طريقة عمل النجرسكو بالصور
الطريقة
انا جبت صدور فراخ وخليتها وقطعتها مكعبات
يعني ممكن تجيبي نص كيلو بانيه وتقطعيه مكعبات
وتتبليه التتبيله بتاعت البانيه العاديه
( بصله كبيره مفرومه + ملح + فلفل اسمر والتوابل اللي تحبيها )
وتسيبيها ع الاقل ساعتين وبعدين تحطيها في طاسه سخنه ع النار
وتغطيها وتهدي عليها النار بتنزل مايتها وتستوي منها ودي صورتها
ولما تستوي سيبيها على جنب
*******
دي المكرونه الأصليه اللي بيتعمل منها النجرسكو
اسمها مكرونه شرايط زي الاسباجتي بس مبططه شويه
ده شكلها
ودي شكلها بعد ما اتسلقت
نجهز بقا الحشوه
ملعقة كبيره سمنه في طاسه وع البوتاجاز
نضع عليها بصله كبيره مقطعه
ولما لونها يبقى ذهبي نضيف ملعقة توم مفروم
تقلبيها شويه وتحطي فلفل اخضر مقطع
وتقلبي دقيقه كده من غير ما الفلفل يتهري
وتضيفي طمطمايه متقطعه
تقلبيها تقريبا 3 دقايق لحد ما تبدأ في التسبيك كده
فاكره بقا الفراخ المتقطعه اللي ركنناها بعد ما استويت
نجيبها بقا ونحطها هنا كده
وده شكلها بعد ما قلبناها تقليبتين متقلبيش كتير هيه مستويه اصلا
******
التجهيز للحشو بقا
انا جبت 1/8 جبنه رومي وفلفل اخضر واسمر وبقسماط مطحون
هقولك هنعمل ايه حالا
هنبشر الجبنه الرومي انا جبتها قطعه واحده عشان تبقا سهله وانا ببشرها
نجهز بشاميل زي العادي اللي كلنا عارفينه بس نخليه خفيف شويه عن بتاع المكرونه معلش نسيت اصور طريقته بس اظن كلنا عارفينها
*********
هنا بقا هنبدأ نرص الصينيه
نجيب المكرونه المسلوقه ونحط عليها شويه بشاميل ونقلبها
نقسم المكرونه نصفين ونحط نصفها في الصينيه بعد ماندهنها بسمنه ورشة دقيق خفيفه
نضع الحشو ونحط عليه حلقات الزيتون
نحط باقي المكرونه النصف التاني
ونحط بقا الباشميل لحد مانغطيها
نرش شوية بقسماط مطحون ع الوش عشان تخرج من الفرن متماسكه
ونحط عليها الجبنه الرومي المبشوره
وعالفرن عدددددددل
وده شكلها بعد ما طلعت من الفرن
*****
***
**
*
*
*
وهنا لما قطعتها
شايفين متماسكه ازاي
طريقة أخرى
اولا نصف كيلو صدور فراخ بانيه
حنفرمها فى الكبة
حتى تصبح بهذا الشكل
ثم نتبلها ببصلة كبيره وفلفل اخضر حلو وملح وفلفل اسمر ونصف ملعقة بهار شاورما فراخ او لحم وزعتر وزيت زيتون حوالى ملعقتين كبار ونتركها فى الثلاجه لمدة ساعه
ثانيا نصف كيلو مكرونه اسباجتى
بنسلقها ونتركها جانبا
ثالثا نصف كيلو طماطم لصنع الصلصه
بنحمر فصين ثوم فى الزيت وبعد ذلك بنضع عصير الطماطم والملح والفلفل الاسمر حتى التسبيك ونتركها جانبا
رابعا البشاميل
مكون من 4 ملاعق كبيره من الدقيق بنحمصهم فى السمن او الزبده وبعد ذلك نسكب عليها حوالى 4 اكواب حليب ونقلب بسرعه حتى يثقل الخليط ثم نضع
الملح والفل الاسمر ونتركها جانبا حتى تبرد
طريقة التحضير
اولا بنخرج الفراخ من الثلاجه ونضعها فى المقلاة وعليها كوب ماء ونقلبها باستمرار حتى الاستواء
ثانيا نقسم المكرونه جزئين ونضع على جزء منهم صلصة الطماطم
رابعا الجزء الاخر نضع عليه جزء من البشاميل الذى اعددناه
خامسا نضع جزء من المكرونه التى بالبشاميل فى ارضية الصينيه ونفردها بالضغط عليها جيدااااا
سادسا نضع عليها جزء من المكرونه التى بصلصه الطماطم ونفردها جيدا بحيث تغطى المكرونه التى بصلصة البشاميل
سابعا نضع الفراخ ونوزعها فى الصينيه كلها
ثامنا نضع الجزء الاخر من المكرونه بصلصة الطماطم فوق الفراخ
تاسعا نضع الجزء الاخر من المكرونه التى بالبشاميل فوق المكرونه التى بالطماطم
عاشرا نضع باقى البشاميل على النار مرة اخرى ونحركه جيدا حتى يسخن ثم نضع عليه جبن الموتزاريلا حتى تذوب فى البشاميل ثم نسكبه فوق المكرونهعلى الوجه وندخلها الفرن حتى الاستواء واحمرار الوجه واليكم الصور
منقول
