ترفيهمسلسل عشاق الصمت

مسلسل عشاق الصمت الحلقات 9و10و11و12

الحلقة التاسعة

هشام:هه بقى هو ده اللى فى وشك..ده بيشخر
وهنا خطر بباله مقلبا
هشام فى نفسه”والله فكرة”
عاد ومعه كوب ماء ووقف بجانب عمر وصرخ
هشام: الحق يا عمررررررر
عمر وقف مفزوعا: ايه في ايه؟ ……………تشششششششششششش
عمر:هااااائ
هشام:ههههههههههه كده انت استحميت
عمر: بقى ده اسمو كلام يعنى….حد يصحي حد كده يا اخي
هشام: يلا تستاهل مهو انت اللى مجتش ورايا علطول ولقيتك بتشخر
عمر: هو انا قولت جاي……ياعم رفع القلم عن ثلاث
هشام: طيب خلاص بقى انت هتسوق فيها
عمر: معيش روخص
هشام:تصدق انك كنت محتاج جردل ميه مش دورق…. وبدأ يلتفت حوله …انا فاكر ان ماما كانت حاطه واحد ف…….
وقبل ان يكمل قفز عمر مسرعا واخرج بجامة من دولاب هشام واتجه نحو الحمام
عمر:هشام انا هاخد دي….يلا سلام
هشام:ههههههه مبتجيش بالذوق ابدا
ونزلا سويا الى الجامع وعادا بعد الصلاة, الى شقة د/جلال
هشام:السلام عليكم…. اخبار زيكو ايه ؟
فايزة:وعليكم السلام…..كويس قام صلى وخد الدوا ونام
هشام: طيب ياماما قومي انتى نامي ….وانا هقعد جنبه
فايزة: لأ يا حبيبى …روح انت ارتاح عشان كليتك
هشام: بس انتى باين عليكي الارهاق
فايزة: متقلقش هنام جنب اخوك اهو روح انت
جاء عمر وامسك هشام من يده يسحبه
عمر: بتقولك هتنام يلا بقى انت مش بتسمع الكلام ليه؟
سوسن:شوفوا مين اللى بيكلم؟
عمر: مش بقول نطلع ننام احسن هتجبلنا التهزيق ع الصبح
واخذ هشام وصعدا
فى غرفة هشام
امسك عمر بهاتفه وظل يراسل احد ما وهو يبتسم
دخل هشام قائلا: واضح انك هتنام….بتكلم مين ياابنى؟ ده مين ده اللى صحيلك دلوقتى
عمر بحب:شوشو حببتى
هشام: آها قولتلي شروق……يسهلوا يا عم
عمر وهو يشير بيده: خمسه واخمسه
هشام: طيب ماشى انا سايبك بس بمزاجي …هروح اشوف مذكرتى احسن
عمر: روح يلا هوينا…..
هشام: ماشى سيبهالك مخضرة
واتجه ناحية الباب ثم التفت قائلا
هشام: ألا انتو حددتوا الفرح امتى؟ وحجزت قاعة ولا لسه؟
حسام: آه الفرح بعد الامتحانات…. هشوف قاعة كده …كان بابا قال عليها تبع واحد صاحبه…..ابقى تعالا ع الساعة 1 عشان نروح نشوفها سوا
هشام :تمام انت تؤمر ياعريس وقت ما تعوزنى ادينى رنه
عمر :مننحرمش يا كبير وعقبال ما اتعبلك فى فرحك
وخرج هشام يذاكر دروسه, وتذكر كلام عمر فقال فى نفسه “فرحي…..هو انا لسه اتخرجت وبعدين مين دي اللى تقبل بظروفى…معقولة فى واحدة هتقبل بواحد بيشتغل فى محل تأجير سيارات…وكمان هيعيشها مع امه فى الشقة…..حتى لو لقيت اللى بحبها عمرها ما هتقبل بده……”
_شروق مجدي “خطيبة عمر” طالبة فى كلية الالسن قسم اللغة الفرنسية ايضا, الفرقة الرابعة, فتاة جميلة,رقيقة,أحبت عمر واحبها “حب من اول نظره”, ولكن لم يعترفا او يتحدثا معا ,الى ان ذهب لخطبتها فى نص العام من السنة الثالثة بالجامعة(مضى ع خطبتهما سنة ونصف وكتب كتابهما منذ شهر) ,تحمل ملامحا تشبه الاسياوين , فعينيها ضيقتين قليلا, وسوداء اللون , ايضا تمتلك بشره بيضاء ناعمة, وشعرها ناعم وقصير , وهي محجبة ,,وغالبا ماتظهر بعض القصاصات من شعرها من حجابها بسبب نعومة شعرها وهي لا تنتبه لظهوره…(وغالبا هذا مايضايق عمر) ,لديها فقط اخ اصغر منها بعامين اسمه “حاتم”, كما ان لها ابنة خالتها”سلمى” بنفس عمر اخاها وتحبها فهي اختها وصديقتها المقربة_

¤¤¤¤¤
فى شقة أ/رياض
رباب: ايه يا بنتى مش هتنامى
حنين: لأ ياماما هقعد اذاكر عندى امتحان ميد ترم
رباب: ربنا يوفقك يا بنتى…..هدخل اريح مش عاوزة حاجة
حنين: لأ تسلميلي يا ماما
بعد ساعة خرج حسام من الغرفة وينادي
حسام: بسرعة يا هنا انا خلصت لبس فين الفطار؟
هنا بصوت عال: خلاص ياحبيبى جهز اهو….نادي لحنين تفطر
حسام: يلا ياحنين مش هتفطري
حنين: جايه اهو ….هصحي ماما بس
وجلسوا جميعا يتناولوا الافطار, ثم قامت حنين
حنين: البراد ع النار صح يا هنا؟
هنا: آه ….خليكي انتى يا حونى وان…..
لم تكمل فقد قاطعتها حنين
حنين:خليكي انتى عملتى الفطار ريحي دي حاجة بسيطة …هاه هتشربوا ايه؟
رباب:كوبية شاي يابنتى ب…..
حنين مقاطعة بأبتسامه: تمام بمعلقتين سكر وعود نعناع…..وانت يا ابيه
حسام: كوبية نسكافيه بس بسرعة يا حونى
حنين واتجهت للمطبخ
حنين:حاضر فوريره
هنا: كده يا حونى متسأليش انا عاوزة ايه؟
حنين: عشان انا عارفة …انتى هتشربى ايه؟
هنا متعجبة:عارفة؟ لأ….اوعي تقولي…..

الحلقة العاشرة

حنين واتجهت للمطبخ
حنين:حاضر فوريره
هنا: كده يا حونى متسأليش انا عاوزة ايه؟
حنين: عشان انا عارفة …انتى هتشربى ايه؟
هنا متعجبة:عارفة؟
لأ….اوعي تقولي…..
حنين:ايوا هو ده بالظبط
هنا بصوت يشبه بكاء الاطفال: لأ يا حونى مبحبش اللبن
ضحكت رباب وحسام
رباب: ههههههههههه منكو لله يا ولاد
حسام: جدعة يا حنين…..انتى مينفعش معاكي المحايلة يا حببتى
هنا: ياسلام….طيب مش هشربه هه
حسام: هتشربيه غصب عنك….ده مفيد ..كفاية ان وشك شاحب اهو…..
هنا: مش هشرب يعنى مش هشرب
رباب: استهدي يا حببتى كده وقولي بسم الله واشربي وبلاش شغل العيال ده انا هلاقيها منك ولا من حنين
حنين:احم بتقولي حاجة ياماما
رباب: بقول ربنا يهديكو يا حببتى
حنين:آها …يارب ياماما
حسام: سبيها ياماما انا هشربها بالعافية
ومسك كوب اللبن واقترب منها
حسام: يلا يانونو ياحببتى
هنا تهز رأسها :لأ
حسام وبدأ يدغدغها
هنا:هههههههههههه خلاص يا حسام بغير .آآه
حسام: هتشربي ولا
هنا : لأ خلاص هشرب
انهوا الفطار وذهب حسام لعمله كذلك والدته , وكانت حنين فى غرفتها تستعد للنزول , وهنا تسترح ع الاريكة ,وتقوم بعمل بعض الاشغال اليدوية لطفلها القادم
¤¤¤¤¤
فى شقة أ/مختار
خرج عمر مرتديا ملابسه (قميص لونه بترولي مخطط “كروهات” سوداء وبيضاء,وبنطال جنز ازرق فاتح ,ونظارة شمسية سوداء معلقة فى جيب قميصه) , ومعطرا
هشام: ياسلام ع الشياكه و البرفان اللى جايب آخر الشارع
عمر: من يومى ياابنى وانا برنس
هشام :طيب يابرنس….وسع خلينى البس
ودخل هشام وارتدى ملابسه (قميص ابيض, بنطال جنز اسود,ويحمل معطف اسود فى يده)
عمر:ايه ياابنى ده جاكت ايه الجو حر والشمس طالعه
هشام:طول ما احنا فى الشتا محدش ضامن حاجة
عمر:طيب …ربنا يستر بس متمطرش الا اما اشوف القاعة
ونزلا الى شقة د/جلال ليتناولا الافطار مع العائلة
¤¤¤¤¤
فى الجامعة “كلية الألسن”
وبعد انتهاء يومهم الدراسي, تقترب الفتاة ذات الملامح الاسياوية منه ببطء ,وهو مشغول بهاتفه
شروق: عمووووورتى…مشغول فى ايه؟
عمر:هأأأئ…وكاد الهاتف ان يسقط منه ولكنه امسكه فى آخر لحظة
شروق:هههه اتخضيت
عمر:عيب اللى بتعملوه فيا ده…الاستاذ هشام الصبح وحضرتك دلوقتى ارحمونى ياجدعان اعصابى مش هتستحمل
شروق:ههه هو هشام خضك الصبح
عمر: ومش اي خضه ده مقلب محترم
شروق بحماس:احكيلي
عمر:احكي ايه ياشيخة ده وقته…بصي يا شوشو روحي عشان انا مشغول
شروق بحزن: مشغول عنى…ولا انت بتقول كده عشان زعلان منى؟
عمر: لأ ياستى مش زعلان
شروق:طب مش هتوصلنى
عمر: معلش ياشوشو اصلي خارج مع هشام فى مشوار مهم….هو مبيردش ليه ده كمان؟
شروق:مشوار اهم منى؟
عمر:امممم الصراحة آه
شروق بصدمة:ايه؟! بتقولهالي فى وشي عينى عينك كده
عمر: يعنى اغمض يعنى وانا بقولها ولا اعمل ايه؟!
شروق: عمر انت هتهزر…مشوار ايه ده اللى اهم منى؟
عمر:اصلك نرفوزة وبحب استفزك…ده ياحبيبتى مشوار لأهم خطوة فى حياتى..اولى خطوات انشاء بيتنا السعيد
شروق بخجل:طب متقول كده من الاول ..لازم تعصبنى
عمر:اهي مرة من نفسي…ماانتى علطول معصبانى ….ورأى قصاصات شعرها
عمر بضيق:اهو زي الاستاذة اللى علطول بتنزل تشم الهوا دي…دخلي قوصتك يااختى
شروق بحب:حاضر…سلام بقى هروح مع صحابي مادام مش هتوصلنى
عمر:سلام ياشوشو وما تنسيش تطمنينى انك وصلتى
لينتبه بعدها ان هشام اجاب ع اتصاله وينادي له
هشام:الو…ياعمر..انت ياعريس
عمر:ها ..ايوا ياهشام انت فين؟
هشام:انا قدام الجامعة اهو..معلش كنت مشغول فى السواقة فمسمعتش رناتك
عمر:طيب ..يعنى معاك العربية..طب انا جاي
لم تكن شروق قد ابتعدت كثيرا,فأخذ ينادي عليها
عمر:شوشو ..أشروق
انتبهت لصوته فعادت اليه
شروق:ايوا يا عمر ..بتنادى ليه لازم تفضحنى فى الكلية..مفيش اختراع اسمه موبايل
عمر:اللى حصل…قلت ممكن مش تسمعيه انتى كمان..يلا هشام برا ومعاه العربية تعالي نوصلك
شروق:طيب..شكرا ياعمور ….وأشارت لأصدقائها بأنها ستذهب مع عمر
كان ينتظر عند باب الجامعة,واقف بجوار سيارته السوداء ,يسند بزراعه عليها ,وناظرا لوجوه الخارجين من باب الجامعة,فلمحها ترتدي فستان اسودا به بعض النقوش البيضاء والوردية وترتدي طرحة باللون الابيض وبها خطوط خفيفة سوداء,حقا يالها من مصادفة,هذا هو لقائهما الثانى ,والان يرتديان نفس الالوان تقريبا
…………………………….

الحلقة الحادية عشر
كان ينتظر عند باب الجامعة,واقف بجوار سيارته السوداء ,يسند بزراعه عليها ,وناظرا لوجوه الخارجين من باب الجامعة,فلمحها ترتدي فستان اسودا به بعض النقوش البيضاء والوردية وترتدي طرحة باللون الابيض وبها خطوط خفيفة سوداء,حقا يالها من مصادفة,هذا هو لقائهما الثانى ,والان يرتديان نفس الالوان تقريبا

هشام فى نفسه:”معقولة دي حنين!…آه هي..ايه ده هي فى ألسن ماشاء الله وياترى فى سنة كام؟؟! …معقولة تكون اذوقنا زي بعض…”ثم بدأت ترتسم ع ثغره ابتسامة عفوية.
تسير بجوار صديقاتها,تهمس احداهن لها
حورية بهمس: حونى…شايفة الجنتل اللى واقف بالعربية السودا ده…بيبص عليكى…انتى تعرفيه؟؟
تلتفت الى حيث تشير لها صديقتها,لتجد انه هشام, وع وجهه تلك الابتسامة
حنين بتعجب: حد بيبصلي انا…ثم تحمر خجلا وتنظر للأرض وتكمل سيرها
حورية:ايه ياحونى؟
حنين بأرتباك: معرفهوش يا حورو..قربي بقى خلينا نروح
حورية:انا قولت كده برضو…ههه انتى علطول كده بتقلبي طمطماية
حنين:يلا بقى..مش وقتك…ثم تسرح هي الاخرى “وهو ايه اللى جابه عندنا فى ألسن..ده كان راكب من عند آداب….ههه بس لابس اسود زيي ..معقولة للدرجاتى ممكن القدر يجمع بين اثنين….ثم عادت لرشدها…هو ايه العبط اللى بفكر فيه ده؟ عادى زي اي حد يعنى ممكن ناس كتير تلبس اسود..بس هو كان بيبصلي مبتسم ليه؟؟؟….اوووووف ..استغفر الله العظيم”
حورية:احونى….حنين
حنين:هاه…ايوا
حورية:لأ…ده انتى مش معايا…ع العموم سلام الاتوبيس بتاعي جه
حنين:طيب سلام…فى رعاية الله ياحورو
ثم تذهب حنين نحو استراحة محطة الحافلات تنتظر حافلتها
¤¤¤¤¤
فى سيارته ركب عمر بجواره, وشروق فى المقعد الخلفي
عمر:متأخرناش عليك صح؟
هشام:آه جيتوا علطول
عمر:طيب اطلع بقى نوصل شوشو وبعدين نروح مشورنا
هشام:بس كده هنتأخر يا عمر …طب ما تيجي معانا…هي برضو لازم تشوف القاعة وتتفقوا ع الفقرات بتاعت الفرح
شروق:صح معاك حق يا هشام…انا هتصل بماما اقولها
عمر:عندك…تتصلي ده ايه؟
شروق:ايه..مهو لو متصلتش بيها هتقلق
عمر:قلت مفيش اتصال معاكي راجل….يقولوا مش متحمل مسؤلية وسيبها تتصل …انا هتصل بحمايا
هشام وهو يكتم ضحكته وبصوت منخفض:انا افتكرتك هتقول حاجة تانية؟
عمر:قول اشجينى..كنت بتفكر فى ايه؟
هشام:لأ…خلاص بقى
عمر:طيب هعديهالك المره دي…..حمايا رد
عمر:أحم….السلام عليكم..ازيك ياعمي؟
مجدي:…………..
عمر:انا هاخد شروق معايا نشوف قاعة كان بابا قالي عليها….وبعدين هبقى اوصلها
مجدي:…………
عمر:الله يخليك يا عمي….انا بس قلت ابلغكم عشان متقلقوش وكده
مجدي:…………
عمر:مع السلامة…..محمد رسول الله
هشام:الله عليك وانت محترم
شروق:بيبقى جنتل خالص
عمر ينظر لهما بضيق:يعنى انتو مش عجبكوا حاجة…وبعدين انتو الاثنين متفقين عليا النهاردة؟
بدأ هشام يصدر صفيرا متهربا من عمر,كذلك حاولت شروق ان تلفت انتباهه لأشياء اخرى ؛لكي يصلوا بهدوء الى مكان القاعة
بالقرب منها صف سيارته,وترجلوا جميعا الي داخل القاعة
كانت القاعة جميلة,وكبيرة…حيث حدثت بها بعض التعديلات ,لتجعل منها مايشبه القصور او حفلات النبلاء فى تلك العصور الوسطى ,كما اطلق عليها قاعة “سنووايت”
عمر:حلوة ….اسم ع مسمى
شروق: آه…اهم حاجة اننا لقينا قاعة كبيرة ومش محجوزة
عمر ويغمز لها: ومش بس كده دي متوصي عليها….تعالي نتفرج ع بقيت القاعة يا سنووايت قلبي
وانتبها لصوت هشام الذى قطع عليهم تلك اللحظات,
هشام:ياعمر ..تعالا شوف الفقرات اللى هتختاروها
عمر:منك لله يا مفرق الجماعات
شروق بضحك:ههههه يلا بقى عشان الحق اروح
¤¤¤¤¤
فى منزل د/جلال
تخرج يمنى من غرفتها متجة الى الباب
يمنى:ياماما…انا رايحة درس العربي
سوسن:طيب يا حببتى..مع السلامة
ثم تخرج مسرعة من المطبخ بعد ان سمعت صوت الباب يغلق
سوسن:يايويو….بت يايويووو
يمنى تفتح الباب مرة اخرى:نعم يا ماما…هتأخر
سوسن:معلش يا حببتى..خدي الشمسية معاكي كانوا بيقولوا احتمال تمطر
يمنى:حاضر…سلام
ع السرير ..بدأ يتقلب ليرى امه جالسه ع سجادتها تصلي وتدعو له, وبصوت مبحوح نادى عليها
زياد:ياماما
تجري مسرعة نحوه……………….

الحلقة الثانية عشر
ع السرير ..بدأ يتقلب ليرى امه جالسه ع سجادتها تصلي وتدعو له, وبصوت مبحوح نادى عليها
زياد:ياماما
تجري مسرعة نحوه…..
فايزة:ايوا يا حبيبى…فى حاجة؟!….عامل ايه دلوقتى؟
زياد:الحمد لله احسن…هي الساعة كام؟
فايزة:3.50 يازيكو
زياد:يعنى يمنى راحت الدرس؟
فايزة:آه ..كنت سامعة صوتها من شويه…عاوزها فى ايه؟
زياد:اصل كان عندنا امتحان فى درس العربي…وكنت عاوزها تعتذر للاستاذ
فايزة: يابنى هي اكيد هتقوله متشغلش بالك انت اهم حاجة صحتك…
زياد:مهو الاستاذ كان قايل اللى مش هيحضر الامتحان ده ميجش تانى
فايزة:متقلقش انا هتصل بيه….وبعدين مبقاش فاضل غير شهر ع الامتحان…يطرد ايه دلوقتى,ايه الاستهبال ده؟!
واقتربت منه تقبله من جبينه
فايزة:الحمد لله الحرارة راحت..قوم ياحبيبى خد الدوا وكل لك لقمه ,واتوضا,وصلي العصر
زياد:حاضر
ويذهب ليصلي العصر,وامه تدعو الله ان يتم شفاؤه ع خير ومعافا
¤¤¤¤¤
بعد ان انتهوا من انجاز ترتيبات الفقرات واجرائات ورسوم حجز القاعة توجهوا للخارج ليتفاجئوا…ان السماء تمطر
هشام:ايه ده الدنيا بتمطر
عمر وهو ينظر لشروق: انتى شكلك لحسه المغرفة يا شوشو
شروق بغضب: نعم دي اقدار وبعدين المطر خير
عمر:طبعا خير حد قال حاجة..ده حتى الدعوة بتكون مستجابه
ثم رفع يده الى السماء وظل يتمتم بدعوات , ولم يسمعا ماذا يقول؟
ويقترب هشام منه
هشام: انا مش سامع حاجة ! انت كنت بتدعي بأيه؟ لتكون بتدعي علينا
عمر:لأ…انا طيب ومبدعيش ع حد
شروق:اومال وطيت صوتك ليه؟
عمر:ده انتو فضولين بشكل…الدعوة فى السر افضل منها فى العلن
هشام:طب قولي انا برضو اخوك وصاحبك الانتيم ومتخفش هأمن وراك
عمر:امممممم…كنت بدعيلك تتخطب وتتجوز وتتبهدل بهدلتى فى الحب وافكرك..واغلس عليك
لم ينتبه هشام لبقية الكلام فأمن ورائه …وبعدها ادرك الامر ,وحينها كان عمر قد
جرى نحو السيارة ,ممسكا شروق من معصمها
شروق:هههه منك لله ياعمر فصلتنى
عمر:ايه؟ فصلتى…طب اجبلك شاحن منين دلوقتى؟!
شروق:هههههه…بس بقى مش قادرة …خلينا اروح قبل ما الدنيا تمطر تانى
جاء هشام وركب السيارة ,وانطلق لمنزل شروق,ولم يتحدث,فقد كان الى حد ما فرحا بتلك الدعوة ويتمنى ان تكون الانسانة التى يحبها هي حنين
ليقطع شروده …..
شروق:شكرا يا هشام ع التوصيلة ع جنب هنا هشتري حاجات من الهايبر
هشام:آه…ولايهمك ياشروق …اي خدمة
عمر:متتأخريش فى الهايبر…اصل انا عارفك
شروق:بقى كده لا اطمن هشتري الطلبات واروح علطول…اساسا مش عنده عروض الشهر ده….صحيح يا عمر …هاجي انا وسلمى الاسبوع الجاي نرص شوية الحاجات اللى جبتها
عمر:ماشي ياشوشو تنوروا…يلا سلام عشان مأخركيش ع الهايبر
وما هي الا لحظات حتى امطرت السماء مرة اخرى ولكنها بغزارة
شروق:ينهار اهي جبتها…سلام انا هروح بلا هايبر بلا بتاع…سلام ياعمر
عمر :هههههه احسن….نيتك مكنتش صافية
شروق بضيق: ماشي…واعطتهم ظهرها متجهة نحو الشارع لتسمع صوته ينادى مرة اخرى
عمر من داخل السيارة:أشروق…..متأكده انك لحسه المغرفة بس…اصل حاسس انك بلعاها
لتلتفت اليه فى غيظ فقد سمعه المارة وظلوا يضحكون,واحمرت وجنتيها خجلا
شروق بصوت مرتبك:عمرررررررر..
عمر بصوت عال:ياخوااااااااااتى بحبها….
لتسرع هي الخطى الى المنزل وهي فى قمة الاحراج الممزوج بالفرح,وقلبها يكاد يرقص فرحا وينقلع من كثرة دقاته خجلا وتوترا
لينطلقوا مسرعين بالسيارة الى المنزل
هشام:هههه ….ربنا يهديك يا عمر…البت اتفضحت فى الحته
عمر:اتفضحت ايه؟ ياابنى انا جوزها….وبعدين الشارع كله عارفنى
هشام:اكيد واحد اهبل زيك لازم يبقى اشهر من النار ع العلم
عمر:اهبل..الله يسامحك …طب ركز في السواقة
هشام:حاضر
¤¤¤¤¤
بعد اسبوع
جاءت شروق ومعها بنت خالتها “سلمى” الى بيت الزوجية فى الدور الثالث لتنظمه
……………..

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: هاجر طه

 

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى