مسلسل “الحب فى زمن الـــ لا حب” الحلقة العاشرة

الحلقة العاشرة

على وصفلهم العنوان وبعد حوالى ساعه كانو هم الثلاثه قدم بيت نورهان والبيت كان فى منطقه شعبيه متوسط الحال طلعو ورنو الجرس وفتحتلهم مامتها

نو ر: السلام عليكم ياطنط

 

الام : وعليكم السلام…………انتم عاوزين مين يا بنات

 

نور: نورهان موجوده ياطنط

 

ام باستغراب: اه موجوده بس انتم مين

 

البنات بداءو يقلقو ليكون فى حاجه بجد

 

مريم بارتباك: احنا اصحابها من الجامعه وكنا قلقنين عليها عشان غيابها وكمان تليفونها مقفول ……..فقولنا نيجى نطمن عليها بنفسنا

 

الام : والله فيكم الخيريا بنات معلشى اعزرونى اصل نورهان ملهاش اصحاب وعمر محد جالها هنا

 

ساره : ولا يهمك ياطنط ……….المهم تكون بخير

 

الام : متقلقوش هى بخير بس كنا مشغولين اليومين اللى فاتو تعالو يابنات اتفضلو يا اهلا وسهلا

 

ودخلتهم الام وراحت تندهه لنورهان وشويه وطلعتلهم نورهان ولا كان فى اى حاجه ودخلت وسلمت عليهم وهى مبسوطه

 

ساره : ايه يابنتى انتى فين وقفله تليفونك ليه؟

 

نورهان : معلشى كنت ملبوخه شويه ومعرفتش اجى الجامعه

 

نور: ماشى دى وعرفناها قفله تليفونك ليه بقى

 

نورهان : مش قفلاه ولا حاجه بس انا غيرت الرقم هبقى اديكم رقمى الجديد ثوانى اجيب التليفون اصلى لسه محافظتهوش

 

ومشت نورهان وسابتهم كلهم محتارين من كلام نورهان وشويه وجات الام وجيبالهم حاجه ساقعه

 

نور: حضرتك تعبتى نفسك ليه بس ياطنط

 

الام : تعب ايه بس وبعدين دى حلاوة قراية فاتحت نورهان

 

نور : ايه ………..نورهان اتقرات فاتحتها

 

الام بفرحه : اه امبارح عقبالكو يابنات

 

ومشت الام وهم فضلو قاعدين مش فاهمين اى حاجه وشويه وجات نورهان وماسكه موبيلها ولقتهم قاعدين مضايقين

 

نورهان : ايه مالكو ………هى ماما زعلتكو فحاجه

 

ساره بضيق: انتى تقرات فاتحتك امبارح

 

سكتت نورهان شويه بعد معرفت سبب ضيقهم وبعدين بصتلهم بكل تحدى وقوى

 

نورهان : اه ………..ايه مش هتبركولى

 

نور بغيظ : نباركلك على ايه

 

نورهان بكل برود :على خطوبتى

 

ساره : طيب وعلى نستيه ……….نورهان انتى اتخاطبتى غصب عنك لو كده احنا ممكن نفكر ازاى نخرجك من الموضوع ده

 

نورهان بضحكه : غصب عنى ايه ومين اصلا يقدر يرفض عريس زى ده جاهز وعنده شقه وبيشتغل بره مصر وهيجبلى شبكه بـ 20 الف جنيه

 

نور : طيب وعلى مش انتى بتحبيه وهو بيحبك

 

نورهان : والحب ده هيجبلى ايه ………..الحب ده مشاعر مراهقه وانا معنديش استعداد ارفض عريس لقته زى ده عشان على اللى لسه قدامه

جيش……….ولا حلته شغل ولا فلوس ولا اى حاجه ……….انا مش هستنه لسه ويا عالم هستنى كام سنه

 

ساره : بس هو بيحبك ….انت مشوفتهوش كان خايف عليكى ازاى

 

نورهان : على كان مرحله وعدت خلاص من حياتى

 

كلهم كانو مضايقين اوى وقامو عشان يمشو نزلو وكانت نور اخر وحده

 

نورهان مسكتها من ايدها

 

نورهان : استنى ……..انا مش عاوزاكو تزعلو منى وياريت تفرحولى انا صاحبتكم وانتم اصحابى الوحدين متسبونيش لوحدى

 

نور : معلشى يا نورهان احنا مش هنقدر نعيش الفرحه دى معاكى

 

 

نورهان : ليه بتقولى كده

 

نور : عشان انا طول عمرى كنت بكره الولاد اللى بيتسلو بالبنات وبيضحكو عليهم باسم الحب بس انهارده انا لقيت ان فى بنات كمان ممكن يخدعو

الولاد باسم الحب ………انتى خدعتى على وخدعتينا ببرائتك وانتى واحده بتاع مصلحتك وانا مش هقدر يكون صاحبه زيك بعد اذنك

 

ونزلت نور ونورهان دمعت من كلام نور اللى كان قاسى اوى

………………………………………………………………………………..

 

وفالطريق الكل كان ساكت لحد موصلو عند مريم البيت وهم مضايقين من اللى حصل

 

ساره : هنعمل ايه دلوقتى على عمال يرن عليه وانا مش عارفه هقوله ايه

 

مريم : على صعبان عليه اوى

 

ساره : ده هيتجنن عليها وهى معندهاش دم …….انا بجد مش مصدقه اللى بيحصل ده

 

نور كل ده كانت ساكته ومش بتتكلم

 

مريم : نور………انتى ساكته ليه ……..متقولى هنعمل ايه مع على

 

نور : طبعا هنقوله الحقيقه ……….لازم يعرفها على حقيقتها

 

ساره : بس على بيحبها بجد وهينصدم اوى لو قولناله كلامها

 

نور: معلشى ينصدم دلوقتها ويعرفها على حقيقتها احسن ما يفتكرها ضحيه ومع مرور الوقت هينسى

 

وشويه ولقو تليفون ساره بيرن كلهم بصو لبعض وهم عارفين انه على

 

ساره : انا مش هرد ……..مش هقدر اقوله

 

نور: هاتى انا هرد عليه

 

نور : السلام عليكم

 

على بقلق وتردد : وعليكم السلام………..ساره ؟؟

 

نور : انا نور يا على

 

على : انتم فين قلقتونى ……….هى ساره فين ………وعملتو ايه ……..ومش بتردو عليه ليه كل ده ؟؟

 

نو ر: اهدى بس شويه ……….ساره هنا اهيه ………بس

 

على بقلق : بس ايه

 

نور : هى مقدرتشى تكلمك ………….على

 

وسكتت شويه وعلى ساكت مستنيها تتكلم

 

نور : على نورهان اتقرات فاتحتها وهتتخطب قريب

 

على بضيق : اكيد غصب عنها …….انا لازم اتصرف ….انا هروح لباباها واكلمه …..حرام يعملو فيها كده غصب عنها …….انا عارف انها

 

بتحبنى وكل ده غصب عنها

 

نور بنرفزه : على اعقل نورهان كانت بتلعب بيك وبمشاعرك ومش هتتخطب غصب عنها بالعكس هى فرحانه بالعريس الجاهز اللقته فوق بقى

 

واعرف انها مش بتحبك ……..نورهان ضحكت عليك وضحكت علينا كلنا

 

على بصدمه : انتى كدابه……………. انا عارفه هى بتحبنى هى بس مغصوبه ………..انتى كدابه بطلى كدب بقى

 

وقفل السكه فوشها

———–———-———————-————