ترفيهمسلسل اشجان

مسلسل اشجان الحلقة الثالثة والرابعة عشر

الحلقة 13

تانى يوم راحت اشجان وعلى اخدوا العفش من الشقة

وكانت اشجان متفقة مع مامتها على الحاجات اللى هيفرشوها فى بيت مامتها وباقى الحاجات هتوزعها جزء عند على وجزء عند خالتها

وكل ما يبعت بهاء حد لاشجان…ردها

“عايزة اتطلق”

وكل ما على يكلم بهاء على الطلاق

“مش هطلق”

وسكتوا الاتنين… والشهور بتعدى

لا بيبعت اى مصروف لولاده… ولا بيطلق من سكات

وفى يوم بعد ما رجعت اشجان من الشغل

“ماما… انا واحدة صاحبتى اخدت لى معاد مع محامى قريبها”

“محامى ؟؟”

“اه… ماهو انا مش هفضل ساكتة كده… لا بيصرف على بناته ولا بيطلق “

“والمحامى هيعمل ايه؟؟”

“هنروح النهاردة ونشوف ممكن يعمل ايه”

“ماشى… نروح”

وفعلا فى المعاد بالليل راحوا للمحامى

وبعد ما حكت اشجان للمحامى كل اللى حصل بالتفصيل

“احنا اول حاجة هنرفع قضية نفقة ولو عايزانى ارفعلك قضية طلاق كمان ماشى بس لو اتطلقتى يبقى ملكيش نفقة”

اشجان”وبالنسبة لمصاريف القضايا”

المحامى”كل قضية ليها مصاريف لوحدها”

اشجان”طيب ممكن نرفع النفقة ونأجل الطلاق”

المحامى”اه طبعا براحتك…وبالنسبة للطلاق هنرفع طلاق للضرر ونقول انه مدمن”

اشجان”لا متجيبش سيرة الادمان خالص فى محاكم”

المحامى”ليه”

اشجان”انا عندى بنات واى حاجة هتأثر على سمعتهم… خلينا فى النفقة والطلاق بعدين”

المحامى”طيب بكرة نتقابل فى الشهر العقارى علشان تعمليلى التوكيل وابدأ رفع القضية”

ومشيت اشجان وحكمت من عند المحامى… ولما روحوا

“انتى ليه مخليتيهوش يرفع قضية طلاق كمان”

“علشان مش معايا فلوس ادفع اتعاب محامى لقضيتين.. لما يتحكم فى النفقة ابقى ارفع الطلاق… انا مش عارفة من غيرك كنت هصرف منين ومرتبى قليل وميكفيش”

“الحمدلله واهو احنا مع بعض والحال ماشى… بس الدراسة قربت هتعملى ايه فى المدارس”

“هحول مدارسهم لمدارس قريبة من هنا”

وبدأت اجراءات رفع القضية..وتحديد جلسات

والشهور بتجرى… ومصاريف البنات والدراسة والدروس

على اشجان وحكمت… وبهاء ولا كأنه عنده عيال

وبعد ما يقرب من سنة… اتحكم لاشجان بالنفقة

ليها وللبنتين… 45جنيه لكل بنت… و30 جنيه ليها

120 جنيه فى الشهر لل3… ومع ذلك رضيت اشجان بحكم الله اولا ثم حكم القضاء

وراحت تدفع للمحامى باقى اتعابه

“على فكرة يامدام اشجان الحكم بأثر رجعى يعنى فيه حكم بنفقة اكتر من سنة لانى رفعت القضية وطلبت نفقة لسنة فاتت غير السنة اللى كانت القضية ماشية فيها”

“يعنى ايه؟”

“يعنى انتى اتحكملك ب 2500 جنيه عن الفترة اللى فاتت ودول يا يدفعهم يا يتحبس”

“بس انا مش عايزاه يتحبس وهو استحالة هيدفع”

“ماشى… انا بلفت نظرك انها وسيلة كويسة للضغط عليه ممكن تساوميه قصاد الطلاق”

وفكرت اشجان لقيت انها فكرة ممتازة ترحمها من قضية تاخد سنين ومصاريف هى مش قدها

“طيب والنفقة الشهرية”

“النفقة هتصرفيها من الشهر الجاى من البنك هى هتتخصم من مرتبه … بس بعد الطلاق نفقتك هتسقط وتاخدى ال90جنيه بس”

“مش مهم … المهم انى أخلص”

“طيب انا همشى فى اجراءات الدفع او الحبس قانونا ونشوف “

وبالفعل بدأ المحامى اجراءاته

وبدأت الاتصالات بعلى من ابو بهاء…

“عايزين تحبسوه… هى دى العشرة… ابنى معهوش فلوس يدفع”

وعرض عليه على الطلاق مقابل التنازل عن المبلغ

وعن كل حقوقها المترتبة على الطلاق

ووافق بهاء على الطلاق بعد الضغط ووصوله للقسم

واتفقوا على معاد الطلاق

وراحت اشجان مع على للمأذون… وبهاء

بهاء شكله بقى زى الهيكل العظمى من كتر الادمان

عند المأذون كانت اشجان حادة جدا ومتأثرتش بمحاولات بهاء

وان كانت حزينة من قلبها على حالها

شابة عندها 32سنة ومعاها بنتين واحدة 12 سنة والتانية 8 سنين

تم الطلاق ورجعت اشجان على بيت مامتها

حكمت” ايه؟؟ خلاص؟؟”

اشجان”ايوه”

زينة”مبروك ياماما… كده احسن”

يوم واحد قضته اشجان متأثرة بموقف الطلاق

ورجعت بعد كده طبيعية… علشان ولادها

 

بعد كام شهر… جه تليفون من جارتها

“ازيك يا اشجان… ايه انتى فين مش بتتصلى يعنى”

“معلش والله ظروف… انتى اخبارك ايه؟”

“الحمدلله… انا كنت عايزة اسألك سؤال؟”

“اتفضلى”

“انتى ليه سايبة الشقة كده لبهاء… المفروض انتى اللى تقعدى فيها”

“ماهو انا مش هقدر اقعد فيها لوحدى واكيد مش هيسيبنى فى حالى وفى نفس الوقت ميقدرش يبيعها ولا يتصرف فيها لانها باسمنا احنا الاتنين”

“اصل انا عايزة ابلغك خبر… بس يا ريت متزعليش”

وبدأت اشجان تقلق… هيكون حصل ايه يعنى

“خير”

“الشقة كان عليها ايجار متأخر كتير وكل ما الحى يبعت انذار لبهاء يطنش ولا يروح يدفع ولا يسأل… لحد الشقة ما اتشمعت بالشمع الاحمر لحد ما تدفعوا الايجار”

بعد ماقفلت اشجان التليفون قعدت تعيط

زينة”مالك ياماما”

اشجان”الشقة اتشمعت”

حكمت”يامصيبتى… بسبب اللى بيشربه”

اشجان”لا علشان الايجار… يعنى ياربى فلوس الشقة كلها انا اللى دفعتها… الشقة كمان يتحجز عليها وعليها فلوس”

حكمت”سيبيها تتشمع ولا تتزفت احسن ماكان عايش فيها”

اشجان”ازاى بس … فوضت امرى اليك يارب”

 

تانى يوم اشجان راحت الحى تسأل وعرفت ان الشفة عليها 300 جنيه

هناء”انتى عايزة تدفعيهم”

اشجان”انا مش معايا منهم حاجة خالص … بس ممكن ادفعهم فى حالة واحدة بس..انى اخد انا الشقة وانا عارفة انه مش هيسيبهالى”

هناء”بقولك ايه ..انتى مش نصها بإسمك والمفروض النص التانى اللى باسمه يبقى ليكى برضه علشان انتى حاضنة”

ولمعت الفكرة فى دماغ اشجان وردت بصوت مسموع لهناء مع انها كانت بتسأل نفسها

“معقول ممكن اخد الشقة فعلا… مع انها حقى وربنا شايف انى انا اللى دفعت فلوسها وهو ولا دفع فيها ولا مليم… بس هينفع ولو اخدتها هيسيبنى فى حالى؟؟”

 

الحلقة 14

بعد ما رجعت حكت اشجان لمامتها على اللى قالته هناء

“اه طبعا ياريت تتنقل باسمك وتاخديها من عينيه”

“يعنى رأيك اخدها”

“اه طبعا اومال تسيبيهاله”

“بس مش معايا فلوس”

“الفلوس نتصرف فيها ان شاء الله بس اسألى هينفع تبقى اسمك”

“هشوف”

وطول الليل اشجان مستنية الصبح يطلع علشان تروح تشوف حكاية الشقة هتنفع ولا لأ

وفعلا راحت وسألت وعرفت انه ممكن تتحول الشقة باسمها بعد ماتقدم الاوراق اللى تثبت الطلاق وحضانة البنات بعد ماتدفع فلوس الحجز

وراحت الشغل… وبدأت تلم جمعية بسرعة علشان تقدر تجيب فلوس الايجار…كل زمايلها وقفوا جنبها ودخلوا فى الجمعية علشان عارفين ظروفها … وجمعت المبلغ

راحت دفعت… واتكتبت الشقة باسمها

وطلعت ايصالات الايجار باسمها لوحدها

وكانت فرحة كبيرة ليها…واتفك الشمع الاحمر اللى على الباب

 

لما جه على يزورهم… بعد يومين بس من موضوع فك الحجز

كانت اشجان فرحانة وهى بتقول

“شفت ياعلى.. الشقة بقت باسمى”

“وانتى فرحانة على ايه؟”

“فرحانة انى اخدتها…حقى وبتاعتى وانا اللى دافعة فلوسها”

“طيب علشان تبقى فاهمة الشقة هتفضل مقفولة وانتى مينفعش تعيشى فيها مع بناتك”

“انا مفكرتش انى اعيش فيها لوحدى… انا قاعدة هنا مع ماما ومش هينفع اقعد لوحدى علشان مدارس البنات هنا”

“كويس انك فاهمة كده… ماهو مينفعش مطلقة ببنات تعيش لوحدها انتى عايزة الناس تتكلم علينا”

حكمت”لا طبعا هى مينفعش تعيش فيها… تبقى تبيعها وتاخد فلوسها احسن”

على”تعمل اللى تعمله المهم متقعدش لوحدها”

واشجان ساكتة ومش بتتكلم لانها اصلا مفكرتش انها تقعد لوحدها

وبعد كام يوم… اتصل بهاء بعلى علشان عايز هدومه اللى فى الشقة

وحدد معاه معاد يوديله هدومه

وراحت اشجان لمت هدومه واديتها لعلى …يوصلهاله

وكان المتوقع انه ميسألش عن البنات…وفعلا ده اللى حصل

ومن يوم الانفصال اللى كان قبل الطلاق لا بيسأل عليهم ولا شافهم ولا مرة خلال ما يقرب من سنتين

واتعودوا على كده … والبنات كانوا مرتاحين كده

 

كان الروتين اليومى لاشجان

بتروح شغلها… وكل يومين ترجع من الشغل على السوق تجيب احتياجات البيت اللى لازماهم… وتكون حكمت محضرة الغدا يتغدوا وتقعد مع البنات تشوف مذاكرتهم او تتابع حكاياتهم واللى حصل فى المدرسة او الدرس وتسمع لكل صغيرة وكبيرة منهم

والمصاريف بتزيد عليها اوى

وفى يوم وهى قاعدة مع البنات ومامتها

“انا عايزة اخد رأيكم فى حاجة”

حكمت”خير”

اشجان”المصاريف بتزيد كل ما بتكبروا وانا تعبت ومفيش قدامى غير انى اشتغل اضافى “

حكمت”ايه الاضافى ده”

اشجان”يعنى بدل مااخرج من الشغل الساعة 2 اخرج 4 وده عليه حافز ييجى 100 جنيه كده”

زينة”وماله ياماما… مفيهاش حاجة”

مى”بس كده هتتأخرى علينا”

حكمت”طيب بدل بالنهار مفيهاش حاجة… بس ده لوحدك ولا معاكى ستات”

اشجان”معايا ستات ورجالة عادى… نص الشغل عندنا بيقعدوا اضافى”

حكمت”خلاص بدل مش لوحدك… اقعدى”
واصبح يوم اشجان بيبتدى من 8 الصبح وبترجع بعد 5 المغرب لو راحت تشترى اى حاجة ولما ترجع بدرى بتكون 4 ونص

ومع ذلك عمرها ما اشتكت من الارهاق علشان تقدر تقعد تتابع بناتها وحكاياتهم وحكايات مامتها

وكانت بتتمنى اجازة الصيف تيجى علشان تترحم شوية من المذاكرة والدروس…ويبقى النهار اطول وتقدر ترتاح ولو ساعة بعد ما ترجع من الشغل

وفى يوم بعد ما رجعت من الشغل… وبعد المغرب

قامت تلبس

“انتى بتلبسى ليه يااشجان”

“رايحة اعزى سمية زميلتى باباها توفى”

“الله يرحمه…وانتى مرواحك هيعمل ايه؟”

“هعزيها”

“انتى مش روحتى الجنازة خلاص”

“روحت الجنازة ورجعت الشغل على طول وبعدين انا هروح مع زميلاتى احنا اتفقنا كلنا اننا هنتقابل بعد المغرب هناك”

“متروحيش”

“ليه مروحش”

“كده…احنا بالليل والوقت متأخر”

“احنا المغرب وانا رايحة عزا مش فرح يعنى مش هتأخر”

وكملت اشجان لبس ونزلت

 

ومشى الحال بنفس الروتين اليومى …وبعد اسبوعين

اشجان”بصوا يابنات علشان انتوا بتسمعوا الكلام وحلوين احنا معزومين على سبوع بكرة”

مى”الله سبوع مين ياماما… انا بحب الحاجات دى اوى”

اشجان”واحدة زميلتى ولدت وبكرة سبوع النونو”

حكمت”وانتى هتروحى”

اشجان”طبعا”

حكمت”وتروحى ليه”

اشجان”دى صاحبتى ومجاملانى وانا لازم اروح ارد لها المجاملة وغير كده البنات تغير جو شوية لانهم مبيروحوش فى اى حتة”

حكمت”انتى عايزة تخرجى فى عز الليل وتقولى مجاملة وكلام فارغ”

اشجان”بقول سبوع يعنى يوم ما هتاخر هرجع الساعة 9 ولا 10 وبعدين ياماما انا مبقتش صغيرة علشان كل ما اخرج تقوليلى ليه ولا وبلاش”

حكمت”مش صغيرة بس انتى مطلقة واى حركة محسوبة عليكى والناس ممكن تتكلم ..ده انتى كمان مش مطلقة وبس لا ومعاكى بنات كمان يعنى اى خطوة تتحسب عليكى”

كلام حكمت كان كانه سكينة طعنت بيها اشجان

وهى المطلقة اتحكم عليها بالحبس علشان كلام الناس

كتمت اشجان ألمها جواها ومبينتش لحد

وتانى يوم كان البنات فرحانين انهم هيخرجوا

وفعلا اخدتهم اشجان وراحت السبوع ومسمعتش كلام مامتها

لما رجعت كانت مامتها على السرير بتتفرج على التليفزيون

لما شافتهم دخلوا… اتدورت الجنب التانى واتغطت بالبطانية

“السلام عليكم”

قالتها اشجان… ومامتها مردتش عليها

“ماما انتى هتنامى… اتعشيتى”

ومردتش حكمت… وفهمت اشجان ان مامتها مقموصة علشان خرجت ومسمعتش كلامها… بس اهم حاجة عندها ان بناتها فرحانين لما خرجوا

تانى يوم مقامتش حكمت كالعادة مع البنات

وبعد ماالبنات راحوا مدارسهم قامت حكمت وفطرت لوحدها

ولما صحيت اشجان ولقت مامتها بتفطر لوحدها من غير ما تستناها زى كل يوم

“ايه ياماما فطرتى لوحدك”

وحكمت مش بترد عليها

“عموما انا معملتش حاجة تستدعى انك تخاصمينى”

“لا عملتى لما متعمليش حساب لكلامى وتخرجى برضه انتى وبناتك تبقى عملتى حاجة… المتطلقة المفروض تعمل حساب كلام الناس”

“اعمل حساب الناس علشان روحت اعمل واجب…اومال ليه بتقوليش انى اتاخرت لما اروح السوق ولا لما تبعتينى اشترى اى حاجة يبقى الناس مش هتتكلم”

“لالالا انتى فجرتى اوى…ايه الرد ده”

“فجرت علشان علشان روحت لزميلتى”

“لازم اخوكى يعرف ويشوف شغله معاكى”

“يعرف ايه؟؟؟ يعرف…انا معملتش حاجة اخاف منها ولا انا لسه صغيرة علشان اخويا يخوفنى… وانا مش هكبت بناتى بالعكس انا هخرجهم وافسحهم واعملهم كل اللى نفسهم فيه”

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة: دينا عماد

 

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى