ترفيهمسلسل أم فتحي

مسلسل أم فتحي الحلقة الرابعة

الحلقة الرابعة

 

 

ماقولتليش ياغادة ايه رأيك في عروسة اخوكي

امورة خالص ياماما وطيبة وحتة سكر

بقى كدة . طب وانتي ياهالة ايه رأيك فيها

ماارتحتلهاش ياماما . شكلها كدة بت سوسة وسهونة ومش ساهلة

نعم احساسي يا حبيبة امك . وانتي يا دينا

وانا هاحكم عليها ازاي من غير ما اعرفها يا ماما . احنا لسة ماشوفناش منها حاجة ربنا يستر

ان شاء الله يا ماما هتشوفي منها كل خير دي باين عليها طيبة خالص

وانتي ياست غادة بتدافعي عنها اوي كدة ليه

عشان شايفاكوا واخدين منها موقف من اولها وناوينلها على نوايا سودة

بس يابت يللي اسمك غادة انتي عشان كلامك بيقف في زوري

مانتي عارفة غادة ياماما . بتشوف كل الناس طيبين

انا مش عارفة البت دي طالعة لمين . ساعات بحس انها مش بنتي واتبدلت مني في المستشفى
.
.
.
.
.
ترن ترررررررررررررررررررن ترن

مين

انا منال ياطنط

اهلا يامنولة يا حبيبتي اتفضلي

الف مبروك لمروة يا طنط

الله يبارك فيكي يا حبيبتي وعقبال ما افرح بيكي يارب

ايوة يا طنط ادعيلي اوي هههههههههههههه

بدعيلك والله يا حبيبتي ربنا يعلم

فين مروة الوحشة اللي كلت الجاتوه لوحديها من غيري

ههههههههههه لأ ازاي بقى . انا شايلالك نصيبك من الجاتوه وهاروح

اجيبهولك . مروة في اوضتها

يا حبيبتي ادخليلها وانا هاحصلك بالجاتوه والحاجة الساقعة

شكرا يا طنط

تن تن تن

اتفضل

مبروك يا عروسة

منووووووووووووولة حبيبتي الله يبارك فيكي عقبالك يارب

تعالي قوليلي واعترفي منين جيبتي العريس ده عشان اروح اجيب واحد

هههههههههههه ده زميلي في الشغل

اه قولتيلي . ده كان بينكو غراميات بقى

اخص عليكي يا منولة . انتي تعرفي عني كدة برضوا . ده اكتر حاجة عجبته فيا ان ماليش

علاقة خالص بأي زميل من زمايلي غير في حدود الشغل

وحتى هو لما اعجب بيا وصارحني انه عايز يتقدملي ماكلمتوش ولا كلمة واديتله رقم بابا عشان يتصل بيه

يامرمورة يا حبيبتي انا عارفة اخلاقك كويس . انا بهزر معاكي

عقبالك يارب يا منولة

بقولك ايه ماتشوفيلي شغلانة معاكو في الشركة يمكن اطلعلي بعريس انا كمان هههههههههههه

ياحبيبتي نصيبك مستنيكي وهيجيلك اللي يستاهلك ان شاء الله

طيب هو عريسك مالوش اخوات عايزين عرايس

للأسف عنده اخ واحد ومتجوز . بس انا مش هسكت . بعد الجواز هخليه

يدورلك على عريس من اصحابه ولا قرايبه

وانا مستنيا يا ست مروة . اما اشوف هههههههههههه
.
.
.
.
.
.
.
امي

يا امي

عايز ايه

مالك بتردي عليا وحش كدة ليه

ما وحش الا عمايلك يا سي فتحي

ليه بس كدة يا ست الكل

بقى يا واد تروح تنقي العفش وماتاخدش امك معاك

يا امي انا عارف ان رجليكي وجعاكي وماحبتش اتعبك معايا

وطبعا الهانم وامها ضحكوا عليك ودفعوك دم قلبك

لا والله ابدا هما مالهومش ذنب . الاسعار هي اللي غالية جداً

جبت الصالون بكام

بخمستاشر الف

يا مصيبتي ! ليه هو انت فاكر نفسك هتتجوز الملكة نازلي ولا الأميرة فوزية . ايش حال ان

ماكانت حتة بت معصعصة ومالهاش لازمة

الله يسامحك يا امي

وجبت اوضة النوم بكام

بتلاتاشر الف

جتك تلاتاشر الف خيبة على خيبتك . مافاصلتش ليه في الاسعار عشان يخفضوهالك شوية

بالعكس انا فاصلت ودي الاسعار بعد التخفيض

يلا . هنقول ايه . كان ماله الصالون بتاعي اللي ماكملش خمسة واربعين

سنة ولسة بشوكه . لكن انت اللي حكمت

رأيك تبيع عفش امك وتجيب للهانم عفش جديد

دي عروسة يا امي ومن حقها عفش جديد

طيب يا حنين يا ابو قلب طيب . انا هقوم البس عشان اروح اصالح خالتك واعزمها ع الفرح

طيب ما تتصلي بيها

كل اما اتصل بيها تكنسل علية وتقفل الموبايل . كله من عمايلك . كان فيها ايه لو كنت اتجوزت

نسمة بدل ما اختي تزعل مني وتقاطعني

كله قسمة ونصيب يا امي

2015-08-20_153307

.
.
.
.
.
.

ترررررررررررررررن ترررررررررررررررررن

مين بيرن الجرس

افتحي يا سهير انا اختك مديحة

اختي مديحة ماتت

موتة لما تشيلك يا بعيدة .اسم الله عليا

امشي يا ست انتي من هنا احنا مش موجودين

مش موجودين ازاي وانتي بتردي من جوا

موجودين ومش هانفتحلك

كدة برضو يا سهير ياختي ياحبيبتي يا بنت ابويا وامي . داحنا راضعين لبن واحد

بلا لبن بلا مورتة . الدم بقى مية خلاص

ياختي افتحي بلاش فضايح فرجتي عليا اللي طالع واللي نازل

اديني فتحت . عايزة ايه

طب خليني ادخل ارتاح من السلم

اوف . اتفضلي

اه يا رجلي ياني

مين يا ماما اللي جه

اهي بلاوي بتتحدف علينا يا نسمة يابنتي

ازيك يا نسمة

اهلا ً


اخص عليكي دي مقابلة تقابلي بيها خالتك .على العموم انا جاية اعزمكوا على فرح فتحي

تصدقي انك ست ماعندكيش ريحة الدم . انتي جاية تغيظينا وتحرقي دمنا يا ست انتي

على العموم انا عملت اللي عليا وجيت لحد عندك يا سهير وان كنت

انا اهون عليكي انتي ماتهونيش عليا .

ونسمة بنتي زي ما هي بنتك وربنا يفرحنا بيها عن اذنك ياختي

.

.

.

.

.


مبروك يا توحا

الله يبارك فيكي ياغادة

مبروك يا ماما

الله يبارك فيكي يا غادة يا حبيبة ماما

ماقولتليش يا ماما انتي جبتي عباية جديدة تحضري بيها الفرح

ايوة يا دينا انا جبت عباية حلوة اوي كلها ترتر

2015-08-20_153229
ترتر ايه يا امي دي كدة هتبقى مخالفة شرعاً

بقولك ايه يا فتحي خليك في حالك يابني عشان قلبي ما يغضبش عليك

صحيح يا جماعة انتو هتجيبوا مين يغني في الفرح

انا بقول نجيب نانسي وهيفا

فكرة يا هالة دول هايخلوا الفرح يجنن . الواحد عنده كبت وعايز يطلعه

اه ياولاد خلاص اتصلوا بيهم قولوهم خالتكوا ام فتحي عايزاكوا وهما هيجوا يجروا

بس متهيألي يا ماما مش هيرضوا يجوا عشان دول بياخدوا فلوس كتيرة اوي اوي

ما انا عارفة يا هالة يا حبيبتي . انا هراضيهم وادي كل واحدة خمسة

جنيه في ايدها وهاعشيهم كمان واروحهم مبسوطين

وهاتجيبوا رقاصة

طبعا يا دينا هو الفرح يبقى فرح من غير رقاصة برضه يابنتي

ايه يا جماعة اللي بتقولوه ده . مغنيين ايه ورقاصة ايه . انا هعمل فرح اسلامي اسلامي اسلامي

