مسلسل اللقاء المنتظر الحلقة الثالثة والرابعة

الحلقة الثالثة

مروة : بس يا بنت هكون بكلم مين يعني بكلم امير اخوكي
ريم : بجد دا واحشني جدا جدا هاتي اما اسلم عليه
مروة : طب استني هخلص كلامي معاه وهخليكي تكلميه
ريم : لا يا ماما ونبي هاتي اكلمه عقبال ما تحضريلي الغداء بايديكي الحلوين دول وبعدين ابقي كملي كلامك معاه
مروة : مافيش فايدة فيكي ابدا ، خد يا امير كلم اختك عاوزة تسلم عليك عقبال ما احضرلها الغداء
امير : هاتيها اسلم عليها البت دي
ريم : اهلا اهلا بالناس اللي مش بتسأل
امير : طب قولي ازيك الاول ، معلش والله انا عارف اني مقصر معاكي بس اسألي ماما انا بطمن عليكي كل يوم لما بكلمها
ريم : مااشي هعديهالك المرة دي ، المهم انت اخبارك ايه واحشني جدا
امير : انا تمام الحمدلله ، مش عاوزة اي حاجة اجيبهالك معايا من هنا
ريم : لا يا حبيبي شكرا تيجي بالسلامه
امير: يا بنتي مش لايق عليكي دور المكسوفة ده ادخلي عليا بالطلبات علاطول
ريم بضحك : ههههههه اذا كان كده بقي فانا عاوزة شوكولاته كتيير ونسكافيه من النوع الحلو اللي بيتباع عندكم ده واه كنت ناسية صحيح ما تنساش تجيب هدية معاك لليليان كمان
امير : ليليان ! انتوا لسه اصحاب ؟
ريم : ايوة طبعا يا ابني وهنفضل اصحاب طول العمر
امير : احم..طب آآ هى عاملة ايه يعني
ريم : اممم هى كويسة ماتقلقش عليها
امير : مين اللى قال ان انا قلقان عليها ، انا..انا بس بسأل عليها زى ما بسأل عليكي زى اختى يعني
ريم : اختك ااااه ، طب ما تنساش الهدية بقا
امير : اة ..اختى ، وبالعند فيكي هديتها هتيجي قبل بتاعتك
ريم : هههههه لا انت كده بتتلكك
امير : بصراحة اةة
ريم : مااشي مااشي بس ابقى افتكرها
امير : هتعملى ايييه
ريم : ولا حاااجة
امير : هههه اوعى تتهورى
ريم : هوريك التهور اللى على اصوله لما تيجي ههههه ، صحيح انت نازل امتي يابني
امير : ان شاء الله بعد اسبوعين
ريم : طب حلو قريب يعني
امير : اه
ريم : طب هتيجي ازاي انت فاكر مكان البيت ولا
امير : لااا خالص ، يا بنتي انا يعتبر سايب البيت بقالي 6 سنين يعني من ساعة ما جيت دخلت اولي جامعة هنا تقريبا
ريم : خلاص هاجي انا اخدك من المطار انت طيارتك هتكون عالساعة كام كده
امير : يعني الطيارة هتوصل عالساعة 5 المغرب كده ان شاء الله
ريم : كويس يعني مش هيكون بليل اوي
امير : اه
مروة : يلا يا ريم قومي غيري هدومك الاكل جاهز
ريم : حاضر يا ماما هقفل اهوه مع امير وجاية
امير : وحشني اكل ماما اووي
ريم : خلاص هانت اهيه وتيجي تاكل براحتك
امير : اسيبك انا بقي علشان تلاقيكي جعانة ، يلا عاوزة حاجة
ريم : لا يا حبيبي شكرا تيجي بالسلامه ، لا اله الا الله
امير : محمد رسول الله
مر الاسبوعين من غير اي جديد ، ليليان كانت بتذاكر و بتروح الاوبرا علشان تدرب عالمسابقة وريم كانت بتذاكر وساعات بتروح مع ليليان علشان تشجعها و كريم كان بيفكر ازاي هيكلم ريم وخصوصا ان اخوها نازل مصر وامير كان بيجهز شنطه وحاجته علشان هيرجع مصر بعد 6 سنين غربة وهو معاه شهادات كتير من احسن الجامعات اللي كان بيدرس فيها في تخصص هندسة
ريم كانت بتتصل بليليان
ليليان : الو يا ريمو
رين : ازيك يا لي لي عملتي ايه انهارده
( ليليان ما راحتش الكلية انهارده )
Flash back
ريم : اييه مش هتيجي ليه يا بنتي الجامعة انهارده
ليليان : علشان رايحة الاوبرا ورايا اختبار انهارده وهو اللي هيأهلني للمرحلة الكبيرة
ريم : اهااا اوك ، طب تحبي اجي معاكي
ليليان : لا مش مشكلة هروح انا وانتي روحي الكلية علشان مافيش حاجة تفوتك
ريم : اوك هبقي اكلمك بليل بقي ، باي
ليليان : اوك ، باي باي
Back
ليليان : الحمدلله تماام
ريم : هاا ايه الاخبار طمنيني
ليليان : الحمدلله نجحت في اختبار انهارده ومبسوطة اوي
ريم : طب الحمدلله الف مبروك يا قلبي
ليليان : الله يبارك فيكي يا روحي ، تعرفي لولا اني سمعت صوتك الصبح ما كنتش نجحت ولا حاجة
ريم : يا سلام يا سلام عالكلام الحلو ده ، انا بقي مش هعرف اروح بكرة
ليليان : ليه يا بنتي
ريم : علشان امير جاي بكرة من السفر وانا هروح اجيبه لانه مش فاكر اي حاجة في مصر خالص
ليليان بفرحة : بججد ؟؟ امير نازل مصر بكرة ؟؟
ريم : ايه الفرحة اللي فى صوتك دى
ليليان : انا ؟؟ انا..فرحانة من اول المكالمة علشان..ن..نجحت فى الاختبار زى ما قولتلك
ريم : اااه
ليليان : انتى كنتى مش واخدة بالك ولا ايه
ريم : لالا واخدة بالى من كله ، المهم انا محتاجاكى بكرة معايا
ليليان : ه‍..هنروح فين ؟
ريم : هنروح نجيب امير من المطار يابنتي انتي نسيتي ولا ايه
ليليان : اصل انا مصدعة اوى وتعبانة مش هقدر انزل حتى اروح الكلية
ريم : مهو انا بصراحة اول مرة اروح المطار وكده وغير اني هروح لوحدي وبما انك ليكي خبرة في مجال المطارات ده فهحتاجك معايا بقا ومش هنتأخر والله
ليليان : اصل…
ريم : من غير اصل علشان خاطرى تعالى والله محتاجاكى معايا انا ماعرفش حاجة هناك وكمان علشان العربية بتتصلح
ليليان : ح..حاضر
ريم : هاا هتيجي صح
ليليان : اووك هاجى معاكى
ريم محاولة تغيير الموضوع : ربنا يخليكى ليا ، من كتر ما كنتي بتودي اخوكي مازن المطار وتجيبيه فبقيتي شاطرة وتعرفي كل حاجة هناك
ليليان : هههههه اه علي رايك ، مهو كمان مش عارف اي حاجة في مصر لانه بقاله في انجلترا من سنين من ساعة ما بابا الله يرحمه قاله تعالي كمل تعليمك هناك وهيشغله علاطول
ريم : الله يرحمه ويخليلك مازن
ليليان : امين
ريم : اسيبك بقي دلوقتي لان صوتك شكله تعبان
ليليان : صحبتي و بتحسي بيا دايما ربنا يخليكي ليا
ريم : ويخليكي ليا ، يلا تصبحي علي خير
ليليان : وانتي من اهله
وقد اغلقا المكالمة وكل واحدة تفكر ، فليليان تفكر في امير ونزوله مصر ، وفى مقابلته من جديد ، وكيف اصبح الان ؟؟ وهل مازال يفكر بها ام لا ؟؟ وفى مستقبلها وهل يمكنها تحقيق حلمها وتسافر الي فرنسا من خلال المسابقة ؟؟ اما ريم فتفكر في امير فهو اخوها الوحيد وتشتاق اليه بشدة
وفي اليوم التالي :
مروة : ريم اصحي يا حبيبتي كفاية نووم كده
ريم : صباح الخير يا ماما
مروة : صباح النور يا حبيبتي
ريم : هي الساعة كام ؟؟
مروة : الساعة 12 الظهر ، هو المفروض هتروحي المطار علي امتي
ريم : انا المفروض هنزل من هنا علي 3 كده
مروة : طب وهتروحي ازاي مش الميكانيكي قالك عدي عليا كمان يومين تكون عربيتك خلصت
ريم : اه مهو انا كلمت لي لي وهتيجي معايا بعربيتها
مروة : طب واخوكي هيرضي يركب معاها
ريم : هيرضي ان شاء الله
مروة : ربنا يخليكم لبعض طول عمرها ذوق
ريم : يارب
مروة : يالا بقي قومي افطري وجهزي معايا كده اوضة اخوكي
ريم : حاضر
وعلي الجانب الاخر :
كانت ليليان تذاكر لانها تضيع نصف يومها في الجامعة والنصف الاخر بالاوبرا
اما في الجامعة :
كريم : صباح الخير يا تامر
تامر : صباح الخير يا كبير ، مالك
كريم : مافيش بس انت شوفت ريم انهارده
تامر : ااااه قول كده بقي ، لا ما شوفتهاش ومش هتيجي انهارده
كريم : لييه ؟
تامر : اصل اخوها جاي انهارده من السفر بقي وكده
كريم : بتعرف اخبار حبيبتي قبلي
تامر : هههههه قدرات بقي يابني
كريم : اخيرااا ، انا مستني اليوم ده بقالي كتير
تامر : اهو جه يا صاحبي
كريم : انا فاتحت الاسرة الكريمة في الموضوع
تامر : هاا طمنى ايه رايهم
كريم : موافقين مبدئيا ونفسهم يشوفوا اللي وقعتني في حبها
تامر : هههههههه
كريم : طب انت رأيك اكلمها امتي
تامر : مممم قولها بعد بكرة ، يكون اخوها وصل وخلاص الحياة ماشية عادي خالص
كريم : انا حاسس ان كده بدري
تامر : لا مش بدري ولا حاجة وبعدين انا مش عارف هو اخوها هيمشي امتي فخليك عالخط كده
كريم : اوك
نرجع تاني لريم وليليان :
ليليان بتتصل بريم : الو
ريم : الو يا لي لي انتي فين دلوقتي
ليليان : انا تحت البيت مستنياكي
ريم : اوك انا نازلة اهوه يلا سلام
ليليان : سلام
ريم : يا ماما انا نازلة بقي علشان ليليان وصلت عاوزة حاجة
مروة: لا يا حبيبتي شكرا بس عوزاكي تطمنيني اول ما تشوفي اخوكي نزل من الطيارة
ريم : حاضر ما تقلقيش
مروة : يلا لا اله الا الله
ريم : محمد رسول الله
في عربية ليليان :
ريم : السلام عليكم
ليليان : وعليكم السلام ، اتأخرت عليكي
ريم : لا الوقت كده تمام
ليليان : اوك ان شاء الله الطريق مش ياخد وقت ونوصل بسرعة
ريم : ان شاء الله ، صحيح هي المسابقة هتكون امتي
ليليان : بعد شهر ونص
ريم : ايه ده قبل الامتحانات بشهر
ليليان : اه للاسف ، بس انا خايفة اووي يعني علشان الامتحانات وكده
ريم : لا لا ماتخافيش ان شاء الله خير وتطلعي من الاوائل زي كل سنة انتي بس نظمي وقتك كويس وكله هيبقي تمام
ليليان : مهو المشكلة ان نتيجة المسابقة في نفس اليوم يعني لو مش نجحت هيبقي فيه اكتئاب بقي وكده
ريم : ان شاء الله تنجحي وبكرة تقولي ريم قالت
ليليان : ياارب
وظلت الفتاتان يتحدثان طول الطريق حتي وصولهم الي المطار
في المطار :
ليليان : هي الساعة كام دلوقتي يا ريم
ريم : السااعة 5 الا ربع
ليليان : طب الحمدلله وصلنا في الوقت المناسب
ريم : اه
وبعد ربع ساعة انتظار :
السادة المستمعين نود ان نحيطكم علما بوصول الطيارة القادمة من فرنسا وشكرا
ريم : الحمدلله يارب الطيارة وصلت بسلام
ليليان : اها الحمدلله
وبعد ربع ساعة اخري
ريم : يا لي لي مش امير اللي جي هناك ده
ليليان : مش عارفة انا بقالي كتير مش شوفته ومش عارفة شكله عامل ازاي
ريم بفرحة : ده بيشاورلي اكيد هو
امير وهو يشاور لريم وهو يقترب منها
امير : يا ريموو وحشاني يابت ويحتضنها
ريم بدموع الفرحة : امييير حمدلله عالسلامه وحشني كتييير ووحشتني رخامتك عليا
امير : وانتي اكتر يا حبيبتي بطلعي عياط بقي الناس عماله تبص علينا انا كويس قدامك اهوه
ريم وهي تمسح دموعها : هههه حاضر
ليليان : حمدلله عالسلامه يا بشمهندس امير
امير : الله يسلمك شكرا
ريم : ايه ده انت مش فاكرها
امير ينظر لريم بمعني لأ
ريم : دي ليليان انت نسيتها ولا ايه
امير : ليليان بجد ؟؟ ازيك عاملة ايه
ليليان : آآ..الحمدلله تمام
ريم : طب يا امير هتصل انا بماما واطمنها انك وصلت بالسلامه
امير : اوك
امير لليليان : انا اسف ما تزعليش مني اصلك اتغيرتي اووي
ليليان بهزار : لا عادي ولا يهمك بس اتغيرت للاحسن ولا
امير وهو ينظر في عينيها العسليتان اللامعتان وبكل جراءة : للاحلي طبعا
ثم……

الحلقة الرابعة
احست ليليان بالاحراج الشديد ثم قالت : احم ميرسي
امير وقد احس بجرئته الزائدة وكاد ان يعتذر لها علي سوء تصرفه لكن جاءت ريم قائلة : اميير اميير ماما عاوزة تكلمك تطمن عليك
امير : هاتيها دي وحشاني اوي ، الو يا حبيبتي انا وصلت اهوه الحمدلله
مروة: حمدلله عالسلامه يا حبيبي انت كويس
امير : اه الحمدلله انا بخير
مروة : انتوا هتتأخروا ولا ايه
امير : لا احنا جايين اهوه علاطول ما تقلقيش
مروة : ماشي يا حبيبي انا مستنياكم
امير : اوك عاوزة حاجة واحنا جايين
مروة: لا شكرا تيجوا بالسلامه
امير : مع السلامه
ريم : يالا يا امير
امير : انتي جايه بعربيتك
ريم : لا احنا جايين بعربية ليليان علشان عربيتي بتتصلح
امير : طب انا هركب تاكسي وهخليه يمشي وراكم علشان تبقوا علي راحتكم
ريم : اوك اللي تشوفه
امير : يالا بينا
ريم وليليان: يلا
خرجوا من المطار واوقف امير تاكسي وادخل شنطه بالتاكسي وركب به ثم اخبر السائق بان يسير خلف سيارة ليليان
في عربية ليليان :
ريم : ايه يابنتي مال خدودك عاملة زي الطماطم كده ليه
ليليان بارتباك : هااه لا مافيش بس اصل الجو حر ولما يكون الجو حر خدودي بتحمر
ريم : اوعي يكون روميو ضايقك بالكلام ولا حاجة
ليليان : مين روميو ؟؟
ريم : امير ، وانا بقوله يا روميو اصله لايق عليه الاسم ده اوى
ليليان : ااها
ريم : المهم هو عملك حاجة
ليليان : آآ..لا طبعا ايه اللى بتقوليه ده
ريم : ممم اوك (احست ريم بشئ حصل بين امير وليليان اثناء مكالمتها لوالدتها ولكن ليليان لا تريد ان تقوله فهي تشعر بصديقتها من اول نظرة )
وعند وصولهم بيت ريم :
نزل امير من التاكسي وانزل شنطه ونزلت ريم وليليان
ريم : معلش تعبناكي يا لي لي انهارده
ليليان : لا يابنتي مافيش تعب ولا حاجة
ريم : طب اطلعي معانا شوية
ليليان : شكرا يا ريم وحمدلله عالسلامه يا بشمهندس امير
امير : الله يسلمك ميرسي
ليليان : يلا سلام يا ريم
ريم : مع السلامه ولما تروحي اتصلي طمنيني
ليليان : اوك يلا بااي
وركبت ليليان عربيتها ومشيت وكانت تفكر في ما حصل اليوم
صعد امير وريم الي منزلهما…
ورن امير جرس الباب لتفتح لهم مروة قائلة : حمدلله عالسلامه يا حبيبي
امير وقد احتضن امه بشدة فقد اشتاق لها كثيرا : الله يسلمك يا حبيبتي وحشاني والله
ريم بهزار : يادي الفضايح طب ادخلوا سلموا علي بعض جوا مش عالباب يعني
مروة : اتفضل يا حبيبي نورت بيتك
ريم : لا علي فاكرة بقي هو البيت كان منور باصحابه
امير بهزار : سيبك منها يا ماما انا جعاان اووي وواحشني اكلك
مروة : عملالك كل الاكل اللي انت بتحبه ادخل غير هدومك هيكون جاهز ، يلا يا ريم ادخلي غيري انتي كمان علشان تتغدي مع اخوكي
امير وريم : اوك
وبعد ان ابدلوا ملابسهم وذهبوا الي السفرة :
امير : الله تسلم ايدك يا ست الكل الاكل طعمه حلو اوي
مروة : بالهنا والشفا
ريم بهزار : انا سمعت كده ان فيه ناس بتعرف تعمل اكل صح ياماما
مروة : ههههه صح
ريم : واحنا بقي لازم ندوق الاكل علشان نعرف الغربة بتعلم ازاي
امير : يا سلام من عنيا الغداء بكرة عليا
ريم : بجد يا امير
امير : اه بجد بس ما ليش دعوة لو حاجة اتحرقت او كانت مش مستوية كويس
ريم : لا يا حبيبي خلاص شكرا انا هاكل من ايد مامتي حبيبتي احسن ما اروح عالمستشفي
مروة : هههههه عن اذنكم بقي انا هدخل انام لحسن مش نمت من امبارح من قلقي عليك
امير وريم : تصبحي علي خير يا حبيبتي
مروة : وانتوا من اهله
وبعد الانتهاء من الاكل :
امير : الا قوليلي يا ريم ما فيش حاجة كده ولا كده
ريم : لا ياخويا مافيش انت اللي مافيش حاجة
امير سريعا : لا
ريم : وانا كنت فاكرة انك هتدخل علينا بمزة وحتة عيل اتاريك طلعت اهبل
امير : اهدي يا بت شوية انتوا عارفين كويس اني مش هتجوز من هناك
ريم : ليه بس يا معلم دا حتي كلهم هناك مزز والحياة حلوة
امير : معلم ؟! ايه الطريقة اللي بتكلميني بيها دي اهو انا لسه عارف دلوقتي ليه ما حدش معجب بيكي
ريم : سيبك مني ورد علي سؤالي
امير : يا بنتي كلهم هناك زي بعض وماتعرفيش ماضيهم كان عامل ازاي والحياة سايبة عالاخر وانا ما احبش مراتي تهزر مع ده وتضحك مع ده وطبعا مش هقدر امنعها لان عاداتهم هناك غيرنا بس كده
ريم : اااه لا طلع عندك حق ، بقولك ايه يالا ندخل ننام علشان انت شكلك تعبان اوي وانا ورايا كلية الصبح
امير : اه ياريت ، احم..آآ صحيح هي ليليان اتصلت بيكي
ريم باستفهام مقصود : تتصل بيا ليه
امير : علشان يعني تطمنك انها وصلت
ريم : اه اتصلت ووصلت بخير الحمدلله ، بس انا عاوزة اسألك علي حاجة كده
امير : اسألي بس في السريع
ريم : هو انت قولت ايه لليليان انهارده
امير باستنكار : انا ؟ ما قولتش حاجة بتسألي ليه
ريم : اصل انا لما جيت وقولتلك خد كلم ماما لاقيت خدودها عاملة زي الطماطم وكانت مرتبكة اوي
امير وقد تذكر ما قاله ثم رسم علي وجهة ابتسامه
ريم وقد لاحظت امير : ايه يابني مالك سرحت في ايه
امير : هااه لا ولا حاجة انا جاي تعبان وداخل انام تصبحي علي خير
ريم : وانت من اهله
ريم لنفسها: هههههههه قال ايه ولا حاجة ، عليا انا بردو
وفي صباح اليوم التالي
ريم : ايه النشاط ده كله امير صاحي بدري كده صباح الخير
امير ومروة : صباح النور
ريم : ماما انا رايحة الجامعة عاوزة حاجة
مروة : لا يا حبيبتي شكرا
امير : استني اجي اوصلك واشوف الشوارع هنا عاملة ايه
ريم : لا ليليان مستنياني تحت بعربيتها
امير : ليليان !
مروة : طب خليها تطلع تفطر معانا يابنتي وبعد كده ابقوا روحوا
ريم : لا ياماما هنتأخر
امير : اما انتي جبارة صحيح يعني هي جيالك بعربيتها وهتوصلك لحد الكلية ومش عوزاها تطلع تفطر
ريم : انت مالك هي بتعدي عليا علاطول اصلا ، انا نازلة بقي لان هي مستنياني تحت ، سلام
مروة : مع السلامه
امير : ماما انا هروح اشوفهم من البلكونة واطمن انهم مشيوا مع بعض
مروة : ماشي
ذهب امير سريعا لكى ينظر عليهم ويري ليليان ايضا وابتسم لها ثم دلف الى الداخل مرة اخرى…
ريم : يا صباح الجمال
ليليان : صباح النورعليكي
ريم : بقولك ايه عاوزين ناخد المحاضرات اللي فاتتنا دي علشان نذاكرها علاطول
ليليان : اوك ياريت ، ممكن نبقي ناخدها من انجي
ريم : اووك ، تعرفي احسن حاجة انهارده
ليليان : ايه
ريم : ان عندنا محاضرة واحدة بس ونروح علاطول علشان اقعد مع امير
ليليان : اه قولي كده بقي امير جه وهيخليكي تنسيني
ريم : انا اقدر انساكي ، انا بس متحمسه وعاوزة اشوف الهدايا اللي جابهالي
ليليان : ههههه اوك
في الجامعة
كريم : تاااامر يا تااامر
تامر : صباح الخير يا كيمو
كريم : صباح الفل ، ماتعرفش اخو ريم وصل بالسلامه ولا
تامر : اة وصل
كريم : طب الحمدلله
تامر : عرفت الجديد ولا لسه
كريم : ايه
تامر : اصل سمعت كلام كده ان في رحلة طالعة تبع الجامعة بس لسه مش حددوا المعاد
كريم : رحلة اخيييرا دا الواحد خلاص كان اتخنق
تامر : معاك حق والله بس مش تعرف هي طالعة فين الاول
كريم : ياعم انشالله تكون طالعة بلطيم بس الواحد عاوز يتفسح وخلاص
تامر : ههههه بلطيم ، اسلوبك بقي بيئة اوي ماتقعدش معايا كتير تاني وخاف علي مستقبلك ، وخد بالك انك داخل علي مشروع جواز فلازم تبقي ابن ناس علشان يوافقوا عليك
كريم : عيب عليك انا كده من زمان بس مش عاوز اوضح ، وبعدين اللي يقعد معاك يتعدي علاطول
تامر : هو فيه احلي من كده ، بردو ماعرفتش هي طالعة فين
كريم : انت بقيت زنان وتحب الرغي انت بتكلم انجي كتير ولا ايه
تامر: ماااشي ماااشي انا غلطان اني عاوز افرحك واقولك عالمكان الحلو اللي ممكن ناس تانيه تطلعه يعني وكده
كريم : قصدك ريم
تامر : مالك قلبت بطة بلدي كده ليه لما سمعت اسمها
كريم : ياعم انت هتزلني قول واخلص
تامر : انا سمعت انها رايحة شرم
كريم : ههههه شرم مرة واحدة ايه التطور الفظيع ده
تامر : بفكر ما اخدش البت انجي معايا
كريم : طب اعملها كده وشوف هتعمل فيك ايه
تامر: جري ايه ياعم هو الواحد مش هيعرف يهزر كمان ، والله دا انا بحبها اووي
كريم : عارف لو ماكنتش صاحبي والله ماكنت هصدقك
في المساء في منزل ريم بالتحديد:
ريم : السلام عليكم
مروة وامير : وعليكم السلام
مروة : حمدلله عالسلامة
ريم : الله يسلمك
مروة : احضرلك الغداء
ريم : اه ياريت
مروة : حاضر يا حبيبتي
ريم : اتغديت انت طبعا ومش استنتني
امير : انا ادغيت مع ماما علشان تاخد علاجها
ريم بفرحة : اهاا ، طب انا هغير هدومي واتغدي واشوف بقي الهدايا اللي جبتهالي
امير : اوك
وبعد ان انهت ريم غدائها :
ريم : انا جاهزة يلا يلا
امير : طيب حاضر يلا