ترفيهمسلسل بين نارين

مسلسل بين نارين الحلقة السابعة والثامنة

الحلقة 7

دخل طارق من المحكمة… ملقاش نجاة بتجرى عليه تاخد منه شنطته تدخلها المكتب

شاف بسمة جاية ناحيته ببطء من تقل بطنها

“نجااااااااااة”

“مش موجودة…هات الشنطة”

“لالا مش مهم انتى مش قادرة”

“احضرلك الغدا”

“لما نجاة تيجى…هى هتتأخر”

“نجاة نجاة… انا اللى مراتك ياطارق مش هى”

وضحك طارق

“انتى بتغيرى عليا من الشغالة”

“ومغيرش ليه انا مش ست وانت جوزى ونجاة دى بنت حلوة وصغيرة”

“طيب يامراتى وانا جوزك انتى تعرفى عنى انى ممكن ابص لاى واحدة وانا معايا القمر”

“بجد ياطارق”

“طبعا ياحبيبتى… بس بجد هى هتتأخر علشان انا جاى جعان اوى”

“نجاة مشيت خالص ياحبيبى”

واستغرب طارق

“مشيت…ليه وازاى؟؟”

“انا اتضايقت من وجودها واديتها حقها وزيادة”

“بس مين هيخدمك”

“ربنا يقدرنى وكلها شهرين بالكتير وارجع لطبيعتى ومكنش محتاجة حد”

“خلاص براحتك… انا كنت عايزك تبقى مرتاحة”

“انا كده مرتاحة اوى الحمدلله”

 

فى مكتب طارق…دخلت له السكرتيرة

“ا\طارق فيه ناس عايزين حضرتك”

“مين؟؟ موكلين جداد؟؟”

“لا واحد بيقول عايز حضرتك ويعرفك شخصيا ومعاه واحدة”

“خليه يتفضل”

وخرجت السكرتيرة ودخلت مع الضيوف

ودخل شاب ومعاه بنت واول ما شافهم طارق قام وقف

طارق”اهلااااااااا … ازيك يا محمود “

محمود”طارق باشا… اخبارك ايه”

طارق”الحمدلله انت فين من زمان…اتفضلوا”

محمود”اعرفك على راوية خطيبتى”

طارق”اهلا وسهلا”

راوية”اهلا بحضرتك”

محمود”مش قلتلك طارق صاحبى من زمان… اصلها مكنتش مصدقة يا سيدى”

طارق”لا ازاى محمود حبيبى من ايام الجيزة”

وضحكوا كلهم مع بعض

محمود”بص بقى ياطارق انا عارف انك مشغول ومش هعطلك.. انا جاى لك فى خدمة”

طارق”اؤمرنى… قتلت ولا سرقت”

محمود”ايه ياعم الفال الوحش ده… راوية خريجة حقوق ولما قالتلى انها عايزة تشتغل قلت مش هلاقى حد احسن منك تتمرن عنده”

طارق”بس كده…تحت امرها تنورنى”

راوية”بجد يا استاذ طارق… ده شرف كبير ليا”

طارق”ورينا شطارتك بقى واثبتى انك محامية شاطرة”

راوية”ان شاءالله ربنا يقدرنى واكون عند حسن ظن حضرتك”

محمود”متشكر اوى ياطارق مش هنعطلك اكتر من كده ونستأذن”

طارق”لا ازاى…انت منورنى”

محمود”لا معلش شوف شغلك انت ومتشكر اوى”

وقام محمود وراوية

راوية”اجى لحضرتك امتى”

طارق”لو عايزة من بكرة تعاليلى المحمة الساعة 9″

راوية”ان شاءالله بكرة الصبح هكون هناك”

 

فى بيت طارق وبعد مااتغدا هو وبسمة

كانت راجعة من المطبخ… شافها طارق

مسكت دماغها فجأة وحاولت تسند على اى حاجة جنبها

ملحقتش… قام طارق بسرعة وفى نطة واحدة لحقها قبل ما تقع وتتخبط فى الارض

بعد مافاقت بسمة وطارق جنبها

“ايه اللى حصل”

“دوختى تانى… مينفعش كده انا مش هعرف اسيبك لوحدك تانى”

“ليه بس ان شاءالله مش هتتكرر”

“وانا اضمن منين… انتى اتسرعتى لما مشيتى نجاة”

“طارق ارجوك متتكلمش فى الموضوع ده تانى”

“خلاص نشوف واحدة تانية”

“لا مش عايزة حد تانى خلاص”

“والحل”

“هروح اقعد عند ماما الفترة اللى جاية دى…واهو هانت خلاص”

“طب وانا …البيت عندكم مفيهوش مكان “

“خلاص اقعد انت كمان عند مامتك لحد ماربنا يحلها والايام اللى فاضلة دى تعدى”

“ايام ايه بس…لسه مش اقل من شهر”

“اهو هانت برضه”

“ماشى… ربنا يكملها على خير علشان نخلص بقى من وجع القلب والشحططة دى”

 

الحلقة 8

راحت بسمة عند مامتها

وراح طارق عند مامته

ورجعوا كل اللى بينهم مكالمات زى ايام الخطوبة

طارق رغم انه كان بيروح فى اوقات بسيطة فى بيت مامته

الا انه حس بانه غريب عليهم

خصوصا ان بسنت وايمن فى البيت

 

راوية مجتهدة جدا وعايزة تتعلم بسرعة

وكل ما طارق يطلب منها حاجة…تنفذها باسرع وابرع مايكون

وفى يوم دخلت له راوية المكتب

“ا\طارق محمود عايز يقابل حضرتك”

“اه…طبعا..خليه يدخل”

ودخل طارق

“السلاااااااام عليكم …ازيك ياطارق”

“اهلااااااا ازيك يامحمود”

راوية”استأذن انا علشان عندى شغل”

طارق”اتفضلى”

بعد ماخرجت راوية

محمود”على فكرة راوية مكنتش عايزانى اجيلك واعطلك… بس انا قلت لازم اسلم عليك قبل مااسافر”

“مسافر فين؟؟”

“مسافر فرنسا”

“شغل يعنى”

“مخبيش عليك انا مسافر سياحة وناوى اكسر فيزا واشتغل هناك اى حاجة”

“ليه كده يامحمود وتعيش مهدد”

“اعمل ايه بس… انا ورايا هم مايتلم المفروض اجيب شقة وعفش ويكون معايا قرش اتسند عليه”

“بس بالطريقة دى”

“مفيش قدامى طريقة غيرها”

“وهترجع امتى”

“مش عارف”

“وراوية”

“هى شايفة كل حاجة وموافقة على السفر … انا لو فضلت هنا مش هعرف اتجوز بوظيفة الحكومة اللى باخد منها 300جنيه”

“مش عارف اقولك ايه بس ده مش حل”

“مفيش قدامى حل تانى”

“ربنا يوفقك”

“يالا…اشوف وشك بخير ياطارق”

“ترجع بالسلامة ان شاءالله”

وقاموا سلموا على بعض وخرج محمود

 

كل جمعة طارق بيروح عند حماته يتغدا معاهم ويقعد شوية مع بسمة

فى تالت جمعة بعد الغدا… خرج البلكونة.. وجت وراه بسمة بالقهوة

“وحشتينى يا بسمة”

“وانت كمان ياطارق”

“نفسى ترجعى معايا البيت بقى”

“وانا كمان انت والبيت وحشتونى …بس هنا قاعدة وسط ماما واخواتى وكلهم مهتمين بيا انما فى البيت ببقى لوحدى”

“انا عارف وعلشان كده قلتلك مينفعش تقعدى لوحدك ببقى قلقان”

“يالا ربنا يهون ان شاءالله ونرجع البيت واحنا تلاتة”

“ان شاءالله …انا هرجع البيت لانى مكسوف اقعد عند ماما”

“ليه بس دول فرحانين بيك اوى”

“بس انا مش مرتاح… بقولك ايه ماتيجى ننزل شوية نتفسح كده ونغير جو”

“حاضر”

قامت بسمة تلبس وهى تعبانة بس مقدرتش تقول لطارق لا

نزلت معاه وقعدوا يتمشوا شوية بالعربية

“طارق انا زهقت من العربية… تعالى نروح نقعد فى حتة”

“حاضر”

واخدها اول مكان خرجوا فيه مع بعض

“يااااه ياطارق… فاكر لما جينا هنا يوم خطوبة بسنت”

“طبعا …اومال انا جبتك هنا ليه”

“احلى يوم فى حياتى لما قلتلى انك بتحبنى”

“وانا احلى يوم فى حياتى لما نرجع بيتنا ونعيش طبيعيين بقى”

“معلش ياحبيبى… احنا بنستحمل علشان البيبى اللى جاى”

“بس خلى بالك… لما ييجى اوعى تنسينى”

“وانا اقدر انساك ياحب ي ب”

“مالك يا بسمة… انتى بتقطعى كده ليه”

“كان عندى مغص وراح خلاص”

“تحبى نقوم”

“لو مش هيضايقك”

“لالا يالا بدل تعبانة”

“اااااااااااااااااااه…. تعبانة اوووووووووووى”

 

اخدها طارق على المستشفى بسرعة

والدكتور قاله انها حالة ولادة

اتصل طارق بحماته… اللى جت بسرعة

ومعاها هدوم البيبى وهدوم بسمة

وجت مامة طارق وبسنت

 

“حمدالله ع السلامة ياحبيبتى”

“الله يسلمك ياحبيبى…فين البيبى”

“البنوتة القمر فى حضن ماما مش عايزة تسيبها من ساعة ماخرجت من العمليات”

“عايزة اشوفها”

“حاضر”

“الله جميلة اوى”

“طبعا طالعة لمامتها… ربنا يخليكم ليا”

“ويخليك لينا ياحبيبى”

 

رجعت بسمة بيتها بعد ما استردت صحتها

ورجعت حياتهم طبيعية وحاولت بسمة ان اهتمامها ببنتها

ميأثرش على اهتمامها بطارق

فاتت الشهور… وحياتهم ماشية طبيعية

 

راح طارق مكتبه … وكان مكلف رواية بشغل مهم

واتاخرت راوية… وطلب السكرتيرة

“هى راوية فين”

“لسه مجتش”

“والشغل اللى معاها فين”

“معرفش يااستاذ”

“طيب اتصلى بيها ولو كانت تعبانة ولا حاجة تبعت الشغل اللى عندها علشان دى مصالح ناس”

“حاضر يااستاذ”

خرجت السكرتيرة ورجعت بعد دقايق

“استاذ طارق… راوية فى المستشفى ومامتها قالت لى انها فقدت النطق”

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: دينا عماد

 

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى