مسلسل آر(R) الحلقة السابعة والثامنة
الحلقة 7
بعد 3 ايام
“خلاص ياهانى باشا تم القبض على صفاء”
“هى فين”
“فى الحجز”
“حطيتها مع فوزية الشغالة؟؟”
“معقول برضه ياباشا ده احنا تلاميذك…كل واحدة فيهم فى حتة”
“طيب هات صفاء”
خرج حسام دقيقة ورجع وبعد دقيقتين العسكرى دخل بصفاء
“انتى صفاء محمود”
“ايوه”
“كنتى فين”
“ليه”
“انا اللى بسأل مش انتى”
“متهيألى انا حرة اروح واجى مكان مااحب فى الوقت اللى يعجبنى”
وزعق لها هانى
“لما اسألك تردى كويس احنا هنا مش بنهزر معاكى”
وفوجئت صفاء بالمعاملة دى
“هو فيه ايه”
“بقولك كنتى فين بقالك اسبوعين سايبة بيتك وشغلك”
“كنت مسافرة”
“فين”
“فى شرم الشيخ”
“بتعملى ايه”
“بغير جو شوية”
“انتى بتشتغلى ايه بالظبط”
“موظفة فى شركة سياحة”
“يعنى كنتى مسافرة تبع الشركة”
“لالا انا كنت فى اجازة ومسافرة لوحدى”
“انتى عايشة مع مين”
“لوحدى”
“ليه”
“ظروفى كده”
“يعنى ايه”
“يعنى بعد مااتطلقت من 5 سنين رجعت شقة اهلى وكانوا اتوفوا وقعدت فيها”
“ملكيش اخوات”
“لا”
“ولا قرايب”
“ليا قرايب بس كل واحد فى حياته”
“معندكيش اولاد”
“لا”
“اتجوزتى كام مرة”
وسكتت صفاء وكأنها بتفكر
“م…مم…مرة واحدة…بس ممكن افهم فى ايه”
“تعرفى د.مجدى حسين”
“ايه…لا معرفوش”
“يعنى مش كنتى متجوزاه”
وعيطت صفاء
“ها مش كان جوزك”
“فهمنى فيه ايه؟”
“بنته اتقتلت من 10 ايام”
“وانا مالى انا مكنتش فى القاهرة كلها”
“حلو اوى…ايه اللى يثبت بقى”
“يثبت ازاى يعنى”
“انا اضمن منين انك كنتى فى شرم الشيخ”
“انا بقولك كنت فى شرم الشيخ”
“قتلتى البنت ليه”
“مقتلتش حد…معرفش حاجة”
“انفصلتى ليه انتى ود.مجدى”
“ده اسوأ راجل قابلته فى حياتى… دخل حياتى دمرها وخرج تانى”
“ازاى”
“انا اتطلقت من جوزى الاولانى علشان الخلفة كانت كل التحاليل بتاعتنا احنا الاتنين سليمة بس محصلش نصيب انى احمل منه طلب يتجوز واحدة تانية فطلبت الطلاق… بعدها بكام شهر اتجوز و9 شهور بالظبط كان معاه اول طفل…فعرفت ان العيب منى وسكتت وسلمت امرى لله وعدت السنين لحد ماقابلت مجدى السنة اللى فاتت واتجوزنا عرفى بعد ماعرفته ب4 شهور…وحصل اللى مكنش فى بالى خالص بعد شهرين لقيت نفسى حامل…لما قتله ثار ورفض انى استمر فى الحمل ده..انا كمان اتمسكت بالحمل اللى جالى بعد سنين اشتياق وطلبت منه ان يعلن جوازنا ويخليه رسمى…فى الاول رفض وبعد كده لقيته فرحان وقالى انه هيعمل كل اللى انا عايزاه فرحت واطمنت وقلت ربنا عوضنى…لحد مافى يوم قال انه عايز يشوف البيبى فى السونار وحجز عند دكتور صاحبه…روحت وبعد شوية لقيت نفسى اجهضت من غير مااعرف”
وقطعت كلامها وبقت تعيط بحرقة ومبقتش عارفة تكمل
“ومبلغتيش عنه وعن الدكتور ليه”
بدأت تتكلم تانى وهى بتعيط
“لما فقت قلت انى هوديه هو والدكتور فى 60 داهية…لقيته بيقولى انه مصور لى سيديهات وهينشرها ع النت وعلى كل الناس ويفضحنى…خفت من الفضيحة وخصوصا انى بعد ماروحت البيت ملقيتش ورقة الجواز العرفى خالص ودى كانت املى الوحيد انى ممكن اثبت انه كان جوزى لو عمل اى حاجة من اللى قالها دى”
“يعنى انتى لسه على ذمته”
“لا طلقنى وانا عند الدكتور ومشفتوش بعد كده… المشكلة انه ودانى لدكتور اى كلام عملى عملية الاجهاض غلط جالى بعدها بكام يوم نزيف حاد وكنت هموت لولا ربنا ستر وفى المستشفى عرفت انى لازم اتعالج من اثار العملية الغلط دى علشان اقدر اخلف تانى”
“علشان كده انتقمتى منه”
“انا فرحانة ان ربنا حرق قلبه زى ماحرق قلبى…بس انا مقتلتش حد”
“مش لازم تكونى قتلتى بايدك”
“يعنى ايه”
“يعنى اتفقتى مع فوزية مثلا”
“فوزية مين”
“فوزية الشغالة اللى كانت فى بيت مجدى”
“معرفهاش فوزية دى”
“يعنى مش عايزة تعترفى”
“انا حكيت كل اللى اعرفه”
رن هانى الجرس للعسكرى واخد صفاء للحجز تانى
“ايه رايك ياحسام”
“متغاظ من مجدى ده اوى… يعنى صفاء عندها اقوى سبب للانتقام وخصوصا انه صعب تخلف تانى الا بعد علاج زى ماقالت”
“بص ياحسام هات واحدة من المرشدين اللى عندنا وحطها مع صفاء فى الحجز وبعد شوية دخل فوزية معاهم فى نفس الحجز”
“حالا يحصل…بس ليه”
“علشان نشوف يعرفوا بعض ولا لأ”
فى الحجز…بعدمادخلت صفاء… دخلت المرشدة بعدها بساعة
وبدأت تفتعل حوار مع صفاء
“شكلك بنت ناس…معاكى سجاير اجنبى بدل الزبالة اللى معايا دى”
“لا مش بدخن”
“هو انتى اول مرة هنا”
“اه”
“انتى جاية فى ايه؟؟ شكلك اداب”
“لالالا اعوذبالله”
“اومال جاية فى ايه”
“جاية غلط واكيد كل حاجة هتتحل”
“يعنى مش عايزة تتكلمى عموما براحتك… لو عايزة اكل ولا حاجة اعرف اللى يجيبلك بس ده لو معاكى فلوس “
“هو ممكن ابعت حد يجيبلى اللى انا عايزاه”
“اه..عايزة ايه”
“عايزة اعمل مكالمة…معايا فلوس ممكن حد يجيبلى تليفون وخط اتكلم منه علشان اول ماجيت اخدوا تليفونى”
“تليفون وخط مرة واحدة…هاتى 10 جنيه وانا اجيبلك تليفون تتكلمى منه بس بسرعة”
“ازاى”
“فيه هنا عسكرى بياخد فلوس ويجيب اللى احنا عايزينه ومعاه تليفون للى عايز يتكلم او يطمن حد من اهله”
“طيب عايزة اتكلم ضرورى”
“اتقلى شوية لما الظباط يمشوا…فى الهداوة كده هظبطك”
“ماشى”
بعد شوية دخلت فوزية الحجز… قعدت فى جنب ولما عينها جت فى عين صفاء…مرت عادى زيها زى اى حد
وفى وقت متأخر بالليل
“خدى انا جبت لك التليفون من العسكرى”
واخدته صفاء بلهفة…واتصلت برقم
“الو…على الحقنى انا محجوزة فى القسم من الصبح ولو ملحقتنيش كل حاجة هتتكشف”
الحلقة 8
تانى يوم الصبح وفى مكتب هانى
“ها…ياامانى اتعرفوا على بعض”
“لا يافندم طول الليل متكلموش مع بعض خالص بس صفاء كانت اهم حاجة عندها تتكلم فى التليفون ولما جبتلها تتكلم كلمت واحد اسمه على وقالت له الحقنى كل حاجة هتتكشف وبعدين اتعصبت عليه وقالت له لو مجتش بكرة الصبح هقول كل حاجة ومش هعمل حساب لحد كفاية اللى جرالى بسبب سكوتى”
“ومتعرفيش كانت تقصد ايه؟”
“حاولت ياباشا اسألها مين ده ولا خايفة من ايه…قالت ان هو ده الوحيد اللى هيقدر يخرجها من هنا… وانه اخر امل ليها ولو مجاش هتنتحر”
“دى مجنونة بقى وهتجيبلنا مصيبة”
“بعد المكالمة دى فضلت تعيط ومرضيتش تتكلم معايا”
“وفوزية”
“قاعدة عادى بكل برود ومفيش اى رد فعل عليها”
“شكرا ياامانى…اتفضلى انتى”
وبعد حوالى ساعة…دخل العسكرى
“فيه واحد عايز يقابل سعادتك ياباشا”
“خليه يدخل”
وفى لحظة دخول الضيف رن موبايل هانى
“هانى باشا قبضنا على رجب جوز فوزية فى دهشور”
“كويس محدش يسأله على اى حاجة”
“بس هو مكنش لوحده”
“ازاى يعنى”
“احنا قبضنا عليه وهو مع 5 تانيين”
“ماشى ياحسام هنتكلم بعدين تعالى بسرعة”
وقفل هانى وبص للراجل الواقف قدامه
“ايوه”
“انا جاى لحضرتك بخصوص صفاء اللى قبضتوا عليها امبارح”
“وحضرتك تبقى مين”
“انا على الحديدى… جوز صفاء”
“جوزها!!”
“هى صفاء هنا ليه”
“متهمة بقتل بنت جوزها يوم 15 اللى فات والدافع عندها طبعا ولا مكنتش تعرف”
“لا انا عارف كل حاجة من بعد طلاقها من مجدى بأسبوع”
“بس هى ليه مقالتش انها متجوزة”
“علشان انا عندى ظروف عائلية ومتجوزين فى السر”
“دى تخصص جواز فى السر بقى؟”
“لو سمحت دى مراتى ومسمحش تتكلم عنها بالطريقة دى”
وزعق هانى بكل قوته
“مراتك دى قاتلة..والدليل انها كانت هربانة من قبل الحادثة”
“صفاء مكنتش هربانة…احنا اتجوزنا يوم 12 اللى فات وسافرنا شرم الشيخ ولسه راجعين امبارح الصبح”
“وايه اللى يثبت”
“احنا سافرنا بالعربية ومعايا كارتة الطريق رايح وجاى وحجز الاوتيل باسمى طول الاسبوعين اللى فاتوا وتقدر تتأكد من الفندق اننا كنا موجودين ولو خرجنا مش بنتاخر عن ساعتين تلاتة…اظن كده دليل قاطع انها مالهاش علاقة بموضوع القتل ده”
“وهى ليه مقالتش كده”
“لاننا من الاول متفقين شرط قصاد شرط هى شرطها ان جوازنا يكون رسمى وانا شرطى ان مهما يحصل يفضل سر”
“يعنى انتوا متجوزين رسمى”
“ايوه يافندم ودى قسيمة الجواز”
واحتار هانى معقول تكون صفاء صاحبة اقوى دافع…بعيدة تماما عن القتل… وامر هانى باخلاء سبيل صفاء فورا
“رشا…انا عاملك مفاجأة”
“خير يامجدى”
“انا فضيت لك اوضة فى العيادة عندى علشان تبقى ليكى تعمليها عيادة بالليل “
“انت بتقول ايه…اكيد بتهزر”
“لا مش بهزر لما رامز يصحى ننزل وتشوفى انى بدأت اجهزهالك كمان”
“ليه يامجدى”
“ليه ايه يارشا”
“ليه اتغيرت كده”
“حسيت انى كنت انانى اوى وربنا جزانى جزاء حاجات عملتها وعايز اصلح اخطائى…ممكن”
“اخطاء ايه…انت قلقتنى”
“متقلقيش…انا كنت مش بفكر فى اى حد فى الدنيا غير نفسى وبس وحسيت انى ظلمتك معايا”
“بس انا خلاص مش عايزة حاجة بعد اللى راحت”
“خلاص يارشا ده قدرنا ولازم نتقبله ونصبر عليه ونحتسبها عند الله”
“اول مرة اسمعك بتتكلم بايمان كده عن ربنا”
“علشان كنت بعيد عنه ورجعت له”
“ربنا يهدينا جميعا يامجدى”
“يعنى مسامحانى”
“انت تعرف حاجة ومخبيها عن القاتل”
“لا والله كل اللى اعرفه قلته للمقدم مجدى “
“وايه الاخبار”
“كلمته النهاردة وقالى انها مسألة ايام”
“ياااااااااارب”
“حسام حقق انت مع رجب واللى معاه علشان انا لازم امشى دلوقتى حالا”
“خير ياباشا”
“المدام تعبانة اوى ولازم اخدها المستشفى حالا”
“ربنا يشفيها لك يارب”
وفى نهاية اليوم لما هانى رجع المكتب تانى
“ايه الاخبار يا حسام”
“طمنى اخبار المدام ايه”
“الحمدلله … الدكتور متوقع انها تكون تعبانة كده وبيقولى عادى…ربنا يهون بالشهور اللى فاضله”
“لسه كتير”
“يعنى لسه شهرين وتدخل فى التاسع وساعتها ممكن الولادة تكون فى اى وقت”
“ربنا يقومها بالسلامة… اخر الاخبار بقى ياباشا…رجب وهو محبوس اتعرف على واحد من بتوع الدجل والكلام ده خرجوا فى اسبوع واحد…اوهمه بقى انهم بيدوروا على كنز واثار واتقبض عليهم مأجرين محل فى دهشور وعاملين قدام الناس انهم بيوضبوه وهما فى الاصل بيحفروا تحته للتنقيب على الاثار”
“والدجال ده مستفيد ايه من رجب”
“رجب بيساعده واقنع ناس يعرفهم تجار مخدرات بموضوع الاثار ده وهما اللى بيصرفوا على الحكاية”
“يعنى رجب علاقته ايه بفوزية”
“هو قاعد مع الناس دى فى المحل وبيروح بيته كل كام يوم ويرجع على المحل تانى”
“خلاص يبقى مفيش غير فوزية اللى عندها الدافع ومفيش حجة غياب…اقفل القضية على كده…وحولها على النيابة”
بعد مرور شهرين
“هانى باشا…فيه مفاجأة غريبة”
“ايه ياحسام”
“جت اشارة دلوقتى بالعثور على طفلة مقتولة وملقاة فى عمارة تحت الانشاء”
“ايه؟؟؟”
“ومخنوقة بايشارب وعمرها حوالى 7 سنين”
———–———-———————-————
ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقات القادمة
بقلم الكاتبة: دينا عماد
