مسلسل “علشان بحبك أنا” الحلقة الثانية
الحلقة الثانية
مرت الايام ويوم عن يوم منار تتعلق بعمر اكتر واكتر بحكم ان مامتها ومامته بقو اصحاب جداا وبيزورو بعض كتير وبقت بتشوفو كتير كانت بتحس
بالامان لما تشوفه من بعد ما والدها اتوفى وهي فقدت الاحساس دة لكن من يوم ما عرفت عمر وابتدت ترجع تحس بالامان ولبنى كمان بقت
صاحبتها جداا لانها زيها نفس الطباع والاخلاق وبقو يقعدو يتكلمو كتير ولبنى كانت متعلقة بعمر جداا لانه حنين عليها وكانت بتحكي كتير عنه لمنار
ودة زود تعلقها بيه لانها لقت فيه كل حاجة بتتمناها
ومازن وعمر كمان اتعرفو على بعض وساعات كانو يروحو يتفرجو على الماتشات مع بعض لكن طبعا دراستهم كانت اخدة معظم وقتهم
مع الوقت اتاءكدت منار انها بتحب عمر ومش قادرة تتخيل نفسها مع حد غيره لكن كانت بتحس انه مش واخد باله منها ولا من شعورها ناحيته
كان بيعاملها زي ما بيعامل لبنى لكن في حدود لانه طبعه ملتزم شويه وجد جداا لكن كانت بتحاول تدي اي امل لنفسها انه مسيره هيحس بيها
عدت الايام ومنار نجحت وجابت مجموع كبير حبها لعمر خلاها تجتهد اكتر عشان يبقى فخور بيها
“ترررررررررررررررررررررن ترررررررررن
فادية”منااار طمنيني ياحبيبتي عملتي ايه”
منار “انتي قلقانة ليه ياماما انتي مش واثقة في بنتك حبيبتك ولا ايه”
فادية بنفاذ صبر:هو دة وقته عملتي ايه”
منار”98%”
فادية”لولولولولولي الف مبروك ياحبيبتي ربنا يفرحك زي ما فرحتيني”
منار”الله يبارك فيكي يااعظم ام في الدنيا ربنا ميحرمنيش منك اما اروح بقى لطنط وفاء ولبنى اقولهم على النتيجة عشان موصيني اول ما تظهر
اقولهم “
ترررررن تررررن
وفاء:منار حبيبتي شكلك كدة هتفرحينا كام المجموع ياقمر
منار:98%
وفاء: لولولولولو لي الف مبروك يادكتورة منار لولولو لي
لبنى:بجد اللي سمعته دة الف مبروك يامنار طب القصر العيني طبعا
منار: احم…لا اسنان ان شاء الله
وفاء:ليه يابنتي مجموعك يجيب طب زي ما انتي عايزو اهو
منار:اص….ل انتي عارفة ياطنط ماما عايزة صيدلة وانا طب هههه فقولت ادخل اسنان وسط بين الاثنين
لبنى:هتبقي مع عمر بقى في نفس الجامعة
منار:ان….شاء الله
منار كانت طايرة من الفرحة لما جالها التنسيق اسنان جامعة القاهرة اخيرا هتبقى مع عمر وهتشوفو كل يوم بدل ما بتسهر تستناهه طول الليل ورا
الشباك عشان تطمن عليه
لغاية ما في يوم كانت لبنى عندها في البيت وبيدردشو سوا
لبنى:منار اقولك على سر بس بيني وبينك
منار:خير ياسوسة في ايه
لبنى:عمر اخويا بيحب
منار حست ان قلبها هيوقف مكانه معقول يكون حلمي هيتحقق معقول عمر بيفكر فيا زي ما بفكر فيه مش قادرة اصدق انا اكيد بحلم
لبنى:هااااي ايه يبنتي سرحتي في ايه ايه مش عايزاني اقولك هي مين ولا برضه زي كل مرة تقوليلي الغيبة والنميمة حرام وخلينا في حالنا احسن
مناروهي متوترة:انتي تعرفي هي مين
لبنى:طبعا هو انا طرطور في البيت ولا ايه
منار:م……ييين
لبنى:واحدة ياستي معاه في الجامعة في سنة رابعة برضه كان بيكلم ماما امبارح وبيقولها انه عايزها تكلم مامتها تتعرف عليها على ما يخلص
ويتقدم لها رسمي.
لبنى:منااار…..منار انتي وقعتي كدة ليه طنط فادية الحقيني الحقني يامازن
وفاء :الف سلامة على منار يافادية خير ايه اللي حصل
فادية :الحمد لله على كل حال كانت قاعدة مع لبنى في الاوضة فجاءة داخت واغمى عليها
وفاء:من نفسها كدة ايه السبب
فادية :مش عارفة والله ياوفاء الدكتور بيقول هبوط مفاجئ
وفاء:اكيد من الريجيم اللي هي عاملاه انا مش عارفة هي عايزة تخس ليه جسمها كدة كويس اوي
فادية:قولتلها كتير الريجيم اللي انتي عاملاه دة هيضر صحتك مفيش فايدة لغاية ما جالها هبوط اهو من قلة الاكل
وفاء:وهي هتفضل هنا في المستشفى كتير
فادية:الدكتور بيقول بكرة ان شاء الله هتطلع
وفاء :ربنا يشفيها انتي عارفة غلاوة منار من غلاوة لبنى بنتي وربنا العالم
فادية :عارفة ياحبيبتي ربنا ميحرمنيش منك
فادية:حمد الله على السلامة ياحبيبتي ادخلي يالا اوضتك ارتاحي
منار:الله يسلمك ياماما
لبنى:هستاءذن انا بقى ياطنط
فادية:لا يا لبنى ياحبيبتي استني معلش خليكي مع منار على ما اعملها شوربة خضار تغذيها
منار:معلش ياماما مليش نفس
فادية:مش بمزاجك يامنار هتاكلي يعني هتاكلي خديها اوضتها يالبني
لبنى:منار
منار :ايوة يا لبنى
لبنى: اهئ اهئ اهئ
منار:فيه ايه يا لبنى مالك؟
لبنى:انا اسفة اوي يامنار على اللي حصل
منار :وانتي مالك يابنتي باللي حصل ..انا دوخت بس من الر…يجيم
لبنى :متضحكيش عليا ولا على نفسك يامنار انتى اغمى عليكي لما عرفتي ان عمر بيحب وهيخطب
منار ارتبكت ومبقتش عارفة ترد تقول ايه معقول لبنى عارفة انها بتحب عمر
منار:وانا مالي ومال… عمر
لبنى:اسمعي يامنار انا من زمان وانا حاسة انك بتحبي عمر لما بتكلم عنه بشوف عنيكي بتلمع ووشك فرحان لما بتشوفيه بحس بيكي وبلاحظ
ارتباكك فاكرة لما سافر اسكندرية اسبوع عشان يزور اصحابه كنتي مكتئبة ووشك دبلان ويوم ما رجع لاقيت الضحكة مالية وشك
ولا يوم نتيجته كنتي واقفة في الشباك رايحة جاية تستنيه انا شفتك من شباك اوضته وانتي كل شوية تبصي على الشارع لغاية ما جه استخبيتى ورا
الشيش عشان ميشفكيش وبعد دقيقة لاقيتك بتتصلي بيا طبعا عشان عارفة اني هقولك النتيجة
منار اتسمرت مكانها معقول للدرجة دي كان باين عليها
منار:”لبنى انا…
وبصت في الارض
لبنى :انتي ايه يامنار انتى احلى اخت وصاحبة ربنا انعم عليا بيها وحبك لعمر اكدلي انتي قد ايه مؤدبة ومحترمة لانك مع الحب دة كله اما بتيجي
عندي وعمر يجي بتصممي تمشي وكل كلامك معاه محدود وقادرة تسيطري على مشاعرك
منار:طيب لما انتي عارفة كدة قولتيلي انه بيحب وهيخطب ليه وانتي عارفة اني …اني.. بحبه.
لبنى:انا في الاول لما حسيت انه متغير ودايما سرحان ومهتم بلبسه بزيادة بصراحة افتكرت انه بيعمل كدة عشانك وكنت فرحانة اوي لغاية ما
اتاءكدت انه بيحب واحدة تانية وعايز يخطبها ساعتها صعبتي عليا اوي كل اما اشوف لهفتك عليه وعلى انك تعرفي اخباره احس بالذنب لغاية ما
كنتي عندي الاسبوع اللي فات وسبتك ودخلت اعمل شاي طلعت اسائلك عايزاه بسكر ولا لا عشان الريجيم لاقيتك ماسكة جاكت عمر وحضناه
ساعتها قررت اني لازم اقولك الحقيقة عشان متتعذبيش اكتر من كدة.
منار رمت نفسها في حضن لبنى ومقدرتش تمسك نفسها
منار: اهئ اهئ اهئ انا تعبانة اوي يا لبنى حاسة اني بموت اهئ اهئ اهئ
لبنى:انا جنبك يامنار ومش هسيبك لغاية ما تعدي الازمة دي انسيه وعيشي حياتك وربنا يبعتلك اللي يحبك ويققدر حبك ليه
———–———-———————-————
ونكمل في الحلقة القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقة القادمة
بقلم الكاتبة :موناليزا
حقوق النشر محفوظة لموقع وصفحة مدام طاسة والست حلة
