مسلسل أم فتحي الحلقة الثالثة

3

الحلقة الثالثة


اهلا اهلا اهلا يا جماعة انتو شرفتونا

الله يشرف مقدارك يا ابو العروسة

منورة يا حاجة ام فتحي

الله يخليك

السلام عليكم ازيك يا ست ام فتحي

وعليكم السلام ازيك يا ام العروسة

بقولك ايه يلا نقعد في مكان تاني ونسيب الرجالة يتفقوا

لأ يا حبيبتي انا مش هتنقل من هنا انا هاحضر الاتفاق

يا امي اسمعي الكلام وقومي مع طنط

مابقومش مع طنطات انا . ولا عايزيهم يستفردوا بيك ويضحكو عليك

خليكي يا امي خليكي

طب يا مروة خدي اخوات العريس القمرات دول واقعدوا في اوضتك يا حبيبتي

حاضر يا ماما

____


في الاول يا عمي احب اعرفك بالجماعة

ده عمي مصطفى وده عمي محمود وده اخويا ممدوح

اهلا وسهلا نورتو يا جماعة انا اسمي صابر عبد الكريم والد مروة

اهلا وسهلا يا استاذ صابر

والله ابننا فتحي شكرلنا في حضرتك وبنت حضرتك جدا ونسبكو يزيدنا شرف

الله يخليك يا استاذ مصطفى . وانا والله سألت على الاستاذ فتحي في الشغل والكل بيشكر فيه جدا وفي اخلاقه

ربنا يخليك يا عمي

ندخل في التفاصيل يا جماعة

اتفضل يا استاذ صابر

اولا ان شاء الله انا هقول الالتزامات اللي عليا . ان شاء الله هجيب الاجهزة الكهربائية وهنجيب المطبخ بكل لوازمه

