ترفيهمسلسل رجل

مسلسل “رجل” الحلقة العشرون والحادية والعشرون

الحلقة العشرون

وخلص الفرح والاهل والاصحاب وصلو العرسان على البيت وهنوهم ومشو وسابوهم مع بعض

وبعد شويه ماجد لقى الباب بيخبط وفتح وكان حاتم ومعاه مأذون

لاما باستغراب : ايه ده ؟؟

ماجد لحاتم : ادخل يا حاتم … جبت شاهد تانى

حاتم : اه معانا مساعد الشيخ

لاما وهى مخضوضه : ماجد بقولك فى ايه … ايه ده

ماجد مسك ايد لاما : تعالى يا لاما عاوزك

وخدها ودخلو الاوضه واول ما قفل الباب

لاما بدموع :ماجد انت كنت بتضحك عليه … انت هطلقنى وتسبنى …. كنت بتضحك عليه و بتتجوزنى قدام الناس بس … ماجد رد عليه …ليه عملت كده حرام عليك

ماجد بابتسامه : اهدى يا مجنونه … ادينى فرصه اتكلم

لاما بعياط : هتتكلم وتقول ايه

ماجد : مانتى لو سكتى شويه وبطلتى عياط هفهمك

لاما قاعدت على السرير : هتفهمنى ايه ؟

ماجد قاعد على ركبته قدامها : بصى يا لاما كتب كتابنا اللى فالقاعه ده باطل وانا لسه مش جوزك

لاما باستغراب وهى بتمسح دموعها : ازاى يعنى

ماجد : بصى هو المفروض ان اى كلمه بتتقال لو فيها حاجه مش صح بتفسد العقد وبيبقى باطل

ماجد سكت شويه وبارتباك : يعنى انا لما كتبت العقد مع عمى قال انك بكر وده مش حقيقى وانك المفروض بتتجوزى لاول مره … فهمانى

لاما باحراج وضيق : يعنى احنا هنكتب الكتاب تانى

ماجد : بصى انا اتكلمت مع المأذون وفهمته كل حاجه وهنكتب الكتاب تانى بس بالحقيقه وانتى عديتى 21 سنه يعنى هتبقى وكيلة نفسك

لاما : بس انا محرجه اطلع قدام الناس اللى بره وهم عارفين اللى حصل   ….ده موقف وحش اوى يا ماجد

ماجد وهو بيطمنها وماسك ايدها : ملكيش دعوه بحد يا لاما وبعدين مفيش حد بره غير حاتم وده صاحبنا وعارف كل حاجه والمأذون والمساعد بتاعه ودول مش هيفرقو معانا …. لاما مينفعشى نعيش مع بعض فالحرام مهما كان احراجنا لازم نعمل الصح وبعدين انتى معملتيش حاجه حرام انتى كنتى متجوزه … ماشى يا حبيبتى

لاما بخوف : ماشى

ماجد : طيب ياله بقى مينفعشى نسيب الناس بره كده .. ياله بينا

وخرجت لاما مع ماجد وابداء المأذون فى اجرات الجواز وكتب الكتاب وخلصو والكل مشى ولاما كانت لسه قاعده مكانها باين عليها الزعل ماجد قرب منها

ماجد : ممكن بقى اعرف عروستى زعلانه ليه

لاما بتنهيده : حسه انى طول عمرى هفضل اتعاقب على غلطتى

ماجد : ليه بس بتقولى كده

لاما : مش عارفه ياماجد …حسه انى كل مفرح هلاقى حاجه تفكرنى باللى حصل وضيع فرحتى …ماجد انا حسه ان فرحتى اتسرقت منى وعمرى مهلاقيها

ماجد بحنيه وهو بيقربها من حضنه : لا يا لاما فرحتك موجوده انا مسؤال انى ارجعهالك تانى وطول مانتى معايا هبعد عنك اى حزن ومش هخلى الماضى ياثر عليكى ولا على فرحتك

لاما : ماجد انت طيب اوى …بس خايفه فى يوم تندم

ماجد : اندم …. اناعمرى مهندم بدا …انا ندمى الوحيد على السنين اللى بعدت فيها عنك …. لاما انتى متعرفيش انا بحبك قد ايه …بجد انتى احلى حاجه حصلتلى فى دنيتى طول عمرك حتى وانتى صغيره كنتى بتعرفى تسعدينى ازى وبتعرفى تخرجى اى ضيق جوايا …عمرى محسيت بالراحه مع حد غيرك

لاما : ربنا يخليك ليا طول العمر … وانا كمان بحبك اوى …طول عمرى كنت بحلم باليوم اللى هيجمعنا فى بيت واحد وكنت فقدت الامل ان حلمى ده يتحقق بس الحمد لله اخيرا اتحقق

ماجد : الحمد لله ياحبيبتى

وقربها منه وخدها فى حضنه جامد

 

……………………………………………………………….

 

بعد 5 سنين

 

لاما كانت مبسوطه جدا مع ماجد وفتحت اخيرا محلها الخاص وقدرت تنجح فى مجال الازياء ويبقى ليها تصميمها اللى بتميزها…انا ماجد كان ناجح فى شغله وقدر يوسع شركته وبقى عندهم ولد شقى اوى وزى العسل اسمه امجد عنده 4 سنين

حاتم بشطرته واخلاصه لماجد بقى مدير الحسابات فى شركه ماجد وكمان صاحبه المقرب اللى بياخد رائيه فى حاجات كتير ام ياسمين بقت ست بيت هايله وزى العسل وكل مسؤليتها هى ولادها ياسين وعنده 5 سنين وحالا عندها سنه ونص وطبعا جوزها وحبيب قلبها حاتم

سناء مامت ماجد توفت بعد جوازه بحوالى سنه عشان كده سابو شقتهم ونقلو وعاشو فى بيت العيله

ندى كانت مضربه عن الجواز وكل ما عريس يجلها تطفشه وكانت مبتصدق يتجمعو كلهم مع بعض عشان تضايق لاما بس ماجد كان بيوقفلها

 

وفى يوم لاما كانت قاعده فى البيت بليل ومستنيه ماجد بعد ما نيمت امجد وحضرت العشا وشويه وسمعت صوت عربيه طلعت البلكونه ولقته ماجد دخلت بفرحه وظبطت السفره وقاعدت تستنى اللى يدخل بس ماجد مدخلشى طلعت تانى البلكونه لقت العربيه مركونه بصت على الباب مش لقيه حد

لاما باستغراب : هو راح فين

هى وهى بتكلم نفسها ” مكن بابا كان عاوزه ولا حاجه وطلعله … بس مش كان قولى حتى … هقعد استناه وخلاص “

وفضلت قاعده على الانتريه اكتر من ساعه لحد ما راحت فالنوم

 

فالوقت ده

ماجد كان طالع شقته قابل عمه محسن عند الباب

ماجد : اهلا ياعمى اخبارك ايه

محسن بضيق : الحمد لله …انت اخبار مراتك وابنك ايه

ماجد بقلق : الحمد لله … مالك ياعمى

محسن : ندى مغلبانى معاها كل ميجلها عريس ترفض …انا تعبت منها وانا خلاص مبقاش فالعمر كتير ونفسى اطمن عليها

ماجد : ربنا يديك الصحه .. متقولشى كده … طيب هى بترفض ليه يمكن مش بقتنع بالناس اللى بتجلها

محسن : هى اصلا مش بترضى تقابلهم … انا خايف لتكون تعرف حد من ورانا

ماجد : لا يا عمى متقولشى كده ندى عاقله …. واكيد لو فى هتقولنا

محسن : طيب متطلع معاها وتتكلم معاها هى بتحترمك وممكن تعرف منها هى بترفض ليه

ماجد بارتباك : انا ؟؟

محسن : معلشى بقى ياماجد هتقل عليك

ماجد : لا ياعمى متقولشى كده هطلع معاك اكلمها

محسن : طيب انت حتى ممكن تقولها انك انت اللى جايب العريس

ماجد : ماشى ياعمى اللى يريحك

طلع ماجد مع محسن وشويه وخرجتله ندى من اوضتها ووقفو مع بعض فالبلكونه يتكلمو

ندى : خير يعنى غريبه انك تكون عاوز تتكلم معايا

ماجد : ليه يعنى .. مش بنت عمى وزى اختى

ندى بضيق : زى اختك … عاوز ايه يا ماجد

ماجد : جيبلك عريس … شاب محترم وكويس

ندى قاطعته : من غير متكمل مش موافقه

ماجد : ليه ؟؟

ندى : كده عشان انا مش عاوزه اتجوز …مش هتجوز غير اللى بحبه

ماجد : يعنى انتى بتحبى حد ولا لسه مستنيه تحبى ؟؟

ندى : غبى … ماجد انا محبتشى ومش هحب غيرك

ماجد بزعيق : ندى اعقلى بقى شويه وسيبك من الكلام الفارغ بتاعك ده … انا مش بحب ولاهحب غير مراتى وحبيبت عمرى لاما …متعلقيش نفسك وحياتى على وهم

ندى بدموع : حبى ليك وهم ياماجد

ماجد : اه وهم انتى بتحبينى بس عشان انا بحب لاما وجوز لاما لكن لو كنت حببيت حد تانى مكنتيش هتحبينى ولا هتحسى بكده بطلى حقد وانانيه بقى … من وانتم اطفال وانتى بتغيرى منها وبتحبى تخدى اى حاجه فى ايدها … متخليش الحقد والغيره تعميكى ودمرلك حياتك …. عموما انتى حره فى حياتك دمريها زى مانتى عاوزه بس ابعدى عنى وعن حياتى … وانا بقولك اهوه لو ضايقتى لاما تانى مش هيحصلك كويس انتى فاهمها

وسابها ونزل وهى فضلت وقفه سرحانه وبترجع لذكريات الطفوله

 

فلاش باك

لاما كانت قاعده على السلم وبتلعب بعروسه جديده

ندى : الله حلوه العروسه دى تعالى نلعب سواء

لاما : لاء انا هستنى ميجو عشان بشوف العروسه الجديده

ندى بغيظ وهى بتشد العروسه : لاء هو كل حاجه ميجو انا هلعب بيها

وشدتها جامد وقعت لاما سلميتن على وشها وتعروت

جه ماجد بسرعه ولحق لاما وضرب ندى وخده منها العروسه وداها للاما

 

ندى ترجع للواقه وهى بتمسح دموعها

” هى اللى مكنتشى بترضى تلعب معايا … كل حاجه ماجد ..انا لازم اخد منها ماجد عشان متلقيش حد تلعب معاه ابدا “

وفضلت تعيط

 

ماجد نزل لقى لاما نايمه على الانتريه وكانت محضره عشا حلو اوى بس برد …قرب منها وباسها ” انا اسف ياحبيتى عشان اتاخرت عليكى “

لاما بتفوق من نومها بس لسه نيمانه :ماجد انت جيت ..هسخن الاكل …انت كنت فين

ماجد حط صبعه على شفايفها : هووووش

وشالها ودخل بيها اوضت النوم
الحلقة الحادية والعشرون

لاما كانت نايمه فجاء لقت نور الشمس بيدخل اوضتها قامت وهى مخضوضه ” ماااااااااااااجد “

بصت جانبها لقته نايم رجعت تانى براحه نامت على السرير وهى بتبصله وبتلمس ملامحه والابتسامه على وشها وبتشكر ربنا على السعاده اللى هي فيها بس كان جواها خوف من اللى جى ياترى السعاده دى هدوم ولا لاء

 

لاما صحت حضرت الفطار وشويه ولقت ماجد وراها وخدها فى حضنه

ماجد بابتسامه : وحشتينى …كده تنامى من غير مشوفك بليل

لاما بزعل : يا سلام …. انت كنت فين اصلا

ماجد بارتباك وهو بيبعد عنها : كنت فالشغل هكون فين يعنى

لاما : انا شوفتك لما جيت بالعربيه وبعدين قاعدت اكتر من ساعه وانت مجاتشى وفالاخر روحت فالنوم

ماجد : اصل …وانا طالع قابلت عمى محسن وطلعت معاه

لاما باستغراب : ليه ؟

ماجد : كان عاوزنى اكلم ندى عشان جايلها عريس

لاما بغيظ : ندى ….طيب وانت مالك

ماجد : هعمل ايه بس يالاما عمى دبسنى وبعدين متنسيش انها بنت عمى وليها حق عليه

لاما فضلت ساكته وكان باين عليها الزعل

ماجد قرب منها : ممكن اعرف حبيبى مكشر ليه ع الصبح

لاما : يعنى مش عارف … ماجد انت عارف ندى بترفض العرسان ليه ؟

ماجد باستعباط : اكيد يعنى مش مرتاحه لسه نصابها مجاش

لاما : لا ياماجد … عشان ندى بتحبك

ماجد : بس انا بحبك انتى

لاما : بس انا خايفه منها ومن طريقتها معايا ومعاك

ماجد : متخافيش مفيش اى حاجه هتاثر علينا …عشان انا مش هحب حد غيرك

لاما : بس

ماجد وهو بيقرب منها اكتر : من غير بس

امجد دخل عليهم وهو بيدعك فى عينه : مامى

ماجد وهو بيبعد عن لاما : ابنك مظبط نفسه

لاما بابتسامه : ايوه يا روح مامى

امجد : بتعملو ايه ؟

ماجد : ها ولا حاجه ياحبيبى بقول لماما سر

امجد وهو بيجرى على ماجد : قولى ثرررررر

ماجد شاله وهو بيضحك واخده فى حضنه

 

…………………………………………………………….

 

بعد الضغط على ندى وافقت على العريس واتقرات الفاتحه   وبيجهزوللخطوبه

لاما كانت فرحانه عشان ندى اتخطبت عشان تبعد عن ماجد وعن حياتهم بس برده كانت حسه انها مش مبسوطه وقلبها مقبوض بس كانت بتحاول تكدب احساسها وتعيش حياتها مع ماجد وابنها اللى مالى عليها حياتها وشغلها اللى قدرت تنجح فيه

 

وجيه يوم الخطوبه كانت فى قاعه شيك الكل لبس وجهز نفسه عشان يروح الخطوبه

ماجد كان لابس وقاعد فى الصاله مستنى لاما وامجد

ماجد بصوت عالى : ياله بقى يا حبيبتى هنتاخر

لاما من الاوضه : حاضر خلصت اهوه

وشويه وطلعت هى وامجد كانت لبسه فستان شيك اوى لونه بينك وطرحه نفس لون الفستان وكان شكلها حلو اوى وامجد كان لابس بدله وببيون نفس لون فستان لاما وكان شكله امور اوى

ماجد بتكشيره : شكلى كده بقيت عزول

لاما باستغراب : ليه

ماجد : انتى وابنك عاملين عريس وعروسه ومطنشينى

لاما بايتسامه : ايه ده بقى انتى بتغير من ابنك

ماجد وهو بيشدها فى حضنه : انا اصلا بغير عليكى من نفسى

لاما وهى بتبعد عنه : طب ياله عشان هنتاخر

ماجد شدها تانى لحضنه :مش مشكله لما نتاخر

امجد وهو بيشد لاما من الفستان :ياله يامامى عثان اللئث

ماجد :هههههههه ابنك بيتكلم هيروغريفى

وشال امجد وقاعد يزعزغ فيه : انت بتقول ايه هتجنينى

امجد : عاوث اللئث يا بابتى

لاما : هههههههه بيقول عاوز يرقص

ماجد : طيب ياله يامامى عشان نلئث كلنا

………………………………………………………………..

 

فى القاعه الكل قاعد بيهنى وفرحان والاغانى شغاله ومستنن العروسه والعريس يدخلو وشويه الزفه وصلت ودخلت ندى ومعاها عريسها

ماجد كان واقف مع مصطفى وبيبص بعينه على لاما مكنشى لقيها

ماجد : عمى مشوفتش لاما

مصطفى : كانت وقفه مع ثريا من شويه

ماجد راح لثريا : طنط حضرتك مشوفتش لاما

ثريا : اخدت امجد تغيرله

شويه وجات عليه لاما وهى شايله امجد

ماجد : ايه يا حبيبتى كنتى فين كنت قلقان عليكى

لاما : ابنك وعمايله … هعمل ايه يعنى

ماجد : طيب تعالى معايا نبارك لندى

لاما :طيب استنى بس ادى امجد لماما

وراحت لاما لثريا وسابت امجد معاه ومشت مع ماجد

 

كان فى ناس كتير على الكوشه لدرجه ان لاما مكنتشى شايفه العريس ولا حتى العروسه وقفت شويه لحد ما الناس نزلت

وشافت ندى وقربت منها : مبروك يا ندى

ندى بدون نفس : الله يبارك فيكى …ها مبسوطه انى هريحك منى اخيرا

لاما : انا مبسوط عشانك وعشان هنفرح بيكى

ندى بغيظ : اعرفك بعريسى … هيثم

لاما بصت على هيثم وهى متنحه ومش مستوعبه ان اللى هى شيفاه ده بجد

هيثم بابتسامه وهو بيمد ايه ليها : اهلا

لاما وقفه مكانها ومش بتتحرك وهى بصه عليه وبس ولا حتى ردت السلام

ماجد لاحظ صدمتها وقرب منها : لاما انتى كويسه مالك

لاما برده ساكته ومش بتتكلم وذكرياتها مع هيثم ماشيه قدامها كانها لسه حصله امبارح

ندى باستغراب : لاما فى ايه مالك

لاما بارتباك : ها ابدا مفيش حاجه ونزلت بسرعه من على الكوشه

ندى وهى بتبص لماجد : فى ايه ؟

ماجد : مش عارف ….

سلم على هيثم وباركله ونزل وراء لاما

لاما مكنتشى شايفه قدامها وكانت ماشه بسرعه وخبطت فى باباها

مصطفى : مالك فى ايه

لاما بدمعه : مفيش يابابا تعبانه شويه …انا هطلع بره عشان حسه ان الزحمه خنقانى ومش قادره اخد نفسى

مصطفى : طيب اجى معاكى … شكلك مش طبيعى

لاما : لاء عشان عمى ميزعلشى انا هبقى كويسه

وسابته وطلعت بره كان فى مرجيحه محطوطه فالجنينه اللى تبع القاعه قاعدت عليها

وفضلت سرحانه فكل حاجه حصلتلها وحست بكل وجعها بيرجع تانى حست بخوفها وكرهها للحياه وشويه ودموعها نزلت

ماجد كان بيدور عليها وشويه وشافها قاعده قرب منها وقاعد جانبها بس هى مكنتشى حاسه باى حاجه حواليها

شويه ولقى دموعها بتنزل مد ايده ومسحلها

لاما بخده وهى بتبص عليه : ايه ؟؟

ماجد وهو بيمسك ايدها : مالك يا لاما

لاما : مفيش بس حسيت انى تعبانه شويه

ماجد : من ايه ؟

لاما بخوف : حسه ان قلبى مقبوض اوى

ماجد بشك : هو العريس فكرك بحاجه

لاما بارتباك وخوف : لاء…… بتقول ليه كده

ماجد : عشان اسمه نفس اسم

وسكت

لاما وهى بتحت راسها على كتفه : ماجد انا بحبك اوى …متسبنيش ابدا ومتسبشى حاجه تبعدنا عن بعض تانى

ماجد وهى بيطبطب عليها : متخافيش يا لاما انا لسه عند وعدى ليكى …انا عمرى مهسيبك ابدا مهما حصل

 

…………………………………………………………….

 

فات كام يوم ولاما حسه لسه بالخوف والخنقه مش قادره تركز فى شغلها ولا حتى فى حياتها خايفه ان سعادتها مع ماجد تكون خلصت …كانت حسه ان الزمن لسه مخبلها وجع وعقاب على غلطتها مكانتشى عارفه تعمل ايه

وفى يوم لاما كانت قاعده فى مكتبها ولقت موبيلها بيرن والرقم غريب

لاما : السلام عليكم

المتصل : وعليكم الصلام

لاما : ايوه مين معايا ؟

المتصل : نسيتى صوتى

لاما بخوف وقلبها بيدق : مين معايا … ياما هقفل السكه

هيثم : وحشتينى

لاما بخضه قفلت السكه بسرعه

بس هو رن تانى مره واتين وهى مش بترد وشويه وبعت مسدج

” ردى عليه عاوزك فى موضوع مهم “

وشويه ورن تانى

لاما بعصبيه : انت عاوز منى ايه … حل عنى بقى يا شيخ

هيثم : انا عاوز مراتى

لاما بسخريه : انت اهبل ولا بتستهبل

هيثم : لا انا بتكلم بجد

لاما : من الواضح انك نسيت …انت طلقتنى

هيثم : اثبتى

لاما :يعنى ايه ؟

هيثم : انا لسه معايا ورقة الجواز العرفى وممكن ادخلك السجن لتعدد الازواج

لاما : بس انت طلقتنى

هيثم بضحكه صفراه : اثبتى

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة :ريم أحمد

 

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى