مسلسل زواج بالإكراه (العنيده والمغرور) الحلقة 9و10و11
الحلقة 9
لتدخل هى علي اخر جمله لينظر لها مروان ويوسف وياسين وف نفس واحد: يانهااار فوحلقي
مروان: ياسين انجدنى يا ياسين ابوس ايدك
ياسين: اثبت يا مروان وروح اقعد جمب حوريه ف الكوشه وانا هتصرف
يوسف: هتعمل ايه يا ياسين
ياسين: هنتصرف تعالي معايا يا يوسف
ويذهب مروان ليجلس بجانب حوريه ونظره معلق بها وهى تنظر له نظرات ناريه ومتوجهه ناحيته ليقابلها ياسين ويوسف
ياسين: تاليا..ايه النور ده
تاليا: اذيك يا ياسين..اذيك يا يوسف
يوسف: اذيك يا تاليا عامله ايه
تاليا: زفت يا يوسف…مش شايف صاحبك بيعمل ايه لا وانتو كمان اللي شاهدين عالعقد برضو
ياسين: اظن يا تاليا انتى عارفه اللي فيها وان مروان مغصوب عالجوازه دى وانه مش بايده يعنى
تاليا: عارفه يا ياسين وعارفه ان خطوبته النهارده عشان كدا جيت بس اللي ماكنتش اعرفه انه كتب كتاب كمان والبيه خبا عليا
يوسف: والله يا تاليا ماكان يعرف ولا احنا كمان كنا نعرف احنا كلنا كدا ع بعضنا اتفاجئنا بما فينا مروان وحوريه كمان محدش كان يعرف بالحكايه دى غير عمى مجدى وعمى سمير ابو حوريه
تاليا: والبيه هيتجوزها برضو بعد شهر زى ماقالي قبل كدا
ياسين: للاسف يا تاليا هو مضطر لكدا
تاليا بغضب: وانا…انا متجوزنى بقاله سنتين وبتحايل عليه يعلن جوازنا وكل مره يتحججلي بحجه شكل مره مش وقته علي اما امهدلهم ف البيت ومره الشغل واقف ومش فايق دلوقتى ومره تطلعلي واحده مااعرفش من انهى داهيه ويتجوزها بكل سهوله ويقولي اصل مغصووب عليها وانااا راكنى عالرف…قوله يا ياسين ان مش تاليا الجوهرى اللي يتلعب بيها الكوره والا قسما عظما عليا وعلي اعدائي وهقلب الترابيزه عالكل وبدل ماتبقي جوازه تبقي جنااازه انت فااااهم..وتتركهم وترحل
يوسف: اوووبس…تاليا مش باينها ناويه علي خير يا سينو
ياسين: باينها كدا ياجو
يوسف: طب هنعمل ايه دلوقتى
ياسين: مافيش ف ايدنا حاجه احنا هنقول لمروان اللي هى قالته وهو اللي هيعمل بقي
يوسف: هيعمل ايه ولا ايه تاليا من نحيه وابوه من نحيه وحوريه من نحيه الله يكون ف عونه والله
ياسين: طيب تعالي نروحله زمانه قاعد علي نار دلوقتى
ويذهبو له
مروان: ها يا ياسين عملتو ايه
ياسين: خلاص مشت يا مروان خليك انت بقي ف اللي انت فيه
مروان: مشت بسهوله كدا..لا ما اظنش اكيد ناويالي ع نيه سوده مانا عارفها
يوسف: شااااطر ماانت حلو اهو وبتفهمها وهى طايره قاابل بقي يا حلو
مروان: اااه مانا اللي جبته لنفسي وبصراحه استاهل كل اللي يجرالي
ياسين: احم رحم الله امرء عرف قدر نفسه يابنى والله..كويس انك عارف انك تستاهل كل اللي يجرالك
يوسف: بالحق يا مروان ابوك حجزلك انت ومراتك ف مطعم…..عشان تروحو تتعشو فيه بعد الفرح مايخلص
مروان: ماهو جه قاللي ياخويا وانتو واقفين مع تاليا
ياسين: الا صحيح يا مروان انت لبست الشبكه ولا لسه
مروان: هاا..تصدق لسه
ياسين: يخربيتك دا الفرح قرب يخلص انا مش عارف ازاى ينسو حاجه زى دى..اما اروح اجبها عشان تلبسها…ولم يكمل جملته ليجد سهيله اتيه عليهم وهى حامله للشبكه
سهيله: خد ياعريس لبس عروستك الشبكه يلا
مروان: ماشي ياسوسو عقبالك ياحبيبتى..ايدك ياعروسه
حوريه بضيق: وعاوزها ليه
مروان: يعنى هاكلها هلبسك النيله دى
حوريه: اووف خد
مروان: اللهم طولك يارووح….وبدأ يلبسها الشبكه ع اغنيه يادبله الخطوبه عقبالنا كلنا..وبعدها يذهب له مجدى وسمير
مجدى: يلا يا مروان خد عروستك يابنى وروحو اتعشو
مروان: حاضر يابابا
سمير: يلا يا حوريه مع جوزك
حوريه: جوزى مين؟
سمير: جوزك مروان هيكون مين يعنى
حوريه باندهاش: يلا معاه علي فين يا نهااار اسود يا بابا هو انا هروح معاه البيت هو انتو خلتوها دخله كمان لسه ف مفاجأت تانى ايه يابابا حرام عليك يا بابا حرام عليك
سمير: اهدى يابنت الدخله بعد شهر زى ماهى انا بقولك قومى روحى معاه عمك مجدى حجزلكو تربيزه ف مطعم…عشان تروحو تتعشو فيه
حوريه: اااه ..بس انا يا بابا مش جعانه وانت عارف انى معتش بتعشي وبعدين انا تعبانه وعاوزه انام
سمير بغضب: حوووريه قوومى مع جووزك
حوريه بصوت منخفض: بس ماتقولش جووزك
فسمعها مروان ويميل عليها: سمعتك ع فكره
حوريه وتنظر له: مابخافش ع فكره
مروان: مانا عارف انك مابتخافيش بس من هنا ورايح هتخافي
حوريه: من مين بقي ان شاء الله
مروان: هيكون من مين يعنى ..منى طبعا
حوريه: منك انت!! هخاف منك انت ليه ان شاء الله..مين انت عشان اخاف منه
فيمسكها مروان من يدها ويضغط عليها حتى تأوهت من الالم: صوتك يوطى وانتى بتكلمينى من هنا ورايح ولو علي انا مين عشان تخافي منه فانا جوزك ياهانم يعنى تنسي الطريقه اللي كنتى بتكلمينى بيها قبل كدا دى وتحترمينى ماااااشي
حوريه: ااااه سيب ايدى يا متوحش
مروان: برضو هنقل ادبنا ياست حوريه ماااشي هى كلها ايه يعنى شهر وتبقي ف بيتى وابدأ انا بقي اربيكى من اول وجديد اصل اظاهر باين عليكى ناقصه ربايه
حوريه: انا متربيه احسن منك 100 مره يابتاع انت ولو علي اللي ناقص ربايه يبقي انت
مروان: انا ناقص ربايه!!!! طيب ماشي قومى يلااا
حوريه وبدأت تخاف: علي فين
مروان: هكون واخدك علي فين يعنى عالمطعم قومى يلاااااا
حوريه: اوك اوك
ويذهبو لوالديهم
مروان: بابا انا ماشي
مجدى: ماشي يا حبيبي خلي بالك من حوريه
مروان وينظر لها: اومااااال وانا ليا مين غيرهااا
هويدا: ربنا يسعدكو يا حبايبي يارب
حوريه: ميرسي ياطنط
ناديه: وانتى يا حوريه خلي بالك من مروان وحطيه ف عينيكى يا حبيبتى
حوريه: ماما احنا رايحين نتعشي مش رايحين بيتنا
سمير: يلا يا بنت مع جوزك وياريت يا مروان ما تتاخروش بره كتيير
مروان: حاضر يا عمى …بعد اذنكو
وذهبو ليستقلو السياره فيفتح لها الباب الامامى فتتجاهله وتفتح الباب الخلفي وفجأه تجده يمسك بيدها
مروان: انتى هتركبي قدام جمبي هنا
حوريه: لا انا هركب زى ما بركب كل مره هركب ورا
مروان: ماهى المره دى غير كل مره انتى المره دى مراتى انتى فاهمه
حوريه بعصبيه: بس ماتقولش مراتى يابنى ادم انت الكلمه دى بتنرفزنى
مروان: والله دا الواقع لو تقدرى تغيريه غيريه
حوريه بحزن: ياريت اقدر ياريييت
مروان: امممم ياحراام صعبتى عليا…يلااااا انا مش هقف كتير كدا اركبي…فتنصاع له وتركب بجانبه ف الامام
وينطلق بالسياره ويظلو طوال الطريق صامتين الي ان وصلو الي المكان المقصود ويهبطو من السياره ويذهبو ناحيه المطعم وما ان دخلوه حيث وجدوه خالي تماما من البشر ووجدو فرقه موسيقيه تعزف عند دخولهم واشياء غريبه طائره ف الهواء مكتوب عليها مروان وحوريه مع رسومات عليها قلوب وورود وهكذا..فاندهشو مما يشاهدوه فذهب لهم مدير المطعم واستقبلهم بترحاب شديد جدا
المدير: اهلا اهلا استاذ مروان الف مبروك…الف مبروك يا مدام
مروان: الله يبارك فيك يا استاذ وائل..هو ايه الحكايه
وائل: ياسيدى مجدى بيه كلمنا امبارح وطلب اننا نحجزلكو المكان كله النهارده ونعمل اللي انت شايفه ده ونجيب كمان فرقه موسيقيه بكمنجات تعزفلكو طول ماانتو قاعدين…يعنى بمناسبه الخطوبه وكدا…ربنا يتمملكو بخير يا استاذ مروان
مروان: تسلم يا استاذ وائل احنا متشكرين جدا علي كل الحاجات دى وتعبكم معانا
وائل: لا شكر علي واجب حضرتك صاحب مكان
مروان: طيب ف ترابيزه معينه نقعد عليها كمان ولا ايه النظام
وائل: لا حضرتك تقعد ف المكان اللي انت عاوزه
مروان: ماشي متشكر اوى..بعد اذنك
وائل: اتفضلو
وذهبو ليجلسو علي الطاوله
مروان: اتفضلي اقعدى واقفه ليه
حوريه: مش عاوزه اقعد هنا
مروان: اوماال
حوريه: عاوزه اقعد علي دى…وتشاور علي الطاوله التى بجانبهم مباشره
مروان: وهى يعنى فرقت ايه ماهى دى لازقه جمبنا اهى
حوريه بعند: ماليييش دعوه…خلاص هفضل واقفه كدا ومش هقعد
مروان بنفاذ صبر: امرى لله واخد بنت اختى معايا باين..اتفضلي
حوريه: ميرسي
مروان: ايه قولتى ايه
حوريه: اييه قولت ميرسي
مروان: ايه ده انتى بتقولي ميرسي والكلام الرقيق بتاع البنات ده
حوريه: اومال..مش بنت ولا ايه
مروان: والله لحد دلوقتى ماعنديش اثبات ولا دليل واحد يثبتلي انك بنت رقيقه زى بقيه البنات
حوريه لتعانده: امممم نفس احساسي نحيتك بالظبط
مروان: اللي هو؟
حوريه: ماعنديش برضو دليل يثبتلي انك راجل زى بقيه الرجاله
مروان باندهاش: انتى بتقولي ايه
حوريه: زى ماسمعت
مروان بغضب: تحبي اخدك دلوقتى علي الفيلا بتاعتنا وهناك اعرفك اذا كنت راجل زى بقيه الرجاله ولا لا
حوريه مصدومه: انت بتقول ايه
مروان: لو ده هيثبتلك انى راجل انا مستعد
حوريه: انت سافل وحيواان
مروان: وانتى مش محترمه
حوريه: انا مش محترمه!!
مروان: لما واحده تقول لجوزها انت مش راجل تبقي مش محترمه ومش متربيه كمان
حوريه بغضب: مين قالك اصلا انك جوزى انا مش شايفاك جوزى ولا هشوفك جوزى مافيش واحده بتتجوز واحد غصب عنها وتبقي شايفاه جوزها عادى انا ابويا فضل متحكم فيا من يوم ماجيت الدنيا دى كنت عامله زى العرايس اللي بيلعبهم بايديه هو اللي يقولي اكل ايه واشرب ايه والبس ايه حتى الكليه اللي كان نفسي ادخلها منعنى انى ادخلها ودخلنى كليه الطب مع انى ماكنتش حباها بس هو كان بيحبها وانا بقي مش مهم طز فيا اولع المهم هو يكون مبصوت ..وتسكت لثوانى…وانا ف الكليه حبيت واحد زميلي وهو كمان كان بيحبنى اووى بس مستواه المادى ماكانش اد كدا..وهو كان مستعد يعمل عشانى اى حاجه كان بيخلص كليته ويروح يشتغل شغلانتين عشان يقدر يجيب حق الشبكه ويجى يتقدملي ولما يدوب جمع حقها بالعافيه جه وكان كله امل ان بابا يوافق بس ابويا ما اتوصاش وادهمله صح خلاه ماشي من عندنا وهو مش شايف قدامه وشايف الدنيا كلها سوده حواليه ولما وقفت قدام ابويا وقولتله انى عاوزاه وبحبه ضربنى…فنظر لها مروان باندهاش…فتكمل كلامها…اه ضربنى وحبسنى وقالي مافيش عندى حاجه اسمها عاوزاه وبحبه انتى هتجوزى اللي انا اختارهولك هتتجوزى اللي يجى علي مزاجى انا وانا بقي مش مهم..تقوم دلوقتى تقولي انك جوزى وانا مراتك باماره ايه..الجوازه دى كفيله تخلينى اكرهك واكره ابويا واكره نفسي العمر كله…كانت تتكلم ودموعها سائله علي وجنتيها
مروان وصعبت عليه حوريه: طب خلاص اهدى لو سمحتى ..ويمد يده ليمسح دموعها فتبتعد بوجهها بسرعه عنه
حوريه: ماتلمسنيش
وتعجب مروان من فعلتها: ف اييه..انا بمسحلك دموعك مش بعمل حاجه
حوريه: برضو ماتلمسنيش
مروان: ياااه للدرجه دى بتكرهينى
وتهز حوريه رأسها بالايجاب
مروان: وانا كمان بكرهك…بكرهك اووى
حوريه: عارفه ومتأكده كمان
مروان: طب ازاى اتنين بيكرهو بعض كدا بعد شهر هيعيشو مع بعض ف بيت واحد
حوريه بسرحان: مش عارفه….وياتى لهم النادل بالطعام فبدأو بتناوله ف صمت وينظرون لبعض من حين لاخر
************************
ف الفيلا
مجدى: يلا ياسمير هنمشي احنا بقي
سمير: ما لسه بدرى يا مجدى الولاد لسه ماجوش
مجدى: لا هما عرسان بقي يسهرو براحتهم انما انا راجل بنام بدرى ياعم سمير
سمير: هههههه ماشي يامجدى
هويدا: مش عاوزه حاجه بقي يا ناديه
ناديه: ايه يا هويدا ماانتو قاعدين معانا لحد الولاد ما يجو
هويدا: حلو اووى كدا بقي لان مجدى بيتعب لما بيسهر كتير وبعدين هو عنده شغل بكره لازم نروح والولاد يجو براحتهم بقي
ناديه: خلاص ماشي..عاوزين نشوفكو بقي وتنورونا ف اى وقت
هويدا: اكيد يا حبيبتى ان شاء الله
ناديه: عقبالك ياسهيله ياحبيبتى اما نفرح بيكى كدا
سهيله: ميرسي يا طنط
وبعد السلامت يغادر هويدا وناديه وسهيله المنزل
سمير: انا طالع اوضتى ارتاح يا ناديه مش هتطلعى
ناديه: لا ياسمير انا مستنيه حوريه لما ترجع
سمير: خلاص براحتك تصبحى علي خير
ناديه: وانت من اهله
وبعد وقت كبير تقف سياره مروان امام منزل حوريه
مروان: اتفضلي انزلي
حوريه: ميرسي عالعشا
مروان: العفو ..علي ايه يعنى دا بابا هو اللي عامل كل ده
حوريه: اوك…بعد اذنك
مروان: اتفضلي
وينطلق هو بالسياره
ناديه: انتى جيتى يا حبيبتى
حوريه: اه يا ماما انتى لسه صاحيه
ناديه: ماجاليش نوم الا اما اطمن عليكى وتحكيلي
حوريه: احكيلك ايه بس ياماما معلش نتكلم الصبح لانى تعبانه وعاوزه انام
ناديه: ماشي يا حبيبتى اطلعى ارتاحى انتى تصبحى علي خير
حوريه: وانتى من اهله ياقلبي
وتصعد حوريه غرفتها وتدخل المرحاض تستحم وترتدى ملابسها وتخرج تستلقي علي سريرها وهى تفكر فيما قالته لمروان ولماذا باحت له بهذا وبدأت تتذكر ما حدث لها منذ سنوات بسبب والدها
***********************
الحلقة 10
وتصعد حوريه غرفتها وتدخل المرحاض تستحم وترتدى ملابسها وتخرج تستلقي علي سريرها وهى تفكر فيما قالته لمروان ولماذا باحت له بهذا وبدأت تتذكر ما حدث لها منذ سنوات بسبب والدها
ف الجامعه وبالتحديد كليه الطب كانت تتواجد حوريه وبسنت مع مجموعه من الفتيات وكان يتحدثان ف مواضيع شتى
حوريه: يلا يابنات بقي نروح المدرج لان المحاضره قربت تبتدى وانتو عارفين الدكتور ده غلس ازاى واللي يدخل بعده ولو بدقيقه مابيخليهوش يحضر المحاضره
بسنت: اه صحيح ياحوريه علي رايك انا مش عارفه ده بقي دكتور من انهى زاويه يعنى
حوريه: هههههه بس بقي اصل الحيطان لها ودان مع ان مافيش حيطان حوالينا بس برضو الاحتياط واجب
سميه زميله لهم: ههههه عندك حق يا حوريه دا بتلاقيه يعرف مين اللي شتمه ومين اللي اتريق عليه ومين اللي مدح فيه منييين مااعرفش…عجيييب
حوريه: مش لو لقي حد يمدح فيه اصلا ههههه
البنات: ههههه
حوريه: طب يلا بينا بقي يا حلوين
وذهبو جميعهم الي المحاضره ومان دلفو للمدرج حتى دخل الدكتور ورائهم مباشره
بسنت لحوريه بصوت منخفض: شوفتى ياحوريه لو كنا اتاخرنا ثانيه واحده بس كانت المحاضره بخ
حوريه: اه يابسنت الحمدلله ربنا ستر…بص قدامك بقي لانه ابتدى
ولسوء حظ حوريه يعلن هاتفها عن اتصال من شخص ما وتنسي بان تضعه ع وضع السايلانت
حوريه لنفسها: يانهار اسود ومنيل انطردنا من المحاضره
وتوقف الدكتور عن المحاضره ليقول بعصبيه: تليفون مين اللي رن دلوقتى
لتتوتر حوريه لتقف وهى مرتبكه: اااا انا يادكتور دا دا دا تليفونى انا
الدكتور: انتى ياحوريه
حوريه بخوف: اسفه والله يادكتور نسيت اعمله سايلانت
الدكتور: طب اتفضلي خدى تليفونك وحاجتك واطلعي بره اظن انتو عارفين تعليماتى كويس..اتفضلي
حوريه وكادت ان تبكى لان تلك المحاضره كانت مهمه للغايه: يادكتور انا اسفه ومش هتتكرر تانى والله
الدكتور بعصبيه: قولت اتفضلي ومش هعيد كلامى تانى
لملمت حاجتها ف حزن وكانت تتبعها بسنت بنظراتها الحزينه وعيون اخرى هناك ع بعد امتار بسيطه كانت هى الاخرى تتبعها
خرجت من المحاضره وذهبت لكافتيريا الجامعه وهناك بدات بالبكاء علي احراجها امام زملائها وطردها بهذا المنظر المهين فهى حساسه بشده وهى ف قمه بكاؤها تجده امامها
حوريه من بين دموعها: احمد!!
احمد: ايوه يا حوريه
حوريه: احمد انت هنا بتعمل ايه وازاى سبت المحاضره
احمد: لا انا استنيت اما الدكتور قال الجزء المهم من المحاضره وكتبته ف الكشكول وسبت المحاضره وجتلك جرى عشان اديهولك
حوريه وتمسح دموعها: طب وسبت المحاضره ليه ماكملتهاش للاخر ليه يعنى
احمد بابتسامه: ماقدرتش اشوفك خارجه وانتى بالحاله دى واقعد انا كنت عارف انك هتفضلي متماسكه لحد ماتخرجى بس كنت واثق انك هتيجى هنا وهتعيطى
حوريه بابتسامه: وانت سبت المحاضره عشان تيجى تدينى الكشكول بتاعك
احمد: لا هو مش بتاعى هو بتاعك انتى انا جبت كشكول وكتبت عليه اسمك واى محاضره كانت بتفوتك كنت بكتبهالك فيه عشان اديهولك عالامتحانات تذاكرى منه ومافيش حاجه تفوتك وبم ان خلاص الامتحانات عالابواب ف ان الاوان انك تاخديه بقي
حوريه مندهشه: احمد..انت بتتكلم بجد
احمد: اومال يعنى بهزر ولو مش مصدقانى اتفضلي ياستى..واعطاها الكشكول وبالفعل وجدت اسمها مكتوب عليه ولكن داخل قلب قد رسمه احمد بيده ورسم بجانبه فتاه تشبه حوريه لا بل انها حوريه بالفعل وما ان فتحته حتى وجدت جميع المحاضرات التى فاتتها او كانت متغيبه عنها
حوريه غير مصدقه: احمد بجد انا مش مصدقه ومش عارفه اقولك ايه…ونظرت له بامتنان..انا متشكره اووى يا احمد
احمد بحب: متشكره علي ايه بس احنا زملا ومن واجبي نحيتك انى اهتم بيكى و و..وبمحاضراتك طبعا
حوريه بابتسامه ساحره: وياترى…بتهتم بكل زمايلنا كدا يعنى لكل بنت عندك كشكول واسمها جوا قلب كدا وصورتها مرسومه جمبه
احمد: احم اكيد يعنى لا
حوريه: امممم اشمعنى
احمد: عادى بقي
حوريه: لا مش عادى بقي
احمد: طيب انا هقوم اروح اشوف المحاضره خلصت ولا لسه
حوريه بابتسامه: اوك
وبعد وقت قليل جاءت اليها بسنت وجدتها شارده وعلي وجهها ابتسامه غير عاديه حتى انها تعجبت فقد اعتقدت انها تجدها عكس ذلك
بسنت: اهئ اهئ حوريه عااااااااااااااا
حوريه بخضه: ايه ف ايه ايه اللي حصل مالك يابسنت
بسنت: زعلانه عشاانك اصلك وانتى مطروده كنتى شبه نص الليمونه اللي ف باب التلاجه
حوريه: هههههههه
بسنت: ايه ده انتى بتضحكى..ياسبحاان الله دا لو الطرد بيعمل كدا انا هخلي تليفونى يرن عشان اطرد ع طوول واشوف هيحصلي كدا ولا لا
حوريه: ايه يا بسبس انتى هتحفلي عليا ولا ايه
بسنت: ولا هحفل ولا حاجه انا بس مستغرباكى عالعموم ياستى اتفضلي كشكولي اهو انقلي المحاضره عشان انتى عارفه انها مهمه وهيجى منها ف الامتحان
حوريه بابتسامه: تؤ مش محتجاه خليهولك انا معايا كل محاضرات التيرم اللي فاتتنى اهى…واخذت بسنت الكشكول وهى متعجبه
بسنت: ايه ده الكشكول ده فيه كل المحاضرات المهمه بتاعه التيرم لا ومكتوب عليه اسمك جوا قلب و. و. ايه ده مش دى صورتك اللي مرسومه عليه دى ياحوريه هى ايه الحكايه انا مش فاهمه حاجه
حوريه بضحك:تصدقي انا زيك كدا كنت عبيطه زمان بس انا النهارده بس عرفت واتاكدت
بسنت: اتاكدتى من ايه
حوريه: تعرفي مين اللي جه وادانى الكشكول ده
بسنت: مين هاا ميين
حوريه بابتسامه: احمد
بسنت: احمد مين؟…..احمد مهران زميلنا
حوريه: ايوه هو لقيته جه وادهولي ومشي
بسنت: اااااااه قولتيلي اتااريه بعد مامشيتى بشويه استأذن من الدكتور وخرج..اتاريه كان جايلك هنا بقي
حوريه بابتسامه: تصورى
بسنت بضحك: تصورت ياختى…لا وكاتب اسمك جوه قلب وراسم صورتك جمبهم
كمان
حوريه برومانسيه: دا طلع بيعرف يرسم حلو اووى
..اظاهر كان نفسه يدخل فنون جميله زيي بس ياترى ايه اللي منعه طب انا وبابا اللي منعنى هو ايه اللي منعه
بسنت: بس الحكايه دى فيها ان ياقطه انا احمد ده كنت ملاحظه عليه من فترات كبيره حاجات كدا بس ماكنتش برضي اقولك خالص
حوريه بتساؤل: حاجات زى ايه؟
بسنت: يعنى علي طول واحنا واقفين مع بعض الاقيه واقف بعيد يبص عليكى ولما ابصله الاقيه يتحرج ويمشي ولما ماكنتيش بتيجى كان بيجى ويسال عليكى ولما اقوله انك مش جايه كنت الاقيه يدايق كدا وساعتها يطلب منى انى مااقولكيش انه سال عليكى
حوريه: ليه يابسنت ماقولتليش
بسنت: ماكانش ف دماغى والله ياحوريه مااعرفش ان الموضوع كدا خالص
حوريه: احم كدا خالص ازاى يعنى
بسنت وتغمز لها: قال يعنى مش عارفه ازاى يعنى مش واخده بالك انه مهتم بيكى اووى وبيسال عليكى دايما وعينه دايما فضحاه
حوريه: اه بحس كدا فعلا
بسنت: بااااااااس الواد ياعين امه وقع وطب من زمان ولا حدش سمى عليه ههههه
حوريه: تقصدى ايه يابسنت بالكلام ده
بسنت: لسه البعيده مش عارفه اقصد ايه اقصد ياختى ان احمد بيحبك وبيحبك اوى كمان ها عرفتى اقصد ايه
حوريه باستعباط: ايه ده بجد الكلام ده..يعنى فعلا احمد ممكن يكون بيحبنى
بسنت:لا مش ممكن دا اكيد وبعدين ياحوريه بطلي السذاجه اللي انتى فيها دى
حوريه: مانا ماكنتش واخده بالي
بسنت: وخدتى ياختى
حوريه بابتسامه: ااه خدت
بسنت باستنكار: اقطع دراعى من لغلوغه ان ماكنتى انتى كمان كدا ومداريه عليا
حوريه: ها…دراعك ايه اللي هتقطعيه من لغلوغه اسمها لسانك
بسنت: سيبك من لغلوغي دلوقتى وماتوهيش..بت يارورو انتى بتحبيه؟
حوريه بكسوف: انتى عاوزه الصراحه
بسنت: لا بنت عمها
حوريه: بحبه من زمان اووى..انا كنت بلاحظ نظراته ليا وبصاته وعنيه وهو بيكلمنى بحس انه نفسي يقولي بحبك يا حوريه وانا كمان ببقي نفسي اقوله كدا بس كنت بعمل عليه مش عارفه..وابتسمت..بستعبط عليه يعنى..بس النهارده واللي عمله معايا ده حسيت انى اسعد واحده ف الدنيا دى كلها..انا بحبه اوى يا بسنت بحبه اووى
بسنت: يااااندله كل ده ومخبيه ع اختك
حوريه: خوفت اقولك تضحكى عليا
بسنت: ههههه هضحك علي ايه ياهبله دا انا هبقي مبصوته اووى وخصوصا ان احمد شخص محترم جدا والكل يشهدله بكدا وبنات كتير ااوى حاولو يكلموه ويصاحبوه بس كان بيرفض اتااريه كان حاطط عينه علي حد معين كدا وانا دلوقتى عرفت ميين
حوريه: ههههه مشكله انتى يابسبس
بسنت وتغمزلها: انا برضو…وظلو يضحكون سويا حيث قطع تفكيرها هاتفها وهو يعلن عن اتصال من مروان فتمسح دموعها وترد عليه
حوريه: الو…ايوه يامروان…لا كنت هنام..ها..لا مش بعيط ولا حاجه
مروان: ازاى وانتى صوتك مخنوق وباين عليه انك معيطه
حوريه: قولتلك يامروان ماكنتش بعيط خلااص
مروان: خلاص خلاص ياستى..انا وصلت وغيرت هدومى وكنت خلاص هنام فاجيتى ف بالي يعنى وقولت اتصل بيكى لان سايبك وانتى مدايقه من اللي قولتيهولي ف المطعم
حوريه: اه طيب متشكره اووى علي اهتمامك ده
مروان وحس انه بدا يلين امامها فغير نبره صوته: لا مش اهتمام علي فكره ولا حاجه دا يدوب تأديه واجب لانك بقيتى مراتى رسمى وربنا هيحاسبنى عليكى
حوريه واغضبت منه لانها احست انه بدا يحسن من اسلوبه معها ولكن يافرحه ماتمت: لا مؤمن اووى وعارف ربنا
مروان: اوماااال انتى فاكره ايه يعنى
حوريه: ماشي ربنا يقوى ايمانك يا مؤمن
مروان: اامين انا وانتى ان شاء الله….بقولك ايه صحيح
حوريه: يانعم
مروان: بابا لما رجعت كلمنى وقاللي ان انا وانتى عاوزين نبدأ نظبط الدور التالت للفيلا يعنى نغير فيه شويه ديكورات كدا ونشترى عفش جديد وتختارى الوان دهانات جديده لان يدوب فاضل شهر نلحق نجهز فيه الحاجات دى
حوريه بضيق: اعمل اللي تعمله مش فارقه
مروان: عاارف انها مش فارقه ولا فارقه معايا كمان والله بس انا كمان مش فاضي للتفاهات دى وانتى هتكونى مسؤله عنها
حوريه بضيق: تفاهاات!!!!! امممم طيب انا كمان مش فاضيه للتفاهات دى وورايا شغل وطبعا شغلي اهم من اى حد تانى وانت كمان وراك شغل خلاص يبقي خلي الشغاله اللي عندكو هى اللي تختار وتظبط التظابيط ماااشي
مروان: الشغااله!! انتى ليه دايما بتسخرى من كلامى وبتقلبيه ل…
حوريه: ل ايه انت اللي بدأت انت اصلا الواحد مايعرفش يتكلم معاك ف حوار من الاول للاخر بهدوء..انا تعبت وزهقت وقرفت انا كنت اموت نفسي وارتاح احسن ..ربنا يعدى الشهر دا علي خير وانا بعقلي قبل ما اتجنن
مروان: والله ماحد هيتجنن غيري دا ايه الجوازه الهم دى
حوريه: هى هم بس دى كل الحاجات الوحشه اللي ف الدنيا
مروان: للدرجه دى
حوريه بحزن: ما انت اصلك ماتعرفش احساس الواحده بيبقي عامل ازاى لما تتجوز واحد غصب عنها ..احساس وحش اووى واكيد انت بتجربه دلوقتى وعارف احساسي ده
مروان بضيق: انا هقفل عشان هنام..تصبحى علي خير
حوريه: وانت من اهله…وتغلق الخط وتعود بذاكرتها للوراء مره اخرى
***************
وتعود لمنزلها وهى فرحه للغايه وكانت تغنى هى دى هى فرحه الدنيا غنى ياقلبي ردى ياعنيا
ناديه: الله اكبر عالقمر بتاعى بيغنى ومزاجه حلو ربنا يسعدك ويفرحك دايما ياقلبي
حوريه بفرحه: مبصوته اووى ياماما
ناديه: ربنا يبصتك كمان وكمان ياحبيبتى
حوريه: انا طالعه اغير هدومى بقي واناااااام
ناديه: مش هتتغدى طيب
حوريه: لاااااا انا جعانه نوووم..سلام ياقمرر
ناديه: سلام يانور عينى
*********************
يوم اخر ف الجامعه كانت تجلس بصحبه بسنت وعيناها لا تفارق احمد الواقف عن بعد
بسنت: عينك هتطلع من مكانها اتهدى شويه بقي
حوريه: بس يابسنت اخرسي
بسنت: ياما نفسي اعيش قصه حب بس ماتكونش صامته زيكو كدا ..لا تبقي من العيار التقيل كدا يعنى اللي يشوفنا يقولنا ايه الحب ولع ف الدره ولا لسه ههههههه
حوريه: اوعدك يا بسبس وعد لو حصلا لاااازم اقولك الكلمه دى ولو بعد سنين
بسنت وكادت ان تبكى مثل الاطفال: حرام عليكى ياحوريه انا لسه هستنى سنين يعنى هو مافيش امل حاليا
حوريه: باينه كدا لاا يابسبس
بسنت: لا ماليش دعوه بقي عااااااا
حوريه: هههههه ياحرااام تصدقي صعبتى عليا
بسنت: طيب ياختى مايصعبش عليكى غالي انا قايمه راحه التواليت تيجى معايا
حوريه: لا انا قاعده
بسنت: قاعده ولا واقفه ههههههه
حوريه ببرود: غورى يا بسنت
بسنت: اوك…..وتذهب بسنت
حوريه: هههههه والله العظيم انتى بنت مشكله…وظلت تنظر لاحمد التى وجدته ياتى عليها فبدات دقات قلبها تتسارع وتعلو بشده
احمد: اذيك ياحوريه
حوريه: احمد…الحمدلله انا كويسه..انت عامل ايه
احمد: بخير طول ماانتى بخيير
حوريه: اتفضل يا احمد اقعد بسنت زمانها جايه
احمد: شكرا ياحوريه
حوريه: لا انا اللي المفروض اشكرك علي اللي عملته معايا
احمد: دى اقل حاجه ممكن اقدمهالك يا حوريه
حوريه: احمد ممكن اسالك سؤال
احمد: اتفضلي
حوريه: هو انت كان نفسك تدخل فنون جميله
احمد باندهاش: عرفتى منيين
حوريه مبتسمه: يعنى فعلا تخمينى طلع صح
احمد: صح….بس برضو ماقولتليش عرفتى منين
حوريه بابتسامه:اصل رسمك حلو اووى والابداع ده مايطلعش غير من فنان بجد…ماتستغربش كدا اصل انا كمان بعرف ارسم حلو اوى لانى كان نفسي ادخل فنون جميله
احمد: طب وايه اللي منعك تدخليها
حوريه وتذكرت يوم ما ان قالت لوالدها بانها تريد بان تلتحق بكليه الفنون الجميله
سمير: ايه فنون ايه وزفت ايه دا انتى جايبه مجموع يدخلك طب تقومى تقوليلي فنون جميله
حوريه: يابابا انا بحب الرسم جدا وهكون متفوقه فيها لانى بحبها لكن لو دخلت اى كليه غصب عنى اكيد هفشل فيها
سمير: بلاش كلام فااارغ من بكره تاخدى ورقك وتقدميه ف كليه الطب وانا بنفسي هاجى معاكى
حوريه بدموع: يا بابا…
سمير بجمود: انا قولت اييه خلااااص الموضوع انتهى…وتركها وحدها وغادر اما هى فظلت تبكى
احمد: معلش دا نصيب وبعدين طب مش وحشه اووى يعنى
حوريه: الحمدلله علي كل حال..وانت بقي مادخلتهاش ليه
احمد بابتسامه حزينه: انا ابويا وامى ناس علي قد حالهم مايعرفوش يعنى ايه فنون جميله ورسام والكلام ده هما مايعرفوش غير ان ابنهم يدخل كليه طب ويبقي دكتور اد الدنيا ويتباهو بيه قدام الناس كلها ويعرفوهم انهم عرفو يربو وبعدين ابويا وامى طول عمرهم بيحلمو ان اكون دكتور وانا بصراحه فضلت اجى علي نفسي وعلي حلمى واحقق ليهم حلمهم هما وابقي دكتور عشان ابويا يرفع راسه قدام الناس كلها
حوريه والدموع ف عينيها: انت عليت ف نظرى اووى يا احمد بعد كلامك ده
احمد: ربنا يخليكى يا حوريه
حوريه: لا بجد…ربنا يباركلك فيهم ويخليك ليهم
احمد: يارب….حوريه هو انا ممكن اقولك حاجه مخبيها عليكى بقالي فتره كبيره اووى..وانا بصراحه قدرت اكون شجاع واقولهالك وكفايه سكوت بقي لحد كدا
حوريه بكسوف: ها..اه طبعا يا احمد اتفضل قول
احمد برومانسيه: بحبك
حوريه باندهاش فانها لم تتوقع بانه سيفاجئها بهذه الكلمه الان: هاااااا
احمد: هاا ايه بقولك بحبك ومن زمان اووى كمان بس كنت متردد اقولك
حوريه: ومتردد ليه
احمد: يعنى انا فين وانتى فين المستوى الاجتماعى اللي مابينا ف فرق بينهم زى السما والارض
حوريه: شششششش ماتكملش يا احمد..انا اخر حاجه افكر فيها اللي انت بتقوله ده…انا اللي يهمنى ف الشخص نفسه اخلاق وطباعه وبره لاهله..هى دى الحاجات الاساسيه انما اللي بتقول عليه ده اخر حاجه افكر فيها يا احمد
احمد غير مصدق: يعنى ايه يا حوريه يعنى انتى….
حوريه وتخفض بصرها بكسوف: احمد انا..انا
احمد: هاا سامعك والله انتى ايه بقي..
حوريه وتنظر له بحب: بحبك
احمد بسعاده: ياااه انا مش مصدق نفسي ..الف حمد وشكر ليك يارب..حققتلي حلمى اللي كنت بدعي بيه دايما
حوريه: انا كنت بالنسبالك حلم يا احمد
احمد بحب: ايوه يا حوريه حلم وكنت بدعى بيه ليل نهار ان ربما يحققهولي انتى مش عارفه انتى ايه بالنسبالي يانورعينى
حوريه بابتسامه: عرفت..نورعينك
احمد: واكتر كمان
********************
وتمر الايام وتنتهى اختبارات اخر السنه ويتقابل احمد وحوريه داخل الجامعه
احمد: حوريه كنت عاوزك تاخديلي معاد من باباكى عشان اجى اطلب ايدك منه
حوريه: يا حبيبي يا احمد..اكيد طبعا…بس انت كنت فين انا ماشوفتكش من اخر يوم خلصنا فيه امتحانات
احمد بابتسامه: انا كنت بعد مابخلص محاضرات بروح اقف ف مطعم بشتغل فيه كاشير وبالليل بشتغل علي تاكسي عشان اقدر اجيب تمن الشبكه واجيلك وانا مرفوع الراس وفتره الخطوبه ان شاء الله ربك يكرمنا واجيب الشقه
حوريه ونزلت دموعها: كل ده عشانى يا احمد..مابتنامش ولا بترتاح عشان تقدر تجيبلي شبكتى
احمد: طبعا يا حبيبتى انا الحمدلله معايا مبلغ كويس جدا يقدر يجيب شبكه كويسه وان شاء الله الشقه هبدا احوشلها اول مانتخطب بس انتى ادعيلي
حوريه: بدعيلك يااحمد بدعيلك والله ربنا يقف جمبك ويرزقك دايما
احمد بابتسامه: ها اقدر اجيب الحاج والحاجه امته بقي
حوريه بسعاده: يا حبيبي يا احمد…انا هكلم بابا النهارده واخدلك منه ميعاد وهقولك عليه ان شاء الله ف الفون اوك
احمد: اوك ياقلب احمد
حوريه بابتسامه: بحبك
*******************
ف المنزل
حوريه: بابا كنت عاوزه اكلمك ف موضوع مهم
سمير: خيير
حوريه بتوتر: ف واحد زميلي عاوز معاد من حضرتك يجى يتقدملي
سمير:امممممم وزميلك ده اسمه ايه ابن ميين بيشتغل ايه
حوريه: اسمه احمد مهران وباباه اسمه سعيد مهران باباه موظف بسيط كدا ع اد حاله واحمد بيشتغل جمب الدراسه بص يابابا اما يجو انت هتتكلم معاهم وتعرف كل حاجه
سمير: ماشي ماشي خليهم يجو بكره
حوريه غير مصدقه: بجد يابابا
سمير: اومال بهزار انا طالع اوضتى…تصبحى علي خير
حوريه بسعاده: وانت من اهله
وذهبت مسرعه لتبلغ احمد بالمعاد وكاد يطير هو الاخر من السعاده
وجاء موعد المقابله وجاء احمد مع والديه الذي يظهر عليهم البساطه..فدخلت حوريه وسلمت عليهم وجلست بجانب والدتها وهى واحمد ينظرون لبعضهم بحب وعشق
سعيد: ها يااستاذ سمير قولت ايه..انا يشرفنى انى اطلب ايد بنتك حوريه لاحمد ابنى
سمير وهو يضع قدم فوق قدم: اممم قولتلي بتشتغل ايه يا استاذ احمد
احمد بتوتر: انا ياعمى بشتغل كاشير ف مطعم بعد مابخلص محاضرات وعلي تاكسي بالليل بس ده لفتره مؤقته بس لحد مااتخرج واتعين ان شاء الله
سمير: طيب انا عاوز شبكه لحوريه ب 100 الف جنيه والشقه تكون ف حى راقي دا غير العفش لازم يجى من بره والفرح يتعمل ف احسن قوتيل دا غير طبعا شهر العسل اللي هتقضوه ف باريس او لندن وطبعا مصروف حوريه ال 5000 جنيه ف الشهر..هاا تحب نقرا الفاتحه علي الاتفاق ده يا استاذ احمد
فتنظر حوريه لوالدها نظره كره فهى تعلم بكلامه هذا انه لم يوافق عليه ويريد ان يطفشه بكل زوق
فنظر والد احمد ووالدته له وكانهم يقولون له: رد انت بقي
احمد بخيبه امل: ياعمى انا لو اطول اجيبلها نجمه من السما مااتاخرش عليها بس انا ياعمى وضعى المادى مايسمحش بكل اللي حضرتك طلبته ده داانا يدوب عامل حسابي ان الشبكه تيجى ب 20 الف والشقه ربنا هيكرمنا واقدر ااجر واحده كويسه
سمير: هههههه ههههههه هههههههه شبكه ب 20 الف وشقه ايجاركمان…قوم يابنى قوم روح شوفلك واحده علي ادك واتجوزها وماتبصش لفوق يابابا…انتى بتجبلنا الاشكال دى منين يا حوريه
حوريه بغضب: بابا كفااايه ارجوك كدا كفاااااااايه اهانه لحد كدا
سمير بغضب: اخرسي يابنت واطلعي فووق وانت يااستاذ احمد انا ماعنديش بنات للجواز اتفضل مع السلاامه
فتنظر له حوريه وهى تبكى بدل الدموع دم فاخذ والديه وخرج ولم يعد ..اما هى فانهارت ودخلت المشفي وبعد ان فقدت الامل ف موافقه والدها ع احمد استسلمت للامر الواقع وفضلت بان تنساه للابد وبعدها بمده علمت بانه تزوج من ابنه عمه فانهارت ولكنها ارضت بالامر الواقع اما بعد 3 سنوات من ذلك الوقت ف سوبر ماركت وهى تتجول مع بسنت تلاحظ طفله بعمر العامين كانت تمشي ببطئ
حوريه: الله بصي يا بسنت البنوته الحلوه دى
بسنت: الله ماشاء الله..اسمك ايه ياقمر
الطفله: حوييه
بسنت: ايه اسمك ايه
الطفله وهى مبتسمه: حويييه
بسنت باستغراب: دى بتقول اسمها حوريه
حوريه: ياسلاام دا انا بتهيالي انا بس اللي ف مصر اللي اسمى حوريه..ليجدو شخص ينادى من بعيد..حوريه ياحبيبتى انتى روحتى فين
حوريه الصغيره: بابا…بابا
لتتصدم حوريه وبسنت من رؤيته وها هو الاخر يتصدم من رؤيتها
احمد بصدمه: حوريه!!
حوريه باندهاش: احمد!!
*******************
الحلقة 11
احمد باشتياق: اذيك يا حوريه
حوريه بحزن: الحمدلله اذيك انت يا احمد عامل ايه
احمد: الحمدلله ماشي الحال..اذيك يابسنت
بسنت: الله يسلمك يا احمد
حوريه: دى بنتك يا احمد
احمد وينظر لابنته ويبتسم: اه دى حوريه الصغيره
حوريه بحزن: حوريه!! سميتها حوريه
احمد: اه هى اصلا حوريه من الجنه اغلي شئ عندى ف الدنيا دى هى اللي بتهون عليا كل صعب واما بشوف ضحكتها بنسي كل همومى
حوريه بابتسامه: ربنا يخليهالك وتشوفها احلي عروسه ف الكوشه
احمد: ياارب…وانتى اخبارك ايه..اااا اتجوزتى؟
حوريه بابتسامه حزينه: لا ما اتجوزتش انا مش حاطه الموضوع ده ف دماغى خاالص احنا متخرجين من كام شهر بس وانا يدوب لسه بشتغل جديد وحابه شغلي جدا فاهركز فيه ومش هفكر ف اى حاجه تانيه غيره
احمد بابتسامه: حابه شغلك! مش قولتلك قبل كدا طب مش وحشه
لتنظر له حوريه نظره حزينه بابتسامه باهته وبصوت مبحوح: كان عندك حق ف كل اللي قولته
احمد: خلي بالك من نفسك يا حوريه
حوريه: وانت كمان يا احمد خلي بالك من نفسك
احمد: ان شاء الله ..بعد اذنك بقي اصل ريهام مستنيانى ف المحل اللي هناك ده ..وينظر لابنته ..حوريه يا حبيبتى قولي باى يلا بااى
الصغيره: ب اى..با ى
حوريه وتشاور لها بيدها: بااى يا حبيبتى بااى
وذهب احمد وذهبت معه جميع ذكرياته للابد..
بسنت: حوريه مالك
حوريه بحزن: ولا حاجه..وتطلق تنهيده..الله يسامحك يابابا..وتنظر لبسنت..يلا يا بسنت
بسنت: حوريه انتى لسه….
حوريه: لا يابسنت مش لسه ولا حاجه انا بس حنيت لذكرياتى معاه مش اكتر ..يلا ربنا يوفقه ويخليه لمراته وبنته ويسعدهم..احمد ماكانش نصيبي ونصيبي لسه ماجاش الله اعلم هو مين وهيجى امته..يلا بقي يا بسبس..وذهبو الي مكان ما اتو
فتفوق من شرودها وهى تجفف دموعها فتقول لنفسها: هو انا ليه قولت لمروان علي احمد وليه دلوقتى افتكرت ايامى وسنينى معاه معقول اكون……… لالالالا استغفر الله العظيم ..اكيد لا طبعا انا بس لما اقولت لمروان افتكرت ..بس برضو السؤال هنا ليه قولت لمروان حبيت اغيظه مثلا لالالا انا حبيت اعرفه انه مش اول واحد ف حياتى وانى كان ليا علاقه قبل كدا اه عشان ما اخدعهوش ونتجوز وهو عارف عنى كل حاجه..بس انا ليه برضو مهتمه انى اعرفه يمكن عشان متجوزاه غصب عنى او ابويا غصبنى عليه فاكنت عاوزاه يعرف انى كل حاجه ف حياتى بعملها غصب عنى دخلت الكليه غصب واتجوزته هو كمان غصب وحياتى كلها غصب…ااااااه ياااارب دمااغى هتنفجر لا انا انام احسنلي بدل ما الفيوزات بتاعتى تضرب من كتر التفكير يلا تصبحى علي خير يا انا…وبعد ان اطفأت النور وجذبت الغطاء عليها وبعد عده ثوانى تنتفض من مكانها وكأنها تذكرت شيئا ما وتقول لنفسها: ايه ده طب هو ليه اتصل عليا وكلمنى ايه ده يكون بيطمن عليا زى ما بيقول طب لو مش بيطمن ليه كان مصمم يعرف مالي وانه حس انى كنت بعيط ولما قولتله انت مهتم غير نبره صوته وقلب عليا وخلانى اقلب انا كمان ..وبعدها تضحك بسخريه..حتى مغرور وانت بتكلمنى ف التليفون بس انا لازم اكسر غرورك ده يامروان وهكسره ماتخافش..بعندى هكسره..ونشوف مين اللي هيكسب ف الاخر وقال بيقول عليا انا عنيده…انا عنيده وانت مغرور يابن العوامى هعع…وتسحب الغطاء مره اخرى وتذهب ف ثبات عميق
******************
اما عنده كان لازال مستيقظا يفكر فيما قالته
مروان بتفكير: اووف قفلتنى كل اما اكلمها لازم تعصبنى وتقفلنى منها..وهو انت لسه هتقفل منها يامروان مانت كدا كدا مقفول منها من اول ما شوفتها..بس هى ليه حكتلي عن العلاقه اللي كانت فيها زمان مع انى ما سالتهاش يمكن كانت هى حابه تحكى عشان ماتخبيش عليا حاجه بس ازاى وانا مش ف اولويتها من الاساس ..هو انا مالي بفكر فيها كدا ليه..يوووه اخرجى من دماغى بقي انا مش ناقصك…وهو ف قمه تفكيره ياتيه اتصال من تاليا فيقول..ييييه دا انا كنت نسيتك خاالص..هرد وامرى لله
مروان: الوو..ايوه يا تاليا يا حبيبتى
تاليا بغضب: حبيبتك…حبيبتك ايه يا ابو حبيبتك انت تعمل فيا كدا يامروان
مروان: حبيبتى ما انتى عارفه باللي هيحصل ده يعنى انا ما ضحكتش عليكى ولا حاجه
تاليا: لا ضحكت عليا قولتلي انها خطوبه بس لكن ما قولتليش انها هتكون كتب كتاب
مروان: طب وهى هتفرق ايه يا حبيبتى بدام كدا كدا الجواز بعد شهر وبعدين انا ماكنتش اعرف باللي هيحصل ده واظن ياسين ويوسف فهموكى كدا
تاليا: مرواان احذر منى يا مروان انا تاليا حبيبتك اه لكن وقت الغدر انا مااعرفش ابويا وعليا وعلي اعدائي وساعتها مش هتكون مروان حبيبي فاهمنى يا بابا
مروان شبه غاضب: انتى بتهددينى يا تاليا ولا ايه
تاليا: لا يا حبيبي مابهددكش ولا حاجه بس انا بحذرك انا بتكه صغيره ااااد كدا اقلب عليها واطيها وادينى حذرتك ياقلبي ودلوقتى الكوره ف ملعبك انت ..ياتعلن جوازنا يا اما تستحمل اللي هيحصل…سلام يابيبي
فيغلق الهاتف وهو ف قمه غضبه
بتهددنى ست تاليا هى ماتعرفش انا مين ولا ايه..طب كانت تقصد ايه لما قالت بتكه صغيره هقلب عاليها واطيها تكون ماسكه عليا حاجه بس هتمسك عليا ايه بس ااااه ممكن تكون تقصد الورقه العرفي اها ولا هتعرف تعمل بيها حاجه..بس برضو شكلها مش ناويه علي خير عديها يااارب..وبعدها يسحب غطاؤه هو الاخر ويذهب ف ثبات عميق
****************
تانى يوم ف مكان ما سنذهب له لاول مره
الشخص: الو ايوه يا باشا
الراس الكبيره(المجهول): ايوه يا حمدى هاا ف اخبار
حمدى: ايوه يا باشا جيلك باخبار سوقع
المجهول: هاا انجز
حمدى: مروان العوامى يا باشا
فاعتدل ف جلسته:ها ف اخبار عنه
حمدى: ف يا باشا..البيه امبارح كانت خطوبته وكتب كتابه علي دكتوره كدا شغاله ف مستشفي………..وابوها رجل اعمال صاحب شركه……ومشارك مجدى العوامى ف كذا مشروع كدا صغيرين
المجهول بسخريه: يعنى جبت الديب من ديل يا خى عادى اخبار عاديه واصغر عيل عندى يجبهالي
حمدى: لا ياباشا مانا الخبر اللي ماسكتش عليه الا اما اجيبه هو اللي سوقع بصحيح
المجهول: هاا اشجينى
حمدى:البيه متجوز عرفي من سنتين ومراته راحتله خطوبته امبارح وكانت هتقلب عاليها واطيها بس اصحابه لمو الليله
المجهول بسعاده: ايوه هو ده الكلام والاخبارالسوقع اللي بصحيح
حمدى: انت تؤمرنى يا باشا
المجهول: طب عرفت منين مين هى مراته دى
حمدى: ايوه يا باشا حصل هى واحده اسمها تاليا الجوهرى ابوها وامها مسافرين امريكا وملهاش حد تانى وهى والبيه اتعرفو علي بعض ف حفله وبعدها حبو بعض واتجوزو عرفي
المجهول: واكيد دلوقتى هى بايعه بقي ومش باقيه عليه بعد ماسابها وراح اتجوز
حمدى: لا يا باشا ماسبهاش هى لسه علي ذمته وهو معشمها انه هيعلن جوازهم وهى كانت عارفه بالخطوبه دى لكن ماكنتش تعرف انه كتب كتاب
المجهول بسخريه: موت ياحمار
حمدى: تمام يا باشا
المجهول: بص ياحمدى انا عاوزك ف خلال الشهر ده تجندلي تاليا دى عاوزها تبقي معانا لان اكيد هى عارفه عنه حاجات كتير وكل اسراره هى مش كانت مراته ولا ايه
حمدى: تمام يا باشا
المجهول: عاوزك تنفذ اللي قولتلك عليه هى اكيد هتنفعنا وكمان هى حاليا علاقتهم متوتره واحتمال تنتهى لا دا اكيد هتنتهى وهى هتكون عاوزه تنتقم منه فاتجيلنا بقي..هاا فهمت يا حمدى
حمدى: فهمت يا باشا
المجهول: خلاص روح انت شوف شغلك واى جديد تبلغنى بيه..الا قولتلي اللي البيه اتجوزها دى اسمها ايه
حمدى: اسمها حوريه ياباشا الدكتوره حوريه الشهاوى
المجهول: خلاص روح
حمدى: سلام ياباشا…واغلق الخط
المجهول لنفسه: اممم ماشي يا مروان اما نشوف اخرتها معاك اييه
وياتيه صوت انثوى من الداخل ينادى عليه بدلع: انت فين يا بشبوشتى ماتيجى بقي
المجهول: جايلك ياقمر…ويخرج من جيبه علبه حبوب زرقاء اللون ويبتلع واحده منها مع القليل من الماء ويذهب لها
*********************
عند حوريه ف المشفي
بسنت: يخربيتك يا حوريه ف واحده تروح شغلها تانى يوم جوازها
حوريه: انتى هبله يا بسنت جوازى ايه وزفتى ايه دى خطوبه بس افهمى بقي
بسنت:what ever يعنى برضو اسمك عروسه
حوريه: خلاص يا بسبس خلصنا
بسنت:………………………
حوريه: بسبس مالك متنحه كدا ليه
بسنت تظل صامته ولكن تشاور بيدها علي شخص ما اتى عليها
حوريه: ايه ده مش ده يوسف ابن عم مروان
بسنت بسرحان: اه هو
حوريه بطرف عينيها: ومالك متنحه كدا ليه
بسنت وتفوق من شرودها: ها لا ابدا لا متنحه ولا حاجه..بس تعرفي يا رورو يوسف فيه شبه كبيير اووى من مروان من بعيد تقولي دا مروان مش يوسف
حوريه: اممم فعلا ..مش ابن عمه بقي
وياتى يوسف بابتسامته الجذابه: السلام عليكم
حوريه وبسنت: وعليكم السلام
يوسف: اذيك يا حوريه اذيك يا بسنت
حوريه: الحمدلله
بسنت بكسوف: الحمدلله..اذيك انت يا يوسف
يوسف: كويس الحمدلله
حوريه: ف حاجه يا يوسف..تعبان ولا حاجه يعنى لاقدر الله
يوسف: لا ابدا انا كويس…انا بس كنت بزور واحد معرفه يعنى فا وانا معدى شوفتكو قولت اجى اسلم عليكم
حوريه: اها..الله يسلمك يايوسف
يوسف: ايه مش هتسالينى علي مروان ولا ايه
حوريه: بعد اذنك يا يوسف ورايا شغل..ابقي حصلينى يا بسبس اما تخلصي…وتركتهم وغادرت
يوسف: هى زعلت ولا ايه
بسنت: لا ولا زعلت ولا حاجه بس عشان انت جبتلها سيره مروان بس
يوسف: وهى سيره مروان بقت تزعل اليومين دول ولا ايه
بسنت: لا بس انت عارف اللي فيها بقي
يوسف: اه ربنا يهديهم ويحببهم ف بعض لانهم كدا كدا هيتجوزو فا حرام يتجوزو وهما مش طايقين بعض كدا
بسنت: فعلا..انا بدعيلهم والله علي طول ربنا يقرب مابينهم
يوسف بابتسامه: وابقي ادعيلي انا كمان والنبي
بسنت بكسوف: ادعيلك بايه طيب
يوسف: ان الاقي بنت الحلال اصل خلاص بقي عاوز اتأهل
بسنت: طيب حاضر هدعيلك هدعيلك…وتأتى لها صفاء
صفاء واللبانه ف فمها: داكتوره بسنت حضرتك دا معاد الحاله اللي هتمرى عليها دلوقتى
يوسف ف نفسه: اعوز بالله من الخبث والخبائث كان عندك حق يامروان لما قولتلي خلي بالك من صفاء وانا ماكنتش فااهم بس دلوقتى فهمت
بسنت: طيب يا صفاء انا راحه دلوقتى حالا….بعد اذنك يا يوسف
يوسف: اتفضلي…بس لازم نكمل كلامنا هاا
وتظل صفاء واقفه مكانها وتنظر له بهيمان بهيئتها هذه: هاا..هااا ايه تؤمرنى بحااجه يا اوستااذ الا حضرتك اسمك اييه
يوسف وهو يغادر: عبد الشكور…بالسلامه ياصفاء
صفاء بابتسامه واسعه: ياخوااتى عالجمال والحلاااوه
******************
عند مروان ف الشركه ياتيه مكالمه من والده
مروان: ايوه يا بابا
مجدى: ايه يابنى مهندس الديكور بيكلمنى بيقولي يبدا امته
مروان: يبدا وقت مايبدا يا بابا انا مش فاضي للكلام الفاضي ده
مجدى بغضب: كلام فاضي!! بقولك ايه يا مروان اتصرف الراجل عاوز يبدا شغله وعاوزكو كمان تبقو معاه مش انتو اللي هتتجوزو يابنى
مروان: خلاص اختار انت الديزاين اللي تشوفه كويس
مجدى: يابنى هو انا اللي هتجوز دا ايه النصيبه دى..كلم مراتك يا مروان وخليها تيجى تقف علي ايد البشمهندس هو مش ده المكان اللي هتعيش فيه لما تتجوزو ولازم تختار كل حاجه فيه بايدها
مروان: حضرتك كلمها انت وقولها كل الكلام ده بنفسك انا قولتلها وهى قالتلي انها عندها شغل ومش فاضيه اقولك يا بابا خلي الشغاله بتاعتنا هى اللي تختار
مجدى بغضب: اقفل ..اقفل يامروان بدل ما اتغابي عليك..وبعدها يغلق مروان الخط ويمسك بوجهه ويرجع راسه للوراء ليدخل عليه ياسين
ياسين: ايه ده ايه ده العريس ماله حاسك تعبان كدا اوعى ياض تكون اتهورت امبارح اصل انا عارفك ..ويغمز له..متوحش وتعملها
مروان: وحيات ابوك اكتم خالص مش فايقلك
ياسين:مالك ياعم العروسه معكره عليك ولا ايه
مروان بصوت عاالي: ياسييييييين
ياسين ويدور بوجهه: الا الواد يوسف فين هاا
مروان بضحك: نااس مابتجيش غير بالعين الحمرا..يوسف ف المستشفي
ياسين: بيعمل ايه ف المستشفي بيموت ولا ايه
مروان: هههه لا يااخويا راح يشوف بسنت
ياسين: الله هو لحق ولا ايه…بستغرب انا الناس اللي بتقع من اول نظره دى
مروان: عادى مانا وقعت ف تاليا من اول نظره برضوو
ياسين: تاليا دى انت لازم تخاف منها ياصاحبي دا شكلها كدا ناويالك علي نيه سوده مخططه باسود وفيها نقط سوده
مروان: ياعم ماتسودهاش اكتر ماهى سوده انت عارف انها كلمتنى امبارح بعد ماروحت
ياسين: وكانت عاوزه منك ايه دى
مروان: قال ايه بتهددنى لو مااعلنتش جوازنا هتقلب عاليها واطيها
ياسين: نفس اللي قالتهولنا انا ويوسف
مروان: تؤ مش عارف ليه حاسس انها ماسكه عليا حاجه بس برجع واقول مافيش غير الورقه العرفي اللي هى ماسكاها عليا
ياسين: اكيد هو ف غيرها تهددك بيها
مروان بتفكير: مش عاارف.. ويدخل عليهم يوسف وهو يهلل
يوسف: اس اس السلام عليكم
ياسين: ياااااااا ابو مزاج رايق عقبالنا يارب
يوسف: بطلو قر بقي
ياسين: لااا يا بابا انا مابقرش انا بحسد بس
مروان: هههههههه مش هتخلص منه…ها قولي عملت ايه
يوسف بهيمان: روحت وقبلتها وكلمتها لا ومش هى بس
مروان: ومين كمان
يوسف بخبث: وصفاء كمان ههههههههه
ياسين: هههههههههه صفااء صفااء هههههههه
لينظرو له يوسف ومروان باستغراب
مروان: انت تعرف صفاء يا ياسين
ياسين: هههههه صفااء صفااء هههههه..ويسكت بعدها….لا
ليلقي مروان ف وجهه بعض الاوراق التى كانت امامه : اومال بتضحك علي ايه يا اخى بتضحك علي ايه
ياسين بضحك: انا لقيت يوسف بيضحك قولت اكيد صفاء دى حاجه تضحك ههههه
يوسف: والله يا ياسين انت دماغك فل عشره ع عشره ههههههه
مروان: المهم قولي عملت ايه
يوسف: ولا حاجه روحت لقيت بسنت وحوريه واقفين مع بعض يدوب رميت السلام وبعدها حوريه مشيت واتكلمت مع بسنت شويه وعينك ماتشوف الا النور ولقيت صفاء جت بعدها خدتها ومشيت
مروان: واتكلمتو ف ايه بقي
يوسف: وانت مالك…غريبه والله هو انا بسالك انت وحوريه بتقولو ايه لبعض
مروان ويلوى شفتيه: حوريه اه…طب قومو يلا كل واحد يروح يشوف شغله مش فايقلكم….اه صحيح واحد فيكو يبقي يروح يقف مع مهندس الديكور عشان يظبط الدور التالت عشان لا انا فاضي ولا هى كمان فاضيه
يوسف: واحنا مالنا هو احنا اللي هنتجوز
مروان: يوسف انا بتكلم جد انا مش فاضي وحتى لو فاضي ماليش نفس يا اخى اقف مع حد ولا اعمل حاجه
ياسين: خلاص خلاص يايوسف خلاص يامروان انا هبقي اقف معاه وكمان هختارلك لون الدهانات ولو عاوز كمان انزل اجيب العفش مع عمى مجدى انا موافق
مروان: ياسلااام ايوه كدا الواحد يطلع منك بمصلحه وكمان انا عارفك زوقك حلو ف الحاجات دى…يلا ياسينو عقبال ما نتعبلك يوم فرحك علي ريناد يااارب
ياسين بهيمان: يارب ياميروو ياارب
مروان: طب يلا قوم ياض منك له قومو شوفو شغلكو يلا فاتحها قهوه انا
يوسف: خلاص ياعم ماتزقش
ياسين: يلا بينا ياجوو وسيبك منه واحكيلي عن صفاء شويه هى حلوه صفاء مش كدا
مروان بضحك: هههههه حلوه اووى ياسينو
..مابلااااش
ياسين: مالكش فيه
يوسف: اسمع كلامه هتندم
ياسين: لع
مروان: خلاص احكيله حتى اكلم ريناد تدخلي واحكيلها انا كمان
ياسين: لا ريناد لا..خلاص بلاها صفاء خلينا ف ريناد
مروان ويوسف: ههههههههه
**********************
وتمر الايام وينتهى ياسين من تجهيز الدور الثالث للعروسين من كل شئ من ديكور واثاث ودهانات حيث طبع لمسه سحريه ف كل مكان كان ياسين يبدع فيه كانه له واكثر
*****************
اما تاليا فطلبت مروان ف منزلها وذهب لها وتشاجران سويا شجارا عنيفاا جدا
مروان بغضب: يابنتى ارحمينى بقي قولتلك مش هينفع اعلن جوازنا دلوقتى انا فرحى كمان 5 ايام
تاليا: والله يامروان ان ما اعلنت جوازنا قبل ماتتزفت انت والتانيه دى والله لافضحك
مروان: تفضحى مين يا تاليا انتى نسيتى نفسك ولا ايه لا فوقي ياماما واعرفي انتى بتكلمى مين
تاليا: هكون بكلم مين يعنى واحد اتجوزنى علشان عجبته وعشان بيجرى ورا شهواته لولا كدا ولا كنت عبرتنى..والله يا مروان لافضحك وانا عندى اللي يفضحك يا ابن العوامى
مروان: انا اتجوزتك علشان كدا ياتاليا انا مش مصدقك بجد…انا اتجوزتك علشان حبيتك وحبيتك بجد لكن للاسف انتى ماتستاهليش حبي ده ياتاليا وعلي اللي انتى ماسكاه عليا وهتفضحينى بيه اهو…ويجرى ناحيه التسريحه ويخرج منها الورقه العرفي ويمزقها امام عينيها..اهو ادى الدليل اللي انتى ماسكاه عليا وبتذلينى بيه اهو اللي عندى اول ما اروح هولع فيها ..ارتحتى كدا
تاليا بصدمه: ايه اللي انت عملته ده انت اتجننت
مروان: لا دا انا عقلت…عماله تذلي فيا وتهددينى وانا فعلا كنت هعلن جوازنا بس مش دلوقت يعنى ماكنتش بخدعك او بضحك عليكى بس انتى اللي استعجلتى بقي
تاليا: انت قطعت الورقه بس انا لسه مراتك وعلي ذمتك يامروان
مروان: ياسلاام..طاااايب روحى يا تاليا وانتى طالق…كدا براءه مش كدا
تاليا باندهاش: لا مش مصدقه
مروان: لا صدقي وكدا كل اللي بينا انتهى كفايه عليكى بقي الشقه دى اللي انا كتبتها باسمك والمهر والشبكه اللي اديتهملك قبل مانتجوز واظن انى ماحرمتكيش من حاجه لا وكمان ركبتك عربيه اخر موديل وبرضو كتبتها باسمك
تاليا: انت بتعايرنى يا مروان
مروان بصدق: لا يا تاليا وانتى عارفه انى عمرى ماكنت كدا بس بعرفك انى ماجتش عليكى او ظلمتك ولو علي انى طلقتك انتى اللي اختارتى يا تاليا لما بداتى تهددينى مافيش واحده بتحب جوزها تهدده انا معتش بحس معاكى بامان ياتاليا
تاليا بشر: ماشى يامروان انت اللي اختارت
مروان: وانتى كمان يا تاليا اللي اختارتى ده…اظن خلاص كدا معادش فيه حاجه تربطنى بيكى..بتمنالك حياه سعيده بس بعيد عنى يا تاليا..ويخرج من جيبه مفتاح الشقه..وادى مفتاح الشقه اهو ومافيش نسخ تانيه معايا ..كدا خلاص ياتاليا
تاليا بتوعد: خلاااص يا مروان
*****************
عند حوريه
ناديه: حوريه…مروان كلم ابوكى عشان تروحو تشوفو الفستان والاوتيل اللي هتعملو فيه الفرح
حوريه: وهو جاى يشوف الحاجات دى قبل الفرح ب 5 ايام
ناديه: يا حبيبتى كلها حاجات بسيطه وسهله وهتخلص علي طول..وبعدين هو مااتكلمش معاكى من زمان هو ف ايه
حوريه بضيق: اوف..ولا حاجه يا ماما..قوليله خلاص بكره نروح نشوف الحاجات دى..ماشي
ناديه: ماشي ياعروسه اسيبك انا بقي..وتتركها وتغادر
حوريه وتلوى شفتيها: عرووسه..وتطلق بعدها تنهيده حزن…عروسه ايه بس يا ماما انا حاسه انى مش عروسه ولا فرحانه زى كل البنات حاسه انى مسجوونه ويوم اعدامى بعد 5 ايام يوووم فرحى
******************
تانى يوم كانت تاليا ف شقتها وكانت تخطط لشئ ما حيث رن هاتفها ليعلن عن اتصال من رقم غريب فترد
تاليا: الو
الشخص: الو…مدام تاليا
تاليا: ايوه انا.. مين
الشخص: محسوبك حمدى
تاليا: حمدى مين وعاوز منى ايه انت كمان
حمدى: تؤ تؤ لا ياهانم بالراحه علينا مش كدا هو عشان البيه طلقك وراح يتجوز واحده تانيه تقومى تطلعي غلك فيا ولا ايه
تاليا: ايه ده انت مين وعرفت الكلام ده منين
حمدى بضحكه شريره: هعهعهعهعه استنى منى مكالمه قريب سلام ياا..هانم هههههه
تاليا:الو الو انت يا.. حمدى الو الوووو يخربيييييتك..وبدات تخاف من ذاك الذي يعرف قصتها مع مروان وظلت ف توتر دائم طول اليوم
*******************
———–———-———————-————
ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقات القادمة
بقلم الكاتبة:سارة ماجد
