نشرة أخبار المتجوزين
سيداتي وستاتي اللي قاعدين قدام شاشتنا العامرة
.
يجعل بيوتكم عامرة
.
يجعل البط والوز والديوك الرومي ماتفارق سفرتكم ابداً
.
ويبعد عن بيوتكم الفقر والنحس الدكر
.
ويجعل رجالتكوا خواتم في صوابعكو الصغننة قولوا آمين
.
معاكم حشرية الرخمة من قناة مكسورين الجناح
.
هقولكو موجز الاخبار وهاروح اشرب كوباية شاي واجيلكوا بالتفاصيل
خناقة بين عواطف وحسين عشان طلبت زيادة في المصروف عشان مرتبه زاد
.
يادي الغلب ياولاد
.
.
.
.
.
.
.
معاكو حشرية الرخمة أنا روحت شربت الشاي وحبست بسندوتشين كفتة وجيت أهو
تعالوا نشوف الاخبار بالتفصيل
جيران عواطف وحسين صحيوا على خناقتهم وصوتهم العالي وبهدلة متبادلة من الطرفين
ال عشان الست عواطف شايفة جوزها مرتبه زاد وهي عايزة زيادة في مصروف البيت
معانا على الهاتف مراسلتنا الحاجة أم محمد من قدام شقة عواطف وحسين
ايوة يا ام محمد
ام محمد انتي سمعاني ياختي
الصوت بعيد يا ست حشرية
الصوت بعيد ولا انتي اللي انطرشتي
علي صوتك يا ست حشرية اصلهم ياختي بيتخانقوا بصوت عالي وانا مش عارفة اسمعك كويس
هما لسة بيتخانقوا يا ام محمد
اه ياختي لسة بيتخانقوا والجيران ملمومة
طب خلينا نكلم حد من الجيران نسألهم
استني لما استنضفلك حد
تعالي ياست
ياحلاوة انتوا هتطلعوني في التليفزيون
ايوة ياختي . كلمي الست حشرية الرخمة
ايوة ياست حشرية معاكي خالتك أم ودان
أهلا يا خالتي ام ودان احكيلنا سمعتي ايه بودانك
بصراحة احنا زهقنا من الست دي ومن عمايلها المطينة
ازاي ازاي احكيلي
كل شوية طلبات طلبات مش بتبطل
وجوزها مش ملاحق على طلباتها
الراجل طلبت منه تدخل العيال مدارس لغات قالها حاضر
اعملنا اشتراك في النادي بدل لعب العيال في الشارع زي المتشردين قالها حاضر
ركبلي تكيف عشان الدنيا حر نار قالها حاضر
غير الطلبات اليومية وكل يوم والتاني تجرجره على الهايبرات وتجيب شنط فيها شيئ وشويات
وبعد ده كله عايزة زيادة في مصروفها كمان
لأ لأ لأ دي كدة ست مفترية ومش تمام إديني أم محمد يا أم ودان
ايوة ياست حشرية كانت معكم ام محمد من قلب الأحداث
شكرا يا ام محمد مانجلكيش في حاجة وحشة ياختي
********************
الكاتبة هبة نور
غداً
أحمد ضرب منى عشان حرقتله البنطلون
تستاهل البعيدة عامية القلب والنظر
انتظرونا غداً الساعة 11 مساءً بتوقيت القاهرة كل يوم خبر جديد
