ترفيهمسلسل أم فتحي

مسلسل أم فتحي الحلقة السادسة عشر

 

 الحلقة السادسة عشر


ياست مروة
يا مروة هانم
ياهانم يللي عاملة مش سامعة

نعم يا ماما نعم

بقولك ايه مش ملاحظة أن البيت بقاله كتير ما اتنضفش والموبيليا كلها تراب

والله يا ماما تعبانة ومش هقدر اشيل حاجة من مكانها

وما تقدريش ليه

الدكتورة محذراني ان اشيل حاجة تقيلة

يا سلام . يا فرحتي بيكي وانتي والدكتورة . استفدت ايه انا بقى ان شاء الله . بقولك ايه انا اكتر حاجة اكرهها في حياتي دلع الستات اللي مالوش لزمة

انا بدلع برضو يا ماما ؟

ايوة بتدلعي ولاقية اللي مقويكي على دلعك . اتفضلي نضفي البيت من اوله لاخره وأياك الاقي ذرة تراب واحدة

يا ماما ……………

بلا ماما بلا بابا بلا كلام فاضي . ايه . ماحدش قادر عليكي ولا ايه

طيب انا هكلم فتحي يشوف شغالة تيجي حتى ولو مرة في الأسبوع

انا يا حبيبتي ما بحبش الشغالات ولا عمري دخلتهم بيتي . مابحبش حد غريب يدخل عندي ويعرف اسرار عيشتي

طيب وانا اعمل ايه . عشان انضف البيت يبقى لازم هبذل مجهود وده خطر على الحمل

ماليش في الكلام ده اتصرفي . وساعة واحدة والاقي البيت زي الفل والا مش هيحصل طيب

ياربي اعمل ايه بقى اوووووووووووف . انا هكلم ماما تشوفلي صرفة

ترررررررررررررررررررررن تررررررررررررررررررررررررررررن

الو ايوة يا مروة يا حبيبتي

ايوة يا ماما ازيك

ايه يا حبيبتي عاملة ايه واخبار الحمل ايه معاكي

شكله مش هيكمل يا ماما

بعد الشر يا حبيبتي ليه بتقولي كدة بس . هو انتي حاسة بحاجة . طمنيني يا مروة

الست حماتي عايزاني انضف البيت وانفض الموبيليا واشيل واحط وان شاء الله بقى يبقى عليه العوض في الحمل

لا حول ولا قوة الا بالله . طيب ما تشوفوا شغالة

مش راضية

يعني ايه مش راضية

بتقول مش بتحب حد غريب يدخل البيت

استغفر الله العظيم .طيب يا مروة هبعتلك واحدة من اخواتك

يا ماما ما تتعبيهومش

يا حبيبتي انتو اخوات وليكوحق على بعض . النهاردة يتعبوا عشانك بكرة تتعبي عشانهم .اومال اخوات ازاي

ربنا يخليكي ويخليهم يارب يا ماما

بس على شرط تخلي اختك تمشي قبل جوزك مايجي عشان مايصحش وجودها في وجود جوزك

حاضر يا ماما ان شاء الله

قولي لحماتك بقى ان اختك جاية وهديها بكلمتين

انا اللي اهديها برضو يا ماما . عموما حاضر
.
.

فتحيييييييييييييييييييييييييييييييي فتوح ازيك يا تيحا

مييييييييييييييييييييييييييين معقوووووووووووول ازيك يا أحمد

ازيك انت يا فتحي وازي احوالك . مبروك يا عم ع الجواز مع انها متأخرة اوي

من ناحية متأخرة فهي فعلا متأخرة على العموم الله يبارك فيك يا ابو حميد وعقبالك

الله يخليك يا فتحي

جيت من السفر امتى ؟

لسة واصل من يومين وقولت لازم النهاردة اعدي عليك في الشغل عشان اباركلك

واخبار شغلك ايه

الحمد لله كله تمام

اعمل حسابك هتتغدى معايا النهاردة

يا عم مافيش داعي انا قولت اجي اشوفك بس عشان واحشني

لا والله مستحيل انت هتتغدى معايا . ولا ما وحشكش اكل مصر

والله كان واحشني جدا واول ما وصلت لقيت الست الوالدة عاملالي كل الاكلات اللي بحبها

ربنا يخليهالك . هي صحتها عاملة ايه

بخير الحمد لله

طيب انا قدامي نص ساعة واخلص شغلي ونروح ان شاء الله . هتصل بالمدام اقولها تعمل حسابك ع الغدا

مورا انا خلصت الطبيخ وهمشي بقى

طيب استني اشربي حاجة حبيبتي

لأ عشان مااتأخرش . هي فين طنط ام فتحي عشان اسلم عليها قبل ما امشي

تلاقيها في البلاكونة اصلها بتحب قعدة البلاكونة جدا

طيب هروح اسلم عليها

انا ماشية يا طنط . عايزة حاجة

عايزاكي بخير يا حبيبتي شكرا تسلم ايدك على اللي عملتيه النهاردة

لا شكر على واجب ياطنط . السلام عليكم

وعليكم السلام ورحمة الله يا عسل انتي . سبحان الله اخوات وكل واحد شكل غير التاني . احلى من مروة الف مروة . الله يسامحك يا فتحي انت وذوقك

تررررررررررررررررن ترررررررررررررررررررن

ايه ده مين بيخبط . انا لسة هفتح الباب عشان اخرج لقيته بيخبط

تلاقيه فتحي يا هاجر ومعاه واحد صاحبه

يوه يا مروة انا اتأخرت وادي جوزك جه وانا موجودة

طيب انا هفتح الباب نص فتحة اخرجي جري وانا كمان طيران على اوضتي عشان معاه راجل غريب

طب يلا بسرعة

السلام عليكم

وعليكم السلام

مين دي يا فتحي

وانت مالك يا جدع انت ههههههههههههه

لا بجد والله مين اللي وشها في الارض وخدت السلم جري دي

دي اخت المدام

ماشاء الله خجولة اوي . انا كنت فاكر الصنف ده انقرض من الاربعينات ههههههههههه

لأ الحمدلله الصنف ده موجود وحمايا مربي بناته كلهم على الاخلاق والتدين والحياء

مخطوبة ؟؟؟؟؟؟؟؟؟؟؟؟؟؟؟؟
.
.
طب ادخل يا احمد اتفضل

يزيد فضلك يا فتحي . ها ما قولتليش هي مخطوبة

هههههههههه يا بني في ايه

بصراحة عجبتني جدا . زي القمر وخجولة كدة وباين عليها صغيرة في السن

عندها اتنين وعشرين سنة ولسة متخرجة طازة من كلية الاداب

هي خريجة اداب قسم ايه

اداب علم نفس

الله . عز الطلب . انا عندي عقد نفسية وهي اللي هتحلهالي ان شاء الله

هههههههههههه بتتكلم جد صحيح عجبتك اوي كدة

ايوة وخلاص انا نويت اخطبها ولو سمحت خلي مراتك تتصل بيها تقولها تروح على البيت على طول انا ماعنديش حريم تتأخر برا البيت وكمان بعد الجواز هنقبها . انا مااطقش حد يبص

لمراتي وخصوصا اذا كانت بالجمال ده

هههههههههههه ايه يابني خلاص انتي اعتبرتها مراتك

عجبتني عجبتني عجبتني اوي يا فتحي

طيب يا سيدي نبقى نتكلم بعدين في الموضوع ده

لا بقولك ايه . بعدين ازاي . انا اجازتي قصيرة جدا انا راجع الكويت كمان شهر وان شاء الله لو حصل نصيب هاخدها معايا

طيب خلاص ان شاء الله هتكلم مع المدام بتاعتي وهي تبقى تكلم اهلها تشوف رأيهم ايه واححدلك معاد مع والدها

ربنا يخليك يا فتحي . ده جميل مش هنسهولك

عيب يا ابو حميد انت ابن حلال وتستاهل كل خير

مين اللي عندنا في الصالون يا مروة

دا واحد صاحب فتحي

صاحبه مين

اللي بيشتغل في الكويت

اااااااااااااااااااه يبقى احمد عبد المنعم بتاع زمان . اما ادخل اسلم عليه

السلام عليكم

وعليكم السلام ورحمة الله ازيك يا حاجة

ازيك انت يا احمد يابني وازي احوالك

الحمدلله بخير

امك عاملة ايه

كويسة بخير الله يخليكي

اتجوزت ولا لسة

لا لسة

خلاص عروستك عندي . عروسة ايه بقى مااقولكش . قمر قمر قمر باين عليك امك دعيالك

تقصدي مين يا امي

اقصد نسمة بنت خالتك يا فتحي

نسمة ايه بس يا امي

شوف الواد هيبتدي يحقد عليك يا احمد . اصله اتقدم لنسمة يجي تلات مرات وترفضه . لحد ما جاله اكتئاب ويأس من الحياة واتجوز مروة

لالالالالالالالا يا امي احمد اختار خلاص ولسة شايف عروسته عندنا ع السلم

شاف عروسته ع السلم !!! بس ام اسماعيل ما بتفكرش في الجواز اليومين دول

يا امي ام اسماعيل مين بس . انا قصدي على هاجر اخت مروة

يا ربي على مروة واخوات مروة . يا عيني عليكي يا نسمة يا بنت اختي . هو انا كل ما احط عيني على عريس لنسمة تيجي مروة واخواتها يخطفوه

النصيب يا حاجة . ادعيلي بس توافق هي ووالدها

وهما يطولوا عريس زيك يا احمد يابني قيمة ومركز ويشرح القلب

الله يخليكي يا حاجة

طب يلا يا ابو حميد عشان نتغدا

الله . المدام بتاعتك نفسها حلو اوي في الاكل

لأ دي عروستك اللي طبخت هههههههههههه

ايه ده . وكمان طباخة هايلة . دانا امي راضية علية بقى هههههههههه

بس انا رأيي تشوف رأي والدتك الاول يا احمد لحسن تكون خاطبالك بنت خالتك انت كمان وانت ماتعرفش هههههههههههه

لأ يا عم . انا امي ربنا يبارك فيها مابتتدخلش في اختيارتنا

ربنا يقدم مافيه الخير

.
.
مروة

ايوة يا فتحي . ايه ضيفك مشي ؟

ايوة لسة نازل حالا . على فكرة هاجر عجبته اوي

يعني ايه عجبته اوي

يعني ياستي عايز يخطبها

حاجة غريبة اوي . هو لحق يشوفها اصلا عشان يعجب بيها ويقرر يخطبها كمان

لأ شافها وشافها كويس اوي وهي خارجة من الشقة وفضل ملاحقها بنظراته لحد ما نزلت السلم هههههههههههه

حتى لو كانت عجبته ما اعتقدش ان بابا وماما هيوافقوا

ليه بقى ؟

اولا لأن هاجر اصغر من سارة ومش ممكن بابا وماما يوافقوا يجوزوا الصغيرة قبل الكبيرة

ثانيا لان صاحبك بيشتغل برا مصر وبرضو متهيألي مش هيوافقوا ان هاجر تبعد عنهم

يا سلام . وحضرتك بقى عمالة تعتقدي وتخمني وهتضيعي فرصة هايلة زي دي من اختك

يا فتحي انا بقولك على توقعاتي

لأ بقى . ياريت تخلي توقعاتك على جنب وتكلمي باباكي ومامتك واختك على العريس

طيب هو انت تعرفه كويس يا فتحي ؟

طبعا يا بنتي . دا اعز اصدقائي وانسان متدين وملتزم وعلى خلق

هو بيشتغل ايه

بيشتغل محاسب في شركة ملاحة ومرتبه كبير

مش مهم مرتبه يكون كبير . المهم يكون حنين ورومانسي

يا سلام ع الشاعرية . ايه العيلة الرومانسية دي .

هو عنده كام سنة

اصغر مني بسنة حوالي اتنين وتلاتين سنة

يعني راجل عجوز زيك هههههههههههههههههه

يا سلام يختي يعني انتي اللي صغيرة اوي هههههههههه

يوه يا فتحي بلاش احراج بقى ههههههههههه

طيب يلا اتصلي بأهلك
لأ ما ينفعش الكلام في التليفون . ماتيجي نروحلوهم ؟

خلاص يا ستي البسي ونروحلوهم مع ان انا عارف ان الغرض الاساسي انك تشوفي مامتك

ماما بتوحشني اوي بجد يا فتحي وبابا واخواتي كمان

طب يلا البسي عشان نروح

على فين العزم ان شاء الله

رايحين عند اهل مروة

يا حلاوة . طب ما انتي حلوة اهو وقادرة تروحي لامك . اومال طول النهار عاملة تعبانة ومش قادرة وماشية بتسندي ع الحيطة يعني

والله تعبانة بس مضطرة اروح

ليه ان شاء الله خير . هي امك عيانة ؟

بعد الشر على ماما . هو انا ماازورش امي الا اذا كانت عيانة

احنا رايحين نكلمهم في موضوع احمد

يا واد اطلع من دول انتي وهي . ال يعني ابوها وامها ما يعرفوش . انتوا متفقين مع بعض من الاول ان امك تبعت اختك عشان صاحب فتحي يشوفها ويخطبها . هو انا مغفلة ولا مغفلة

والله ابدا .الموضوع جه بقدر الله يا امي

مش مصدقاك

طب خلاص على العموم اساسا الموضوع ما يخصناش وهنروح نكلم اصحاب الشأن

بس انا مش موافقة ع الجوازة دي

وانتي دخلك ايه بس يا امي

دخلي ايه ازاي . انا حماة اخت العروسة والعريس صاحب ابني . يعني ليا حكم ع الطرفين

طيب يا امي عن اذنك عشان نلحق نروح ونيجي على طول

ياخويا على طول ولا على عرض انا مالي . بس برضو انا مش موافقة ع الجوازة دي . ما عرفتش امشي كلمتي على ابني يبقى امشيها على صاحبه ان شاء الله

.
.
ها يا جماعة ايه رأيكو

والله يا فتحي هو اذا كان بالمواصفات وبالاخلاق دي يبقى انسان ممتاز

ايوة يا ابو مروة بس ازاي نجوز هاجر قبل سارة

وفيها ايه يا ام مروة . كل واحد وبياخد نصيبه . وسارة ان شاء الله ربنا يبعتلها ابن الحلال اللي يستاهلها

لأ انا بصراحة خايفة على مشاعر سارة . ازاي يعني نجوز اختها الصغيرة وهي لسة ما اتخطبتش حتى

اسمحيلي يا حماتي انا مش معاكي . انا رأيي من رأي عمي . ماينفعش تضيعوا فرصة كويسة زي دي من هاجر وصدقيني احمد ما يتعوضش

لأ لأ لأ يا فتحي يابني حماتك خايفة من بعد بنتها عنها هههههههههه

بصراحة ده كمان سبب . يعني يا ناس ابقى في بلد وبنتي في بلد وما اعرفش اطمن عليها واشوفها

يا ام مروة الست مكانها مكان جوزها . وياما بنات بيتجوزوا جنب اهاليهم ومع ذلك اجوازهم في قمة السوء وبيعاملوهم ابشع معاملة ووجود اهلهم مش نافعهم بحاجة

انا ادي بنتي لراجل يصونها ويتغرب بيها ولا اديها لراجل يهينها ووجودي جنبها ما يفيدهاش . الفيصل هو الدين والالتزام مش القرب والبعد

نعم الرأي يا عمي والله

طيب مش نشوف رأي العروسة الاول

ادخليلها يا مروة وكلميها على انفراد

 

—————————————————–

ونكمل في الحلقة السابعة عشر .. إلى اللقاء في الحلقة السابعة عشر

بقلم الكاتبة: هبة نور

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى