ترفيهمسلسل أقوى حب

مسلسل أقوى حب الحلقة التاسعة عشر والعشرون

 

الحلقة 19

رجعت امل البيت… وكانت باين عليها انها مش مبسوطة

“مالك ياامل”

“انتى عادى ياماما كده عارفة انى هتجوز واسافر وموافقة”

“انتى هتتكلمى فى الموضوع ده تانى”

“ياماما بقالنا كام شهر مع بعض حاسة انى مش طايقاه لما بيكون هنا بفضل اتمنى الوقت يجرى بسرعة علشان يمشى يبقى ازاى هتجوزه واعيش معاه”

“زمان كانوا مبشوفوش بعض وبيعيشوا “

“واحنا دلوقتى زى زمان”

“اه زى زمان….وانا غلطانة انى سيبتلك السايب فى السايب تدخلى وتطلعى زى ماانتى عايزة”

واستغربت امل من كلام مامتها… وقارنت نفسها بكل اللى حواليها

“سايبين مين؟؟ ده انا الوحيدة اللى مبتعرفش تروح ولا تيجى الا بالمواعيد فى واحدة دلوقتى بتدى جدول محاضراتها لاخوها ده حتى اى شغل مطلوب للكلية بعمله بالعافية… ده انتوا قافلين عليا كأنى هتخطف لو خرجت… نفسى اخرج مع اصحابى وانا مش ماشية اتلفت حواليا كأنى بعمل حاجة غلط… كل البنات بيخرجوا ويتفسحوا ويسافروا كمان وانا هنا زى ماانا”

“مين اللى حفظك الكلام ده… مكنتيش كده… اكيد البت ايناس اللى انتى رايحة وجاية معاها دى هى اللى قلبتك كده”

وضحكت بسخرية

“انتوا فاكرين انى هفضل اخبى عينى عن اللى شايفاه حواليا”

وسمعوا صوت الباب بيتفتح …وابراهيم جه

الام”الحمدلله انك جيت ياابراهيم…تعالى شوف اختك وكلامها”

ابراهيم”انا سامع صوتها وانا بفتح…فى ايه”

امل”مش عايزة اتجوز اسامة”

ابراهيم”ليه بقى ان شاءالله…علشان راجل محترم وبيعاملك كويس”

امل”انا معيبتش فيه…هو كويس بس مش بحبه”

ابراهيم”اهلااااااا… سمعينى تانى “

وهجم عليها مسكها من كتفها…ولوى دراعها وراها

“حب ايه… انتى تعرفى حد تانى”

واتألمت امل…عيطت من الالم

“دراعى هيتكسر…اااااه”

“انتى تعرفى حد تانى على خطيبك”

“والله العظيم ابدا”

واتدخلت الام لما صعبت عليها امل

“سيبها يا ابراهيم مش كده”

ابراهيم بعد ما زقها بعيد عنه

“انا مش عايز اسمع الكلام ده تانى…مش كفاية كل يوم والتانى متشحطط بين هنا وبين بيتى وشغلى كل ده علشان تفضل عينى عليكى… كفاية بقى واهو ايام وهتبقى فى عصمة راجل ويشيل هو همك بقى”

امل”وهو انا بعمل ايه علشان تفضل عينك عليا”

الام”اسكتى بقى يا امل… انتهينا من الموضوع ده”

دخلت امل اوضتها… وهى بتعيط

ابراهيم قاعد وهو متنرفز

“متديهاش ودنك تانى فى الكلام ده”

“والله يابنى ما بسكت لها خالص”

“انا خايف يكون حد مالى ودانها بكلام الحب والكلام الفارغ ده”

“معقول؟؟ لالا اختك عاقلة ومش بتاعة كلام من ده”

“ربنا يهون بالايام دى خلينا نخلص بقى واهو لما يعيشوا مع بعض وهتعرفه هتتعود عليه وتعرف اننا بنعمل لمصلحتها”

 

فى المجلة… ايناس نسيت احساسها بالوحدة وسط انشغالها بالكلية والمجلة واصبحت هى كمان مشغولة طول اليوم

ومبقتش تحس بافتقادها لمامتها وباباها…بالعكس بقت هى كمان مشغولة زيهم

مازن زى ايناس بالظبط انشغل بالكلية والمجلة ومش بيرجع بيته الا على النوم ومن وقت بعاده عن عادل وسفره لمامته وباباه وهو بطل الحشيش نهائيا…واصبح شخص طبيعى جدا

ايمن وشروق بين الكلية والمجلة مع بعض والحب اللى بينهم بيشجعهم للنجاح وخصوصا ان ايمن ساب الشغل واتفرغ للمجلة

وجودهم فى كلية اعلام ساعدهم ان طلبة كتير يشتغلوا معاهم كنوع من التدريب العملى ليهم ومن غير ما يكون حد فيهم ملتزم باى حقوق ناحية التانى

لاهما بيدفعوا مرتبات ليهم ولا الطلبة ملزمين بعدد معين من الموضوعات فى العدد الواحد

الوحيدين اللى بياخدوا مرتب السكرتيرة والمحرر الالكترونى

 

اتقابلوا ال4 فى الكلية

مازن”بقولكم ايه احنا محتاجين نروح المجلة الجمعة كمان”

ايناس”ماشى”

امل”انا عارفة انكم بتتعبوا اوى فى المجلة وانا بروح قليل اوى”

ايمن”معلش احنا عارفين ظروفك”

ايناس”انا مش عارفة ازاى هتتجوزى وتسيبينا”

امل”انا لو عليا عايزة افضل معاكم ومسيبكومش ابدا”

ايمن”يابنتى ازاى ساكتة كده بس”

امل”مش قادرة عليهم”

مازن”بقولك ايه…اتكلمى مع خطيبك وصارحيه ومتهيألى يعنى لما يسمع منك انك رافضاه هيبعد وخصوصا انتى بتقولى هو مش وحش”

امل”مشفتش منه حاجة وحشة بس مش طايقاه لله فى لله كده”

ايمن”انا رأيي من رأى مازن برضه”

ايناس”وانا كمان شايفة كده”

امل”ربنا يقدرنى لما ييجى بكرة “

ايمن”انا عايز اقولكم حاجة بس خايف احبطكم”

امل وايناس ومازن”قول”

ايمن”احنا لازم نشوف حاجة تزود دخل المجلة… احنا يدوب اللى بنصرفه على الطباعة هو اللى بيرجع بعد التوزيع وبصراحة مازن بيصرف كتير من جيبه على المجلة وكده مينفعش”

مازن”معلش احنا لسه فى البداية”

ايناس”كلام ايمن صح…بس معنى كلامك بقى لازم نجيب اعلانات”

ايمن”ايوه ومن الاعلانات وفلوس توزيع المجلة الحكاية تمشى والحمدلله احنا توزيعنا كويس مش وحش لاننا لينا قرائنا من زمان”

امل”همشى انا بقى علشان متأخرش”

ودعوها وكلهم بيشجعوها انها متستسلمش لاخوها

 

تانى يوم كان معاد زيارة اسامة

ولما بيججى بيكون ابراهيم ومراته موجودين

وفى الاغلب مش بيقعدوا لوحدهم … وكل مرة امل بتتحجج انها بتساعد مامتها فى المطبخ علشان تضيع كتير من وقت الزيارة

المرة دى كانت مختلفة… كانت عايزة تقعد معاه لوحدهم

بس مفيش مجال خالص… وهو بيغسل ايده بعد الغدا

راحت عند الحمام… وهى بتناوله الفوطة

قالت بهمس

“ممكن تقول لابراهيم ننزل لوحدنا عايزة اتكلم معاك”

وفعلا استأذن اسامة من ابراهيم ..وبعد الحاح وافق

ماشيين الاتنين وبينهم مسافة كبيرة نسبيا

“تحبى نروح فين”

“اى مكان نقعد فيه نتكلم”

وراحوا كافيه قريب وقعدوا فيه…كانت امل بتفتكر كل كلمة من اصحابها علشان تتشجع وتقوى نفسها انها تتجرأ وتتكلم وتواجه

“انا مش مصدق نفسى انك طلبتى نخرج لوحدنا”

“علشان عايزة اتكلم معاك فى موضوع مهم بس ياريت متزعلش منى”

“ربنا مايجيب زعل..خير”

“انا بحترمك جدا علشان انت شخص يستحق الاحترام انا بس عايزة اقولك ان ارتباطنا ده حصل غصب عنى معلش ده مش عيب فيك لا سمح الله بس ممكن ميكونش حصل بيننا القبول اللى يخلينا نتجوز”

“بس اللى اعرفه غير كده”

“وهو انا قلتلك حاجة تانية قبل كده”

“ابراهيم لما سألته عن رأيك قال انك مرحبة جدا وسعيدة بس مكسوفة وانك خجولة اوى علشان كده طلب منى متصلش بيكى كتير ومسألكيش عن شعورك لانك بتتكسفى”

“هو قالك كده؟؟؟ معلش هو بيكدب عليك انا موقفى كان واضح من الاول انى رافضة الارتباط”

“طيب مش ممكن تدى نفسك فرصة نقرب من بعض”

“معلش انا مش عايزة اغشك…ربنا يرزقك بواحدة احسن منى انما انا مش هينفع”

“وانا مش هغصبك على حاجة… انا احترمت صراحتك رغم انى كنت اتمنى تكونى مراتى بس كل شئ نصيب”

وقامت امل… وقام معاها اسامة… وهما ماشيين

“متشكرة لانك تفهمت موقفى”

“العفو…بس هتقولى لابراهيم ايه”

“هقوله اللى حصل وربنا يعينى على المشاكل اللى هيعملها معايا”

“مفيش داعى… خليها تيجى منى احسن علشان ميضايقكيش”

“شكرا”

 

اعتذر اسامة عن تكملة الارتباط بأمل… بحجة ان محصلش بينهم توافق

ابراهيم كان بيسأل امل كتير عن السبب…كانت ترد بنفس الاجابة

رجعت امل لدراستها وللمجلة وهى مقبلة على الحياة اكتر

امل الوحيدة اللى مش بتروح المجلة بالليل ولا فى الاجازات

وفى يوم اتصلت بيها ايناس

“امل احنا مش رايحيين بكرة الجامعة”

“ليه”

“محتاجين محاسب فى المجلة وفيه واحد جاى بكرة يقابلنا فلازم نكون موجودين كلنا وانتى معانا…تعالى على المجلة ومتروحيش الكلية… هنتقابل الساعة 10 “

“ماشى”

 

فى المجلة اتقابلوا الساعة 10

ايمن واينا وامل

دخلوا امل وايناس اوضتهم… وايمن دخل يستنى مازن فى اوضتهم

وبعد نص ساعة… دخل ايمن عند ايناس وامل

“المحاسب بره…هو مازن مجاش انا افتكرت مازن عندكم”

ايناس”لا مجاش…هو مش عارف المعاد”

ايمن”عارف طبعا”

ومسك ايمن موبايله…واتصل بمازن

“ايه يامازن المواعيد دى… طيب يالا…سلام”

امل”ايه؟”

ايمن”عربيته عطلت وهو جاى… سابها وركب تاكسى وبيقول قرب اهو… انا هروح استناه ولما ييجى نبقى نقابل الراجل اللى قاعد مستنى ده”

خرج ايمن… وقفت امل فى الشباك بتبص بره

وايناس قاعدة على مكتبها…

“امولة شفتى المقال بتاعى اللى نزلته امبارح”

“اه حلو اوى وفهمت انك بتحكى عن جوز اختك وانتى بتنبهى البنات ميأمنوش لحد ويخلوا بالهم من نفسهم”

“اه فعلا..طيب كويس انه عجبك”

“اهو مازن وصل اهو”

امل شايفة مازن نازل من التاكسى… وبيعدى الشارع

صرخت امل

“حاسب يامازن”

انتفضت ايناس من مكانها على صرخة امل

جريت تبص… شافوا مازن وعربية جاية عكس الاتجاه

وخبطته خبطة قوية…اترفع قدام عينيهم ونزل ع الارض

صراخ متواصل منهم وهما بيجروا نازلين الشارع

وايمن وراهم مش فاهم غير انهم بيقولوا مازن وبيعيطوا

نزل كل اللى فى المجلة… كان مازن فى نص الشارع

وحواليه ناس كتير… والدم مغرق الشارع ومازن

الحلقة 20

جه الاسعاف… اخد مازن

ايناس جريت على عربيتها ومعاها امل

ايمن”ولاء متقفليش المجلة غيرفى معادها عادى”

ولاء”حاضر…بس عايزين نطمن”

ايمن”اكيد اكيد اى جديد هتصل بيكى”

الكلام كان بسرعة قبل مايروح ايمن يركب مع ايناس وامل

 

فى المستشفى

ال3 واقفين قدام العمليات… متوترين

ايمن”مش المفروض نقول لاهله”

امل”هنقولهم ايه ؟؟هو احنا عارفين ماله؟؟”

ايناس”هو مفيش حد يطمنا كده… دول بقالهم كتير”

واستمروا على نفس القلق لحد ما خرج دكتور من الدكاترة اللى كانوا جوه

ايمن”طمنا يا دكتور… مازن كويس”

الدكتور”محتاجين نقل دم لانه نزف كتير …بس اهم حاجة الخبطة مكنتش فى راسه يعنى مجرد جروح فى الراس انما الجمجمة والمخ سليم… خيطنا كل الجروح اللى فى اماكن متفرقة ودلوقتى لازم نعمل تركيب شرايح فى الفخد “

ايمن”يعنى بجد مفيش خطر”

الدكتور”لا الحمدلله… هنعمل العملية فورا”

ايمن”ماشى يادكتور… اهم حاجة يكون كويس”

امل وايناس”الحمد لله… الحمدلله”

بعد ما مشى الدكتور

ايمن”لازم بقى اهله يعرفوا ودلوقتى نقدر نطمنهم”

ايناس”وانت تعرف ارقامهم”

امل”موبايل مازن اهو معايا واحد اداهولى ساعة الحادثة”

اخد ايمن الموبايل…دور فيه

“فيه ماما وفيه بابا متهيألى اكلم باباه احسن”

امل”اه طبعا لان مامته حرام هتتخض اوى”

واتصل ايمن بالرقم المكتوب عليه بابا

“الو… السلام عليكم”

“مازن ازيك”

“انا ايمن صاحب مازن”

صوت الاب بقلق

“مازن فين؟؟مازن حصله حاجة”

“مازن بخير بس حادثة بسيطة وهيبقى كويس ان شاءالله”

“قولى الحقيقة مازن حصله حاجة”

“لا والله مازن هيبقى بخير ان شاءالله بس فى العمليات … ياريت حضرتك ومامته تيجوا فى اقرب وقت”

“ان شاءالله…على اول طيارة”

 

خرج مازن من العمليات…

فضلوا قاعدين معاه…لحد ما بدأ يفوق

اتكلم كلام بسيط ونام تانى ومردش عليهم

قلقوا عليه… سألوا الممرضة

“متخافوش هو اخد مسكنات قوية علشان ينام..النوم احسن له “

رن موبايل امل…كان ابراهيم

“انتى فين ياامل”

“انا بركب اهو”

“الساعة بقت 5 وانتى بترجعى 4 كل ده فين”

“اتأخرنا شوية بس… بس خلصت خلاص”

بعد ماقفلت

ايناس”قومى انتى علشان متتأخريش انا قاعدة وايمن معايا اهو”

امل”ربنا يشفيه شكله وهو نايم كده يقطع القلب”

ايناس”اه والله مكناش نعرف انه غالى علينا كده”

امل”ان شاءالله يبقى كويس… افرضى باباه ومامته مجوش”

ايمن”انا مش هسيبه خالص ولو محدش جه من اهله هبات معاه..اطمنوا وانتى ياايناس لو عايزة تروحى روحى انتى”

ايناس”لا انا هنزل اجيب اى حاجة نتغدا بيها واوصل امل وارجعلك”

 

اول مادخلت امل بيتها…لقيت ابراهيم موجود

“ايه حكاية المحاضرات اللى بتتأخر كتير كده”

“معرفش الدكتور ساعات بيتأخر انا ذنبى ايه”

“طيب بعد كده لما يتأخر متحضريش وارجعى بدرى”

“ازاى يعنى”

“زى مابقولك كده…واهى هانت كلها السنة دى ونخلص من كل ده”

“ان شاءالله”

“متتأخريش عن معادك تانى ..انا بقولك اهو”

“حااااااااااااااااضر”

قالتها ودخلت اوضتها

“خلى بالك عليها ياماما مش هفضل حاطط عينى فى وسط راسى كتير كده”

“هى بس عملت ايه”

“وانا هستنى لما تعمل… حاسس انها مخبية حاجة انا مش عارفها”

“يو ياابراهيم…هتخبى ايه يعنى”

ابراهيم بتفكير”مش عارف”

 

فى نفس اليوم… وصل اهل مازن

ايمن بيزوره كل يوم

ايناس بتزوره كل يوم

امل بتسأل عليه ويوم تروح الكلية ويوم للمجلة

 

خرج مازن من المستشفى بعد اسبوع

بالاسعاف… لانه ممنوع من الحركة

مامته وباباه معاه وبيراعوه

وبعد يومين من رجوعه البيت

الام”مازن احنا هنحجزلك معانا”

مازن”تحجزولى فين”

الاب”تسافر معانا”

مازن”اسافر ازاى …هو انا بقوم من مكانى”

الاب”احنا اخدنا اسبوعين ودى اقصى اجازة نقدر ناخدها”

الام”وعلشان تكون وسطنا واعرف اراعيك “

مازن”وهتراعينى ازاى وانتى وراكى شغل”

الام”هنجيب حد يقعد معاك طول فترة الشغل”

مازن “انا عايز افضل هنا…ده انا كنت مخنوق فى الاجازة اللى قضيتها هناك مع انى كنت حر قادر انزل واطلع واروح واجى عايزنى وانا عاجز كده اروح اتخنق هناك”

الام”ماهو انا مينفعش اسيبك ومينفعش اسيب شغلى”

ورن جرس الباب… قام الاب يشوف مين

ايمن جه يزور مازن كالعادة… دخل ايمن الاوضة

الام”اهلا ياايمن… تعالى اتكلم مع مازن وشوف دماغه الناشفة”

ايمن”خير… مزعل مامتك ليه يا مازن”

وحكت الام لايمن… ومازن مُصر على موقفه

وحاول ايمن يقنعه ان كلامهم صح

“انا مش مسافر… تجيبلى حد يشتغل هنا بدل هناك وخلاص”

الام”وهو فيه وقت ندور… هشوف طيب”

 

فى المجلة… كانوا امل وايناس فى مكتبهم

دخل لهم واحد اول مرة يشوفوه

“صباح الخير… انا ايهاب المحاسب اللى كنت جاى يوم الحادثة”

ايناس”اه…اهلا اهلا..اتفضل اقعد”

ايهاب”معلش انا جاى بس اقولكم انى معروض عليا شغل وانا ارتبطت معاكم بكلمة ومش عارف انتوا لسه محتاجين لى ولا اشوف الشغل التانى”

بصوا لبعض ايناس وامل

امل”لا طبعا محتاجينلك…بس هو من يوم الحادثة واحنا مش مستقرين…اسفين ان محدش اتصل بيك”

ايهاب”ابدا مفيش مشكلة…انا مقدر الظروف…طيب استأذن ولما الظروف تستقر حد يكلمنى وانا جاهز للشغل فى اى وقت”

قام يمشى

ايناس”لحظة ..استنى دقيقة بس”

وقامت ايناس بره..واتصلت بايمن

“ايمن المحاسب هنا … انت جاى امتى…طيب هخليه يستنى لحد ماتيجى”

ودخلت ايناس…

“ممكن تستنى ايمن وتستلم الشغل النهاردة ان شاءالله”

 

لما وصل ايمن واتفقوا مع ايهاب على الشغل..قعد مع ايناس وامل

“اهل مازن مسافرين بكرة… وملقوش حد يراعيه… انا هبقى معاه الفترة الجاية دى وممكن ابقى مش فاضى اجى المجلة… حاولى ياامل تبقى انتى وايناس متواجدين هنا كتير علشان المجلة متقفش”

امل”حاضر… بس انت هتعمل ايه “

ايمن”مازن نفسيته تعبانة من قلة حركته دى وكمان اهله هيسيبوه فنفسيته تعبت اكتر… مينفعش اسيبه انا كمان..حرام مين يساعده ومين يشوف طلباته… ربنا يقدرنى ومش هسيبه غير لما يتحرك ان شاءالله”

ايناس”هو لسه كتير لحد ما يتحرك”

ايمن”الدكتور قال اسبوعين كمان وممكن يتحرك جوه البيت على خفيف وبعد اسبوعين تانيين يبدأ علاج طبيعى وربنا يسهل…هقوم انا بقى اشوف شغلى”

بعد ما قام ايمن … الاتنين قاعدين زعلانين على حال مازن

“واحنا مش هنساعدهم ياامل”

“المفروض نعمل ايه”

“انا عن نفسى مازن وقف معايا فى موضوع عادل ولازم اردله جميله …انا هبقى اروح اعملهم اكل وكمان اكيد ايمن لا هيعرف يتعامل مع الغسالة ولا يقوم بمراعاته فى شغل البيت”

“وانا مش هنسى لمازن انه جالى بسرعة يوم ما ماما تعبت بس هعمل ايه”

“ماهو انا مينفعش اروح بيته لوحدى…نروح مع بعض ساعة كده فى اليوم نشوف محتاجين ايه نعمله وكفاية على ايمن انه هيفضل معاه 24ساعة”

امل قعدت تفكر وهى مترددة

“انتى مترددة كده ليه؟؟دى مساعدة مريض وكمان مش اى حد ده مازن اللى وقف جنبنا كلنا”

“ماشى ياايناس بس نروح الصبح قبل الكلية علشان متأخرش عن معاد الرجوع بتاع كل يوم مش عايزة مشاكل مع ابراهيم”

“ماشى.. نروح الساعة 9 قبل المحاضرات”

 

امل وايناس بيروحوا كل يوم

نفسية مازن بتتحسن فى وجودهم

هما فعلا مبيقعدوش كتير بس بيعملوا كل احتياجات البيت من تنضيف واكل وغسيل وينزلوا يروحوا الكلية او المجلة

 

بعد 10 ايام فاتوا …وكان فاضل ايام ويسمح الدكتور لمازن بالحركة

امل وايناس بيتقابلوا… ويروحوا مع بعض عند مازن

 

ابراهيم وهو رايح شغله اتصل بيه مديره وبعته مأمورية لفرع من فروع الشركة

 

امل وايناس نازلين من العربية وطالعين عمارة مازن

 

ابراهيم فى التاكسى… لمح امل وايناس

 

وقف التاكسى… نزل ومشى وراهم من غير ما يشوفوه

 

هما طالعين… وهوا وراهم

خبطوا وفتح لهم ايمن… دخلوا وقفلوا الباب وراهم

ابراهيم مش مصدق نفسه… حب يختبر اخته قبل ما يتصرف

اتصل بيها على الموبايل

“الو… ازيك ياامل…انتى فين… فى الجامعة.. ماشى”

خبط الباب بكل عصبية …رزع على الباب

ايمن بيفتح الباب … ووراه امل وايناس

 

وقفت امل ووشها اصفر وبصوت مبيطلعش

“ابراهيم”

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: دينا عماد

 

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى