مسلسل “الست ذكية” الحلقة الثالثة والرابعة

“يوميات الست ذكية (3) “
********
********

ذكية الزوجة المثالية قاعدة على النت من الصبحية

وجوزها بيدور عليها

تعالوا شوفوا عملت ايه النهاردة

ذكية

نعمين يا عبد الصمد

بتعملى ايه

بشيت عقبال امالتك

وقمصانى فين

ماشوفتهومش النهاردة

هو انا بسألك عن ولاد اختك

مين بتقول ايه يا عبد الصمد

يا ستى ادينى وشك وركزى معايا

خير يا عبد الصمد

قمصانى فين

فى الغسيل يا اخويا

ومتغسلوش ليه

حاضر هبقى اغسلهم

ولحد ما يتغسلوا هلبس ايه

ما انت لابس اهو والحمد لله

القميص اللى انا لابسه زى الطين

وانت مش تحافظ على هدومك نظيفة يا عبد الصمد

المهم هعمل ايه دلوقتى

اتصرف يا عبد الصمد البس اى حاجة

يعنى هلبس عباية من بتوعك يا ست

لا حول ولا قوة إلا بالله يعنى ايه لزوم التريقة دى

بجد أنا فوضت أمرى فيكى لله

يا شيخة اتقى الله خافى من ربنا حرام عليكى

جرى ايه يا عبد الصمد ايه اتقى الله وخافى من ربنا دى هو انا واكله مال يتامى يا راجل

بجد كان يوم اسود يوم ما دخلتلك النت فى البيت

يا سلام ! ال على رأى المثل النت لو مش فى البيت القطن يهرب من الغيط

لاء ولا انتِ الصادقة الست اللى على النت طول النهار لا تنظف بيت ولا تعمر دار

انت عايز ايه با عبد الصمد دلوقتى

يا هانم انا ما منعتكيش من النت لكن المفروض تحددى ساعتين بس مش طول النهار

انت بجد راجل غاوى مشاكل يعنى انا عملت ايه دلوقتى هو انا كنت روحت ولا جيبت فى حتة علشان تزعل

انا قاعده كافية خيرى شرى فى بيتى وفاتحه نتى وبكلم حبايبى تزعل ليه بقى

بصى انتِ الكلام مش هيجيب نتيجة معاكى شغل البيت مقصرة فيه وانا بقيت اخر اهتماماتك انا من بكرة هروح الغى اشتراك النت

كده برضو يا عبد الصمد طيب روح الغى النت وانا قلبى وربى غضبانين عليك ليوم الدين

 

“يوميات الست ذكية (4) ”

********
********

الست ذكية قاعدة بتتفرج على مهند ونور

وجالها جوزها الغلبان الشقيان عبد الصمد

وقعدت تبحلق فى وشه تعالوا نشوف ايه اللى حصل

مالك يا ذكية بتبوصيلى كده ليه

بتفرج على عجائب خلق الله

لا إلا إلا الله مالك يا ست

قولى يا عبد الصمد انت بتحبنى

طبعا اومال عايش معاكى ومستحملك ليه

اومال ليه مش بتعيط وبتشحتف علشانى

واشحتف علشانك ليه !هو انا محروم منك! ما انت فى وشى ليل ونهار

وبعدين الحاجه الوحيده اللى بتخلينى اعيط لما بفتكر اليوم اللى خطبتك فيه

طيب وليه مش بتبصلى بحنيه

تعالى يا ست لما أبصلك بحنية

ايه ده يا عبد الصمد مال عنيك

مالها عنيه

مش عارفة فيها حاجه غريبة

غريبة أزاى

انت عندك عين أوسع من عين يا عبد الصمد

لا حول ولا قوة إلا بالله

وحواجبك مالهم مقفولين وكتير كده ليه يا اخويا

معلش استحملينى

وليه بقك كبير كده

وايه تانى مش عاجبك

بصراحة مش عارفه يا عبد الصمد فى حاجه فى وشك مش مريحانى بس مش عارفه ايه هي , يمكن مناخيرك بقى

طيب أنا هدخل انام يا ذكية علشان اريحك منى شوية

لاء خليك ادينا بندردش

هى دى دردشه يا ذكية

ده كلام تقوليه لجوزك

اصلك انت ما شفتش مهند يا عبد الصمد

مين مهند ده يا ست هانمممممممم

طيب وطى صوتك .. ده الجدع الممثل التركى اللى بيجى فى التليفزيون

اصل انا نفسى تبقى شبهه

يا سلام وابقى شبهه ازاى يا فالحة

أولا تروح الجيم

أروح الجيم ليه

بصراحة يا عبد الصمد مش عايزه اقولك ان كرشك فاضحنى فى كل حته

دى حتى امى شافت واحد شبهك وكانت هتسلم عليه لكن قالتلى لما قربت عرفت انه مش جوزك لانى معلماه بكرشه

يا سلام عليك وعلى امك يا ذكية ونعم الناس

بقولك ايه با عبد الصمد انت تروح مركز تجميل يشفطولك كرشك ويركبولك لينزز خضره

وماله يا ذكيه اروح اركب لينزز خضره واصبغ شعرى واسمى نفسى عفاف

بطل تتريق عليا يا عبد الصمد الموضوع كبير قوى قوى يا اخويا وما ينفعش السكات عليه

يا هانم الست لازم تقدر جوزها وتحترمه اما سى مهند ده شغلته التمثيل

ودى مهنته اللى بياكل منها عيش يعنى يسبل ويقبض

لكن الراجل اللى زى حالاتى مطحون فى شغله ومستنى مراته الكاملة العاقلة اللى تقدره وتشيله على راسها

ومهند ده لو بتحترمى جوزك ما تشفهوش تانى

وعلى فكره ليكى عندى مفاجأة

ايه يا اخويا

لمى هدومك ومع السلامة على ابوكى

ايه

ليه كده يا اخويا

خلى مهند ينفعك

مهند مين وبتاع مين يا نور عينى انت

بقيت نور عينك دلوقتى

سامحنى يا عبد الصمد

لاء أنا مصمم تسيبى البيت

اه يانا يا مظلومة يانا اهئ اهئ

يقطع التمثيليات التركي واللى بلانا بيها

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة