ترفيهمسلسل على بياض

الحلقة التاسعة عشر من مسلسل على بياض للكاتبة مي حُريز

الحلقة التاسعة عشر من مسلسل على بياض للكاتبة مي حُريز

 

 

الفصل التاسع عشر

ريهام بعصبية: مش من حقك ترفض ولا تدخل في حياتي اصلا
شريف بزعيق: لا من حقي طبعا انا اعرف مصلحتك اكتر منك
ريهام: انا مش صغيرة و عارفة مصلحتي و مش محتاجة لحد يكون وصي عليا
شريف: تمام… لما انتي مش صغيرة و مش عاوزة وصي خليتيه ييجي يكلمني انا و ياسر ليه؟؟؟ كنتي روحي اتجوزى من نفسك و خلاص
ريهام: كنت بكبركم لكن انتو عاوزين تصغروني
شريف بعصبية: نصغرك عشان مش عاوزينك تتبهدلي و تعيشي في شقة اوضتين في حتة مقطوعة و بدخل ميجيش ربع اللي بتصرفيه على لبسك و خروجاتك!!! ما تقوليلها حاجة يا ماما
عايدة: يا بنتي اسمعي كلام اخواتك هما بيحبوكي و خايفين عليكي
ريهام: محدش خايف عليا كله خايف على نفسه و بس… لو صحيح بيحبوني كانوا يجوزوني اللي بحبه
عايدة: مش مناسب يا حبيبتي انتي زي القمر و شوفي انتى بنت مين و اخواتك مين ليه ترمي نفسك الرمية دي؟
ريهام: رمية ايه؟ و بعدين لو على الفلوس انا عندي فلوس و اقدر اجيب احسن شقة في احسن مكان و أعيش احسن عيشة المهم اللي بحبه يكون جنبي
شريف: هتجيبيله شقة و تصرفي عليه!! بالظبط زي ما توقعت… إنسان انتهازي و بيستغلك و طمعان فيكي… طب هو هيقدملك ايه؟؟ غير الحب بس عشان مرارتي
ريهام: هيقدملي التفهم و الاهتمام يا شريف.. هما دول مش كفاية؟ هو انا عاوز ايه اكتر من حد يفهمني و يهتم بيا و يحبني
شريف: ماما انا قلت اللي عندي و خلاص مبقاش عندي كلام تاني أقوله من فضلك عقليها… انا ماشي
عايدة: استنى بس يا شريف… يابني متمشيش و انت زعلان كده
مردش عليها و مشي
—————
بعد يومين
نادر: اتفضل
ياسر: ايه دي؟
نادر: استقالتي
ياسر: و ايه المناسبة
نادر: كفاية كده مفتكرش أنى هقدر اكمل في الشركة كدة
ياسر: طيب لقيت شغل تاني؟
نادر: مش مهم.. بكرة ألاقي
ياسر: انا ممكن اساعدك تلاقي شغل لو تحب
نادر: متشكر اوى انا اعرف امشي أموري بنفسي
ياسر: طيب زي ما تحب عموما لو احتجت مني توصية في اي وقت هكون تحت امرك
نادر: متشكر. عن اذنك.
——————
ريهام: مش عارفة انت ليه صممت تستقيل ما انت عارف انها شركتي زي ما هي شركتهم
نادر: كرامتى يا حبيبتي مكنتش قادر استحمل اكتر من كده
ريهام: عموما ولا يهمك يا حبيبي هتلاقي شغل تاني و احسن ان شاء الله
نادر: ان شاء الله
ريهام: فكها بقا متزعلش المهم اننا مع بعض… انا عمري ما هسيبك يا نادر انا ما صدقت لقيتك
نادر: بس انا مش عاوز اعملك مشاكل مع اخواتك. دول رافضين ارتباطنا تماما و شوفتي ازاي ما صدقوا اني اقدم استقالتي و قبلوها في ثواني!!
ريهام: اصبر يا حبيبي و انا هفضل ازن و أكيد هيزهقوا و يقبلوا الأمر الواقع
نادر: خايف أكون فعلا بظلمك بارتباطنا و انا مش واخد بالي
ريهام: لا اوعى تقول كده.. نادر انا هفضل متمسكة بيك لآخر يوم في عمري فاوعى تكون انت بتراجع نفسك و ناوي تخذلني
نادر و هو بيمسك ايديها: انا اخذلك!!! انا عمرى ما اقدر ابعد عنك يا حبيبتي و البعد عنك بالنسبالي أنتحار و كنت مستعد انتحر لو ده فيه سعادتك
ريهام: انا سعادتي و انا جنبك و معاك يا حبيبي
نادر: يبقى انا عمري ما هتخلى عنك او اسيبك يا حبيبتي و هتمسك بيكى اكتر من الاول مليون مرة.
—————
شريف: بقولك يا نهول
نهلة: ايوه يا بيبي
شريف: معلش ابقي خلي بالك شوية لما تيجي تتصلي بيا اتصلي مرة واحدة و انا هبقى اكلمك اول لما يكون الوقت مناسب عشان ساعات ليلى بتكون جنبي و بتستغرب انا ليه مبردش و انتى عارفة انها مجنونة لو عرفت حاجة يبقى الله يرحمنا احنا الاتنين
نهلة: ده انت بتخاف منها بقا!!
ضحك و قالها: اي راجل عاقل لازم يخاف من مراته طبعا
نهلة: متخافش يا شريف.. انا مش عاوزة اعملك مشاكل و لا انا كمان ناقصة مشاكل كفاية مشاكلي مع طليقي ربنا ياخده و يريحني منه و لا اشوفه دايخ دوختي في المحاكم يا رب
شريف بزهق: خلاص بقا غيري السيرة دي
————
بعد كام اسبوع
منة: اهدي بس يا بنتي متحسسينيش انك بقالك عشر سنين متجوزة
ليلى: لا بس قربت على سنة اهو و مفيش جديد
منة: عادي ناس كتير بياخدوا وقت على ما يخلفوا انتي بس متوتريش نفسك
ليلى: ما هو انا كمان معنديش ٢٠ سنة عشان اصبر و اقعد استنى
منة: مش الدكتور الحمد لله طمنك ان معندكيش اي مشكلة
ليلى: اه الحمد لله
منة: طيب يا بنتي في ايه متسربعة على ايه؟
ليلى: عاوزة افرح شريف باي حاجة احسن من ساعة موضوع اخته ده و هو جاله القولون و مبقاش بياكل و خس النص و مكتئب اوى
منة: مالها اخته عملت ايه تاني؟
ليلى: مقاطعاه و مبتكلموش و راحة جاية تقول لأي حد فينا انها هتتجوز نادر هتتجوزه حتى لو غصب عن شريف
منة: دي بت هبلة و متدلعة عاوزه حد يديها علقة كده عشان تتلم
ليلى: فعلا دلع رخم و هو اكتر واحد كان بيدلعها دلوقتي بيضرب نفسه بالشوز
منة: طب و اخوها التاني موقفه ايه؟
ليلى: ياسر. رافض بردو بس هي حاطه شريف في دماغها عشان هو اللي رفض رفض مباشر و لما اتكلم مع الولد ده حسسه انه ولا حاجة فطبعا مسخنها على شريف بالذات… المهم خلينا في موضوعنا دلوقتي
منة: يوووه بردو مبتنسيش!!! طب بقولك ايه؟ ما تخلي شريف يطمن هو كمان
ليلى بسرعة: لا طبعا مستحيل
منة بغيظ: يا سلام!!! اشمعنا بقا
ليلى: يا بنتي انا روحت للدكتور من غير ما يعرف اصلا و بعدين انا كل هدفي من الموضوع ده اني افرحه و اغيرله موده من مشاكل ريهام و الشغل و البنك اللي موافقش يديله قرض بالمبلغ اللي هو عاوزه فتخيلي بقا لو خليته يكشف و طلع في مشكلة ولا حاجة هبقى زودت الضغوط اللي عليه اكتر و هو مش ناقص دلوقتي.
منة: طيب يا حبيبتي اهدي بس و اصبري كمان شوية و لو محصلش نصيب تكون الدنيا هديت عنده شوية و تروحوا سوا للدكتور تشوفوا ايه الحكاية
ليلى: هعمل كده معنديش حل تاني غير كده انا بس بفضفض معاكي بكلمتين
—————
شريف و هو بيضحك: ايه اللي انتي بتقوليه ده يا حبيبتي انتي بتتكلمي بجد ولا بتهزري؟
ليلى و هي منشكحه: بجد طبعا مفيش هزار في الحاجات دي
شريف: بس مش شايفة انها واسعة شوية
ليلى و هي بتقرب منه و بتبصله بكل فخر: مش واسعة ولا حاجة دي على مقاسك مظبوط و ده اللي بصراحة كان المفروض يتعمل من زمان
سكت شوية يفكر و بعدين قالها: لا لا مليش انا في الحوارات دي خالص
ليلى: لازم يبقى ليك يا حبيبي… بص سيبلي نفسك و انا هشهرك
شريف: يا ستي انا مش عاوز اتشهر انا عاوز اشتغل في صمت
ليلى: لازم تشتهر و الناس كلها تعرف مين هو شريف المعداوى و ازاي شاب في سنه قدر يحقق كل ده بمجهوده… لو مش عشان انت عاوز كده فيبقى عشان المجتمع محتاج كده و الشباب محتاج نماذج ناجحة زيك عشان يحاولوا هما كمان و مييأسوش
شريف: و انتي من امتى بتهمتي بالمجتمع و الشباب و الكلام ده أوعي يا بت تقوليلي انك عاوزاني بعد كده اترشح في الانتخابات …
ليلى و هي بتضحك: لا لا بلاش انتخابات عشان انت ماضيك اسود و لو دخلت السياسة أكيد هيطلعلك سيديهات و بلاوي كتيرة
شريف: ما تتلمي بقا
ليلى: خلاص بس اسمع كلامي هما كام حوار صحفي و تليفزيوني و نعرف الناس بيك و بتعمل ايه و قصة نجاحك عشان تكون قدوة للشباب
شريف و هو بيضحك: انا قدوة
ليلى: طبعا يا حبيبي انت قدوة و مثل يحتذى به لأي شاب عاوز ينجح في حياته و يحقق ذاته.. و بعدين ممكن متقاوحش بقا و تسيبني اشوف شغلي انا مديرة العلاقات العامة مش انت على فكرة
قرب منها و مسك ايدها و باسها و هو بيقولها: انتي مديرة قلبي و روحي و حياتي كلها كمان… خلاص اعملي اللي انتي عاوزاه انا من ايدك دي لايدك دي.
——————
بعد كام اسبوع تاني
علي: ايه يا نجم النجوم من ساعة ما صورك بقت في المجلات و الناس بقت تتكلم عليك عالسوشيال ميديا و محدش عارف يشوفك
شريف و هو بيضحك: عمايل ليلى يا علي فجأة كده عملتني بطل قومي
علي: و الله بنت جدعة ربنا يباركلك فيها
شريف: فعلا و الله جدعة و واقفة جنبي بميت راجل و مش عارفة تعملي ايه و لا ايه عشان تفرحني بعد موضوع ريهام ده
على: هي لسه بردو راكبه دماغها
شريف: لسه.. و يا ريت كده و بس دي قالبة عليا الناس كلها و مطلعاني ان انا اللي شرير و ظالم و بعمل كده عشان انا اللي طمعان فيها!! انت متخيل يا علي!!! انا ساعات ببقى مش مصدق ان دي ريهام اختى اللي انا مربيها بايدي
علي: معلش يا شريف ربنا يهديها و يصلح الحال بس انت حاول تحتويها و تاخدها تحت جناحك بدل ما تعادوا بعض كده
شريف: و الله حاولت كتير و جيت على نفسي كتير لكن مفيش فايدة زي ما تكون فجاة بقت حد غريب عني معرفوش
علي: ربنا يعينك يا حبيبي عاللي انت فيه انت شايل كتير
——————
ليلى: بشمهندس ابراهيم ! اهلا اهلا ازيك عامل ايه
ابراهيم: ليلى هانم. ازاي حضرتك؟
ليلى: الحمد لله بخير. اتفضل
ابراهيم: معلش هعطلك عن شغلك ثواني
ليلى: لا براحتك. خير في ايه؟
ابراهيم: كنت بدور على شريف عاوز امضي ورق مستعجل و مش لاقيه و روحت مكتبه قالولي نزل قلت اجى أسالك عليه عشان مش بيرد عالتليفون
ليلى: غريبة هو قال انه نازل الموقع هو مجاش ولا ايه
ابراهيم: لا ما جاش. جايز بقا انا مشيت من هنا و هو راح من هنا
ليلى: جايز فعلا. عموما سيبلي الورق اللي عاوزه يتمضي و انا هخليه يمضيه و يجيبهولك بكرة و هو نازل الموقع
ابراهيم: هو هينزل بكرة كمان ده ايه الهنا ده!! ده انا قلت انه مقاطعنا عشان بقاله فترة كبيرة مش بييجي
ليلى: ايه؟؟!!!
اتصدمت انه بقاله كتير مش بيروح مع انه بينزل كل يوم ميقلش عن ٣-٤ ساعات و بيقولها انه راح يبص عالمشاريع. ده حتى كان بيرجع تعبان و مرهق و يقولها من اللف طول اليوم و طلوع السلالم و المهاتية مع العمال و المهندسين. تماسكت قدام ابراهيم و خدت منه الورق و خلته يمشي. و اول لما خرج اتصلت بشريف و سالته هو فين قالها في مشروع من المشاريع… سالته لو قابل ابراهيم قالها لا هو في مشروع تاني قالتله طب ابقى شوف هو عاوز ايه عشان كان بيسأل عليك… قالها عاوز ايه يعني ما انا كنت لسه معاه امبارح!!! طبعا كده اتاكدت انه بيكدب عليها فضلت متوترة مش عارفه هو بيكدب ليه؟؟ يا لهوى يا شريف لو بتلعب بديلك هتكون ليلتك سودة. قعدت تهري في نفسها كتير و بعدين مسكت تليفونها و اتصلت على منة
ليلى: الو ازيك يا منة
منة : الحمد لله ازيك انتي يا لولو
ليلى: الحمد لله.. بقولك!!
منة: نعم
ليلى: عاوزاكي تقوليلي ازاي افتح الواتس اب بتاعي على التابليت
منة و هي بتضحك: بتاعك بردو
ليلى: انجزي مش وقتك
منة: حاضر عنيا انتى عارفة انا في الأذية مفترية.
——————
بعد كام يوم
ليلى و هي بتعيط: بيخونني يا منة بيخونني كان عندك حق… ديل الكلب عمره ما ينعدل
منة: طب اهدي بس و قوليلي براحة كده عرفتي ايه؟
ليلى: انا هتجنن و الله مش مصدقة نفسي بعد كل اللي بعمله علشانه يعمل كده لا و بمنتهى الأريحية ولا كأنه عامل حاجة
منة: يا حبيبتي بطلي عياط بقا العياط مش هيفيدك بحاجة انتي لازم تهدي عشان تعرفي تفكري هتعملي ايه
ليلى: عمله اسود و مهبب هروح اطينها فوق دماغه طبعا و هطلق و لو مرضيش هخلعه انا مستحيل افضل معاه بعد اللي عمله ده
منة: ممكن تبطلي عياط بس و تحكيلي ايه اللي حصل؟ بيعمل ايه يعني بالظبط و يعرف كام واحدة؟
ليلى: هي واحدة بس و هتجنن و اعرف مين هي
منة: مسجلها ايه؟
ليلى: مش مسجلها حافظ رقمها و كل أما يتكلموا يمسح المكالمة او التشات بعدها على طول
منة: طب ايه طبيعة العلاقة بينهم بيتقابلوا ولا لأ و فين بيتكلموا ازاي فهميني
ليلى: بيصبح و بيمسي و بيدلع و يهنن و لما بينزل من الشغل يروح المشاريع بيروحلها اغلب الايام…
منة: بيروحلها البيت!!! ولا بيتقابلوا برة؟
ليلى: مش عارفة… بصي انا اصلا مش عارفه انا مستنيه ايه واحنا بنتكلم دلوقتي في ايه انا هروح اطربق الدنيا على دماغه الخاين الزبالة ده
منة: ليلى اهدي من فضلك ممكن تصبري و تسمعي كلامي انتي المرة اللي فاتت مسمعتيش كلامي و اديكي شوفتي اللي حصل ممكن تديني فرصة المرادي و تسمعي كلامي و انا هطربقهالك على دماغه بردو بس بطريقتي
ليلى: مش قادرة… مش قادرة يا منة انا هتجنن انا يعمل معايا كدة سبحان من سكتني عليه لحد دلوقتي
منة: دي احسن حاجة عملتيها انك مبينتيلوش حاجة خليه ياخد راحته عالاخر و احنا بردو ناخد راحتنا و نعرف نفكر
ليلى: انتي عاوزة تجننيني انتي كمان!!! انا لسه هاخد راحتي و افكر!!
منة بعصبية: عاوزة تعملي ايه يا ليلى؟؟ عاوزة تروحي تتخانقي معاه و تقوليله انك عرفتي كل حاجة و تجري على اهلك و اهله و تقوليلهم طلقوني منه و هو يتصعبن و يعتذر و اهلكوا يتوسطوا و تلاقي نفسك رجعتيله و مخدتيش منه لا حق ولا باطل؟ و لا عاوزة تعملي كل ده و تركبي دماغك و تطلقي و بردو تبقى مطلعتيش بحق ولا باطل لانه مش هيخسر حاجة عادي يعني هيكمل حياته بالطول و العرض !
ليلى: امال انتي عاوزاني اعمل ايه؟ هي اللي بتكتشف ان جوزها بيخونها بتعمل ايه؟ انتي لما اكتشفتي ان جوزك بيخونك عملتي ايه غير اللي انتي قولتيه ده؟؟؟ و بعدين الحمد لله ان مفيش أولاد ولا حاجة تربطني بيه … هستنى ايه؟ و ليه؟؟؟؟
منة: صحيح انتي مفيش حاجة تضطرك تفضلي معاه بس بردو شريف فيه ميزة مش عند هشام او عند رجاله كتير
ليلى: ايه!!
منة: انه غني
ليلى: يعني عاوزاني اسيبه يدوس على قلبي و كرامتي بالجزمة عشان شوية فلوس!!! انتي تعرفي عني اني كده!!!
منة: مش هيلحق يعملك حاجة… انا بقول هما كام شهر و انتي طول عمرك ذكية شوفي تعرفي تاخدي ايه منه و خديه و لما تاخدي اللي انتي عاوزاه ابقي واجهيه و افضحيه و اعملي اللي انتي عاوزاه بس ساعتها هتبقي مش طالعه فاضية من الجوازة ده غير ان الفلوس هتوجعه اوى هما مبيوجعهومش غيرها اصلا
ليلى: و هعيش معاه ازاي الكام شهر دول؟ هبص في وشه ازاي و اتعامل معاه ازاي و انا بتفرج عليه و هو بيخونني كل يوم
منة: لازم تعرفي حاولي… عاوزة تطلعي خسرانه كل حاجة و هو كسبان ولا تطلعي كسبانه و هو اللي خسران!!!
ليلى: مش هقدر… مش هقدر يا منة مش حاسه اني اقدر اعمل حاجة زي دي مش انا ولا دي اخلاقي ولا دي تربيتي
منة: اقولك على حاجة تخليكي تقدري تعملي كده؟؟؟ خانك قبل كده و اعترف بخيانته و كملتي معاه عادي و المرادي لو واجهتيه هيقلب الترابيزة عليكي انك بتفتشي في حاجته ده غير انه هيحور الكلام اللي شوفتيه و يقول ده كلام عادي و مفيش دليل و هترضى و هترجعي و هو هيسوء فيها و مش هيبطل يخونك.. يبقى اعتبري ان كل ده حصل و انتي مكمله بس مكمله عشان هدف معين… تحرقي دمه و تاخدي منه اللي تقدري عليه… و بعدها بقا اعملي اللي عاوزاه حتى لو قررتي تكملي بس تكملي و انتي قويه مش و انتي غلبانه ضعيفه منكسرة لمت نفسها و مشيت بعيد و ده كل اللي قدرت عليه!!!
الفلوس بتقوي… بتقوي اوي يا ليلى.

زر الذهاب إلى الأعلى