مسلسل عمارة 8 الحلقة الحادية والثانية والعشرون
الحلقة 21
وقبل ما يخلص حامد كلامه مع اسلام
قام واتصل بميرفت
“الو…بقولك ياميرفت انا جاى لك مع اسلام بكرة بالليل”
“اهلا وسهلا تشرف فى اى وقت”
“مع السلامة”
بعد المكالمة
سامية”انت هتروح لها ليه”
حامد”علشان الموضوع ده مينفعش فيه كلام العيال”
سامية”بس انت هتروح تقولها ايه؟؟”
حامد”بكرة هتعرفى… وانت يااسلام موافق على الجوازة بتاعة حماتك دى”
اسلام”مم مم مش عارف بس مش مرتاح للوضع ده”
حامد”خلاص سيبنى اتصرف واقرر صح”
اسلام”حاضر يابابا”
فى شقة 2
بعد المكالمة
“فى ايه ياماما”
“مش عارفة حماكى قال جاى بكرة…هو حصل حاجة بينك وبين اسلام”
“مفيش حاجة…مش معقول يكون جاى علشان …”
“علشان ايه؟؟؟”
“يعنى لما قلت لاسلام على موضوع جوازك وشه اتقلب كده فقلت له دى مامتى مش مامتك…زعل من الكلمة دى”
“يعنى هييجى هو وابوه علشان كلمة… بقولك ايه ياخبر بفلوس بكرة هيبقى ببلاش”
“احكيلى بقى اتفقتى مع عمو نبيل على ايه”
“لسه متفقناش على جاجة يا حبيبتى انا يدوب قلت انى موافقة”
“عايزين نفرح بيكى ياعروسة ههههههه”
“عيب يابنت خليكى مؤدبة”
“ياختى كميلة ماما بتتكسف”
فى شقة 4
“ياه يانهلة طول اليوم بره كده وسايبانى”
“معلش ياماما النهاردة اول يوم شغل ليا وكان لازم اخرج من الامتحان على الشغل”
“وعملتى ايه”
“الحمدلله…انا لسه بتعلم بس المدام قالت عليا انى بتعلم بسرعة… واللى نفعنى ياماما انى اصلا غاوية الحاجات دى وبفهمها من الاول…اهى نفعت”
“والناس اللى معاكى كويسين”
“اه…امنية صاحبتى ومامتها صاحبة المكان وفيه بنات تانيين بس باين عليهم طيبين وكويسين”
“ربنا يوفقك يابنتى ويوقفلك ولاد الحلال”
“معلش ياماما الشغل هيبقى طول اليوم…متزعليش منى انا هسيبك لوحدك غصب عنى”
“لا يابنتى انا عارفة انا بس كنت بطمن عليكى”
فى شقة 2
ميرفت”اهلا وسهلا اتفضلوا”
حامد”ازيك يا ميرفت”
ميرفت”الحمدلله…سامية مجتش معاكوا ليه”
وبعد ما قعدوا
حامد”عرفت انك عايزة تتجوزى يا ميرفت صح الكلام ده”
وفوجئت ميرفت بالسؤال ولهجته اللى كأنها اتهام
“انا مكنتش بفكر فى الجواز انما لقى راجل محترم عرض عليا الجواز فقلت مفيش مانع”
حامد”عموما انتى حرة..بس مينفعش نيفين تعيش مع راجل غريب”
ميرفت”مش فاهمة قصدك”
حامد”يعنى لو هتتجوزى نيفين مش هتعيش مع معاكى”
ميرفت”ومين اللى يقدر يحرمنى من بنتى وازاى اصلا هسيب بنتى تعيش لوحدها”
ونيفين اللى كانت قاعدة ساكتة..قامت وقعدت جنب مامتها ومسكت فيها وهى مستغربة وبتقول
“يعنى ايه ماما تسيبنى”
حامد”انتوا بتتسرعوا ليه فى فهم كلامى”
ميرفت”تقصد ايه”
حامد”انا قصدى لو هتتجوزى يتجوز اسلام ونيفين الاول وتبقى نيفين معانا وانتى تعيشى مع جوزك وتبقى بينكم زيارات طبعا مفيش مشكلة خالص”
ميرفت”مش سامعة صوتك يعنى يااسلام…انت جاهز للجواز”
حامد”انا اللى بتكلم…وبعدين ماهما هيتجوزوا معانا وممكن نجيب اوضة نوم سهلة مش صعبة”
ميرفت”وليه الاستعجال والجواز بالطريقة دى”
حامد”علشان جوازك”
ميرفت”ولو مااتجوزتش”
حامد”خلاص هنرجع لاتفاقنا الاولانى”
نيفين”بس ماما هتتجوز ان شاءالله وانا مش هتجوز غير لما اسلام يخلص كل اللى اتفقنا عليه”
حامد”الكلام مع مامتك مش معاكى”
نيفين”ماهو انا اللى المفروض هتتجوز اسلام مش ماما… وانا واسلام اتفقنا اننا هنعيش فى شقة لوحدنا واسلام لسه مجابهاش يبقى هنتجوز ازاى”
حامد”شقة؟؟ شقة ايه؟؟ هى بتقول ايه يااسلام”
اسلام”اصل… اصل..يابابا”
حامد”يبقى كلامها صح…بتتفقوا من ورايا”
وكانت كل النظرات موجهه لاسلام…حامد وميرفت ونيفين
كلهم مستنيين يسمعوا رده
ورد اسلام”الكلام ده كان قبل الظروف اللى جدت انما دلوقتى انا رايي هو نفس راى بابا بالظبط”
وقام وقف معلن عن نهاية كلامه
حامد”فكروا يومين كده وردوا علينا لو هتتجوزى يا ميرفت نحدد معاد جواز اسلام ونيفين الاول…سلام عليكم”
فى المصحة النفسية
“يادكتورة لو سمحتى اخبار حالة انعام ايه”
“بخير زياراتك المتكررة ليها وودك فى التعامل معاها خفف عنها كتير وقصر مدة العلاج”
“يعنى هى ممكن تخرج قريب”
“اه ممكن اسبوع كمان وتخرج”
“انا ممكن اطلب منها انها ترجعلى ويكون ردها باقتناع”
“اه ممكن طبعا”
وبعد المحادثة بين جمال والدكتورة دخل لانعام اوضتها
“اخبارك ايه النهاردة”
“انا بقيت كويسة الحمدلله…بس ينفع كده تتعب نفسك كل يوم وتيجى تزورنى”
“انتى بتقولى ايه…تعب؟؟؟دى احلى الاوقات اللى بقضيها معاكى”
“بس كده مراتك هتتضايق لو عرفت انك بتجيلى كل يوم”
“هى عارفة ومش متضايقة ولا حاجة… انا كنت عايز اطلب منك طلب”
“خير”
“عايزك توافقى ترجعيلى… انا حياتى من غيرك صعبة اوى انتى حبيبتى ومراتى وعشرة عمرى”
“ومراتك؟”
“انا مش اول واحد الظروف تحكم عليه انه يتجوز مرتين…انتى مراتى وهى مراتى وواجب عليا العدل بينكم…بس طبعا القلب بيميل ليكى انتى…هاااااا اجيب المأذون”
وابتسمت انعام وهزت راسها موافقة وبصت فى الارض وكانها بنت 17 سنة وحبيبها بيطلب ايدها لاول مرة
الحلقة 22
فى شقة 2
“شفتى ياماما الراجل بيتكلم ازاى”
“بصى يا نيفين انا اصلا مكنتش بفكر فى الجواز ووافقت علشانك …بس لو الجواز ده هيأثر عليكى فمش مهم”
“انتى بتقولى ايه ياماما…لا طبعا انا مش ممكن اوافق على اللى بتقوليه ده”
“اومال اوافق على الجواز وتتجوزى انتى بالطريقة دى”
“ومين قالك انى عايزة اتجوز اسلام”
“نععععم….انتى مش بتحبيه”
“بحبه بس شفتى سلبيته وشخصيته قدام ابوه…وابوه ده مش ممكن اقدر اتحمله”
“بس بتحبيه”
“بقولك ايه ياماما…انتى طيبة اوى وبتسلمى بسهولة… انا بقى الراجل ده استفزنى لانه بيتدخل فى حاجة متخصوش ولازم ارد عليه”
“عيب يانيفين الكلام ده ….ده حماكى”
“لا خلاص مبقاش”
“انتى بتقولى ايه”
“هتعرفى حالا”
وقامت نيفين اتصلت باسلام وقالت انها عايزاه يطلع لها
بعد اقل من ربع ساعة جالها اسلام وسابتهم ميرفت زى ما نيفين طلبت منها
“ها يانيفين خير”
“خير طبعا اومال انا ندهت لك ليه”
“نحضر لجوازنا”
“لا…احنا مش هنتجوز”
“يعنى مامتك مش هتتجوز…والله عين العقل”
“ماما هتتجوز وانا هعيش معاها ومش هتجوزك يااسلام”
“ايه التخاريف اللى بتقوليها دى”
“التخاريف انى اتجوز واحد شخشيخة فى ايد ابوه زيك”
“احترمى نفسك انتى كده بتغلطى”
“اشمعنى انا لما غلطت اتحمقت ولما باباك بيغلط فيا بتسكت خالص”
“بابا مغلطش فيكى”
“بص يااسلام…من الاخر غلط مغلطش النتيجة واحدة انت ماشى بكلام باباك وانا كلام باباك ميمشيش عليا”
“مش مصدق انك تقصدى …”
“نسيب بعض وكل واحد فينا يشوف حد يناسبه انما احنا مش مناسبين لبعض”
“والحب اللى بيننا”
“من غير تفاهم واحترام…مينفعش…اتفضل يا اسلام دبلتك وربنا يوفقك”
ودورت نيفين وشها قبل ماتنزل الدموع اللى حابساها…. وقام اسلام مشى بعدها…خرجت ميرفت من اوضتها واخدت نيفين فى حضنها
“يابنتى ليه كده بدل هتزعلى”
“بالعكس ياماما انا مبسوطة انى اخدت قرار صح”
“اومال بتعيطى ليه”
“مكنتش متخيلة ان الحب مش كفاية”
وسمعوا الباب بيخبط…لقوا حامد جاى لوحده
“ايه اللى عملتيه ده يانيفين..انتى بتفسخى الخطوبة”
ميرفت”خلاص ياابو اسلام كل شئ نصيب”
حامد”ايه عمايل العيال دى… وايه السبب ان شاءالله”
نيفين”السبب انى كنت فاكرة انى هتجوز اسلام بس اكتشفت ان راي اسلام من دماغ حضرتك وهو مالوش شخصية”
حامد”انتى قليلة الادب”
نيفين”طيب لو انا قليلة الادب عايز ابنك يتجوز واحدة قليلة الادب ليه…شوفله واحدة مؤدبة تناسبه”
حامد”1000بنت يتمنوا ابنى”
نيفين”شوفله واحدة منهم او حتى 4,,,انا لأأأأ”
مشى حامد وهو عمال يتكلم
“كنتى فى جرة وطلعتى برة… بنت قليلة الادب”
ورزع الباب وراه
“زودتيها اوى يانيفين”
“مش بسببه حبى اتحكم عليه بالموت…سيبينى بقى افش غلى”
“بس برضه مهما يكن ده راجل كبير”
“والنبى ياماما سيبينا بقى من الكلام ده…ياريت تحددى معاد جوازك من عمو نبيل بسرعة علشان نمشى من هنا”
“بسرعة ايه بس..ايه ياربى اللى حصلنا ده”
فى شقة 1
“ادخلى ياانعام نورتى بيتك”
“هو منور برجوعك ليه”
“بقولك ايه..فى رحلة تبع الشغل الاقصر واسوان…احجز فيها”
“لمين”
“انا وانتى”
“ومراتك”
“ماانا كنت معاها الكام شهر اللى فاتوا مش هيجرى حاجة لما نتفسح كام يوم كده…ها ايه رايك”
“موافقة طبعا بس مش عايزاك تظلمها”
“لا متخافيش بعد مانرجع ان شاءالله هنمشى بالعدل ولا تتضايقى”
“لا ابدا انا فكرت كتير مكنش المفروض نتطلق”
“خلاص بقى اللى حصل حصل المهم اننا رجعنا لبعض تانى”
فى مكتب مسعد الغريب المحامى
“اهلا ياحسين…حمدالله ع السلامة”
“الله يسلمك يابيه…انا كنت خايف تكون شفت حد تانى للشغل”
“لا انا كلمتى واحدة ومش اتفقت معاك خلاص”
“متشكر يافندم”
“طبعا انت معندكش مكان تسكن فيه …انا عندى فى جنينة الفيلا اوضتين كده مبنيين واحدة للغفير والتانية كانت بتاعة الطباخ قبل مايمشى… وانا مروح تعالى معايا استلمها واستنانى بره لحد مااخلص بكده تبقى استلمت الشغل معايا خلاص”
“انا متشكر قوى يابيه…بعد اذنك”
فى شقة 2
“حطيتى كل الهدوم فى الشنط ياماما”
“ايوه يانيفين خلاص”
“يالا هانت كلها يومين ونمشى من هنا بسرعة بقى”
“ليه يانيفين كده انتى بتكرهى بيتنا”
“لا طبعا…بس انا بحمد ربنا ان اسلام قطع اجازته ورجع شغله بعد المشكلة علشان مش عايزة اشوفه”
“كرهتيه”
“مش عايزة اشوفه علشان بحبه مش علشان بكرهه..ماما نغير الموضوع انا هنزل اجيب الهدوم اللى عند المكوجى علشان معندوش حد يبعتها النهاردة”
“طيب مش هقفل الشنطة الكبيرة الا لما تجيبيهم”
وكملت نيفين لبسها… ونزلت
وقبل ماتخرج من العمارة…وهى على السلم
قابلت اسلام فى وشها راجع من السفر
وقفت ساكنة مش بتتحرك
ووقف اسلام مش بيتحرك
والاتنين عنيهم بتنطق من غير كلام
وايديهم مشتاقة تتلاقى زى الاول
وكل واحد فيهم عايز يرمى نفسه فى حضن التانى
———–———-———————-————
ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقات القادمة
بقلم الكاتبة: دينا عماد