يا سلام ومالك جاي على نفسك كدة

امي يا امي استني

استنيت اما اشوف اخرتها

طيب يا عمي انا هجيب اوضة النوم واوضة الصالون والسفرا والنجف والسجاد والستاير

يا ريتني ما خلفتك يا فتحي

خلاص على بركة الله

استنى يا عم انت هو انت ما صدقت .على بركة الله ايه . انتو كدة هتغرقونا

في ايه بس يا حاجة ام فتحي

مش عاجبني الكلام الفاضي ده . انتو تشيلو اوضة من التلاتة وتجيبوا السجاد والستاير

يا سلام . ليه ان شاء الله

ما تتدخليش في الكلام يا ام مروة

حاضر

على العموم مش هنزعلك يا ست ام فتحي . انا هجيب اوضة السفرا وهجيب الستاير

زي بعضه

شوفتي الراجل ذوق ازاي يا امي

طيب بالنسبة للشبكة يا استاذ فتحي . مقدرتك تجيب بكام دهب

مقدرته يجيب غويشتين نحاس

استني يا امي

انا ياعمي بصراحة مش هقدر اجيب شبكة بأكتر من ست الاف

ليه ياابني حرام عليك يا حبيبي . ست الاف بحالهم تشبك بيها حتة السردينة دي

قليلين اوي اوي اوي يا استاذ فتحي على بنتي حبيبتي

ام مروة وبعدين

حاضر اديني سكتت

سكت حسك يا بعيدة . ال قليلين ال . عايزين يضحكو ع الواد

خلاص يا ابني اللي في مقدرتك هاته

طيب بالنسبة للفرح بقى


طب مش قبل ما نتفق ع الفرح يا ام مروة نشوف استاذ فتحي هيكون جاهز امتى بالعفش

2015-08-20_153229

فتحي ابني هيكون جاهز بالعفش بعد سبع سنين من غير مقاطعة

ايه يا امي اللي بتقوليه ده . ان شاء الله يا عمي كمان تلات شهور

الله يكرمك يا ابني .اصل انا ضد فترة الخطوبة الطويلة

عند حق يا استاذ صابر . انا بنتي الكبيرة قعدت مخطوبة سنتين وحصل مشاكل لاحصر لها

ربنا مايجيبش مشاكل يا استاذ محمود

يعني فرح مروة بنتي حبيبتي بعد تلات شهور ان شاء الله

ومالك يختي فرحانة اوي كدة انك لزقتيهالنا

ياامي اسكتي الست هتسمعك


هو انا غلطت في حاجة يا فتحي يابني . انا ساكتة اهو

طيب هننزل نجيب الشبكة امتى يا استاذ فتحي

ان شاء الله الخميس الجاي يا طنط

حار ونار فيكي وفي بنتك يا ام اويئ

فين الشربات يا جماعة

الف مبروك يا ام العروسة

الله يبارك فيكو وعقبال ولادكو

الف مليون مبروك يا ام العريس

ييارك فيكوا ويكفينا شر بلاويكوا

2015-08-20_153307

—————–

 

اه ياني يارجلي . لازم يابني تروح تخطب من اخر الدنيا . مش قادر تخطب من الشارع اللي ورانا عشان خاطر رجل امك

معلش يا امي دعواتك بالتيسير

تيسير مين . هي مش العروسة اسمها عفاف ؟

عفاف مين يا امي بس . اسمها مروة مروة مروة

ياخويا وانا عقلي دفتر . اتصلي باخوك عشان انكد عليه وعلى مراته

استر يارب حاضر

ايوة يا ممدوح افندي

اهلا يا امي

انت ياواد انت واخدينك معانا عشان تقعد زي الكرسي وماتنطقش ولا ايه

ايه يا امي اللي حصل

ماحصلش حاجة ياخويا . قاعد زي ابو الهول وسايب الناس تضحك على اخوك

وتاخد شقانا وعرقنا ويحطوه في شبكة وشوية خشب وانت ساكت

لا اله الا الله . وانا هتكلم في ايه . ماهو فتحي بيتكلم وعمامي بيتكلمو . وانتي ماشاء الله عليكي غلبتي الكل في الكلام

اه وانت بقى جيت عشان تفرجنا ع الجزمة الجديدة

معلش يا امي حقك عليا

وبعدين تعالى هنا .ست الحسن والجمال مرات جنابك ماجتش ليه

لانها راحت عند مامتها زي كل اسبوع . وقالت ان وجودها مش مهم لان ده اتفاق رجالة

قصدك ايه ياواد . ان امك بشنب
2015-08-20_153213
امي تصبحي على خير انا عندي شغل الصبح

وانت من اهله ياخويا . عيال تعل وتشل
.
.
.
.
.
.
مالك يا ماما

مافيش حاجة يا مروة

لأ بجد مالك يا ماما . انتي سرحانة وحاساكي مش طبيعية خالص

بصراحة يا مروة انا قلقانة عليكي

قالقانة عليا ! ليه ياماما

ياحبيبتي السكن مع الحما مش حاجة سهلة وبيجيب مشاكل كتير

ياماما وهتيجي منين المشاكل . انا هاعملها زي ماتكون امي ومش هزعلها . يبقى هاتيجي منين المشاكل

يابنتي الحما بتغير على ابنها ومش هتكون مبسوطة لما تشوفه يهتم بيكي او يحاول يسعدك

ليه بس ياماما .وليه ماتقوليش انها هتعاملني زي بنتها وتخاف عليا وتتمنالي السعادة

والله يابنتي اللي بشوفه من الناس اللي حواليا بيأكد ان الحموات طبعهم واحد ومهما عملتي مش هترضى عنك

ياماما بس انا مقتنعة بفتحي وهستحمل اي حاجة عشانه

هو بصراحة فتحي انسان مهذب يا مروة وكفاية عنيه اللي مابتترفعش من على الأرض

خلاص بقى ياماما فرفشي وشوفي بقى هننزل نجيب ادوات المطبخ امتى

هقول ايه يابنتي . ربنا يسعدك ويفرحك ويخلف ظني وتطلع حماتك كويسة

ان شاء الله يا ماما

*************

ونكمل في الحلقة الرابعة بإذن الله
إلى اللقاء في الحلقة الرابعة

.
.
.
بقلم الكاتبة هبة نور

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *