ترفيهمسلسل اشجان

مسلسل اشجان الحلقة الأولى والثانية

الحلقة 1

منتصف السبعينات

اشجان هى البنت الصغيرة الوحيدة على ولدين اكبر منها

على الاخ الاكبر “حصل على دبلوم تجارة وبيشتغل”

وعادل الاوسط الطالب بكلية تجارة

اتنقلوا حالا للبيت الجديد اللى اشتروه بعد ماباعوا بيتهم علشان مامتها تسدد ديون مرض باباها اللى توفى من شهور

اشجان من يوم ما وعيت على الدنيا وهى شايفة باباها مريض فى السرير حركته جوه البيت بالعافية

ومامتها هى الام والاب الحنان والقسوة الشدة واللين

هى اللى بتخدم الاب المريض وبتجيب طلبات البيت وبتربى الاولاد

اشجان مرتبطة اوى بمامتها وده لانهم اسرة محافظة جدا وتربت على العادات والتقاليد الصارمة فمفيش اختلاط بحد

خاصة ان عائلة الام من كبرى العائلات الا ان مرض زوجها حولهم الى اسرة متوسطة بسبب مصاريف العلاج

الام”هى دى الشقة اللى هنعيش فيها بعد شقتنا امرى لله”

عادل”كويسة ياماما هى اصغر من بتاعتنا بس مش مهم”

الام”اصغر ومنطقة باين عليها انها اى كلام والناس اللى هنا مستواهم باين انهم غلابة اوى”

على”الحمدلله اننا سددنا ديون مرض بابا وكده بقى نعيش من غير ديون”

الام”الحمدلله”

على”هتقدمى لاشجان فين فى ثانوى ولا تجارة”

الام”انا لو عليا مش قادرة على مصاريف .. معاش ابوك على المصروف اللى انت بتدفعه فى البيت يدوب يمشينا”

عادل”بس نسألها يمكن تكون عايزة تكمل”

الام”ايه يااشجان…تدخلى ثانوى عام ولا تجارة”

اشجان”لا ياماما خليها تجارة علشان اخلص واشتغل”

الام”ابقى اسأل ياعادل التقديم امتى والحمدلله ان فيه مدرسة تجارة هنا قريبة اوى من البيت”

 

بدأت الام تتعود على البيت وجيرانها فى العمارة

اما اشجان فمكنش لها اى اصحاب هى مامتها وبس

ياقاعدين فى البيت مع بعض يا اما بيوزوروا قرايبهم

كل يوم لما تدخل اشجان البلكونة تنفض سجادة ولا تقف شوية

تلاقى واحد واقف فى الشارع وعينه على بلكونتها

واقف فى نفس المكان كل يوم

لما تنزل تشترى اى حاجة تلاقيه وراها

لما تخرج مع مامتها…برضه وراها

لفت نظرها… بمتابعته ليها

بس مكنتش تقدر تحكى لاى حد عن احساسها بيه

وخصوصا مامتها…هما قريبين بس مش اصحاب

 

عرفت اشجان فى الفترة التالية

ان بهاء ساكن فى نفس المنطقة وانه لسه مخلص جيش

وبهاء حاول يتقرب من عادل بحكم ان عادل بقى له اصحاب كتير

بدأت الدراسة وبعد شهر من الدراسة

فوجئت اشجان ببنت داخلة الفصل وبتقول ان اشجان تكلم الناظر

قلبها وقع…ياترى استدعاء ليه؟؟؟هى عملت ايه؟؟

لما خرجت من الفصل مع البنت

لقت بهاء فى المدرسة… وفاجأها انه اتعين ادارى فى نفس المدرسة

 

اشجان وبهاء كانوا بيتقابلوا يوميا فى المدرسة

وصارحها بحبه ليها من اول ماشافها

واتعلقت اشجان بيه جدا وبقت قصة الحب بينهم مضرب المثل فى المدرسة

وفاتحها بهاء برغبته فى التقدم لها رسميا

طارت من السعادة لما قالها انه هيكلم اخواتها

 

طول فترة سنة اولى وكل ما يكلم عادل

وعادل يتشاور مع مامته ومع على…يرفضوا

لانها لسه صغيرة على الارتباط دى يدوب مكملتش 16 سنة

بس بهاء كان طويل البال ومش بييأس ابدا

محاولاته متكررة… والرد مبيتغيرش

 

بدأت سنة تانية لاشجان وكل اللى اتغير انها هى وبهاء كانوا بيزيدوا تمسك بحبهم

بس اشجان مكنتش تقدر تصارح مامتها انها بتحب بهاء وعايزاه

كانت بتكتفى بمحاولات بهاء المتكررة ربما تنجح واحدة من المحاولات

اما فى المدرسة فكان معروف ان بهاء واشجان بيحبوا بعض

سواء للبنات او زملاء بهاء

وفى يوم … بعد المغرب بشوية

خبط الباب…وكان عادل وعلى موجودين فى البيت

قام على يفتح…شاف بنت ومامتها

“السلام عليكم… ممكن مامة اشجان”

“اتفضلوا”

لما اشجان شافتهم… حست ان روحها بتنسحب منها

دى زميلتها فى الفصل…وتبقى جارة بهاء و… و…بتحبه

الام”اهلا وسهلا”

الضيفة” ازيك يا مدام… انا جارتك فى نفس المنطقة وبنتى فاطمة تبقى زميلة اشجان فى الفصل”

الام”اهلا وسهلا… يا مرحبا”

الضيفة”انا ام زيك وجاية اوعيكى”

الام بقلق”خير”

اشجان اللى اختفت من المشهد واقفة بتسمع وهى فى المطبخ

وعادل وعلى فى الاوضة وسايبين الضيوف مع مامتهم

الضيفة”بنتك تعرف واحد وبيشاغلها فى المدرسة ومع بعض وكل الناس بتتكلم عليها”

الام”بنتى انا؟؟لالا اكيد فى حاجة غلط”

فاطمة”لا مش غلط… هى بتحب بهاء وحتى اسأليها”

ام اشجان حست بنار بتغلى فى دماغها وف نفس الوقت عايزة تدافع عن بنتها قدام الاغراب

الام”بهاء اتقدم لها كذا مرة بس احنا قلنا له انها صغيرة”

الضيفة”انا قلت لازم اعرفك … البنت صغيرة وميصحش تبقى كل الناس عارفة انها هى وبهاء بيحبوا بعض كده…سمعتها برضه”

الام”شكرا شكرا”

الضيفة”هستأذن انا…وابقى خلى بالك”

الام”ان شاءالله”

قامت فاطمة ومامتها… واشجان الدنيا بتلف بيها فى المطبخ

هتموت من الخوف… ياترى هيعملوا فيها ايه؟؟

بعد ماالباب اتقفل…. طلع على من الاوضة اللى كان سامع كل حاجة… وهجم على اشجان

وفضل يضرب فيها بالاقلام ويشد شعرها

والام تصرخ بصوت مكتوم”فضحتينا”

وحاول عادل يحوش بينهم

“اهدا ياعلى مش كده”

على جرى على السكينة”انا لازم اموتها قبل ماتخلى سيرتنا على كل لسان”

وجريت اشجان على الاوضة تستخبى فيها بعد الضرب اللى اخدته

الام”يا مصيبتى … هتموت اختك؟؟”

وعادل مسك السكينة من على

“مينفعش الكلام بالطريقة دى…اهدا ونتكلم”

“اهدا ايه…انت مسمعتش كلام الست دى واكيد غيرها وغيرها بيتكلم”

الام “تعالى ياعلى انت وعادل لازم نشوف حل وننهى الموضوع ده”

ودخلوا التلاتة الاوضة التانية وقفلوا الباب عليهم

اشجان مش عارفة تسمع بيقولوا ايه… وقاعدة تستنى الحكم اللى هيصدر عليها …من امها واخواتها

الحلقة 2

قعدت اشجان تدعى ربنا ان الموضوع يعدى على خير

واللى يقولوا عليه هى هتنفذه

حتى لو قالولها متكلموش تانى ابدااا… مش هتكلمه

 

فى الاوضة

على”شايفة بنتك عملت ايه؟؟؟مسيبتنيش اموتها ليه”

الام”تموتها ايه انت اتجننت”

عادل” مكنش ينفع تضربها كده ياعلى”

الام”هنعمل ايه؟؟ انا خايفة تعمل فى نفسها حاجة… احنا نوافق عليه وخلاص واهو برضه اسمه جه واتقدملها”

عادل”لالالا بلاش بهاء ده…اخلاقه مش كويسة”

الام”عرفت منين”

عادل”بشوفه فى الشارع… مش زى تربيتنا خالص”

على”بس بعد اللى حصل ده لازم نحافظ على سمعتها”

الام”مش البت عايزاه… لاحسن تهرب معاه ولا تموت نفسها علشانه”

على”خلاص يبقى لازم يكتب كتابه عليها علشان منظنا قدام الناس”

الام”ايوه ويجيب شبكة كويسة ويعمل فرح كمان علشان العيلة”

خرجوا كلهم من اجتماعهم المغلق… واشجان منكمشة فى مكانها

الام”بكرة فى المدرسة قوليله ييجى ويجيب اهله ويعمل حسابه على يجيب شبكة كويسة ويعمل فرح كبير ويكتب الكتاب”

بصت لهم اشجان وهى مبرقة عينيها

دى اخر حاجة كانت تتوقعها… هى بتحلم ولا فى الواقع؟؟

 

اول ما عرف بهاء اللى حصل فرح جدا وخلال كام يوم كان هو واهله فى بيت اشجان بيطلبوا ايدها… وكل طلبات اهلها مجابة

رغم ان لسه متعين ومرتبه 12جنيه وحوافز 5 جنيه بس وافق على انه يجيب شبكة ويعمل فرح وان الجواز هيكون بعد ما اشجان تخلص دراستها

طول فترة التجهيز للخطوبة ومامة اشجان مش طايقة بهاء

لانها حست انها أُجبرت على الموافقة.. فرق كبير واضح بين مستوى عيلتها و بهاء

 

يوم ماكانوا رايحين يجيبوا الشبكة راح بهاء لوحده معاهم

الام”احنا هنروح نجيب من عند ابن عمى”

بهاء”حاضر ياطنط”

لما وصلوا فى محل ابن عمها

الجواهرجى”اهلا اهلا… ازيك يا حكمت “

حكمت”ازيك يا هاشم … جايين نجيب شبكة اشجان”

الجواهرجى”الف مبروك…اشجان الصغيرة بقت عروسة… المحل كله تحت امركم”

وبدأت حكمت تختار وتنقى

“شوفى دى يا اشجان”

“كويسة ياماما”

الجواهرجى”طيب نوزنها كده… 250 جنيه”

بهاء بسرعة”طيب نشوف حاجة تانية”

وكل ما حكمت تختار … بهاء يقول نشوف حاجة تانية

حكمت”مينفعش كده بقى هنجيب ايه يعنى”

الجواهرجى”استنى بس ياحكمت… تعالوا يالاود”

واخدهم بره المحل”ايه يا بهاء انت معاك كام”

بهاء”انا كل اللى معايا 100 جنيه “

الجواهرجى”ولا يهمك انا هشوفلك دبلتين وغويشة بيهم”

ولما دخل واختاروا وخلصوا روحت اشجان ومامتها بعد ماوصلهم بهاء

اول مادخلوا البيت

“انتى خلاص هتفضحينى”

“انا ياماما ليه؟؟”

“جايبالى واحد وصمممتى عليه وجايب شبكة تعر يبقى شكلى ايه قدام العيلة؟؟”

واشجان ساكتة مش عارفة ترد…وكملت مامتها

“ادى اللى اخدته من خلفتك…يا ريتنى ماخلفتك ولا انك تفضحينى كده … مش كفاية اتورطنا فى تكاليف فستان خطوبة وانا ماشية بالمعاش بالعافية… كان يوم اسود لما جينا هنا”

واستمرت الايام ماشية على نفس الحال

الام مش راضية عن الجوازة وبتممها علشان معتقدة ان اشجان هتصمم على بهاء وممكن تعمل اى حاجة من وراهم

وكل ده واشجان ساكتة ومش بتتكلم ومستحملة كلام مامتها واخواتها

اما بهاء فهو اكتر واحد كل اللى عايزة ماشى كويس

اللى بيحبها هيخطبها… وهيكتب كتابه عليها كمان

برغبة اهلها اللى كانوا رافضينه

واشجان الطفلة اللى لا تفقه اى شئ فى الحياة

مسلمة له قلبها وعقلها وثقتها

 

من بعد كتب الكتاب وبهاء يوميا بيرجع مع اشجان من المدرسة

ويفضل قاعد عندهم لحد بالليل

فاتت شهور ف يوم

“بصى بقى يااشجان مينفعش كده هو كل يوم قاعد من ساعة ماتيجى وغداء وعشا وانا بجد مش قادرة على كده”

“ياماما والله هو اللى بيقولى هوصلك وامشى والاقيه قاعد”

“قوليله يمشى”

“كتير بقوله مش مهم توصلنى المدرسة قريبة وهما مش بيرضى”

“انا مكسوفة بيفاجئنى كل يوم وانا مش عاملة حسابى”

“بصى ياماما لو عايزة تقوليله قوليله بس انا اتكسف”

“وانا اتكسف اقوله المفروض هو يكون عنده دم…واول مرة النهاردة يمشى المغرب”

“مممم ماهو قالى رايح مشوار وجاى”

“ياااااااااااامصيبتى انا زهقت”

خبط الباب ووصل بهاء…وقعد وبعد شوية جت جارة ليهم

ولان بهاء كان مقيم يوميا فكان معروف للجيران

وبعد السلامات قامت الام تعمل شاى

الجارة”ايه اخبارك يا بهاء انا شفتك جاى نولت لك مخصوص”

بهاء”خير ياطنط”

الجارة”معايا اطقم جميلة تنفع اشجان …خد اللى انت عايزة وبالقسط المريح”

بهاء”شكرا ياطنط”

الجارة”خليها تاخد اللى هى عايزاه وابفقى ادفع حتى ف5جنيه فى الشهر”

بهاء”بعدين بعدين”

الجارة”ايه رايك يااشجان…نقى يابت”

اشجان”حلوين اوى ياطنط”

وبصت اشجان لبهاء… غمزلها انه ميقدرش يجيب

اشجان”بس مش مهم دلوقتى ياطنط احنا لسه بدرى على الجواز”

قالتها اشجان وهى مضطرة…. كان نفسها عريسها يشتريلها اى حاجة اى هدية تبقى ذكرى حلوة بينهم

 

خلصت اشجان دبلوم التجارة… ونجحت

والمفروض انها تتجوز

مفيش شقة… مفيش عفش

مامتها معندهاش اى بند تجهز منه بنتها

يعنى الطرفين… على فيض الكريم

ومكنش فيه غير حل واحد

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: دينا عماد

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى