ترفيهمسلسل اللقاء المنتظر

مسلسل اللقاء المنتظر الحلقة الخامسة والسادسة

الحلقة الخامسة

في غرفة امير :
ريم : ياتري جبتلي ايييه
امير : غمضي عينك
ريم : اهوه بس يلا بسرعة
امير : اووك تقدري تفتحي دلوقتي
ريم : Wooow ايه الجاكيت الجامد ده
امير : عجبك بجد
ريم : اااه طبعا شكله حلو اوي وعلي مقاسي بظبط
امير : الف مبروك يا حبيبتي
ريم : ميرسي الله يبارك فيك ، احم طب والباقي
امير : دايما مستعجلة ، اتفضلي علبة شوكولاته بحالها وادي النسكافيه
ريم : ربنا يخليك ليا ، طب و لي لي
امير : جبتلها حاجة بس حاسس انها مش قد كده
ريم : طب وريني وانا اقولك
امير : اهوه اتفضلي
ريم : الله حلوين اوي
امير : بجد ، يعني هيعجبوها
ريم : اه البرفيوم ماركة والنظارة الشمس كمان ماركة وباين عليهم حلوين
امير : طب الحمدلله
ريم : بس سيبك انت بقيت بتعرف تجيب برفيوم بناتي حلو اوي
امير : يارب بس يعجبوها
ريم : اقعد انت ادعي بقي هنا لحد الصبح عقبال ما انا اشوف باقي الحاجة اللي جبتها لماما واجرب النسكافيه ده اشوفه اصلي ولا بتضحك عليا بيه
امير وهو يرمي المخده عليها بهزار : طب يلا بقي اطلعي من الاوضة احسنلك
ريم : هههههه خلاص طلعت اهوه
وفي صباح اليوم التالي :
ريم : ماما انا نازلة الجامعة عاوزة حاجة
مروة: لا يا حبيبتي شكرا تيجي بالسلامه
امير : ريم استني عاوزك
ريم : خير في ايه
امير : احم كنت عاوز اسألك يعني انتي خدتي معاكي هدية ليليان علشان تديهالها
ريم بابتسامه : اه اخدتها يا حنين
امير : يلا بقي امشي علشان ما تتأخريش عليها سلام
ريم : مااشي لما ارجع فيه كلام تاني يلا سلام
في عربية ليليان :
ليليان : صباح الفل
ريم : صباح النور
ليليان : يلا بينا
ريم : لا استني قبل ما نروح في حاجه كنت عاوزة اديهالك اتفضلي
ليليان : ايه الشنطة دي
ريم : آآآ خديها بس وقوليلي رأيك اول ما تفتحيها
ليليان : اوك ميرسي
ريم : علي ايه يا بنتي يلا علشان مش نتأخر اكتر من كده
في الجامعة وخاصةً في وقت البريك بين المحاضرة الاولي والتانية
ريم : يابنات انا رايحة التويلت اسبقوني عالكافيتريا
ليليان ودينا وانجي : اوك
تركتهم ريم وغادرت واثناء ذهابها سمعت صوت من خلفها يناديها فاستدارت لكي تري من ينادي عليها لتجد….
كريم : قطعتي نفسي عمال اجري وراكي علشان الحقك وماكنتش عاوز انادى عليكي بصوت عالي
ريم : انا آسفة ما خدتيش بالي منك خالص
كريم وهو مبتسم : ولا يهمك
المهم انتي عاملة ايه ؟ واخبار المذاكرة معاكي ؟
ريم : بخير والله تمام وادينا بنذاكر وبنعمل اللي علينا وربنا يسهل
كريم : مم طيب شدي حيلك بقي واطلعي الاولي عالدفعة
ريم : ههههه الاولي مرة واحدة طب قول اجيب تقديرعالي حتى
كريم : ان شاء الله تجيبي تقدير حلو ، انا بس كنت عاوز اسئلك شوية اسئلة كده
ريم : اه اتفضل هي تبع مادة ايه ؟ ” وفي نفسها يارب يكون عاوز اسئلة مادة سهله لحسن يقولي سؤال صعب وانا عماله اقوله بذاكر بذاكر ويطلع شكلي وحش ” قاطع كريم تفكيرها
كريم : ههههههه لا دي مادة جديدة خالص
ريم باستغراب : ايه ؟ مادة جديدة ومقررة علينا واحنا مش عارفينها ازاي يعني وازاى هيمتحنونا فيها وامتي نزلوها اصلا
كريم : ههههه لا لا اهدى ده استبيان سريع كده من 4 اسئلة بس احتمال تبقي مقررة عليكي قريب
ريم : قول يا كريم فيه ايه
كريم بطريقة كوميدية : بسم الله السؤال الاول اما بتقومي الصبح بتحبي تشربي قهوة ولا نسكافيه ؟
ريم : النسكافيه
كريم : انتي من البنات اللي بتحب افلام الرعب الاجنبي ولا ؟
ريم : بصراحة اة بس مش تتريق
كريم : ههههه لا ده كده تمام اوي ، بصي بقي السؤال ده مصيري انتي اهلاوية ولا زمالكاوية ؟
ريم بضحك : مصيري هههههههه
كريم : اة طبعا ده الناس بتتخانق في بيت واحد عشان ماتش الدورى
ريم : انا اهلاوية وساعات متعصبة
كريم : طمنتيني الحمدلله
ريم : متعصبة يبقي طمنتك ؟!
كريم : لا عادي ما تخديش في بالك طب ده اخر سؤال وخلاص
ريم : كريم فيه ايه انا مش فاهمه حاجة وبعدين مش هينفع اقف معاك اكتر من كده ، عن اذنك
كريم بترجي : لالا استني ، معلش والله ده اخر سؤال وقد تحولت نظراته الي الجدية
ريم : طب بسرعة بليز
كريم : ريم هو انتي لو اتجوزتي وافرضي جوزك في مرة كان متعصب جدا جدا وما مسكش اعصابه وغصب عنه ضربك هيكون رد فعلك ايه ؟
ريم وقد تضايقت من هذا السؤال وردت عليه بحده : اظن دي حاجة تخصني انا و..ومش من حق اى حد يعرف اجابته
كريم بترجي : ارجوكي يا ريم لو ليا خاطر عندك جاوبي
ريم : انا مش عارفة ايه اخرتها معاك بس اوك ، اولا انا مش هعمل اى حاجة ان شاء الله تستدعي ان هو يمد ايده عليا ابدا وفرضا لقدرالله لو حصل انا مش هخلي الموضوع يعدي بالساهل بس عمر ما اللي حصل هيخرج بره بيتنا ابدا
كان كريم يستمع لكل كلمة باهتمام بالغ وعندما انهت جملتها الاخيرة
نظر لها بحب قائلا : مبروك انتي كسبتي يا ريم
ريم باستغراب : كسبت بجد ، كسبت ايه بقي
كريم بفرحة : كسبتي قلبي يا ريم
توترت ريم واحمرت خجلا ونظرت الي الارض وبدون ان تنطق بكلمة قالت لنفسها كيف يكلمني بهذة الطريقة هل يمزح ام ماذا ؟
وهمت بالانصراف لانها لم تكن تعرف ماذا تفعل
فاسرع كريم امامها قائلا : ريم انا بحبك جدا من اول مرة شوفتك فيها هنا في الجامعة وحبيتك اكتر لما لاحظت اخلاقك كويس اوي وكنت مستني لما نكون في اخر ترم لينا في الجامعة علشان اقولك عاللي جوايا وماكنتش عاوزك تفهميني غلط طول السنين اللي فاتت
ولما اتاكدت من مشاعري ناحيتك قررت اجي واقولك ، وكنت خايف اوى ليكون فيه حد تانى فى حياتك بس كنت بدعى كتير اوى ان ماحدش يعجب بيكي ( فنظرت له باستغراب )
فأكمل كريم : ايوة ما تبصليش كده مهو اللى بيحب حد بجد بيبقي نفسه يقضي باقى حياته معاه وبيسعي فى كل الطرق علشان يحاول يقرب منه
كانت ريم تسمع كلماته وهي في قمة الخجل والتوتر وقد احمرت وجنتيها ولكنها حقا كانت سعيدة
كريم : ريم انتي مش بتردي عليا ليه
ريم : آآآصل انت فاجئتني بكلامك ده ووو انا مش عارفة ارد اقول ايه وكنت بحسب اسئلتك دي كلها هزار وو..
قاطعها كريم قائلا : انا مش عايزك تردي دلوقتي فكري وخدي وقتك
اوعي تكوني ادايقتي من اسئلتي ثم تبسم وقال اصل انتي ماتعرفيش موضوع الاهلي والزمالك ده ممكن يخرب بيوت
ريم بضحك لا اراديا : هههه عندك حق
كريم : ايوة كده اضحكي خلي الدنيا تنور كنتي عملالي جو توتر ورعب mbc 2 من شوية
خجلت ريم من كلماته ونظرت الي الارض
كريم : خدي وقتك وفكري براحتك بس اوعي تنسيني وانا جاهز اني اقابل اخوكي في اي وقت يحدده بعد موافقتك طبعا
ريم : اوك انا همشي بقي علشان اتأخرت عالبنات باي باي
كريم : مع السلامه ، مشت ملك من امامه وهو يرسم ابتسامة وكان قلبه يطمئنه بان ردها سيكون علي الاغلب بالموافقة
اما عن ريم فبعد ان ذهبت الي الحمام ظلت تنظر في المرآة وكان بداخلها الكثير فكريم شخصية شهمه وناجح وقادر علي تحمل المسؤلية ومرح في نفس الوقت ثم قررت العودة الي اصدقائها
ليليان : مالك يا ريم شكلك مش طبيعي
ريم بارتباك : هااه لا مافيش اانا بس تعبت شوية وعاوزة اروح البيت
ليليان : مالك حاسه بايه طمنيني
ريم : لا انا تمام بس مش قادرة احضر المحاضرة انا همشي لو عاوزة تقعدي انتي وتحضريها براحتك
ليليان : لا هروح انا كمان يلا بينا
ريم : اوك يلا
انجي ونهي : رايحين علي فيين
ريم : مافيش بس حاسه بشوية تعب فهروح البيت وليليان هتوصلني
انجي ونهي : اوك
نهي : لما توصلي البيت وتستريحي ابقي طمنينا
ريم : اوك يلا سلام
انجي ونهي : سلام
في عربية ليليان :
ليليان : ايه يا بنتي مالك شكلك متوترة اوي
ريم : اصل حصل حاجة وانا لحد دلوقتي مش مصدقاها خاالص
ليليان : خير حصل ايه
ريم : ليليان انا فيه واحد بيحبني واتقدملي انهارده
ليليان بسعادة وقد اوقفت السيارة : بجد ؟! ده احلي خبر سمعته في حياتي
ريم : مش لما تعرفي مين الاول
ليليان : من غير ما اعرف باين عليكي اوي انك موافقة
ريم : كده يا رخمة طب مش هقولك مين ، وبعدين باين عليا ازاى
ليليان : لا لا خلاص سووري بلييييز قولي حد اعرفه
ريم : كريم !!
ليليان : كريم مين
ريم : كريم اللي بيطلع الاول عالدفعة كل سنة
ليليان بفرحة اكتر وقد احتضنتها : بجد ؟ الف مبروك يا ريموو
ريم : الله يبارك فيكي انا مش مصدقة اللي حصل لحد دلوقتي وحاسه اني بحلم
ليليان : ان شاء الله هيكون احلي حلم اتحقق في حياتك ، بس احكيلي اللي حصل بالتفصيل
ريم : هههه طب انتي مش ناوية تروحيني البيت سوقي وانتي بتسمعيني
ليليان : اوك يا عروسة
ريم : بس بردو ماقولتليش باين عليا ازاى انى موافقة
ليليان : يعني بتضحكي ومبتسمة كده ووشك كله طماطم ههههه
ريم وقد حكت لليليان كل شئ
ليليان : ههههه بس حلوة حركة الاسئلة دي بس شكله بيحبك بجد
ريم بتوتر : اانا مش عارفة حاسه اني متلخبطة بس فرحانة
ليليان : ربنا يتمملكم علي خير يارب
ريم في نفسها : يارب

 

الحلقة السادسة
تحت بيت ريم :
ريم : ميرسي عالتوصيلة وهبقي اكلمك بليل
ليليان : عيب يا بنتي ما تقوليش كده اانا حتي زعلانة اني مش هعرف اعدي علي كل يوم ونقعد نرغي قبل ما نروح الجامعة
ريم : خلاص انا ممكن اعتبر ان عربيتي ما اتصلحتش وتعدي عليا عادي
ليليان : وانا موافقة طبعا
ريم : انا هطلع بقي علشان مش اأخرك اكتر من كده
ليليان : اوك ، ريم صحيح انتي هتقولي لطنط وامير علي موضوع كريم انهارده
ريم : مش عارفة
ليليان : اوك بس مش تنسي تكلميني بليل وتحكيلي
ريم : اوك يلا سلام
ليليان : سلام
في بيت ريم :
ريم : يا اهل المنزل ، انتوا فين
لا احد يرد
ويم : هو ماحدش هنا ولا ايه ( وكانت تتجه لغرفة امير )
ريم تطرق عالباب:
امير: ادخل
ريم : امير اومال فين ماما
امير : حمدلله عالسلامه ، ماما راحت الجامع انهارده علشان بقالها اسبوعين مش بتروح
ريم بارتباك : ااااه صح ، اوك انا رايحة علي اوضتي
امير : ريم استني عاوزك
ريم وقد شعرت ان امير يلاحظ ارتباكها
ريم : نعم
امير: احم هي ليليان شافت الحاجة
ريم : لا لسه لما تروح البيت هتشوفها
امير : اوك
ريم : انا رايحة اوضتي بقي
امير : ريم انتي مالك فيكي حاجة غريبة
ريم بتوتر : ااانا لا انا بس جايه تعبانه
امير : يعني مش عاوزة تقوليلي حاجة
ريم : بص بقي يا امير فيه حاجة حصلت انهارده في الجامعة ولازم تعرفها
امير بابتسامة : مش بقولك فيه حاجة ، خيرايه اللي حصل
ريم : انا هغير هدومي واجي احكيلك
امير: اوك هستناكي اوعي تضحكي عليا وتنامي
ريم : لا هغير واجيلك
امير : اوك
وبعد ربع ساعة :
ريم : انت فين يا امير
امير : انا هنا في البلكونة تعالي
ريم : يا سلام عاملي نسكافيه كمان
امير : انا بقالي كتير مش بقعد معاكي فقولت اعمل اي حاجة تسلينا
هااا كنتي عوزاني في ايه
ريم بارتباك شديد وتوتر : امير اااناا … يعني انهارده لما كنت في الجامعة وكده حصل اااا….
امير: فيه ايه يا ريم قلقتيني
ريم وقد احمرت خدودها : اصل بصراحة كده….انا جايلي عريس
امير باندهااش : عريس ؟؟! انتي بتتكلمي جد
ريم : اه
امير: طب وانتي تعرفيه منين
ريم : هو واحد معايا في الجامعة يعني وكده
امير بغمزة : ازاى يعنى وكده
ريم : انا غلطانة اني اتكلمت معاك وقد همت بالوقوف
لكن شدها امير لكي تجلس مرة اخري
امير : خلاص والله بس انتي شكلك كده موافقة
ريم : انت هتعمل زي ليليان
امير: هي كمان قالتلك كده
ريم : ايوة
امير : شوفتي الناس اللي بتفهم ، المهم يعني هو عامل ازاي وكده
ريم : بص انا هحكيلك كل حاجة بس اوعي تتريق
امير : لا ما تخافيش
ريم وقد حكت لامير عن كل ما حدث بينها وبين كريم
علي جانب اخر :
ليليان : مساء الخير يا ماما
سمية : مساء النور يا حبيبتي
ليليان : اتغديتي واخدتي الدواء بتاعك ولا لسه
ايه الشنطة اللي معاكي دي ، سمية : اه ما تقلقيش عليا
ليليان : دي شنطة ريم قالتلي خديها وشوفي اللي جواها وابقي قوليلي رايك
سمية : ااه
ليليان : استني كده اما اشوف ايه دي
فتحت ليليان الشنطة لتفاجئ بنظارة شمسية جميلة وبرفيوم رائحتة رائعة
سمية : الله الحاجات دي شكلها جميلة وغالية بس بمناسبة ايه
ليليان : مش عارفة ، ااااه دي ممكن تكون هدية امير جايبها معاه من السفر
سمية : ااه بس ذوقه ما شاء الله حلو اوي
ليليان : انا هدخل بقي اغير هدومي
سمية : ماتنسيش تكلمي ريم وتشكريها
ليليان : اكيد يا ماما
سمية : وابقي سلميلي عليها وقوليلها انها وحشتني
ليليان : هههه اوك
دخلت ليليان غرفتها وامام المرآة كانت تجرب النظارة الجديدة فكانت معجبة بها جدا
نرجع تاني لامير وريم :
امير : ههههه حلوة الحركة دي بس تصدقي بقي شكله بيحبك فعلا
ريم بكسوف : هو قاللي انه كان عاوز يكلمني من سنة اول بس كان خايف افهمه غلط او انه عاوز يتسلي بيا وقاللي انه هو كده حافظ عليا اكتر
امير: ممم طب وانتي ايه رايك
ريم بكسوف : انا مش عارفة هفكر وابقي اقولك
امير : اوك بس انا حاسس اننا هنقول مبروك قريب
ريم نظرت له بابتسامه : انا هدخل انام بقي تصبح علي خير
امير : وانتي من اهله
دخلت ريم غرفتها لكي تتحدث مع ليليان وتحكي لها حوارها مع اخوها ولكي تعرف رأيها بالهدية
ريم : الوو
ليليان : الو
ريم : ايه السرعة دي
ليليان : كنت لسه هكلمك
ريم : اهاا انا كلمت اميرفي موضوع كريم
ليليان : بجد ؟ وكان رايه ايه
ريم : حسيته مبسوط وقاللي ان شاء الله نقول مبروك قريب
ليليان: الف مبروك يا حبيبتي
ريم : الله يبارك فيكي
ليليان : اه صحيح ميرسي اووي عالهدية
ريم : عجبتك
ليليان : اة ميرسي وابقي اشكري امير
ريم : ابقي اتصلي بيه وقوليله انتي
ليليان بتوتر : آآ..اناا ؟
ريم : اه عادي
ليليان : بس انا مش معايا رقمه ابقي اشكريه انتي بالنيابة عني
ريم : مهو اصل انا ممكن انسي استني كده خليكي معايا دقيقة
ليليان في نفسها : يارب يارب ما يحصلش اللي في بالي و تديلة الموبايل يكلمني
ريم بصوت منخفض : امير امير
امير : ايوة فيه حاجة
ريم : ليليان عالموبايل وعاوزة تشكرك عالهدية
امير : بجد ؟
ريم : اه والله
امير : طب هاتي الموبايل وروحي اعملي اي حاجة
ريم : لا انا هستني
امير : امشي بقي بدل ما هرفض كريم من قبل ما اشوفه وتفضلي قاعدة جنب ماما
ريم : لا وعلي ايه الطيب احسن اما تخلص ابقي هات الموبايل
امير : اوك
قد غادرت ريم غرفة امير
امير : الو
ليليان بصدمة : آآ…الو
امير: ازيك عاملة ايه
ليليان : الحمدلله تمام ، ميرسي عالهدية الحلوة دى
امير بفرحة : عجبتك بجد
ليليان باحراج : احم اه ميرسي يا بشمهندس
امير: بلاش يا بشمهندس قولي يا امير علاطول زي زمان
ليليان : ….
امير : ايه روحتي فين
ليليان : انا..معاك
امير : نفسي اسمعها منك زي زمان ، عشان خاطري عندك
ليليان : ….
امير : انا اسف لو ضايقتك
ليليان بتوتر: لا مافيش حاجة ، اناااا آآآ.. مضطرة اقفل دلوقتي علشان هنام
امير : اوك ااا.. تصبحي علي خير
ليليان: وانت من اهله يا .. يا امير
وقد اغلقت الخط
امير بعد ان اغلق مع ليليان : هااه !! دى قالت امير ، دي قالت اميير ، ياهوووو ، الحمدلله انها عجبتها والحمدلله اني سمعت صوتها انا لازم انام علشان يكون اخر صوت سمعته انهارده
ريم وهي تدخل غرفة امير وبصوت عالى نسبيا : خلاويص ولا لسه
امير : شششش خدي موبايلك واطلعي بره علشان هنام
ريم : انت قفلت معاها ليه كنت لسه هكلمها
امير : ريم بعد ازنك سيبيني انام دلوقتي وبعدين هي كمان قالتلي انها هتقفل علشان تنام
ريم : اهااا قول كده بقي ، طيب عالعموم انا عاوزة اقولك ان ماما لسه جايه
امير : اوك يلا تصبحوا علي خير
ريم : وانت من اهله يا حنين
ريم لنفسها وهي تخرج من غرفة امير : للدرجادي لحقت تتعلق بيها دا انت شوفتها مرة واحدة بس من ساعة ما جيت ، ولا يمكن لسه بتحبها من ساعة ما كنا صغيرين ، بكرة نشوف ايه اللي هيحصل
علي الجانب الاخر :
كريم : الو يا تيموو
تامر : اهلا اهلا
كريم : ماجيتش ليه انهارده
تامر : اصل ماما كانت تعبانه شوية فروحنا للدكتور
كريم : خير بس مالها
تامر : مافيش شوية تعب كده بس
كريم : لا الف سلامه عليه
تامر : الله يسلمك ، بس صوتك شكله مبسوط
كريم : دايما فاهمني
تامر : ههههه اعترف ايه اللي حصل وانا مش موجود
كريم : انا روحت كلمت ريم انهارده
تامر : ايه السرعة دي يابني مش تتقل شوية
كريم : كنت هفضل مستني لحد ما واحد تاني يروح يتقدم لها
تامر : طب وهي ايه رايها
كريم : قالتلي سيبني افكر يومين بس كان باين عليها انها هتوافق
تامر : وانت عرفت ازاي يا عم الحبيب
كريم : كان باين عليها انها اتوترت جامد و ضحكت بعد كلامنا عادي وتمام يعني
تامر : ايوة ياعم بقيت تفهم في الحاجات دي الف مبروك
كريم : بقيت افهم منك هههههه ، بس اجل الف مبروك دي شوية لحد ما اعرف رأيها بردو الاول
تامر : يابني كله هيبقي تمام بس خلي عندك شوية ثقة في نفسك زى ماقولتلك قبل كده
كريم : ان شاء الله ، انت جاي بكرة ولا لا
تامر : مش عارف لو سما اختي هتقعد مع ماما بكرة هاجي
كريم : ماشي ، اسيبك بقي دلوقتي
تامر : ماشي يلا سلام
كريم : سلام

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: ندى عبدالحميد

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى