ترفيهمسلسل أم فتحي

مسلسل أم فتحي الحلقة الثانية عشر

الحلقة الثانية عشر

صباح الخير ياطنط

صباح النور يختي . فين ممدوح

نزل راح الشغل

والعيال فين ما شفتهومش

راحوا المدرسة . دول كانوا هيتهبلوا من الفرحة لما شافوكي وخصوصا عمار

طيب شوفيلي لقمة اشق ريقي بيها

حاضر يا طنط من عيوني
.
.
.
السلام عليكم

عليكم السلام يا ممدوح يابني

ازيك ياست الحبايب

الله يسلمك من كل وحش يا حبيبي

فين ايناس

باين في المطبخ

الغدا يا ايناس

انت برا يا ممدوح ؟

اومال بنده عليكي من الشغل !

اهلا يا ممدوح . الولاد زمانهم جايين نستناهم عشان يتغدوا معانا

ترررررررررررررررن تررررررررررررررررررررررن

افتحي يا ماما افتحي يا ماما احنا جينا

اهلا يا حبايبي ادخلوا سلموا على تيتة

ييييييييييييييييييييييييييي هي لسة هنا .

بس يا قلالات الادب ادخلوا خدوها بالحضن وبوسوها

 

ازيك يا تيتة

اهلا يا عمار

ازيك يا تيتة

اهلا يا محمد

ازيك يا تيتة

انت مين يا واد

دا خالد

خلفتوه امتى ده انا ماشوفتوش قبل كدة

لأ يا امي شوفتيه بس اصله تخن شوية

ايوة يتخن ماهو يعز الاكل زي امه

انتوا مش كان عندكو بت رابعة

ايوة سلمى

وهي فين ودتوها الملجأ ؟

لأ عند مامتي اصلها تحبها اوي وتحب تقعد عندها

.
.
.
يعني ايه بنتك عند جدتها ام امها يا سي ممدوح . البت تيجي حالا عشان اشوفها

حاضر يا امي هنتغدا واروح اجيبها عشان خاطر عيونك

ايه ده يا ايناس . انتي واخدة فرخة بحالها وكوم لحمة حطاهم قدامك وعمالة تنهشي فيهم زي الغولا كدة ليه

جرا ايه يا طنط هو حضرتك بصالي في اللقمة اللي هاكلها . وبعدين انا حامل وباكل لنفرين

انتي كدة بتاكلي لاربعين نفر

يا طنط الدكتورة قالتلي اتغذا كويس عشان البيبي

يا شيخة اتقي الله . هو فيه بيبي بياكل فراخ ولحمة برضو .

انتي واخدة البيبي حجة عشان تاكلي الفراخ لوحدك

 

لا يا امي هي حاطالك ربع فرخة اهو وحاطة ليا ولكل عيل ربع فرخة

طب واللحمة يا واد

لا والله يا امي اصل انا ما ليش حكم ع اللحمة عشان جايباها من عند امها

هي بتجيب اللحمة من عند امها وتاكلها لوحديها

ايوة

اعوذ بالله . شوف ياخويا البت بتاكل الفرخة زي المجنونة ازاي .

قوم العيال من جنبها يا ممدوح لتاكلهم

 

كفاية اكل يا ايناس .

جرا ايه يا ممدوح هو الواحد ما يعرفش ياكل اللقمة بنفس

اما اقوم اغسل ايدي

ايه يا امي كملي اكلك

الحمدلله يابني . الله يكون في عونك ويرزقك برزق امنا الغولا دي

على فكرة يا امي فتحي اتصل بيا وبيسأل عليكي وبيقول انه اتصل بيكي

كتير كنتي بتكنسلي عليه وبعدين قفلتي الموبايل

 

ايوة قفلت الموبايل . مش عايزة اكلمه ولا اسمع صوته ولا اشوف وشه وما تجبليش سيرته

لا يا امي دا مهما كان فتحي حبيبك برضو

لا حبيبي ولا ليا دعوة بيه ولا لسانه يجي على لساني تاني ابدا

على العموم يا امي خليكي قاعدة منورانا لحد ما تهدي خالص

هو انت عايزني امشي يا ممدوح ولا ايه

والله يا امي ابدا . انتي تقعدي طول العمر واشيلك على دماغي

اه يا طنط خليكي احنا فرحانين اوي والعيال هيطقوا من الفرحة

انتي كدة بتاكلي لاربعين نفر

.
.
ترررررررررررررررررررن ترررررررررررررررررررررررن

مييييييييييييييييييين

ام اسماعين

اهلا يا طنط ام اسماعيل

ازيك يا مروة يا بنتي

الله يسلمك يا طنط

ألاقيش عندك بصلة ؟

ايوة حاضر يا طنط هجيب بصلة من المطبخ لحضرتك

طب يا حبيبتي عشان ماتروحيش وتيجي تاني هاتيلي معاها راس توم وكام قرن فلفل

حاضر يا طنط

مروة

نعم يا طنط

معلش يختي شوفيلي كام حباية طماطم كدة على حزمة جرجير عشان السلطة

حاضر يا طنط

اتفضلي يا طنط البصلة وراس التوم والفلفل والطماطم والجرجير

اي خدمة تانية ؟

لا يا حبيبتي اصل انا مابحبش اتاقل على حد حتى اسألي ام فتحي عني

اه طبعا طبعا يا طنط

طب معلش لو فيها رزالة وبواخة مني يعني الاقيش عندك كيلو لحمة تكوني مستغنية عنه

لا والله يا طنط ماعنديش غير فرخة وهعملها على الغدا

طب يختي كلوا واتهنوا ولو فاض منكو صدر ولا ورك ابعتيهولي عشان بحب الفراخ اوي

حاضر يا طنط من عنيا

والله يا مروة يا بنتي انا بحبك اوي عشان عمري ماطلبت طلب واخرتيه عني

حضرتك تؤمري الجيران لبعضيها

ربنا يسعدك يا رب . هي فين ام فتحي مش باينة بقالها كام يوم

في مشوار كدة

اه مشوار كدة فين يعني

في مشوار يا طنط في مشوار ولما تيجي هخليها تيجي لحضرتك عشان تزورك

بس غريبة اوي الموضوع ده . ام فتحي مش عادتها تسيب بيتها وتروح عند حد

البيوت اسرار يا طنط

اسرار ! هو فيه اسرار من ورايا . يا لهوي . ام فتحي راحت فين ؟؟؟؟؟؟؟؟؟؟؟؟؟؟؟؟؟؟؟

عن اذن حضرتك يا طنط عشان هعمل الاكل

اقفلي اقفلي يا مروة اقفلي

ياترى انتي فين يا ام فتحي . ابنك ومرات ابنك ودوكي فين يا ام فتحي .

يا دي الخيبة . اروح فين واجي منين . انا الفار بيلعب في عبي ومش مستريحة


تيتة
عايز ايه يا واد

انا مش عايز القناة دي انا عايز اتفرج ع الكرتون

لأ ما فيش كرتون . مش شايفني بتفرج على البرنامج

يا تيتة ده معاد الكرتون اللي بحبه

حبك برص . اسكت يا واد خليني اتفرج

يا تيتة انا عايز الكرتون بقى ماليش دعوة

بقولك ايه يا واد انت ما تقعدش تتنطط فوق دماغي زي ابو قردان كدة . مافيش كرتون

يووووووووووووووووووووووووووه انتي هتمشي امتى

مشش في ركبك يا قليل الادب

يا ماما انتي يا ماما

عايز ايه يا عمار

عايز اتفرج ع الكرتون وتيتة مش راضية

معلش يا حبيبي هنعمل ايه . لما تمشي ابقى اتفرج براحتك

هي هتمشي امتى

وانا ايش عرفني ياابني

ماليش دعوة يا ماما انا عايز الكرتون

طب خلاص خد محمد وخالد وروحوا اتفرجوا مع مهاب ابن طنط مايسة

لأ . هروح من غير محمد وخالد

ليه ان شاء الله

عشان محمد وخالد بيعملوا شقاوة وبيضربوا اخوات مهاب الصغيرين وطنط مايسة بتطردنا كلنا

لا خدهم معاك انا هتصل بطنط مايسة اقولها

الو ايوة يا مايسة

جرا ايه يا ايناس . بعتالي الفريق بتاعك كله ليه يا حبيبتي . مش كفاية عليا دوشة ولادي .

هو انتي كل ماتحبي تريحي دماغك تبعتيلي عيالك . هو انا ناقصة

 

معلش يا مايسة اصل العيال عايزين يتفرجوا ع الكرتون وحماتي مش راضية

هي حماتك عندك

شوفتي الخيبة يختي

وايه اللي جابها

زعلانة مع ابنها اللي عايش معاها هو ومراته

جتك خيبة سلفتك انصح منك حدفت حماتك عليكي عشان هي تعيش

من غير مشاكل وتاخد راحتها مع جوزها

 

معقول يا مايسة

ايوة طبعا .انتي ماتعرفيش شغل السلايف اسأليني انا . حاولي تطفشي حماتك بأي طريقة

اطفشها ازاي قوليلي

سلطي عليها العيال يزهقوها

يا حبيبتي دي هي اللي زهقت العيال وطفشتهم من الشقة

ربنا معاكي بقى اصبري

.
.
تررررررررررررررررن ترررررررررررررررررررررررن

الو ايوة يا ماما

ازيك يا مروة يا حبيبتي

الحمدلله يا ماما بخير

ها طمنيني الاحوال هديت بينك وبين حماتك

لأ يا ماما الاوضاع اتعقدت اكتر

لا حول ولا قوة الا بالله . ليه بس كدة يا حبيبتي . حصل ايه

فتحي شد معاها شوية بسببي وهي طبعا زعلت وخدت هدومها وراحت عند ممدوح

وانتي سبتيها تمشي يا مروة بالسهولة دي

اومال كنتي عايزاني اعمل ايه بس يا ماما

كنتي حايلتيها شوية وهديتيها وبوستي على راسها عشان ما تمشيش والمواضيع تكبر

اللي حصل بقى يا ماما

مافيش حاجة اسمها اللي حصل يا ماما . روحي صالحيها انتي وفتحي ورجعيها بيتها عيب كدة

فتحي بيتصل بيها مش بترد عليه

يروح يجيبها بنفسه وانتي معاه

يروح هو لوحده يا ماما . انا مش هقدر اروح

مش هتقدري ليه ان شاء الله

خايفة يا ماما لحسن تهيني وتكسفني قدام مرات ممدوح

حتى لو حصل يا ستي يبقى عملتي اللي عليكي وبينتي نواياكي الطيبة .

ولا عايزة حماتك تقول انك ما صدقتي سابت البيت

 

والله يا مروة لو عملتي كدة وجت منك انتي المبادرة وطلبتي من جوزك

انك عايزة تروحي تصالحي امه وترجعيها جوزك هيشيلهالك جميل

طول العمر ويعرف اصلك الطيب وهيفضل

 

فاكر موقفك الجميل ده طول العمر

خلاص يا ماما حاضر من عيوني لما يجي فتحي هيلاقيني لابسة وجاهزة

واعملهاله مفاجأة واقوله يلا بسرعة نروح نصالح مامتك ونرجعها البيت

 

ايوة كدة . هي دي مروة بنتي حبيبتي اللي ربيتها

ربنا يخليكي ليا يا ماما ومايحرمني من نصايحك ابدا

ويخليكي ياحبيبتي ويصلحلك حالك يارب ويرزقك بالذرية الصالحة قريب وتفرحينا

.
.
.
تيتة حبيبتي انا جيت . وحشتيني هاتي بوسة

اهلا يا سلمى يا حبيبة تيتة خدي عشر بوسات يا حبيبتي

خدي واحدة شيكولاتة يا تيتة

ياخد عدوينك يا بنت ابني . جبتيها منين الشيكولاتة دي

من عند تيتة صفصوفة

مين تيتة صفصوفة دي اللي بتفرق شيكولاتة ؟

قصدها على ماما يا طنط

هي امك اسمها صفصوفة اليومين دول . مش كان اسمها صفية البراوية

بندلعها يا طنط

انا بحبك اوي يا تيتة وعايزاكي تقعدي معانا على طول

 

تسلمي يا حبيبتي طول عمرك حنينة ولسانك حلو زي عمتك غادة .

حتى سبحان الله طالعة زي القمر شبهها

 

ايوة فعلا يا طنط غادة امورة خالص لكن هالة ودينا شبه حضرتك بالظبط

اخرسي قطع لسانك انا شبه هالة ودينا . اصلك ما شوفتنيش في شبابي كنت ازاي

الحمدلله اني ماشوفتكيش

بتقولي ايه يا بت

 
.

ونكمل في الحلقة الثانية عشر بإذن الله
.
إلى اللقاء في الحلقة الثانية عشر

.
.
.
بقلم الكاتبة هبة نور

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى