ترفيهمسلسل يا انا ياحماتي

مسلسل يا انا يا حماتي الحلقة الثالثة

الحلقة الثالثة

فات حوالى شهر انا وحسام قربنا اوى من بعض فى الفتره دى

كل واحد فينا كان حاسس انه لقى نصه التانى وحلم عمره فى شريك حياته بجد كنت مبسوطه اوى بيه وقد ايه قدر يستوعبنى ويحتوينى ويحسيسنى بالحب والامان اللى كنت محتاجاه

2015-08-10_145536

علاقتى بقى بمامته كانت سطحيه نوعا ما كنت من وقت لتانى بكلمها وبطمن عليها وهى كمان كانت ساعات بتسال عليه بس كله كلام فى العادى سلامات وخلاص

لحد ما جيه حسام وحدد مع بابا اليوم اللى هننزل نجيب فيه الشبكه

نزلت انا ونهال وخالتو وحسام وسهير وبابا قال هو ملوش فى المواضيع دى وان دى حاجات ستات

رغم انى قربت منه بس ده فالتليفون لسه مش متعوده اقعد معاه واكلمه فيس تو فيس عشان كده كنت مكسوفه اوى منه

نزلت انا ونهال وكانت خالتو معاهم مستنينى فالعربيه

سهير نزلت سلمت علينا وخالتو كمان وحسام كان واقف يبص عليه من بعيد وعلى وشه ابتسامه بجد موتتنى كان قلبى بيدق بسرعه اوى ومحاولتش ابصله حتى

سهير : تعالى يانهى اركبى قدام

انا بلخبطه : لا يا طنط ميصحش لا انا هركب وراء مع نهال وخالتو

ومشيت بسرعه ركبت قبل متصمم

وطول الطريق مش بحاول ابص عليه ولا اتكلم معاهم لحد موصلنا الصاغه

وبداءت بقى النداله

فجاءه لقتهم كلهم ماشين مع بعض وببص جانبى لقيت حسام واقف ومبتسم

2015-08-08_175307

: ايه هتفضلى واقفه كده

انا : ها اه …هم مشو ليه مش يستنو

ومشيت سبقته بخطوه فضلنا ماشين جانب بعد وانا بحاول ابعد على قد مقدر لحد موصلنا المحل

وبدائنا نختار بجد طنط كانت وقفه معايا واى حاجه كنت بشاور عليها كانت بتجبهالى بس ساعات كانت بتقولى لاء ده احلى وساعدتنى واختارت معايا كام حاجه واختارنا الدبل وبجد كنت فرحانه اوى

وبعد كده حسام وسهير صممو يعزمونا بره بمناسبة الشبكه وخدونا مطعم شيك اوى

نزلنا من العربيه وحسام اخد العربيه وراح عشان يركب قدام شويه ولسه هدخل معاهم

سهير : نهى استنى انتى مع حسام عشان ميبقاش لوحده

بصتلها باستغراب وبينى وبين نفسى “ليه هيتخطف يعنى … يالهوى على التدبيس “

انا باحراج : حاضر ياطنط

وفضلت واقفه شويه وحسام قرب عليه وبصلى باستغراب

2015-08-08_175307

حسام : انتى وقفه كده ليه

انا : مش عارفه طنط قالتلى استناك عشان متبقاش لوحدك

حسام بضحكه : ماما مش هتبطل حركاتها  

انا : نعم

حسام : لا ابد ولا حاجه

ودخلنا لقينا بقيت النداله … قاعدو على تربيزه فيها 4 كراسى وطنط بصت لحسام وقالتله : اقعدو انتم فى تربيزه تانيه

انا بارتباك : لا احنا نقعد معاكو احسن

2015-08-10_145841

حسام قرب منى وبهمس : ريحى نفسك انتى خلاص ادبستى

بصتله بكسوف : يعنى مفيش امل

حسام : هههه لا معتقدشى … تعالى معايا

ومشيت وراه وقاعدنا على تربيزه تانيه

فضلت طول الوقت ببص على كل حاجه حواليه الا هو وكل ميكلمنى ابص حواليه وارد عليه باختصار

حسام : من الواضح كده ان المكان عجبك اوى

انا من غير مبصله : اه حلو اوى

حسام : اه احلى منى انا شخصيا

انا : ها … ليه

2015-08-10_150311

حسام : اصلك تقريبا مبصتليش من ساعة مقاعدنا سواء

انا بكسوف : ها .. لا ابدا …صحيح مقولتليش اخبار الشغل ايه

حسام بابتسامه : الهروب الكبير …انتى مشكله على فكره

انا : وانت غلس على فكره

حسام بتكشيره : انا غلس

فوقت لنفسى ايه اللى ان قولته ده

انا : انا اسفه بجد مش قصدى والله انا قولتها كده بعفويه مش قصدى حاجه

حسام : ايه يابنتى خلاص انا مزعلتش على فكره … وبعدين دى حقيقه انا فعلا غلس انتى متعرفيش

انا باحراج : لا انت مش غلس و لاحاجه

حسام : لا غلس بقى

انا بتكشيره :لا مش غلس بقى

حسام : خلاص مش غلس بس اضحكى

2015-08-10_145856

بصيت فى الارض وابتسمت وكان قلبى هينط من الفرحه

حسام : شكلك بيبقى احلى وانتى بتضحكى ومكسوفه كده … ربنا يقدرنى واقدر اسعدك واشوف ضحكتك طول الوقت

وفضلنا بقى نتكلم قصدى يعنى هو يتكلم وانا مقضيها ابتسامه وبصه فى الارض

اول لما روحت فضلت اتكلم مع بابا عن حسام والشبكه وكان باين عليه فرحتى وانبساطى وبابا كان مبسوط اوى عشانى ودخلت بعد كده غيرت هدومى وكلمت “رانيا ” دى بقى صاحبتى الانتيم

اتصلت بيها وحكتلها على كل حاجه عشان تفرح عشانى

بس لما حكتلها على موضوع الشبكه وان طنط اختارتها معايا

لقتها بتزعقلى

2015-08-10_150541

رانيا : انتى هبله يابنتى ازاى تخليها تختار هى

انا باستغراب : وايه المشكله … والله كانت بتختار حاجات كويسه وشيك

رانيا : اقولك ايه ..انتى غبيه

انا بضيق : فى ايه يا رانيا بتشتمى ليه طيب

رانيا : عشان انتى مش فاهمه … يابنتى الشبكه دى اختبار هى بتشوفك هتسمع كلامها وهتبقى تحت طوعها ولا لاء …شوفى بقى اللى هيحصلك بعد كده …هى اللى هتختار كل حاجه فى شقتك العفش وكمان هتدخل فى حياتك … وهتشوفى وابقى قولى رانيا قالت

انا بخوف وقلق :  مش للدرجه دى يابنتى … انا بس اعتبرتها زى ماما الله يرحمها يعنى لو ماما كانت عايشه مش كانت هتختار معايا

رانيا : والله انتى خايبه …يابنتى دى مش مامتك دى حماتك عارفه يعنى ايه حماتك … سيبك من الهبل بتاعك ده وجوا احنا اسرة مع بعضينا

انا : انتى بتخوفينى ليه يا رانيا

رانيا : انا مش بخوفك انا بوعيكى … خالى بالك منها ومتنسيش انه ابن وحيد يعنى مش هتسيبه بسهوله وهتبقى مدخله فى كل حياتك لو معملتيش حدود من الاول هتتعبى اوى فى حياتك

انا بضيق بعد مفرحتى راحت : طيب ربنا يسهل ويستر بقى …ياله سلام عشان عاوزه انام

رانيا : ماشى سلام

من اليوم ده وبداءت احس بخوف منها ممكن فعلا يكون كلام رانيا صح انا طول عمرى بشوف كلام كتير عن الحماه وازى تبتقى مسيطره ومتسلطه بس انا كان عندى امل معشى كده فى صراعات وكلام ملهوش لازمه عاوزه اعيش مع حسام فى راحه وهنا ونبقى مبسوطين بس رانيا عندها حق هو ابنها الوحيد وكما جوزها متوفى يعنى مفيش غيره فى حياتها اكيد مش هتستسلم وتسيبه بسهوله …بس انا  كمان مش هستسلم انا بحب حسام ومش هسيب اى حد يفرق بينا او يدخل فى حياتنا مع بعض

2015-08-10_150518

وبداءت اجهز نفسى واستعد بكل اسلحتى للحرب اللى انا دخله عليها وكلى ثقه وحماسى انى هكون الفايزه

فاتت ايام وشهور كتيرعملنا الخطوبه  انا وحسام اخر تمام والحدود والحواجز اللى بنا بتقل والكسوف بيقل والحب بيزيد والتفاهم والاحترام كمان بيزيد

اما بقى حماتى كانت من فتره للتانيه بتزورنا او ساعات انا بزورها مع خالتو وحسام مسافر وكل كلامنا برده عام ولا انا حاولت اقرب منها ولا هى حاولت تقربنى منها وفضلنا كده مع بعض كل واحد خايف من التانى وخايف يقرب وبنتعامل بطرقه رسميه وتقضه للواجب وبس

واخير نهال خلصت الثانويه ودخلت كليه الهندسه وعمر خلص جامعته وحسام ساعده وشغله فى بنك محترم  

وحددنا ميعاد الفرح وكل حاجه كانت تمام وفى يوم كنت بكلم حسام بليل

انا بضق : لا ياحسام هستنى لما تيجى وننزل مع بعض احسن

حسام : ياحبيبتى مش بقولك اشترى …انزلى بس مع ماما اتفرجو …عشان نوفر على نفسها الف الكتير تبقى عارفه ايه اللى عجبك ونروح عليه على طول …انتى عارفه اجازتى مش مستحمله

انا بحزن : بس انا عاوزه نختار كل حاجه فى شقتنا واحنا مع بعض

حسام : عشان خاطرى متزعليش …انا بس عاوزك تلفى وتشوفى كل حاجه … واللى يعجبك لما هنزل نروح نشوفه مع بعض ولو معجبنيش مش هنجيبه مع انى واثق فى ذوق حبيبتى

انا بحب : ربنا يخليك ليا …بس عشان خاطرى اى حاجه نجبها فى شقتنا تكون عجبانا احنا الاتنين ونخترها مع بعض

حسام : حاضر ياحبيبتى

انا بكسوف : بحبك

حسام : وانا كمان بحبك

وفعلا بعد يومين نزلت مع طنط وروحنا نتفرج على محلات العفش والموبيليا

سهير : حلوه الاوضه دى يانهى  …. مش كده

انا : لا ياطنط انا وحسام متفقين نجيب العفش كله مودرن مش حبه الكلاسيك

سهير : مودرن ايه بس ده عامل زى حاجة الفنادق انتم هتعيشو فى شقه ولا فى فندق

انا : بالعكس ياطنط المودرن بسيط وشيك جدا … انا مبحبش الشغل الكتير والرسومات الغريبه اللى بتبقى فى الكلاسيك ده

سهير وهى مش عاجبها الكلام : انتم جيل غريب …عاوزين بس تطلعو فى تقليعه جديده وخلاص … ماله ده يعنى مكل الناس بتجيب الكلاسيك

انا بضيق : والله ياطنط دى اذواق … وانا اللى هعيش فى بيتى مش اى حد تانى ولازم اكون مرتاحه فيه

سهير : قصدك ايه يعنى … مش عجبك ذوقى

انا بضيق: انا شايفه نستنى لما حسام يجى احسن وانزل معاه ننقى حاجتنا بنفسنا

سهير بزعيق: ليه هو انا مليش لزمه  ولا ايه …. انا اصلا غلطانه انى نزلت معاكى وعبرتك

ومشت وركبت تاكسى وسابتنى فى وسط الشارع لوحدى

ركبت تاكسى وروحت وانا معيطه بابا اتخض من شكلى

بابا : نهى فى ايه … انتى لحقتى ايه اللى حصل

قاعدت معاه وحكتله اللى حصل

بابا بزعل : انتى غلطانه يانهى

2015-08-08_173723

انا : انا … يا سلام بعد كل اللى حكيته لحضرتك بعنى غلطانه عشان عاوزه افرش شقتى على مزاجى

بابا : لا مش قصدى…. قصدى انك غلطى فى طريقه الرد … فى ايه يانهى طول عمرى بقول عليكى عقله وذكيه كان ممكن تريحيها بكلمه بس انتى كنتى عدوانيه اوى معاها … مينفعشى كنتى تقولى كده

انا بعياط : يا سلام …. انا مش عاوزاها تدخل فى حياتى دى حياتى انا وشقتى انا مش من حقها تتدخل وكمان تسبنى فى وسك الشارع وتمشى

بابا : انتى عصبيه دلوقتى والكلام مفيش فايده منه … ادخلى اوضتك دلوقتى ولما تهدى نبقى نتكلم

فعلاً قومت ودخلت اوضتى وفضلت اعيط لحد ملقيت تليفونى بيرن

واسم حسام عليه……….

ونكمل الحلقة القادمة بإذن الله … الى اللقاء في الحلقة الرابعة

الحلقة الأولى

الحلقة الثانية

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى