مسلسل أم فتحي الحلقة الثانية

2

الحلقة الثانية

والله يا عمي ان شاء الله هاسكن مع والدتي

اييييييييييييييييييييييييييييييييه ؟؟؟؟؟

 

بس انت فاجئتنا يابني


يا عمي اصل بعد جواز اخواتي والدتي قاعدة لوحدها وماينفعش اسيبها

ايه رأيك يا ام مروة

بصراحة انا مش موافقة ان بنتي تعيش مع حماتها

احسن برضو .

ليه بس كدة يا طنط . دي حتى والدتي ست طيبة ولسانها بينقط سكر زي ماحضرتك شايفة

قوللها يابني . ولا يمكن مش باين علية الطيبة وحنية القلب

لالا ياست ام فتحي ماتقوليش كدة . ام مروة ماتقصدش

ولا تقصد ياخويا

ياطنط اؤكد لحضرتك اني هشيل مروة في عنية وامي هتكون ام تانية ليها ان شاء الله

والله يابني مش عارفة اقولك ايه

خلاص يا فتحي ياضنايا ماتضغطش عليهم هما مش موافقين يلا نمشي

ياامي اقعدي اقعدي ابوس ايدك بنتفاهم مع الناس

طيب ياحبيبي اديني قعدت

خلاص يابني هنفكر ونرد عليك

طيب ياعمي هترد امتى

ياواد مدلوق عليهم الدلقة السودة دي ليه . ان شالله ماردو

ياامي ياامي

خلاص سكت اهو

ان شاء الله يابني يومين واتصل بيك ابلغك بالرد

اتمنى ياعمي يكون الرد بالموافقة

ان شاء الله ياابني

طيب نستأذن احنا

اتفضلوا

 ___________________


ياحفيظ يارب . اعوذ بالله من ده مشوار . ركبي بتنأح عليا

ماقولتليش يا امي ايه رأيك في العروسة

ماعجبتنيش

ليه بس يا امي

بت نشفانة كدة ومعرقبة وكارتة

وعرفتي منين بس يا امي انها كارتة وهي قابلتنا بالحجاب وماشوفتيش شعرها

قلبي حاسس انها كارتة وانا قلبي دليلي

على العموم ياامي كفاية اخلاقها العالية

عالية في الدور الكام ياخويا

طيب ايه رأيك في اهلها

ماعجبونيش خالص خالص وخصوصا امها

مالها بس امها

عاملة فيها نوغة وبنت اربعتاشر ولابسة عباية حمرا . عيب عليها عيب تلبس احمر المفروض تحترم سنها

لا اله الا الله . كان لازم اتوقع انك هتطلعي فيهم القطط الفاطسة . على العموم انا مقتنع بيها وبأهلها

اشربهم ياخويا اشربهم

ايوا يا استاذ فتحي

ايوا ياعمي خير طمني

احنا موافقين يابني على خطوبتك من مروة

ياااااااااااااااااااه ياعمي فرحت قلبي ربنا يخليك

هات اسرتك الكريمة وتعالوا شرفونا الخميس الجاي عشان نتفق على التفاصيل

ان شاء الله يا عمي

مع السلامة ياابني

الله يسلمك يا عمي

الحمدلله ياااااااااااااااااااااااااااااااااااه

يا امي يا امي يا امي

ايه يا واد في ايه

ابو مروة وافق

يادي النيلة . وافق ليه . دا ايه الآذية دي

حضري نفسك يوم الخميس وانا هتصل باخواتي واعمامي عشان يحضروا الاتفاق

اووووووووووووووف

ياامي افرحيلي نفسي اشوف الفرحة في عنيكي

مبروك

الله يبارك فيكي يا حبيبتي

اما اروح اتصل بخالتك اقولها . مش عارفة هودي وشي منها فين

__________________

تررررررررررررررررررن ترررررررررررررررررررن

الوو ………………..


نعم نعم نعم يعني ايه ابنك خطب يا مديحة

نعمل ايه بس يا سهير يختي النصيب

يعني ايه نصيب يا مديحة . انتي مش وعدتيني انك هتاخدي نسمة لفتحي

يختي والله ده كان منى عيني . بس نعمل ايه في شباب الايام دي

انا غلطانة اني رفضت التلات عرسان اللي جم لنسمة الاسبوع اللي فات عشان خاطر ابنك

يختي بلاش فشر انتي كمان . تلات عرسان ايه اللي هيعبروا بنتك . انا كنت هاخدها شفقة

كدة برضو يا مديحة

يختي كبري دماغك . بكرة يجيلها احسن منه ونفرح بيها

بقولك ايه يا مديحة . انا مش مسمحاكي ولا مسامحة ابنك

ليه بس كدة يختي يا حبيبتي

عشان انتي وعدتيني ان الواد للبت وانا صدقتك والبت يا عين امها قايلة لاصحابها انها هتتخطب لابن خالتها

وهي تتسحب من لسانها وتقول لاصحابها ليه

عندك حق . في الآخر طلعنا احنا الغلطانين

خلاص يختي بقى لاغلطانين ولا حاجة . بكرة يجيلها اللي يعرف قيمتها

ان شاء الله بكرة يجيلها عدلها ونكيد الاعادي

هو احنا بقينا اعادي يا سهير يختي

انسي ان انا اختك اصلا وماتتصليش هنا تاني

استني بس يا سهير نتفاهم

اخص عليكي ياسهير ياختي طول عمرك خلقك ضيق

________________________

 

تررررررررررررررررررن ترررررررررررررررررررن

السلام عليكم

عليكم السلام ايوة يا غادة


اهلا ياماما ازيك يا حبيبتي وحشاني

ماتشوفيش وحش ابدا يا حبيبتي . ازي جوزك وعيالك

كويسين يا ماما بخير الحمدلله

انا متصلة اقولك ان المحروس اخوكي لقى عروسة

فتحي !

ايه العبط ده . انتي ليكي كام اخ مش متجوز . ممدوح اتجوز وفاضل فتحي

الله . مبروك يا ماما الف مبروك . ومين سعيدة الحظ بقى ؟

بت زميلته في الشغل

ماشاء الله . اسمها ايه العروسة

ما اعرفش

ماتعرفيش ازاي ياماما هو انتي ما شوفتيهاش ؟

شوفتها ونسيت اسمها

اكيد امورة . انا عارفة ذوق فتحي

ذوقه منيل من يومه . عمره ما اختار حاجة عدلة . كنت اخده عشان اشتريله اي حاجة كان يسيب كل الحاجات الحلوة ويشبط في انتن حاجة

هههههههههههههه ايه يا ماما انتي هتبدئي شغل الحموات من دلوقتي

اخص عليكي يا غادة . هو فيه اطيب من قلب امك يا بت

لا طبعا مافيش ياست الحبايب . اتصلتي بهالة ودينا وقولتيلهم يا ماما ؟

لأ لسة . هاقفل معاكي واطلبهم

طيب يا ماما وانا هتصل بفتحي اباركله واعرف منه التفاصيل مع السلامة يا ماما

الف يسلمك يا حبيبة ماما

 _________________


قولي يا واد يا فتحي

نعم يا امي

اتصلت باخوك ممدوح وقولتيله على خطوبتك ؟

ايوة طبعا وغادة اتصلت بيا وقالتلي انك قولتيلها وقولتي لهالة ودينا

اتصلت بعمامك ؟

ايوة طبعا وكلهم هيكونوا موجودين . مافيش دعوة حلوة ياست الحبايب ولا ايه

ربنا يكفيك شر بلاوي الدنيا يا ابني

اللهم آمين . وعايزك تدعيلي ربنا يتمم بخير

هحاول اعصر على نفسي لمونة وابقى ادعيلك

ربنا مايحرمنيش منك يا امي يا ست الكل

يا خوفي منك يا فتحي

خايفة من ايه بس يا امي

خايفة بعد ما تتجوز مراتك تاخدك مني وتقسي قلبك على امك

يا امي تاخدني منك فين بس اذا كنت انا هعيش معاكي

اه ياني من العروسة واللي هنشوفه على ايد العروسة . ياخوفي لتطردوني من الشقة وتودوني دار مسنين

لا حول ولا قوة الا بالله

ليه بس كدة يا امي . انا هشيلك فوق راسي يا غالية . هو انا انسى حنيتك عليا وعلى اخواتي وكل اللي عملتيه عشانا

كلامك حلو يا واد . اما نشوف افعالك بقى

ان شاء الله يا امي هنعيش مع بعض سعدا . بس انتي اعتبري مروة زي بنتك

اعتبرها زي بنتي ليه يا خويا . هو انا عدمت بناتي . ربنا يخليهوملي حبايب قلب امهم . ال زي بنتي ال

__________________

تررررررررررررررررررن ترررررررررررررررررررررررررن

افتح يا فتحي انا لسة بلبس . لازم اخواتك جم

حاضر

مبروووووووووووووووووووووووووووووووووووووووووووك يا توحا

مبروك يا عريس

مبروك يا فتحي

الله يبارك فيكو يا جماعة عقبال ولادكو

فين ماما

بتلبس جوا

انتو جيتو ياولاد

هو احنا نقدر نتأخر على فتحي

طيب يلا يا جماعة عشان هنعدي على الحلواني نجيب الجاتوه

ايه ايه ايه . جاتوه ايه اللي هتجيبه يا واد انت ياواد

اومال يعني يا امي هنخش بايدينا فاضية ع الناس

احنا ياواد مش ودينا علبة شيكولاتة حار ونار في جتتهم لما روحنا نشوف المخفية

ايوة يا امي بس النهاردة مختلف

مختلف في ايه . احنا يادوب رايحين نتفق ويمكن الكلام ما يعجبناش وما نتفقش وان شاء الله الكلام مش هيعجبنا

يا امي يا امي حرام عليكي والله

يا ماما مش كدة

هو انا عملت حاجة يا اخواتي . انتو كلكو عليا ولا ايه

ما فيهاش حاجة يا ماما لما فتحي يشتري جاتوه بالمناسبة دي

انا مالي يشتري ولا مايشتريش ولا يتفلق هو حر

عارف يا فتحي في محل حلواني تحفة فتح على اول الشارع والجاتوه بتاعه يجنن

خلاص نتوكل على الله ونجيب منه

والحتة بكام يا بت يا غادة

حوالي خمسة جنيه يا ماما

خمس عفريت لما ينططوكي . مش هنجيب منه خسارة فيهم

اومال بس نجيب منين ياماما

في محل حلواني ام اسماعيل بتجيب منه والحتة بخمسين قرش وبتقول عليه جميل اوي

يا ماما في حتة جاتوه بخمسين قرش برضو

ايوة . حتى كل لما ام اسماعيل تشتري منه الاسعاف تيجي تشيلها هي وعيالها

لا حول ولا قوة الا بالله . لا يا امي انا هشتري من اللي قالت عليه غادة

اشتري مطرح ماتشتري جاتك الارف

الله يبارك فيكي يا امي . منورة

يلا يا جماعة عشان عمامكوا جم بعربياتهم تحت

 

*************

ونكمل في الحلقة الثالثة بإذن الله
إلى اللقاء في الحلقة الثالثة

 

 

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *