مسلسل أبغض الحلال الحلقة الحادية والثانية عشر
الحلقة 11
سعاد واقفة فى الشارع… بتبص فى الساعة
شوية وجت نوال من بعيد
“ازيك ياماما”
“ازيك يانوال…اتاخرتى ليه”
“معلش ياماما البلد زحمة اوى”
“ولا يهمك..هو البيت قريب من هنا”
“اه العمارة اللى بعد دى”
مشيوا الاتنين جنب بعض
دخلت نوال العمارة ومعاها سعاد
خبطت نوال على الشقة اللى ف الدور الاول
“انتى بتخبطى على مين يانوال”
“على حماتى ياماما”
“هو انتى مش ليكى شقة”
“اه ليا…فوق”
“وبتخبطى عليها ليه”
اتفتح الباب… وظهرت مامة رامى
الحماة”اهلا يانوال”
نوال”ازيك يا ماما…اعرفك على ماما”
سلموا الامهات على بعض
الحماة”ثوانى وجاية معاكى”
سعاد بتبص لنوال ومستنية تفسير…لانها مش فاهمة
دقيقة وشافت ام رامى طالعة وعليها طرحة صلاة وبهدوم البيت
وف ايديها ميدالية مفاتيح…طلعت ووراها نوال ووراهم سعاد
فتحت ام رامى باب الشقة…دخلت نوال وسعاد
ام رامى”شدى حيلك يانوال مش فاضل غير اسبوعين”
نوال”ان شاءالله هنخلص…بس يمكن يكون اكتر من اسبوعين”
ام رامى”مين قال اكتر…عمك حجز القاعة امبارح”
نوال”حجز خلاص؟”
ام رامى”ايوه”
نوال”رامى مقاليش يعنى”
ام رامى”اكيد كان هيقولك مش انتى العروسة”
بدات ام رامى تفتح شنط السفر اللى فيها هدوم نوال
ام رامى”بصى يا نوال الجنب ده حطى فيه هدومك والجنب ده يبقى هدوم رامى”
نوال”حاضر”
سعاد ساكتة خالص كل شوية تبص عليهم وهما بيتكلموا ومستغربة
عايزة تنفرد بنوال مش عارفة…لحد ما جت فرصة
ام رامى”انا هنزل اجيب شنطة فيها باقى حاجة رامى”
نوال”اتفضلى ياماما”
نزلت ام رامى
“ها يا ماما ايه رأيك ف الشقة”
“طيب قوليلى اخترتى فيها ايه علشان اقولك حلو ولا وحش”
“اخترت العفش انا ورامى”
“هو انتى معكيش مفتاح للشقة”
“لأ”
“ليه”
“واخده ليه هو انا لسه اتجوزت”
“مش حاجتك كلها هنا…مش باباكى هو اللى جايب نص العفش ده يبقى ليه متاخديش المفتاح”
“دى حاجات تافهه ميصحش اتكلم فيها”
“هو اللى رفض يديهولك يا نوال صح؟؟”
وارتبكت نوال وانشغلت بتكملة رص الهدوم ف الدولاب
“وهى مامته ليه بتقولك تحطى ده هنا وده هناك…وهى هتفضل هنا واحنا بنحط الهدوم”
“ايوه ياماما رامى قال انها هتساعدنى…وارجوكى ياماما بلاش تفسدى عليا فرحتى”
“فرحتك!!يارب يفرحك يانوال”
سمعوا صوت المفتاح بيتفتح…وجت مامة رامى
فى بيت سمير… سمير قاعد ونوال بتفتح الباب بالمفتاح
“ازيك يابابا”
“الحمدلله”
“نسمة فين”
“بتذاكر جوه”
وحطت قدامه كروت
“بابا دى الكروت بتاعتنا”
بص لها سمير باستغراب…وباستنكار سألها
“كروت من غير معاد”
“لا بمعاد… رامى حجز القاعة كمان اسبوعين”
“بجد..والله مبروك انه عزمنا ..وياترى انتى كنتى عارفة ولا اتعزمتى برضه زينا”
قعدت نوال على الكنبة وعيطت
“بتعيطى ليه”
“ماما تضايقنى بكلامها وحضرتك كمان تكمل عليا”
“ومامتك ضايقتك ليه…مش دى مامتكم اللى انتوا عايزينها”
وقامت نوال
“بعد اذنك يابابا …انا داخلة اغير هدومى”
دخلت نوال اوضتهم…شافتها نسمة
“ايه يانوال عملتى ايه مع ماما”
“خلصنا الاوض والمطبخ”
“طيب كويس لسه النيش “
“اه هبقى اخد نادية معايا ويوم الستاير يبقى اقول للراجل ييجى الصبح ويعلقها ونفرش السجاد ويبقى خلاص”
“مش لما تحددوا المعاد”
“حددناه خلاص والكروت مع بابا”
كانت غيرت هدومها…وطلعت على السرير قبل ما تدخل ف اى مناقشات تانية
“تصبحى على خير…اتهدينا طول اليوم ف الشقة”
“طيب استنى تاكلى”
“لا شبعانة مش قادرة”
سمعوا صوت باب الشقة اترزع
قامت نسمة وهى خارجة من الاوضة
“هو حد جالنا ولا ايه”
سمير بيخبط على مديحة…فتحت له الباب
“اهلا يا سمير …تعالى”
دخل سمير وقعد …حط كارت قدامها
“كارت الفرح بتاع نوال اهو”
“ومالك بتقولها كده…ربنا يسعدها”
“انا اتخنقت منها ومن خطيبها ده…انا مش فاهم هو يعنى ميفهمش الاصول ولا بيستغبى ولا ايه…وهى كمان ازاى ساكتة كده وراضية بكل حاجة”
“يمكن بتحبه”
“انا خايف يكون فيه حاجة بينهم من الاول وعلشان كده جه عايز يتجوز بسرعة وهى راضية وساكتة كده”
“حاجة ايه اعوذ بالله… بناتك متربيين احسن تربية”
“اللى بيحصل ده مش طبيعى وانا مش قادر اتكلم… انا اللى جوايا ده مجرد شك انما لو اتأكدت ممكن اموت فيها علشان كده ساكت وبقول يتجوزوا وتتستر احسن”
وسكتت مديحة تفكر
“لالا مش معقول…ياريتك ما قلتلى ياسمير خليت مخى يودى ويجيب”
“انا مش عارف اتكلم مع مين..مقدرش اقول كده لاخواتها ومفيش حد غيرك اتكلم معاه”
“ربنا يسترهم يارب”
“والنهاردة طول اليوم كانت مع مامتها…يعنى انا اربى واتعب وهى تاخدهم ع الجاهز”
“هى اخدتهم ياسمير…ده يوم وهما معاك من سنين”
“يالا شكلى ربيت وتعبت ع الفاضى”
“لا يا سمير متقولش كده بناتك ميستغنوش عنك”
ضحك سميربسخرية
“هيستغنوا”
فى بيت سعاد… بتلبس واسامة بيلبس…جه اسلام وهو لابس بدلة
“ايه رأيك ياماما…حلو كده”
سعاد”ماشاءالله …كبرت يااسلام وبقيت راجل”
اسامة”ايوه ياعم الشياكة دى كلها ماانت اخو العروسة”
سعاد”انا خلصت”
اسامة”وانا جاهز…يالا بينا”
وصلوا القاعة… واول ما دخلوا كانت مديحة بتستقبل الناس
مديحة”اهلا اهلا…ازيك يا سعاد”
سلموا على بعض… وسلمت على اسامة واسلام
“اهلا وسهلا…اتفضلوا”
اخدتهم وقعدتهم فى ترابيزة قريبة من الكوشة
سعاد”البنات فين”
مديحة”مع اختهم ف الكوافير… بعد اذنكم اقول اسلم ع الناس”
لمحت سعاد سمير واقف بعيد…دورت وشها عنه
ولما شافها سمير…تجاهل وجودها
راح لمديحة
“شوفى البجاحة…جايباه معاها كمان…اروح اطردهم الاتنين دلوقتى”
“وانت نسيت انه جوزها ولا ايه.. ملكش دعوة بيهم خلى اليوم يعدى على خير”
“هو يوم مش فايت شكله…سواء من الجوازة الهم دى ولا من معازيم البنات…جايبين امهم وجوزها..ده اللى كان ناقصنى”
وصلت العروسة والعريس
ومعاهم نادية ويحيي ونسمة
نادية عرفت يحيي واهله على سعاد واسامة واسلام
وطول الفرح والبنات بيرقصوا ويهيصوا مع نوال
ورامى مع اهله واصحابه
وقبل الفرح ما يخلص بشوية
اخد يحيي نادية بعيد عن الدوشة
“حلوة القاعة هنا ايه رأيك”
“اه حلوة اوى”
“نحجز فيها للشبكة”
“ماشى”
“حددى يوم نروح نجيب فيه الشبكة ومتقوليليش عندى دروس”
“ههه لا الجمعة معنديش دروس…نروح الجمعة”
“ابقى قولى لمامتك تيجى معانا اكيد هتفرح”
فرحت نادية باقتراح يحيي
“معاك حق…فعلا هتفرح اوى”
نسمة طول الفرح فرحانة بقربها من بلال مدة طويلة
دورت عليه ملقيتوش ف لحظة
خرجت بره القاعة شافته…راحت له
“انت فين كنت بدرو عليك”
“مفيش كنت بشرب سيجارة بس وجاى على طول”
“ايه رايك ف الفرح”
“حلو عقبالك بقى علشان نخلص منك”
“انت مفيش مرة تقولى كلمة حلوة ابدا”
“بسبوسة هاها”
“هاها رخم والله”
“يا بنتى اكبرى بقى شوية وبطلى تغلسى عليا”
“هو انا علشان بحب اتكلم معاك ابقى غلسة”
زعلت نسمة من نبرته الجدية ف الكلام
مشيت خطوتين…وقفها بلال من ايدها
“انتى هتزعلى بجد”
“انت على طول كل ما اتكلم معاك تصدنى كده”
“يا حبيبتى انا متعود ارخم عليكى من واحنا صغيرين”
فرحت من كلمته… وعايزة تتأكد منه
“ايه حبيبتك دى”
“اه طبعا انتى حبيبتى ونادية حبيبتى ونوال حبيبتى…هو انا عندى اخوات غيركم”
“اخوات”
“ايوه يا نسمة انتى اختى الصغيرة اللى مقدرش ازعلها”
“بس احنا مش اخوات يا بلال..ولا انا بتعامل معاك زى اخويا”
“نسمة… انا بحب وهخطب قريب وانتى الوحيدة اللى قلتلك بعد ماما علشان انتى اختى”
حاولت نسمة تتماسك بعد صدمتها
انقذها صوت ال dj وهو بينهى الفرح
“الفرح خلص…انا رايحة لنوال”
خلص الفرح…. مشيت سعاد وسامة واسلام
وراحت مديحة وسمير والبنات يوصلوا العروسة والعريس
وعلى باب البيت الخارجى…وقفت مامة رامى وباباه
طلعوا نوال ورامى…ووقفوا بعرض الباب
الام”كان بودنا نقولكم اتفضلوا بس احنا معندناش حد يدخل مع العروسة والعريس شقتهم”
مديحة وبنفاد صبر”بس احنا عندنا بنوصل العروسة لحد اوضة نومها”
الام”معلش بقى هى عندنا وتمشى على عاداتنا”
نادية”هو فيه ايه…انتى بتمنعينا نفرح باختنا”
خاف سمير من عصبية نادية… وخافت نسمة
نسمة مسكت ايد اختها
“يالا يا نادية “
وضحكت لتخفيف التوتر
“العروسة للعريس ربنا يهنيهم”
مشيت معاها نادية وهى بتبص لام رامى شذرا
مسك سمير ايد اخته ومشيوا ناحية العربية اللى قاعد فيها يحيي يستناهم
“شفتى مش قلتلك… مش ممكن كانت هتتصرف كده الا لو عارفة ان بنتنا مش هتقدر تتكلم…انا متاكدة الجوازة دى اتلمت بسرعة كده ليه”
الحمدلله انها اتجوزت وخلاص…ميجيش منه الكلام ده بقى”
ركبوا ف عربية يحيي
ركبت نادية جنبه وسمير ومديحة ونوال ورا
نادية”ست معندهاش ذوق وقليلة الادب”
يحيي”هى مين”
سمير”خلاص يا نادية حصل خير”
نادية”انا مش عارفة نوال ساكتة لهم ليه… هتستحملهم ازاى دول”
يحيي”هدى نفسك يا نادية… مش مستاهلة كل ده”
نادية”متتدخلش يا يحيي …لما اتكلم عن حاجة تخص اهلى متتدخلش لو سمحت”
بص لها يحيي… وبص فى المراية على اللى قاعدين ورا
وطلع بالعربية بكل سرعة وعصبية
الحلقة 12
طول الطريق ومحدش بيتكلم خالص
يحيي محرج من اهل نادية ومتضايق منها اوى
سمير متضايق من نوال اللى حطته وحطت نفسها فى جوازة غريبة
نسمة بتحاول تمسك دموعها بعد صدمتها فى بلال
نادية متضايقة من الطريقة اللى عاملتهم بيها حماة اختها
مديحة ملاحظة جو التوتر العام ومتضايقة من اللى حصل عند نوال
وقف يحيي بالعربية عند البيت وهو ساكت
نزلوا كلهم…
سمير”متشكرين يا يحيي تعبناك معانا”
يحيي”متقولش كده ياعمى … تعبك راحة”
مشيت مديحة فى ايد نسمة… ووراهم سمير
نادية وهى بتقفل باب العربية
“تصبح على خير يا يحيي”
مردش عليها وهو بيبص قدامه… اول ماقفلت الباب… طلع بالعربية بنفس السرعة والعصبية
التفت سمير شاف نادية واقفة مكانها بتبص ع العربية
“نادييييييييية”
راحت نادية ناحية باباها
“نعم يابابا”
“مالك واقفة كده ليه”
“يحيي بكلمه مردش عليا ومشى”
حط ايده على كتفها واخدها وطلعوا من غير ما يتكلم
لما وصلوا لشقتهم كان الباب مفتوح ونسمة مستنياهم وسمعوا صوت باب مديحة بيتقفل
دخل سمير وقفل الباب…بص لبناته كل بنت باين عليها الزعل
“مالكم هو ده شكل ناس راجعة من فرح”
نادية”انا مش فاهمة يحيي ماله”
سمير”احرجتيه قدامنا يا نادية وده ميصحش”
نسمة”انا استنيتك يا بابا تقوله اى حاجة”
سمير”لو كنت اتكلمت كان هيتحرج اكتر”
نادية”انا كل الحكاية قلتله ميتدخلش فى حاجة تخصنا”
سمير”هو متدخلش انتى غلطانة”
نادية”ماانا كنت متنرفزة من الزفتة ام رامى دى”
نسمة”تصبحوا على خير”
دخلت نسمة وسابتهم يكملوا كلامهم اللى متعداش 5 دقايق ودخلت وراها نادية
“مالك يا نسمة شكلك زعلانة”
“مفيش متضايقة بس من حركة ام رامى معانا”
“دى ست فظيعة…هو انا لو اتصلت بيحيي فيها حاجة”
“ده المفروض انك تتصلى طبعا”
نامت نسمة على السرير… او عملت انها نايمة علشان تسيب دموعها اللى حبستها تنزل براحتها من غير ما حد يحس بيها
بعد تردد اتصلت نادية بحيي… مرة و2 و3 مش بيرد عليها
“لاء بقى …ان شالله عنك مارديت”
فى بيت نوال الصبح… نوال قاعدة على سريرها بتعيط
ورامى واقف جنب السرير
“مينفعش كده بقى خلصينى”
نوال وهى بتعيط
“وانا اعمل ايه يعنى انا تعبت … مش لازم دلوقتى يعنى”
“انتى عايزة تفضحينى…انتى عايزة اهلى يقولوا عليا مش راجل”
“واهلك مالهم…دى حاجة بيننا احنا”
رامى بيعدل ف هدومه
“انت نازل لمامتك برضه…طول الليل نازل طالع كده”
سابها رامى ورجع بعد شوية ومعاه مامته
“ايه يانوال… فى ايه”
“مفيش يا ماما”
“مش تطاوعى جوزك بقى خلينا نخلص”
“انا مش ممانعة بس خايفة”
“خايفة من ايه…الله يرحم زمان لما كانت ستات العيلة كلها تبقى واقفة”
اتكسف نوال من كلامها وخافت اكتر
ام رامى”خليك راجل معاها مينفعش الدلع ده…وان منفعش معاها الذوق يبقى مفيش غير العافية”
مشيت الام ووصلها رامى لحد الباب ورجع لنوال
قامت نوال…. وبكل خوف
“والله العظيم لو قربت منى بالعافية لاتصل ببابا ييجى ياخدنى واخليها فضيحة بجلاجل”
وبصوت واطى
“خلاص خلاص… مش هاجى جنبك بالعافية…بس قوليلى ليه كل ما اقرب منك تتخشبى كده”
“خايفة يا رامى…ملحقتش اخد عليك… معرفش بس احساسى ان مامتك قاعدة مستنية تحت بحس كانها شايفانا”
وسكتت لحظات
“انا تعبت ونفسى انام… انا داخلة انام فى الاوضة التانية”
“نعم ياختى… نامى هنا لحد ما نشوف حل… ان شالله حتى تروحى لدكتور “
سكتت نوال… طلعت على السرير… لفت وشها بعيد عنه ونامت
مديحة بتخبط على سمير
فتحت لها نادية
“تعالى ياعمتو”
“سمير فين”
صوت سمير من جوه
“انا جاهز خلاص اهو”
نسمة محضرة شنطة كبيرة فيها علب
“ده الاكل بتاعها ياعمتو”
اخدت مديحة الشنطة واخد سمير علب حلويات كان حاططهم ونزلوا
لما راحوا البيت عند اهل رامى كان باب البيت الخارجى مقفول
رن سمير جرس جنب الباب…. بعد 10 دقايق نزلت ام رامى
ام رامى”اهلا وسهلا اتفضلوا”
طلعوا وراها…وقفت على باب شقتها
“اتفضلوا”
سمير”لأ شكرا احنا طالعين لنوال”
الام”اتفضلوا بس..والله لانتوا داخلين”
مديحة وسمير بصوا لبعض…ومع تصميمها دخلوا
قعدوا ساكتين…حوالى 5 دقايق
سمير”نستأذن علشان نطلع لنوال”
الام”متأخذنيش يعنى يا حاج…اصلهم نايمين ..لسه يدوب نايمين من شوية ومينفعش نصحيهم عرسان جداد بقى”
مديحة”احنا جايبينلها الاكل وعايزين نطمن عليها”
الام”وماله ياحبيبتى اول ما يصحوا هوصلهم الاكل بنفسى”
سمير”عايزين نطمن على نوال”
الام”هى بخير…ولما تصحى هقولها تكلمكم ف التليفون…تشربوا ايه”
مديحة وسمير بصوا لبعض
سمير”يالا يا مديحة”
نزلوا وهما متضايقين…وسمير عمال يشتم ويزعق فى الشارع
“ايه الناس دى… هو فيه حد كده… انا ازاى اديتلهم بنتى”
سعاد فى بيتها… واقفة ف المطبخ بتغنى
دخل عليها اسامة
“الله الله على المزاج الحلو”
“طبعا مش راجعة امبارح من فرح بنتى”
“ربنا يفرحك كمان وكمان”
“يارب افرح بيهم كلهم”
“ان شاءالله”
“احنا الساعة كام يااسامة”
“6 الا ربع”
“هروح اتصل بنسمة كده اطمن على نوال”
خرجت سعاد من المطبخ…واتصلت بنسمة
حكت لها نسمة على موقف امبارح بالليل وعلى رجوعهم من غير ما يشوفوها… اخدت سعاد رقم مديحة من نسمة
بعد ما قفلت معاها اتصلت بمديحة
“الو… ازيك يامديحة… هو انتوا صحيح مشفتوش نوال … ازاى ابوها سكت يعنى…افرضى البت حصل لها حاجة ومخبيين… ليه وافق م الاول على ناس زى دول… شك ف ايه؟؟ لالالا مش معقول مفيش حاجة بينهم… نسمة قالتلى ان نوال مكنتش تعرفه فعلا قبل ما يتقدملها… ماهو انا مش قادرة اطمن عليها كده…بقولك ايه انا هروح لها واللى يحصل يحصل..هبقى اطمنك لما ارجع…مع السلامة”
بعد ماقفلت سعاد… قامت وهى بتلبس
“اسامة اتصل بالكبابجى اللى بتجيبلنا منه خليه يحضر لى كيلو كباب وافوت عليه وانا رايحة لنوال”
“حاضر بس هو فيه ايه”
“الولية حماتها مخلتش حد يطلع معاها امبارح ولا حد يشوفها النهاردة”
وصلت سعاد عند بيت نوال…وكان الباب الخارجى مقفول
رنت الجرس…وبعد شوية نزلت ام رامى
“اهلا وسهلا”
فتحت الباب ودخلت سعاد
“اهلا بيكى يا حاجة”
وطلعت ووقفت عند بيتها
“اتفضلى”
“لا شكرا انا طالعة لبنتى”
“لازم تتفضلى عندى..والله لانتى داخلة تشربى حاجة”
“بصى يا حاجة انا لاجاية اكل ولا اشرب انا جاية لبنتى مش لحد تانى”
“مالك يا ام نوال كده انتى مش عايزة نضايفك ولا ايه”
“معلش وقت تانى”
طلعت نوال على اول سلمتين…مسكتها ام رامى من ايدها
“استنى بس”
وزعقت سعاد
“استنى ايه… انتى هتمنعينى اطلع لبنتى ولا ايه”
“لا بس هما نايمين”
“يا سلاااااام هما نايمين ليل ونهار… حتى لو نايمة هصحيها او هقعد جنب الباب لحد ماتصحى… عن اذنك بقى”
طلعت سعاد وطلعت وراها ام رامى
خبطت سعاد… فتح رامى… دخلت ووراها مامته حطت سعاد الاكل اللى معاها على السفرة
“فين نوال”
رامى”اتفضلى انادى عليها”
سعاد”لا متناديش انا داخلة لها”
مع جرأة سعاد وسرعة تصرفها وقف رامى ومامته مش عارفين يتكلموا
نوال اول ماسمعت صوت مامتها… خرجت من الاوضة بسرعة
واتقابلوا عند الباب… اترمت نوال ف حضن مامتها
اخدتها سعاد ف حضنها وبصت لرامى ومامته…المرتبكين
“مالك يانوال…وشك مخطوف ليه”
نوال”مفيش ياماما”
سعاد”انتى عينيكى عاملة كده ليه…انتى معيطة”
ام رامى”دلع بنات”
سعاد”هو ايه اللى دلع بنات…بنتى معيطة ف يوم صباحيتها ليه”
رامى”مفيش حاجة والله…ماتتكلمى يانوال”
سعاد”تعالى نتكلم ف الاوضة”
ام رامى”لأ الكلام بيبقى قدامنا…انا مضمنش تتدعى على ابنى وتقول ايه”
نوال”هقول عليه ايه يعنى؟؟”
ام رامى”بصى بقى يا ام نوال…بنتك عاصية على جوزها من اول ليلة…ده اسمه كلام… هو محدش فهمها انها لازم تطاوعه من اول يوم”
بصت سعاد لنوال باستغراب ومفاجئة من الكلام
“تعالى يانوال نتكلم جوه”
اخدتها سعاد ودخلت الاوضة وقفلت من جوه
“ايه اللى بتقوله حماتك ده”
“ياماما انا خايفة ومتوترة وهو كل شوية ينزل يقولها عمل ايه وانا قلت ايه وهى تطلع تدينى محاضرة طول الليل على كده…كل مايقرب منى بخاف…اصله مبيقوليش كلمة حلوة تشيل الخوف من جوايا ده كل همه عايز يخلص علشان مامته مستعجله”
“يعنى هو طبيعى … ضربك؟؟؟ عملك حاجة”
“طبيعى ياماما ومضربنيش ولا حاجة بس مامته مخليانا احنا الاتنين متوترين”
حضنتها سعاد وهى بتطمنها
“يااااه يا نوال…انا كنت هموت م القلق عليكى … دى ست جاهلة ومتخلفة…ايه ده للدرجة دى التدخل فى حياتكم”
حست سعاد بنوال بتعيط وهى ف حضنها
“متعيطيش ياحبيبتى…خوفك ده طبيعى متقلقيش انتى “
خرجت سعاد لرامى ومامته اللى كانوا قاعدين واقفين وواقفين قاعدين مش ثابتين على حال
سعاد”بقولك ايه يارامى ما تاخد مراتك كده يومين اى حتة تتفسحوا”
ام رامى”يروحوا فين ؟مش ليهم بيت”
سعاد”بس دول عرسان يا حاجة ولازم يتفسحوا”
ام رامى”ابنى خلص كل اللى معاه فى الجواز ومعهوش للفسح والكلام الفاضى ده”
ردت سعاد بنفاد صبر
“هحجز لهم انا فى اى اوتيل يومين … ماشى يا رامى”
رامى وهو بيبص لمامته ومتردد
“ماشى يا طنط”
نادية طول اليوم متصلتش بيحيي… ولا يحيي اتصل بيها
البيت كله متوتر …سواء بسبب جوازة نوال
او كل بنت عندها سببها على حدة
وكل بنت زعلانة على زعل باباها
خبط الباب… فتحت نسمة
كانت مديحة على الباب وبلال نازل معاها
بلال”ازيك يا نسمة”
نسمة من غير ماتبص له
“الحمدلله…اتفضلوا”
بلال”انا رايح الشغل…مش عايزة حاجة”
نسمة”شكرا”
دخلت مديحة… واول مادخلت
“سمير فين”
نسمة”فى البلكونة”
دخلت له مديحة وهى مبسوطة وبتضحك…قعدت قدامه
“اطمن يا سمير شكوكك مش ف محلها…بنتك سليمة مش زى ماكنت فاكر”
رد سمير بلهفة
“عرفتى منين”
“من سعاد”
وحكت مديحة لسمير عن مكالمة سعاد ليها وعن زيارتها لنوال وانها بعد ما رجعت اتصلت بيها وحكت لها
“الحمدلله…طمنتينى يا مديحة”
“والله اللى طمنتنا سعاد ربنا يخليها ويطمنها يارب”
نادية بعد تفكير طول اليوم… وبعد عمتها ما مشيت
قلعت دبلتها …وراحت لسمير
“بابااا… دى دبلة يحيي والخاتم اللى جابهولى.. ابقى اتصل بيه واديهومله”
اتفاجئ سمير
“ليه ايه اللى حصل”
“مالناش نصيب نكمل مع بعض يا بابا… هو مش عايزنى وانا كمان مش عايزاه”
———–———-———————-————
ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقات القادمة
بقلم الكاتبة: دينا عماد
