مسلسل أقوى حب الحلقة السابعة والثامنة عشر
الحلقة 17
انتبهوا كلهم علشان يشوفوا مازن هيقول ايه…وكمل
“الاجازة اللى سافرت فيها نفعتنى اوى وخلتنى واحد تانى احسن من الاول”
ايمن”انت مكنتش وحش علشان تفرح كده”
مازن لا كنت وحش اوى … المشكلة اللى حصلت بينى وبين عادل قبل مااسافر خلتنا نبعد عن بعض وده كان احسن ليا ولما سافرت كان احسن واحسن”
ايناس”هو عمل معاك مشاكل احنا منعرفهاش”
مازن”لا خناقة فى التليفون وانا خوفته وبعدها متصلش تانى وانا كنت عارف انه جبان…متقلقيش مش دى المشكلة”
امل”ايه المشكلة طيب”
مازن”هى مش مشكلة هى فكرة “
وانتبهوا كلهم اكتر وردوا
“ايه\\ فكرة ايه\\ قول الفكرة”
مازن”حلمنا… نكمل حلمنا بس متبقاش مجلة حائط”
ايمن”تبقى ايه”
مازن”اعداد ننشرها اسبوعيا بس على النت ونعملها bdf واللى هيتابعنا هيحملها ونعملها صفحة ع الفيس بوك ونتوسع بدل ماالمجلة بيشوفها اللى فى الجامعة بس يشوفها اى حد فى اى حتة”
وبصوا كلهم لبعض مستحسنين الفكرة
ايمن”يابن الايه… جبتها ازاى الفكرة دى”
مازن”طول عمرى افكارى جامدة”
ايناس”هى من ناحية جامدة …جامدة”
مازن”امل وشروق…ايه ليه ساكتين كده”
شروق”انا مع ايمن فى اى حاجة”
مازن”هاااا وانتى ياامل”
امل”انا سرحت فى حلمنا…معاكم طبعا”
ايناس”ياابو قلب حديد ياامل ياجااااااامد”
ايمن”بس مش هنقدر احنا ال5 على المجلة”
امل”اللى عنده موضوعات حلوة وعايز يشارك معانا يشارك”
ايناس”صح واكيد هنلاقى كتير عايزين يشاركوا معانا”
ايمن”احنا نبدأ الاسبوع ده بمجلة حائط ونكتب فيها اننا من الاسبوع اللى بعده هتبقى الكترونى ونعلن ان اللى عايز يشاركنا يبعتلنا”
امل”تمام ونعمل ايميل للمجلة نتابع منه موضوعات المشتركين”
ايناس”تمام اوى كده.. شكلنا كده مفيش محاضرات النهاردة انتوا قاعدين ولا ايه”
امل”لا انا همشى بقى”
ايناس”طيب يالا بينا.. سلام ياجماعة”
ومشيوا ايناس وامل… وهما فى العربية
“اخبار بنت اختك ايه يا ايناس”
“الحمدلله بقت عسولة خالص بس مش بشوفها كتير”
“هو لسه بيضايقك”
“انا عملت زى ماقلتى ومرة وهما عندنا فى البيت دخلى المطبخ وبيقولى عايز اتكلم معاكى ضرورى… قمت مزعقة وقلت له هقول لبابا على عمايلك دى وهو يتصرف معاك.. من ساعتها بقى بطل ييجى عندنا الحمدلله”
“احسن اللى زى ده بيبقى جبان زيه زى عادل لو خفتى منه يزودها لو اديتيله على دماغه يبعد عنك”
“خلاص اتعلمت الدرس الحمدلله”
امل وهى بتفتح الباب بالمفتاح
سمعت صوت ابراهيم… وحد تانى متعرفوش
كملت فتح الباب… كان ابراهيم قاعد بيتغدا مع واحد تانى
بعد ما القت التحية دخلت على مامتها فى المطبخ
“مين ده ياماما”
“واحد صاحب اخوكى”
“وعندنا ليه؟؟”
“هو يعرف اخوكى من الشغل بس من اسكندرية ولما اخوكى بيروح هناك اسامة ده بيعزمه وبيرحب بيه”
“ومعزموش فى بيته ليه”
“ماانتى عارفة الفت ملبوخة بالعيال ولا فاضية تعزم ولا حاجة واخوكى اتصل بيا وقالى اجهز غداء”
“طيب مش هنتغدا احنا بقى”
“غيرى هدومك وتعالى نتغدا هنا لحد ما يخلصوا”
امل ومامتها لما اتغدوا… دخل ابراهيم عليهم
“ماما اعملى الشاى…وابقى هاتيه انتى بلاش امل”
“حاضر”
ورن تليفون البيت… وصوت ابراهيم بينادى على مامته
“ماما تعالى كلمى ام نجوى”
“يوووووه هتقعد ترغى ياختى وانا مش فاضية”
“اقول لابراهيم يقولها انك نايمة”
“لالا لاحسن تزعل…لو طولت ومعرفتش اقفل معاها ابقى ودى الشاى لاخوكى”
“حاضر”
ووقفت امل تعمل المطبخ… والشاى خلص واتصب ومامتها لسه بتتكلم…واضطرت امل تطلع لهم الشاى قبل ما يبرد
فى الكلية… وفى امتحانات اخر السنة
بعد الامتحان واقفين الاربعة مع بعض
ايناس”على فكرة احنا كده هنقعد شهر من غير المجلة ماتنزل وانا خايفة الناس تنسانا”
امل”هنعمل ايه بس ضغط الامتحانات واحنا شايلين مواد من السنة اللى فاتت يعنى هنذاكر ولا ننزل المجلة”
مازن”مااحنا هيبقى عندنا الصيف ننزل المجلة ونرجع نشاطنا تانى اقوى من الاول”
ايناس”بس امل فى الصيف مش بتعرف تنزل كتير علشان اخوها انما فى الدراسة عارفين نشتغل”
مازن”الا امل… امل مهمة جدا وانا بحب شغلها تصويرها ممتاز “
ايناس”ماتحاولى ياامل تبقى حتى تنزلى الصبح ونعمل شغلنا واخوكى بيبقى فى شغله”
امل”بس ساعات بيبقوا قاعدين عندنا ومراته بتبقى موجودة واخاف لو نزلت كتير يعملى مشكلة”
ايمن”ماتقوليله عندك تدريب فى الصيف تبع الكلية واليوم اللى تكونى هتنزلى فيه قوليله انه تدريب وحاولى تخليها يومين تلاتة بس فى الاسبوع”
مازن”حلوة فكرة ايمن… واحنا مينفعش نشتغل من غيرك”
امل”اوك …ربنا يستر”
فى بيت مازن مامته وباباه قاعدين بيتفرجوا على التليفزيون
ومازن راجع من بره
الام”مازن كنت فين طول النهار”
مازن”كنت مع اصحابى بنحتفل بالنتيجة”
الاب”باين ان اصحابك دول كويسين من ساعة ماعرفتهم وانت بتنجح وانا فرحان بيك”
الام”ها ياحبيبى عايز ايه هدية النجاح”
مازن”اللى انا عايزه هتجيبهولى”
الام”طبعا”
مازن”وعد”
الاب”شكلك طمعان فى حاجة كبيرة”
مازن”بصراحة اه”
الام” ايه هى… مفيش حاجة تغلى عليك”
مازن”عايز شقة فى مكان حلو”
واستغرب الام والاب وبصوا لبعض وردوا الاتنين
“ليه”
ايمن هو ومامته بعد ما رجع من شغله
“ماما بقولك ايه…مش كفاية كده بقى”
“كفاية ايه”
“عايز اخطب شروق”
“الف بركة ياحبيبى… انت جاهز يعنى”
“حاليا ممكن نقرا فاتحة بدبلتين وربنا يسهل بعد كده واهو اللى حوشته معقول بس نخلى الشبكة وكتب الكتاب السنة الجاية لما اخلص ولحد ماهى تخلص يكون ربنا فرجها وكونت فلوس للعفش وابقى اشوف اى شقة ايجار على قدنا”
“انت مرتب كل حاجة ما شاءالله عليك”
“انا بقالى سنين بشتغل علشان ايه مش علشان اصرف على نفسى وعلشان اقدر اخطب شروق”
“بس تفتكر اهلها هيوافقوا على كل اللى انت قلته ده من غير شروط”
امل قاعدة فى اوضتها بتشتغل على الكمبيوتر
دخلت عليها مامتها وهى فرحانة
“مبروك ياحبيبتى الف مبروك”
“الله يبارك فيكى ياماما…ماانتى باركتيلى الضهر لما رجعت”
“انا مش بباركلك على النتيجة بس”
“اومال على ايه”
“اسامة خطبك”
“اسامة مين”
“صاحب اخوكى اللى كان اتغدا عندنا قبل كده”
“وهو يعرفنى منين”
“ده اخوكى طاير م الفرحة وبيشَكر فيه اوى وقال ييجى هو واهله يوم الجمعة”
“هو ايه الهبل ده… ييجى فين هو واهله من غير مااعرفه اصلا”
“ماهو جاى علشان تشوفيه وعلشان اهله يشوفوكى”
“ماما بلاش استعجال… انا معرفوش”
“استعجال ايه.. ده شاب كويس وابن ناس وجاهز وشقته جاهزة وعايز يناسب اخوكى واخوكى يعرفه من فترة كبيرة وعارف اخلاقه ومتدين زينا وكمان مبسوط هو واهله”
“معرفوش ياماما ازاى كده بس”
“بكرة تعرفيه… بقولك ايه بقى مش معنى انى بوافقك على حاجات كتير انى هوافقك على كلامك ده… العريس كويس وابن ناس واخوكى يعرفه وهنبقى مطمنين عليكى… واحنا نعرف اكتر منك بكرة تعرفيه وتاخدى عليه وهتفتكرى كلامى ده كويس”
الحلقة 18
رد عليهم مازن
“انا عايزها علشان عندى طموح اعملها مقر للمجلة بتاعتى انا واصحابى”
الام”ماشى يامازن… بس متكونش شقة كبيرة ابدأ بشقة معقولة شوية واذا مشى الحال ابقوا كبروها بمجهودكم انتم”
الاب”واشمعنى انت اللى هتجيب الشقة يعنى”
مازن”الفكرة خطرت على بالى دلوقتى وانا بكلمكم ومحدش من اصحابى يعرف لسه”
الام”دور على الشقة اللى تناسبك واحنا موافقين”
وبصت لجوزها علشان تسمع رأيه وتأكيده على كلامها
الاب” ماشى… ربنا يوفقك”
شروق مع مامتها فى البيت
هما الاتنين بس
“ماما… انتى طبعا عارفة ان ايمن اللى قدامنا معايا فى الكلية والسنة اللى فاتت دى قربنا من بعض زيادة شوية”
“قربتوا ازاى يعنى”
“يعنى بنشوف بعض كل يوم… وبنتكلم وبيساعدنى فى الدراسة لما بطلب منه…كده يعنى ياماما اكيد انتى فاهمة قصدى”
وفهمت مامتها قصدها لما اتكسف شروق
“انتى بتحكيلى شعورك ولا هو اتكلم معاكى”
“هو اتكلم معايا… وعايز ييجى يكلم بابا”
وفرحت الام …فرحتها مش علشان عريس جاى لبنتها
فرحتها كانت لان ايمن عايز يطلبها منهم رسمى ومستغلش انهم مع بعض فى الكلية استغلال سئ
ورجعت افتكرت حاجة اخدتها من فرحتها
“بس يخطبك ازاى وفيه حاجات كتير متنفعش”
واتخضت شروق
“حاجات ايه…ايمن كويس جدا ياماما”
“انا عارفة انه مؤدب ومحترم بس ابوه سمعته مش قد كده”
“بس مامته طيبة اوى وايمن طالع زيها …وبعدين ياماما مش معقول يبقى باباه طول عمره منكِد عليهم وييجى يقف كمان قدام ارتباطنا بحكاية سمعته دى”
“وهو ايمن خلص علشان ييجى يخطب”
“بصى ياماما هو فاضله سنة ممكن نقرا فيها فاتحة وبعد كده ربنا يسهل… مش انتى طول عمرك بتقولى ان الراجل اهم حاجة اخلاقه وتربيته مش فلوسه”
“اه بقول… ولسه بقول”
“انا عايزاكى تتكلمى مع بابا بس لو اعترض على اى حاجة والنبى ياماما تساعدينا وتقنعى بابا علشان لما ايمن ييجى كل حاجة تمشى كويس”
“انتى بجد بتحبيه”
كانت شروق عايزة تقول انها بتحبه اوى من زمان… بس سكتت واكتفت ان مامتها تفهم سكوتها
“ماما… اطمِن”
وحضنتها مامتها
“ربنا يقدم اللى فيه الخير ان شاءالله”
امل وايناس مع بعض الصبح بيغطوا موضوع وبعد ما خلصوا
“هتصل بمازن وايمن علشان نقابلهم”
“ليه فى حاجة”
“مازن كلمنى امبارح وبيقول عايزنا ضرورى”
واتصلت ايناس بيه…
“ازيك يا مازن… اه امل معايا… هو فيه حاجة؟… طيب ماشى”
امل”ايه؟؟”
“بيقول هيكلم ايمن ونتقابل كمان ساعة فى المكان بتاعنا”
لما اتقابلوا كلهم فى الكافيه اللى بيتقابلوا فيه كل مرة
مازن”قوموا معايا”
ايمن”على فين”
مازن”محدش يسأل خالص…كلها شوية وهتعرفوا”
وقاموا معاه امل مع ايناس فى عربيتها ورا مازن وايمن
ركن مازن فى منطقة سكنية… ركنت وراه ايناس
نزل ايمن ومازن … وراحوا ناحية ايناس اللى كانت لسه قاعدة فى العربية
مازن”يالا انزلوا”
ايناس”ننزل فين”
ايمن”انت هتفضل ممشينا وراك كده… انا مش فاهم حاجة”
مازن”انزلوا بقى علشان تفهموا كل حاجة”
ونزلت ايناس وامل وراح مازن ناحية عمارة
امل”انت رايح فين يامازن…انا مش طالعة حتة معرفهاش”
مازن”وانا يعنى هخطفكم انتوا ال3…اطلعوا معايا بس”
طلعوا كلهم ورا مازن….فتح شقة فى الدور التالت
مازن”ادخلوا بقى وقوليلى… ايه رأيكم فى مقر حلمنا”
بصوا لبعض ال3… وابتسموا بفرحة مع عدم الفهم الكامل
مازن”من غير ما تسألوا… انا عايز اشترى شقة واعملها مقر للمجلة بتاعتنا…وحاجة كمان”
ايمن”قول ياابو المفاجآت”
مازن”هنعملها مجلة بجد … ورقية يعنى مش الكترونى بس”
امل”انت بتحلم اوى يامازن”
مازن”وهى حلمنا كانت ايه… انتى نسيتى اول مجلة عملناها اتقالنا ايه عليها… فاكرة لما حلمنا وحققنا حلمنا بتشوفى عدد تحميل العدد الواحد بيوصل قد ايه… حلمنا هنكبرها”
ايناس”انا معاك جداااا يامازن… حلمنا هى حلمنا فعلا ولازم نفضل نحلم ونحقق حلمنا”
ايمن”يا سلااااااااااام ع الاخبار الحلوة… اقولكم حاجة يوم الجمعة رايح اتكلم مع ابو شروق”
ايناس”واااااااو… مبروك ياايمن”
ايمن”الله يبارك فيكى بس ده انا لسه رايح اتكلم بس”
مازن”تتكلموا وتتفقوا وتقروا الفاتحة وتكتبوا الكتاب وتعلوا الجواب وزغروطة يابنات”
ضحكوا مع بعض الا امل… كانت ساكتة وواضح انها بتغالب دموعها
مازن”مالك ياامل”
امل”انا كمان يوم الجمعة جاى لى عريس”
ايناس”وااااااااو تانى فرحين فى وقت واحد”
ايمن”واضح انك مش فرحانة خالص”
امل”خالص”
ونزلت دموعها غصب عنها…قربت منها ايناس بسرعة حضنتها
“ايه ده ايه ده… مالك ياامل”
مازن وايمن مش فاهمين…وبيسألوا بعض”مالها”
ايناس”طيب تعالوا ننزل نقعد فى اى حتة علشان امل تحكى مالها”
مازن”قبل ماننزل الشقة عجبتكم خلاص… اخلص فيها”
ايمن”وانت هتشتريها على حسابك لوحدك ليه بس”
مازن”وهى يعنى هتخسر…اهى شقتى…انما المجلة والشغل احنا ال4 زى بعض بالظبط “
ايمن”ماشى الكلام… ع البركة”
امل”انا هروح بقى مش هينفع نروح فى حتة دلوقتى”
ايمن”طيب قوليلنا مالك”
امل”مفيش …متضايقة بس من موضوع العريس اللى جاى فجأة ده وماما وابراهيم مصممين عليه”
مازن “مصممين ايه؟؟دى حياتك انتى وانتى اللى تختاريها”
امل”عندى امل انى معجبش العريس ولا اهله لما ييجوا تانى”
ايناس”بس هو متقدملك يعنى انتى عاجباه خلاص… ومش عاجبنى سلبيتك دى يا امل…ارفضى لو مش عاجبك”
مازن”طبعا لو مش عاجبك ارفضى”
ايمن”ادى لنفسك فرصة ياامل تتعرفى عليه يمكن يطلع كويس”
امل”انا اسفة ياايمن…نسيت اقولك مبروك..ربنا يتمم لكم بخير”
ايمن”الله يبارك فيكى… وانتى كمان ربنا يتمملك بخير”
يوم الخميس جه ابراهيم ومراته وولاده… وباتوا فى بيت الام
طول ماهما قاعدين ابراهيم بيتكلم عن اسامة وحكايات ومواقف تبين قد ايه هو كويس
والفت والام عمالين يتكلموا فى هنقدم ايه ونجيب ايه ونحضر عشا علشان يشوفوا كرمهم وشطارة امل
امل كل ماتحاول تبين انها رافضة تتقابل من كل اللى حواليها بعدم السماح لها بمجرد التفكير…الموضوع منتهى
لما جه اسامة ومامته وباباه واخته وجوزها
كل الموجودين بيرحبوا بيهم… حتى الفت
ولما خرجت اما تسلم عليهم… كانت مكسوفة تبص ناحية اسامة
ام اسامة”ماشاءالله على القمر… عرفت تختار يااسامة…تعالى ياحبيبتى اقعدى جنبى”
امل بتتحرك زى حسب ما بتتوجه منهم… مش عارفة تتكلم لانها لوحدها قصادهم كلهم
الامور بتمر بسرعة جدااا… قرأوا الفاتحة
بيتفقوا على تفاصيل العفش والمؤخر والجهاز
ابو اسامة”بعد ما اتفقنا بقى على كل حاجة… الجمعة اللى بعد الجاية نيجى نجيب الشبكة وبعدين نحضر للخطوبة وكتب الكتاب”
بعد ما مشيوا… قعدت امل تعيط
“احنا متفقناش على قراية فاتحة…انتوا قلتوا هييجوا بس…انا مش عايزاه”
ابراهيم”ومش عايزاه ليه ان شاءالله…في ايه يتعيب”
امل”محصلش قبول ياابراهيم… ده مش كفاية”
ابراهيم”لا مش كفاية…انتى بس تلاقيكى مكسوفة انما لما تاخدوا على بعض مش هتقولى كده”
امل”ياماما قولى حاجة… ياناس محسيتش ناحيته بأى قبول”
الفت”انتى بتتبطرى على عريس زى ده… ده على رأى المثل البطران اخرته قطران… ولا ايه ياطنط”
الام”يا امل هو فيه عرسان بالمواصفات دى دلوقتى”
امل”حتى لو مفيش…مش عايزاه..وده اخر كلام”
وزعقت الام… وانفعلت… ومسكت قلبها
وافتكرت امل الازمة اللى جت لها قبل كده
“مالك ياماما”
الام وهى بتعيط” حرام عليكى تعبتى قلبى… هو انا عايشالك العمر كله… عايزة اطمن عليكى قبل ما اموت”
امل”ياماما متقوليش كده”
ابراهيم”انتى زودتيها اوى… موتى امك من حرقة الدم”
امل وهى بتبوس ايد مامتها
“متزعليش يا ماما… خلاص هعمل اللى يريحك… وخلاص مش هتكلم تانى”
ايمن وشروق… تمت قراية فاتحتهم
مازن وايمن بيتابعوا توضيب الشقة والتصاريح اللى محتاجينها علشان تبقى المجلة مطبوعة
امل وايناس بيتابعوا الشغل بنفس طريقتهم السابقة
اسامة بييجى كل اسبوع لامل بعد ما جابوا الشبكة وبيحضروا لكتب الكتاب… امل مش قادرة تحب اسامة ولا حتى تتقبله
كل ما بييجى بتستحمل وجوده بالعافية وتحس ان روحها ردت لها بعد ما يمشى
جت الدراسة… اخر سنة
واتحدد ان خلال شهر هيتم كتب الكتاب…بعد ما حجز اسامة وابراهيم المكان
الشقة خلصت وبقت جاهزة انهم يبدأوا منها شغل
الشقة اوضتين بس وريسيبشن كبير
الاوضتين…كل اوضة بمكتبين
واحدة لامل وايناس والتانية لمازن وايمن
والريسيبشن فيه ترابيزة طويلة فى النص للمحررين اللى اغلبهم مش دائمين … وعلشان الاجتماعات
ومكتبين بعد الباب…واحد للسكرتيرة والتانى للمحرر الالكترونى
“دول الثابتين المتواجدين يوميا “
ايناس وايمن ومازن بيروحوا بشكل يومى
الا امل… بتروح حسب ظروفها..خصوصا انها بقت متحاطة بابراهيم من ناحية واسامة من ناحية تانية
كنت احلى لحظاتها وهى معاهم فى المجلة
ولما اتحدد يوم كتب الكتاب… وحست انها هتتحرم من كل حاجة بتحبها لو اتجوزت وسافرت اسكندرية
هتتحرم من اصحابها… ومن المجلة.. حلمها وحلمهم
وقررت انها لازم تنهى الارتباط ده بأى طريقة ومهما كانت النتايج
———–———-———————-————
ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة
الى اللقاء في الحلقات القادمة
بقلم الكاتبة: دينا عماد
