ترفيهمسلسل الحب فى زمن الـــ لا حب

مسلسل “الحب فى زمن الـــ لا حب” الحلقة السادسة والعشرون

الحلقة السادسة والعشرون

وتانى يوم فى النادى

على : خير يا ساره ايه الموضوع المهم اللى عاوزانى فيه

ساره باستغراب : هو انت متعرفشى ؟؟

على باستغراب : اعرف ايه متفهمينى فى ايه ؟؟

بداءت ساره تحكيله كلام مامتها ومامته

وهو فضل متنح وساكت ومش بيقول ولا كلمه

ساره : ايه ساكت ليه

على : اقول ايه ؟؟

ساره بنرفزه : هو انا جيباك عشان تقولى هقول ايه قولى هنعمل ايه

على : مش عارفه ………..بصراحه عمرى متخيلت ان ماما تعمل كده

ساره : خلاص ارفض وجبها من هندك وريحنى وريح نفسك

على : سبينى افكر شويه

ساره : تفكر فى ايه ؟؟

على : معلشى يا ساره سبينى يومين مع نفسى ونبقى نتكلم

ساره : ماشى يا على فكر وانا مستنيه بس ياريت مش اكتر من يومين

على : ماشى يا ساره ربنا يسهل ……..ياله عشان اوصلك

ساره : ياله بينا

ومشو هم الاتنين

على كان محتار يمكن عشان عمره مفكر فى ساره اكتر من اخت وبنت خاله وكمان الموضوع جه فجاءه ده غير موضوع كريم

ساره بقى كانت مضايقه من صدمت على وكانت مضايقه انه ممكن يشوفها مش كويسه بعد ما عرف موضوع كريم وكانت حسه انها زعلانه من تصرفه

عشان كده اول لما روحت كلمت نور عشان تحكلها

 

ساره : انا مش عارفه هو اتخض كده ليه هو انا للدرجادى وحشه يانور

نور : لا طبعا يا ساره يمكن بس اتفاجئ

ساره : انتى مشوفتيش شكله كان عامل ازاى

نور : يا بنتى بس اهدى واصبرى لحد متشوفى هيعمل ايه

ساره : استنى ايه بس هو فاكر انى بموت فيه ولا حاجه ولا انى مرميه عليه هو انا ليه بيحصل كل ده ليه

وبداءت تعيط

نور : بس يا ساره بقى يابنتى انتى مكبره الموضوع وبعدين هو بس هيفكر وهيرد عليكى وانتى متعرفيش ربنا مخبيلك ايه

ساره : ونعمه بالله بس انا تعبت وزهقت اوى يانور هو قلبى ده اللى مودينى فى داهيه ياريتنى ما حبيت كان فين عقلى وقتها

نور : كفايه انك اتعلمتى وبعدين خير يا حبيبتى صدقينى خير

ساره : يارب يانور عشان بجد انا تعبانه اوى

نور : ربنا يهدى الحال

ساره : امين يارب

…………………………………………………………………………

 

عدى اليومين

نور كانت قلقانه اوى على ساره وكانت خايفه احسن على يجرحها بسبب موضوع كريم وتكون هى السبب وفالنفس الوقت كانت خايفه ساره تفقد الثقه فى نفسها

ساره بقى كانت متوتره جدا ومكنتشى عارفه تقول ايه لعلى ولا هو هيعمل معاها ايه

على كلم ساره وطلب منها تقابله فالنادى عشان يتكلمو مع بعض

وفعلا فالميعاد ساره كانت فالنادى دخلت لقت على قاعد فالمكان اللى دايما بيقعدو فيه

ساره والتوتر باين عليها : السلام عليكم

على : وعليكم السلام …………ازيك يا ساره

ساره : الحمد لله تمام

على : انا هتكلم على طول بصراحه عشان متعبكيش معايا اكتر من كده

ساره وقلبها بيدق اوى من القلق : اتفضل

على : اولا انا اسف على المره اللى فاتت بس بجد انا مكنتش مستوعب وكانت صدمه بالنسبالى

ساره وبان على وشها الضيق

على : مش عيب فيكى والله ياساره بس انا طول عمرى بحبك كاخت ليه وبنت خالتى اللى بخاف عليها وبعزها وعمرى متخحيلتك كزوجه ليه وده كان سبب صدمتى بس لما قاعدت مع نفسى وفكرت فالموضوع بصراحه انا شايفك بنت جميله ومحترمه وشخصيتك حلوه وبتعجبنى

ساره : بتقول كده وانت عارف حكايتى مع كريم

على باستغراب : انتى عرفتى انى عارف منين؟؟

ساره : نور قالتلى

على : بصى يا ساره بصراحها انا وقتها كنت مضايق جدا لما عرفت وده مش عشان شكيت فيكى او شايف انك غلط ده لانى نصحتك اكتر من مره واعرفك حقيقة كريم بس انا كنت صاحبه وعارفه وعارفه هو ازاى ممكن يضحك على اى بنت وانا عزرك عشان انتى كنتى صغيره ومشيتى وراء قلبك وكمان عشان انا اتحطيت فى نفس موقفك ومشيت وراء قلبى واتلعب بيه عشان كده موضوع كريم مش فارق معايا عشان انا عارف ساره كويس اللى متربى معاها وعارف اخلاقك كويس اوى

ساره : انا مش فاهمه برده انت موافق على كلام مامتك واننا نرتبط

على :………بصى يا ساره انا وانتى اتجراحنا وقلوبنا محتاجه حد يداويها مش هضحك عليكى انى بحبك كحبيبه عشان انا قلبى لسه مكسور وانتى كمان زى بس عقلى شايفك زوجه كويسه وهتربى ولادى وهتحافظى عليهم وعليه وانا وانتى قرايب واولى ببعض وعارفين بعض كويس يعنى مش هنلعب بمشاعر بعض ولا هنجرح بعض

ساره بحزن : بس انا كان نفسى اتجوز حد بيحبنى وبحبه

على : طب هو احنا بنكره بعض

ساره : لاء …بس

على : طب هقولك فكره حلوه اوى

ساره : قول

على : احنا هنتتخطب وقدامنا سنه نحاول نشوف بعض بطريق مختلفه شويه ونقرب من بعض ولو قدرنا نحب بعض يبقى تمام لو مقدرناش وحسينا اننا اخوات وبس او عدك انا هتحمل مسؤلية كل حاجه ووعد منى مش هتتجوزى غير اللى بتحبيه وبيحبك وبيقدرك وبيحافظ عليكى

ساره بفرحه : مش عارفه اقولك ايه ………….انت احسن على فالدنيا

على بابتسامه : اعتبر ده اعجاب

ساره بكسوف : بطل غلاسه بقى

على : تتصدقى اول مره اشوفك مكسوفه كده هههههههههههههههه

ساره : على امشى من قدامى

على : هههههههههه خلاص خلاص

وقاعدو يغلسو على بعض شويه

وبعدين ساره سكتت شويه

ساره : ينفع اسالك فى حاجه ؟؟

على : طبعا ………… بس الاول هتفق معاكى على حاجه

ساره : قول

على : مش عاوزين نخبى على بعض اى حاجه ودايما نصارح بعض باللى جوانا ومشاعرنا عشان نقدر نوصل لبعض …. ..موافقه ؟

ساره بابتسامه : اكيد موافقه

على : ها بقى عاوزه تسالى فى ايه

ساره : موضوع نور …………..

———–———-———————-————

ونكمل في الحلقة السابعة والعشرون  .. الى اللقاء في الحلقة السابعة والعشرون

بقلم الكاتبة :ريم أحمد

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى