نشرة اخبار المتجوزين..نوال وعربيتها الجديدة ..وهالة الغلبانة

نشرة اخبار المتجوزين

نشرة اخبار المتجوزين

من قناة مكسورين الجناح نحييكم سيداتي وستاتي

نكمل باقي تفاصيل الانباء

 

بالنسبة للخبر بتاع الست نوال اللي خلت جوزها يغيرلها العربية

عشان اصحابها شافوها بيها الاسبوع اللي فات كتير كتير

 

هاتولي الست دي ع التليفون عشان انا مرارتي مفقوعة منها

الو ايوة يا نوال معاكي حشرية الرخمة

هاي مدام حشرية هاورايو

مالكيش دعوة انا كنت عايزة اتأكد من صحة الخبر

خبر ايه

هو جوزك غيرلك العربية زي ماطلبتي منه

 

طبعا طبعا طبعا هو عمره ماقالي لأ على اي طلب

 

يا سلام يختي ياسلام ليه ان شاء الله ما احنا بيتقالنا لأ خمسين مرة في اليوم .

هو انتي احسن مننا في ايه يختي زايدة ايد ولا رجل يعني

 

هو انتي وباقي الستات هتشبهوا نفسكو بيا ولا ايه يا حقوديات انتو .

 

انا جوزي بيموت في التراب اللي بمشي عليه وحفي على مارضيت اتجوزه

جاز عليكي الهم يا شيخة . هو انتي عايزة تفرسيني

 

طب اقولك جود باي يا حشرية بقى عشان بحضر الشنط عشان مسافرين

باريس نتفسح والطيارة كمان ساعتين


وهتتفسحي في باريس كمان . عيني عليا وعلى بختي .

اقفلي السكة يا ست انتي واخفي من القناة . يارب سواق الطيارة بدل ما

يوديكو باريس يوديكو الصومال وتنشفي زيهوم

ال جوزها مابيقولهاش لأ ال وهيغيرلها العربية .

وانا جوزي بيديني حق تذكرة المترو بعد ما بيطلع عيني


فاصل ونكمل باقي الاخبار اياك تتحركو من قدام شاشتنا المدمرة .

اتفرجو ع الكرتون على مااجي

 

———————————————–

 

نواصل اخر تطورات الاوضاع الزوجية

نشرة اخبار المتجوزين من قناة مكسورين الجناح

حشرية الرخمة تحييكم

عودة للخبر بتاع هالة الغلبانة اللي بعد ما لبست واتغندرت وحضرت سهرة رومانسية على اضواء الشموع

 

لقيت جوزها ساحب امه وجاي . خبر مستفز ورزل بس هنعمل ايه .

 

معانا في الاستوديو لتحليل الموقف المتردي الخبيرة بالشئون الزوجية

 

الحاجة صابرة عبد الصبور خبرة تلاتين سنة جواز . بنرحب بيكي يا ست الخبيرة

 

اهلا بيكي يا ست حشرية

 

طبعا عايزين تحليل تفصيلي وشامل للحدث بتاع هالة وجوزها

 

لا تحليل ولا حاجة دي مسألة مش محتاجة حيرة .

 

دي عملة عادية من عمايل الرجالة اللي تجيب شلل .

 

المفروض اذا كان المحروس ناوي يجيب امه يتصل ويقول للغلبانة

عشان تعمل حسابها .

 

مش جايب امه في ايده وطالع على غفلة ويحرق

دم الغلبانة دي .ياخسارة الشمع يختي يا خسارة

 

طيب معانا هالة ع الهاتف

 

 

ايوة يا هالة

اهئ اهئ اهئ ايوة عايزين ايه انتو كمان

واحنا مالنا يختي هو انتي هتطلعي غولبك فينا ولا ايه .

 

على العموم عذراكي عشان الموقف المرير ده مر بيا قبل كدة .

 

بس الست الجدعة تاخد الصدمة وتقف على رجليها تاني يا هالة يختي

 

 

عندك حق يا ست حشرية .

 

انا لازم ابطل عياط واحباط وارجع هالة بتاعة زمان اللي عمايل

جوزها ما بتهزش فيها شعرة

 

ايوة كدة يختي ياما دقت على الراس طبول . كلمي الست صابرة الخبرة

 

ايوة يا هالة يابنتي قلبي عندك

 

اهئ اهئ قلبك فيه الخير يا طنط

 

معلش يابنتي المرة الجاية تبصي من العين السحرية لو لقتيه

 

جايب امه تاني في سهرة رومانسية خبي كل الاكل في دولاب

 

المطبخ واطفي الشمع وخشي نامي وخليه هو وامه ياكله بواقي الجبنة اللي


في التلاجة عشان يحرم يعمل كدة تاني


ميرسي يا طنط على النصيحة الغالية

 

العفو يا هالة انتي برضو زي بنتي وانا عايزالك الخير .

 

معاكي الست حشرية

 

متشكرين يا هالة على المداخلة


ميرسي يا ست حشرية مع السلامة
______________________

نجاة الاستاذ راضي من تحت انقاض مراته وفرحة عارمة تملأ أجواء العمارة

.

غداً نعرف التفاصيل انتظروانا غداااااً

ميعادنا غداً نكمل نشرتنا الساعة 11 بتوقيت القاهرة وكل يوم خبر جديد

نشرة أخبار المتجوزين بقلم .. الكاتبة :هبة نور

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *