ترفيهمسلسل أم فتحي

مسلسل أم فتحي الحلقة السابعة عشر

 

الحلقة السابعة عشر


انا ادي بنتي لراجل يصونها ويتغرب بيها ولا اديها لراجل يهينها ووجودي جنبها ما يفيدهاش . الفيصل هو الدين والالتزام مش القرب والبعد

نعم الرأي يا عمي والله

طيب مش نشوف رأي العروسة الاول

ادخليلها يا مروة وكلميها على انفراد

ماقولتليش يا هاجر

نعم يا مروة

ايه رأيك في الشاب اللي شوفتيه النهاردة داخل عندنا

شاب مين وداخل فين . انا ماشوفتش حد

يا بنتي اللي كان مع فتحي

ما اخدتش بالي يا مروة والله . هو في ايه ؟

اصله عايز يخطبك

هو مين ده وعايز يخطب مين هو ايه الحكاية

بصي يا ستي الراجل اللي كان مع فتحي ده صاحبه وبيشتغل محاسب في الكويت ومسافر بعد شهر وعايز يتجوزك وياخدك معاه

ايه يا مروة اللي بتقوليه ده . اسافر مع مين . اسافر مع واحد ما اعرفوش واروح بلد غريبة . ايه الكلام ده

بصي بقولك ايه ده انسان هايل بجد وفتحي بيشكر فيه ومعجب بيكي جدا

معجب بيا ازاي وانا ما شوفتوش

ماهو ده اللي عجبه فيكي هههههههههه

يعني ايه

عجبتيه عشان خجلك وانك ما بصتيش في وشه حتى وانتي خارجة فلفتي نظره ليكي جدا

يا سلام . يقوم يقرر يتجوزني وياخدني ويسافر . بس انا بقى مش موافقة

تبقي عبيطة

ليه بقى

يا بنتي بقولك فتحي مرشحه وبيشكر فيه يعني مش هنرميكي لواحد من الشارع وكمان في ميزة مهمة جداااااااااااااااااااااااااااااااااااااااا

ايه هي

انك هتسافري معاه . يعني مافيش حماة تنكد عليكي ولا اخت جوز تأرفك في عيشتك ولا سلفة تقعد كل شوية تخمس في وشك

هتبعدي عن كل الهم ده وهتبقي انتي وجوزك في بلد لوحدوكو . قمة الرومانسية . يا بختك يا هاجر يا محظوظة يا هاجر هههههههههههههههه

هههههههههههههه ايه الحقد ده من اولها يا ست مروة

استخيري يا حبيبتي وردي علينا وكمان اتشاوري مع بابا وماما وربنا يقدم ما فيه الخير

طيب هو اسمه ايه

الله . دانتي ابتديتي تحنيله بقى ههههههههه

بس بقى يا مروة بتكسف

اسمه احمد يا ستي . الله . هاجر واحمد . اساميكو لايقة على بعضها خالص

عنده كام سنة

عنده اتنين وتلاتين سنة

ايه ده . دا اكبر مني بكتير خالص . عشر سنين بحالهم

مش مشكلة يا حبيبتي . الستات بيعجزوا قبل الرجالة . يعني فرق السن مناسب جدا

خلاص هصلي استخارة ان شاء الله

تررررررررررررررررررن ترررررررررررررررررررررررن

ايوة يا فتحي

ايوة يا احمد . حددتلك معاد بكرة مع ابو العروسة الساعة تمانية ونص مساءا وربنا يوفق ان شاء الله

ايوة كدة اهي دي الصحوبية ولا بلاش ههههههههه طيب هات العنوان عشان اخد والدي ووالدتي ونروح بإذن الله


فتحي

ايوة يا حبيبتي

شايف التفاح الأمور ده

ايوة شايفه

شكله حلو مش كدة ؟

تحبي اخدلك صورة جنبه يا حبيبتي ههههههههههه

لأ يا سيدي عايزاك تشتريلي عشان بتوحم عليه . ولا انت عايز الواد يطلع في وشه تفاحة

انا عيوني للواد وام الواد . حاضر حبيبتي

تررررررررررررررررن تررررررررررررررررررن

مين

انا فتحي يا امي

السلام عليكم ازيك يا ماما

وعليكم السلام يا الف اهلا وسهلا . اتأخرتوا ليه ان شاء الله

على ما اقنعنا العروسة واهلها

وايه الشنطة اللي في ايدك دي

دا تفاح طلبته مروة

وهو كل اللي تطلبه مروة تجري تجيبهولها . يابني حرام عليك هو انت قاعد على مطبعة فلوس

ياامي دي بتتوحم

يا حلاوة ياخويا . اللي بتتوحم تتوحم على حتة جبنة قديمة ولا شوية فول حيراتي مش تتوحم على تفاح . وجايب كام كيلو

تلاتة كيلو

. ليه ياابني تلاتة كيلو بحالهم تجيبهم للهانم . حرام عليك شقاك ياابني اللي عمال تبعتروا ع اللي يسوا واللي مايسواش ده. جبت الكيلو بكام

بتمنتاشر جنيه

يا وكستك في ابنك يا مديحة . تمنتاشر جنيه الكيلو . استنى احسبهوملك . تمنتاشر وتمنتاشر يبقوا ستة وتلاتين وعليهم تمنتاشر يبقوا !!!!!!!!!!!!!!!!!!! قلبي قلبي مش قادرة اقول .

دفعت اربعة وخمسين جنيه في شوية تفاح . حرام عليك يابني . حرام عليك توجع قلب امك . خد الهانم واخفى من وشي الساعة دي

حاضر . يلا يا مروة

سيب الشنطة بتاعة التفاح هنا . ولا انت جايبه للأميرة نازلي لوحدها

لأ يا امي هحطه في طبق الفاكهة في السفرا واللي عايز ياكل

أصيل يافتحي يابني
.
.
.
صباح الخير يا مروة

صباح النور يا حبيبي

هو التفاح اللي اشتريته راح فين ؟ انا لقيت طبق الفاكهة في تلات تفاحات بس

اقولك يا حبيبي . انا قلقت بالليل وقومت عشان اشرب لقيت مامتك بتعبي التفاح اللي في السفرا في كيس نايلون وجريت بيه على اوضتها

هههههههههههههههههههه معقول

معقول ونص

بس امي كريمة برضو سابتلنا تلات تفاحات هههههههههههههه

انت بتضحك يا فتحي

معلش يا حبيبتي . ست كبيرة وعقليتها كدة هنعمل ايه . انا هجيبلك غيره ما تزعليش

ماهي برضو هتاخده تخبيه

لأ ما تخافيش . خليه عندك في اوضة النوم

يا مروة

نعم يا ماما

ممكن يا مرات ابني يعني لو مافيهاش رزالة وقلة ذوق مني تعمليلي كوباية شاي . ولا مرواحك المطبخ فيه خطورة على الاستاذ البيبي كفالله الشر

لأ مافيش خطورة ولا حاجة حاضر

لو فيها خطورة ابعتلك تاكس يوديك ويجيبك من المطبخ ولا يهمك . احنا ما ورناش الا راحتك . انتي معنا في ايدي امينة

شكرا يا ماما . مالوش لزوم التاكسي . تحت امرك

هي مالها مرات ابني مكشرة في وشي ليه . زي مااكون قتلتيلها قتيل . اه يا مظلومة ياني . بسرعة يختي هو انتي لسة ماجبتيش الشاي

.
.
.
هاجر

نعم يا ماما

قولتي لسارة ان جايلك عريس

لأ

ليه يا حبيبتي

بصراحة يا ماما خايفة اقولها لتزعل

تزعل من ايه بس

يعني يا ماما عشان هي الكبيرة والمفروض انها تتجوز الاول

لأ مش مفروض ولا حاجة . اللي يجيلها نصيبها الاول هي اللي تتجوز الاول

طيب يا ريت يا ماما تقوليلها انتي . انا مش قادرة اقولها

سارة حبيبتي

نعم يا ماما

مش تباركي لهجورة

اباركلها على ايه يا ماما

جالها عريس عقبالك

ايه !!! عريس !!! عريس لهاجر

انتي اتضايقتي يا حبيبتي

انا ……… لا ……… لا انا ما اتضايقتش يا ماما ابدا انا فرحت خالص

انا عارفة انك هتفرحي لاختك يا حبيبتي . عقبال ما افرح بيكي يارب

لكن مين العريس ده وعرفتوه منين

صاحب جوز اختك

واشمعنى اختاروله هاجر

والله يا بنتي ما حد اختار لحد لحاجة . هو شاف هاجر عند مروة وعجبته

اه عشان كدة بقى الاجتماع السري بتاع امبارح بين مروة وهاجر

سارة . انتي زعلانة مش كدة ؟

لا يا ماما . بس كان المفروض هاجر ومروة يقولولي ولا انا مش اختهم يعني

معلش يا حبيبيتي . اديني انا قولتلك اهو . وبعدين احنا حتى لسة ما شوفناش العريس ولا نعرف هنوافق ولا نرفض

كفاية هاجر شافته يا ماما . كفاية رأيها هي

والله ما شافته . هي كانت نازلة من عند اختك وما شافتوش . انتي عارفة هاجر وخجلها

طيب في حاجة مطلوبة مني يا ماما . اصلي مشغولة ومش فاضية

لأ يا حبيبتي اسيبك تشوفي اللي وراكي

اهلا وسهلا يا استاذ احمد

اهلا بيك يا عمي

اهلا يا استاذ عبد المنعم اتشرفنا بيك وبالمدام

اهلا بيك يا استاذ صابر . احنا اللي زادنا شرف

فين العروسة يا ام مروة

حاضر هتيجي حالا

يا هاجر

نعم يا ماما

جهزتي ولا لسة

جاهزة يا ماما

طب يلا

يلا ايه

اخرجي عشان تشوفي العريس

يوه يا ماما هو لازم اشوفه ؟

اومال هتتجوزيه من غير ما تشوفيه

مكسوفة اوي يا ماما . طب هاتيلي صورته وخلاص

يلا يا بنت بلاش دلع

ايه ده انتي مال ايدك متلجة كدة يا هاجر

يابنتي يلا هو انا هجرجر فيكي كدة لحد الصالون ولا ايه

يلا سمي وادخلي

طيب دخلي سارة بدالي انا متنازلة عنه لاختي

بصي ما تخلنيش اتعصب عليكي يلا خلصيني اتفضلي ادخلي

طب اقولهم ايه

ما تقوليش حاجة . قولي السلام عليكم واقعدي

طب اقعد فين

يا ربي ياربي

طب خلاص يا ماما حاضر حاضر

ادخلي يا عروسة

السلام عليكم

وعليكم السلام ورحمة الله وبركاته

ماشاء الله

الله . عروستك زي القمر يا احمد

حماتك بتقول عليكي حلوة قوليها شكرا

مش هقول حاجة يا ماما انا داخلة اوضتي

يا بنت خدي هنا يا بنت

معلش يا جماعة اصلها مكسوفة انا اسفة خالص

ماشاء الله . ربنا يزيدها حياء

ربنا يخليكي يا ام احمد

والله انا اتشرفت بيكي يا ام مروة

ربنا يخليكي يا حبيبتي

ها ندخل في الموضوع بقى يا استاذ احمد

.
.

ترررررررررررررررررررررن ترررررررررررررررررررررررررررن


الو ايوة يا ماما عملتوا ايه

باركي لاختك وافقت على العريس وابوكي وافق الحمدلله

مبروك مبروك الحمدلله والله فرحتيني يا ماما

هو بصراحة شاب مهذب جدا ما يتخيرش عن فتحي جوزك وارتحناله خالص

هيجيب شبكة بكام

والله انتي عارفة يا مروة ابوكي مش بيدق على الحاجات دي . لكن العريس قال انه هيجيب شبكة بتلاتين الف

ماشاء الله ماشاء الله . ده واقع لشوشته بقى ههههههههههههههه

هاجر طيبة وتستاهل كل خير . وكمان قال انه هيجهز كل حاجة وعايزها بشنطة هدومها

ايه الجمال ده . طب والله فرحتيني اكتر

باباكي بقى قال انه هيجيب لهاجر بفلوس جهازها دهب عشان ما يظلمهاش

بابا ده ونعم الاب والله ربنا يخليه لينا

بس سارة شكلها متضايقة

انا كنت متوقعة يا ماما . معلش غصب عنها . ربنا يبعتلها ابن الحلال قريب ان شاء الله

يارب يا حبيبتي

اسيبك بقى دلوقتي مع السلامة

الله يسلمك يا ماما

فتحيييييييييييييييييييييييييييييييييييييييييييييييييييييييييييييييي تعالى اقولك خبر حلو

.
.
خير يا مورا يا حبيبتي

هاجر وافقت على العريس خلاص وتخيل هيجيب شبكة بتلاتين الف

ماشاء الله الف مبروك ربنا يتمم بخير .

هو مييييييييييييييين ده اللي هيجيب شبكة بتلاتين الف جنيه يا فتحي يا بني

ده احمد صاحبي هيجيب لهاجر اخت مروة

يا نهاري . ضحكو ع الواد واكلوه البالوظة زي ما اكلوهالك . وازاي امه توافق على الكلام الفاضي ده . حموات ايه اللي هتجيبلنا العار وتبوظ سمعتنا دي

يا امي واحنا مالنا

واحنا مالنا ازاي . اديني نمرة امه يا واد

عايزة نمرة امه تعملي بيها ايه بس

افهمها ووعيها باين عليها خام في عالم الحموات . دي زميلة ولازم اقوم معاها بالواجب

ربنا يتمملهم بخير

اندهلي مراتك اللي اسمها ايه دي

تعالي يا مروة كلمي امي

نعم يا ماما

هو العريس هيجيب كام اوضة وانتو هتجيبوا كام اوضة

لأ احنا مش هنجيب حاجة خالص . هياخدها بشنطة هدومها

هو انتوا حيلتكو هدوم اصلا عشان تحطوها في شنطة

ربنا يسامحك يا ماما

ايوة ايوة انا فهمت . اكيد لما جم وشافوا البؤس والفقر والمنطقة اللي انتو عايشين فيها صعبتوا عليهم ومارضيوش يخلوكوا تبيعوا البلاط عشان تجهزوا البت

جرا ايه يا ماما . هما اهلي شحاتين

لأ جعانين ومش لاقين تاكلوا . فقر وعنطزة . امك يوم فرحك كانت لابسة عباية واسعة زي البحر عليها . تلاقيها كانت شحتاها وتاني يوم رجعتها لاصحابها

شا يف كلام مامتك عن اهلي

معلش يا حبيبتي فوتي

والله انا مش عارفة اقوت ايه ولا ايه انا زهقت

.
.
تررررررررررررررررررررررررررررن تررررررررررررررررررررررن

الو ايوة يا احمد

ازيك يا استاذ فتحي يا عديلي ههههههههههههههه

ههههههههههههههههه باين عليك هتقع في اربيزي العمر كله . واهي ختمت بإننا اتجوزنا اختين

ربنا يديم المعروف يا عم ان شاء الله

ها ما قولتليش انطباع اهلك عن اهل هاجر

امي مبسوطة جدا وطايرة بأم هاجر وعمالة تقولي ان حبيتها جدا ست طيبة وبنت حلال

سبحان الله نفس رأي أمي فيها

وكمان والدي معجب بوالد هاجر واخلاقه وتربيته لبناته

ايوة فعلا عمي راجل محترم بجد وانسان هايل . ورأيهم ايه في العروسة

نفس رأي ابنهم طبعا هههههههههههه

ربنا يتمملك بخير ان شاء الله

ان شاء الله . اتفقنا هنكتب الكتاب الجمعة الجاية عشان كمان نلحق نخلص اجراءات السفر لهاجر

الف مبروك يا احمد . وياترى انا معزوم انا والمدام ولا لأ ههههههههههههه

هفكر وارد عليك ههههههههههههه

هههههههههههه ماشي ياسيدي .

 

امي

يا امي

انتي فين يا امي

انا هنا يا فتحي يا حبيبي . قاعدة في البلكونة وعايزة اشرب شاي ومش لاقية حد يعملي

لأ ازاي بقى . انا هروح اعمل كوبايتين شاي واجي اقعد معاكي ونحكي مع بعض للصبح زي زمان

الله . كانت ايام حلوة . قبل ماتيجي واحدة تشاركني فيك

هو في حد يقدر يشاركني فيك يا جميل . انت اللي في القلب يا باشا ومالكش شريك ههههههههههه

ربنا يخليك يا حبيبي ويجبر بخاطرك

طيب هروح اعمل الشاي واجي

تيجي لوحدك اوعى تجرجرلي حد معاك

هههههههههههه لأ ما تخافيش مروة نامت

احسن برضو عملت طيب

 

—————————————————–

ونكمل في الحلقة السابعة عشر .. إلى اللقاء في الحلقة السابعة عشر

بقلم الكاتبة: هبة نور


 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى