ترفيهمسلسل الحب فى زمن الـــ لا حب

مسلسل “الحب فى زمن الـــ لا حب” الحلقة السادسة

 

الحلقة السادسة

 

تانى يوم ساره كانت قاعده على الفيس تكلم نور ومريم لقت تليفونها بيرن

جرت عليه بسرعه لقت رقم غريب توقعت انه كريم

ساره : الو

كريم : تصدقى صوتك حلو اوى فالتليفون

ساره وشها احمر وجاب كل الالوان وحبت تعمل عبيطه وتتقل شويه اشمعنا هو مكلمهاش امبارح

ساره: ايوه مين معايا

كريم : انا واحد بيحبك اوى ………عندك مانع انك تحبيه

ساره: احبه ازاى وانا معرفهوش

كريم :ياستى اعتبرينى كتاب مفتوح قدامك عاوزه تعرفى ايه

ساره : اول حاجه عاوزه اعرف مكلمتنيش ليه امبارح

كريم : ايه وحشتك

ساره ارتبكت : لا بس كنت عاوزه اعرف انت ليه مش عاوزنى اقول لحد؟

كريم : مفيش بس انا خايف عليكى

ساره باستغراب : خايف عليه؟؟

كريم : اه خايف حد يضايق بكلمه او على يغلس عليكى اصبرى شويه وانا هقول لكل الدنيا انك حبيبتى بس لما يجى الوقت المناسب

ساره بارتباك : حبيبتك

كريم : اه حبيبتى وروح قلبى وكل حاجه ليا فالدنيا دى

ساره : بالسرعه دى

كريم : سرعة ايه ………..انا بحبك من زمان من اول يوم شوفتك فيه بس كنت خايف منك

ساره : ليه انا بخوف

كريم : كنت خايف تصدينى او تكونى مش بتحبنى زى ما بحبك

سكتو شويه

كريم : ساره انا اول مره احب حد كده….. صحيح انا عرفت بنات كتيربس اول مره قلبى يدق واخاف على حد كده انتى متعرفيش انا خفت عليكى ازاى امبارح …………ساره انا بحبك

ساره بكسوف : وانا كمان

كريم : وانتى كمان ايه

ساره بكسوف : شكلى كده بداءت احبك

كريم : تعرفى انا مبسوط اوى اوى بجد

” ههههههههههه طبعا مبسوط ده انتى طلعتى اسهل مما كنت اتخيل “

 

………………………………………………………………………………..

 

وفات حوالى شهرين وساره وكريم كل يوم يتكلمو بالساعات بليل وساره اتعلقت جدا بكريم وحبته فعلا وهو كان مبسوط باللعبه الجديده وكل يوم كان بيفرح ويتغر اكتر بنفسه وبتمثيله وفى يوم كانو بيتكلمو

ساره : بقولك مش هينفع ياكريم

كريم : انتى مش بتحبنى

ساره : انت عارف كويس انى بحبك

كريم : اللى بيحب حد بيبقى عاوز يشوفه …….وانتى مش راضيه اهوه

ساره : ماحنا بنشوف بعض كل يوم يا فالنادى يا فالجامعه

كريم : مش كفايه انا مش بشبع منك عاوز اشوفك كل لحظه وكل ثانيه وبعدين واحنا فالنادى او الكليه مش بنبقى لوحدنا ومش بعرف اكلمك ولا ابص فعينك الحلوين دول

ساره سكتت وكان قلبها بيدق جامد مكنتشى عارفه تقوله ايه

كريم : عشان خاطرى ياله بقى هعدى عليكى ماشى

ساره بتردد: بس انا هقولهم ايه فالبيت

كريم: قوللهم خارجه مع اصحابى

ساره : بس انا متعودتش اكدب

كريم بزعل : خلاص يا ساره براحتك انا مش هغصبك على حاجه ياله سلام

ساره : استنى خلاص ماشى هتفوت عليا امتى

كريم بفرحه : حالا اهوه اصلك وحشانى اوى

ساره : طيب كمان نص ساعه هلبس وهرن عليك

كريم: ماشى ياحبيبتى متتاخريش عليا ………ياله سلام

ساره قفلت وقعدت شويه محتاره فاللى بتعمله قلبها عاوزها تنزل وتشوف كريم وتقعد معاه بس عقلها مش مقتنع ومضايقه انها هتكدب

وشويه ورن موبايلها

ساره : الو

مريم : ايه يابنتى تليفونك مشغول كل ده ليه

ساره برتباك : ها لا ولا حاجه………فى حاجه ولا ايه

مريم: كنت هنزل انا ونور نشترى حاجات تيجى معانا

ساره : انا ………لا ……مش هقدر

مريم : نتى مالك مبتجمعيش ليه

ساره:لا …….مفيش حاجه ……اصل انا تعبانه شويه وهدخل انام انزلو انتم

مريم : خلاص ماشى …..الف سلامه عليكى

وقامت ساره لبست ورنت على كريم وفعلا بعد 5 دقايق كان على اول شارعها

ساره : عربيه مين دى

كريم : عربيه بابا …………..ياله اركبى

وبعد شويه وقف كريم عند كوفى شوب

كريم : ياله تعالى نقعد هنا شويه

ساره : كريم بلاش احسن …….احنا نلف بالعربيه شويه واروح

كريم : بس انا كده مش مركز معاكى ومش عارف ابصلك ولا ابصلك ونعمل حادثه

ساره بتردد : طيب افرض حد شافنا

كريم مسك ايدها : متخافيش يا روحى ياله بقى انزلى

ساره سحبت ايدها بسرعه ونزلت معاه

وفى الكافى شوب

كريم فضل باصص على ساره ومش بيتكلم وساره وشها احمر

ساره بكسوف : انت بتبصلى كده ليه

كريم : اصلى مش مصدق انى قاعد معاكى كده لوحدنا ………تعرفى انك زى القمر من قريب كده

ساره بكسوف : طيب اسكت بقى ……….انا حسه الناس كلها بتبص علينا

كريم : يعملو ايه اول مره يشوفو قمر على الارض

ساره : كريم ……..بجد اسكت بقى

كريم : اسكت ليه ……انا بحب اشوف كسوفك ده

فالوقت ده نور ومريم كانو بيشترو طلبات

مريم : نور تعالى نقعد شويه فالكافى ده انا تعبت

نور : ماشى وانا كمان تعبت …. ساره النادله مجاتشى عشان تلف معانا ليه

مريم : مانا قولتلك تعبانـــــ………….

وقبل متكمل مريم كلمها شافت ساره قاعده مع كريم

وكريم مد ايده ومسك ايد ساره بس ساره سحبتها بسرعه وبص حوليها عشان تدراى كسوفها

وفجاءه شافت مريم ونور وقفين بيبصو عليها


———–———-———————-————

ونكمل في الحلقة السابعة .. الى اللقاء في الحلقة السابعة

بقلم الكاتبة :ريم أحمد

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى