ترفيهمسلسل أم فتحي

مسلسل أم فتحي الحلقة الحلقة الثامنة عشر

الحلقة الثامنة عشر


انتي فين يا امي

انا هنا يا فتحي يا حبيبي . قاعدة في البلكونة وعايزة اشرب شاي ومش لاقية حد يعملي

لأ ازاي بقى . انا هروح اعمل كوبايتين شاي واجي اقعد معاكي ونحكي مع بعض للصبح زي زمان

الله . كانت ايام حلوة . قبل ماتيجي واحدة تشاركني فيك

هو في حد يقدر يشاركني فيك يا جميل . انت اللي في القلب يا باشا ومالكش شريك ههههههههههه

ربنا يخليك يا حبيبي ويجبر بخاطرك

طيب هروح اعمل الشاي واجي

تيجي لوحدك اوعى تجرجرلي حد معاك

هههههههههههه لأ ما تخافيش مروة نامت

احسن برضو عملت طيب

الشااااااااااااااااااااااااااااااااااي يا ام فتحي يا قمر

هات يا حبيبي تسلم ايدك

كنت عايز اتكلم معاكي شوية يا امي في موضوع كدة

خير يا حبيبي . عايز تتجوز على مراتك . من عيوني . الصبح اجيبلك ست ستها

لأ يا امي انا بصراحة زعلان من طريقة كلامك عن اهل مروة

هو انا قولت حاجة غلط يابني . انا بوصفهم بالاوصاف المناسبة

يا امي مايصحش تقولي المنطقة اللي هما فيها مش حلوة وتنقصي من قدر ابوها وامها بالشكل ده

انا يابني ما نقصتش ولا زودت انا شهدت بللي اعرفه عنهم

غلط يا امي كدة يا حبيبتي دول مهما كان اهلها وهي ماتحبش حد يغلط فيهم

جرا ايه يا فتحي هي الست هانم سلطتك على امك ولا ايه

مروة مالهاش دعوة

اومال مين اللي ليه دعوة . انت جاي تحاكمني ولا ايه يا فتحي . ايه يابني هو انت هتحجر على لساني . احط كمامة على بقى ومااتكلمش . مااخدش حريتي في بيتي ولا ايه

يا امي انا مااقصدش والله . انا بس عايز العلاقة بينكم تكون كويسة

بلا علاقة بلا نيلة . قوم يا واد من هنا وهات الكوباية اللي ايدك دي والله ما انت شارب شاي ولا قاعد معايا . يلا امشي لحسن احميك بالمية اللي في البراد دي

عن اذنك يا امي تصبحي على خير

ال خلاص الواد كبر وطلعله شنب وجاي يحاكمني . هو انت لولايا كان طلعلك شنب ولا بقيت راجل . ال ربي يا خايبة للغايبة
.
.


تن تن تن

ميييييييييين

افتحي يا مروة انا ماما يا حبيبتي

ماماااااااااااااااااااااااااااا ايه المفاجأة الجميلة دي يا حبيبتي وحشتيني

هو انا لحقت اوحشك يا بكاشة

والله يا ماما لما يعدي يوم مش بشوفك فيه بحس اني هتجنن واشوفك

ربنا مايحرمنيش منك يا حبيبتي

فين حماتك . انا جاية اعزمها على كتب كتاب هاجر

طيب ما كنتي اتصلتي بيها بدل ما تتعبي نفسك وتيجي يا ماما

ما يصحش يا حبيبتي . انا قولت اقدرها واجي بنفسي اعزمها

كلك ذوق والله يا ماما . اتفضلي في الصالون هندهالك حالا

ماما

عايزة ايه يختي

ماما برا جاية تعزمك على فرح هاجر

يا سلام . دي بتفهم في الاصول بقى على كدة

اهلا اهلا اهلا ام مروة يا الف خطوة عزيزة

اهلا يا ام فتحي ازيك يا حبيبتي

الله يسلمك من كل وحش . ايه يختي الغيبة الطويلة دي . بقالنا كتير ما شوفناكيش

مشاغل بقى يا ام فتحي . بس على طول بوصلك السلام مع مروة

الله يسلمك يا حبيبتي يا الف اهلا وسهلا . مروة يا حبيبتي يا مرات ابني

ايه !!!!!! حضرتك بتكلميني !!!!!!!!

ايوة يا حتة من قلبي . شوفي ماماتك تشرب ايه

تشربي ايه يا ماما

فنجان قهوة مظبوط يا مروة

حاضر يا ماما

بس القهوة وحشة ع الضغط يا ام مروة

انا الحمدلله ما عنديش ضغط

ما عندكيش ضغط ! ولا سكر ؟

الحمدلله ولا سكر

اومال عندك ايه

الحمدلله ربنا معافيني ماعنديش حاجة بفضل الله

انا بقى عندي الضغط والروماتيزم ورجلي طول الليل تنئح علية عقبال عندك

سلامتك الف سلامة ربنا يشفيكي ويعافيكي

آمين يارب

وازي غادة وهالة ودينا وولادهم

بخير الحمدلله كلهم كويسين

والاستاذ ممدوح ومراته وولاده

ممدوح كويس بس مراته تخينة اوي . بتاكل زي الغيلان بعيد عنك .

يا ستي مطرح ما يسري يمري

هو بيمري ولا بيتمر يختي . ستات تجيب المرض . هو انا جالي الضغط من شوية

ربنا يصلح حال الجميع ان شاء الله

اتفضلي القهوة يا ماما

تسلم ايدك يا حبيبتي

والله يا ام مروة انتي غالية عندي اوي ودايما اشكر فيكي . حتى اسألي مروة كدة , لو انا كدابة تكدبني . ولا ايه يا مروة

نعم !!!! اه اه طبعا طبعا

طب دانا اول ماشوفتك يا ام مروة قولت ام مروة دي مش هتبقى حماة ابني بس دي هتبقى اختي الكبيرة

اختك الكبيرة !!!!!!!!!!!!!! شكرا يا حبيبتي

بس يا ماما على فكرة مامتي عندها سبعة واربعين سنة وممدوح عنده اتين واربعين سنة تبقى ازاي اختك الكبيرة

شوفتي بنتك وطولة لسانها . يعني قصدك ايه يا يختي . قصدك ان امك من دور ولادي

لالالالا يا ام فتحي ماتقصدش . مروة وبعدين . يابنتي عاملوا الناس على قدر عقولهم

يا ماما دي عندها يجي ستين سنة ازاي تقول عليكي اختها الكبيرة

يا ستي انا جدتها كمان اذا كان ده يريحها . اسكتي بقى

منورة يا ام مروة

نورك يا ام فتحي . على فكرة كتب كتاب هاجر يوم الجمعة ان شاء الله ولازم تشرفينا

الف مليون مبروك فرحتلها اوي اوي اوي وخصوصا بالشبكة الغالية اللي هي تستاهلها . دنيا حظوظ

الله يبارك فيكي ويخليكي . في انتظارك ان شاء الله . عن اذنك

مع السلامة يا حبيبتي ابقى تعالي ماتغبيش

الله يسلمك

مع السلامة يا ماما

انتي بقى اياك تعارضي كلام حماتك ولا تغلطيها فاهمة ولا لأ . ولا انتي غاوية مشاكل ووجع قلب

حاضر يا ماما

سلمي على فتحي

الله يسلمك يا ماما مع السلامة

.
.
شوفت حماتك يا فتحي

مالها يا امي خير زعلتك في حاجة بعد الشر

لا والله دي طلعت اصيلة وكلها ذوق

الحمدلله

انا ندمانة على الكلام اللي قولته عنها بصراحة وزعلانة من نفسي اوي وضميري مأنبني وماعرفتش انام طول الليل

طب الحمد

انت بتحمد ربنا عشان ضميري مأنبني ومانمتش يا فتحي ؟

لا والله يا امي انا بحمد ربنا ان قلبك صفي لحماتي

هو ما صفيش اوي يعني بس احسن من الاول

خير يا امي الحمدلله

تصدق . خالتك سهير بقالي يجي تلات شهور ما اعرفش عنها حاجة وخايفة اقولها ان مراتك حامل

ليه يعني . هي دي حاجة هتستخبى

اصل انت ماتعرفش سهير . دي ممكن لو عرفت ان مراتك حامل تأجر عصابة تخطفها وتخلص عليها

اعوذ بالله يا حفيظ يارب . كل ده من الحقد وسواد القلوب . فيها ايه يعني لو اتمنت للناس امنيات طيبة . يمكن ساعتها ربنا يكرم بنتها

امنيات طيبة من سهير . دا انت متفائل اوي . يا ترى عاملة ايه يا سهير يختي انتي ونسمة

نسمة

نسومة

تعالي يا حبيبة ماما جايبالك خبر ماحصلش ولا هيحصل بعد كدة . حدث تاريخي

في ايه يا ماما

جالك عريس يا حبيبتي جالك عريس

بجد يا ماما . مين هو فرحيني

عارفة المعلم فرج بتاع الفراخ اللي على ناصية شارعنا

ايوة بشوفه لما بكون معاكي بنشتري فراخ . ماله ده

ما له ازاي . هو ده العريبس

يا خبر مش فايت . ازاي الكلام ده . ازاي يتجرأ اصلا ويطلب طلب زي ده

طب اسكتي بس اما احكيلك . النهاردة وانا بشتري الفراخ قالي عايز اسألك سؤال يا مودام

قولتيله خير يا معلم

قالي هي الكتكوتة البيضة اللي كانت معاكي دي تبقى مين

قولتله بنتي اللي طلعت بيها من الدنيا

قالي عدم الامؤاخذة هي متجوزة

قولتله لأ . قالي اصل عايز اتأهل وادخل دنيا ومش هلاقي احسن من بنتك

انتي بتقولي ايه يا ماما . انتي بتتكلمي ازاي . انتي عايزة فتحي ومراته يشمتوا فيا . يعني مروة اللي انا برقبتها تتجوز محاسب في شركة كبيرة وانا اتجوز فرارجي

يا دي فتحي وسنين فتحي . هو كان عبرك واحنا قولنا لأ . مش سابك تخبطي راسك في الحيط وراح اتجوز

ولو يا ماما . انا بقى لما اتجوز لازم اتجوز واحد اغيظ بيه فتحي . مش فرج الفرارجي

يابنتي فتحي ايه وخيبة ايه . هو كان فتحي هيأكلك فراخ اد اللي هيأكلهالك المعلم فرج . انتي عارفة الفرخة بكام . يا بنتي دا هيغرقنا فراخ وبيض

البيض هيبقى عندك بالكراتين تسلقي وتعملي الاومليت اللي بتحبيه والبيض العيون . دا بالنسبة لوجبة الفطار

ع الغدا بقى براحتك تعملي بط تعملي وز تعملي ارانب انتي حرا تاكلي والباقي ابعتيه لامك

يا ماما يا ماما الاكل والشرب مش كل حاجة

لأ كل حاجة . هناكل على حساب المعلم ونحوش . يا بنتي احنا فلوسنا ضايعة ع الفراخ والبيض . يعني لو وفرنا تمنهم ممكن نشتري دهب ولا حتة ارض ونبقى من اصحاب الاملاك

انا مش موافقة انا خريجة جامعة وده شكله اصلا مش متعلم

لا متعلم خارج من ستة ابتدائي وماحدش زيه

يا ماما حرام عليكي انا اصحابي متجوزين دكاترة ومهندسين

يا بنتي يا حبيبتي الدكاترة ريحتهم بنج وطول النهار يخرجوا من عملية يخشوا عملية والمهندسين طول النهار لابسين الخوذة الحديد ومقضين اليوم في المواقع ومش فاضين لستاتهم

لكن ده راجل بيتعامل مع الطيور يعني رومانسي ورقيق وكله عواطف

انا مش موافقة . ده عريس مش مناسب

انا بقى موافقة ورأيي هو اللي هيمشي . كفاية ابوكي اللي من ساعة ماطلقني وهو رامي همك علية ومابيسألش عليكي ولا معبرك . انا خلاص تعبت

هو عشان تعبتي مني تقومي ترميني الرمية دي

بقولك ايه انا مش عايزة اسمع كلام . الراجل جاي بكرا هو وامه

كمان امه عايشة

احمدي ربنا هيبقالك حما زي بقيت الخلق

.
.


.
ترررررررررررررررررن ترررررررررررررررررررررن

مين

المعلم فرج يا تنت أمو نوسمة

اهلا اهلا اهلا يا معلم اهلا وسهلا ازيك يا حاجة ام فرج

اسمي الحاجة بطة يختي

اهلا بيكي يا حاجة اهلا وسهلا

استني ما تقفليش الباب يا تنت . الصبي بتاعي معاه قفص فراخ بلدي هدية من المحل عربون محبة وقبول . ادخل يا مرزوق

احط القفس فين يا معلمي

اسأل تنت أم نوسمة

ايه الهنا والعز دا كله . دحله المطبخ يا خويا على ايدك اليمين . تعيش وتجيب يا معلم

توشكري يا تنت . اومال فين الكتكوتة

حاضر هندهلها حالا . نورتونا

نورك يا تنت

تعالي يا نسمة سلمي على العريس وامه

اهي ياما اهي الانوسة نوسمة اهي

هي مالها عاملة زي الفرخة الدايخة كدة

سلمي يا نسمة يا حبيبتي

ازيكو

مافيش زينا حد يا عروسة ابني

ايه رأيك ياما في الانوسة نوسمة

بصراحة يا ام العروسة المعلم فرج ابني عمال يحكي ويتحاكي عن نسمة وجمال نسمة بس بصراحة خدنا فيها مقلب

نعم . كمان مش عجباكي

بس يا نسمة . قصدك ايه يا حاجة بطة

بصي يا حبيبتي انا عمري ما ادخلت لعيل من عيالي في جوازة . بسيبهم يختاروا براحتهم ويشيلوا الطين

كلك ذوق

امي ما تقصدش يا تنت ام نوسمة . هي بس ابوها كهربائي وكلامها صادم للعواتف

عواتف . شوفتي العواتف دي ياست ماما . دا مابيعرفش يتكلم . جاهل جاهل يا ناس

اسكتي خالص هتتجوزيه يعني هتتجوزيه . ندخل في الموضوع بقى يا معلم

موضوع ايه يا ام العروسة . هو انتوا ماعندكوش رجالة يتكلموا مع المعلم فرج ابني ولا ايه

احنا يا حبيبتي عيلتنا كلها رجالة

هما فين يا حبيبتي ماشوفناش منهم ولا واحد يعني

هتشوفيهم ان شاء الله

هي ابوها ميت

لأ ابوها مطلقني

وطلقك ليه ان شاء الله

وانتي ايه دخلك في الموضوع ده

دخلي يعني ايه . دا نسب ولازم اعرف كل حاجة

جرا ايه يا اما هو انا كل مااروح اشوف عروسة تبوظيلي الموضوع . حقك عليا يا حوماتي

الله يجبر بخاطرك يا خويا

طب احنا هنأجل الكلام لحد ما تجيبولنا شنب نقعد معاه . بالإذن

اذنك معاك ياخويا

هعمل ايه واسوي ايه . مش هينفع اكلم ابوها . دا رميها ومابيسألش فيها . اكلم مين اكلم مين . هكلم مديحة اختي حبيبتي تتصرف وتقف جنبي

 

—————————————————–

ونكمل في الحلقة التاسعة عشر .. إلى اللقاء في الحلقة التاسعة عشر

بقلم الكاتبة: هبة نور

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى