ترفيهمسلسل رجل

مسلسل “رجل” الحلقة الخامسة

الحلقة الخامسة

لاما كانت حسه بخنقه وكمان مخضوضه من جواها مش عارفه اللى بيحصل ده صح ولا غلط بس فى نفس الوقت حسه انها مبسوطه بس ياترى هى مبسوطه فعلا من حب هيثم ليها ولا مبسوطه من عندها وانها لقت حد تانى يعوضها حب واهتمام ماجد

 

لاما : انا هقوم انام بقى هتعوز حاجه

هيثم : بالسرعه دى … خليكى معايا شويه

لاما : الساعه بقت 3 الفجر وفى كليه بكره

هيثم : خلاص ماشى … هوافق بس عشان هشوفك بكره

لاما : تصبح على خير

هيثم : وانتى من اهل الخير … بس قبل متقفلى .. عاوز اطلب منك طلب

لاما : خير … طلب ايه ؟؟

هيثم : ياريت متقوليش لياسمين وحاتم حاجه من اللى بينا

لاما : وهو ايه اللى بنا اصلا …

هيثم : ياستى قصدى يعنى انى بحبك وكده

لاما : ماشى .. بس ممكن اعرف ليه … هو حبك ليا حاجه وحشه عاوز تخبيها عن الناس

هيثم : مش كده … بس ممكن يلعبو فى دماغك ويفهموكى حاجات غلط

لاما : مش مقتنعه … بس ماشى مش هقول لحد … انا هقوم بقى عشان بجد فصلت

هيثم : اوكى … تصبحى على خير هتوحشينى

لاما : وانت من اهله مع السلامه

……………………………………………………………….

 

فاتت شهور تانيه وتجيى الامتحانات ويخلصوها وينجحو كلهم والغريب ان هيثم كمان ينجح

كان طول الوقت مع لاما ياما فالكليه مع بعض اوبيتكلمو ع الفيس وكمان ع الفون بقت مش بتعمل حاجه من غيره ولا بتحكى لحد حاجه غيره قدر يبعدها عن ياسمين وحاتم وطول ماهم فالكليه قاعدين مع بعض لوحدهم

ياما ياسمين كلمتها بس هى كانت معميه ومبتفكرشى وحصلت مشاكل كتير ما بنهم بسببه

وماجد كان كل ميحاول يكلمها كانت بتصده وبتخلص المحاوله بخناقه وبعد اكتر

 

خلصت السنه وبداءت اجازة اخر السنه والوضع زى مهو ومفيش جديد غير قرب لاما لهيثم وبعدها عن اصحابها وماجد

وفى يوم لاما كانت بتكلم هيثم فالتليفون

لاما : مالك يا هيثم صوتك مش عجبنى

هيثم بضيق : مفيش يا حبيبتى … انا بقيت كويس لما سمعت صوتك

لاما : يعنى كان فى حاجه … قول عشان خاطرى

هيثم : مش عاوز اشغلك بمشاكلى

لاما : يعنى ايه بقى … اشمعنا انا بقولك على كل حاجه وشغلاك بمشاكلى

هيثم : مش عاوز بس اضايقك …لاما انتى اكتر حاجه بتسعدنى فالدنيا ومعوضانى غياب اهلى عنى .. مش عاوز كلامى معاكى يبقى عن المشاكل .. انا ما بصدق اهرب منها معاكى

لاما : بس بجد انا قلقانه عليك … ريحنى وقولى فى ايه

هيثم : اصل بابا وماما مبعتوش فلوس الشهر ده والفلوس اللى معايا خلصت ومش عارف هصرف ازاى

لاما : طيب متكلمهم وتشوف اتاخرو ليه

هيثم : كلمت ماما بتقولى ظروف وفى مشاكل عندهم … بتقولى اتصرف انت وانزل اشتغل شهور الاجازه دى

لاما باستغراب : هتشتغل … هو فى شغل اصلا فالبلد للى معاهم شهادات

هيثم : مش عارف اعمل ايه .. وبعدين انا معنديش استعداد اهين نفسى واشتغل فى مصنع ولا عند حد فى محل … سمعتى متسمحليش اعمل كده

لاما : طيب وبعدين … هتعمل ايه

هيثم : مش عارف … وكمان الراجل بتاع العماره عاوز الايجار انا مخنوق اوى …ومش عارف اعمل ايه

لاما سكتت شويه وهى مش عارفه تقوله ايه

لاما : طيب بقولك ايه … تعرف تنزل تقابلنى دلوقتى

هيثم استغراب : انتى بتتتكلمى بجد

لاما : اه فى ايه مستغراب كده ليه

هيثم : اصلى بلح عليكى من اول الاجازه نتقابل بره وانتى مش موافقه

لاما : هقبلك شويه وهروح على طول عشان ماما وبابا

هيثم : ماشى يا حبيبتى انتى فعلا وحشانى اوى ونفسى اشوفك

لاما : خلاص قابلى بعد ساعه فى كافتريا _________

هيثم : اوك …. سلام

………………………………………………………….

 

ياسمين كانت قاعده فى اوضتها وحسه انها مضايقه حاتم وحشها بس مفيش اى طريقه للتواصل غير الكليه والكليه اجازه

كانت قاعده على سريرها بتفكر فيه بتفتكر ملامحه وموقف حصل بينهم فتضحك وترجع تانى تكشر من شوقها ليه

شويه والباب خبط

ياسمين : ادخل

عادل : قاعده لوحدك كده ليه

ياسمين وهى بتعدل نفسها : مفيش عادى

عادل : كنت عاوزك فى موضوع

ياسمين : اتفضل يا بابا .. خير

عادل قاعد جانبها على السرير : صراحه كده انا مصدوم ويمكن مش مصدق

ياسمين بقلق : فى ايه يا بابا خضيتنى

عادل بابتسامه : متخافيش … هو بس كل الموضوع انى فجاءه حسيت انى بنتى الصغيره اللى كنت بدلعها واجبلها شكولاته والعب معاها كبرت وبقت عروسها وبيجلها عرسان

ياسمين بخضه : ايه … عرسان .. مين

عادل : فى واحد كلمنى انهارده وعاوز يتقدملك وانا اديته ميعاد يوم الجمعه اللى جايه

ياسمين : ايه … ليه كده يابابا .. انا مش عاوزه اتجوز …ليه بتديله ميعاد

عادل : يابنتى انا حسيت من كلامه انه شاب محترم وكويس مفيش مانع اننا نشوفه ونقعد معاه لو مرتحتيش بعد كده مش هغصب عليكى حاجه

ياسمين : بس يابابا انا مش عاوزه اشوف حد …انا لسه صغيره ولسه قدامى سنه فالجامعه بلاش احسن يابابا

عادل بصلها بشك : انتى مخبيه عليا حاجه يا ياسمين

ياسمين : هو ….اصل .. بصراحه كده مش هكدب عليك …انا فى واحد زميلى انا معجبه بيه وهو كمان بس هو مقالهاليش بصراحه هو بس لمحلى وقالى انه خايف عليه وبيحترمنى وقالى انه هيبقى مجرد زميل لحد ميقدر يتقدملى رسمى عشان منعملشى حاجه غلط ..وانا بعد كلامه ده احترامته اكتر ووعدته انى هستناه

عادل بضيق : والمفروض اعمل ايه دلوقتى … هى دى الصحبيه اللى متفقين عليها …بتخبى عليا يا ياسمين

ياسمين بحزن : بابا انا اسفه بجد بس مكنشى فى حاجه تتحكى حاتم شاب محترم جدا اعرفه من اولى جامعه عمره مكلمنى فى حاجه ولا عدى حدودو معايا وكلامه كان واضح مقدرشى اقولك على حاجه محصلشتى لسه ويا عالم هتحصل ولا لاء …بس والله انا معملتش حاجه غلط وعلاقتى بيه متتعداشى علاقتى بزميل

عادل : ماشى يا ياسمين … بس الراجل اللى انا حددت معاه ميعاد ده لازم تقبليه عشان مطلعنيش صغير وبعد كده انا هتصرف معاه … وموضوع زميلك ده فى كلام تانى بس مش دلوقتى

وقام من على السرير عشان يخروج من الاوضه

ياسمين : بابا

عادل : ايوه يا ياسمين

ياسمين : عشان خاطرى متزعلشى منى

عادل بابتسامه : مش زعلان … وانا واثق فيكى وانك مش هتغلطى

 

وخرج وسابها نامت تانى على السرير وهى بتفكر هتعمل ايه وموضوع العريس اللى جاى مش فى وقته ده

 

………………………………………………………..

 

فى الميعاد لاما قابلت هيثم قاعدو يتكلمو ويهزرو شويه لاما طلعت فلوس من شنطتها

لاما : خد دول يا هيثم

هيثم باستغراب : ايه دول

لاما : ده مصروفى مش محتجاه …خده واتصرف بيه لحد ما باباك يبعتلك فلوس

هيثم بضيق : انتى نزله تقبلينى عشان تهزقينى يا لاما … كشرا اوى ليكى …انا مروح

لاما مسكت ايده : استنى انت رايح فين

هيثم بصلها بحب وبص لايدها وضغط عليها : تعرفى دى اول مره لمس فيها ايدك

لاما باحراج وهى بتشد ايدها : طيب سيب ايدى لو سمحت

هيثم : لاء مش هسيبها ده انا مصدقت لمستها وحسيت بيها

لاما بكسوف : لو سمحت يا هيثم سبنى الناس بتبص علينا

ساب ايدها وفضل يبوصلها من غير ميتكلم وهى وشها كان احمر وبتبص فالارض

لاما : ممكن تاخد الفلوس .. وتبطل تبص عليه كده

هيثم : بتفصلينى بموضوع الفلوس ده … انا مش هاخد منك حاجه

لاما بصتله بحب : عشان خاطرى خدهم .. ابقى رجعهم تانى لما عمو يبعتلك الفلوس

هيثم : هخدهم عشان بس قولتى … عشان خاطرى

لاما بصت تانى فالارض من الكسوف

هيثم : بحبك اوى على فكره

———–———-———————-————

ونكمل في الحلقة السادسة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقة السادسة

بقلم الكاتبة :ريم أحمد

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى