مسلسل ورقة جواز عرفي الحلقة الثالثة والرابعة عشر

 

الحلقة الثالثة عشر

فى مطعم فخم جدا

هشام وشرين وعبد الرحمن وفريده وشهد واحمد قاعدين بيتكلمو وبيتعشو
شهد كانت عماله تتكلم وتهزر واحمد كمان والاب والام مبسوطين وشرين كل شويه ترد ع شهد او تضحك ضحكه مجامله وخلاص وهشام قاعد ساكت سرحان وبيلعب فى الطبق ومش بياكل
عبد الرحمن : هشام ………هشام
هشام بيفوق من سرحانه وهو بيبص لعبد الرحمن : ايوه
عبد الرحمن : تعالى انت وشرين عاوزكم فى موضوع مهم
قام هشام وشرين وعبد الرحمن وقعدو على تربيزه تانيه
عبد الرحمن : فى حاجات عاوزين نتفق عليها …….اولا كده انتم هتتجوزو لمدة سنه بس وفاى وقت لو شرين قالت انها عاوزه تنفصل انا هبقى معاها …….. انت هتشتغل فالشركه بمرتب 5000 جنيه بس هيبقى الوضع مختلف المره دى لو غبت من الشغل هيتخصم من مرتبك واى غلطه هتتحسب عليك يعنى هتتعامل كاى موظف فالشركه واعمل حسابك انك هتبقى مسؤل عن بيت ومصروف البيت وكل حاجه تطلبها شرين منك هتجبهلها
وشرين هتشتغل فالشركه بمرتب 3000 جنيه بس مش هتصرف حاجه على البيت يعنى الفلوس دى بتاعها تتحكم فيها زى مهي عاوزه
هشام بغيظ: اشمعنا بقى وانا هصرف عليها بتاع ايه
عبد الرحمن : عشان انت الراجل ولا انت عندك رائى تانى
هشام سكت ومعرفشى يرد
عبد الرحمن : كل يوم هتوصلها معاك الشغل وطبعا هتستناها تروح معاك انت عارف لو عرفت انها روحت فيوم لوحدها
هشام بنرفزه : هو انا هشتغل سواق عندها
عبد الرحمن : اه اذا كان عجبك
هشام وهو بيبص لشرين : انا مش عارف ايه الهم ده
عبد الرحمن : اعمل حسابك انت وهى تتعاملو بطريقه كويسه قدام اهلها هم ميعرفوش اى حاجه مش عاوزنهم يخدو بلهم وتعاملهم باحترام انت فاهم ……..ولوشرين جات تشتكيلى منك فى يوم هتبقى ليلتك سوده
هشام : يا سلام ……..وهى مين دى يعنى عشان تعمل فيا كل ده عشانها …….دى وحده استغلاليه وبتعمل كل ده عشان الفلوس
شرين بغيظ : احترم نفسك ………ومين اصلا عمل كل ده من الاول
هشام : استعبطى بقى ………….. ده انتى قلبتى اللعبه كلها لمصلحتك وانا اللى كنت فكرك طيبه
عبد الرحمن : هشام لو اتكلمت تانى هتخلينى افقد اعصابى ……… اسكت احسنلك
هشام : ادينى اتزفت وسكت
عبد الرحمن وهو بيبص لشرين : معلشى يا شرين متزعليش ………عاوزه حاجه تانيه
شرين : اه انا عندى شرط قبل كتب الكتاب
هشام : اه طبعا اتشرطى ……..ما كلنا هنمشى بامرك بعد كده
عبد الرحمن : شرط ايه قولى
شرين : الجواز هيبقى على الورق بس
هشام بعصبيه : ازاى يعنى وده من ايه
شرين : مانا مش هينفع اتجوز اكتر واحد بكرهه فالدنيا
هشام : ده على اساس انى بموت فيكى يعنى
شرين : طب وايه اللى مضايق ……….كل واحد يعيش فحاله
هشام : لا مش كل حاجه هتقوليها هتتنفذ ………..وده حقى وهخده
شرين : ده على جثتى …………. معلشى يا عمو انا مش هوافق على كتب الكتاب الا بالشرط ده
هشام : هو انتى بتتامرى على ايه …………. محسسانى ان مفيش زيك ……..ده انا البنات بيترمو ورايا ويتمنو يكلمونى
شرين : ياسيدى انا وحشه واستغلاليه وزى الزفت هتموت عليه ليه بقى متوافق وخلاص
هشام بتريقه : هموت عليكى انتى …. ليه يعنى على ايه يا حسره ………..ماشى انا موافق انا اصلا مش طايق اشوفك
شرين : خلاص تمام ……….كل وحد يبقى فى حاله
عبد الرحمن : وهو بيبصلهم ………..ارتحتو ممكن بقى تتهدو شويه شهد واحمد هيخدو بالهم ………ايه ده ده انتم تعصبو بلد
وسابهم ومشى وشرين قامت وراه وراحت تقعد معاهم وهشام فضل قاعد وهو سرحان ومضايق ومش طايق شرين ولا حتى باباه

……………………..……………………..……………………..…………..

وفات اسبوع وعبد الرحمن لقى الشقه وعجبت شرين وكان كل يوم تنزل شرين وشريفه وشهد مع فريده وهشام عشان يجيبو العفش ويفرشو الشقه هشام كان بداء ياخد على شهد وشريفه وكان بيتكلم ويهزر مع شهد عادى بس يجى لحد شرين وهم الاتنين كانو بيتجاهلو بعض بس مكنوش بيحولو يبينو كده قدام شريفه وشهد

وعدت الايام واتفرشت الشقه وكل حاجه بقت جاهزه
وقبل الفرح بيوم كان الكل فرحان وزغريط وهيسه والاغانى شغاله عند شرين فالبيت وشرين قاعده فى اوضاتها مع ليلى
شرين : ليلى انا خايفه اوى ……..انا عامله نفسى قويه ومش هاممنى حاجه بس كل مفتكر انى خلاص بكره هعيش مع اكتر واحد بكرهه فى حياتى بموت من الخوف
ليلى : حسه بيكى يا شرين ……..بس كنتى هتعملى ايه
شرين : ربنا يهدى الحال ……. وتعدى الفتره دى على خير
ليلى وهى بتحضنها : امين يارب
ليلى : ياله بقى قومى كده وقعدى بره مع الناس عشان محدش يقول انك متجوزه غصب عنك
شرين بحزن : حاضر هقوم اهوه

تانى يوم شرين طبعا من الصبح فالكوافير ومعاها شهد وليلى وخلصو وكانو مستنين هشام عشان يخدومهم بس الوقت عدى ومحدش جه
شرين قاعده قلقانه وليلى وشهد بيهدوها
ليلى : اكيد فى حاجه عطلته …………..زمانهم جاين
شهد : طب متكلميه يا شرى
شرين :: مش معايا نمرته
شهد ياستغراب : بجد ازاى يعنى امال بتتكلمو ازاى الفتره اللى فاتت دى
شرين عشان تدارى على ان مفيش اتصال بينهم : اصل هو غير رقمه امبارح ونسيت اخده منه
شهد : طب وبعدين ………..ليكون حصل حاجه
ليلى : بس يا شهد احنا بنطمنها ولا بتقلقها اكتر
شهد : مش قصدى والله
وبعد تفكير وحيره شهد: انا هكلم بابا وهو يكلم عمو عبد الرحمن


الحلقه الرابعة عشر
هشام قاعد فى اوضته لابس البدله وعمال يلف سجاير بانجو ويشرب وتقريبا كده كان ضارب كل مخدرات ممكنه
دخل عليه احمد وهو فرحان : ياله ياعريس العرووو…………
احمد بخضه : ايه اللى انت بتشربه ده
هشام بيضحك بشكل هستير : مفيش بظبط العريس
احمد : انت اتجنينت…………..بابا لو شافك هتبقى ليله سوده
احمد مسك موبيله واتصل بكريم بسرعه
احمد : الو …….ايوه يا كريم انت فين ………..تحت ……..طب اطلع بسرعه انا فاوضة هشام ……..ياله بسرعه هتفهم لما تيجى
مفيش دقايق وكان كريم فى الاوضه
كريم : يانهار اسود ………….هو عمل ايه
احمد: مش عارف هو شرب ايه ……..بس ده مش فى وعيه …هنعمل ايه
كريم : لو راح الفرح بالمنظر ده هتبقى فضيحه
قام احمد وكريم مسكو هشام وقلعوه جاكت البدله ودخلوه الحمام وحطو دماغه تحت الحنفيه
هشام : بس بقى هضيعولى الدماغ
كريم : اسكت انت بقى ………….. احمد روح خلى اى حد يعمله كوباية قهوه
ورجع بعد شويه احمد بالقهوه وهشام فاق شويه
كريم : احنا اتاخرنا اوى على شرين
هشام : وايه المشكله
احمد : ياله قوم عشان ننزل ورينا يستر وتعدى الليله دى على خير……………………..……………………..……………………..………….

البنات فى الكوافير قلقانين من تاخير هشام ومحدش معاه نمرته عشان يطمن عليه
شهد: انا هكلم بابا وهو يكلم عمو عبد الرحمن
ولسه شهد بتتصل سمعت صوت عربيات وهيصه عرفت ان هشام جه وخرجت بسرعه عشان تطمن
خرجت شهد شافت احمد : ايه يا احمد اتاخرتو كده ليه كنا قلقانين اوى
احمد : طب ياله عشان التاخير شرين خلصت
شهد : اه من بدرى وشويه وجه هشام وخرجت شرين وكانت قمروه اوى
هشام اول ماشافها وبصوت عالى : الله هى العروسه الحلوه دى مراتى
شرين بخوف مسكت ليلى : هو ماله شكله مش طبيعى
ليلى : مش عارفه ………ربنا يستر
هشام راح مسك ايدها وركبو العربيه والكل ركب العربيات وطلعو على القاعه
الزفه عدت على خير وكريم واحمد واقفين جانب هشام عشان لو عمل اى حاجه وشرين كانت خايفه وطلبت من ليلى متسبهاش
شويه وشرين وهشام قاعدين فالكوشه جم عليهم شوية بنات قرايب واصحاب هشام بس كانو افر اوى فى لبسهم كان عريان جدا واخدو عشان وبداؤ بقى الرقص وطبعا هشام مكنشى متوصى اصلا
شرين فضلت قاعده مكانها وليلى قاعدت جانيها
شرين بغيظ : شايف المناظر
ليلى : وانتى متغاظه ليه ………..غيرانه
شرين : غيرانه ايه بس وزفت ايه ………بس انا شكلى ايه دلوقتى ………انتى عاجبك تصرفاته انا حسه اصلا انه شارب حاجه
ليلى : شارب …………شارب ايه يعنى
شرين : مش عارفه ………..بس مش منظر واحد طبيعى ابدا …………..انا خايفه بابا وماما يخدو موقف من تصرفاتو دى

كريم واحمد راحو لهشام
احمد: اهدى بقى شويه مينفعشى اللى بتعمله ده
هشام: بعمل ايه فرحى وفرحان وبرقص ايه المشكله
كريم : مينفعشى كده ………..شرين شكلها مضايق ……….. واهلها كمان مضايقين من تصرفاتك
احمد : ياله تعاله معايا اقعد جانب عروستك بقى وبلاش فضايح ………..خالى الليله تعدى على خير
هشام مشى وقعد جانب شرين وهو مش طايق نفسه
واحمد وكريم حاولو يخلصو الفرح بدرى بدرى قبل متحصل اى حاجه
خلص الفرح والكل روح ووصلو العريس والعروسه على بيتهم

……………………..……………………..……………………..………..

شرين قاعده على الانتريه قلقانه وخايفه شويه ويقرب عليها هشام ويقعد جانبها
هشام : تعرفى انك حلو اوى انهارده
وبيقرب منها قامت شرين زقته وضرباه بالقلم
هشام : انتى اتجنينتى
شرين : لا انا بفوقك ……………لان واضح انك شارب حاجه
هشام بتحدى : اه شارب …………..شارب كل حاجه ممكن تتخيلهيا ………….شارب عشان انسى اللى انا فيه ………..انتى ليه فوقتينى ليه متسبينى اعيش فعالم تانى وانسى كل القرف اللى انا فيه
شرين : قرف ………. ومين السبب فالقرف ده ………مش انت ………..انت ليه عايش دور الضحيه
شرين بداءت تعيط : انت دمرت حياتى بسبب لعبه وتسليه منك ………خلتنى اعيش حياه مكنتش اتمناها……….خلتنى انسانه حقيره ومستغله وبتجرى وراء الفلوس ………….انهارده كان يوم فرحى اليوم اللى بتحلم بيه اى بنت ……حلمى بالفستان الابيض والراجل اللى بحبه وهعيش معاه طول عمرى ضيعته منى …….خليت احلى يوم فحياتى اكتر يوم بكرهه وبكرهه نفسى فيه …. خليت حلمى كابوس …….وكل ده ليه … عشان لعبه ……….لعبه وانا اللى دفعت تمانها فوق بقى فوق انت المجرم مش الضحيه ..انت المجرم
وسابته شرين ودخلت اوضه الاطفال وقفلت على نفسها الباب وهى منهاره من العياط
وهشام فضل قاعد  على الانتريه وهو سرحان فى كلام شرين لحد ما راح فالنوم
……………………..……………………..……………………..……….

تانى يوم تصحى شرين على صوت موبايلها وهو بيرن وتبص فالساعه تلاقى الساعه 5 العصر
شرين بصوت نايم : السلام عليكم ….ايوه يا ماما ………اه كنت نايمه …….انا تمام كويسه ………….هشام اه كويس الحمد لله …… ماشى يا حبيتى تنورينى طبعا …………. ماشى سلام
تقوم شرين تلاقى نفسها لسه بفستان الفرح وتبص فالمرايه تلاقى الميك اب مبهدل وشها من العياط طول الليل
تطلع شرين من الاوضه تلاقى هشام نايم على الانتريه بالبدله زى ما هو

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة :ريم أحمد

نبذة عن الكاتب

أدمن 1

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *