مسلسل فيروز الحلقة العاشرة

10

 

الحلقة العاشرة

فيروز نايمه ع سرير صغير فى اوضه كبيره وواسعه اوى بس

فاضيه والعنكبوت وخيوطه ماليه الحيطه والحشرات والفيران بتجرى على الارض

مغمضه عنيها وهى خايفه ومش مطمنه بس بتحاول تنام او بمعنى اصح بتمثل انها نايمه

شويه ويدخل عليها رجل كبير وعجوز شكله مش فى واعيه بيطوح يمين

وشمال قرب منها وقاعد على طرف السرير مد ايده وملس شعرها وهى الخوف

والرعب ماليها عاوز تصرخ بس خايفه فضلت ساكته وهى بتغمض عنيها اكترواكتر

وهو بيقرب منها اكتر واكتر انفاسه بقت على خدها حست بخنقه وانها مش قدره تاخد

نفاسها مش عاوز نفسه يدخل جواها قرفانه منه اوى ايده نزلت من على شعرها

لوشها كان بيلمس وشها بكل تفاصيله عنيها خدها شفايفها ونزل على رقبتها وهو

بيبعد خصل شعرها عنها وانفاسه السخنه بتحرقها وبتخنقها اكتر

 فتحت عنيها غصب عنها شافته قريب اوى منها ملامحه قريبه

اوووووووى لدرجه انها شايفاه وحش شكله يخوف ومرعب

زقته بكل قواتها وهى خايفه وبتعيط

وفجاءه قامت من نومها وهى مفزوعه

لقت دموعها على خدها كانه كان حقيقه مش حلم

مسكت دماغها من الصداع ولسه برده دموعها بتنزل ومش قادره

تتحكم فيها كانت لسه حسه بلمست ايده وانفاسه عليها

دخلت بسرعه ع الحمام غسلت وشها جامد وهى حسه بقرف وبتغسل

وبتغسل وهى دموعها نازله وهى مش فاهمه حاجه ولا فاهمه ايه اللى شافته ولا ايه اللى حست بيه

فيروز بدموع : لسه حاسه بيه برضه … هو ايه ده ومين ده …انا حاسه ان قلبى مقبوض اوي

ودخلت اخدت شور عشان تتخلص من احساسها بحلمها البشع

 

………………………………………………..

 

عمار فى الطياره

قاعد سرحان وبيبص من الشباك على الارض وبيكلم نفسه

” قد ايه الدنيا دى صغيره اوى … وياما حاجات من قريب بتبقى كبيره

اوى بس لما بنبعد عنها بنشوف قد ايه هى صغيره “

غمض عينه ورجع بالزمن

 

فلاش باك

 

عمار قاعد مع فريده فى مطعم

عمار بفرحه : ماتعرفيش انا فرحان قد ايه .. بجد مش صدق ان خلاص فرحنا كمان اسبوعين

فريده من غير نفس : اه

عمار باستغراب : مالك ؟

فريده : مافيش

مسكت المنيو : هتاكل ايه

عمار وهو بيمسك ايدها والابتسامه منوره على وشه  : اللي هتختاره حبيبتي

فريده قفلت المنيو وحطته : انا ماليش نفس …. انا عاوزه اروح

عمار بعد ما ملامحه اتغيرت : مالك يا فريده فى ايه ؟

فريده بارتباك : بصراحه كده فى موضوع عاوزه اكلمك فيه من فتره ومش قادره اسكت اكتر من كده

عمار بقلق : موضوع ايه اتكلمي

فريده : انا جايلى عرض حلو اوى من مجلة فى امريكا

عمار لسه مش مستوعب : عرض … عرض ازاى يعنى

فريده : عرض شغل …. هاشتغل محرره والعقد لمدة سنتين قابل للتجديد

وبعدين سكتت شويه وبصتله : واخر فرصه للسفر كمان 10 ايام

عمار فضل ساكت بيبصلها وهو برضه مش مستوعب متنح ورافع حواجبه  

فريده : ساكت ليه

عمار : مستني باقي كلامك يمكن اقدر استوعبه

فريده : انا خلصت كلامي

عمار : والمفروض اني اقولك ايه

فريده بارتباك : عادي .. تقوليي رأيك

عمار : رائيي ….رائيي فى ايه … انا اصلاً لسه مش مستوعب كلامك عشان اقولك رائيي

فريده بصتله وسكتت

عمار : يعنى انتى جايه تقوليلى انى جايلى عرض شغل حلو اوى وعجبنى وهسافر كمان 10 ايام ..

يعنى طظ فيك وفالفرح وفالناس وشكلى قدامهم ….

انتى عاوزه رائيي فى انك بعتيني وبعتي  كل حاجه ما بينا

 

عمار بعصبيه : انتى ازاى كده …ومستنيه اقولك ايه … اقولك  انك انانيه مش بتفكرى

غير فى نفسك وبس …. انك عمرك مااهتميتى بمشاعرى ولا بحبى ليكى …

انك موتى فرحتى … اقولك ايه قوليلي …. اقولك انى استحملتك كتير واستحملت

دلع وحبك للشغل اكتر مني ولا اقولك انى بجد مش مصدق انى حبيبتك وقلبى كان

معمي عن حقيقتك وشخصيتك الانانية … فهمينى اقولك ايه

فريده : انت ليه مكبر الموضوع كده

 

عمار : مكبرالموضوع .. ليه هو انتى شيفاه صغير … انتى ازاى بارده كده

فريده : عمار انت بتغلط فيا من الصبح ومش عاوزة ارد عليك عشان مقدره

صدمتك …. ياريت نتكلم بالعقل شويه …الفرصه دى عمرها ماهتتكرار لكن

الجواز ممكن يتأجل شويه او ممكن تيجى تعيش معايا ونتجوز هناك

 

عمار بعصبيه وصوت عالى : انتى مجنونه صح …..انتى مصدقة كلامك ده …

انتى اصلا خليتى فيا عقل عشان اتكلم بيه

 

 فريده وهى بتبتص حواليها : عمار وطي صوتك الناس بتتفرج علينا

 

عمار بعصبيه اكتر : انتى ازاى كده انا مش مصدقك … بقالك 3 سنين معلقانى

جانبك مع انى جاهز والشقه جاهزه كل يومين بحجه شكل وانا اقول مش مشكله هستحملها

انا بحبها وهى بتحبنى هى شريانى بس لسه صغيره وخايفه من المسؤلية انا لازم اطمنها

واهتم بيها عشان نبقى مع بعض واستحمل واستحمل لحد ماخلاص هانفجر

 

عمار سكت شويه وحاول يهدي نفسه وبعدين بصلها : بصى يا فريده اخر كلام عندى ….

يا انا يا شغلك والسفر كان نفسي مابقاش موضع اختيار بس للاسف

انتى حطتينى فالموقف ده ….. مستنى ردك

 

وقام وسابها قاعده لوحدها فى المطعم

 

 

ويفوق عمار على صوت المضيفة بتعلن وصول الطيارة لمطار القاهرة

 

………………………………………………..

 

فيروز طول اليوم مكانتشي طبيعية وهى قاعدة مع مها كانت سرحانه ومش معاها خالص

مها باستغراب : فيروز … فيروز

فيروز : ها … نعم ياماما بتقولى حاجه

مها بحنيه :بكلمك من الصبح وانتى ولا هنا … مالك يا حبيبتى انهارده

فيروز : مش عارفه حلمت حلم وحش ومن ساعتها وانا حاسه ان قلبى مقبوض ومضايقة اوى

مها وهى بتطبطب على ايدها : قولى خير الله ما اجعله خير … وان شاء الله خير

فيروز بتنهيده : امين يارب … انا هاقوم اغير هدومى عشان يوسف هايجى نروح للدكتور

مها بابتسامه كلها حب طمنت فيروز : ماشى يا حبيبتى خلي بالك من نفسك

قامت فيروز ولسه بتفتح الباب لقت عمار فى وشها

فيروز حست ان قلبها اتنفض وفضلت تبصله وهى متنحه

عمار بابتسامه : مالك متنحه كده ليه

فيروز بارتباك : لا مفيش حمد الله على السلامه

عمار : الله يسلمك

ودخل باس مامته و قاعد جانبها وفيروز لسه بتبصله وقلبها بيدق

مها باستغراب : انت مش المفروض ترجع بكره

عمار : اصلكم وحشتونى فرجعت على طول … انتى عامله ايه

مها : انا بخير عشان شوفتك

عمار : يارب دايما

وبعدين بص لفيروز : وقفه كده ليه بعيد

فيروزبارتباك  : ها ..اصل .. اصل عندى ميعاد مع الدكتور بعد اذنكم

وطلعت بسرعه على اوضتها

عمار باستغراب : مالها

مها : مش عارفه مالها انهارده …المهم عملت ايه احكيلي بقى كل حاجه بسرعة

 

……………………………………………………….

 

بعد حوالى ساعيتن

 

كانت فيروز نايمه على شزلونج ومغمضه عنيها

الدكتور : لسه شايفه صورته قدامك

فيروز بدمعه : اه … شكله بيخوفني اوى

وفتحت عينيها بسرعة : اسفه يا دكتور مش قادره اشوفه اكتر من كده

الدكتور : طيب مش فاكره مين الشخص ده

فيروز : لاء اول مره اشوفه فالحلم انهاردة

الدكتور : طيب شكله مألوف بالنسبالك ولا حاسه انك شوفتيه قبل كده

فيروز بتعب وهى بتمسك دماغها : مش عارفه …. انا مصدعة اوى

الدكتور : انا هاكتبلك دواء للصداع ده …. انا مش هضغط عليكي اكتر من كده …

بس زى ماأتفاقنا اى حاجه تفتكريها تكتبيها على طول عشان متنسيهاش

فيروز : حاضر

الدكتور بابتسامه : الجلسه انتهت وهستناكي كمان اسبوعين ان شاء الله

فيروز وهى قايمه من مكانها : ان شاء الله

وعند الباب وقفت فيروز وبصت للدكتور تانى

فيروز : دكتور ممكن اسال حضرتك سؤال

الدكتور : اكيد اتفضلي

فيروز بكسوف وارتباك  : هو يعنى … هولو انا كنت بحب شخص …

بس مش دلوقتى قبل كده يعنى  وانا دلوقتى مش فاكره حاجه هاحس

بيه وبإنى بحب ولا لاء

الدكتور بابتسامه : الحب اكيد مرتبط بالقلب يعنى الاحساس بس كمان مرتبط

بالعقل والتصرفات يعنى لو الشخص ده مش قدامك وانتى اصلاً مش عرفاه

هاتعرفى منين انك بتحبيه حتى فى مثل بيقول” البعيد عن العين بعيد عن القلب “

يعنى احنا بنحب بعنينا وبعقلنا وبقلبنا اللى هوا احساسنا مش هتقدرى تكتشفى

ده غير لما تفتكرى او تشوفى الشخص ده

فيروز : طيب لو شوفته وافتكرته بس ماحستشي اني بحبه

الدكتور : يبقى انتى ماكنتيش بتحبيه اصلا من الاول ممكن يكون كنتى بس محتاجاه

فى وقت معين … حاولى تفرقى بين الحب والاحتياج

فيروز وهى مش مستوعبه كلامه اوى : امممممممم … ماشى … بعد اذنك

 

فيروز نزلت من عند الدكتور وهى سرحانه واول لما شافت يوسف

بصتله بصه غريبه كانها بتفكر فى حاجه

فيروز : يوسف هو الفرق بين الحب والاحتياج ؟

 


—————————————————–

ونكمل في الحلقة الحادية عشر .. إلى اللقاء في الحلقة الحادية عشر

بقلم الكاتبة: ريم أحمد

 

 

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *