ترفيهمسلسل ورقة جواز عرفي
مسلسل ورقة جواز عرفي الحلقة الأولى والثانية
الحلقة الاولى
تصحى شرين على صوت موبيلها هو بيرن تمد ايدها وهى لسه مغمضه عنيها لحد ما تجيبه وترد عليه
شرين بصوت نايم : الو
ليلى : يالهووووووووووووى انتى لسه نايمه
شرين : ليه هى الساعه كام ؟؟
ليلى : الساعه 9 والمحاضره الساعه 10
شرين : لا انسينى انا بقى المحاضره دى روحى انتى وانا هحصلك على المحاضره التانيه
ليلى : والله انتى ندله
شرين : معلشى بقى يا لولو ……..هحصلك على طول
ليلى : ماشى ياله سلام
شرين : سلام
قامت شرين بكسل وهى حسه انها تعبانه ومصدعه وراحت غسلت وشها وصلت الصبح ودخلت لمامتها المطبخ
شرين : ماما انا عاوزه كوباية نسكافيه ……… بس بسرعه
شريفه : نسكافيه على الصبح كده ………اشربيلك كوباية لبن تفيدك احسن بدل النسكافيه والقرف ده
شرين : لا يا شوشو ياقمر الله يخليكى مش طلبه خالص النصايح بتاع الامهات دى ……….انا منمتش كويس ومضيعه محاضره ومش هروح انام
فالتانيه
شريفه : ومنمتيش ليه ……….شايفه الهالات السوداء اللى تحت عنيكى من قلة النوم والسهر ……..
شرين : ماما عشان خاطرى كفايه ………النسكافيه لحد مالبس
وخرجت شرين قبل ماتسمع بقيت النصايح من مامتها
ولبست وجهزت نفسها وشربت النسكافيه وراحت الجامعه
……………………..
فى فيلا كبيره فى منطقه راقيه جدا كان هشام نايم فى اوضته اوضه وسعه وشيك جدا بس مبهدله بطريقه غير طبيعيه
فريده : هشام ……….يا هشام
هشام بصوت نايمه : ايه ياماما …انا عاوز انام
فريده : قوم ابوك كلمنى وقال لو مروحتش الشركه دلوقتى هيطلقنى
هشام : مهو كل مره بيقول كده ومش بيعمل حاجه ………سبينى بقى انام
فريده : يابنى قوم ابوك شكله متعصب بجد واخوك فالشركه من الساعه 7 الصبح قوم بقى
هشام : هى الساعه كام
فريده وهى بتبص فساعاتها : الساعه 10
هشام وهو بيحط المخده على دماغه : طيب لسه بدرى هنام ساعه وهقوم اروح
فريده بنرفزه وهى بتشد المخده : لا هتقوم حالا وتنزل عشان متحصلشى مصيبه
قام هشام وهو متنرفز ولبس وراح الشركه
……………………..
شرين وصلت الكليه الساعه 11 وطبعا ليلى كانت فالمحاضره راحت تستناها فالكافتريا
وهى قاعده شافت منظر دايقها اوى
شافت نرمين زملتهم والمفروض انها كانت صاحبتها قاعده مع واحد وقريبين اوى من بعض وحاطت ايده حولين كتفها وبتضحك معاها بصوت
عالى وكل اللى رايح واللى جاى بيبصلهم بقرف
وبعد حوالى نص ساعه ليلى كانت خلصت وجات عندها
ليلى : شرى حبيبتى وحشانى يا ندله
شرين بضيق: وانتى كمان
ليلى باستغراب : ايه يا بنتى مالك
شرين وهى بتشارو براسها على مكان نرمين : بصى
ليلى : هى حره فى تصرفاتها ………..احنا اتكلمنا معاها كتير
شرين : بجد انا بقرف من اللى بتعمله ده
ليلى : كبرى دماغك ………المهم انتى ايه سهرك امبارح
شرين : مفيش مكنشى جايلى نوم قاعدت ازاكر شويه لحد الفجر وصليت ودخلت نمت
ليلى : ماشى يا ستى ربنا يعينك ………….بس بعد كده متسبنيش احضر لوحدى
شرين : ربنا يسهل ……….هانت كلها شهر ونص ونخلص خالص
والبنتين بيتكلمو جات عليهم نرمين
نرمين بضحكه صفره : ازيكو يا بنات ……….انتو لسه بتحبو فبعض
شرين بغيظ : على الاقل قاعدين محترمين
نرمين : قصدك ايه ؟؟؟
ليلى : بقولك ايه يا نرمين انتى حره فى تصرفاتك ……….بس لو سمحتى متجيش تكلمينا تانى
نرمين : ليه ؟؟
شرين : عشان احنا بنخاف على سمعتنا ……..وبصراحه ميشرفناش اننا نكلم وحده زيك
البنات بداء صوتهم يعلى وناس كتير اتلمو حواليهم
نرمين : ميشرفكوش ليه ان شاء الله
شرين : عشان انتى كل تصرفاتك غلط واحنا قومنا بواجبنا ونصحناكى اكتر من مره بس اللى انتى بتعمليه ده ……..يخلينا مينفعشى نكلمك تانى
نرمين بعصبيه : وانتى بقى عامله نفسك محترمه وخايفه تكلمينى لحسن اوسخك لا يا حلوه انا بكلمك بس عشان مفيش حد بيعبركم اصلا ……..ده
انا كل الولاد بيحبونى ويتمنو كلمه منى
شرين : اه عشان سهله ورخيصه
نرمين قربت منها وضربتها بالقلم : انا رخيص طيب انا هوريكى الرخيصه دى هتعمل ايه
……………………..
فى الشركه
عبد الرحمن فى اجتماع وباين عليه التوتر والقلق وكل شويه يبص فى ساعته وشويه ويدخل عليه هشام بكل برود وهدوء
عبد الرحمن اول ما شافه قام من مكانه وراح نحيته : هات مفتاح المكتب
هشام باستغراب : ليه فى ايه
عبد الرحمن بعصبيه : هات المفتاح
هشام اداله المفتاح ودخل بسرعه مكتبه وجاب ورق ودخل كمل الاجتماع
وبعد الاجتماع دخل عبد الرحمن مكتبه وكان هشام قاعد فيه
عبد الرحمن ضرب هشام بالقلم : مش عاوز اشوف وشك فالشركه تانى
هشام وهو ماسك خده : انتى بتضربنى .؟؟؟
عبد الرحمن : انت فاشل ومستهتر ومش عاوز اشوف وشك هنا تانى ………ياله بره
الحلقة الثانية شرين كانت نايمه على رجل مامتها ومنهاره من العياط ومامتها وشهد اختها بيحاولو يهدوها
شريفه : خلاص بقى يا حبيبتى ………….. كفايه عياط
شهد : بصراحه انتى غلطانه اصلا يا شرى
شرين بعياط : غلطانه فايه بقى
شهد : انك اصلا بتكلمى الاشكال دى كنتى كبرى دماغك ولا كانها موجوده اصلا
شرين : هى اللى جات كلمتنا وانا كنت متنغاظه منها
شريفه : خلاص يا حبيبتى حصل خير ………..ملكيش دعوه بيها تانى وتعمل صح او غلط ليها ولاهلها ………ياله قومى اغسلى وشك
شهد وهى وقفه وبتفرد عضلتها : تحبى اجى معاكى بكره اضربهالك فوسط الكليه
شرين بضحكه : على اساس انك راجل البيت يعنى
شهد : طبعا يا بنتى اختك بميت راجل ده انا بيخوفو بيه العيال الصغيره
شرين : طيب اجرى ده انا لو نفخت فيكى هتطيرى ……..
شهد : هههه طب جربى كده ده انا جامده يابنتى بس انا اللى شكلى كده
شرين : هههههههههههههه ضحكتينى وانا مليش نفس
جرت عليها شهد وهى بتزغزغها : خلاص اضحكك بقى بنفس
شرين هو بتضحك : يابنتى اسكتى ضيعتى برستيج العكننه اللى كنت عملاه
شهد وهى بتضحك : بعد الشر عليكى من العكننه يا قمر
شريفه : ربنا يحميكو يا بناتى ويبعد عنك ولاد الحرام ويخليكو لبعض
فضلت شهد تزغزغ شرين ويضحكو ويهزرو مع بعض ومامتهم تصوت من هزرهم وجريهم فالشقه وراء بعض
……………………..
كريم : ايه يا اتش بقى متكبر دماغك
هشام بنرفزه : اكبر دماغى بقولك طردنى من المكتب وهزقنى وسط الناس
كريم بضحك : ههههههههه يا بنى انت هتعيش دى خامس مره يطردك …….وبترجع تانى ولا انت بتتحمل المسؤليه ولا هو بيفقد الامل فيك والله
ابوك ده صعبان عليه
هشام بتريقه : ميصعبشى عليك غالى يا اخويا
كريم : بقولك ايه فك كده بقى وبلاش رخامه مش طلبه
هشام بابتسامه: مانا اكيد هفك ………انا قولت بس اغير شويه
كريم : والله انت مجنون
هشام :هى نرمين اتاخرت كده ليه ؟؟
كريم : مش عارف اكيد هتيجى ………هى دى هتفوت حته انت موجود فيها
كريم وهى بيغمزله : ع فكره البت دى بترسم عليك
هشام : ههههههه مانا عارف بس عامل نفسى مش واخد بالى
كريم : طب وانت ايه ؟؟
هشام : والله ياكيمو يا اخويا ………اللى يتبطر على النعمه يبقى حرام عليه
كريم : بس خد بالك البت دى شكلها صايع ولفه كتير ولو مسكت فيك مش هتسيبك بالساهل
هشام : عيب عليك ……..هو انا تلميذ
هشام وهو بيبص على الباب : طب اسكت بقى عشان وصلت
……………………..
ليلى : ها يا حبى اخبارك ايه دلوقتى
شرين : تمام يا لولو ……..الحمد لله
ليلى : بقولك ايه نسى موضوع نرمين ده وركزى فى مذاكرتك
شرين : مش عارفه يا ليلى كل مفكر فاللى حصل القى نفسى بعيط بقى الحيوانه دى تضربنى ده بابا وماما عمرهم مضربونى تيجى وحده زباله زى
دى وتضربنى وسط كل الناس كده
ليلى : معلشى بقى متفكريش كتير بقى ………وكلها شهر ونص وهنتخرج ومش هنشوفها تانى ……….شرى احنا مش عاوزين مشاكل احنا
طول عمرنا فى حالنا
شرين : ماشى يا لولو ………بس انا مش هروح الكليه بكره انا هقعد اذاكر فالبيت احسن
ليلى : ايه يا شرين انتى خايفه منها ولا ايه ………لا هنروح بكره عادى
شرين باستسلام : ماشى يا ليلى ربنا يسهل ………..ياله سلام عشان اذاكر شويه
ليلى : ماشى يا حبيبتى ربنا يعينك ……..سلام
وقفلت شرين وهى لسه بتفكر هتروح بكره الكليه ازاى وهتقابل الناس ازاى اكيد هيتريقو عليها
……………………..
نرمين قاعده متغاظه بعد ما حكت اللى حصل لهشام وكريم
نرمين قاعده متغاظه بعد ما حكت اللى حصل لهشام وكريم
نرمين : انتو لازم تتصرفو انا لازم انتقم من البنت دى
كريم : عاوزانه نعمل ايه يعنى نقتلهالك …………..وبعدين مانتى اخدتى حقك وضربتيها
نرمين بحقد : لا مش كفايه
كريم بنرفزه : بصراحه بقى انتى ملكيش الحق تعملى معاها حاجه البنت مغلطتشى
نرمين وهى بتبصله بغيظ : قصدك ايه ان انا سهله ورخيصه
كريم : تصرفاتك هى اللى خلت الناس تقول عليكى كده
نرمين : احترم نفسك يا كريم احسن وبعدين انا حره فى تصرفاتى
كريم : انا هقوم امشى احسن ………..اصلى بصراحه قرفان من القعده دى
وقام كريم من مكانه ومشى وهو مضايق وقرفان اوى من نرمين
نرمين بصت لهشام بدلع : ها يا اتش ………هنعمل ايه ..؟؟؟
هشام : فى ايه ؟؟؟
نرمين بعصبيه : هو انا بكلم نفسى
هشام : مهو يا حبيبتى لو اللى بيتكلم مجنون المستمع لازم يبقى عاقل
نرمين وهى بتقرب منه وبدلع : حبيبتك …….يعنى انا فعلا حبيبتك
هشام وهو بيقرب وشه من وشها : طبعا يا قمر
نرمين : طيب هتساعد حبيبتك مش كده
هشام : اللى تعوزه حبيبتى يتنفذ حالا
نرمين : مش عارفه ………….فكر معايا
هشام بعصبيه : مش عارفه يانرمين يعنى اروح اتجوزهالك عرفى ……….متكبرى دماغك بقى وتسيبك منها
نرمين بضحكه : ايوه هو ده …
هشام باستغرب : هو ده ايه انتى اتجنينتى ولا ايه
نرمين : هو ده …………..تتجوزها عرفى
———–———-———————-————
ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقات القادمة
بقلم الكاتبة :ريم أحمد
