ترفيهمسلسل أبغض الحلال

مسلسل أبغض الحلال الحلقة الخامسة والسادسة

الحلقة 5

وقف التاكسى… ونزلت نسمة وقفت قدام العمارة شوية

مترددة…طول الطريق بتفكر

“هتقابلنى ازاى… هتفرح…هتتضايق… هتعاتبنى؟؟”

بعد ما طلعت نسمة اول دور… خافت سعاد تحرجها

وخافت انها بعد الاحراج تكرهها… نزلت تانى

وقفت ف الشارع لحظات

“بعد ما جيت ده كله هرجع تانى؟؟… لأ انا هطلع واللى يحصل يحصل”

طلعت نسمة وهى قلقانة من المقابلة..ضربت الجرس ووقفت

قلبها بيدق ترقبا للقاء…مشاعر مختلفة فرحة شوق قلق خوف

الباب اتفتح… وظهرت سعاد

وقفت سعاد قدام نسمة…مش مصدقة المفاجئة

فتحت دراعها وبكل فرحة

“نسمة!!”

حضنتها نسمة… قد ايه حست بقيمة الحضن ده..كانت نفسها فيه من زمان…مش عايزة تخرج من حضن مامتها

حست سعاد ان نسمة مش بتسيب حضنها…قلقت

“نسمة…مالك ياحبيبتى انتى كويسة”

بعدت نسمة خطوة واحدة…وردت بابتسامة

“الحمدلله… كنتى وحشانى بس”

حضنتها سعاد تانى… حضن سريع

“تعالى ادخلى… انا مش مصدقة نفسى”

دخلت نسمة وهى مترددة ومكسوفة…وقفلت سعاد الباب

“حد هنا؟؟”

“لا مفيش…اسامة ف الشغل واخوكى ف المدرسة”

“اخويا”

رددت نسمة الكلمة فى سرها….واستغربتها

دخلت قعدت على كنبة… وقعدت سعاد جنبها

“طمنينى عليكى وعلى اخواتك…عاملين ايه”

“الحمدلله كويسين”

“قوليلى بجد مالك… جيتى ليه…فيه حاجة”

“لا مفيش بس بجد وحشتينى اوى… مش هطول عليكى”

“تطولى ايه… ياريتك تطولى وتطولى… ده انتوا وحشينى اوى”

“بجد يا ماما بنوحشك”

“اه طبعا…مش ولادى”

“طيب ليه مبتسأليش علينا”

“اسألى اخواتك وانتى هتعرفى ايه اللى بعدنى عنكم”

“ايه ياماما…قوليلى”

“قوليلى بس الاول… تشربى ايه… ولا اقولك احط لك تتغدى”

قامت سعاد دخلت المطبخ… قامت وراها نسمة

“ماما… جاوبينى لو سمحتى”

سعاد واقفة ضهرها لنسمة… ووشها للبوتاجاز بتعمل شاى

نسمة خبطت على كتفها

“ماما…فهمينى ربنا يخليكى”

التفتت سعاد …وكانت الدموع بتلمع فى عينيها

قفلت نسمة البوتاجاز

“مش عايزة شاى ولا عايزة آكل…انا عايزة افهم”

خرجوا من المطبخ وقعدوا فى الانتريه تانى

“نسمة …انا مش عايزة اتكلم على باباكى كلام ممكن يزعلك منه”

“ليه… هو بابا وحش؟؟”

“بابا مش وحش…بابا احسن اب ممكن يكون عند اى بنت وانتوا محظوظين بيه… بس هو مكنش يصلح زوج ابدا”

“ازاى”

“بلاش نقلب فى اللى فات يا نسمة”

“طيب بلاش اللى فات… مش بنوحشك”

“بتوحشونى طبعا وببقى هتجنن واسمع صوت واحدة فيكم بس من كتر ما بقيتوا تبعدوا بقيت اخاف اضايقكم”

“نبعد ازاى”

“لما كنت اطلب اشوفكم كنتوا مرة تيجوا وكذا مرة اخواتك يتحججوا بأى حجة… كنت لما اتصل اسمع صوت اخواتك خايفين… انا عارفة ان باباكم اكيد كان بيتكلم عنى وحش معاكم علشان كده بعدتوا”

“لا والله بابا مش بيجيب سيرتك بحاجة وحشة”

“مش مهم اللى فات…هتبقى تجيلى وتسألى عليا..صح”

“طبعا ياماما”

“واخواتك؟؟”

“اكيد هما كمان عايزين يشوفوكى”

“ياريت يا نسمة… هتقولى لباباكى؟”

سرحت نسمة وبعدين جاوبت

“مش عارفة”

 

نوال بقت مش مصدقة نفسها من الكلام اللى بتسمعه

دموعها كانت شلالات نازلة من عينيها

قفلت معاها بعد كلامها… نزلت من الشركة

راحت على البيت… اول ما دخلت لقيت نسمة كانت وصلت قبلها بدقايق

“نوال…مالك”

وهى بتعيط”مفيش”

جريت على الاوضة وهى بتعيط…نسمة وراها

“نوال مالك”

“سيبينى يا نسمة…علشان خاطرى سيبينى”

“طيب طمنينى مالك بس”

“مامة هيثم رفضتنى علشان بابا وماما مطلقين”

عيطت نوال كتير…خدتها نسمة ف حضنها

كانت نادية وصلت للبيت…واول مادخلت شافتهم بيعيطوا

نادية”فى ايه…بابا حصل له حاجة”

نسمة”الولية الهم ام هيثم الدلدول كلمت نوال بطريقة وحشة وقالت انها رافضة الجواز علشان بابا وماما مطلقين”

نادية”ايه التخلف بتاعها ده…ونوال مالها”

نوال بتسمع وتعيط ومش بترد

نسمة”متخلفة هنقول ايه”

نادية”وانتى زعلانة ليه…المفروض تفرحى ان ربنا بعدك عن ناس متخلفة واغبيا زى دول”

نوال”ممكن تتكلموا بره انا عايزة انام”

شاورت نسمة لنادية انهم يخرجوا….خرجوا من الاوضة

“ياعينى يا نوال صعبانة عليا اوى يا نادية”

“هى اه اتجرحت بس الحمدلله انها فهمت ان كل ده هيثم بيتحجج”

“انا خايفة عليها من الصدمة”

“مش اوى كده يعنى…هتزعل شوية وخلاص …المهم فين الاكل علشان ورايا درس كمان نص ساعة”

“معملتش اكل النهاردة…اشتريت كشرى”

“كشرى كشرى…هدخل اكل انا علشان البنات زمانهم جايين”

“نادية هو مينفعش تغيرى الدروس وتبقى بره البيت”

“ايدى على كتفك…بابا مش راضى اروح بيوت حد علشان كده ادانى اوضة للدروس”

“طيب مليش دعوة بدل اوامر عليا م الحاج”

دخلت نادية جابت علبة كشرى وجت قعدت تاكل وهى بتفتح وتقلب فى التليفون…دخلت نسمة جابت علبة ودخلت بيها لنوال…وخرجت بيها تانى

“نوال مش عايزة تاكل”

“هى عبيطة… مفيش حد يستاهل”

“قلبك جامد”

“لو مكنش قلبى جامد مكنتش عرفت اتكيف مع الظروف”

وصل سمير…دخل قعد معاهم وبعد ما دخل بشوية…بدأوا البنات اللى فى الدرس يوصلوا واحدة ورا التانية

دخلت نسمة تلم غسيل من البلكونة

ونادت على نادية…راحت لها نادية البلكونة

“بصى يا نادية البنت دى بتاخد درس عندك”

“اه…دى ياسمين”

“بصى دى تانى مرة اشوفها واقفة قبل الدرس مع الولد ده شكلها بتيجى معاه”

“مين ده…مش شكل وقفة اخوات ولا قرايب”

“اخوات مين يانادية…شوفى واقفين يهزروا ازاى…كل ده وهى لسه ف 3اعدادى”

“بس لما اتطلع هوريها”

“من غير عصبية يانادية …وجهيها بس من غير ماتحرجيها”

“هو انا لسه هطبطب وادلع…اهى طالعة اهى”

دقيقة ورن جرس الباب..ودخلت ياسمين على اوضة الدروس

 

فى اوضة الدروس…ترابيزة كبيرة على راسها نادية و10 بنات قاعدين…نادية بتبص لياسمين كتير…وقبل ما تبدأ الدرس

“ياسمين…مين اللى كنتى واقفة معاه تحت”

“ده…ده ابن خالتى”

“ابن خالتك؟؟ ومامتك عارفة ان ابن خالتك بيجيبك”

“اه طبعا”

مسكت نادية موبايلها ونادت لياسمين

“تعالى اتصليلى بمامتك”

“ليه”

“عايزة اتأكد منها…واقولها مفيش داعى واحد ييجى معاكى لحد هنا”

“انا هبقى اقولها”

“لا اتصليلى بيها هقولها انا”

“خلاص يا ميس نادية مش هخليه يوصلنى تانى”

“يعنى كدبتى”

“انا مش كدابة”

“لا كدابة وقليلة الادب علشان بتردى عليا كده… اتفضلى يا ياسمين من هنا ومتجيش الدرس تانى”

خرجت ياسمين وهى مكسوفة قدام صاحباتها…ومشيت من الدرس

 

نفس اليوم بالليل…والبنات فى اوضتهم قبل ما يناموا

نسمة جايبة صينية وفيها سندويتشات وكوباية لبن

“نوال.. نوال …قومى كلى”

نوال بترد وهى على السرير

“مش عايزة”

نادية قاعدة على سريرها بتحضر شغلها

نادية”قومى يانوال مش هتفضلى طول اليوم كده”

نسمة”بصى قومى كلى سندويتش واحد بس…علشان عايزة اقولكم حاجة مهمة حصلت النهاردة”

وقامت نوال على مضض… وانتبهت نادية لكلام نسمة

نادية “ايه اللى حصل؟؟”

نسمة”وحياة بابا عندك يانوال لتاكلى علشان احكى بقى”

نوال عارفة ان نسمة حنينة ومن حنيتها مش هتسكت…اخدت منها ساندويتش…وبدأت نسمة تحكى كل اللى حصل عند مامتها

نسمة”ها ايه رأيكم بقى…اقول لبابا ولا اسكت…هتيجوا تزوروها معايا ولا لأ”

نادية ساكتة بتفكر… ونوال ردت

“يعنى قابلتك كويس… اومال سابتنا ليه”

نادية”ماهو مكنش ينفع يرجعوا لبعض يا نوال”

نوال”انتى ناسية ان اخر مرة كانت ماما السبب فيها”

نادية”مش ناسية بس فيه مرتين قبلها كان بابا السبب فيهم”

نوال”لو مكنتش ماما عاندت اخر مرة كان زماننا عايشين زى اى بنات طبيعيين ليهم ام واب ومكنتش سمعت كلام زى اللى سمعته النهاردة”

نسمة”بس انا حسيت ان ماما بتحبنا اوى وانها طيبة وحنينة اوى”

نادية”ايوه طبعا بتحبنا… انا فاكرة كانت احن ام فى الدنيا”

نوال”لو كانت حنينة كانت متجوزتش وسابتنا”

نادية”متلوميش عليها لوحدها يا نوال…هى مقدرتش تتحمل بابا”

نوال”ماله بابا..وحش؟؟ عمره ما زعلنا ولا استخسر فينا حاجة”

نادية”كل واحد وليه ظروفه ودى ظروفنا ومحدش منهم غلطان”

نسمة”محدش رد عليا اقول لبابا ولا لأ…هتيجوا معايا ليها تانى ولا لأ”

نوال ونادية بيبصوا لبعض

نادية”لما الاقى وقت هبقى اجى معاكى…ومتقوليش لبابا”

نوال”لسه هفكر…مش عارفة لو قابلتها ممكن اعاملها ازاى… وعايزة اقولكم انى قررت اسيب الشغل”

نادية”ليه”

نوال”لا عايزة انزل شغل ولا عايزة اتعامل مع بنى ادمين”

 

تانى يوم فى المدرسة…. نادية داخلة الحصة

وبعد ما دخلت …شافت ياسمين قاعدة فى مكانها

تجاهلتها تماما وكأن محصلش حاجة فى الدرس

مع الشرح… حست ان ياسمين قاعدة مشغولة بحاجة

وكأنها مخدتش بالها…كملت شرح وقربت بهدوء من ياسمين

وفجاة شدت من ايدها الموبايل اللى كانت فاتحاه

“بتعملى ايه ف الحصة”

وبصت نادية فى الموبايل…شافت الاكونت بتاع الفيس مفتوح وياسمين بتكلم واحد ف الشات

“بتكلمى ولاد ف الحصة…دى مالهاش غير معنى واحد انك قليلة الادب”

“انا مؤدبة غصب عن اى حد”

“لو مؤدبة مترديش كده وانتى غلطانة”

“انتى اللى مش من حقك تاخدى موبايلى كده…انتى حاطانى ف دماغك ليه”

“وانا هحط انتى فى دماغى؟؟ليه ان شاءالله”

“علشان انا احلى منك…وعلشان انا فيه حد بيحبنى وانتى لأ… غيرانة منى علشان قربتى تعنسى”

وبدون وعى…رفعت نادية ايدها وضربت ياسمين قلم

عمرها ماكانت بالقوة والانفعال ده… ومحسيتش غير والبنات بيحاولوا يهدوها… وياسمين بتصرخ لما شفتها نزلت دم من قوة القلم وشدته

الحلقة 6

ياسمين بتخبط على باب بيتهم برزع على الباب

فتحت مامتها مخضوضة

“ياسمييييييين… مالك”

وهى بتعيط وتصرخ

“شايفة وشى”

“يا مصيبتى…مين اللى عمل فيكى كده”

ياسمين وهى بتصرخ

“المتخلفة اللى اسمها نادية ضربتنى لحد مابقى الدم نازل من بؤى”

الام وهى بتزعق

“ضربتك… ضربة ف قلبها …هى فاكرة ملكيش اهل”

“والله ياماما ما رايحة المدرسة تانى الا لما تاخدوا لى حقى”

“طبعاااا… لازم تقف عند حدها ..بس هى ضربتك ليه”

“بتسألينى ليه…هو فيه حاجة مهما كانت تستاهل انها تمد ايدها عليا”

“لا معاكى حق… اتصليلى بيحيي”

ومسكت ياسمين موبايلها…واتصلت وادت لمامتها التليفون

“الو…انت فين يا يحيي… لا خلاص يالا بسرعة”

وسألتها ياسمين

“هو فين…مقلتيلوش ليه؟؟”

“طالع ع السلم اهو..لما ييجى نبقى نحكيله”

دقايق وفتح يحيى الباب

الام”تعالى يا يحيى شوف المصيبة اللى احنا فيها”

يحيى بقلق”مصيبة ايه ياماما”

ياسمين بتعيط… واول ما شافته

“شايف يا يحيى…مدرسة متخلفة ضربتنى ازاى “

يحيى”ضربتك؟؟ليه”

ياسمين”يعنى ايه ليه…هو المهم ليه ولا المهم انها ضربتنى”

يحيى”ماهو لما اعرف ليه اشوف مين غلطان”

الام”حتى لو اختك غلطت… تضربها وتزرقلها وشها كده”

ياسمين”هيكون ليه…حاطانى ف دماغها علشان انا احلى منها…هى كده بتغير من البنات علشان هى عانس ومعقدة واحنا مش زيها”

الام”لازم تقف عند حدها يا يحيي…اتصرف”

يحيي”اتصرف اعمل ايه يعنى”

الام”احبسها علشان تتربى وتعرف ان الله حق”

يحيى”وانا احبسها باى صفة ولا باى تهمةطك

ياسمين”انت مش محامى…مش هتغلب يعنى”

يحيى”انا هقدم فيها شكوى ف النيابة الادراية…مفيش ف ايدى اكتر من كده”

ياسمين”اى حاجة المهم تتأدب”

 

فى بيت سعاد… سعاد بتحط شاى قدامها هى واسامة

“تسلم ايدك… مكنتش اعرف ان زيارة نسمة هتعمل فيكى كده”

سعاد بتضحك

“عملت فيا ايه”

“خلت مزاجك حلو ومبسوطة ومن امبارح ولا زعقتى لاسلام على حاجة وحاسس بيكى كده مزقططة”

“فعلا يااسامة…انا حسيت ان بناتى منسونيش وكنت محتاجة اوى حتى كلمة حلوة منهم”

انا مش عايز اضايقك بس تفتكرى باباهم هيخليهم يبقوا زى ماانتى فاكرة معاكى”

“اللى مفرحنى من زيارة نسمة انى حسيت ان مهما باباهم قال ولا عمل هفضل امهم وهما بناتى… وكفاية انها جت من نفسها دى حاجة كبيرة اوى عندى”

“ربنا يخليهوملك يا ستى”

“ويخليكم ليا يااسمامة انت واسلام”

“بصى لما نسمة ولا اخواتها ييجوا تانى ابقى خلي اسلام يشوفهم ويقعد معاهم…يعنى هو يدوب يعرف شكلهم بس انما مفيش علاقة بينهم ودول مهما كان اخوات”

“معاك حق.. بس يارب ييجوا ولا حتى يتصلوا بيا ومتكونش مرة وعدت وخلاص”

“سيبيها على الله”

 

بلال فى الشارع… وبيتكلم فى الموبايل

“ايوه يا ليلى…وحشتينى طبعا… انا عاملك مفاجئة…انا عند الجامعة… قدامك قد ايه..يعنى ايه لسه فى الطريق…انتى مش قلتى هتكونى ف الجامعة الساعة 9… اتأخرتى… انا رجعت من الشغل عليكى…خلاص هروح انا بقى وابقى اجيلك بكرة الصبح ان شاءالله… مع السلامة”

 

وعلى بعد كانت نسمة مع آيه… لمحت بلال

فرحت لما شافته وقالت لآيه

“بلال اهو… اكيد جه علشانى”

“وهييجلك ليه وانتى قدامه طول الوقت ف البيت”

ردت نسمة بضحك

“شوفى انتى بقى ليه”

“ههههه ايوه ياعم يبقى احساسك صح…يمكن جاى يصارحك”

“اكيد… انا هروح اكلمه يمكن بيدور عليا”

“طيب هسبقك انا لو اتأخرتى هدخل المحاضرة”

“ماشى”

دخلت آيه الجامعة وراحت نسمة ناحية بلال

بلال مكنش شاف نسمة وبعد مكالمته مع ليلى مشى لحد مايشوف تاكسى…سمع نسمة من وراه بتناديه

 

“بلاااااااااااااال”

التفت بلال لنسمة

“ازيك يا نسمة”

“الحمدلله…ايه بتدور عليا”

“لا كنت جاى لواحد صاحبى وملقيتوش”

ضحكت نسمة وقالت فى سرها

“للدرجة دى فاكرنى عبيطة…قال صاحبه قال”

“وبعدين هتعمل ايه”

“مفيش هروح انام “

“ماتيجى اعزمك على الفطار”

“انتى اللى هتعزمينى هههههه”

“خلاص اعزمنى انت”

“يا بنت انتى على طول جعانة كده…تعالى نفطر انا كمان جعان “

فرحت نسمة… وراحوا يفطروا مع بعض وهى ف منتهى السعادة

ومستنية كل لحظة يقولها الكلمة اللى مستنياها… بلا جدوى

 

بعد حوالى اسبوع

نوال طول الاسبوع كانت قاعدة فى البيت مبتخرجش نهائى

ولا بتقعد مع سمير واخواتها…على طول يا قاعدة فى الاوضة يا اما نايمة

نسمة كلمت سعاد خلال الاسبوع مرتين تسأل عليها ومعرفتش تزروها تانى لانشغالها بالدراسة

نادية بين المدرسة والدروس وياسمين مش بتروح المدرسة ونادية نسيت موقف ياسمين تقريبا او اسقطته عمدا من ذاكرتها لانها مش مهتمة بكلامها

                       ***********************

نسمة فى المطبخ… ونوال دخلت عليها

“اعمل معاكى حاجة”

“لا يا نوال خلاص خلصت…بابا ونادية زمانهم جايين ونتغدا مع بعض”

“طيب”

“انتى هتفضلى زعلانة كده كتير”

“لا خلاص هيثم مكلفش نفسه حتى يتصل بيا ويقولى انا متمسك بيكى”

“اومال ليه قافلة على نفسك كده”

“انا بس مليش نفس لاى حاجة”

“ايه رأيك ننزل كمان شوية انا وانتى نروح لماما”

“لا مش عايزة”

“ليه”

“مش عارفة يا نسمة…يمكن مش عايزة عتاب بيننا هى هتقول مسألتوش عليا وانا مش هقدر مقولهاش انى زعلانة من انها مصبرتش وعاشت معانا…بابا مش وحش اوى لدرجة انها تمسك على تفاهه وتسيبه… انا ساعات بفكر ياترى هى فعلا اتطلقت من بابا علشان تتجوز اسامة ده”

“ايه الكلام ده يانوال…مش معقول”

“ليه مش معقول… مش يمكن كانت بتحبه ومحبتش بابا”

“ولو هى محبتش بابا اتجوزته وبقت ترجعله لما يطلقها ليه”

“معرفش يانسمة… دى كلها افكار بتجيلى وببقى مش عارفة مين صح ومين غلط”

سمعوا صوت الباب…وصوت سمير

“السلام عليكم”

ردوا عليه لما خرجوا من المطبخ

دخل قعد على اقرب كنبة

“نادية لسه مجتش”

نوال”لسه”

نسمة”زمانها جاية”

سمير”طيب اقعدوا… عايزك يانوال”

نسمة”وانا لأ”

سمير”مستغناش عنك يا اخر العنقود… بقولك ايه يا نوال تعرفى واحد اسمه رمى صبرى”

نسمة”وهو فيه حد ميعرفوش”

سمير باستغراب”تعرفيه؟؟؟تعرفيه منين”

نسمة”ده مطرب معروف”

سمير باستغراب اكتر

“مطرب!!! اومال هو بيقول انه زميل نوال ازاى”

نوال مكنتش مهتمة بالكلام ولما سمعت اسمها ردت

“مين… اااااه صح كان معايا واحد فى الشغل اسمه رامى صبرى”

نسمة” ماله ده يعنى”

نوال”ماله يابابا… تعرفه منين”

سمير”النهاردة لقيت واحد بيتصل بيا فى الشغل وعرفنى بنفسه”

نوال”وده عايز منك ايه يابابا… وجاب رقمك الشغل ازاى”

سمير”جابه ازاى سأل زمايلك على اسم الشركة اللى بشتغل فيها وجاب رقمها من الدليل ده اللى قاله لما سألته نفس السؤال…وحكاية عايزنى ليه…فهو عايزك انتى مش عايزنى انا”

نسمة”عرييييييييس”

نوال”عريس؟؟ عريس ازاى ومعتقدش اننا اتكلمنا قبل كده كلمتين على بعض”

سمير”هو بيقول انه يعرفك من الشغل وعايز يتقدملك وتتعرفوا على بعض يعنى لما ييجى”

نوال”وقلتله ايه”

سمير”قلت هسألك…انتى ايه رأيك”

وسمعوا صوت الباب بيتفتح…ودخلت نادية

“بابااا…الحقنى يا بابا”

وقام سمير مخضوض ونادية عيطت اول ما شافته

قاموا البنات يطبطبوا على اختهم

البنات”مالك…فى ايه”

نادية”فى الحصة الاخيرة مديرة المدرسة بعتتلى وقالتلى ان جه اشارة من النيابة الادارية بيستدعونى للتحقيق”

سمير”تحقيق!!! ليه؟؟”

نادية”معرفش يابابا… انا خايفة اوى…هيكون تحقيق ليه..انا لا معايا عهدة ولا مسئولة عن فلوس ولا بعمل حاجة غلط”

سمير”اهدى بس يانادية… هما عايزينك امتى”

نادية”بكرة الصبح”

سمير”متخافيش انا هتصل دلوقتى اخد بكرة اجازة واجى معاكى..هتطلع حاجة بسيطة ان شاءالله”

سمير”وانتى يا نوال…ايه ردك”

نوال”لما نطمن على نادية الاول يابابا اكون فكرت”

 

تانى يوم الصبح… نادية وسمير راحوا النيابة الادراية

قعدوا يستنوا حوالى ساعتين… وكل ما يسألوا المعاد امتى

يرد العسكرى

“البيه وكيل النيابة لسه مجاش…ولما ييجى حسب ما يطلبكم”

سمير قال لنادية

“انا زهقت وتعبت… انا هنزل اشوف اى قهوة اشرب فيها شوية شاى ولا قهوة”

“ماشى يابابا…ولو جه وكيل النيابة هتصل بيك تيجى بسرعة”

“متقلقيش لو ملقيتش قهوة قريبة خلاص…مش هبعد يعنى .. بقولك ايه…تعالى انزلى معايا اجيبلك شيكولاته وعصير واطلعى تانى”

“لا يابابا مش عايزة”

“لا اسمعى الكلام اليوم شكله طويل وانتى مفطرتيش”

قامت نادية سمعت كلامه ونزلت معاه… اشترى لها شيكولاته وعصير من كشك قريب

“اطلعى انتى وانا مش هتأخر عليكى”

راحت نادية… وقفت تستنى الاسانسير ينزل

نزل الاسانسير… وهى بتركب… جه واحد ركب معاها

 

ركب يحيى الاسانسير مع نادية من غير مايعرفها

“الدور الكام يا انسة”

“التامن”

اللحظات السريعة اللى جمعتهم فى الاسانسير

جمعتهم نظرات سريعة كانت بتتحاشاها نادية من خجلها

 

نزلوا من الاسانسير… وراحت نادية قعدت فى مكانها

دخل يحيى يسأل عن التحقيق..وعرف ان وكيل النيابة لسه مجاش

رجع يحيى وقعد قصادها… كل ما يحاول يشغل نفسه بحاجة يلاقى نفسه بيفكر انه عايز يتعرف على البنت اللى قدامه دى

اول مرة بنت تشده بالطريقة دى

“لازم اتعرف عليها… مين عارف ممكن صدفة تانية تجمعنا ولا لأ… بس ممكن تحرجنى… لازم اجيبها بطريقة مناسبة”

وحاول يحيى يفكر فى طريقة يتعرف بيها على نادية

 

نادية قاعدة وملاحظة نظرات يحيى

“مين ده…بيبص لى كده ليه… اقوم انزل ولا اعمل ايه…ايه الاحراج ده”

وارتاحت من تفكيرها لما شافت سمير جه وقعد جنبها

“لسه وكيل النيابة مجاش”

“لأ لسه”

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: دينا عماد

 

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى