مسلسل مشاعر الحلقة الثالثة والرابعة
الحلقة الثالثة
سلمى حكت تانى لسامى بس المره دى كانت متاكده خلاص ان الموضوع باظ
سامى سكت شويه وبعدين بص للباباه : انت رايك ايه يابابا
محمد : مش عارف هو الموضوع حلو بس انا خايف تنشغل عن دراستها والسنه دى صعبه وانا عاوزها تجيب تقدير كويس
سلمى : صدقنى يا بابا مش هنشغل وهجيب تقدرير بجد
سامى : انا عن نفسى موافق
سلمى كانت مصدومه حسه انها مش سامعه صح
سلمى : بجــــــــــد؟؟
سامى : بجد بس عندى شرطين ؟؟
سلمى بقلق : ايه
سامى : اولا تجيبى تقدير كويس السنه دى …….ثانيا تخلى بالك من تصرفاتك مع الولاد فالسن ده وتحطى حدود معاهم
سلمى : دول عيال واصغر منى بكتير
سامى : عارف ياالومى بس هم فى سن مراهقه ومتضمنيش تفكيرهم وكمان عشان متاخديش حد عليكى ….ماشى
سلمى بابتسامه : ماشى
سامى : تمام بس لسه طبعا موافقة بابا هو الاساس برده ومن غير موافقته موافقتى ملغيه
سلمى وهى بتبص لبابها برجاء : ها يا بابا قولت ايه
محمد : موافق بس الاول اتاكديلى من المواعيد وفترة الامتحانات هتعملى فيها ايه ولو لقيت المواعيد مناسبه انا مده هوافق
سلمى قامت باست باباها : ربنا يخيلك لا يا بابا
سامى : اطلع انا منها يعنى
سلمى : لا طبعا يا ابيه ربنا خليك ليا ويسعدك دايما يارب
سامى : تسلملى يا لومى ……..هو انا عندى كام لومى يعنى
ويدخل عليهم سامح : كله لومى وموحا خلاص ولا حتى بتسال عليه
سامى : هههههههه كنت لسه هسال عليك يا لمض انت
سامح : مخلاص بقى راحت عليا ……..ماشى يا ابيه
سامى : انا اقدر برده ده انت تربيتى ياض ها بقى اخبار الدراسه ايه
سامح : الحمد لله ماشى الحال
سامى : يارب دايما
وقاعدو كلهم يتكلمو ويضحكو مع بعض ويطمنو على احوال بعض
………………………………………………………………………….
تانى يوم فالكليه
ريهام : ها يالومى عملتى ايه
سلمى بتكشيره : مش راضى
لينا : ليه بس
سلمى : مش عارفه مش راضى خالص
ريهام : طيب انا هاجى اكلمه بس متزعليش كده عشان خاطرى
سلمى : مش هيرضى برده انا كلمته امبارح كتير واتخانق معايا جامد وقعد يزعق
ريهام باستغراب : عمو محمد عمل كده مش مصدقه
سلمى حطت ايدها على وشها قبل ما تضحك وعملت نفسها بتعيط
ريهام : خلاص بقى يا لومى معلشى انا السبب خلاص بقى عشان خاطرى
لينا : خلاص بقى يا لومى متزعليش
سلمى شالت ايدها من ع وشها وبكل براءه وبابتسامه : ها بقى يا روما هنروح امتى للمستر
لينا وريهام بيبصولها وهم متنحين
سلمى : ههههههههه انتو عاملين كده ليه
ريهام : انتى كنتى بتشتغلينى مش كده …….اكدب وقولى لاء
سلمى : ههههههههههههههههههه
لينا : على فكره انتى غلسه انا صدقتك بجد
ريهام : وانا هصور قتيل دلوقتى
سلمى : عشان تعرفى انتى بتعملى فينا ايه
ريهام : لا بجد ………طيب قولى يا زفتى انتى ايه اللى حصل
سلمى : هههههههه بعيدا عن كلمة زفتى دى ….هو وافق وكمان ابيه سامى وافق
ريهام : بجد ………طب احكى بسرعه
وحكت سلمى كل اللى حصل وبعد الكليه ريهام وسلمى راحو وقابلو مستر مصطفى وتفقو على المواعيد وكل الحاجه وكانو البنات مبسوطين جدا كان فى هناك بنت متخرجه بقالها سنتين وبتشتغل مع مصطفى من زمان اسمها شهد اتعرفو عليها وعرفتهم هيعملو ايه ومواعيد الحصص وقاسمو على بعض المجموعات اللى كل واحد هيحضرها وهيكون مسؤال عنها
وتانى يوم بعد الكليه البنات هيبداء اول يوم شغل ليهم وكانت الفرحه والنشاط ماليهم ولينا كانت زعلانه انها مش هتبقى معاهم
لينا : يا بختكم عاوزه اكون معاكو
سلمى : يا ريت يا لي بجد وانا كمان
لينا : بس بابا مش راضى خالص هعمل ايه
ريهام : عنده حق انتى عارفه شغلك بعد كده مش محتاج انك تدربى معانا
لينا : مانا عارفه بس كنت عاوزه ابقى معاكو ………عموما انا هوصلكم انهارده
ريهام : انتى معاكى العربيه .؟؟
لينا : اه اتصلحت اخيرا
سلمى : امممممممم ………..طب ربنا يستر
لينا وهى رفعه حاجه : نعم يا اختى عاوزه تقولى حاجه
ريهام : ههههههههه يمكن عاوزه تقول انك مبتعرفيش تسوقى ولا حاجه
سلمى : سكتى يا ولعه انتى
ريهام : ههههههههه انا بس بهدى النفس
سلمى : طيب يا اختى …….ياله يالى عشان منتاخرشى بس وحيات اغلى ما عندك ماتسوقى بسرعه يعنى كملى فرحتنا بالشغل ع خير
لينا : ههههههههههههه بس كده من عيونى
سلمى : من عيونى كمان ………يبقى ربنا يستر بجد
ومشو البنات عشان يلحقو اول يوم وميتاخروش
………………………………………………………………………….
فى السينتر
سلمى كانت قاعده بتنقل حاجات فى اوضة الدرس بين الحصتين وشويه ولقت بنت شكلها غلط وقفه قدامها وبتبصلها بقرف كانت لبسه لبس دايق جداااااا ونص شعرها خارج من الطرحه وحط ميك اب كامل
دينا : ده مكانى على فكره
سلمى بابتسامه : طيب ثانيه ……..هخلص وهقوم اهوه
دينا : وانا هفضل وقفه كده لحد ما تخلصى …….ياله ياماما قومى شوفى فين مجموعتك
سلمى بأدب لمت حاجاتها ورجعت الديسك اللى وراها
دينا قاعدت ولفت وشها لسلمى : انتى جديده معانا
سلمى مردتيشى عليها ولا اديتها اى اهتمام
دينا بقلة ادب : عنك مرديتشى انا عارفه ايه الاشكال دى
شويه ودخل باقى الطلبه وبعديها دخل مستر مصطفى
مصطفى : ها يا شباب اخباركم ايه ؟؟؟
الطلاب : الحمد لله يا مستر
مصطفى وهو بيشاور على سلمى : ميس سلمى مدرسه جديده معانا وهتساعدنى عاوز الكل يعاملها باحترام وتسمعو كلمها مفهوم
الحلقة الرابعة
شويه ودخل باقى الطلبه وبعديها دخل مستر مصطفى
مصطفى : ها يا شباب اخباركم ايه ؟؟؟
الطلاب : الحمد لله يا مستر
مصطفى وهو بيشاور على سلمى : ميس سلمى مدرسه جديده معانا وهتساعدنى عاوز الكل يعاملها باحترام وتسمعو كلمها مفهوم
الطلاب : اوكى يا ميستر
دينا وهى بتبص بقرف لسلمى ووبعدين توشوش صاحبتها وتضحك
سلمى “فى سرها ربنا يشفى ……..ياربى ايه المناظر دى ولسه فى الثانوى امال لو دخلت الجامعه هتعمل فى نفسها ايه “
سلمى حاولت متبصش على دينا المستفزه وتحاول تركز مع مصطفى
بعد الحصه
سلمى كانت وقفه بره مع شهد
شهد : ها ايه الاخبار؟؟
سلمى : الحمد لله ……..بصراحه مستر مصطفى شرحه تحفه جدا وكمان محبب فى الطلبه بس ايه الطلبه دول دول اكبر منى انا مكنتش باينه فى وسطهم
شهد : عندك حق خصوصا البنات شايفين نفسهم اوى
سلمى افتكرت دينا والموقفها وكلامها الغلس
سلمى : اه صحيح فكرتينى فى بنتــــــــــــــــ
سلمى لسه مكملتشى كلامها لقت دينا وقفه وراها
دينا بضحكه صفره: انا جيه اتاسف لحضرتك ….زانا افتكرتك طالبه معانا
سلمى من غير نفس : ولا يهمك …..حصل خير
دينا : ان شاء الله بكره تعرفينى كويس ونبقى اصحاب …….مش كده يا ميس شهد
شهد : اه طبعا يا دينا يالله بقى عشان متتاخريش واحنا كمان نشوف شغلنا
دينا : بس هو انا كنت عاوزه اسالك ع حاجه
شهد بضيق : خير
دينا : هو …..هو محمود مجاش انهارده
شهد باستعباط : محمود مين ..؟؟
دينا : محمود ابراهيم يا ميس اللى معانا فالمجموعه اصله مجاش انهارده وهو مش متعود يغيب …..يعنى قولت يمكن جيه فى مجموعه تانيه
شهد بنفاذ صبر : لاء مجاش انهارده
دينا بزعل : ماشى …….ياله سلام
ومشت وشهد وسلمى بيبصو على شكلها ولبسها الملفت اوى
وشهد وهى بتنفخ: ايه هى البيت دى معندهاش دم ولا حياء
سلمى باستغراب : مالك ؟؟
شهد : البنت دى بتعصبنى بجد …..تخيلى كده معجبه بواحد زميلها وهو مش معبرها الولد اصلا ممتاز وجايب 98 % وهى رميه نفسها عليه وكمان من البجاحه جيه تسالنى عليه عشان غاب انهارده
سلمى : معلشى يا شهد انتى عارفه دول فى سن مراهقه
شهد : هههههههه انتى بس لسه جديده انتى لسه ياما هتشوفى
سلمى : انتى بتخوفينى ولا ايه
شهد : لا مش بخوفك ولا حاجه بس الجيل اتغير كتير وممكن تنصدمى من اللى هتشوفيه ربنا يسهل بقى
سلمى : ربنا يطمنك ………هى روما فين ؟؟
شهد : مع مستر مصطفى بيقولها على حاجات تعملها
سلمى بابتسامه : اوكى
وخلص اليوم والبنات مبسوطين من الشغل الجديد ويفوت كام يوم مفيش اى جديد
………………………………………………………………………
وفى يوم
كانت واقف سلمى على المكتب بتاع شهد وبتكتب حاجات وشويه لقت بنت دخله تجرى
نورهان : دينا ……..يا دينا
دينا : ها جيه ولا لاء برده
نورهان بابتسامه : اه جه واقف تحت مع احمد
دينا بفرحه : بجد ………..اخيرا ………ده كان وحشنى اوى متعرفيش ليه مكنشى بيجى الدروس
نورهان : يا بت اتقلى شويه
دينا : بحبه يا بنتى اعمل ايه بس
نورهان : وده من امتى ما محمد كنتى بتقولى كده برده وكريم وفاكره ابراهيم لما كنا فى اولى ثانوى
سلمى كانت بتسمع الحوار وبتقول فى سرها ” كل دول الله يخرب بيوتكم يارب ارحمنا “
دينا : لا يا بنتى كل دول شباشب محمود هو الاصل
نورهان : هو بس عشان مطنشك هتموتى عليه
دينا : بطلى غلاسه بقى وقولى مكنشى بيجى ليه
نورهان باستعباط : وانا ايه اللى هيعرفنى
دينا : وحياة امك …….يعنى احمد مقلكيش انتى هتعمليهم عليه
نورهان : يالهوى ع طول لسانك …….قالى بس مش هقولك
وطلعتلها لسانها وجايه تمشى دينا وقفت قدامها
دينا : خلاص بقى يا نور بقى يالله قولى بقى
نورهان : ماشى يا ستى …بصى هو كان تعبان عنده دور برد شديد عشان كده مكنشى بيجى الدروس
دينا : يا حرام …….ان شالله اللى يكرهه
نورهان : اه ياحنين
دينا : ما تلمى نفسك يا بت انتى
نورهان : هههههههههههههههه طيب …….ياله بقى عشان ندخل نقعد
دينا : طيب ……..بس هو مش هيطلع بقى عاوزه اشوفه
نورهان : هتشوفيه دلوقتى يا اختى ياله بقى قدامى
سلمى كانت بتسمع الحوار وهى مستغربه الكلام واللى بيحصل وبتقول فى نفسها ” ده احنا مكناش بنات داحنا كنا بنتكسف من ضلنا انا بجد مش مصدقه ان معدشى فى حياء كده “
شويه ودخل ولدين زى القمر شدو انتباه سلمى اللى كانت اول مره تشفهوم للحظه وبعدين كملت شغلها تانى عادى
محمود : اوبااااا من القمر دى
احمد : قمر مين ..؟
محمود : البنت اللى واقفه عند المكتب دى
احمد : ايه ده ….ده وجه جديد معداتشى عليا قبل كده
محمود : هو انا اغيب حصه القمر نزل ع الارض
احمد : اه يا عم الرومانسى ياله قدامى
محمود : طب اعرفلى هى مين الاول
احمد : طيب تعالى معايا
محمود : هتعمل ايه يا مجنون
احمد : ياعم تعالى بس وانت سكت
احمد خد محمود وقربو على سلمى
احمد : السلام عليكم ……….لو سامحتى هى ميس شهد فين
سلمى : هى بتكلم مستر مصطفى وجيه اهوه …..ثوانى
فضلو ساكتين شويه وعين محمود منزلتشى من على سلمى بس هى كانت مركز فالورق اللى معاها
احمد : هو حضرتك جديده معانا
سلمى بابتسامه : لاء …..انا ميس سلمى هساعد مستر مصطفى
محمود فضل متنح ليها وهو مش مصدق ان القمر اللى خطف قلبه ده اكبر منه
———–———-———————-————
ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقات القادمة
بقلم الكاتبة :ريم أحمد