ايه يابني اسلامي اسلامي !. هو احنا قولنالك هانجيب كفار قريش يغنوا . احنا هنجيب مسلمين موحدين بالله

وندر عليا اجيب الرقاصة كمان مسلمة هي والصبي بتاعها اومال ايه يابني انا مايخلصنيش

زعلك . هو انا عندي كام فتحي

حرام يا امي حرام تجيبي رقاصة خليعة معرية جسمها وبترقص على انغام الشيطان

والله يابني انت اللي حرام عليك تخوض في عرض الولايا . طب دانا حاطة عيني

على حتة رقاصة اخر ادب واخر اخلاق

كانت بترقص في فرح البت مشيرة . حتى من ادبها واخلاقها كانت بترقص وهي باصة

في الارض وبتترعش من كسوفها

وام ابراهيم من كتر ما انبسطت من اخلاقها كانت عايزة تخطبها لابنها بس الرقاصة مارضيتش

وقالت انا مااسيبش اكل عيشي عشان راجل

يا امي لو سمحتي انا مش هبدأ حياتي بمعصية تغضب ربنا . وبعدين سبحان الله دانتي حجيتي

بيت ربنا ووقفتي عند الكعبة ازاي تقبلي تعصيه

انت ياواد هتكفرنا عشان حتة فرح . طب ايه رأيك يا فتحي لو عملت فرح اسلامي مش هاحضره

. وكمان ليك عندي مفاجأة مش هسكنك معايا

ابقى روح بقى اعمل فرح اسلامي وخلي المسلمين يلمو من بعض ويجيبولك شقة

لا حول ولا قوة الا بالله

معلش يا فتحي انا هاقنعها ان شاء الله

ربنا يخليكي ياغادة دايما واقفة جنبي

.
.
.
.
منورين الفرح يا جماعة عقبال ولادكوا

مين الستات الجرابيع اللي داخلو القاعة دول يا هالة

اكيد قرايب العروسة يا ماما

اه والله يا بنتي عندك حق

يا جماعة عيب كدة ما يصحش

بس يا بت يللي اسمك غادة انتي عشان انا مبقوقة ومتغاظة منك يا بتاعة الفرح الاسلامي انتي واخوكي

ماله بس ياماما ماهو جميل اهو

اه ياختي جميل اوي . وان شاء الله هايسمعونا اغاني ولا هايسمعونا حاجة عن عذاب القبر عشان نتعظ

لأ ياماما هيشغلوا اناشيد

اناشيد ايه يعني يابنتي . انا حافظة نشيد بلادي بلادي اقوم اقوله ؟

لأ يا ماما اناشيد اسلامية

اهي الاناشيد ابتدت

ايه ياماما الفرح العجيب ده

هنعمل ايه يا دينا يابنتي حكم القوي ع الضعيف

ماما الحقي دول مشغلين نشيد بيقول افراح وقرود . قصدهم مين بقى ع القرود

قصدهم ع العروسة واهلها يا حبيبة امك

افراح وقرود ايه يا جماعة اسمها افراح وورود

لو سمحتوا ممكن اقعد جنبكوا

انتي تبع مين ياست

انا قريبة العروسة

يبقى ارجعي ورا في اخر القاعة .

ليه يعني

هو كدة واللي مش عاجبه يروح بيتهم

طب حضرتك بتزعقي ليه

انا حرة . فرح ابني وازعق براحتي

 


*************

ونكمل في الحلقة الخامسة بإذن الله
.
.
إلى اللقاء في الحلقة الخامسة

.
.
.
بقلم الكاتبة هبة نور

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى