مسلسل فرحة الحلقة السابعة

الحلقة السابعة

 

نادر قرب عليهم ومعاه اتنين عصير:اتفضلي

فرحه بابتسامه : شكراً

نادين : ايه ده وانا ماليش

نادر: قومى هاتى لنفسك

نادين وهى بتبص لفرحه :…شايفه المعامله انا هروح لخطيبى حبيبى وهو يجبلى وقامت وفرحه بتضحك على طفولتها

شويه وبصت لنادرلقته بيبصلها ومتنح 

فرحه باحراج :خير حضرتك عاوزنى فى ايه

 

نادر : انتى على طول مستعجله كده

فرحه : قولت لحضرتك انى عندى شغل كتير … ياريت تدخل في الموضوع ع طول

نادر : ماشى يا ستى هريحك وهدخل في الموضوع ع طول … الدار هنا هتعمل فرح جماعى لبنات الدار اول الشهر وكنا حابين ناخد من عندك الفساتين

فرحه : هو انت شغال هنا فالدار ولا ايه صفتك فيها

نادر : انا والدى اللى اسس الدار وانا بشرف عليها بعد وفاته بس المديره المسؤله هي ابله صفيه … ثوانى هندهالك تتعرفى عليها ونتفق هنعمل ايه

فرحه :  ماشى

مشى نادر وبعد ثوانى رجع ومعاه ست كبيره في السن باين عليها الاحترام والطيبه

صفيه : السلام عليكم

فرحه وهى بتقوم من مكانها : وعليكم السلام

وسلمت على صفيه

صفيه : انتى بقى فرحه ….نادر بقاله شهر مش بيتكلم غير عنك

فرحه اتكسفت جدا وباحراج : انا

نادر بارتباك : انا هروح اجبلكم حاجه تشربوها

ومشى بسرعه

صفيه بابتسامه :اقعدى انتى واقفه ليه

فرحه بضيق : حضرتك ممكن تفهمينى اكتر انتم عاوزين منى ايه

صفيه : بصى يا ستى فى فرح جماعى زى ما نادر قالك وهيبقى فيه 8 عرايس …. عشان كده انا عاوزه منك 10 فساتين البنات تختار منهم ومتقلقيش هدفعلك الايجار اللى انتى عاوزاه بس حاولى تجيبى حاجات مش غاليه اوى عشان الميزانيه …. ها بقى ايه رئيك

فرحه بتفكير : انا معنديش مشكله بس ممكن اطلب من حضرتك طلب

صفيه : اه طبعا اتفضلى

فرحه : كنت عاوزه اجيب الفساتين من عندى … يعنى مش هاخد مقابل

صفيه باستغراب : ليه كده … كده هتبقى خساره كبيره ليكى

فرحه : حضرتك بتقولى انهم بنات ايتام يعنى مفيهاش حاجه لما اشترك معاكو بحاجه بسيطه زى دى … وبعدين ربنا بيعوض

صفيه : بس

نادر من وراها : انا شخصيا موافق

صفيه : خلاص ماشى اللى يريحك

فرحه بفرحه : بكره ان شاء الله حجبلكم الفساتين والبنات تختار اللى هم عاوزينه

صفيه وهى قايمه : انتى فعلا زى ما نادر قال عنك اسم على مسمى فرحه … ربنا يكرمك يا بنتى ويفرح قلبك

فرحه : ربنا يخليكى

مشت صفيه وفضل نادر زى العاده متنح لفرحه

فرحه : من الواضح ان حضرتك بتجيب فى سيرتى كتير

نادر بحنيه : اعمل ايه غصب عنى … انتى السبب

فرحه باستغراب : غصب عنك ليه ! وانا السبب فى ايه ؟

نادر : كل شويه القيكى نطه فى عقلى مش عارف افكر غير فيكى ولا اتكلم غير عليكى

فرحه بارتباك : انا اتاخرت اوى على فاطمه … والمحل لوحده بعد اذنك بقى

 وقامت بسرعه من مكانها

ونادر فضل يبص عليها من بعيد لحد مخرجت من الدار

 

…………………………………………………………………….

 

تانى يوم فالمحل

فرحه كانت قاعده طول الوقت سرحانه

فاطمه : ابله فرحه … انا جهزت الفساتين … فى حاجه تانيه اعملها

فاطمه : ابله فرحه انتى معايا

فرحه : ها بتقولى حاجه يا بطه

فاطمه : اللى واخد عقلك … بقولك انا جهزت الفساتين

فرحه : اه تمام … طيب جهزى نفسك عشان هتيجى معايا  عشان نظبط الفساتين على البنات

فاطمه باستغراب : طيب والمحل

فرحه : مش مشكله هنقفله هى كلها ساعه وهنرجع على طول

فاطمه : ماشى اللى تشوفيه … احنا المفروض نروح امتى

فرحه وهى تبص فى ساعاتها : يعنى كمان نص ساعه

فاطمه : طيب هروح اضبط المنيكان اللى بره قبل ما نمشى

شويه ودخل رجل كبير فالسن المحل وفاطمه كانت وقفه تظبط فالفستان

فاطمه باستغراب : السلام عليكم اى خدمه

الراجل وهى بيبص حواليه وبغيظ : هى فرحه موجوده

فاطمه : اه ابله فرحه موجوده جواه … اتفضل

دخل الرجل وهو عمال يبص على الفساتين ويقلب فى الحاجه بغيظ

فاطمه بضيق : ابله فرحه … فى واحد غريب اوى عاوزك

فرحه بصت باستغراب على الراجل وقامت من مكانها بفرحه : عمى انا مش مصدقه اهلا بيك اتفضل اتفضل

على : اخدتى فلوس ابوكى وضيعتيها على الكلام الفارغ ده

فرحه بضيق بعد متغيرت كل ملامحها : هى دى ازيك يا بنت اخويا

على قاعد على المكتب :اه طبعا ازيك عامله ايه

فرحه : انا الحمد لله كويسه … تحب تشرب ايه

على : اشرب ليه هو انا ضيف انا صاحب مكان

فرحه بضيق : طبعا يا عمى

على : اخبارك ايه واخبار شغلك ايه بيكسب كويس ولا هضيعى شقى ابوكى ع الفاضى

فرحه : متقلقشى ياعمى المحل ماشى كويس وشقى بابا انا اكتر وحده هقدر احافظ عليه

على وهو بيحاول يجر ناعم : انا بس بطمن عشان خايف عليكى

فرحه : لا متخافشى انا كويسه اوى الحمد لله

على بتهكم : طيب يارب دايما

فرحه : وانت اخبارك ايه … وكريم و مريم عاملين ايه

على : مريم اتجوزت عقبالك

فرحه : اتجوزت ! …. من غير معرف

على : اصل الموضوع جيه بسرعه ونسيت اعزمك وبعدين محبتش اضايقك

فرحه باستغراب : تضايقنى … ليه

على بابتسامه صفره : يعنى عشان هى لسه صغيره واتجوزت وانتى …….

فرحه : وانا ايه … قصدك يعنى عشان متجوزتش … ايه خايف على بنتك منى  فاكر انى هحسدها ولا حقد عليها … بالعكس والله انا كنت هفرحلها وهاجى ابارك واهنى

على : معلشى بقى اهو اللى حصل

 

فرحه  بنفاذ صبر : خير حضرتك افتكرتنى ليه دلوقتى … بعد ما اتخليت عنى بعد وفات بابا وماما ماتت من الحصره عليه ومن تصرفاتكم وسبتونى

عايشه لوحدى ولا حد بيسائل عليه … خير ايه اللى جد عشان تجيلى دلوقتى

 

على وهو بيحط رجل ع رجل : اصل انا فكرت فى وضعك ده وحاولت افكرلك فى حل يعنى بدل مانتى قاعده كده لوحدك وبتتصرفى على كيفك

وبتبعترى فالفلوس يمين وشمال … فانا فكرت انك لازم تتجوزى ويكون ليكى رجل يتحمل مسؤليتك

 

فرحه بضحكه كلها سخريه : وحضرتك بقى جايبلى عريس ولا لسه هننزل ندور

على : لا طبعا فى عريس … يعنى انا فكرت انى الم لحمى … مهو انتى لحمى برضه ومحسوبه عليا عشان كده انا قرارت اجوزك لابنى كريم

فرحه  فضلت متنحه شويه وهى مش مستوعبه كلامه

على : هو كان رافض فالاول عشان طبعا انتى عارفه هو اصغر منك بسنتين بس انا قدرت اقنعه واكيد انا عارف مصلحتكم انتم الاتنين اكتر منكم

فرحه : انت مجنون

على بزعيق : انتى بتقولى ايه

 

فرحه بعصبيه وبصوت عالى : انت مجنون … انت مش انسان طبيعى … لحمك ايه اللى عاوز تلمه وكان فين لحمك ده لما قفلت الباب فى وشى فى

اكتر وقت انا محتجالك فيه … كان فين لحمك ده اكتر من سنه وانا مقفول عليه باب وعايشه ولا الكلبه بين اربع جدران ولا ليه ولا اب ولا ام ولا اخ

… وجى انهارده بعد كل ده عاوز تجوزنى للعيل ابنك عديم الشخصيه عشان تستولى على كل حاجه وتتحكم فيا وفى فلوسى يلعن ابو الفلوس اللى

تعمل كده بين الناس

 

فرحه بدموع وانهيار اكتر : يلعن ابو الفلوس اللى تخلى عم يرمى بنت اخوه ويتبرى منها ويخاف منها على بنته وفالاخر جى دلوقتى عشان

يستعبدها ويجوزها لعيل اصغر منها وهو بيتشفى فيها …. انت كده بتبعترني مش بتلم لحمك

 

فرحه وهى بتحاول تسيطر على نفسها وتمسح دموعها : انا طول الفتره دى كنت بحاول برضه مكرهكشى واديك اى عذر

مع ان اللى عملته معايا ملهوش اى عذر بس انهارده بجد اتاكدت انك انسان انتهازى وانانى ومبتفكرشى غير فى نفسك وبس

 

 

على رفع ايده عشان يضرب فرحه بالقلم بس لقى ايد بتمسك ايده وبتزقه بعيد  

———–———-———————-————

ونكمل في الحلقة الثامنة .. الى اللقاء في الحلقة الثامنة

بقلم الكاتبة :ريم أحمد