مسلسل “يوميات أختان” الحلقة الثلاثون والأخيرة
الحلقة الثلاثون والأخيرة
منى كانت سرحانه ومش بتذاكر
مى : منى ………..يا منى ……..انتى يابنتى
منى مخضوضه : ايه بتزعقى كده ليه
مى : ايه يابنتى بقالى ساعه بكلمك وانتى ولا هنا
منى بتنهيده: احمد وحشنى اوى
مى بتريقه: احمد وحشك …….طيب ايه اتصلك بيه يجى
منى : لاطبعا انتى اتهبلتى …..بس انا مستغربه هو بيتعامل معايا كويس رغم اللى انتى قولتهوله
مى باستعباط : قولتله ايه؟؟
منى : الكلام اللى قولتهولك
مى : لا طبعا انا قولتله انك مضايقه عشان عمو واستنى شويه لحد مترجع لطبيعيتهاا والكلام الل انتى قولتيه لمها
منى بفرحه : بجد ……………ربنا يخليكى يا مى ………..يعنى هو لسه عارف انى بحبه
مى : اى خدمه …….مش عارفه من غيرى هتعملى ايه……….ياله نذاكر بقى وبلاش كلام كتير
منى بداءت تذاكر تانى وهى مبسوطه وفرحانه
وعدت ايام وبداءت الامتحانات وفاخر يوم امتحانات كانت منى ومى فالكافتريا مستنين بقيت اصحابهم يخلصو
مى شافت احمد جى من بعيد فقامت وقالت لمنى انها هتجيب حاجه من الكافتريا وشويه واحمد قرب على منى
احمد: السلام عليكم
منى بارتباك : وعليم السلام ازيك يا احمد
احمد: الحمد لله : عملتى ايه فالامتحان
منى : الحمد لله كان كويس
وفضلو ساكتين شويه
احمد: فاكر اخر يوم فامتحانات السنه اللى فاتت
منى سكتت ووشها اتغير وبصلها احمد بكل حب
احمد: فاكره كلامك ليه ………… طيب بصى يامنى انا هنسى كل اللى فات وهقولك تانى كانى مقولتش اى حاجه قبل كده منى انا بحبك وعاوز
اتقدملك رسمى……. موافقه ؟؟؟؟
سكتت منى وهى مكسوفه ومش عارفه تقوله ايه
احمد: منى ردى عليه طيب بصى حركى دماغك قولى اى حاجه عشان خاطرى
منى ابتسمت لاحمد وحركت دماغها بالموافقه
احمد وقف فمكانه وهو مش مصدق : بجد انتى مواقفه مش كده …….طيب قولى موافقه ……….عشان خاطرى قولى موافقه
منى وهى بتبص حوليها ومكسوفه : موافقه اقعد بقى
احمد: بجد يامنى انا اسعد اناس فالدنيا انا مروح عشان اكلم عمو على طول سلام يا احلى منى فالدنيا
ومشى احمد وروحت منى وقرارت انها تحكى لمها على كل حاجه
مها : انتى جيتى يامنى عملتى ايه فالامتحان
منى :الحمد لله……….انا عاوزه احكيلك على حاجه
وحكتلها كل حاجه
مها فضلت ساكته شويه وهى عمله نفسها زعلانه
منى : انتى ليكى حق تزعلى بس بجد كان غصب عنى
مها ابتسمت وحاضنتها جامد: انتى بنتى ومهما تغلطى هسامحك وهفضل طول عمرى جانبك
منى والدموع فعنيها : ربنا يخليكى ليا يا احلى ام واخت وصاحبه فالدنيا
وبليل حسام كلم مها زى العاده وطلبت منه انها تقابله فالكليه تانى يوم ضرورى
وفى الكليه
حسام : خير يامها قلقتينى
مها : منى واحمد خلاص هيتخطبو احمد كلم بابا امبارح ومنى جات وحكاتلى على كل حاجه
حسام : طيب الحمد لله كويس
مها بزعل : يعنى احنا كده خلاص
حسام: خلاص ايه
مها : التمثليه دى لازم تخلص احنا خلاص نجحنا فى اللى عاوزينه
وبعدين انا شايفه ان بابا اتعلق بيك والاهتمام الزياده ده ملهوش لزمه كفايه اووووى لحد كده
حسام: خلصتى كلامك………..بصى يا مها انا معجب بيكى ولو انتى لسه فكره الموضوع تمثليه انا بالنسبالى الموضوع بجد
مها : يعنى انت كنت بتضحك عليه
حسام : بس انا كنت عاوز اديكى فرصه تعرفينى اكتر ونقرب من بعض والفرصه جاتلى وكان لازم استغلها وانا دلوقتى بقولك يامها انا بحبك وعاوز
اخطبك بجد واهلى هيجو يخطبوكى بجد مش تمثيل ومش هسيبك ولا هبعد عنك
مها : بس
حسام : مفيش بس فى موافقه ………او موافقه برده
ضحكت مها : دى عافيه بقى
حسام : مش عافيه و لاحاجه بس ان شاء الله هنبقى لبعض انا حاسس بكده
مها ضحكت : وطنط وعمو هيجو امتى
حسام: اعتبر دى موافقه
مها : حاجه زى كده
النهــــــــــــــاية
حلو ان الواحد يضحى بس ميضحيش بحياته التضحيه ليها حدود وينفعشى اعيش حياتى كلها فى عذاب عشان حاجه ممكن تكون غلط
الصراحه حلوه مهما كانت عواقبها والكدب وحش مهما كان منجى
قول الحقيقه وخرج مشاعرك واحكى وعيط بصوت عالى لو ده هيريحك وفالاخر مش هناخد غير نصيبنا واللى ربنا كتبهولنا
__________________
شكر خاص للكاتبة الرائعة ريم احمد
