ترفيهمسلسل علشان بحبك أنا

مسلسل “علشان بحبك أنا” الحلقة الثانية عشر

الحلقة الثانية عشرة
عمر وهو متفاجئ:ايه
منار :بقولك طلقني ياعمر انت مش بتحبني ولا انا بحبك يبقى نكمل مع بعض ليه؟
عمر اول مرة يسمع من منار انها مش بتحبه فيه فرق انه ميعرفش هي بتحبه ولا لا وبين انها تقول انها مش بتحبه
عمر:انت بتحبي حد تاني
منار:بص ياعمر عشان اريحك والله العظيم انا ما بحب حد تاني ولا ثالث ومش عايزةاحب اصلا
وبعدين عيب اوي ان واحد يسأل مراته هي بتحب واحد تاني اظن انا متربية كويسة ولا عايز تعيد كلامك اللي قولته امبارح تاني
عمر:انا اسف يامنار انا مش قصدي طيب تعالي يمنار نفتح صفحة جديدة وننسى اللي فات كله
منار:مش هينفع ياعمر
عمر :ليه يامنار يعني مفيش حاجة حلوة خالص تفتكرهالي تشفعلي عندك
منار :حاجة حلوة زي ايه زي يوم خطوبتنا اللي صممت نعملها على الضيق وجيت متأخر وكنت قاعد مكشر طول الحفلة ولا بتبصلي ولا طول فترة
الخطوبة عمرك ما عاملتني كأني خطيبتك ابدا كنت بتعاملني على اني واحد صاحبك عمرك ما قولتلي بحبك ولا حسستني بيها حتى واحنا بنختار
العفش مجتش معانا وقولت لمامتك اختارو انتو اللي عايزينه ولا يوم عيد ميلادك لما جبتلك هديه وقولتلي شكرا ومفتحتهاش ولا يوم فرحنا
مرضتش ترقص معايا سلو وكسفتني قدام الناس ولا لما قولتلي انك لسه بتحب خطيبتك ومش متخيلني مكانها ولا اتهامك ليا اني على ذمتك وبحب
واحد تاني واني كدابة ومروة احسن مني قولي كدة ايه في الحاجات دي يشفعلك عندي
عمر بيأس:معاكي حق انا عملت فيكي حاجات كتير ياريت تسامحينيمنار :قلتلك خلاص مبقتش تفرق فكر ازاي هننهي الموضوع دة وابقى قولي… تصبح على خير

 

ودخلت منار اوضتها وسابت عمر مش مستوعب اللي حصل

منار كانت حاسة بقوة اول مرة تحس بيها حست انها فعلا قدرت تتغلب على ضعفها قدامه وحست انها مبسوطة بتالقرار اللي اخدته

عمر مكنش مصدق كان متخيل ان منار هتزعل منه وهيصالحها وينتهي الموقف حتى لو جت وشافته مع مروة كان متخيل هتزعق فيه وتزعل انما

انها تطلب الطلاق مكنش متوقع خصوصا ان قبل ما يتخانقو كانو كويسين اوي مع بعض وكان حاسس انها بتحبه عمر مكنش عارف يعمل ايه

وافتكر كل اللي عمله مع منار من يوم ما اتخطبو ولقى نفسه كان وحش اوي وفعلا مفيش حاجة حلوة تشفعله عندها بس مع كل دة مكنش عنده

استعداد انه يفرط في منار او يبعد عنها وقرر انه يعمل المستحيل عشان منار تحبه وتشيل فكرة الطلاق من دماغها

 

 

عمر:صباح الخير

 

منار صباح النور ها فكرت في اللي اتكلمنا فيه امبارح

 

عمر :ايوة فكرت

 

منار :ووصلت لأيه

 

عمر:مش هينفع نتطلق دلوقتي

 

منار :ليه بقى ان شاء الله

 

عمر :عشان مازن ولبنى لو احنا اتطلقنا موضوعهم هيتفركش

 

 

منار مكنتش عاملة حساب الموضوع دة خالص خناقتها مع عمر واما شافته مع مروة وخطوبة مازن ولبنى كل الحاجات دي خلت تفكيرها مشوش

 

ومخدتش بالها من النقطة دي

منار :طيب والحل

عمر:الحل اننا نفضل مع بعض لغاية ما لبنى ومازن يتجوزو

منار:نعم هو انا هفضل في الوضع دة كل دة

عمر بحزن :معلش ياستي استحملي ومعتقدش ان خطوبتهم هتطول

منار :امري لله بس بشرط

عمر:اتفضلي

منار نعيش مع بعض اه لكن كل واحد في حاله وميدخلش في حياة الثاني

عمر:موافق

منار:ومتحاولش تضايقني او تستفزني

عمر:موافق

منار اتفقنا

عمر كان موافق على اي شرط من منار بس تفضل معاه يمكن تحبه منار مكنتش عارفة هي مبسوطة ولا زعلانة ولا شعورها ايه بعد كلامها مع

عمر بس كانت حاسة انها قوية

 

حازم :صباح الخير يادكتورة منار

منار:صباح النور يادكتور حازم

خازم :الجامعة عاملة رحلة يوم الجمعة لاسكندرية تحبي احطك في جدول الاشراف

منار:لا شكرا

وبعدين افتكرت انها عايزة تعيش حياتها وانها تاخد قرارتها بغض النظر هتعجب عمر ولا لا

منار:اممم ولا اقولك خلاص يادكتور ماشي

حازم:خلاص هبقى انا وانتي والدكتورة رضوى المشرفين هنمشي الساعة سبعة الصبح

منار:تمام

 

مروة:صباح الخير

عمر صباح النور

معتز:صباح النور يادكتورة مروة ها هتبتدي من النهاردة

مروة :ان شاء الله

عمر:انا رايح الكافتريا اجيب شاي اجبلكو معايا

معتز:ياريت تجبلي فنجان قهوة معاك

مروة:استنى ياعمر انا جاية معاك

عمر كان مضايق من سلوك مروة معاه وفضل ساكت

مروة :عمر انت لسه مضايق مني

عمر:ما قولنا يامروة دة موضوع وراح لحاله وكل شئ نصيب

مروة :اصل انت بتحاول تتجنبني

عمر:ياستي لا بتجنبك ولا حاجة الموضوع وما فيه اني بتعامل معاكي كزميلة وبس

مروة :خلاص ياعمر براحتك وسابته ومشيت

عمر مكنش مبسوط ابدا بوجود مروة معاه في الشغل هو مشاعره من ناحيتها خلاص انتهت انما واضح ان هي لا

 

عمر خلص شغل وراح بسرعة على الجامعة
منار:الو

عمر :ايوة يامنار بقولك انتي خلصتي شغل

منار:ايوة خلصت ونازلة اهو عشان اروح فيه حاجة

عمر:اصل انا مستنيكي عند الباب

منار:ليه ياعمر مش قولنا كل واحد يخليه في حاله

عمر:ماشي ماختلفناش بس دة ما يمنعش اننا على الاقل نعامل بعض كويس لغاية ما….نتطلق

منار :اووووف ماشي انا جيالك اهو

 

منار ركبت العربية مع عمر وفضلو ساكتين طول الطريق

عمر:يضايقك لو شغلت حاجة اسمعها

منار:لا عادي براحتك

 

أفتـــرقنـــا وأبتديت

 

ألوم فى روحى واقول يا ريت
كل يوم بيعدى أصعب

والفراق أصعب وأصعب

كل يوم على نفسى بصعب

ان انا سيبته ونهيت

 

منار حست ان كلام الاغنية دي عمر بيوجها ليها بس مكنتش قادرة تصدق لغاية ما في نص الاغنية رفع الصوت حست كأنه بيقولها اسمعي

 

أيه جرالى يومها أيه

كنت ظالم قاسى ليه

ألف ليه وازاى خسرته

ليه جرحته وليه كسرته

بعد ماشوهت صورته

النهارده هموت عليه

منار وطت الصوت وقالتله معلش اصلي صدعت

عمر قال لنفسه”اوف وبعدين معاكي بقى يامنار”

 

وصلو البيت ودخلو غيرو هدومهم

عمر:منار هو ممكن ناكل سوا ولا دي كمان كل واحد في حاله

منار وهي مبتسمة :لا ياسيدي لقمة هنية تكفي مية

 

منار:الحمد لله ….بقولك ايه على فكرة انا هغسل اطباقي بس

عمر :ههههههه ماشي ياستي وانا هغسل اطباقي

 

دخبت منار المطبخ وعمر دخل وراها

عمر :طيب هقولك على حاجة نقسم البلد بلدين انتي تغسلي وانا اشطف

منار:ماشي ياسيدي

 

وبدئت منار تغسل الاطباق وعمر يشطف

عمر:احط الاطباق دي فين

منار :حطها فوق في المطبقية

 

منار :وادي اخر طبق شطفه على ما اغسل الحوض

عمر خد الطبق وشطفه وراح واقف ورا منار ورافع ايده يحط الطبق

كان قريب منها منار كانت حاسة بنفسه في شعرها

كانت حاسة بلخبطة وهو واقف وراها

منار:احم هتفضل واقف كدة كتير انا عايزة امشي

عمر وهو بيقرب من منار اكتر :اصل برتبهم

منار ضحكت:طيب عديني وبعدين رتبهم

عمر :هههههه مانا لو عديتك هرتبهم ليه خلاص ان شالله عمرهم ما اترتبو

 

ضحكو شوية وعملو شاي وقعدو قدام التليفزيون

منار:عمر انا طالعة رحلة يوم الجمعة

عمر:رحلة ايه دي وفين

منار :بص عشان نبقى متفقين انا بقولك من باب العلم بالشئ مش الاستئذان عشان تبقى عارف

عمر:عرفنا ياستي انا بسأل للعلم بالشئ

منار:رحلة تبع الجامعة وانا هبقى مشرفة انا ورضوى وحازم

عمر:رضوى ومين

منار باصرار:وحازم قصدي الدكتور حازم

عمر بغيظ:ورايحيين فين

منار:اسكندرية

عمر:وهترجعو الساعة كام

منار:اكيد بالليل على واحدة مثلا

يالا تصبح على خير وقامت وقفت

:عمر مسك ايدها :على طول كدة لسه بدري

منار وهي بتسحب ايدها من عمر:ماانا مش هنام على طول بس عايزة اقعد لوحدي شوية وسابته ودخلت

 

عمر كان مضايق اوي من موضوع الرحلة مكنش متخيل انه ممكن اليوم كله يعدي من غير ما يشوفها وكمان ان حازم هيبقى معاها و كان مضايق

من برودها معاه بس قال لنفسه ان اللي عمله فيها مش شوية ولازم يستحمل

 

منار كانت مش عارفة تفسر تصرفات عمر تقول يمكن فعلا حبها وترجع تقول لا ما هو قبل كدة كانو كويسين وراحو سينما وانبسطو وتاني يوم

قالها كلام وحش وقالها ان مروة احسن منها كمان مكنتش عارفة هل فعلا لسه مصممة على الطلاق ولا لا ماهما اقنعت نفسها انها قوية بتيجي عند

عمر وتضعف لكن قالت لنفسها مستحيل تعشم نفسها بحبه ليها تاني

 

منار صحيت تصلي الفجر سمعت صوت التليفزيون استغربت ان عمر لسه صاحي دخلت تشوفه لاقيته نايم على الكنبة ومن غير غطا

 

منار قعدت جنب عمر اول مرة تشوفه وهو نايم

منار:عمر …عمر اصحى نام على السرير

عمر وهو بيحاول يفتح عنيه:لا

منار:يعمر قوم يالا الجو برد

عمر قام طلع على السرير ونام على المخدة :طيب غطيني
منار غطيته بالبطانية وهي بتضحك على منظره:ها اي طلبات تانية

عمر:اه مشي ايدك في شعري لغاية ما روح في النوم

منار:ايه لا طبعا

عمر:عشان خاطري

منار مهما كان غيظها من عمر او زعلها منه مبتقدرش ترفضله طلب

 

منار حطت صوابعها في شعر عمر اول مرة تعمل كدة شعره ناعم وكثيف كانت حاسه براحة فظيعة طول عمرها كان نفسها تعمل الحركة دي

 

فجأءة عمر قعد على السرير :منار روحي اوضتك دلوقتي وسيبيني

منار استغربت :طيب ماشي وقالت لنفسها دة مجنون دة ولا ايه

 

عمر مكنش عايز اي حاجة مع منار تيجي قبل اوانها وقبل ما تحبه

———–———-———————-————

ونكمل في الحلقة القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقة القادمة

بقلم الكاتبة :موناليزا

حقوق النشر محفوظة لموقع وصفحة مدام طاسة والست حلة

 

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى