ترفيهمسلسل اشجان

مسلسل اشجان الحلقة التاسعة عشر والعشرون

الحلقة 19

استغربت اشجان وحكمت…وبصت اشجان لزينة

“طيب اتفقى معاه وشوفى هيجيلكم امتى بس بدرى”

وردت زينة على بهاء

“طيب يابابا هتيجى امتى… طيب كويس…مع السلامة”

وبعد ما قفلت

حكمت” لسه فاكر”

اشجان”طول ال3 سنين اللى فاتوا جالهم مرتين بس يمكن افتكر ان له بنات”

زينة”هييجى بكرة الساعة 5″

حكمت”ييجى… ماهو انتوا برضه ولاده ومنقدرش نقوله لأ”

وتانى يوم بعد المعاد بشوية…خبط الباب

واول ما الباب خبط … دخلوا حكمت واشجان الاوضة وقفلوا عليهم

وفتحت زينة الباب ومى واقفة جنبها

اول ما بهاء شافهم…. حضن زينة… وبوس بوس بوس فيها

وبعدين حضن مى… وبوس بوس بوس فيها

والبنتين مِسلمين خدهم ليه… وعادى جداااا بدون اى مشاعر

قعدوا مع بعض وقعد بسألهم عاملين ايه فى الدراسة

وانهم وحشوه اوى… ونفسه يشوفهم كتير

وبعد ماقعد ييجى ساعتين يتكلموا فى مواضيع عامة

قام… وطلع لكل بنت 50 جنيه… وقالهم انه هيبقى يشوفهم تانى

وقال لزينة انه هيعدى عليها وهى راجعة من المدرسة بكرة

وبعد ما مشى

دخلوا البنات الاوضة لحكمت واشجان… وحكوا لهم

حكمت” 100 جنيه؟؟ هى الحداية بتحدف كتاكيت”

زينة”وقال انه هييجى ياخدنى من المدرسة”

حكمت”يامصيبتى ليخطفكوا”

زينة”يخطف مين… هيخطفنى وانا كبيرة كده”

اشجان وهى بتضحك”صحيح ياماما هيتفق معاها علشان يخطفها هى ههههه اللى ماعملها وهما صغيرين هيعملها دلوقتى”

حكمت”انا عارفة بقى… اومال ايه التغيير المفاجئ ده”

اشجان”الله اعلم بقى”

وتانى يوم راح لزينة قبل انتهاء اليوم الدراسى

ودخل المدرسة وقابل المدرسين اللى بيدرسوا لها

واتكلم معاهم وسألهم عن مستواها… واخدها ومشيوا

بعد ما خرجوا..اخد ايدها فى ايده

“انتى بقيتى طولى يا زينة… دلوقتى الناس يقولوا شوفوا البنت اللى مزوغة من المدرسة وماشية مع الواد بتاعها”

“هههه انت اللى قصير وبعدين الناس من ضهرك هيفتكروك صغير انما من وشك باين عليك سنك طبعا”

“وشى اللى زى القمر ده يقولوا عليا كبير”

“اعوذبالله… قمر مين انت عايش فى الدور”

“والله الناس كانوا بيبرقوا من شياكتى ووسامتى”

“ده زمان قبل ما شكلك يتغير كده”

“ياااااااه يا زينة كبرتى بسرعة”

“مش بسرعة ولا حاجة انت اللى محسيتش بينا ابدا لا واحنا صغيرين ولا واحنا بنكبر”

“انا خلاص هعوضكم عن اللى فات ده لانكم اتظلمتم وانا السنين اللى فاتوا دول ربونى بجد”

“ربوك ازاى”

“انتى بتستقلى لما اكون قاعد فى بيت امى ومعايا فى البيت اختى وجوزها وعيالها وكل واحد له بيته ومراته وعياله وانا كده لوحدى”

“مش انت السبب فى كده ولا احنا”

“ماانا اخيرا فوقت لنفسى وبطلت شرب… وبقيت احسن”

“خير والله”

“بقولك ايه الجمعة الجاية اجهزوا انتى ومى واخدكم نقضى اليوم مع بعض”

“ماشى”

 

لما رجعوا يوم الجمعة من الخروجة…. كانوا مبسوطين جدا

وقعدوا يحكوا لحكمت واشجان

مى”ماما احنا النهاردة اتفسحنا فسحة حلوة اوى”

زينة”اول مرة نحس اننا مبسوطين كده”

حكمت”وداكوا فين”

مى”روحنا الملاهى واتصورنا فى استوديو التنكر… واتغدينا وبعدين ركبنا حنطور واتفسحنا كتير”

زينة”وهو بيوصلنا ادى كل واحدة فينا 50جنيه”

حكمت”وايه حكاية الخمسينات اللى ظهرت دى”

زينة”ماهو بطل وعلشان كده بقت معاه فلوسه عادى واهو بيصرفها علينا”

حكمت”وانتى بتدافعى عنه كده ليه”

مى”علشان هو ابونا”

حكمت”دلوقتى ابوكم… مش ده اللى راميكم من زمان”

مى”وبقى كويس…انتى زعلانة ليه بقى”

حكمت”سامعة ياست اشجان… بنتك طلع لها صوت وبقت بترد عليا”

اشجان”ماهو ابوهم ياماما برضه”

حكمت”ايوه… لازم تعومى على عوم بناتك… قويهم عليا”

اشجان”بس يا زينة… بس يامى”

زينة”بس ايه ياماما مش شايفة عمالة تتكلم على بابا ازاى… واحنا ماصدقنا انه بقى كويس وفرحنا”

حكمت”ضحك عليكوا خلااااص”

اشجان”بس بقى يا زينة… بس يامى”

حكمت”هو ده اللى قدرتى عليه…بلا نيلة على تربيتك بكرة بناتك دول يوروكى الويل ومش هتقدرى عليهم”

اشجان”ليه بس كده… ده هما اللى طلعت بيهم من الدنيا… بتدعى عليا فيهم”

وقامت حكمت…اتقمصت… اتغطت بالبطانية كالعادة… وممنوع الكلام… ومخاصمة اشجان والبنات… ايااااااااااااااام

 

وكان تواجد بهاء فى حياة البنات مضايق حكمت جدا

وسيرته سبب مشاكل

اما اشجان فكانت شايفة ان مش من حق حد انه يحرمهم من ابوهم بعد ما افتكرهم

وفى يوم واشجان خارجة من الشغل… لقيت بهاء واقف مستنيها

عملت نفسها مش شايفاه… ومشيت

“اشجان… اشجان استنى”

“نعم”

“ازيك”

ومد ايده يسلم عليها… سلمت وسحبت ايدها بسرعة

“عاملة ايه يا اشجان”

“انت عايز ايه؟”

“نروح نقعد فى اى مكان نتكلم كلمتين”

“مفيش بيننا كلام خالص”

ومشيت اشجان ومشى بهاء وراها… وبعدين جنبها

“طيب اسمعينى بس”

“نعم”

“انا اتغيرت خالص والله… وبطلت ادمان واتعالجت”

“لنفسك مش ليا”

“وليه ميببقاش ليكى وليا ولولادنا… ونرجع لبعض تانى”

“وانا اتجننت علشان ارجع اعيش معاك تانى… دى عِشرتك سودة وايامك كلها سواد اللى مافاكرة لك يوم عِدل”

“وان الاوان اننا نعوض اللى فات… جربينى”

“وانا لسه هجربك”

“طيب احلفلك على المصحف انى اتغيرت وبقيت واحد تانى”

“ولا تحلف لى ولا احلفلك”

“انتى اكيد خايفة من مامتك ومن على”

“انا مش خايفة من حد”

“لا انا عارف انك بتخافى منهم ومش هتقدرى تقوليلهم اننا نرجع لبعض”

“انا اللى مش عايزة ارجع لك تانى”

“طيب خدى الضمانات اللى انتى عايزاها… اؤمرينى وانا لو منفذتش اى شرط يبقى انا مستاهلكيش”

“انا لا عايزاك ولا عايزة ضماناتك”

“طيب جربينى”

“مينفعش كده بقى… انا ماشية واوعى تيجى ورايا”

ومشيت اشجان… وكل يوم نفس بتلاقى بهاء قدام الشغل

ويتكرر الحوار نفسه كل يوم

وترجع اشجان تلاقى مشاكل حكمت والبنات…كل يوم

وبدأت اشجان تفكر من كتر الزن على ودانها…ومعاملة مامتها الشديدة من جهه تانية

واستغلت فرصة كانت هى والبنات مع بعض… وفتحت معاهم الموضوع وانها بتفكر… لقيت البنات بيأيدوها جدااا

وراحت لفاطمة تاخد رأيها ورأى جوزها..لانه بيشتغل مع محامى

وبعد ما حكت لهم

فاطمة”بصى يااشجان بدل كده كده مامتك رافضة جوازك وانتى لسه صغيرة يبقى ترجعى لبهاء احسن بعد ما تاخدى عليه شروط وضمانات”

اشجان”والله يافاطمة انا بقول نار بهاء ولا جنة ماما وشدتها معانا”

فاطمة”ايه رأيك ياابو تامر… ايه الشروط اللى تضمن بيها حقها”

ابو تامر”هكتبلها قايمة كويسة وتخليه يمضى عليها…ووصولات امانة علشان لو عمل اى حاجة تخوفه بيهم”

طيب هفكر تانى برضه

وبعد ما رجعت اشجان قعدت مع زينة

“ماما خدى كل الضمانات اللى تطمنك”

“بصى انا هقوله شروط كبيرة علشان انا عارفة انه مش هيقدر ينفذها وتبقى جت منه بدل الزن اللى عليا…ولو عملها يبقى ماشى”

“ايه الشروط دى”

“يجيب شبكة وعفش ويوضب الشقة ويمضى على قايمة ووصولات امانة ب 10الاف جنيه…والعصمة تبقى فى ايدى”

الحلقة 20

تانى يوم لما راح لها بهاء عند الشغل…كالعادة

قالت شروطها كلها

“انا موافق على كل شروطك…الا موضوع العصمة ده”

“ليه”

“وهو انا مش راجل علشان تبقى العصمة فى ايد مراتى”

“وهو انا عبيطة علشان ارضى ارجعلك تانى… ده اهم شرط علشان يوم ما الاقيك رجعت تانى لعمايلك يبقى كل واحد يروح لحاله من غير وجع قلب”

“طيب لو ده اللى هيضمنلك انى اتغيرت انا موافق”

“يعنى كل الضمانات اللى قلتها هتنفذها”

“كلها بس اقفى معايا وكل حاجة هتبقى على ايدك… هاااا اتكلم مع على ولا هتكلميه انتى”

“لا استنى اما اتكلم انا الاول”

ولما رجعت اشجان من الشغل

ومامتها فى المطبخ بتحضر الغدا

والبنات معاها وهى بتغير هدومها

“انا هفتح مع ماما موضوع رجوعى لباباكم وربنا يستر”

وحكمت جت عليهم بسرعة

“انتوا سايبنى فى المطبخ وقاعدين تتودودوا هنا”

اشجان” انا جاية اهو”

وراحت ورا مامتها… وبعد ما خلصوا غدا

“ماما… بهاء عايز نرجع لبعض”

حكمت”يا مصيييييييييييييييييييييبتى انتى مفيش فايدة فيكى”

اشجان”فى ايه ياماما”

حكمت”عايزة ترجعيله علشان يموتك”

زينة” بتزعقى ليه واحدة وعايزة ترجع لجوزها”

حكمت”وانتى مالك بتتكلمى ليه”

زينة”علشان الموضوع يخصنا انا ومى مع ماما مش ماما لوحدها”

اشجان”وانتوا عايزينه”

مى”ايوه …ابونا ونفسنا نعيش كلنا زى كل الناس اللى عايشة مع مامتهم وباباهم”

حكمت”نسيتوا… اااااااه صحيح ده انتوا معندكوش اصل زى ابوكوا”

مى”انتى بتشتمينا ليه؟؟وبتشتميه كمان…احنا عايزينه”

اشجان”يعنى انتى ياماما قلتى متجوزش علشان البنات ولا عايزانى ارجع لابوهم”

حكمت”ايوه… ربى بناتك وخلاص… ولا انتى حنيتى له”

واتضايقت اشجان من طريقة مامتها اللى مفيهاش اى احساس بيها نهائى… وبتحكم عليها انها تعيش مطلقة طول حياتها

علشان تفضل تتحكم فيها وفى بناتها… وردت اشجان

“عموما انا خلاص قررت انى راجعاله… وقلت له على شروط جامدة وهو قال هينفذها حتى لو رجع وحش تانى “

“انا لاااااااااازم اكلم اخوكى ييجى يشوف عملتك السودة دى”

“ياااااااااه بعد كل ده لسه بتتعاملى معايا على انى لسه عيلة صغيرة واخاف من اخويا… قوليله ماهو كده كده لازم كنت هقوله”

مى”انتى ليه بتكرهى بابا كده؟؟”

حكمت”بكرهه من اللى عملوا فيكوا… هو رماكم وانا اللى ربيتكم”

زينة”بس برضه هو ابونا واحنا اتحرمنا منه ونفسنا بقى يعوضنا”

حكمت”ضحك عليكوا خلاااااااااص… لف دماغكوا وكرهكوا فيا”

مى”احنا بنحبك وبنحبه”

حكمت”يالا روحى وان شاءالله هيبهدلك وترجعى تانى”

زينة”حتى لو بهدلها مش جايين هنا تانى”

حكمت”يا قللاة الادب انتوا وامكم اللى معرفتش تربيكم”

اشجان”ادعى عليا واشتمينى…ماهى طريقتك دى اللى خلتنى اوافق ارجعله”

حكمت”انا…خلاص قلبكوا عليا..ربنا ينتقم منكم زى ما بتحرقوا دمى”

ودخلت…واتقمصت وخاصمتهم اياااااام

وجه على… وكان رده مش مختلف كتير عن رد حكمت ولكن باسلوب اعقل واحكم من حكمت

بمعنى ادق بيرفض… وبيحاول يقنع اشجان برفضه

ولكن كانت اشجان والبنات اتشحنوا من كلام واسلوب حكمت

وده اللى زود اصرارهم على موقفهم…والموافقة على الرجوع

“خلاص يااشجان…انتى حرة…بس متجيش تقولى الحقنى انا وقفت جنبه فى علاجه قبل كده ورجع تانى وانا بقولك دلوقتى اكيد هيرجع تانى…بس خلاص انتى وولادك عايزينه مليش دعوة”

“انا اشترطت عليه انه يجيب شبكة وعفش جديد ويوضب الشقة ويمضى على قايمة ووصولات امانة ب10 الاف جنيه والعصمة تبقى فى ايدى”

واستغرب على

“بجد؟؟؟وقالك ايه؟؟”

“وافق على كل الشروط دى”

“خلاص يمكن يكون اتغير فعلا… ربنا يهديه”

 

واتفقت اشجان مع بهاء ان مفيش اى حاجة هتتم الا بعد ما ينفذ شروطها

وقابل على واتفقوا على كل حاجة… وطالبت اشجان المؤجرين انهم يسيبوا الشقة خلال شهر… وكانت بتتقابل هى وبهاء والبنات كتير

“بص يا بهاء انا برضه لسه قلقانة منك…وعلشان كده انا سألت المحامى وقالى انى ممكن اخد التفقة عادى بعد مانرجع.. يعنى مش هتنازل عن النفقة”

“ولا يهمك…ماهو كله لولادنا…ومش هكدب عليكى انا مش معايا فلوس غير يدوب مرتبى فانا هاخد قرض من الشغل واجيبهولك لحد عندك”

“ماشى”

وتانى يوم راح بهاء الشغل واتصل بيها فى شغلها

“اشجان قابلينى دلوقتى حالا فى الشغل عندى”

“ليه”

“فيه كلام عايزك تسمعيه بنفسك”

“طيب جاية”

ولما راحت اشجان عند بهاء فى الشركة… اخدها لموظف فى الشئون المالية وهو بيقولها.. لما جيت اقدم على القرض تعالى اسمعى… وقال للموظف تانى

“الشروط ايه يا ا\ عبده”

“انا قلت لك يا بهاء مينفعش اى قرض وانت بيتخصم منك نفقة… انما لو اتلغت النفقة ممكن تاخد القرض”

بهاء”ممكن اخد 5الاف جنيه”

عبده”اه ممكن”

وخرجوا من المكتب

“سمعتى بنفسك علشان متقوليش انى بكذب عليكى”

“سيبنى افكر يا بهاء”

وقعدت اشجان يومين تفكر…بس البيت جحيم بسبب معاملة مامتها لما عرفت انها خلاص راجعة لبهاء…المشاكل زيادة عن المعتاد

راحت اشجان وبهاء اتنازلت عن النفقة… وعملوا اجراءات القرض مع بعض… وعرفوا ان الصرف بعد كام يوم

فى معاد صرف القرض…معرفتش اشجان تروح مع بهاء لانها كان عندها شغل … وراح بهاء صرف الفلوس

واتصل بيها فى الشغل

“ايوه يااشجان…انا صرفت الفلوس دلوقتى بس مش 5الاف جنيه نقدى انا اخدت 3500 وقالوا الفرق ده فوايد لازم تتخصم”

“اه ماانا عارفة ان فيه فوايد”

“طيب انا مش عايز امشى بالفلوس كده مش هتاخديهم”

“معرفتش استأذن خالص… زينة فى البيت روح اديها الفلوس”

“حاضر”

وفعلا بعد نص ساعة اتصلت بيها زينة وقالت

“بابا ياماما جال 3500 جنيه…هو مش الفلوس المفروض 5الاف”

“دى فوايد يا زينة بتتخصم… خلى الفلوس معاكى لحد ما اجى”

 

وكانت اشجان بتنزل مع زينة ومى وبهاء…علشان يقرروا هيرتبوا نفسهم ازاى

بهاء”بصى بقى يااشجان الفلوس دى مش هتكفى كل اللى انتى عايزاه”

اشجان”ماهو ده المتوقع انك ترجع فى كلامك”

بهاء”اصبرى بس… انا اقصد اننا كده هنضطر نجيب العفش بالتقسيط”

اشجان”انت مش مرتبك كبير ومش هيتخصم منك غير القرض بس”

بهاء”ايوه طبعا… يكفى من وسع… هنكتب الكتاب امتى”

اشجان”مفيش كتب كتاب الا لما كل حاجة تخلص”

بهاء”حاضر”

وكان كل التصرف بايد اشجان… الفلوس معاها وهى مقيدة بالمبلغ ومكنش قدامها غير توضيب بسيط للشقة مش زى ماكانت بتتمنى… وجابت غويشة شبكة… وجابوا اوضة نوم وانتريه ودفعت المقدم من باقى الفلوس ومضى بهاء على القايمة وعلى وصولات الامانة… وتم كتب كتابهم والعصمة فى ايد اشجان

واتفقوا انهم هيتنقلوا لشقتهم بعد 3 اسابيع…تكون زينة خلصت امتحانات 2ثانوى…صيف 1996

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: دينا عماد

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى