نشرة أخبار المتجوزين..اطلاق قذائف لفظية موجهة من فم الاستاذ ممتاز لزوجته مدام إنجاز

نشرة أخبار المتجوزين

نشرة اخبار المتجوزين لهذه الساعة نحييكم واليكم العناويناطلاق قذائف لفظية موجهة من فم الاستاذ ممتاز لزوجته مدام إنجاز جراء تأخير طعام الغداء على البوتاجاز

ال إنجاز ال . عالم بتستهبل

*

تشابك بالأيدي والأرجل وكسر فازتين على سبيل الحصر في مشاجرة  بين الاستاذ تلفان وحرمه الاستاذة امتثال بعد تلقيه مكالمة نسائية

ال إمشي عدل تحتار مراتك فيك . رجالة اخر زمن

*

عودة الاستاذ معقد ابو حواجب مقلوبة من عمله  واستنكار من مراته الست انشكاحيا شيخ افردها شوية مش ناقصين هم

*

فاصل ونعود بالتفاصيل انتظرونا اياك تتحركو لأكلكو

 

عودة للخبر بتاع الست انجاز اللي عطلت الاكل على البوتاجاز

اتصلولنا بالاستاذ ممتاز عشان ده اللي مفقوع وهيقول اللي حصل بالتفصيل لكن هي لو اتصلنا بيها هتعمل نفسها مظلومة وهو ابو لهب وبيعذبها زي الكفار

الو

ايوة يا استاذ ممتاز

ايوا مين معايا

هو ايه اللي مين معايا دي . ماقالولك في الكنترول ولا هتستعبط

ايوا يا ست حشرية

احكيلنا يا خويا مراك عملت ايه

يعني لازم تفكروني يا عالم . انا الست دي خنقتني من اهمالها . دلوقتي هي عارفة ميعاد رجوعي من الشغل

وكنت طالب منها محشي  . يرضيكي ارجع من الشغل الا قيها لسة بتسلق ورق الكرنب

والله انا لو منك يا استاذ ممتاز ياخويا كنت حطيت دماغها في حلة المية المغلية بدل الكرونباية

طب وهي بررت الحدث ازاي

بتقول انها صحيت متأخرة ولما صحيت جالها تليفون من ام مسعد

ام مسعد مين

ام مسعد مرات اخوها

ايه الاسامي البلدي دي . كمل ياخويا حكاية مراتك وام مسعد

قولتيلها كنتي اعتذرتي بأدب وقولتيلها انك مشغولة

قالتلي لا ما ينفعش اصل ام مسعد بتتأمص بسرعة

طب ما تتأمص ولا تولع بجاز .دي ستات عايزة الدبح بعيد عنك ياخويا . كمل يا استاذ ممتاز اشجيني

وبعد ما خلصت كلام مع ام مسعد . خبطت عليها جارتها أنهار

أنهارها اسود ان شاء الله . عايزة ايه الست انهار دي كمان

كانت عايزة حبة شطة

ليه هو البقال قافل

ياستي الست انهار مش غلطانة .لأنها كانت عايزة حبة الشطة من على الباب . لكن مراتي هي اللي صممت تدخلها وتعملها شاي

يالهوي ع الستات وعمايلها ياولاد

لأ وكمان زعلانة عشان زعقتلها عشان الغدا اتأخر وبتقول عليا راجل عصبي ومايتعاشرش

معلش ياخويا الست اللي زي دي نعمة

نعمة ازاي انتي هتجننيني ياست حشرية

طب انا راضية ذمتك . مش انت بعد ما شتمتها وعصبتك قعدت تنفخ وتقول استغفر الله العظيم

ايوا فعلا دا حصل .انتي عرفتي ازاي

جوزي بيعمل كدة . واديكو بتستغفروا وتاخدوا حسنات على قفانا ابسط يا عم ماحدش قدكو

———————————————

عودة لتفاصيل الاخبار وتطورات الاوضاع الزوجية المهببة

بالنسبة للخبر بتاع خناقة الاستاذ تلفان ومراته مدام امتثال واللي راح فيها فازتين ضحية

تابعونا غداً إن شاء الله

وخبر جديد كل يوم في نشرة أخبار المتجوزين

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *