ولو احتجتي اي شيء احنا موجودين, انتي خلاص بجيتي مننا وأمرك يهمنا.
هادية بغيظ وهي تنهض بدورها: معلوم, مش هتتجوز زينة شباب عيلة سليم؟
شكرت مريم سعاد وصافحت الجميع وقامت بتوصيلهم حتى البوابة الرئيسية للفيلا, وعندما عادت كانت تغلي من الغضب فلاحظت حياة ذلك ,فحاولت التخفيف عن صديقتها: معلش يا مريم, ما تنسيش بردو ان باباكي الله يرحمه رفض انه يتجوزها وفضل مامتك عليها. فعادي انها تعمل كدة واكتر.
مريم وقد هدأت قليلا: عندك حق. والحمد لله اصلا اني مش هقعد هنا في البلد لاني كل ما بتيجي عيني في عين أي حد هنا بحس فيها بلوم وعتاب صحيح مش ليا بس حتى لو لبابا فأنا مش هقدر أستحملها.
فربتت حياة على كتفها مواسية: ولا يهمك يا قمر . الزمن أكيد هينسي , وخلاص انتي بجوازك من يوسف هتمحي كل اللي فات والناس مش هتفتكر غير انك مراة يوسف جلال اللي صيته في البلد هنا ولا العمدة نفسه.. وبعدين بقولك ايه بقا؟ انا زهقت خلاص من الحبسة دي, واديلي كتير ما شفتش البلد ,فايه رأيك لو نخرج ونتمشى شوية ,صدقيني البلد هتعجبك أوي.
مريم: اوك, وانا موافقة, بس ثواني هستأذن من جدو الاول.
ذهبت مريم الى حجرة المكتب حيث كان جدها يجلس ويقرأ في أحد الكتب سلمت مريم عليه فسألها بقلق: طمنيني يا حبيبتي,عملوا ايه الضيوف معاكي, وبالذات هادية كان ايه رد فعلها لما شافتك, معلش بقا سيبتك تقابليهم لوحدك لان دي عادات وتقاليد احنا مش هنقدر نكسرها.ولو عمتك كانت هنا كانت بقت معاكي في موقف زي دة.
فقالت مريم وقد قررت اخفاء الحقيقة عن جدها حتى لا تزيد من قلقه: ولا يهمك يا جدو, حفيدتك قدها وقدود. والناس بصراحة كانوا كويسين اوي معايا وأنا كمان حبيتهم أوي.
فتنهد عبدالرءوف بارتياح: طب الحمد لله. طمنتيني.
مريم: طب بقا يا سي جدو,أنا كنت جاية عشان استأذنك نخرج أنا وحياة شوية,اهو مننا نغير جو وكمان أتعرف على البلد ,قلت ايه؟
عبدالرءوف بقلق: هتخرجوا لوحدكم؟
مريم: وفيها ايه يا جدو؟ماهي حياة عارفة البلد حتة حتة يعني مش هنتوه.
عبدالرءوف: اوك يا حبيبتي,بس ما تتأخروش.
مريم بسعادة: حاضر يا جدو
وقبلت خد جدها ثم رحلت, وبالفعل خرجت الاثنتان وأخذتا تتجولان في القرية ,وهناك بعض الناس ممن كانوا يتذكرون حياة يحيونهما وبالطبع يبدون مدى اعجابهم بجمال مريم ويندهشون فور علمهم بحقيقتها, ظلتا هكذا لوقت طويل حتى حل المساء وكانتا تتمشيان بمحازاة ترعة محاطة بالاشجار فقالت مريم بتعب: خلااااص يا حياة,انا بجد تعبت وجعت اوي
فقالت حياة موافقة صديقتها: وانا كمان, ياللا بينا نروح.
وهما في طريقهما عائدتين سمعتا صوت منبه سيارة من بجوارهما, فتوجهت أنظار الفتاتين نحوها لتجدا انها سيارة وليد الذي قد أوقفها ونزل منها وبعد ان سلم عليهما, سأل: انتوا رايحين فين؟
فأجابت مريم: حياة كانت بتفرجني ع البلد
توجه نظره الى حياة التي كانت تتجنب نظراته بخجل: بجد؟! وياترى عجبتك؟
مريم بفرحة: اه طبعا,عجبتني جدا, انا اصلا اول مرة ازور الريف وبصراحة عجبتني شكل الخضرة والهدوء وكمان اكتر حاجة عجبتني اد ايه هنا الستات متعاونة جدا مع الرجالة تحس ان فيه نوع خاص من التفاهم بينهم مش موجود في المدينة.
حياة مؤكدة: دة حقيقي يا مريم. اصلا هنا هتلاقي المعنى الحقيقي للتعاون والمساواة بين الرجل والمرأة, كل واحد فيهم عارف واجباته قبل حقوقه وبيقوم بيها على أكمل وجه.
وعندما اختلست النظر الى وليد وجدت عينيه ممتلأة بنظرات الاعجاب مما جعل خداها يحمران خجلا ,في الحقيقة كانت تلك هي المرة الاولى التي يتجاهل فيها أحدهم مريم بجمالها الطاغي لينظر الى فتاة اخرى حتى وان كانت في جمال حياة الشرقي الأخاذ, مما جعل حياة تقول لمريم بضيق: مريم! احنا مش هنمشي بقا؟
فوجهت مريم اعتذارها لوليد: طب معلش بقا يا باشمهندس. عن اذنك عشان مش عاوزين نتأخر.
وليد: طب مانا ممكن أوصلكم بالعربية بدل ما تمشوا كل دة.
فأسرعت حياة بالرفض: لالالالا. مفيش داعي اننا نتعب حضرتك ,وكمان الطريق مش طويل.
وليد: اولا مفيش تعب ولا حاجة. ثانيا ذوقيا انا مش ممكن اسيبكم ترجعوا لوحدكم في الوقت دة. ثالثا بقا ودة الأهم ان مريم هتكون معانا دة لو كنتي يا ستي خايفة مني يعني.
حياة: ارجوك ما تفهمنيش غلط. انا ما كنش قصدي.
وليد: ولا يهمك , حصل خير. ياللا بقا يا ستي عشا ما تتأخروش فعلا.
ركبت الفتاتان في الكرسي الخلفي بالسيارة وتولى وليد بالطبع القيادة ,ظلوا هكذا في صمت الى ان قال وليد ليفتح مجالا للحديث: على فكرة يا مريم. يوسف قالي انه مش هييجي غير يوم الحنة بس انا هنا مكانه, يعني اي حاجة تحتاجيها هتلاقيني في الخدمة.
مريم: متشكرة اوي يا وليد.اكيد طبعا, انت زي اخوية الكبير.
وليد موافقا:طبعا دة شيء يشرفني.وربنا يتمملكم بخير.
مريم: ثانكس. وعقبالك.
نظر وليد الى المرآة أمامه التي كان قد وجهها ناحية حياة منذ ركوبهم السيارة ولكن حياة لم تكن قد لاحظت ذلك ,فقال وليد بسعادة ظاهرة: يارب يا مريم, ادعيلي ترضا عليا.
وقد فهمت مريم ما يرمي اليه ولكنها حاولت الا تبدي ذلك فسألته بابتسامة واسعة بمداعبة: هي مين دي يا عم العاشق؟
وليد بشرود وهو لا يرفع نظره عن المرآة: اللي بالي فيها.
فغمزت مريم لحياة وهي تقول لوليد: طب ما تقولها يا عم مجنون ليلى انت.
بدا على وجه حياة الضيق الشديد حيث بدأت تفهم الحوار بين الاثنين فقال وليد باسلوب جاد بعض الشيء: اكيد هيحصل يا مريم. وفي اسرع وقت ان شاء الله. بس ادعيلي انها توافق.
مريم: ومين المجنونة دي اللي ترفض واحد بيحبها بالشكل دة؟!
وفجأة قالت حياة مقاطعة الحوار في نفاذ صبر وانزعاج: خلاص احنا وصلنا, شكرا يا باشمهندس.
وشكرته مريم هي الاخرى ودعته الى الدخول معهما لمقابلة جدها ولكنه اعتذر وأجل الزيارة لوقت آخر,ثم نزلت هي اولا وخلفها اسرعت حياة الا ان اوقفهما صوت وليد الذي اسرع خلفهما وهو ينادي: آنسة حياة
توقفت الاثنتان وادارتا وجهيهما اليه فقال وليد مترددا وهو ينظر ناحية حياة: ممكن لو سمحتي كلمتين لوحدنا؟
ترددت حياة ولكن مريم أسرعت بالرد نيابة عنها منعا للاحراج: طب , انا هسبقك يا حياة.
ودخلت مريم الفيلا , فبادرت حياة بسؤال وليد وقد بدا الغضب في لهجتها واضحا: نعم؟! ايه الموضوع اللي حضرتك عاوز تكلمني فيه ولوحدنا؟ ومن امتى اصلا وانا بيني وبينك أسرار؟
وليد: طب ممكن تهدي شوية! انا اسف لو كنت سببتلك اي ازعاج بس الحقيقة احنا من اول ما اتقابلنا وانا حاسس انك مش طايقاني ومش عارف ايه السبب. هو انا عملت حاجة تضايقك؟
حياة: حضرتك ما عملتش اي حاجة وانا بتعامل معاك طبيعي جدا , ولو حضرتك شايف غير كدة فيبقا دي مشكلتك انت. وعن اذنك بقا عشان وقفتنا دي ما تنفعش.
ولم تنتظر رده بل أسرعت الى الداخل فقال وليد بتمني: ياريت يا حياة تكون دي الحقيقة فعلا.
جاءت ليلة الزفاف وسط الاغاني والزغاريد وكعادة الصعايدة كان الفرح منفصل العروسة تجلس وحدها مع النساء يصفقن ويرقصن بسعادة وكانت مريم ترتدي فستانا أبيضا طويلا يمتاز بالبساطة والرقة وتزين رأسها طرحة بيضاء اللون ايضا , ولا تضع على وجهها سوى بعض ادوات الزينة البسيطة زادتها جمالا ورونقا جعلت كل العيون مأخوذة بذلك الجمال الذي لم يروا له مثيلا من قبل, وفي الناحية الاخرى وقف يوسف ببدلته السوداء الأنيقة وبجانبه وليد بالخارج مع الرجال وقد كان يحيي الحفل فرقة المزمار والطبل البلدي وهناك من يرقص على الحصان والجميع يهنىء العريس ويدعو له بالسعادة والذرية الصالحة.
أما عبد الرءوف الكهل كان يجلس مع حسين وسليمان وكبار العائلتين في حجرة الضيوف وقد بدا عليهم الانسجام حيث بدأوا يتناسون الخلاف القديم. وبعد مرور وقت طويل همس وليد في أذن أخيه: جرى ايه يا عريس انت ناوي تقضي الليلة معانا ولا ايه؟ مش هتطلع لعروستك؟
فنظر يوسف في ساعته ثم قال لوليد: معاك حق.
وحيا يوسف الجميع بيديه وسط الهتاف وطلقات النيران,ثم صعد الى حجرته ,فطرق الباب وفتحه قبل أن يتلقى أي رد,وعندما دخل وأغلق الباب خلفه أسرعت مريم اليه وارتمت في حضنه وهي ترتعش وقد أصابها الذعر الشديد وهي تلهث من البكاء: يوسف! الحقني يا يوسف, ابعدهم عني.
نظر يوسف الى الاتجاه الذي تشير اليه ليجد عمته هادية وعمتها وردة وكذلك جميلة وسعاد فسألهم بشك وهو يضم مريم اليه بيده اليمنى مهدئا اياها: هوة ايه اللي بيحصل بالظبط؟
فاقتربت منه هادية مما جعل مريم تختبىء خلفه: ولا حاجة يا ولد أخوي, سلامتك.
يوسف: طب بعد اذنكم ممكن تسيبونا لوحدنا؟
هادية بغضب: كيف دة؟! والناس اللي مستنيين تحت عشان يفرحوا وجدها اللي مستني يطمن على شرف بته هنجله ايه عاد؟
فهم يوسف ما تقصده عمته وما جعل مريم تنتفض رعبا بهذا الشكل, ففكر قليلا في كيفيه التصرف في تلك المشكلة ثم قال بهدوء لعمته: طب معلش يا عمتي, اللي انتم عاوزينه دة مش ممكن يحصل.
هادية: انت بتجول ايه يا ولدي؟ انت نسيت عوايدنا ولا ايه؟ولا تكون مش واثج في عروستك.
وهنا تكلمت وردة لأول مرة فصاحت غاضبة بلهجتها الصعيدية التي تحاول تجاهلها عندما تكون في القاهرة: انتي بتجولي ايه يا هادية؟ احنا بتنا أشرف من الشرف.
هادية: ولما هية أشرف من الشرف خايفين ليه عاد؟
يوسف:عمتي! كفاية لحد كدة. انا مش هقبل أي كلمة تاني عن مراتي اللي سمعتها بقت من سمعتي.
هادية بسخرية: مرتك ! اللي اتولدت وعاشت عمرها كله في بلاد الخواجات واطبعت بطبعهم؟
وردة: وبعدين وياكي يا هادية ؟وايه أخرة كلامك الماسخ دة؟
هادية: ولا جبلين يا خيتي.انتم احرار. بس شوفوا بجا هتجولوا للناس ايه عاد.
يوسف: طب لو سمحتوا تنزلوا معايا دلوقت؟
وقبل ان يتحرك يوسف وجد ان مريم متشبثة به ترفض ان تتركه وهي تنظر برعب الى عيني هادية المخيفة فمسح يوسف بحنان على رأسها وهو لا يدري أيغضب من عمته التي تسببت لها بكل ذلك القلق والخوف؟ أم يشكرها لان بسببها وللمرة الاولى ترتمي مريم في حضنه وبارادتها؟ همس يوسف لمريم وهو يحتضن وجهها بكفيه: مريم. ما تخافيش , خمس دقايق مش أكتر وهتلاقيني عندك.
مريم وقد غسلت الدموع وجهها: لا , أرجوك ما تسبنيش لوحدي.
يوسف: مريم . انا لازم انزل عشان احل المشكلة دي, واقولك على حاجة؟ انا هقفل الباب من برة بالمفتاح وهاخد المفتاح في جيبي ,وبكدة محدش هيقدر يدخلك وانا مش موجود. اوك؟
أومأت مريم موافقة ,فقبل يوسف رأسها ,ثم خرج بعد خروج الجميع من الحجرة وكما وعد مريم أغلق الباب بالمفتاح ووضعه بجيبه, نزل يوسف وتوجه الى المضيفة فتعجب الرجال من رؤيته ,ولكنه لم يبال بنظراتهم فنادى لعبدالرءوف و حسين عمه الكبير , خرج الاثنان فبدأ يوسف الحديث موجها كلامه لعبدالرءوف: يا عمي ,بعد اذنك انا شايف ان مفيش داعي للي هيحصل دة طالما انا وحضرتك واثقين في مريم دة غير ان دي اصلا حاجة ما تهمش حد غيرنا.ولا انت ايه رأيك.
عبدالرءوف: والله معاك حق يابني, انا موافق على اي حاجة هتعملها.
حسين: كيف دة؟ دي عوايدنا وتجاليدنا ولا انتم عيشتكوا في مصر خليتكم تنسوا اللي اتربينا عليه؟
يوسف: لا يا عمي احنا ما نسيناش. لكن مش اي حاجة اتعودنا عليها تبقا صح, فيه حاجات غلط ومحتاجة لتصحيح ودي اولهم.
فقال حسين بغضب: انتم احرار . اعملوا اللي على هواكم.
ثم تركهم وذهب فقال عبدالرءوف بامتنان ليوسف: انا متشكر اوي يابني. انت مش عارف انت اد ايه عليت في نظري. بس هنقول ايه للناس دي كلها؟
يوسف: ما تقلقش يا عمي, انا ووليد هنتصرف
وبعد فترة استطاع وليد ويوسف ان يصرفا معظم المدعوين حيث لم يتبقا الى الاقارب فقط الى ان قال وليد ليوسف: خلاص بقا يا بطل. سيبلي انا الباقي وروح انت لعروستك.
يوسف وقد بدا عليه الارهاق: تسلم يا وليد.نتعبلك في فرحك ان شاء الله.
وليد: ماشي يا عمنا, طب اتفضل بقا من غير مطرود احسن اقول انك بتتهرب من العروسة ولا حاجة.
يوسف: ما تحترم نفسك ياد.
وليد: ماشي يا كبير
يوسف: طب تصبح على خير
وليد: وانت من أهله يا صاحبي. وصباحية مباركة مقدما ان شاء الله.
يوسف: الله يبارك فيك.
وفعلا دخل يوسف المنزل وترك وليد ليتصرف بنفسه , فنظر ذلك الاخير من بعيد ليلمح حياة تقف وحدها , فتخيل انه يحلم ولكنها كانت هي بالفعل,فتوجه اليها,وعندما رأته حياة رسمت ابتسامة على شفتيها وهي تقول: ألف مبروك يا باشمهندس وعقبالك.
وقبل ان ينتبه لكلامه وجد نفسه يقول: انا وانتي في ليلة واحدة ان شاء الله, وعندما وجد التغير في ملامحها حيث عاد مرة اخرى اليها الضيق والحزن,فقرر ان يغير الموضوع فسألها: انتي واقفة كدة ليه؟
حياة: مستنية بابا اصل بعت كريم اخوية عشان يناديله ومش عارفة اتأخروا ليه؟ خلاص دول جايين هناك اهو.
انتظرهما وليد مع حياة وكان بصحبتهما شخصا اخر يرتدي قميصا وبنطلونا وعندما اقترب الثلاثة منهما قال محمود لوليد وهو يمد يده لمصافحة وليد: الف مبروك يا باشمهندس. وعقبالك.
وليد وهو يصافحه: الله يبارك فيك يا استاذ محمود. وعقبال الانسة حياة.
ثم استطرد كلامه وكأنه تذكر شيئا اخر: وطبعا كريم.
ثم تولى محمود مهمة التعريف بذلك الغريب: دة بقا يا باشمهندس علاء ابن اخويا خريج السنادي هو باشمهندس بردو بس تخصص هندسة ماكينات.الحقيقة انا كنت عاوز اتوسطله عند الباشمهندس يوسف عشان يشغله في الشركة.
فسلم وليد على علاء وهو يقول: انت شايف ان يوسف مش هيكون فاضي اليومين دول يبقا قدملي انا الورق وان شاء الله خير.
وهنا نظر علاء الى حياة ومد لها يده وهو يقول مبتسما: مش معقول! حياة! ازيك .وحشاني يابنت عمي.
فمدت له حياة يدها وقد شعرت بنظرات وليد مسلطة عليهما كادت ان تحرقهما معا.
فتح يوسف الباب بالمفتاح ليجد مريم مختبئة خلف أحد الكراسي كالطفلة التي تهرب من شرب اللبن ,وعندما اطمئنت بدخول يوسف خرجت من مخبئها وكان القلق يعلو ملامحها وهي تنظر ناحية باب الحجرة المغلق فطمئنها يوسف قائلا: ما تخافيش. خلاص الموضوع انتهى.
بدأ الارتياح يتسلل الى ملامحها فقالت له: متشكرة. متشكرة اوي ليك يا يوسف.
فاقترب منها يوسف بخطى ثابتة وهو يقول: متشكرة على ايه؟ انتي خلاص بقيتي مراتي. وحمايتك بقت مسئوليتي. ومفيش حد في الدنيا كلها دي هيقدر يمس شعرة منك طالما انا لسة عى قيد الحياة

الحلقة العاشرة

*ملاك أم شيطان*
فاقترب منها يوسف بخطى ثابتة وهو يقول: متشكرة على ايه؟ انتي خلاص بقيتي مراتي. وحمايتك بقت مسئوليتي. ومفيش حد في الدنيا دي كلها هيقدر يمس شعرة منك طالما انا لسة على قيد الحياة.
لم تستطع مريم الرد بل اكتفت بالنظر ناحية الأرض أما يوسف فقد وقف لحظات يتأمل مريم بملامحها الطفولية الجميلة والتي تمتاز بالبراءة جعلته يشك في أن مثل هذه الشابة قد قضت ولو يوم واحد في بلاد الغرب. ودون أن يشعر وجد نفسه يقترب منها أكثر حتى لم يعد يفصلهما سوى سنتيمترات قليلة, ثم رفع يده ليلمس خدها الناعم,فأجفلت مريم للمسته وجعلها ذلك تتراجع الى الخلف ينتابها بعض الخوف و التوتر,بدا على يوسف وكأنه متفهما لردة فعلها في البداية ولكن عندما تكرر الموقف جعله ذلك يشك في الأمر, فسألها: فيه ايه يا مريم؟ مالك؟
فسألته مريم بخوف: مالي؟
يوسف موضحا: يعني شايف اني كل ما بقرب منك بتبعدي.
تحولت نبرة مريم من الخوف الى العداء ووجهت نظراتها الى عيني يوسف مباشرة: وانت تقربلي ليه؟ وبصفتك ايه أصلا؟
فاجأه السؤال, ولكن ليس يوسف جلال هو من يقبل أن تشعر أي امرأة بعجزه أو بأنها قد تغلبت عليه فأجابه بثبات وبعيون جامدة: بصفتي اني بقيت جوزك والمفروض ان دي ليلة دخلتنا.
مريم: دة عشم ابليس بالجنة زي ما بتقولوا عندكم.
يوسف مستوضحا: قصدك ايه؟
مريم: يعني انت عمرك ما هتكون جوزي ولا انا عمري هبقا ليك.
بدا يوسف وكأنه قد تلقى منها صفعة قوية, فلم يستطع هذه المرة أن يتمالك أعصابه او ان يتجاهل نوبة الغضب الشديدة التي قد اجتاحته فجذبها بشدة من ذراعها وكادت أن تلتصق به وهي تصرخ من الألم, ثم قال لها وهو يجز على أسنانه: انتي فاهمة كويس معنى كلامك دة ايه؟ اوعي تكوني فاكرة ان حركة الشهامة اللي عملتها معاكي من نص ساعة هتخليني اتساهل معاكي.
لم ترد مريم أن تظهر لها الخوف الذي شعرت به فقالت له متحدية: اوعى انت اللي تكون فاكر ان عشان خاطر اللي عملته معايا اني هخضعلك وهسلملك نفسي بسهولة.
فهزها يوسف بعنف وهو يقول: انتي بتقولي ايه؟ انتي مراتي. فاهمة يعني ايه مراتي؟!
مريم وهي تتجاهل آلامها: انت اللي اظاهر عليك نسيت اني اصلا اتجوزتك غصب عني. والجواز اللي بالاكراه زي جوازنا دة كأن لم يكن.
يوسف صائحا بغضب: والمأذون؟ والشهود؟ وعقد الجواز؟
مريم: باطل. طالما كان غصب عني.
يوسف: مريم! انتي كنتي تقدري تقولي لا.
مريم: انت كنت عارف اني ما كنتش اقدر. لأن حياة جدي تقريبا كانت متوقفة على موافقتي.
فقال يوسف والشرر يتطاير من عينيه وهو ينظر اليها: انا كل اللي أعرفه دلوقت انك مراتي. وان ليا حقوق عليكي .
مريم وقد زاد الخوف بداخلها ولكنها ما زالت تنجح في اخفائه: بالغصب يا يوسف؟ هتاخدني غصب عني؟ دة لا هيحصل ولا هيكون.
فرد يوسف وقد ضاقت عيناه وهدأ صوته على نحو خطير وهو يمسحها من أعلى لأسفل بنظراته الغاضبة: لسة ما اتخلقش لحد دلوقت اللي يقدر يقف بين يوسف جلال وبين حاجة هو عاوزها. لكن للأسف يا مريم انتي طلعتي محظوظة لأن انا اللي دلوقت بقيت مش عاوزك.
ثم رماها فجأة للأمام مما جعل توازنها يختل وكادت ان تسقط على الأرض لولا انها تمسكت بمسند أقرب كرسي لها وقد انهارت عينيها وسقط منهما شلالا من الدموع.
وسمعت مريم صوته وهو يدير لها ظهره ولكنها استطاعت ان تكتشف مدى القوة التي يبذلها للتحكم في نفسه وليخرج صوته هادئا طبيعيا بتلك الطريقة المذهلة: صدقيني يا مريم ,لا انتي ولا ابوكي تستحقوا مني اي شعور بالاحترام أو التقدير, ولولا جدك عبدالرءوف اللي انا مدينله بالكتير كان زماني رميت عليكي يمين الطلاق وطردتك في ساعة زي دي أدام كل الناس, لكن انا كل خوفي على الراجل المريض اللي مش هيقدر يستحمل فضيحة زي دي بعد اللي عمله أبوكي.
وفجأة نظر لها مجددا وكانت مريم تجلس على الكرسي وقد شحب وجهها كثيرا والذي اغتسل بالدموع و بدا ان جسمها ينتفض قليلا ولكن ذلك كله لم يؤثر فيه فاستطرد حديثه وهو ينظر لها بجمود وأخذ يلقي بأوامره وكأنه قائدا بأحد الفرق العسكرية وهي أحد الجنود: اعملي حسابك, احنا أدام الناس اتنين متجوزين وهنتعامل على الأساس دة لحد ما نطمن على صحة جدك وبعد كدة هنطلق وكل واحد فينا يرجع لحياته الطبيعية . و كمان جهزي نفسك لأننا هنرجع القاهرة بكرة. انا كنت عامل حسابي اننا هنسافر اسبوعين لبنان لكن خلاص هلغي السفر لان ما بقاش فيه داعي. اتفضلي قومي اغسلي وشك وغيري هدومك في الحمام عشان تنامي. و كمان مش من مصلحتك ان حد يحس انك كنتي معيطة.
وجدها لم تحرك ساكنا فصاح بها غاضبا: اسمعي الكلام يا مريم و بلاش تستفذيني, ياللا قومي اعملي اللي قلتلك عليه.
اسرعت مريم وأخذت بعض الثياب من خزينة الملابس ثم دخلت الحمام الخاص بالحجرة, وقفت مريم لبعض الوقت تستعيد كل ما حدث بينها وبين يوسف وتتخيل حياتها معه في الفترة القادمة, وترتب كيف ستتحمل ذلك الوقت بقربه وقد أصبح يحمل لها كل هذا القدر من الغضب والكره لها؟
ثم غسلت وجهها ولكنها لم تستطع ان تخفي كل اثار البكاء من عينيها,وغيرت ثياب العرس بمنامة قد اختارتها طويلة وردية اللون وارتدت فوقها روبا حريريا بنفس اللون وقد ترددت قليلا في ان ترتدي الطرحة أم تترك شعرها منسابا هكذا على كتفيها لتكون المرة الأولى التي تجعله يرى شعرها بلونه المتوهج اللامع ولكنها قد حسمت أمرها أخيرا وارتدت الطرحة وخرجت لتجد أنه قد بدل ثيابه هو الأخر وارتدى بيجاما حريرية بنية اللون بها خطوط صفراء رفيعة, وكان يتمدد بجسمه الطويل على الأريكة فعلمت مريم أنه قد قرر أن يترك لها السرير لتنام عليه, نظر لها نظرة سريعة لم تتبين مريم أي تعبير فيها,ثم أعاد عينيه مرة أخرى ناظرا الى السقف. توجهت مريم الى السرير وكانت تتوقع أن يجافيها النوم , ولكن عكس ما توقعت تماما ففور أن وضعت رأسها على الوسادة غاصت في نوم عميق.
*****************************************************************
:مريم !مريم !ياللا قومي
في البداية ظنت مريم أنها تحلم , ولكنها أيقنت أنه لم يكن حلما بل كان يوسف نفسه يقف بجوار السرير ويهزها برفق لتستيقظ, فسألته وهي ما تزال بين النوم واليقظة: فيه ايه؟
يوسف: فيه انك لازم تقومي دلوقت عشان تستقبلي الحريم اللي برة وجايين يباركولك.
قال كلمته الأخيرة بنبرة ساخرة أدركتها مريم وقد استيقظت تماما لتسمع صوت طرقات على الباب يصاحبها نداء متكرر: افتح يا عريس
وكذلك أصوات زغاريد تملأ المكان, قالت مريم ليوسف وهي تنهض من السرير: صباح الخير.
تجاهل يوسف التحية وقال لها بلهجة صارمة لا تقبل الجدال: ادخلي الحمام واغسلي وشك عشان تفوقي وانا هفتح الباب.
نفذت مريم ما قاله بصمت وتوجهت ناحية الحمام بينما ذهب هو ليفتح الباب فوجد عمته وعمتها وكذلك سعاد وجميلة اللتان كانتا تحملان صنيتي بهما أنواع مختلفة من الطعام الفلاحي, وفور أن رأته عمته أخذته في حضنها بسعادة وقبلته وهي تقول: مبروك يا ولد أخوي وصباحية مباركة
فرد يوسف والذي استطاع بسهولة أن يرسم معالم الفرح والسرور على وجهه: الله يباركك فيكي يا عمتي
ثم سلم على الأخريات ورد على التهاني بابتسامة واسعة,فسألته وردة: أمال وينها مريم؟
يوسف: مريم في الحمام
ولم ينه يوسف جملته حتى رأوا مريم تخرج من الحمام وعلى وجهها ابتسامة جاهدت كثيرا لتظهرها لهم, ثم سلمت عليهن واحتضنتها كل واحدة على حدة , وبعد أن جلس الجميع في أحد أركان الحجرة وقد كان يشبه حجرة الصالون خاصة بسبب بعده النسبي عن السرير. قال يوسف وقد تعمد أن يجلس بجوار مريم ملاصقا لها: بس ايه يا جماعة كل الأكل دة؟ مين هياكله؟
وردة: مش فطار عرايس يا ولدي؟
وكانت النظرة التي وجه يوسف ناحية مريم تحمل الكثير من السخرية واللوم جعلت مريم تبعد نظرها عنه وتسأل عمتها: وجدو يا عمتي عامل ايه دلوقت؟
وردة: والله يا بنيتي جدك سافر.
مريم: سافر! وبسرعة كدة! وكمان من غير ما يقولي!
وردة: والله يا بنيتي مانا عارفة. هو احواله اليومين دول ما تسرش واصل. و وليد أخو جوزك عدى علينا الصبح بكير فجدك ركب وياه وسافروا اتنيناتهم. وجال انه سابلي السواج عشان يوصلني بعد ما اطمن عليكي وأعاود.
مريم: غريبة أوي
ثم نظرت الى يوسف مستفسرة وهي تسأل: ايه اللي خلى جدو يسافر مع وليد؟ انت تعرف حاجة عن الموضوع دة؟
فرد يوسف وهو يضع ذراعه حول كتف مريم التي حاولت التخلص منها بطريقة لا تلفت نظر الآخرين. ولكنه شدد قبضته على ذراعها بشكل آلمها وجعلها تتوقف عن المحاولة: يمكن يا حبيبتي فيه حاجة مستعجلة في الشركة وبما ان وليد هو اللي مكاني دلوقت فأكيد جدك اتصل بيه واتفقوا انهم يسافروا مع بعض. ما تقلقيش نفسك انتي بس.
ثم وجه نظره ناحية هادية واستطرد حديثه: آه صحيح يا عمتي. انا ومريم هنسافر النهاردة.
هادية باستنكار: كيف يا ولدي؟ انتو ع الاجل لازم تجعدوا ويانا يوم ولا تنين. انا واعمامك ملحجناش نجعد وياك ولا نشبع منيك.
يوسف: معلش بقا يا عمتي . انا كنت دبرت أموري اننا نسافر بكرة لبنان ولازم نكون النهاردة في القاهرة.وبعد ما نرجع ان شاء الله هنحاول نيجي يومين هنا.عشان تشبعوا مننا زي مانتو عاوزين.
هادية دون اقتناع: اللي تشوفوا يا ولد أخوي
فنهضت وردة وهي تقول: طيب. نسيبكم بجا عشان تفطروا وحديكم, ياللا بينا ياهادية.
فنهضت هادية وقد سبقتها كل من جميلة وسعاد واتجهوا ناحية الباب وفي اثرهم يوسف الذي قال: طب ما تقعدوا تفطروا معانا يا جماعة.
هادية: تسلم يا ولد الغالي.
وردة: ودي تيجي يا عريس؟ بس خلي بالك من مريم.
يوسف بنبرة لم تشك وردة في صدقها: مريم في عنيا.
وردة: تسلم عيونك يا حبيبي.
وبالفعل غادر الجميع وعاد يوسف ليجد مريم تقوم بترتيب ثيابهما في الحقائب فقال لها: تعالي افطري الاول ويبقا كملي اللي بتعمليه.
فقالت مريم دون أن تنظر ناحيته: متشكرة, انا مش جعانة.
فأسرع يوسف وانتزع منها الثوب الذي كان في يدها وألقاه على السرير فصدمت مريم وسألته: ايه اللي انت بتعمله دة؟
فأمسكها يوسف من معصمها بقبضة حديديه وسحبها خلفه وهي تئن من الألم محاولة الافلات من قبضته دون فائدة الى أن ألقاها على أحد الكراسي أمام الطعام ثم قال لها آمرا: اتفضلي كلي.
مريم بتحدي: قلتلك مش جعانة. هو بالعافية يا أخي؟
يوسف: أه. بالعافية. ومن هنا ورايح يا مريم وطول مانتي في عصمتي اتعودي ان كلمتي هي اللي هتمشي برضاكي أو غصب عنك., والا أقسم بالله لهوريكي النجوم في عز الضهر ومش بعيد اني أمد ايدي عليكي وهتكون دي أول مرة أمد ايدي على واحدة ست. اتفضلي كلي.
رأت مريم أن لا فائدة من الجدال معه, فيبدو أنه مستعد لتنفيذ كل كلمة قالها مما جعل الخوف يتسلل بداخلها ولتتجنب بطشه بدأت بتناول الطعام, ثم جلس يوسف على الكرسي المقابل ليتناول طعامه هو الآخر.
_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
كان وليد يقف في الفيلا يضع سماعة الهاتف على اذنه ويقول: أه, باسم وليد جلال…….أيوة هو ….أوك, وانا كلها ساعة بالكتير وأبقا عندكم. متشكر.
ثم أعاد السماعة مكانها, ونظر الى ذلك الخادم الذي كان ينزل السلم ويحمل حقيبة ثياب كبيرة, فقال له: بسرعة يا محمد, ويبقا حطها في شنطة العربية.
محمد: حاضر يا سعادة البيه.
ثم فجأة وجد باب الفيلا يُفتح ليدخل كل من مريم ويوسف, وبعد أن استوعب وليد المفاجأة أسرع ناحية يوسف ليحتضنه وهو يهتف بسعادة: معقول! أهلا بالعرسان , أمسية مباركة يا صاحبي, معلش بقا مانا ماحضرتش الصباحية.
يوسف: الله يبارك فيك يا حبيبي عقبالك.
ثم قال وليد لمريم: ألف حمدالله ع السلامة يا عروسة.بس ايه اللي رجعكم بدري كدة؟! اوعى يكون الواد دة زعلك, قوليلي وانا أخدلك حقك على طول انا صحيح أخوه الصغير بس بقيت في نفس الوقت أخوكي الكبير.
فوكزه يوسف بلطف وهو يقول له مداعبا: ما تبطل غلبة بقا يا عم المصلح الاجتماعي, تبسمت مريم وهي تقول ردا على كلام وليد: لا يا سيدي هو مش زعلني ولا حاجة.
وليد: أمال؟
يوسف: ابدا. مانت عارف أخوك ما يقدرش يبعد عن شغله اكتر من يومين.
وليد: اما انت بارد صحيح. طب والغلبانة دي ذنبها ايه. مش ليها حق في شهر عسل زي كل مخاليق ربنا؟!
فأسرعت مريم لتقول: لا. ماهو انا كمان هبقا مشغولة بالانشطة الصيفية اللي هتعملها الأسرة اللي انا عضوة فيها.
فضرب وليد كفا على كف وهو يقول مداعبا: والله انتوا عالم مجانين صحيح. يعني انا معقول اتجوز ومش أقضي شهر عسل ويكون كمان تلاتين يوم بالكمال والتمام وانشالله حتى تنطبق السما على الأرض!
يوسف مازحا: طب لما نشوف يا سيدي. بكرة نقعد جنب الحيط.
فأتم وليد المثل بفكاهة: وهتسمع أحلى زيطة كمان.
ونظر يوسف الى محمد الذي كان يقف بالقرب منهم وبجواره الحقيبة وقال له: ازيك يا محمد. عامل ايه؟
محمد: الله يسلمك يا يوسف بيه. والف حمدالله ع السلامة ومبرك لسعادتك انت والست هانم وربنا يرزقكم بالخلف الصالح ان شاء الله.
يوسف: متشكر يا محمد عقبال أولادك.
وعندما لمح يوسف الحقيبة سأله: شنطة مين دي؟
فتولى وليد الاجابة: دي شنطتي أنا.
يوسف: شنطتك! انت مسافر ولا ايه؟
وليد: لا يا سيدي مسافر ايه.. انا بس هروح اقعدلي يومين في الاوتيل لحد ما شقتي تجهز.
يوسف بعدم فهم: اوتيل؟ وشقتك؟ يعني ايه ؟ مش فاهم, انت هتسيب الفيلا ولا ايه؟
وليد: ايوة يا سيدي.
يوسف: ليه؟
وليد:هو ايه اللي ليه ؟ انت نسيت انك خلاص بقيت راجل متجوز ؟ يعني بقت ليك حياتك الخاصة انت ومراتك اللي ما ينفعش ان أي حد تاني يشارككم فيها.
يوسف: بس ما وصلتش انك تقعد في اوتيل.
وليد: مانا ما هبقاش مقيم فيه على طول يا عم يوسف. انا أصلي أخدت شقة في برج من بتوعنا ومستنيها لحد ما تتفرش وبعدين هنقل فيها.
يوسف بحزم: خلاص يبقا هتفضل معانا في الفيلا لحد ما شقتك تتفرش.
وكان وليد على وشك ان يبدي اعتراضه فأشار له يوسف وهو يقول: خلاص, انا مش هقبل ولا كلمة تاني.
ثم أمر محمد: وانت يا محمد رجع الشنطة دي مكانها.
محمد: أمرك يا يوسف بيه.
وهنا نظرت مريم تجاه الهاتف وقالت: انا هتصل بجدو واطمن عليه.
واتجهت ناحية الهاتف فأوقفها صوت يوسف: استني يا مريم
فأدرات مريم وجهها اليه تسأله : فيه ايه يا يوسف؟ انا هطمن عليه بس, وهو اكيد لسة صاحي.
عندما لم يأتيها رد من يوسف ووجدته يتبادل النظرات مع وليد بدأ القلق يتسلل الى قلبها فسألتهم: هو فيه ايه؟ جدو ماله؟
يوسف: اطمني .جدك بخير بس هو مسافر.
مريم: مسافر! فين؟ وليه؟
يوسف: مسافر ألمانيا عشان يعمل العملية.
قلق, خوف,ضياع, احساس بعدم الأمان ,كل ذلك لا يستطيع أن يصف ما شعرت به مريم فور سماعها ذلك الخبر, ثم توجهت بعينيها المليئة بنظرات الاتهام الى يوسف وهي تشير ناحيته باصبعها: انت كل عارف كل دة . كنت عارف وخبيت عليا. ليه يا يوسف؟ كان من حقي أعرف.
علم يوسف أنها على وشك الانهيار فأسرع لها وأخذها في حضنه يهدئها: مريم! جدك هو اللي كان عاوز كدة, هو اصلا اختار الوقت دة بالذات عشان كان فاكر انك هتبقي مشغولة وممكن ما تلاحظيش غيابه.
بدا ان مريم لم تستوعب ما قاله يوسف بل أخذت تردد: انا عاوزة اروحله. وديني ليه يا يوسف. أبوس ايدك وديني ليه .عشان خاطري.لا بلاش عشان خاطري, طب وغلاوة جدي عندك وديني ليه.
يوسف: اهدي يا مريم , أرجوكي اهدي. هو بخير وكمان معاه فريق كامل من الدكاترة على أعلى مستوى هيهتموا بيه لحد ما يرجع بالسلامة.
مريم: انا مش ههدى غير لما أشوفه بنفسي.وديني ليه. او سيبني انا اروح لوحدي, ارجوك يا يوسف انا مابقاش ليا غيره في الدنيا.
يوسف: هو أكد عليا اني مش اسمحلك تروحيله , بس انا هتصلك بيه وأخليكي تطمني عليه بنفسك.
مريم بلهفة وتوسل وهي لا تستطيع أن توقف دموعها: طب دلوقت ,ارجوك اتصل بيه دلوقت.
يوسف: حاضر, هتصل بيه. وليد!
وعلى الفور أسرع وليد ناحية الهاتف ورفع السماعة ثم بدأ يضغط على بعض أزراره.
_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
في فيلا كمال وهدان تكرر نفس المشهد الحزين ولكن بشكل آخر حيث انهارت وردة على الاريكة وهي تضرب بيدها على صدرها: بابا! يا حبيبي يا بابا
ثم توجهت قائلة لابنها وزوجها اللذان كانا يقفان أمامها: طب ازاي محدش يقولي؟ وانتوا كنتم فين؟
فقال كمال بجمود: احنا نفسنا عرفنا بالصدفة, وهو من امتى اصلا و عبدالرءوف الكامل بيدي سره لحد غير سي يوسف اللي مش عارف طلعلنا منين؟
فنهضت وردة لتقول لماهر: طب ياللا يا ماهر بسرعة وديني لجدك ,انا لازم ابقا معاه في ظرف زي دة.
ماهر: هتروحي بس فين يا ماما؟ هو احنا اصلا نعرف هو في أي مستشفى؟
فصاحت به وردة في غضب: معرفش اتصرف واعرفلي جدك فين؟
ماهر: طب اهدي بس وخلينا نشوف هنتصرف ازاي؟
وردة: انتو لسة هتشوفوا؟
فأحاطها ماهر بذراعيه وهو يحاول تهدئتها: طب اهدي بس . واطلعي اوضتك استريحي شوية. وسيبينا احنا هنتصرف.
لم تستطع أن تجادله وردة ,بل انها أطاعت كلامه على الفور وتوجهت ناحية السلم لتصعد الى غرفتها.
وعندما تأكد من صعودها توجه الى والده وسأله وعينيه مليئة بالشر: قولي بقا يا بوب هنعمل ايه؟
كمال مبتسما بطريقة شيطانية: هنعمل كتير, خلاص الساحة بقت فاضية قدامنا بعد سفر عبدالرءوف ومين عارف مش ممكن ما يرجعش تاني وتبقا كل حاجة بين ادينا ومريم بقا تشرب من البحر.
ماهر: ويوسف يطلع نأبه على شونة . ويشبع بقا بيها.
_ _ _ _ _ _ _ _ _ _ _ _ _ _ _ _ _ _ _ _ _ _ _
كانت مريم تجلس على الأريكة تتكلم عبر الهاتف وبجوارها يجلس يوسف ومن الناحية الأخرى يقف وليد.
مريم: يعني انت بجد بخير يا جدو؟….طب وهتعمل العملية امتى؟…..بعد اسبوع؟…..طيب انا عاوزة أجيلك…..يا جدو عروسة ايه بس؟…..انا عاوزة أطمن عليك….خلاص ماشي يا جدو اللي تشوفه بس هبقا اتصل بيك كل يوم…..يوسف؟!
وتوجهت عيناها ناحية يوسف وكعادتها فشلت في قراءة تعابير وجهه وأكملت محدثة جدها: اه يا جدو, الحمد لله سعيدة جدا بس انت يا حبيبي ما تفكرش دلوقت غير في نفسك….جدو! ارجعلي بسرعة انت عارف اني مش هقدر أعيش من غيرك……ماشي يا حبيبي هسلملك عليه……اوك مع السلامة.
أنهت مريم المكالمة فقال لها وليد: خلاص يا ستي اطمنتي بنفسك انه الحمد لله بخير.
مريم بتنهيدة ارتياح: الحمد لله
ثم توجهت الى يوسف لتقول له: جدو بيسلم عليك
لم يجب يوسف بل اكتفى بايماءة صغيرة من رأسه
ثم قال وليد: وانت يا عم يوسف ياللا خد مراتك واطلعوا اوضتكم أكيد بعد السفر الطويل دة والارهاق النفسي اللي عشتوه يبقا لازم تكونوا ميتين من التعب.
يوسف: معاك حق, وكمان انا هيبقا عندي شغل بدري.
وليد مستنكرا: شغل ايه يا عم يوسف اللي هيبقا بدري بس؟ طب خدلك يومين او تلاتة تاني اجازة.
يوسف: ما ينفعش, كفاية كدة.
كان وليد يعلم ان قرارات يوسف غير قابلة التعديل فتوقف عن الجدال ولكنه اكتفى ان قال بمزاح: الله يكون في عونك يا مريم.
نهض يوسف وهو يمد يده لمريم ويقول لها: ياللا بينا يا مريم.
ترددت مريم قليلا ولكنها أمام نظرات وليد اضطرت الى ان تمد له يدها ليساعدها على النهوض وسمحت له بأن يضع يده حول كتفيها وهويقودها ناحية السلم ويقول لوليد: تصبح على خير يا وليد.
وليد: وانتو من أهل الخير.
وفور صعودهما السلم أنزل يوسف ذراعه من عليها بل انه تقدمها بخطوات واسعة ناحية الغرفة التي يفترض ان تكون غرفتهما معا, دخل الغرفة ومن بعده مريم التي استطاعت ولو في سرها ان تشهد لبراعة الشخص الذي ظهر ذوقه الرفيع في اختيار أثاث الغرفة , ولكن عندما وقع نظرها على السرير الوحيد الذي بالحجرة مما جعلها تفكر في المشكلة الجديدة التي سيواجهانها, فمن غير المعقول أن يستمر يوسف في النوم على تلك الأريكة طوال فترة بقائهما معا, أم انه سيجبرها هي على النوم على تلك الأريكة؟ وسيكون له كل الحق لانها سبب تلك المشكلة, أم ماذا سيقرر صاحب الكلمة الأخيرة؟
وكأنه يقرأ أفكارها سمعته يقول من خلفها: اطمني يا انسة مريم مش انا الراجل اللي ممكن يسيب واحدة ست تعاني بسببه حتى لو كان بيتمنى ان دة يحصل من كل قلبه.
مريم مستفهمة: ماهو مش معقول بردو انك هتفضل تنام على الكنبة على طول. اكيد هتتعب.
يوسف ساخرا: ايه؟ خايفة عليا؟
لم تجب مريم مما جعل يوسف يستمر في كلامه وهو يتجه ناحية باب أخر في الغرفة: ع العموم ما تخافيش, دة باب الاوضة اللي جنبنا , انا هنام فيها.
فأسرعت مريم تقول: طب ما ممكن انا……..
ولكنها قطعت جملتها فور رؤية نظرته اللاهبة وكأنها تذكرها بأنه لن يقبل منها أي اعتراض على أوامره كما أخبرها سابقا.
مريم باستسلام: خلاص اللي تشوفه.
يوسف وهو يخرج بعض الثياب من خزانة الملابس: ع العموم زي ما قلتلك دي هتبقا اوضتك وخدي راحتك فيها بس المشكلة الوحيدة ان الاوضة التانية مفيهاش حمام عشان كدة هبقا استعمل الحمام اللي هنا.
وقبل ان ينتظر منها اي رد قال لها: تصبحي على خير
ثم دخل الغرفة الثانية وأغلق الباب خلفه تاركا مريم وحدها محاولة تحليل تصرفات ذلك الرجل الغامض الذي لم يستطع عقلها الصغير الوصول لماهيته حتى الان, فأوقات يبدو لها كأنه ملاك أنزل من السماء فقط لحمايتها وتلبية رغباتها , ومن ناحية أخرى تجده شيطانا لا يرغب سوى بايلامها وتعذيبها لسبب تجهله
فياترى من يكون يوسف جلال في تلك الشخصيتين؟

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: رحاب حلمي

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى