ترفيهمسلسل اللقاء المنتظر

مسلسل اللقاء المنتظر الحلقة الأولى والثانية

المقدمه

كم أعشقك أيتها الأحلام..!
لأنكِ تجمعيني بأشخاص يسعدونى كثيراً ، ويشعرونى بأنهم بجانبي دائماً
حتى لو لم يكونوا بالقرب منى.. ولكن يكفى بأنى اجتمعت بهم ولو للحظات وكأنى جلست وتحدثت معهم فتُصبريني حتى اللقاء المنتظر…
اللقاء الذى انتظرته طوال حياتى..
ولكن استظلين أحلاما فقط ؟؟ أم سيأتى اليوم الذي ستتحققين فيه ؟
فمن ماذا تخافين ؟؟ هل لأننا نرى الجانب الرائع فقط بكى ولا نرى سواه ؟؟ أم لان كثيراً علينا تحقيقك ؟
ولكن اعلمى جيدا بأننى سوف اسعي واسعي لأخر لحظة بعمرى حتى أراكى تتحققين امام عيناى !!

الحلقة الأولى

ليليان: هي بطلة الرواية
هي بنت تتميز بالبشرة البيضاء والشعر البني الفاتح الناعم والطويل ذات العيون العسلية الرائعة ، تعشق الرسم والورد وسماع الموسيقي وخاصة فيروز والعزف علي الآلات الموسيقية
سمية : والدة ليليان وهي امرأة طيبة وحنونة
مازن: اخو ليليان ويكبرها في العمر 3 سنوات
ريم : هي صديقة العمر والمقربة جدا من ليليان
مروة : والدة ريم
امير : اخو ريم ويكبرها في العمر بسنتين ، يتميز بالشعر البني الناعم والطول والوسامة
انجي ونهي : اصحاب ريم وليليان من اولي كلية
تامر : خطيب انجي

 
عند برج ايفل بباريس ليلا كانت ليليان تردي فستان باللون الاحمر شديد الجمال وكان شعرها ينسدل علي ظهرها بجماله الساحر وكان يقف امامها شخص لم تتعرف علي ملامحه جيدا وكان يقدم لها بوكيه ورد باللون الاحمر (لونها المفضل ) وكانت في غاية السعادة ولكن بجانب السعادة كان هناك شعور بالاطمئنان الشديد ، لم تُرِد ان يمر الوقت ، كانت تود بشدة التعرف على ملامح الشخص الذى معها ولكن كلما دققت فى ملامحه كان يقول لها ” فقط اغلقي عينيكي الساحرتين وستشعرين بي وتعرفيني “…!
وفجأة يرن المنبه ليعلن عن قدوم صباح جديد فتستيقظ ليليان قائلة الحمد لله الذي عافاني في جسدي ورد عليا روحي واذن لي بذكره
وقامت من علي فراشها لتنظر من شرفتها قائلة : لحد امتي يارب هفضل احلم بالحلم ده كل فترة احلم بنفس المكان ونفس شكلي ونفس كل حاجة بس انا عاوزة اعرف مين الشخص اللي كان معايا ده ؟ وليه بحس بالسعادة دي كلها ؟ يمكن يكون …؟؟ لالالا ده بعيد عنى مسافات واكيد مش فاكرنى اصلا ، قد ايه نفسي الحلم ده يتحقق !!
ثم دخلت لتأخذ شاور وتؤدى فريضتها وبعد انتهائها :
سمية : صباح الخير يا حبيبتي
ليليان : صباح الخير يا ماما
سمية : ثوانى ويكون الفطار جاهز
ليليان : مش احنا قولنا انا هعمل كل حاجة بعد كده وبلاش تتعبي نفسك خالص ، اعتبري نفسك برنسيس البيت وانا الخدامة بتاعتك
سمية : ههههه مهو انتى مش هتهونى عليا
ليليان : وانا مش مستغنية عنك يا ماما ، علشان خاطرى ريحي نفسك وانا هعملك كل اللى انتى عوزاه
سمية : اوك اللى تشوفيه
ليليان : ايه الهزار ده انتى وافقتى بالسهولة دى ، مش من شوية كنتي بتقولى تهونى عليا راح فيين الكلام ده
سمية : وبعدييين انتى هترجعى فى كلامك ولا ايه
ليليان : حقك طبعا ما انتى ما صدقتى تلاقي اللي يعملك اللى انتى عوزاه هههه
سمية : قال يعني بتعملى اووى
ليليان : طااااب يا ماما انا هدخل اغير هدومي وانزل بقا لو قعدت اكتر من كده هتأخر بسببك
سمية : هههههه خلاص خلاص روحى انتى اللى عماله تتكلمى
ليليان : انا بردو هههههه الله يسامحك
سمية : هتعدى على ريم
ليليان : اة ان شاء الله يارب تكون صحيت لحسن لو روحت لاقيتها نايمة هرتكب فيها جريمة
سمية : طب بجد هحضرلك فطار بس انهاردة علشان انتى متأخرة
ليليان : لالا خليكي انا هفطر مع البنات فى الجامعة
سمية : انتى لما لتنزلى من غير فطار بتدوخى وبيجيلك هبوط
ليليان : احنا متفقين هنفطر سوا ماتقلقيش عليا ، هدخل انا بقي اغير هدومى علشان مش اتأخر
سمية : ربنا معاكى ياحبيبتى
في مكان اخر:
مروة : ريم حبيبتي اصحي يالا علشان ما تتأخريش علي جامعتك
ريم : ماما ونبي سبيني انام كمان شوية واستمتع بأخر عشر دقايق من الاجازة
مروة : يابنتي قومي بقي بلاش كلام فاضي دي عاشر مرة اقولك قومي
جرس الباب يرن
مروة : بقولك ايه انا هروح اشوف مين عالباب اجي الاقيكي قومتي
ريم : مع الف سلامة يا حبيبتي
مروة : يارب صبرني
يرن جرس الباب مرة اخري
مروة : ايوة انا جايه اهوه ثواني ياللي عالباب
فتحت مروة الباب لتجد امامها ليليان
ليليان : صباح الخير يا طنط
مروة : صباح الفل عليكي يا حبيبتي اتفضلي
ليليان : شكرا (وتدخل ليليان ) ، هي ريم جهزت ولا لسه
مروة : صاحبتك نايمة جوا ومش عاوزة تقوم
ليليان : اييييه ؟؟ لسه نايمة
مروة : من بدري عماله اصحي فيها وهي مش عاوزة تقوم ، بقولك ايه ادخلي صحيها انتى انا تعبت منها
ليليان بهزار :دا انا هدخل اقتلها مش هصحيها
مروة : هههههههه ربنا يخليكم لبعض
في غرفة ريم :
ليليان : بت يا ريم اصحي بقي هنتاخر عالجامعة كده يخربيتك
ريم : ليليان ! انتي ايه اللي جايبك عندنا الصبح كده ، وبعدين ما احنا ملتزمين بقالنا 3 سنين وترم ما جتش علي مرة يعني من نفسي
ليليان : في حد يصبح عالناس كده بذمتك ، وبعدين مش احنا متفقين اعدي عليكي علشان عربيتك في الصيانة وايه النوم ده كله يالا قومي بقي لحسن انتي عارفة كويس ممكن اعمل فيكي ايه
ريم : لالا خلاص والله هقوم بلاش مايه وتلج وحركات الاطفال بتاعتك دي
ليليان بسخرية : ايوة كده ناس مش بتيجي غير بالتلج
انا هستناكي بره بقي عقبال ما تقومي وتجهزي
ريم : اوك
ليليان : ماتتأخريش عليا هااااه
ريم : ماشي ماشي
خرجت ليليان من غرفة ريم وانتظرتها بالخارج..وبعد انتظار ربم كثير نسبيا من الوقت
ريم : يلا يا لى لى انا جهزت
ليليان : لا اتأخرى كمان شوية وفوتى علينا المحاضرة
ريم : يارييييت نفسي احس الاحساس دا اووى لكن اعمل ايه ربنا رزقنى بواحدة مواعيدها مظبوطة للاسف
ليليان : مافيش احلى من الانتظام عاوزين نخلص بقا
ريم : يسمع منك ربنا ياااارب
مروة : يلا يابنات الفطار جااهز
ريم : ليه يا ماما تعبتى نفسك احنا متفقين هنفطر فى الجامعة
ليليان : ميرسي يا طنط بالهنا والشفا
مروة : لا انا عملت حسابكوا خلاص وبدل ماتكلوا اكل الشارع كلوا من البيت احسن
ريم : مهو اصل نهى وانجى هيفطروا معانا يعنى كلنا سوا
ليليان : معلش بقا يا طنط تتعوض مرة تانيه
ريم : يلا بقا يا لى لى متأخرين كده مش هينفع
ليليان : لا والله ؟؟!
ريم : خلا بقا يا ماما احنا نازلين عاوزة حاجة
مروة : لا يا حبيبتي شكرا خدوا بالكم من نفسكم ، لا اله لا الله
ريم وليليان : محمد سول الله
عند جامعة القاهرة كلية اعلام :
ليليان : تصدقي يا ريمو لمتنا عالكافيتريا وحشتني اووي
ريم : وانا كمان اووي لا واللي انا مش مصدقاه اكتر ان دا اخر ترم لينا في الكلية
ليليان : وانا كمان السنين عدت بسرعة اووي
انجي : بتجيبوا في سيرة مين عالصبح كده
ليليان : جي جي وحشتيني يا بت عاملة ايه وقد احتضنا سويا
انجي : الحمد لله وانتي كمان وحشتيني
ريم : ايه وانا مش ليا نصيب في الحب ده ولا ايه
انجي : ازاي يعني انتي كمان وحشتيني اوي ووحشتني القاعدة معاكي والكلام عن الناس
ريم : هههههههه ، اة صح فكرتيني امال فين نهي
نهي : انا جيييت وحشتوني اووي يا بنات
الجميع : انتي اكتر
وظلت الفتيات يضحكن بعض الوقت قبل دخولهم المحاضرة الاولي
علي الجانب الاخر
كريم : صباح الخير يامعلم واحشني
تامر : ههههههه انت هتعمل زي البنات ياعم ولا ايه ما احنا كنا مع بعض اول امبارح
كريم : تصدق انا غلطان اني بسلم عليك ياض
تامر : يااض ؟؟ خلاص مش هقولك اخر اخبارها
كريم : استني بس يا تامر انت شوفتها انهارده
تامر : مش هقولك
كريم : ما تبقاش رخم بقي وقول يا اما مش هساعدك اخر السنة انت عارف ان امتحانات اخر السنة فاضل عليها 3 شهور وخليك انت بقي تخلل في الجامعة
تامر : تصدق صعبت عليا ، خلاص هقولك
كريم : اخلص
تامر : انجي قالتلي ان اخوها هيجي مصر قريب زيارة يعني وكده وساعتها ممكن تروح تتقدملها وتخطبها
كريم : خلاص خلتني وانا واقف اتقدمتلها وخطبتها افرض هي اصلا مش هتوافق عليا او فيه حد تاني في حياتها
تامر : اولا انجي مأكدالي ان مافيش حد في حياتها ثانيا انت واحد محترم وابن ناس وبتطلع كل سنة من الأوائل عالدفعة هتكون عاوزة ايه تاني ثالثا لازم يبقي عندك ثقة في نفسك اومال هتكلمها ازاي اصلا
كريم : ان شاء الله خير
تامر: ربنا يسهلك الحال يا صاحبي
كريم : مش يالا بينا بقي عالمحاضرة
تامر : ليه كده دا انا لسه جايبلك خبر حلو
كريم : بقولك ايه شد حيلك بقي معايا السنة دي شوية علشان تجيب مجموع عالي وتشتغل في مكان كويس وتتجوز انجي اللي تاعبها معاك دي
تامر بسخرية : تصدق كلامك اثر فيا ، يالا ياعم العاقل عالمحاضرة
كريم بصوت منخفض : انا مش عارف هي مستحملاك ازاي
تامر : بتقول حاجة
كريم : لا مافيش بقولك يالا

الحلقة الثانية
بعد خول الجميع الي المحاضرة
تامر : يابني ماتركزش معاها اوي كده ، هتاخد بالها ان انت واقع
كريم : ياعم دا الوقت الوحيد اللي بشوفها فيه كمان عايز تمنعني
الدكتور: وبكده نكون خلصنا جزئية النهارده
كريم : استريحت دلوقتي قعدت ترغي كتير لحد الوقت ما ضاع
تامر : معلش يا ابو قلب حنين
ليليان : ريم انا همشي بقي علشان رايحة الاوبرا علشان اتدرب عالمسابقة اللي قولتلك عليها الاسبوع اللي فات
Flash back
ليليان تتصل بريم
ريم : الو
ليليان : الو يا ريمو عاملة ايه
ريم : الحمدلله تمام وانتي
ليليان : الحمدلله ، بقولك فيه موضوع كده كنت عاوزة اقولك عليه فاضية ولا وراكي حاجة
ريم بضحك : لا انا مش ورايا غيرك
ليليان: طب كويس ركزي معايا بقي واسمعيني كويس
دار الاوبرا كانت منزله اعلان كبير شوفته اخر مرة كنت بتدرب هناك بيقول ان فيه مسابقة للمتميزين علي مستوي الاوبرا هيشاركوا فيها من غناء وعزف وكده وهيكون فيه لجنه هتيجي وتقيمنا واحسن اتنين هيسافروا فرنسا يحضروا 4 حفلات في اماكن مختلفة
ريم : وااااو فرنسا !! بس ايه حكاية المتميزين دي
ليليان بهزار : مهو انتي لو تسيبيني اكمل ، ما علينا المهم في نفس اليوم المدرب قاللي انا رشحتك للمسابقة دي فقولتله انااا؟؟؟ قاللي اه انتي صوتك حلو وانى بعرف اعزف كويس
ريم : انا شايفة انها فرصة كويسة اووي وانتي قدها
ليليان : مهو انا خايفة اقدم اصل الموضوع شكله كبير لجنة وكده وغير الناس اللى هيبقوا ماليين القاعة وياسلام بقا لو فيه صحافة او اعلام بتغطى المسابقة دى هههههه ، دا انا مرعوووبة
ريم : لا اهدى كده ان شاء الله خير وخلى عندك ثقة فى نفسك بس المهم انك تقدمي ومين عارف مش يمكن ده يكون بداية تحقيق حلمك
ليليان : تفتكري ؟؟
ريم : مش عارفة حاسه كده ان ربنا هيحققلك حلمك قريب
ليليان : يارب ، بصي انا هقدم واعمل اللي عليا واللي ربنا عاوزة هيكون
Back
ريم : اااه صح اوك ، طب هو انا ينفع يعني اجي اتفرج عليكي واسمعك وانتي بتغني ، اصلك ماتعرفيش صوتك ده بيخلي الواحد يعيش دنيا تانية خاالص
ليليان بضحكة : ههههه طبعا ينفع تيجي يالا بينا
في عربية ليليان :
ريم : صحيح يا لي لي هو انتي اللي المفروض تختاري اللي انتي هتغنيه وتعزفيه ولا المدرب بتاعك
ليليان : هو المفروض المدرب هو اللي يختارلي حاجة بس هو قاللي شوفي ايه اكتر حاجة انتي بتحبي تغنيها وفي نفس الوقت تعزفيها علي بيانو وتعالي قوليهالي ونتناقش علشان لما انا اعمل حاجة بحبها هتطلع احلي كتير من حاجة تتفرض عليا فمش هكون حباها اوي
ريم : والله راجل ذوق وبيفهم ، طب وانتي عرفتي طنط
ليليان : اة طبعا
ريم : طب وهي كان رأيها ايه
ليليان: هي الاول مش كانت موافقة خاالص وخاصة علشان موضوع السفر وكده لو يعني انا اخدت مركز ، بس بعد محايلات كتير وافقت وخصوصا لما قولتلها لو اخدت مركز هسفرك معايا
ريم : وهو مسموحلك تاخدي مرافق معاكي
ليليان : لا كنت هحجزلها تذكرة عادية بس ربنا يسهل
ريم : ماتقلقيش ان شاء الله خيير
ليليان : يااارب
ريم : المهم اختارتي اغنية ولا لسه
ليليان : الصراحة اخترت
ريم بلهفة : ايه ايه
ليليان : اغنية اعطني الناي وغني لفيروز
ريم : واااااو انتي بتغني الاغنية دي حلو اووي وغير ان العزف فيها كمان تحسيه رقيق كده وهادي خالص
ليليان : اها ، هو فيه احلي من اغاني فيروز
ريم : طب ما تشغلي لينا حاجة لفيروز نسمعها
ليليان : ياسلام بس كده من عنيا
وظلت الفتاتان تستمعان لصوت فيروز الجميل حتي وصلوا الاوبرا
ليليان : مساء الخير
المدرب وليد : مساء النور ازيك يا ليليان
ليليان : الحمدلله ازي حضرتك
وليد: تمام ، مش تعرفينا
ليليان : اه اكيد ، دي ريم صحبتي جدا وزي اختي بظبط
وليد: اهلا وسهلا نورتي المكان
ريم : اهلا بحضرتك ، المكان منور باصحابه
وليد: يلا نشوف بقي ايه اللي ورانا
ليليان : يلا
وظلت تتمرن ليليان وكانت ريم فرحانة بها كثيرا حتي مدربها وليد الذي حمسه اكتر اختيار لي لي لاغنية فيروز فكان من وجهة نظرة انه اختيار ناجح وصحيح
في مكان اخر :
كريم : السلام عليكم
هناء : وعليكم السلام ، حمدلله عالسلامه يا حبيبي ( هناء والدة كريم )
كريم : الله يسلمك يا ماما ، ااا.. ماما هو فين بابا و مي
هناء : ابوك بيصلي المغرب ومي لسه داخله من كليتها ، في حاجة ولا ايه ؟؟
كريم : آآ لأ ، اقصد اة
هناء : خير يا ابني فيه ايه
كريم : بصي يا ماما فيه موضوع يخصني وعاوز افاتحكم فيه
هناء : موضوع ايه
كريم : هغير هدومي تكوني قولتي لبابا ومي انى عاوزكم كلكم في موضوع
هناء : طب مش هتتغدي الاول
كريم : لا انا مش جعان
هناء : ماشي روح غير هدومك عقبال ما اجمعهم
كريم : اوك
وبعد ان اعد كريم نفسه ليخبر أسرته بموضوع يشغل باله :
كريم : ازيك يا بابا
سامح : الحمدلله ، خير هناء بتقولي انك عاوزني في موضوع
مي : والله تلاقيه عاوز فلوس زي كل مرة
كريم : بت انتي اهدي شوية ، وبعدين انا لو عاوز فلوس هخليكي تقعدي معانا ليه
هناء : يابني حرام عليك ادخل في الموضوع قلقتنا
كريم : كل خير يا ماما ان شاء الله ، من الاخر كده يا جماعة انا عاوز اتجوز
مي : ههههههه ومين اللي مامتها بتدعي عليها ههههه
هناء : اسكتي يا مي ، كريم انت بتتكلم بجد
كريم : اة والله جد الجد
هناء : طب وهي واحدة نعرفها يعني ، قريبتنا ، جارتنا كده يعنى
كريم : لا هي واحدة زميلتي في الكلية ومحترمة جدا وناجحة كمان في دراستها
مي : بركااااااتك يا جاااامعة ، خليتي كريم يحب واحدة
كريم : اقسم بالله لو ما سكتي ما هتكلم تاني قدامك ، وبعدين انا ايه اللي خلاني اتكلم قدامك اصلاا
مي : ههههههه خلاص والله هسكت
كريم : هااا يابابا ايه رايك
سامح : علي رايك يا مي الجامعة واخيرا وقعت اخوكي
كريم : حتي انت يابابا
سامح : تعرف بقا انا نفسي اتعرف عالبنت اللي خليتك تحبها اووي كده ، دا انت كل اما نجيبلك سيرة عروسة كنت تتعصب وتقول انا اللي يهمني دراستي ومستقبلي ، ايه اللي حصل
كريم وهو يبتسم : انا نفسي مش عارف
هناء : طب كلمنا عنها شوية ، يعني ايه المميزات اللي فيها دونا عن باقي البنات
كريم : بصي يا ماما هي اسمها ريم ودي اخر سنة ليها في الكلية زيي ، ومحترمة جدا يعني من اولي كلية عمري ما شوفتها واقفة مع واحد الا اذا كانت بتديه محاضرات او كده وبيكون معاها كذا بنت علشان ماحدش يتكلم عليها بطريقة مش كويسة ، ووالدها متوفي واخوها مسافر برا مصر وهيرجع قريب ان شاء الله وتعتبر هي ووالدتها عايشين لوحدهم
هناء : والله لو عاللي انت بتقوله ده يبقي مافيش اي مشكلة مبدئيا ولا ايه رايك يا سامح
سامح : انا كمان موافقك في الرأي بس لما اخوها يبقي يرجع من السفر هيبقي فيه كلام تاني ان شاء الله
مي : وانت بقا ايه اللي يضمنلك انها مش مرتبطة او مش بتفكر في حد تاني
كريم : دي بقا انا عرفتها بطريقتي المهم دلوقتي ان مبدئيا كله تمام
هناء : انت هتتقدملها وانت مش بتشتغل ؟؟
كريم : ليه بتقولي كده يا ماما ، انا بطلع الاول عالدفعة كل سنة وربنا يعيني ان شاء الله واطلع السنادي كمان واتعين في الكلية وبعد كده احضر دراسات عليا ، وبعدين لو ماعجبهمش الموضوع ده هشتغل مع بابا في الشركة ، ولا ايه رايك يابابا مش كان نفسك اني اشتغل معاك في الشركة
سامح : اكييد والاهم ان ده هيكون في مجال دراستك
كريم : بالله عليكم بلاش احباط وخليكوا موافقين زي ما كنتوا
هناء : احنا موافقين بس لازم نحط نفسنا مكانهم بردو ولا ايه
كريم : ماتقلقيش ان شاء الله كله هيكون في التمام
مي : علي فاكرة انا كمان موافقة
كريم : هو حد خد رأيك اصلا
مي : ايه الاحراج ده ، طب انت قولت لماما ليه اني اجي مش علشان تاخد رايي
كريم : ههههههه لا علشان بس تكوني عارفة
مي : طب ايه رايك بقي اني هاجي معاك واشوفها لاني بجد متشوقة اشوف البنت اللي وقعت كريم سااامح
هناء : يابت بطلي لماضة شوية
كريم : انا جعان يا ماما
مي : وانا كمان
كريم : الله !! انتي هتاكلي معايا كمان
مي : لو سيادتك مش عندك مانع
كريم : خلاص ياماما خليها تاكل معايا علشا انا مبسوط بس
مي : بركاتك يا ست رييييم
كريم : ما تعمليش حسابها ياماما انا غيرت رايي
سامح : جري ايه يا واد منك ليها صدعتونا ، يا هناء حطيلي انا كمان هاكل معاهم
مي وكريم : هههههه
وفي المساء عادت ليليان الي منزلها لتجد والدتها في انتظارها..
ليليان: السلام عليكم يا ست الكل
سمية والدة ليليان : وعليكم السلام يا حبيبتي حمدلله عالسلامه
ليليان : الله يسلمك
سمية : اتغديتي ولا احضرلك الغداء
ليليان : لا يا ماما مش اتغديت حضريلي الغداء بعد اذنك عقبال ما اغير هدومي علشان احيكلك ايه اللي حصل انهارده
سمية : ماشي يا حبيبتي
في نفس الوقت صعدت ريم الي منزلها لتجد والدتها بتتحدث مع احدهم في الهاتف :
ريم : السلام عليكم
مروة : وعليكم السلام ( وهي تكمل كلام في التليفون )
ريم بهزار : بتكلمي مين متأخر كده يا ماما ؟هاااا هاااا !

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: ندى عبدالحميد

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى