مسلسل أم فتحي الحلقة الرابعة عشر

2015-08-28_004227

الحلقة الرابعة عشر

 

 

بت يا نسمة يا مقصوفة الرقبة انتي

نعم يا ماما

يابت انتي مش عارفة ان خالتك زعلانة وسايبة البيت بسبب المخفية مرات ابنها

طب واحنا مالنا

واحنا مالنا ازاي . مش تشغلي مخك معايا شوية

جرا ايه يا ماما هو انتي عايزانا نصالحهم على بعض ولا ايه

نصالحهم ايه بس يا بت انتي . يابت افهمي دي فرصتك . دلوقتي فتحي اكيد مخنوق من مراته عشان زعلت امه وخليتها تسيب البيت

انتي بقى بشطارتك تلفي دماغ فتحي وتخليه يكره مراته ويطلقها ويرجعلك . يابت خليكي واعية زي امك .

طب واعمل كدة ازاي يا ماما

مش معاكي رقمه

ايوة معايا من زمان . من قبل ما يتجوز الزفتة دي

طب خلاص وريني شطارتك بقى . ويكون في علمك لو ماعرفتيش توقعيه هتفضلي قاعدة في ارابيزي وماحدش هيعبرك

يالهوي يا ماما . لا خلاص انا هتصل واغتت واغلس لحد ما اكرهه في البت دي ويطلقها ويرجعلي

جدعة يا حبيبتي طول عمرك طيبة وبنت حلال مصفي

طالعالك يا ماما

ترررررررررررررررررررن تررررررررررررررررررررررن

الو

ازيك يا توحا

مين معايا

اخص عليك يا وحش .بقى كدة مش عارف صوتي

مين معايا يا فندم

طب فكر شوية

حضرتك واضح انك ست فاضية وعايزة تضيعي وقت وانا مضطر اقفل السكة

ترررررررررررررررررررن ترررررررررررررررررررررررن

افندم

بقى كدة يا متوحش تقفل السكة في وشي

وهقفلها تاني لو ماقولتيش انتي مين

انا نسمة

نسمة مين

يا سلام ! نسمة بنت خالتك سهير

اهلا يا نسمة خير في حاجة

ايه طريقة الكلام الرزلة دي . وحشتني وقولت اسمع صوتك

نسمة عيب الكلام ده انا راجل متجوز ومتهيألي انتي بنت محترمة وبنت ناس ومتربية

ايه ده ايه ده ايه ده . على مهلك شوية . هو لما اعبرلك عن مشاعري ناحيتك ابقى مش محترمة

الانسانة المحترمة تحترم نفسها وما تقللش من شأنها وشأن اهلها وتكلم راجل وتتمايع في الكلام بالشكل ده

انا محترمة غصب عنك انت اللي مش محترم

والله لو انا مش محترم كنت رحبت بمكالمتك وجاريتك في الكلام واتسليت بيكي . لكن انا اخلاقي ما تسمحليش

جرا ايه يا فتحي هو انت فاكرني متصلة اتسلى ولا اهزر

اومال متصلة ليه ان شاء الله

متصلة اقولك هي دي بقى مروة اللي فضلتها علية . اديها قدرت تفرق بينك وبين امك وتخلي حياتك جحيم

لا لا لا انتي معلوماتك مش دقيقة يا انسة نسمة . انا امي ومراتي زي السمن ع العسل وامي راجعة البيت قريب ان شاء الله وخليكي في حالك انتي

انا مش عارفة انت متمسك بالست مروة دي ليه . هي احسن مني في ايه .ايش حال انها مابتخلفش

بصي يا نسمة هقولك كلمة عشان ماتتعبيش نفسك ورايا كتير وتهدي بقى وتسيبيني في حالي

مروة دي مراتي وحبيبتي وسواء خلفت او ما خلفتش مش هفرط فيها

كدة . طيب . والله انت ما تستاهل الواحدة تفكر فيك . اشبع بالست هانم بتاعتك

.
.
.
سمعتي ياست ماما الاستاذ ابن اختك عمل معايا ايه

ماانتي اللي جبتيه لنفسك يا شيخة . هو انتي متصلة تجري رجله ولا متصلة تتخانقي وتوريله قلة ادبك . يخرب بيت البهايم يا شيخة

يا ماما هو اللي مادانيش فرصة

فرصة ايه ونيلة ايه .انا لو بفهم في بقرة كانت زمانها فهمت ووقعت عشرين طور . انما هقول ايه . نصيبي كدة معايا بت عقلها في جزمتها

بقولك ايه يا ماما . انا مخنوقة ومش عايزة اتكلم

والله انا اللي مخنوقة ومش عايزة اشوف وشك . اخفي من وشي الساعة دي يابت انتي بدل ما افتح دماغك بالكوباية اللي في ايدي

منك لله يا فتحي انت وامك . اودي البت دي فين يا اخواتي . اجوزها ازاي . اعمل عليها عرض واقول تعالوا يا ناس خدوا عروسة ومعاه ازازتين زيت وباكو شاي

.
.
.
مروة

ايوا يا فتحي يا حبيبي انت جيت

ايوا يا قمر . ها الغدا جاهز ؟

طبعا يا حبيبي ودا سؤال تسأله برضو . انت عمرك دخلت البيت والغدا ماكانش جاهز

لا والله يا حبيبتي انتي عمرك ماقصرتي في حاجة ابدا

انا رايحة للدكتورة بكرة ان شاء الله انا وماما

طيب يا حبيبتي ان شاء الله يكون خير

ان شاء الله يا حبيبي . طيب يلا عشان اساعدك في تغير هدومك

يلا يا حبيبتي

تررررررررررررررررن ترررررررررررررررررررررررن

الو ايوة يا امي يا ست الحبايب

ازيك يا فتحي يا حبيبي

الله يسلمك يا حبيبتي هتيجي امتى بقى كفاية كدة

قريب ان شاء الله . اصل انا قاعدة بسلي ايناس والعيال واخوك مش عايزني امشي والله وكمان ايناس مرات اخوك جالها الضغط مش عارفة من ايه

لا يا امي كفاية كدة على ممدوح . انا كمان ليا حق عليكي . على فكرة مروة رايحة للدكتورة بكرة

يا سلام وتاخد امها ليه ان شاء الله . ما تستنى لما اوديها انا

يا امي وفيها ايه لما تاخد امها معاها

فيها اننا كدة هنفضل على عمانا وما نعرفش الدكتورة قالت ايه . مش يمكن الدكتورة تقول ما فيش منها امل وهما يضحكوا علينا ويقولوا ان العيب منك انت ويلبسونا السلطانية

سلطانية ايه بس يا امي اللي هيلبسوهالنا . والله هما تفكيرهم مش كدة خالص

وانت ايش عرفك بالحريم وتفكير الحريم . الرجالة ما بيفهموش في شغل الستات ده اسألني انا . الست من دول يا بني تودي الراجل البحر وتجيبه عطشان

على العموم هنشوف الدكتورة هتقول ايه

طيب يا خويا اما نشوف اخرتها

.
.
.
مدام مروة بعد الكشف عليكي والتحاليل اللي عملتيها اقدر اقولك انك ما عندكيش اي مانع للحمل

وعلى العموم هطلب منك شوية تحاليل يعلمها زوج حضرتك ونشوف ان شاء الله

ان شاء الله . شكرا يا دكتورة

العفو يا فندم

الحمدلله يا مروة يا حبيبتي . انا كنت قلقانة جدا عليكي

الحمدلله يا ماما بجد انا كدة ارتحت نفسيا
مروة تبقي تقولي لفتحي على التحاليل اللي طالباها الدكتورة عشان المرة الجاية ناخد النتيجة معانا

خلاص ان شاء الله

ياااااااااااااااه يا فتحي انا فرحانة اوي يعني احنا الاتنين الحمدلله ما عندناش اي موانع للخلفة

الحمدلله يا حبيبتي . انا بصراحة لما عرفت ان ماعندكيش موانع قولت يبقى اكيد عندي انا ههههههههه

الحمدلله يا حبيبي نتيجة تحاليلك انت كمان هايلة . الدكتورة قالت مسألة وقت والعامل النفسي مهم جدا

تررررررررررررررررن ترررررررررررررررررن

ايوة يا فتحي طمني يا حبيبي

الحمدلله يا امي انا ومروة نتيجة تحاليلنا كويسة جدا وماعندناش موانع للخلفة

الله . اومال لما ما عندكوش موانع ما بتخلفوش ليه . بتستهبلوا ولا بتستعبطوا

دي حاجة بتاعة ربنا وان شاء الله انا قلبي حاسس ان ربنا هيكرمنا بس انتي ادعيلنا

هو انا ورايا اللي الدعا ليك ولاخواتك يا حبيبي . ربنا يرزقك بالخلف الصالح عن قريب

مروة

يا مروة

انتي فين يا حبيبتي

انا هنا يا فتحي

ايه يا حبيبتي اول مرة اجي الاقيكي في السرير انتي تعبانة ولا ايه

اه والله يا فتحي حاسة اني دايخة خالص ومش قادرة اقف . اسفة والله ما قدرتش اطبخ . دخلت المطبخ حسيت الدنيا بتلف بيا

سلامتك يا حبيبتي الف سلامة . خلاص يا ستي اطبخ انا مافيش مشكلة خالص

تطبخ ايه بس يا حبيبي انت لسة راجع من الشغل مرهق . انا شوية كدة وهبقى كويسة واقوم اعمل الاكل

لا يا روح قلبي خليكي مرتاحة انا هعمل اي حاجة سريعة كدة وخلاص . عندنا ايه في الفريزر

هتلاقي كفتة متبلة وجاهزة على القلي واعمل جنبها شوية مكرونة وخلاص

اه . بموت في الكفتة بتاعتك دي . مش عارف بتبليها ازاي ههههههههه

هههههههههه طيب يلا وريني شطارتك في قليها بس

دقايق معدودة يا مروة هانم وهحضر لحضرتك احلى مكرونة وجنبها الكفتة اللي تجنن . هروح البس مريلة المطبخ ودعواتك بقى ههههههههههه

تررررررررررررررررررررررررررن تررررررررررررررررررررررررررررن

ميييييييييييييين

انا امك يا فتحي افتح يا حبيبي

اهلاااااااااااااااااااااااااااااااااااااااا امي حبيبتي نورتي

يا مصيبتي !!!!!!!!!! ايه اللي انت عامله في نفسك ده يا واد . لابس مريلة المطبخ وماسك كبشة . يا لهوووووووووووووووووووي الحقوني ياناس

ايه يا امي اهدي في ايه

تعالوا يا ناس اتفرجوا على ابني اللي ربيته وتعبت وكبرته لحد ماشنباته بقى يقف عليها الصقر اتقلب حورمة

يا امي مايصحش كدة ادخلي هتفرجي علينا الجيران

خليهم يجوا ويتفرجوا

مين اللي بيزعق ع السلم ده . ميييييييييييييييييييييييييين ام فتحي . يا حبيبتي يختي . هو انتي لسة عايشة . صحيح عنتي عند مندوح ؟

تعالي يا ام اسماعيل ولمي الجيران يتفرجوا

في ايه بس يا ام فتحي

ام فتحي مين يختي انا بقيت ام فتحية خلاص

يا امي كفاية كدة الله يهديكي ادخلي

هي فين المحروسة اللي شقلبت كيانك ومسكتك كبشة

اهلا يا ماما ازيك

ماما في عينك يا حرباية . انتي يابت بتستغلي غيابي وتمشي البيت على كيفك وتوقفي راجل طول وعرض في المطبخ دانتي لا عيشتي ولا كنتي

يا امي مروة تعبانة

تعبانة ايه . ماهي واقفة زي فحل الجاموس اهيه

والله يا ماما تعبانة ودايخة ونفسي في الفسيخ

نفسك في الفسيخ !!!!!!!!!!!!!!!!

الله لما تجيبوا فسيخ يا ام فتحي ابعتولي شوية عشان وحشني اوي

يا شيخة ماتغوري على شقتك احنا ناقصينك

.
.
.
يلا يا امي الغدا جاهز

كمان جايب الاكل بنفسك . اشتغلت سفرجي عند الهانم يا سي فتحي

معلش يا امي . مراتي تعبانة ومافيهاش حاجة لما اساعدها

استغفر الله العظيم من كل ذنب عظيم . يا خسارة الرجالة

كلي يا امي يلا مدي ايدك

امد ايدي على ايه . هو فين الاكل ده . حد يابني يعمل جنب المكرونة بتنجان مقلي

يا امي دي كفتة

كفتة ! انا اول مرة اشوف كفتة سودة

معلش اصلها كانت هتتحرق مني

كانت هتتحرق . دي اتحرقت وشبعت حريقة

تسلم ايدك يا فتحي يا حبيبي الاكل يجنن

انتي بتغظيني ولا ايه يا اسمك ايه انتي

انا بغيظك في ايه بس

يعني انا اقول الاكل مش عاجبني وانتي تقوليله تسلم ايدك

يعني مش كتر خيره يا ماما عمل الاكل بدالي

ايوة ماانتي عايزة تعملي هانم وتشغلينا عندك . مش بعيد كمان شوية تقوليلي قومي اعمليلي كوباية شاي

انا ما اقدرش اطلب من حضرتك طلب زي ده

ايوة ايوة ايوة اتمسكني خليني اصدقك والدمعة تفر من عيني

لا حول ولا قوة الا بالله . يا امي فيه ايه بس

ولا فيه ايه ولا مافيش ايه انا قايمة وداخلة اوضتي بلاش كلام فاضي

استغفر الله العظيم . هو انا عملتلها حاجة يا فتحي

لا حبيبتي حصل خير كملي اكلك

ماليش نفس

عشان خاطري حبيبتي . طب حتة اجبري بخاطري وخدي الكفتاية المحروقة دي من ايدي هههههههههههههه

ههههههههههههههههه والله انا مش عارفة من غيرك كانت حياتي تبقى ازاي . ربنا يخليك ليا يا حبيبي

يا مروة

انتي يللي اسمك مروة

نعم يا امي

هو انت اسمك مروة اليومين دول

مروة تعبانة

وبعدين بقى هي مراتك دي ايه حكايتها . ايه كل شوية تعبانة تعبانة . ما التعبان يشوفله مستشفى يقعد فيها
يا امي معلش اصلها كل شوية دوخة وترجيع ومش عارف مالها

دوخة وترجيع ونفسها في الفسيخ !! يكونش عندها الحصبة

ربنا يستر يا امي . على العموم هوديها للدكتورة بالليل

هو انت كل شوية تدفع فلوس ع الدكاترة هو انت يابني بتلاقي فلوسك في الشارع . حرام عليك شقاك ياابني

اومال مين بس يوديها للدكتور

ماتخلي ابوها يوديها واحنا مالنا . هي كانت من بقيت اهلنا

الله يهديكي يا امي

تررررررررررررررررررن تررررررررررررررررررررررررن

ايوة يا مروة يا حبيبتي

ازيك يا ماما

ازيك انتي يا نور عيني عاملة ايه

تعبانة يا ماما تعبانة اوي

ليه يا حبيبتي سلامتك

حاسة بأعراض غريبة علية

اعراض ايه حبيبتي

دوخة وترجيع ونفسي بتروح لحاجات غريبة اوي غير الالم اللي في ضهري

الله الله ايه الكلام اللي يبشر ده

يبشر بأيه بس يا ماما

بقولك ايه

نعم يا ماما

هي جت

لأ دي حتى متأخرة كتير

طيب خير الحمدلله . روحي اعملي اختبار حمل النهاردة واول ماتيجي بشريني بالنونو بقى

ايه ده يا ماما تفتكري ممكن يكون حمل ؟

ان شاء الله يا حبيبتي . يارب يستجيب دعائي

ياريت يا ماما ياريت . عشان نفسي افرح فتحي اوي

يا حبيبتي ربنا يفرحكو ويبعد عنكو كل شر اللهم آمين

طيب يا امي احنا نازلين

رايحين فين ان شاء الله

مروة هتعمل اختبار حمل

هتعمل اختبار حمل لمين

يعني هتعمل اختبارحمل لمين بس يا امي . ادعي انها تطلع حامل

قلبي حاسس انها مش حامل وانا قلبي ما يكدبش علية . ده مش شكل واحدة حامل ابدا

معلش ادعي برضو . ربنا كريم

ازيك يا فتحي ازيك يا مروة

اهلا خالتي ام اسماعيل

ازيك يا طنط ام اسماعيل

انتو رايحين فين

رايحة اعمل اختبار حمل ادعيلي يا طنط بالله عليكي اطلع حامل

طيب ولو دعيتلك وطلعتي حامل هتجبيلي حاجة حلوة

طبعا والله من عيوني الاتنين بس ادعيلي

طيب يارب يا مروة تطلعي حامل عشان تجبيلي كباب وكفتة وانتي جاية

حاضر ياطنط بسيطة من عنيا

.
.
.

—————————————————–

ونكمل في الحلقة الخامسة عشر .. إلى اللقاء في الحلقة الخامسة عشر

بقلم الكاتبة: هبة نور

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *