ترفيهمسلسل أم فتحي

مسلسل أم فتحي الحلقة الرابعة والعشرون

الحلقة الرابعة والعشرون


وبعدين في مراتك دي يا فرج اللي عمالين نعلف فيها من غير ما ترمي انتاج

ياما كله بأوانه ياما الصبر حلو

انا بصراحة ما عجبنيش حالها واديتلها كلمتين في جنابها

ايه ياما . مالك ومال نوسمة ياما . خفي عليها شوية دي مش حملك

وانت مالك زعلان اوي كدة

ياما دي مراتي ياما . ولما تزعليها تبقي بتزعليني

طيب يا ابو قلب حنين . اما اشوف هنصبر عليها لإمتى

الصابرين بخير ياما . بالإذن . عايزة حاجة

عايزاك طيب يا حبيبي . بالسلامة

صباخ الخير يا معلم فرج

صباح النور اهلا يا مودام فاتن .طلباتك ؟

عايزة فرختين حلوين كدة الفرخة ما تقلش عن كيلو ونص

شوف طلبات المودام يا مرزوق ونضفلها الفراخ كويس

بصراحة يا معلم مابحبش اخد فراخ غير من عندك . كفاية امانتك في الميزان

حد الله بينا وبين الحرام يا مودام


ربنا يكرمك ويخلف عليك بالحلال دايما يا معلم . دانا كنت بجيب فراخ من عند واحد تاني

كان دايما يغشني وينقص في الميزان . اصل انا عندي ميزان في البيت

 

وبصراحة بطلت اجيب من عنده . وواحدة جارتي قالتلي اجي اخد من عندك وشكرتلي فيك اوي

الله يخليكي ويخليها يا مودام . خلصت طلبات المودام يا مرزوق

قربت اخلص يا معلمي


بصراحة مرزوق ماشاء الله عليه بينضف الفراخ ويغسلها وبيديهاني زي الفل .

انا من نضافة الفراخ ببقى عايزة اخدها من ايده احطها في الحلة على طول

 

لا دي تبقى نتانة منك عدم الامؤاخذة . لازم تغسليها تاني بالملح والخل

ماانا بعمل كدة

اتفضلي يا مودام الفراخ اهيه

واد يا مرزوق

روح يابني جيبلي علبة كشري ولا اي حاجة اكلها

ليه يا معلمي . هو مافيش اكل في بيتكو

لا ازاي . المودام عليها طبق سلامون ماحصلش ولا هيحصل وبتسلق بيض ما شوفتوش على حد . بس النفس طماعة بعيد عنك

يا عيني عليك يا معلمي . طب ماتروح تتغدا عند الحاجة والدتك


ما انا لو روحت عند امي وقولتليها اكليني عندك هتقولي يبقى مراتك خايبة ومابتعرفش تطبخ .

وانا مابحبش حد يغلط في مراتي ولا يعرف عيوبها

 

طب خلاص يا معلم تعالى كل معانا . امي طابخة شوية بامية يستاهلوا بقك

بامية ! ولا زمان يا بامية . ابقي سلملي عليها

امي ؟

لأ البامية

مساء الخير يا جوز بنتي

اهلا اهلا يا مرحب بالغالية أم الغالية . ازيك يا حوماتي

ازيك يا فرج يابني وازي نسمة

نوسمة زي الفل الحمدلله . كرسي لحوماتي يا واد يا مرزوق

اتفضلي يا مودام

شكرا يا مرزوق

تشربي شاي ولا شيشة يا حوماتي

لا يا حبيبي لا ده ولا ده كتر خيرك

بصراحة يابني انا كنت جايالك في طلب كدة ومكسوفة . ومش عارفة ابتدي ازاي

انتي تؤمري يا حوماتي . انا زي ابنك ومافيش بينا كسوف احنا اهل

والله يابني انت بتحرجني بذوقك . اصل بصراحة كنت عايزة منك مبلغ صغير كدة كنت محتاجاه . يادي الكسوف

تحت امرك يا حوماتي عايزة كام

خمسوميت جنيه بس وهرجعهوملك لما ربنا يفرجها


ترجعي ايه بس يا حوماتي . والله ماهم راجعين . وبعدين انتي ماكنتيش تتعبي رجليكي وتيجي .

كنتي عدم الامؤاخذة رنيتي علية وانا اجيبهوملك لحد عندك

 

يا حبيبي يابني . ربنا يباركلي فيك ويوسع عليك يارب

الحمدلله خير ربنا كتير يا حوماتي الف حمد والف شكر . اتفضلي يا حوماتي ولو عايزة اكتر قولي

ربنا يزيدك يابني كتر خيرك . كدة كويس اوي . طب سلملي على نسمة

بقولك ايه يا حوماتي

نعم ياخويا

اصل يعني عدم الامؤاخذة كنت عايز اقولك كلمتين ولساني مش قادر ينطقهم

قول يا حبيبي . هي نسمة مزعلاك في حاجة

يعني عايزك توصيها علية شوية . اصلها يعني بتديني حقوقي الشرعية بالعافية وانا بصراحة ماكنتش عايز اقولك بس الكيل فاض

معقول ! هي بتمنع نفسها عنك ولا ايه

لا يعني هي مرة توافق وعشرين لأ . وانا بصراحة بيصعب عليا منها

اخص عليها . والله ما هاسكتلها . انا هامشي من عندك واروحلها على طول

لا يا حوماتي بالراحة عليها دي مهما كان نوسمة برضوا
.
.
قفشتك يا نوسمة . ايه البورشام اللي بتبلبعيه ده كل يوم

دددددا دا دا . اصل انا عندي صداع

صوداع . كل يوم صوداع

طب هاعمل ايه بيجيني صداع كتير

اعترفي يا نوسمة البورشام ده بتاع ايه ولا اقولك انا

هو انت . انت . انت عارف

ايوة طبعا عارف ومراقبك من زمان ومارضيتش ابلغ عنك

تبلغ عني !!!!!!!! تبلغ عني ليه ان شاء الله


عشان مودمنة عدم الامؤاخذة وكل يوم اقول ياواد بكرة تبطل الاودمان بلاش تحرجها .

بس خلاص كان لازم اعرفك ان انا عارف عشان اوديكي

 

المصحة بتاعة المهافيف يظبطولك مخك اللي فوت

يا اخي ادمان ايه وكلام فاضي ايه قولتلك برشام صداع

يا هيبتك اللي ضاعت وسط المعلمين يا فرج . بقى نوسمة حرمنا المصون بتضرب بورشام وبتعمل دماغ

بقولك ايه يا فرج انا مش طايقة اشوف وشك اصلا وماتغيرش الموضوع . انت ازاي تروح تشتكيني لماما

اعملك ايه يا نسوم . عمايلك لا تسر عدو ولا حبيب . اشتكي لمين غير لامك . اهي ستر وغطا عليكي ومش هتطلع الكلام برا

يا اخي الحاجات دي تبع الحالة النفسية وانا حالتي النفسية من يوم ما اتجوزتك طين في طين اعملك ايه

 

لي بس كدة يا نسوم . انا قصرت معاكي في ايه .دانا لو عليا اجيب نجمة

من السما واحطها بين ايديكي . وفرحتي هتكمل لما يبقالي حتة عيل منك يقولي يابا

 

ياربي ياربي . اهو عشان انت عايزه يقولك يابا مش هجيبهولك . ايه رأيك بقى

ربنا اللي بيجيب مش العبد

مش عاجبك ابقى روح هاته من واحدة تانية

لا انا مش عايز عيال الا منك انتي وعندي امل ومش هاقطعه

خليك عايش في الوهم بقى

قصدك ايه يا نسوم

قصدي ان انا مش هاخلف طول ماانا قاعدة في المنطقة دي . انا كرهتها . مش معقول هتولد واعيش واموت فيها . دا عذاب

مالها بس المنتكة . اهلنا وحبايبنا حوالين مننا وتجارتنا وحالنا ومالنا فيها وزباينا الحلوين منها

بقولك ايه يا فرج . تعالى نبيع العمارة دي ونشتري فيلا شيك كدة في منطقة هاي كلاس

ايه يا نسوم هو الصوداع جامد اوي كدة عدم الامؤاخذة . نبيع ايه ونشتري ايه يا بنت الناس

يا فرج . يافرج انت عندك فلوس كتير وممكن تغير نشاطك ممكن نغير حياتنا كلها . لكن ما ينفعش نكمل بالطريقة دي

نشاط ايه . طب ماانا طول عمري نشيط وبصحى من بدري اعمل ايه تاني

تغير نشاط شغلك يعني تبطل شغلانة الفراخ والطيور دي

واتاجر في ايه عدم الامؤاخذة . انا مابفهمش غير في الشغلانة دي

ممكن تصفي شغلك هنا كله ونبيبع العمارة ونشتري فيلا وتعمل ريستورانت شيك كدة في منطقة راقية ونبقى حاجة تانية

تبقى فرج بيه وانا نسمة هانم . مش المعلم فرج وحرمه المصون اللي هتشلني بيها دي

انا مش موافق ع الكلام ده ومش داخل دماغي من الاخر . انا ايه يخليني اسيب شغلي وطيوري اللي بحبهم واروح افتح صالون حلاقة

صالون حلاقة ايه بس يابني ادم . ريستورانت يعني مطعم

ايوة ايوة . مطعم فول وطعمية يعني . طب ماتقولي كدة يا نسوم

لااااااااااااااااااااااااااااااااااااااااااااااا انت بجد صعب التفاهم معاك . انا عايزة انام

تنامي ! نوم العوافي يختي . انا نازل أأكل الطيور يا احلى من شوربة لسان العصفور . ال ابيع طيوري ال . جايلكو يا حبايبي
.
.
.
ترررررررررررررررررررن ترررررررررررررررررررررررررررررن

مين

منال صاحبة مروة

وبعدين بقى في المقاطيع اللي بيتحدفوا علينا كل شوية دول . افندم

السلام عليكم

وعليكم السلام

حضرتك حماة مروة

مع الالم والأسف والشكوى لله ايوة . انتي مين

انا منال صاحبتها

انتي مش كنتي هنا امبارح

انا ! لا والله انا اول مرة ازورها في بيتها

بيتها دا ايه يختي . هي ورثتني بالحياة ولا ايه . البيت ده بيتي وهي ضيفة عندي

طيب طيب حضرتك زعلانة ليه . ممكن اشوف مروة

أهي عندك متلئحة في اوضتها

طيب هي فين اوضتها



يادي الغولب . كل اللي يجي يقولي فين اوضتها . يعني اعمل سهم احمر واكتب تحتيه

الى اوضة مروة ولا اعلق يافطة على باب الاوضة واكتب عليها مرحب بالزوار

 

معلش يا طنط انا اسفة ممكن تشاوريلي ع الاوضة

شايفة يا حبيبتي البرواز الكبير اللي هناك

ايوة يا طنط

اول ماتوصليله اكسري شمال . اول اوضة تقابلك ع الناصية . بس بصي يمين وشمال وانتي بتعدي الشارع

شكرا يا طنط

 

ربنا يتوب علينا من اشكالكو . الواحد رجله وجعته من فتح الباب كل شوية .

ايه الناس اللي جايين يباركولها دول كلهم . زي مايكون ماحدش ولد زيها قبل كدة . اااااااااه يارجلي ياني

تن تن تن

مين

انا منال يا مروة

لا مش ممكن منووووووووووووووولة ادخلي يا حبيبتي

السلام عليكم

وعليكم السلام منولة حبيبتي ازيك وحشتيني

والله وحشتيني اكتر يا مروة ازيك حمدالله ع السلامة

اموووووووووووووووووووووووووووه امووووووووووووووووووووووووووووه

الله يسلمك يا حبيبتي . عقبال ما افرح بيكي وانتي متجوزة ومتهنية في بيتك ومعاكي البيبي بتاعك

يارب يا مروة يارب . يابنتي ادعيلي بضمير شوية ههههههههههههه

هههههههههههه والله بدعيلك انتي وسارة اختي دايما

فين الاستاذ صهيب

دانتي عرفتي اسمه كمان ههههههههه

اومال يابنتي . انا سألت مامتك وقالتلي واستأذنت من ماما وقولتيلها هروح ابارك لمروة واجي على طول . فين استاذ صهيب

نايم في سريره المجرم بعد ماسهرني طول الليل

تعيشي وتسهري يا ماما مروة هههههههههه بس حماتك دي صعبة اوي . كانت هتضربني هههههههههه

اومال انا اعمل ايه في الارف الي عايشة فيه

ايه ده . هي حماتك مطلعة عنيكي ولا ايه

اه والله يا شيخة كانت غلطة عمري اني وافقت اسكن معاها

بس يامروة انا عندي بنت خالتي وعايشة مع حماتها كويسين خالص

 

مش كل الناس زي بعضها . الحموات دي حظوظ . ربنا مايكتب عليكي حماة زي حماتي

ولا اخواته البنات واللي كل مايجوا مافيش واحدة تتحرك من مكانها وانا اللي اقف اخدمهم

 

والله يا منولة كنت حامل وتعبانة وبرضو بخدمهم وهما عاملين هوانم

معلش يامروة يبقى انتي اللي غلطانة

غلطانة في ايه

يا حبيبتي المفروض من الاول كنتي وقفتي كل واحد عند حده . مش تبقي ضعيفة ومستسلمة بالشكل ده

خلاص بقى يا منولة أهو عرفوا اني ضعيفة وغلبانة ومقدور علية

جتك خيبة . عرفوا دا ايه . غيري طبعك . وريهم الوش التاني وعرفيهم حدودهم . تعالي شوفي نسرين اختي واللي عملاه في حماتها واخوات جوزها .دول بيخافوا منها اوي

اززززززززززززاي فهميني

اسمعي ياستي

.
.
ها يا منولة قولي يا حبيبتي اعمل ايه

بصي بقى يا مروة اسلوبك مع جوزك يتغير نهاااااااااااااااااااائي

يعني ازاي

يعني دور الست المسكينة اللي تقول حاضر وطيب وتخلي جوزها يستقل بيها ده تبطليه

مش فاهمة

بصي يعني اول ما يدخل تقابليه بتكشيرة حلوة كدة ملو الوش تسد نفسه وتكرهه في عيشته

دي سهلة خالص من عنية

يقولك ازيك يا حبيبتي تقوليله زي الزفت

يقولك في ايه بس مين زعلك

تقوليله خليها في القلب تمرح ولا تخرج لبرا تسرح

هي مين دي يا منولة

هي مين ايه يا مروة . دا مثل شعبي

ههههههههههههه الله . لطيف اوي .قوليه تاني كدة

اقولك واحد تاني . ال جوا وبرا فرشتلك وانت حالك مايل وايه يعدلك

هههههههههه الله وده حلو اوي كمان . استني استني هجيب ورقة وقلم واكتب وراكي عشان احفظهم

هو انتي ماسمعتيش الامثال دي قبل كدة من امك ؟

ماما ! ماما تقول الكلام ده !!!!!!!!! ماما ماتعرفش غير جزاكم الله خيرا لما حد يعملها حاجة حلوة وسامحكم الله لما حد يزعلها

والله يا مروة امك دي تروح تعيش في عالم سمسم وتسيبنا في حالنا احسن

هي مامتك هي اللي بتحفظك الامثال اللطيفة دي ؟

ايوة طبعا . كل يوم تجمعني انا واخواتي وتحفظنا امثال وتخلينا نطبقها ودايما تقول خليكو جامدين عشان حمواتكو ما يستوطوش حيطتكم

يعني ازاي يعني .حيطة ايه . هو انتوا بتبنوا بيت

مروة . بطلي غباوة لحسن اقوم اروح ومش هعلمك حاجة

لالالا خلاص علميني بالراحة . طب انتي عارفة في مثل حفظته من ايناس سلفتي وكل مااشوفها اقولهولها وهي تتغاظ

مثل ايه ده ؟

بتاع مركب السلايف

اه اه عارفاه . دا قديم اوي . امي حفظيتهولنا من زمان ايام جواز نسرين

طيب خلينا في المثل مليني تاني

جوا وبرا فرشتلك وانت حالك مايل وايه يعدلك

جوا لبرا فرشتلك

جوا لبرا ايه يا مروة . اسمه جوا وبرا

اه سوري سمعت غلط . خلاص كتبته وهحفظه على مايجي فتحي

عايزاكي تنكدي عليه عشان يعرف قيمتك ويجيبلك حقك

طيب فتحي وخلصنا منه . اعمل ايه مع حماتي ؟؟؟؟؟؟؟؟؟؟

بسيطة اوي . سوقي العوج

بس انا مش بعرف اسوق ولا معايا رخصة

استغفر الله العظيم . يا حبيبتي يعني ماتسمعيش كلامها ودايما اتمردي عليها واقهريها

بس انا بخاف منها اوي . دي عصبية خالص

عصبية على نفسها يا حبيبتي مش عليكي . اسمعي كلامي وهتشوفي

خلاص ماشي . طيب واخواته هالة ودينا

عندهم عيال ؟

ايوة عندهم وبيجوا يبهدلوا البيت ويسيبوه زريبة

اضربيهم .موتيهم من الضرب

 

يا سلاااااااااااااااااام . وانتي فاكرة هالة ودينا هيسكتوا . يابنتي اصلك ماشوفتيش هالة .

دي عاملة زي مازينجر .شكلها زي بتوع كمال الاجسام

 

بلا خيبة دي منظر ع الفاضي . انا عارفة الاشكال دي . الواحد ينفخ فيهم يقعوا

الله . انا كدة هبقى سوبر مروة انا فرحانة اوي

اومال يا حبيبتي . اعملي اللي قولتلك عليه وهتشوفي الخوف والرعب اللي هيبقوا فيه منك

متشكرة اوي اوي اوي يا منولة . من النهاردة هنفذ مع فتحي . وبكرة هالة ودينا جايين وهيشوفوا اللي عمرهم ماشافوه

الى الامام يا مروة . ثبت الله خطاكي

.
.
بتدوري على ايه يا نوسمة

ماشوفتش البرشام بتاعي يافرج

شوفته ورميته وهحبسك في البيت عشان ماتجبيش منه تاني لحد ماتبطلي اودمان

يا نهارك مش فايت انت اتجننت هات البرشام هات البرشااااااااااااااااااااااااااااااااام البرشام بتاعييييييييييييييييييييييييييييييييييييييييييييي يا مامي اديني البرشام البرشااااااااااااااااااااااااااااااام

 

انا كدة اتأكدت انك مودمنة عدم الامؤاخذة . بشوف زمايلك المودمنين يقعدوا يصوتوا

ويتمرمغوا في الأرض كدة ويقولوا هاتوا البرشام . بس انا مش هضعف . لازم تتعالجي يا حرمنا المصون

 

اهئ اهئ اهئ . طب اطلع نام برا

نعم ! ليه ان شاء الله . حد في الدنيا يشوف القمر ده ويسيبه

يا ماميييييييييييييييييييييييييييييي

مروة

مروة

حبيبتي

روحي

عقلي

القمر مابيردش ليه

عايز ايييييييييييييييييييييييييييييييييييييييييه

مين دي !!!!!!!!!!!!!! مالك يا مروة

جوا وبرا فرشتلك يا مايل يللي مافيش حاجة بتعدلك

ايه !!!!!!!!!!!!!!!!!!!!!!!!!!!!!!!!! ايه الكلام البيئة ده . ايه اللي حصلك يا مروة

اللي حصل اني مش طيقاك . مش عايزاك . بتعصب لما اشوف وشك اللي يقطع الخميرة من البيت ده

لالالالالالالالا مش ممكن تكوني مروة مراتي المؤدبة المتربية . انا مش مصدق وداني . في ايه يا مروة سمعتي من منين الكلام المتدني ده

سمعته من حبايبي اللي بيحبوني وعايزين مصلحتي . يا مبهدلني يا فتحي . يا ذاللني لكلاب السكك يا فتحي

لا لا بجد مش ممكن انا مذهول . دي مش مراتي الرقيقة الهادية اللي بحبها

انا فتحتلك الباب اخرج نام برا برااااااااااااااااااااااااااااااااااااااا روح نام في حضن امك يا ابن امك . براااااااااااااااااااااااااا خد مخدتك ولحافك وبراااااااااااااااااااااااااااااااااااا

يا مروة ماتزقيش كدة امي قاعدة في الريسيبش عيب

براااااااااااااااااااااااااااا اخرج بقى يوووووووووووووووووووه الواحد مش قادر يزوقك اخرج بقى

يا مروة افتحي الباب عيب كدة نتفاهم مروة يا مروة

احم احم مساء الخير يا امي

انت معزل يا حبيبي !

انا !!!! لا . لا ابدا

اومال شايل مخدتك ولحافك ورايح فين

ابدا ابدا اصل الولد صهيب . صهيب ابني الصغير مانتي عارفاه . اصله بيعيط ومش عارف انام منه . قولت اخرج انام برا

 

يا وكستك في ابنك يا مديحة . ياريتني ماعيشت لليوم ده . يا خسارة الرجالة .

اطردت من اوضتك يا سيد الرجالة . ادخل احلق شنبك عشان مالوش لزمة تحتفظ بيه وتهزئوا معاك اكتر من كدة

يا امي

بلا امي بلا ابويا بلا خيبة . ال اكسر للست ضلع يطلعلها اربعة وعشرين . اديك دلعت وفي الآخر جت على دماغك

لا حول ولا قوة الا بالله . ايه اللي عمل فيكي كدة يا مروة . الله يسامح اللي كان السبب . انا داخل انام في الصالون . عايزة حاجة يا امي

عايزاك تجيب منخل وتحطه على وشك وتقول يا أرض اتشقي وابلعيني

.
.

 

—————————————————–

ونكمل في الحلقة الخامسة والعشرون .. إلى اللقاء في الحلقة الخامسة والعشرون

بقلم الكاتبة: هبة نور

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى