مسلسل “رجل” الحلقة الرابعة عشر الخامسة عشر

 

 

الحلقة الرابعة عشر

تانى يوم الكل صحى من بدرى وفطرومع بعض وخرجو قاعدو شويه فالجنينه مصطفى وسناء وثريا كانو قاعدين مع بعض بيتكلمو وماجد قاعد فى ركن لوحده وقاعد يقراء فى كتاب بس مكنشى مركز فيه شويه وخرجت لاما

لاما : بابا … هروح اقعد عند البحر شويه

مصطفى : الجو برد يا لاما خليكى هنا معانا

لاما بترجى :عشان خاطرى يا بابا

مصطفى : يعنى هتروحى لوحدك

لاما :متخافشى مش هبعد هقعد هنا قدامكو

مصطفى : ماشى يا لاما

ماجد كان متابع الحوار بس متكلمشى شوييه وقرب عليه اخو لاما

عبد الرحمن : ماجد تعالى العب معايا

ماجد : مش قادر يا بودى

عبد الرحمن : عشان خاطرى …العب معايا شويه

ماجد بابتسامه : حاضر

وقاعد يلعب معاه بالكوره بس عينه كانت على لاما

ماجد : بودى انا تعبت بقى

عبد الرحمن بزعل : حاضر

ماجد قرب منه : طيب متزعلشى …بليل هنخروج مع بعض ونلعب كتير …ماشى

عبد الرحمن بفرحه : بجد … ماشى

وخد الكوره وقعد يلعب لوحده

ماجد طلع اوضته لبس جاكت وجاب جاكت تانى ونزل مشى نحيت لاما اللى كانت قاعده قدام البحر الرمله وسرحانه

ماجد قرب منها وحط الجاكت على كتفها

لاما اتخضت : اييه

ماجد : مفيش الجو برد

لاما بابتسامه حزينه : شكرا … تعبت معايا

ماجد وهو بيقعد جانبها : ممكن اقعد ولا عاوزه تقعدى لوحدك

لاما :ده على اساس انك مقعدتش

ماجد وهو بيعمل نفس قايم : ممكن اقوم عادى

لاما وهى بتمسك ايده : لا خلاص خليك

ماجد بص لايد لاما وهى مسكه ايده وهو فرحان

لاما اخدت بالها وسحبت ايدها بسرعه : انا اسفه

ماجد : اسفه على ايه

لاما وهى بتبص ع البحر : على كلامى ليك امبارح

ماجد فضل ساكت ولاما كمان فضلو يبصو على البحر شويه

ماجد : شكل البحر حلو … عاوز انزل

لاما بخوف : لا طبعا الجو برد ….وبعدين الموج عالى اوى

ماجد : متخافيش عليه انا واخد بطولة العالم فى السباحه

لاما : ههههههه يا سلام …ده امتى الكلام ده

ماجد بابتسامه : انكر ى بقى انكرى … فاكر وانتى صغيره وكنتى بتغرقى مين اللى انقذك مش انا

لاما بحزن : ليه انقذتنى ؟

ماجد بصلها بستغراب وشاف فى عنيها حزن ووجع

لاما : ليه بجد ليه انقذتنى كنت سبنى

ماجد : ليه كده يا لاما

لاما : مش كان زمانى دلوقتى ملاك عند ربنا …كنت طفله لسه مليش ذنوب كتير ربنا زمان كان هيسامحنى بس دلوقتى لاء

ماجد : ربنا بيسامح فى اى وقت لما فعلا تبقى من جواكى ندمانه ومش عاوزه تغلطى …ربنا رحيم بعباده ورحمته وسعه

لاما : ونعمه بالله …..بس يارتنى كنت مت وقتها

ماجد بضيق : لاما متقوليش كده تانى

لاما بدموع : انا تعبانه اوى يا ماجد

ماجد : حاسس بيكى بس مش عارف فى اييدى ايه اعملهولك …نفسى اشوف ابتسامتك من تانى بس مش عارف وده خنقنى اوى

لاما : انا حسه ان ربنا زعلان منى اوى

ماجد : خلاص صلحيه اللى بيزعل حد لازم صالحه عشان يرضى عنه

لاما وهى بتمسح دموعها : ازاى

ماجد : اللى بيصالح حد بيشوف ايه اكتر حاجه بيحبها وبيعملهاله …. حاولى تغير من نفسك وقربى منه وادعيله وصلى وحكيله كل اللى فقلبك … غير من طريقه لبسك ….وغير من تصرفاتك اللى بتزعله

لاما : تعرف انى فكرت اتحجب

ماجد بابتسامه : تعرفى هيبقى شكلك حلو اوى بالحجاب …استنى كده

وقرب منها ومسك الشال اللى كان على كتفها وحطه على شعرها زى الحجاب

ماجد بايتسامه : تصدقى شكلك حلو ومنور وشك اوى …بس

قرب ايده من على وشها ومسح دموعها : بس لو الدموع دى اتشالت وحطينا بدالها ابتسامه هتبقى احلى واحلى

لاما بتلقائيه ابتسمت لكلامه

ماجد بفرحه : شوفتى بقى … زى القمر

لاما : انا معايا كام طرحه ….من انهارده هتحجب ولما ننزل مصر هروح اشتر ى لبس جديد

ماجد : ممكن طلب

لاما : ايه

ماجد : تنزلى معايا انهارده نجيب اول طقم …انا عاوز اجبلك اول طقم هديه …. وكمان انا واعد بودى انى هخروج معاه …نخروج كلنا ونتفسح ايه رائيك

لاما : امممممممم موافقه

ماجد كان مبسوط اوى وقاعدو شويه يتكلمو لحد ما جيه وقت الغداء

 

……………………………………………………………….

 

حاتم كان قاعد مع ياسمين فالصالون بس كان قاعد سرحان

ياسمين بقلق : حاتم مالك انهارده

حاتم : هااا … مفيش

يياسمن بزعل : بتخبى عليه

حاتم قرب منها ومسك ايدها : ابدا ياحبيبتى مقدرشى اخبى عليكى حاجه …. انا بس مشغول شويه بموضوع لاما

ياسمين بحزن : لاما صعبانه عليه اوى …انت عارف ساعات بلوم نفسى

حاتم : ليه ياحبيبتى وانتى ذنبك ايه

ياسمين : انا برده لما اتخطبنا بعدت عنها وكنت فين وفين لما بكلمها مع انى عارفه انى صاحبتها الوحيده ..هيثم الحيوان استغل ده وضحك عليها

حاتم : لا يا ياسمين ….دى حاجه ربنا كتبهالها واكيد هتتعلم منها صحيح الدرس قاسى اوى بس هتتعلم …وانا مش هسيبه ولا زم اشوفلها حل

ياسمين : انت ناوى تعمل ايه

حاتم : هسافر اسيوط ….. اكيد هلاقى مصيبه تانيه عاملها هناك

ياسمين : بس انا خايفه عليك يا حاتم

حاتم بحب: متخافيش احنا مع الحق وربنا اكيد هيبقى معانا

ياسمين : انت عارف كل يوم بتكبر فى نظرى اكتر وبحبك اكتر واكتر ….. بجد انت احلى هديه ربنا بعتهالى

حاتم : ده عشان انتى احلى انسانه فالدنيا دى كلها

ياسمين : لا انت

حاتم : لا انتى واسمعى الكلام

ياسمين بابتسامه : لا انت برده …واسمع الكلام

حاتم : بحبك

ياسمين : بحبك

 

……………………………………………………………….

 

بعد الغدى لاما جهزت نفسها وحاولت تلبس لبس واسع شويه ولبست طرحه قاعدت كتير لحد معرفت تلفها واخيرا خلصت ونزلت

الكل كان قاعد تحت وماجد وبودى كانو لبسين من زمان ومستنيانها …شويه ونزلت عليهم وهى مضايقه وبتشاكل الطرحه والكل كان مستغرب وبيبصو عليها

ثريا باستغراب : ايه ده انتى هتتحجبى

لاما بضيق : ماما انا مش عارفه الفها صح

مصطفى بفرحه : بالعكس يالاما حلوه اوى ومظبوطه

سناء : شكلك بقى احلى فى الحجاب يا لاما

لاما : بجد يا طنط

ثريا قربت منها : بصى حطى دبوس هنا وهى مش هتتفك منك وهتتظبط

ثريا كانت فرحانه والكل كان فرحان واولهم ماجد

عبد الرحمن : ياله بقى … انا قاعد من زمان

ماجد : ياله يا استاذ … عاوز تروح فين

عبد الرحمن : نروح السنيما … وعاوز اكل بيتزا … وعاوز

ماجد : ايه كل ده ..ده انت داخل على طمع بقى … احنا هنروح زى ما لاما عاوزه

وبص للاما : ها يا لاما تروحى فين

لاما وهى بتبص لعبد الرحمن اللى بيحرك شفايفه انها تقول زى اللى قاله : نروح السينما … وعاوز اكل بيتزا …ها وايه كمان

ماجد مسك بودى وقعد يزغزغ فيه : اسكت يا سوسا انت ..

وكلهم ضحكو

مصطفى : خالى بالك منهم

ماجد : فى عنيه يا عمو … ياله بينا

وخرجو مع بعض وطبعا راحو السينما وماجد كان مبسوط جدا مع ان عبد الرحمن صمم يدخولو فيلم انيميشن بس لما لقى ضحكت لاما فرح اوى

وبعد كده اتمشو شويه واشترو لعب لعبد الرحمن ودخلو محل عشان ما تجيب الطقم

ماجد : ينفع انا اللى اختار

لاما : ماشى بس لو معجبنيش مش هجيبه

ماجد : انا عارف ان ذوقى هيعجبك

لف ماجد شويه فالمحل وجاب جيب اسمر وعليه شميز فيروزى بس كان شكلهم بنوتى اوى ووسعين ومعاهم طرحه لونها اسود فى فيروزى

ماجد : خدى قيسى دول

لاما بقلق : انا هلبس دول .

ماجد : ياستى بس البسيهم لو مش عجبينك مش هنجبهم

لاما دخلت وهى متردد

 

الحلقة الخامسة عشر

 

ماجد لف شويه فالمحل وجاب جيب اسمر وعليه شميز فيروزى بس كان شكلهم بنوتى اوى ووسعين ومعاهم طرحه لونها اسود فى فيروزى

ماجد : خدى قيسى دول

لاما بقلق : انا هلبس دول .

ماجد : ياستى بس البسيهم لو مش عجبينك مش هنجبهم

لاما دخلت وهى متردد وشويه خرجت

ماجد اول ما شافها اقعد يضحك

الجيب كانت وسعه جدا والشميز ايده طويله كان شكلها يضحك لاما وهى مضايقه : انت بتضحك …ايه اللى انت جايبه ده

ماجد قرب منها : هههههههه شكلك حلو اوى ممكن تشتغلى ارجوز فالسيرك

لاما وهى بترجع البروفه وهى زعلانه : انا غلطانه اصلا انى بسمع كلامك

ماجد :ههههه طيب استنى بس

وقرب منها وعدلها كوم الشميز : بصى هجبلك مقاس اصغر من الجيب بس الشميز حلو انتى اللى مش مظبطه نفسك …

وقرب ايده لوشها على شعره نزله من الطرحه

ماجد : وبعدين شعرك كله يبقى جوا الطرحه … شوفتى بقى شكلك كده احسن

لاما كانت بتبصله وقلبها بيدق جامد كان فى مشاعر كتير جواها لماجد ومع كل كلمه كان بيقولها كانت بتتحرك وبتلخبطها اكتر …فرحانه باهتمامه وحنيته عليها وكانت بتكلم نفسها

” ياه وحشتنى اوى ياماجد … هو ده ميجو بتاع زمان اللى حبيته وحبيت قربه منى ….بس″

وفاقت من سرحانها على صوت ماجد

ماجد : ايه يابنتى ياله ادخلى غيرى عشان نمشى هنفضل هنا كتير

لاما : هااا …. حاضر

ماجد اشترى الطقم بعد مغير المقاسات … وبعد كده خدهم واتعشو بره بيتزا عشان خاطر بودى وكانو مبسوطين وفرحانين اوى وهم مع بعض

 

…………………………………………………………

 

لاما روحت ميته من التعب دخلت نامت وهى مش حسه باى حاجه وتانى يوم الصبح صحت من بدرى قاعدت شويه فى اوضتها كانت سرحانه وبتفكر فى ماجد وهى بتبص على الطقم اللى محطوط على الكرسى وبتفتكر كل حاجه حصلت امبارح وتبتسم وفجاءه تفتكر هيثم واللى حصل معاها ترجع دموعها تنزل وهى بتكلم نفسها

” خلاص يا لاما معدشى ينفع تفرحى تانى ….انتى خلاص انكتب عليكى طول عمرك تعيشى فالحزن والوجع “

“بس انا مصدقت ماجد رجع تانى ليه رجع يقرب منى …انا ببقى مبسوطه اوى وانا معاه “

“ماجد هيفضل مجرد حاجه بتتمنيها بس عمرك مهتوصللها …لاما انتى مبقتيش تصلحى للحب والارتباط لا لماجد ولا لغيره … ابعدى احسن متجرحيه وتجرحى نفسك متتعلقيش نفسك بحلم جميل وانتى عارفه ان عمره مهيتحقق”

“بس انا هعيش ازاى وهعمل ايه فى حياتى ….انا لازم اشغل نفسى بحاجه …انا لو فضلت كده هتجنن”

فاقت من سرحانها على صوت الباب

لاما : ادخل

عبد الرحمن : لاما بابا بيقولك مش هتنزلى كلنا صحينا وماما بتحضر الفطار

لاما : ماشى يا بودى … هلبس وهنزل اهوه

خرج عبد الرحمن وقامت لاما لبست ونزلت فطرو كلهم مع بعض وبعد كده قاعدت فى الجنينه ومعاه قلم وورقه بتشخبط فيهم

ماجد : بتعملى ايه ؟

لاما بابتسامه : مفيش

ماجد وهو بيبص فى الورقه : ايه ده شكل الطقم اللى جبتهولك امبارح

لاما بابتسامه : بقالى كتير مرسمتش

ماجد وهو بيضحك : فكره البدل اللى كنتى بترسمهالى ههههههههه كنتى مجنونه

لاما : دول لو كانو اتنفذو كنت هعمل انقلاب فى عالم الازياء

ماجد : هههههههه قصدك هتقلبى حال البدل

ماجد سكت شويه كانه افتكر حاجه : استنى كده هوريكى مفجاءه

وطلع جرى على اوضته وجاب محفظته ونزل وقاعد جانبها وطلع ورقه من المحفظه

لاما باهتمام : ايه ده

ماجد فتح الورقه كان فيها تصميم لفستان فرح

ماجد بابتسامه : فكره

لاما وهى بتاخد الورقه منه ورجعت بالزمن حوالى 6 سنين

 

فلاش باك

لاما كانت نزله تجرى لماجد اللى كان قاعد فى اوضته

لاما بفرحه : ماجد شوف الفستان ده

ماجد : ايه ده

لاما : ده فستان فرحى … انا اللى رسمته

ماجد بابتسامه : حلو اوى … بس مش لما نلاقى العريس الاول نبقى نشوف الفستان

لاما : مانا عارفه مين عريسى

ماجد باستعباط : بجد هو مين بقى …؟؟

لاما : ملكشى دعوه مش هقولك

ماجد : بس الفستان ده عريان من فوق …افرضى عريسك مش موافق انك تلبسيه

لاما بحزن : بجد مش هيرضى … طيب هات كده

لاما مسكت القلم : بص انا ممكن اعمله هنا بلرو وقاعدت ترسم باهتمام وماجد بيبصلها بحب وبيتخيلها وهى لبسهوله يوم فرحهم

لاما : هااا ايه رائيك كده

ماجد بحب : حلو اوى .. وعليكى هيبقى احلى … هاتيه بقى

لاما باستغراب : ليه

ماجد : هعينه معايا لحد ميجى اليوم واخليهولك حقيقى

لاما بابتسامه : احم احم …. لا معلشى عريسى هواللى هيخلهولى حقيقى

وبتقول فى سرها ” انطق بقى … نفسى اوى البسلك الفستان ده “

ماجد وهو بيخبى الورقه : لما يبقى يجى هبقى اديهاله بس لحد ما اليوم ده يجى هتبقى معايا … وياله بقى اطلعى شوفى مذكرتك لما تكبرى نبقى نشوف الموضوع ده

لاما بتكشيره : انا مش صغيره …وعلى فكره بقى انت غلس

 

لاما ترجع للواقع وهى بتبص على الرسمه ودمعه تخدعها وتنزل غصب عنها

ماجد : ممكن اعرف بتعيطى ليه

لاما : مفيش ….اصلى كان عندى احلام كتير بس ضاعت وانا بغبائى استسلمت ومحققتش منها حاجه

ماجد : طول مانتى عايشه مفيش حلم بيضيع … احلمى من تانى ومستسلميش وحققى حلمك

لاما : تفتكر …بالسهوله دى ….الكلام سهل بس الفعل صعب

ماجد : مفيش حاجه صعبه ….انتى مش كان حلمك تطلعى مصممة ازياء

لاما : اه … بس خلاص

ماجد : ليه خلاص …انتى لسه عندك الموهبه ممكن تخدى كورس عشان تقوى موهبتك بالعلم وبعد كده تبدائى تشتغلى وتحققى حلمك ….. بصى احنا اول منروح هشوفلك موضوع الكورس ده ….. وبعد كده لو لقيتك فعلا عندك طموح وعندك استعداد تقفى جانب حلمك وهتحققيه …انا هقف جانبك وهساعدك

لاما : بجد …. ازاى

ماجد : هشاركك ونفتح محل ويبقى كل اللى فيه من تصميمك ومين عارف مش يمكن يبقى ليكى ماركه عالميه … ومحدش يعرف يكلمك

لاما : انت بتتكلم بجد

ماجد : اه والله …. بس الاول احس انك هتقدرى تساعدى نفسك عشان انا اقدر اساعدك

لاما بفرحه : بجد انت احلى ماجد فالدنيا ….. ربنا يخليك ليا

ماجد بحب : ويخليكى ليا

لاما بارتباك : انا … انا هقوم اشوف ماما بتعمل ايه

وقامت بسرعه وهى حسه بدقه فى قلبها حست انها بتضعف تانى قدامه وده مينفعشى …لازم تقوى مينفعشى تحب ولا حتى ينفع تتحب …بس اكيد انها هتسمع كلامه وتحاول تحقق حلمها فالشغل اللى هيشغلها عن كل حاجه وينسيها وجعها وخسرتها وجرحها

 

………………………………………………….

 

حاتم سافر اسيوط وراح سال على هيثم فى الكليه ومين ممكن يعرفه او حتى عنوانه اللى كان عايش فيه

وفعلا عرف العنوان وراح يسال عليه فيه وهناك حاتم شاف شاب واقف فى مدخل العماره

حاتم : السلام عليكم

الشاب : وعليكم السلام

حاتم : لو سامحت كنت بسال عن واحد كان ساكن هنا من حوالى سنه اسمه هيثم حكيم

الشاب بنرفزه وكان هيمسك فى حاتم : انت تعرفه …هو فين … انا لو شوفته هقتله

حاتم وهو بيحاول يهديه : اهدى بس …انا معرفشى هو فين انا بدور عليه

الشاب بضيق : وبدور عليه ليه … اكيد قريبه ولا من اصحابه الفاشلين اللى زيه

حاتم : بص حضرتك من الواضح انك بتكرهه واتاذيت منه … انا كمان اعرف ناس اذاهم وبدور عليه عشان كده …احنا ممكن نساعد بعض …يعنى لو حضرتك حابب

الشاب : ان اسف انى تعصبت عليك بس انت متعرفشى هو عمل معايا ايه … الواطى ده دمرلى عيلتى كلها

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة :ريم أحمد

 

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *