ترفيهمسلسل زواج بالإكراه

مسلسل زواج بالإكراه (العنيده والمغرور) الحلقة 17و18و19

الحلقة 17

وف الاسفل

يقف بالقرب من منزلها وهو يسال المار ف الشارع: خد ياض يا مرسي تعالي اما اقولك

مرسي: خير يا اشرف

اشرف: هى ايه الزغاريط اللي جايه من بيت المزه دى

مرسي: اااه هو انت ماتعرفش عقبال عندك يااشرف دى المزه بتتخطب

اشرف بغضب: ايييييييه انت بتقول ايه يااض انت اتجننت ولا ايه

مرسي: ولا اتجننت ولا حاجه واسأل اى حد هيقولك كدا

اشرف: ماااشي غور انت دلوقتى

مرسي: ماشي ياعم..ويذهب

اشرف بتوعد: مااشي يا برنسيسه بقي بتتخطبي وحيااتك عندى وحيات الحب اللي حبتهولك بدل ما تبقي جوازه هخليهالك جنازه وبدل ما يلبسلك البدله السوده هلبسلك كفنه

وف الاعلي

عبد الحميد: مبروك ياولاد ربنا يسعدكو ويتمم ليكو بخير

ريناد: الله يبارك فيك يابابا

ياسين: الله يبارك فيك ياعمى عقبال ماتفرح بأميره وامير ياارب

عبد الحميد: يااه يا ياسين يامين يعيش يابنى

نجوى: ربنا يديك الصحه وطول العمر ياحاج وتفرح بيهم وبعيالهم كمان

عبد الحميد: ياااه عيالهم كمان لا ياحاجه انا كفايه عليا افرح بيهم هما

ياسين: المهم ياعمى ماقولتليش تؤمرنى بايه

عبد الحميد: الامر لله وحده يا ياسين وانا قولتلك طلباتى مش عاوز اكتر من كدا

ياسين: ماشي ياعمى دى طلباتك..انما طلبات ريناد لازم تجيلها كامله دا حقها

عبد الحميد: يبقي تسألها هى بقي

ريناد: انا يا ياسين مش عاوزه حاجه خلاص من الدنيا تانى غيرك وبس..كفايه عليا انت مش عاوزه اى حاجه تانى

ياسين بابتسامه: بس دا حقك ياريناد ودى الاصول

عبد الحميد: شوف انت عاوز تجيب ايه وانا موافقك عليه…

ياسين: هاخدك انت وطنط وريناد وهننزل نشترى الشبكه اللي ريناد تختارها وكمان المهر اللي تطلبه وبالنسبه للفيلا ..انا عايش فيها لوحدى..وقبل الفرح هبدأ اظبط فيها شويه حاجات بسيطه كدا وهتبقي زى الفل المهم ان ما اقصرش ف ريناد ابداا

ريناد بابتسامه: ربنا يخليك ليا يا ياسين

ياسين: ويخليكى ليا يا حبيبتى

عبد الحميد بمداعبه: هاا..ويخليكو لينا احنا كمان

ياسين: احم..عمى..منورنا ياعمى

فيضحك الجميع بشده وبعد وقت لطيف قضاه ياسين مع اهل ريناد يهبط للاسفل وهو يسير يشاهده اشرف فيذهب ويخطى بجانبه وعن قصد يخبط ف كتفيه

اشرف: اييه يا اخيناا انت..مش تاخد بالك ولا ايييييييييه

ياسين: جرا ايه ياعم ..انت اللي خبطت فيا مش انا

اشرف: يعنى انا بتبلي عليك ولا ايييه

ياسين: انت توطى صوتك ده وانت بتكلمنى وتتكلم بأدب

اشرف: لا دا انت ما اتربتش وعاوز تتربي من جدييد

ويهجم علي ياسين ياسين ويظل يضرب فيه وتجتمع الناس عليهم وف وسط هذه الهمجيه يخرج اشرف من جيبه مطوااه ويغرزها ف بطن ياسين..لتخرج ريناد الي البلكونه وتشاهد الناس وهى مجتمعه وبعد تركيز منها ادركت انه ياسين من يتعارك

ريناد بلهفه: ياسيييييييين

فتهبط الدرج مسرعه لتتفاجئ بانه غارق ف دمه فتجرى عليه متلهفه وهى غارقه ف دموعها: ياسيين..ياسيييين قوم ياحبيبي..ياسين رد عليا..اطلبو الاسعاف بسررررررررعه

وبالفعل اتت الاسعاف ونقلته الي المشفي وذهبت معه ريناد هى ووالدها..وبعدها اجرت اتصالا بمروان

عند مروان قبل ذلك

كان يجلس هو وافراد العائله مع الدكتور معتز الذي جاء للمباركه

الدكتور معتز: هاا يلا ياحوريه اتجدعنى الشغل مستنيكى

حوريه:هههههه من عنيا يادكتور قدامك لاخر الاسبوع بس وبعدين هرجع ارخم عليكو هناك

الدكتور معتز: والله وحشتنا رخمتك يا حوريه

مروان: ومين قالك يا دكتور ان حوريه مراتى رخمه دى دمها زى العسل

الدكتور معتز: ايوه ياسيدى مين يشهد للعروسه ههههههههه

وبعد وقت قليل

الدكتور معتز: استأذن انا بقي يا جماعه

مجدى: ايه الدكتور معتز مستعجل ليه

الدكتور: لا كويس اووى كدا…بعد اذنكو ياجماعه

حوريه: ماشي يا دكتور ميرسي اووى علي زيارتك دى

الدكتور معتز: دى اقل حاجه ياحوريه..يلا بعد اذنك

حوريه: اتفضل يادكتور

وبعدها تصعد حوريه غرفه الليفينج ويصعد مروان ورائها فتجلس وتشاهد التلفاز اما مروان فيتصفح ف هاتفه ويلعب عليه بلايستيشن

حوريه: وطى صوت الفون لو سمحت يامروان

مروان ونظره ف الهاتف: طيب

حوريه: وطى صووت الفووون لو سمحت

مروان: حاضر

حوريه بضيق ونفاذ صبر: ممكن بعد اذنك لو سمحت توطى صوت الفون شويه انا مش عارفه اتفرج

مروان: وانا مابعرفش العب غير والصوت عالي كدا

حوريه: خلاص قوم ادخل اوضه النوم والعب فيها

مروان: طب ماتقومى تدخلي انتى

حوريه: اوضه النوم مافيش فيها تليفزيون

مروان ويترك ما بيده: طب ايه رأيك انا عندى فكره حلوه

حوريه: قوول

مروان ويقترب منها ببطئ: ما انا اسيب الفون وانتى تقفلي التليفزيون ونقعد نتكلم مع بعض شويه

حوريه بارتباك: ها..لا لا انا متابعه المسلسل وعاوزه اتفرج عليه

مروان: هنتكلم والله ماتفهمنيش غلط

حوريه: ع فكره انا فهماك صح وعارفه انك عاوز تتكلم بس انا عاوزه اتابع المسلسل فعلا

مروان بغضب: ماشي ياحوريه

حوريه لتعانده: ماشي رايح فين ماتقعد

مروان: ياا عسل احنا بقينا بنألش وكدا طيب مش ماشي وقاااعدلك يا حوريه قاااعدلك واهو هلعب عالفون وهعلي الصوت كمان..وما ان امسك بهاتفه حتى وجد ريناد تتصل به

مروان: ريناد بتتصل دلوقت..خير يارب..الو

ريناد ببكاء: مروااان الحقنى يا مرواان

مروان بخضه: ايه ياريناد ف اييه

ريناد ببكاء: ياسين يامروان ف اوضه العمليات الحقنا ارجوك

مروان بلهفه: ياسييين..عنوان المستشفي ايه يا ريناد بسرعه

ريناد: العنوان,,,,,,,,,,, ارجوك يامروان بسرعه

مروان: مسافه السكه…وبعدها يجرى اتصالا بيوسف

حوريه: ف ايه يامروان وياسين ماله……..مروان رد عليا……..مروان

مروان: ايوه يا يوسف..انت فين..تلبس هدومك بسرعه وتروح مستشفي,,,,,,,,,,,, دلوقتى حالا ياسين هناك ف اوضه العمليات…مااعرفش يايوسف انا لسه عارف زيي زيك دلوقتى ريناد كلمتنى وقالتلي…..يلا يايوسف……زويغلق الخط ويجرى ناحيه غرفته ويرتدى ملابسه بعجاله ويهبط للاسفل يستقل سيارته ويذهب

لتهبط حوريه لتجد هويدا وسهيله ومجدى

هويدا: ف ايه يا حوريه مروان بيجرى كدا ليه وبنادى عليه واخد ف وشه وما بيردش علي حد

حوريه: مش عارفه ياطنط كل اللي اعرفه انه جاله تليفون من ريناد وقالتله ان ياسين ف المستشفي

مجدى: اييه ياسين..ماله ف ايه

حوريه: والله ياعمى مش عارفه..انا برضو كنت بكلمه وبسأله وهو ماكانش بيرد عليا

مجدى: لا انا كدا لازم اتصل بيه واسأله..ويجرى اتصالا بمروان فيرد عليه

مروان: ايوه يابابا

مجدى: ايوه يامروان ف ايه يابنى وياسين ماله

مروان: انت عرفت منين يابابا

مجدى: من مراتك المهم قولي ف ايه

مروان: مااعرفش يا بابا انا لقيت ريناد بتتصل بيا وبتقولي ان ياسين ف اوضه العمليات وادتنى عنوان المستشفي وانا كلمت يوسف وزمانه راح وانا دلوقتى خلاص قربت اوصل

مجدى: ماشي يابنى احنا جاينلك دلوقتى حالا

مروان: ماشي يا بابا معلش انا مضطر اقفل لانى وصلت…وبعدها يغلق الخط ويصعد علي عجاله ويصل لغرفه العمليات وبانفاس متقطعه يسأل يوسف: يوسف ف اييه وياسين ايه اللي حصله

يوسف: اهدى بس يامروان وخد نفسك

ريناد بدموع: انا السبب انا السبب

مروان: انتى!! ايه اللي حصل لياسين ياريناد

عبد الحميد: اهدى بس يابنى…ريناد مش السبب فاللي حصل لياسين..هى بس حاسه بالذنب

مروان: ومين حضرتك

عبد الحميد: انا عمك عبد الحميد والد ريناد

وبعدها يخرج الطبيب ويقول: يا جماعه المريض نزف كتير واحنا محتاجينله دم بسرعه وفصيلته مش موجوده هنا وعما نبعت نجيب هناخد وقت

مروان: انا يادكتور فصيلتى نفس فصيله ياسين..انا جاهز

الطبيب: طيب اتفضل معايا…وبعد وقت يخرج مروان وهو دايخ بعض الشئ ويجرى عليه يوسف

يوسف: اقعد ارتاح هنا يامروان

مروان: انا عاوز اعرف اييه اللي حصل لياسين

يوسف: اقعد طيب وانا هحكيلك اللي قالهولي عم عبد الحميد وريناد..وبعد ان حكى له يوسف

مروان: يا ابن ال……بقي يضرب ياسين بالمطوه عشان خطب ريناد..والله لا لازم اخد حقك يا ياسين واوديه ف ستين داااهيه

عبد الحميد: ماتخافش يامروان يابنى احنا طلبناله البوليس وجه خده وهما هيجو ياخدو اقوال ياسين

وبعد وقت كبير يخرج ياسين من غرفه العمليات وهو غائب عن الوعى ويجرى عليه جميع الموجودين واولهم ريناد

ريناد ببكاء: ياسين..ياسين رد عليا يا نورعينى..دكتور هو عامل ايه

الطبيب: لاا اطمنى خاالص الحمدلله بقي كويس جدا وشويه صغيرين وهيفوق بس هو محتاج راحه وتغذيه مش اكتر

مروان: متشكرين اووى يادكتور

الطبيب: علي ايه دا واجبي ..بعد اذنكو

فيدخل له الجميع الغرفه..وبعد وقت كبير يبدأ يفيق شيئا فشيئا ويقول بصوت مبحوح ومنخفض: رينااد..ماحدش هياخدك منى..ريناد

ريناد بدموع وهى جالسه بجانبه وتمسك بيده: نعم يا حبيبي انا جمبك

ياسين: بحبك

ريناد: وانا كمان بحبك اوووى ومااقدرش اعيش يوم واحد من غيرك يا حبيبي

ويفيق تمام وينظر حوله ويقول: انا فيين

يوسف: انت فين ايه بس..وقعت قلبنا ياعم ياسين وانت قايم تحبلي ف ريناد

عبد الحميد: حمدالله علي سلامتك يابنى

ياسين بألم: الله يسلمك ياعمى…ااااااااه بطنى بتوجعنى اوووى

مروان: معلش يا ياسين اتحمل شويه وانشف كدا يااض

ياسين: انشف اييه بس..وبعدين ايه اللي حصل..هو..هو ااااه انا افتكرت..انا لما نزلت من عند ريناد ف واحد جه وخبط فيا وبعدها فضل يزعق معايا والناس اتلمت وفجأه حسيت بحاجه بتدخل بطنى وبعدها ماحستش بأى حاجه حواليا

عبد الحميد: منه لله يابنى..ربنا كبير وهياخد جزاؤه علي اللي عمله فيك

ياسين: طب هو عمل كدا ليه انا مااعرفوش

عبد الحميد: بيحب ريناد وكان عاوز يتجوزها واحنا رفضناه كتييير فلما لقاها اتخطبتلك قرر ينتفم منها فيك

ياسين: ياااه الشر بتاع الناس يوصل لدرجه القتل

عبد الحميد: واكتر يابنى واكتر المهم انك قومتلنا بالسلامه

ريناد بدموع: سامحنى يا حبيبي انا السبب

ياسين: لا يا حبيبتى انتى مالكيش ذنب ف حاجه

وبعدها يدق الباب ليدخل ظابط ويطلب ان يأخذ اقوال ياسين..واخذها بالفعل ورحل وبعدها جاء مجدى وهويدا ويليهم سهيله وحوريه وجميعهم اطمئنو علي ياسين وقرر الطبيب ان يمكث ياسين ف المشفي اسبوعا كاملا للاطمئنان علي صحته تماما وكان برفقته اياما ريناد ووالدها واياما مروان واياما يوسف..وبعدها جاء يوسف له ليبلغه بأنه اصدر حكم علي اشرف بالسجن لمده 3 سنوات مع الشغل

عبد الحميد: الف حمد وشكر ليك يارب

ريناد: ربنا اخدلك حقك يا حبيبي

ياسين: الحمدلله ياحبيبتى..الحمدلله
******************
ويبدأ اسبوعا جديدا خالي من المشاكل ومن المتاعب ومن اى شئ…فيه تذهب حوريه لعملها ويذهب مروان ويوسف وياسين لعملهم

مروان: ها ياولاد اخبار الشغل ايه

يوسف: ياولاد ايه حضرتك..اسألنى انا عن الشغل مش حضرتك كنت بتعسل الاسبوع اللي فات والبيه كان ف المستشفي

مروان: الهى يابعيد تدوق العسل اللي انا دوقته.. طيب يايوسف..اخبار الشغل ايه يا يوسف..حلو كدا

يوسف: اه كدا حلو..الشغل تمام والصفقه الجديده مشعلله الدنيا

مروان: اه مش صفقه المدارس..بقولكو ايه احنا عاوزين نحط اقل سعر عاوزين الصفقه دى ترسي علينا مفهوووم يايوسف انت وياسين

يوسف: مفهوم يابوب

ياسين: تمام ياميرو

يوسف: الا قولي عامل ايه مع حوريه

مروان: هكون عامل ايه يعنى زى مااحنا مافيش جديد..بس.

ياسين: بس ايه اتكلم يا ميروو

مروان: بس انا حاسس كدا احساس اتجاها مش عارف ده ايه

ياسين: احساس ايه ده

مروان: مش عارف يا ياسين بس احساسي من نحيتها اتغير

يوسف باستنكار: من اسبوع!!

مروان: اهو الاسبوع اللي انت بتتكلم عليه ده غير فيا حاجات كتير من نحيتها ..يايوسف كونك انك تشوف حد ليل نهار قدام عنيك بتاكلو مع بعض بتنامو ف اوضه واحده مع بعض اى نعم مابنتكلمش كتير ولو اتكلمنا بنرمى دبش بس لما بتبصلي وابصلها بحس ان احنا بنقول لبعض كلام كتير من غير حتى مانتكلم

يوسف: اقدر اقول انك..حبيتها

مروان: مش بالظبط كدا بس تقدر تقولي ان عرفتها كويس اووى ومالقتش اطيب من قلبها ولا ف حنيتها

ياسين: طب دى بدايه مبشره جدا يامروان

مروان وينظر امامه: تفتكر!!
****************
ف المشفي عند حوريه

بسنت: يااه يا رورو كان واحشنى مشينا ف طرقه المستشفي واحنا بنرغي سوا انتى نفسك وحشتينى اووى كنتى سايبه فراغ يابنت الايه

حوريه: وانتى كمان يابسبس كنتى وحشانى جدا..وادينى اهو ياستى رجعتلك تانى وهفضل علي قلبك

بسنت: ياريت ياحبيبتى…المهم قوليلي عامله ايه مع مروان ما اتكلمناش من اخر مره كنا عندكو فيها

حوريه بابتسامه: مروان

بسنت: ايوه مروان وايه السرحان والضحكه دى..خيييير يارورو

حوريه: ايه يا بسبس كل خير ان شاء الله بس..بس

بسنت بضحك: بتبسبسي ليه يا حوريه احكى احكى وماتكسفيش ههههه

حوريه: اوعى تفهمينى غلط انا ومروان زى مااحنا

بسنت: اومال ف اييه

حوريه: مش عارفه يابسنت بس انا حاسه ان احساسي من نحيه مروان مابقاش زى الاول

بسنت: ازاى يعنى

حوريه: يعنى لما عرفت مروان كويس نظرتى فيه اتغيرت مروان طلع انسان كويس جدا وبيحب اصحابه واهله وبيخاف عليهم جداا يعنى حاساه شخص غير اللي انا عرفته خاالص

بسنت: وكل ده حستيه ف اسبوع واحد بس

حوريه: انا برضو مستغربه اصل انك تعيشي مع حد وتشوفيه طول اليوم قدام عينك وتاكلي معاه وتنامى معاه ف اوضه واحده..اكيد هتعرفيه كويس اووى لما تعاشريه كدا ويا اما احساسك يتغير يا للاحسن يا للاوحش

بسنت: واحساسك بقي اتغير لانهووون يا رورو

حوريه بابتسامه وهى متسائله: للاحسن؟؟

بسنت بضحك: انتى بتسألينى انا…حلوتك ياحوريه ههههه

حوريه: ههههههه بس يابنت
*********************
اما عند تاليا فيتصل بها حمدى ويأخذ منها معادا ليقابلها ف نفس الكافيه الذي قابلها فيه اول مره فذهبت له وهى حامله لذاك السي دى

تاليا: اذيك يا حمدى

حمدى: الله يسلمك..اذيك يا تاليا

تاليا: مدااااااااام تاليا ياحمدى احنا هنشيل الالقاب ولا ايه

حمدى: ماشي يا ت..مدام تاليا

تاليا: كدا تمام يا حمدى

حمدى: هاتى الحاجه

تاليا:الفلوس الاول يا حمدى

حمدى بسخريه: مااشي يا.. يامداام..ويضع امامها حقيبه صغيره بها النقود…اتفضلي 150 الف جندى

تاليا: يا سلاااام ايوه كدااا..كدا انا احبك

حمدى: هاتى الحاجه بقي

تاليا: اتفضل يا حمدى..واعطته الظرف الذي يوجد فيه السي دى

حمدى: كدا تمام..تحبي تشربي ايه بقي

تاليا وهى تضع ساق فوق ساق: هوت شوكليت يا حمدى

حمدى: من عنيا يا جميل
******************
وبعد يومين ف شركه مروان العوامى

مروان: ايه الاخبار ياولاد

يوسف: كله تمام يامروان حطينا اقل سعر ف السوق

مروان: واش عرفك انه اقل سعر مش يمكن ف سعر متقدم اقل مننا

ياسين: عيب عليك يا مروان انت بيشتغل معاك رجاله مش عيال

مروان: طيب وحطيته كام

يوسف: 10 مليون جنيه

مروان: طيب تمام اووى..الصفقه دى صعبه ومهمه جداا يايوسف لازم ترسي علينا انت فااهم

يوسف: فااهم يامروان

ياسين: ماتخافش يامروان وسيبها علي الله

مروان: ونعم بالله
*********************
ويأتى تانى يوم ويكون الجميع منتظرين علي احر من الجمر..كان يتواجد مروان مع يوسف ف الشركه وياسين ف مكان اخر منتظر ان يعرف النتيجه..وكانت حوريه ف عملها

مروان بتوتر: ياسين اتأخر ولا انا بتهيألي يا يوسف

يوسف: اهدى يا مروان هو ما اتأخرش ولا حاجه بس انت اللي متوتر

مروان: الصفقه دى مهمه اووى يا يوسف ولو مارستش علينا هنخسر اووى

يوسف: ان شاء الله خير يا مروان

مروان بتوتر:ان شاء الله..ان شاء الله

اما عند حوريه كانت متوتره هى الاخرى

بسنت: حوريه مالك ف ايه

حوريه بتوتر: ها لا مافيش مالي يعنى يابسنت

بسنت: حوريه انتى متوتره من الصبح وموترانى معاكى مالك ف ايه

حوريه:………..

بسنت: يابت انطقي

حوريه: مروان..قلقانه عليه اووى

بسنت: قلقانه علي مروان..والنبي

حوريه: بسنت مش وقتك خالص والله

بسنت: سورى يا حوريه طب ف ايه فهمينى

حوريه: كان خارج متوتر جدا..عشان صفقه المدارس خايف انها ماترساش عليه وانا كمان بصراحه خايفه ان الصفقه ترسي علي حد غيره دا لوحصل هيخسر كتير اووى ف شغله

بسنت: تصدقي صح..انا برضو كنت بكلم يوسف النهارده قفل معايا كدا وكان موده مش اللي هو

حوريه: مش بقولك متوترين خايفين ماترساش عليهم

بسنت: بس مش غريبه انك قلقانه عليه يارورو

حوريه: الله مش جوزى يابسنت

بسنت: اييه سمعينى تانى كدا..جووزى..الله اكبرررر

حوريه: بس بقي يابسنت

بسنت: طب بقولك ايه ماتتصلي علي مروان اسأليه عمل ايه..يعنى اهو يعرف انك مهتمه وكدا

حوريه: تفتكرى

بسنت: افتكر ونص..يلا

حوريه: اوك..وتمسك هاتفها وتجرى اتصالا به..فيرن هاتفه فيمسكه بلهفه اعتقادا منه انه ياسين

يوسف بلهفه: دا ياسين يا مروان

مروان: لا لا دى حوريه

فيرد عليها: الو..ايوه يا حوريه

حوريه بارتباك: ايوه يا مروان اذيك

مروان: انا كويس ياحوريه انتى عامله ايه كويسه

حوريه: اه كويسه انا بطمن بس اخبار النتيجه ايه

مروان: لسه والله يا حوريه ياسين لا اتصل ولا جه

حوريه: ماتخافش ان شاء الله هترسي عليكم..سيبها علي الله

مروان: ونعم بالله….ادعيلي يا حوريه

حوريه بابتسامه: بدعيلك يامروان…خلي بالك من نفسك

مروان بابتسامه: وانتى كمان

حوريه: مع السلامه

مروان بابتسامه: الله يسلمك

يوسف: ايه يا مروان ف حاجه..كان مروان سارح بخياله..مرواان مالك

مروان: هاا..لا مافيش حاجه..ياسين جه

يوسف: لا لسه وتأخيره ده قلقنى..ليدخل عليهم ياسين وهو منكس الرأس

مروان بلهفه: ايه ياياسين ايه الاخبار

ياسين:…………….

يوسف: ماتنطق يابنى وخلصنا

ياسين بحزن: الصفقه مارستش علينا ورسيت علي عبدالله المنشاوى

يوسف ومروان بصدمه: ايييييييييييييييه
**********************

 

الحلقة 18

يوسف ومروان بصدمه: اييييييييييييه

يوسف: انت بتقول ايه يا ياسين انت بتهزر صح

ياسين: لا يا يوسف مابهزرش فعلا الصفقه رسيت علي شركه المنشاوى

مروان بغضب: ازااااااااى..ازاى ترسي عليه دا انا مقدم اقل سعر ف السوق..ازاى يا ياسين ازاااى

ياسين:……………….

يوسف: ماتتكلم يا ياسين ف حاجه انت مخبيها علينا

ياسين: كل اللي قدرت اعرفه انه كان مقدم سعر عالي 12 مليون وبعدين…..

مروان: وبعدين ايه اتكلم

ياسين: للاسف عرف السعر اللي احنا مقدمينه فا قلل ف السعر بتاعه وخلاه 9 مليون بدل 12

فيهوى مروان علي اقرب كرسي له: لا مش ممكن..يعنى ايه يعنى ف حد بينقل اخبارنا لعبدالله المنشاوى

ياسين: يامروان 100 مره قولتلك عبدالله المنشاوى ده منظر وخلاص ولا عارف حاجه ف اى حاجه واللي بيمشي الشغل واحد احنا مانعرفش هو مين لا هو ولا رجالته

يوسف: معنى كدا ان ف خاين ف الشركه يا ياسين

ياسين: او يمكن براها

مروان: لا اكيد جوه الشركه احنا مابنتكلمش ف الشغل بره

يوسف: احنا لازم نعرف هو مين يامروان لازم

مروان: انا اللي يهمنى دلوقتى الخساره الكبيره اللي خسرناها..وهقول لبابا ايه دا كان معتمد عليا ف الصفقه دى

ياسين: قدر الله وماشاء فعل ارضي بقضاء ربنا يامروان ومتعوضه ف صفقه تانيه ان شاء الله

مروان بحزن: ان شاء الله
********************
اما عند حمدى فيتصل بالباشا ليبلغه اخر الاخبار

حمدى: الو..ايوه يا باشا

المجهول:طمنى ياحمدى الصفقه رسيت علي مين

حمدى بسعاده: مبرووك يا باشا عليك صفقه المدارس

المجهول بفرحه: عفاااارم عليك ياحمدى ليك مكافأه عشان الاخبار الحلوه اللي جبتها دى

حمدى: ربنا يخليك لينا يا باشا

المجهول: طيب اقفل دلوقت انت ياحمدى

حمدى: ماشي يا باشا سلام

ويغلق الخط ويتصل بتاليا

تاليا:ايوه يا باشا

المجهول: تحبي مكافأتك تبقي ايه يا حلوه

تاليا بسعاده: يبقي الصفقه رسيت عليك يا باشا مش كدا

المجهول: كدا ياحلوه..ها تحبي اكافئك بايه

تاليا: مش عاوزه حاجه يا باشا

المجهول: ازاااى دا لولاكى انتى ماكانتش رسيت عليا ابدا

فلاش بااك

كان يجلس ف شقته ليستقبل اتصالا منها فيرد عليها: الو…ايوه يا تاليا

تاليا: ايوه ياباشا

المجهول: هااا..ايه الاخبار

تاليا: جايبالك معلومات استاهل عليها حاجات حلوه كتير اووى يا باشا

المجهول: ها ياتاليا قولي وليكى الحلاوه

تاليا: حضرتك حاطط السعر ف صفقه المدارس اللي انت نازلها كام

المجهول: وانتى عاوزه تعرفي ليه

تاليا: قول بس ياباشا دا انا قلبي علي مصلحتك..قول ماتخافش

المجهول: حاطط 12 مليون جنيه

تاليا: ههههههه ايه رأيك بقي ان البيه حاطط السعر بتاعه 10 مليون جنيه وده اقل سعر متقدم واكيد هيقبلوه وهترسي عليه الحق انت يا باشا قلل ف السعر بتاعك عشان ياخد هو الصابونه والصفقه ترسي عليك انت

المجهول: يابنت اللعيبه ياتاليا..دا انتى اللي بتاخديه قليل عليكى..شكلي كدا هخليكى دراعى اليمين ياتاليا

تاليا: يشرفنى يا باشا

المجهول: طيب يا تاليا اقفلي انتى دلوقتى وانا هتصل بيكى بعدين

تاليا: اوامرك ياباشا

فيغلق الخط ويتصل بحمدى

المجهول: الو…ايوه ياحمدى

حمدى: خير يا باشا

المجهول: المناقصه بكره يا حمدى

حمدى: واحنا ف التمام يا باشا ومقدمين اقل سعر ف السوق

المجهول: بسخريه: اقل سعر ف السوق..دك خيبه ياحمدى شغلك معاتش بيعجبنى دى تاليا طلعت اجدع منك

حمدى بغل: تاليا..خير يا باشا هو ف جديد

المجهول: تروح تغير السعر اللي ف الورق وتخليه 9 مليون يا حمدى..مفهوم

حمدى: مفهوم يا باشا

المجهول: غوور دلوقت

حمدى: اوامرك يا باشا

ويغلق الخط

حمدى لنفسه: بقي انا شغلي معاتش بيعجبك يا باشا وتاليا هى اللي بقت حلوه دلوقت وبتجبلك الاخبار اللي انت عاوزها ماشي يا تاليا صبرك عليا

باااااااك

تاليا: دا عشان عيونك انت بس يا باشا

المجهول: امممم طلباتك ياتاليا

تاليا بدلع: انا مكافئتى يا باشا انى اشوفك واتملي بجمالك

المجهول: امممم تانى ياتاليا

تاليا: تانى وتالت ياباشا انا مش قادره ما اشوفكش لحد دلوقتى…عشان خاطرى يا باشا

المجهول: طيب سبينى افكر

تاليا بدلع يذوب الحجر: تؤ مش هسيبك تفكر..ها هنتقابل امته

المجهول: مصمم يعنى يا جميل

تاليا: ووبشده ..ها

المجهول: ماشي..نتقابل بكره بس مش ف مكان عام

تاليا: اومال فين

المجهول بخبث: هتجيلي الشقه..اصلها اماان ايه رأيك

تاليا: الشقه!! وماله اجيلك الشقه..ادينى بقي العنوان

المجهول: خديه عندك..ويمليها العنوان…مستنيكى بكره ياقمر

تاليا:هتلاقينى عندك ف المعاد يا باشا..سلاام
******************
ليعود مروان منزله وهو عابس الوجه

لتستقبله سهيله: مروان

مروان: عاوزه ايه يا سهيله مش فايقلك

سهيله: بابا قال اول ماتيجى تدخله مكتبه ع طوول

مروان: اوباا..اهو اللي كنت خايف منه حصل..ماشي يا سهيله انا داخله..ويدخل لوالده مكتبه وهو يعتقد انه سوف يوبخه علي الذي حدث

مروان: بابا..سهيله قالت ان حضرتك عاوزنى

مجدى: اقعد يامروان

مروان: بابا انا عارف انك زعلان منى..بس انا والله يا بابا عملت كل اللي اقدر عليه انا وياسين ويوسف وكنا مقدمين اقل سعر ف السوق بس حصل ان حد عرفه وراح بلغه لشركه المنشاوى وخلاه يغير ف السعر بتاعه والمناقصه ترسي عليه

مجدى: ومين قالك انى زعلان منك انا مؤمن ان الحاجات دى نصيب واحنا مالناش نصيب ف المناقصه دى

مروان باندهاش: والخساره يا بابا

مجدى: هنعوضها ف صفقات تانيه ان شاء الله..وعسي ان تكرهو شيئا وهو خير لكم

مروان: ماتعرفش انت ريحتنى بكلامك ده ازاى يا بابا

مجدى: بس دا مايمنعش انك تعرف مين اللي بينقل اخبارك لاعدائك

مروان: دا انا مش هيهدالي بال غير لما اعرف مين

مجدى: ماشي يا حبيبي..يلا بقي اطلع لمراتك

مروان: ماشي يابابا..بعد اذنك

مجدى:اتفضل يابنى…وبعد ان يخرج مروان من مكتب والده..يبتسم مجدى ويقول لنفسه: اختيارنا ليكى عمره مايكون غلط ابدا ياحوريه

ويبدأ يتذكر ما مر منذ ساعات قليله وهو يدخل الفيلا عابس الوجه

هويدا: خير يا مجدى مالك

مجدى: خسرنا الصفقه يا هويدا ابنك خسرنا اكبر صفقه دخلناها

هويدا: مروان

مجدى: ايوه مروان وخسارتنا كبيره اووى

سهيله: اهدى يا بابا ماتعملش ف نفسك كدا

مجدى: بلا اهدى بلا زفت انا داخل مكتبي واما البيه يشرف خليه يدخلي…ماشي يا سهيله

سهيله: حاضر يابابا حاضر

حوريه ف نفسها: ياعينى عليك يامروان انت كان املك كبير انك تكسب الصفقه دى..كنت بتقول انها هتنقل الشركه نقله تانيه..بس هو مالوش ذنب دا نصيب وهو عمل اللي عليه ليه عمى مجدى عاوزيشيله مسؤليه اللي حصل لوحده..لا انا لازم ادخل واتكلم معاه

حوريه: طنط انا هدخل اتكلم مع عمى شويه

هويدا:ياريت يا حوريه يابنتى وعرفيه ان مروان مالوش ذنب دا نصيب

حوريه: من عنيا يا حبيبتى..بعد اذنك…وبعدها تذهب له غرفه المكتب وتدق الباب

مجدى: مش عاوز حد يدخل عليا..سبونى دلوقتى

حوريه: دا انا ياعمى ممكن ادخل

مجدى: ادخلي يا حوريه..فتدخل وتغلق الباب ورائها

حوريه: ايه ياعمى مالك معصب نفسك كدا ليه

مجدى: يعنى انتى شايفه ان مافيش حاجه تستدعى انى اتعصب

حوريه: ياعمى انا معاك وليك حق تزعل بس مش من مروان ..ياعمى والله مروان عمل اللي عليه وبزياده بس ربنا هو اللي عاوز كدا

مجدى: ونعم بالله

حوريه: ياعمى الدنيا مش هتقف علي الصفقه دى وبعدين مجال البيزنس يوم مكسب ويوم خساره والصفقه دى ماكانتش من نصيبكم يبقي متعوضه ف صفقه تانيه ان شاء الله

مجدى: ……………

حوريه: صدقنى ياعمى ربنا عاينلكو حاجه احسن من دى 100 مره..وعسي ان تكرهو شيئا وهو خير لكم…ومروان مالوش ذنب..لان لو هتجيب الذنب عليه يبقي تجيبه علي ياسين ويوسف وعلي حضرتك اولهم لانكو كلكو شغالين مع بعض مش مروان لوحده

مجدى: انتى شايفه كدا ياحوريه

حوريه: انا مش شايفه غير كدا ياعمى..وياريت لما مروان يجى ماتزعلوش وفهمه انه عمل اللي عليه بزياده وانكو مالكوش نصيب فيها عشان يبقي عنده طاقه يعوض الخساره ومايبقاش عنده احباط والشغل يقف والخساره تكبر

مجدى بابتسامه:تعرفي بكلامك ده ادتينى انا الطاقه اللي كانت مسلوبه منى وخلتينى اخد بالي من حاجات ماكنتش واخد بالي منها

حوريه بابتسامه: طب دا كويس

مجدى: خلاص اوعدك انى مش هزعله ونحاول نعوض خسارتنا دى

حوريه: ودى حاجه تسعدنى جدا ياعمى..وليا طلب ياعمى بعد اذنك ياريت مروان مايعرفش بقعدتنا دى ممكن

مجدى: ممكن اووى

وتقف: طيب انا هطلع اوضتى بقي مش عاوز حاجه

مجدى: لا يا حبيبتى سلامتك

حوريه: بعد اذنك

مجدى: اتفضلي……ويعود بذاكرته الي الحاضر……كلامك كله كان صح يا حوريه..بنت بتفهم صحيح

ويصعد مروان لغرفته ويدخل ليجد حوريه جالسه علي الاريكه وهى تقرأ روايه

مروان: السلام عليكم

حوريه: وعليكم السلام…حمدالله علي السلامه

مروان ويجلس بجانبها وهو متعب للغايه: الله يسلمك..بتعملي ايه

حوريه: مافيش كنت قاعده زهقانه فاجبت روايه اقرأ فيها….انت كويس

مروان: كنت مش كويس…بس لما اتكلمت مع بابا ارتحت شويه

فابتسمت: اشمعنى

مروان: مافيش كنت فاكر انه هيتعصب ويشيلنى الليله لوحدى ويجيب الذنب عليا بس لقيته كويس جدا معايا

حوريه: طب كويس

مروان وينظر لها وكأنه تذكر شيئا ما وبابتسامه عذباء: هو انتى صحيح لما اتصلتى بيا النهارده كنتى عشان تطمنى عليا

حوريه بارتباك: هاا لا اه لا اقصد يعنى كنت عاوزه اطمن علي النتيجه عشان عارفه انكو هتخسرو كتير لو مارستش عليكو وكدا

مروان: امممم وكدا

حوريه بابتسامه تداريها: اااه وكدا

مروان: طب قومى بقي كدا ياهاانم عشان انا عاوز اريح ضهرى لانى مش قاادر..فاصل بجد

حوريه: وعاوزنى اقوم ليه

مروان: عشان انام

حوريه: طب ماتقوم تنام انا ماسكاك

مروان: لا مانا هانام عالكنبه هنا

حوريه بضحك: ليه هو السرير بيكهرب ولا ايه

مروان: ههههه لا والله…لا ياستى انا هنام هنا وقومى انتى عالسرير

حوريه: يا مروان احنا لسه بدرى وانا مش هنام دلوقتى خالص..قوم انت نام عالسرير وانا هقعد هنا اكمل الروايه دى

مروان وينظر الي عنوان الروايه: ودى اسمها ايه بقي

حوريه وتنظر ف عينيه وكأنها تقول له هذا: دعنى احطم غرورك

مروان وفهم ماترميه عليه: لا ياختى اطمنى هو اتحطم واتشدش خالص

حوريه: ههههههه هو ايه ده

مروان ويغمز لها: غرورى….انا هنام بقي

حوريه: طيب تحب اصحيك امته

مروان: عالعشا يارورو

حوريه بابتسامه: اوك
*********************
ويمر الوقت ويأتى وقت العشاء وتذهب حوريه لتوقظ مروان

حوريه: مرواان..يامروان

مروان بنوم: اممممم

حوريه: اصحى يامروان يلا

مروان: امممم عاوزه ايه ياحوريه سبينى اناام

حوريه: يامروان قوم بقي طنط وسهيله حضرو العشا ومستنينا

مروان وقد استيقظ قليلا: هى الساعه كام دلوقتى

حوريه: الساعه 9

مروان: بس انا ماليش نفس للاكل خالص

حوريه: طب هنقول ايه لطنط وعمى

مروان: انتى قوليلهم مروان مش عاوز يتعشي وانتى اقعدى اتعشي معاهم

حوريه: لا انا كمان مش عاوزه

مروان: طب ما هما كدا ممكن يزعلو

حوريه: طب انا عندى فكره ايه رأيك انزل واقولهم اننا مش عاوزين نتعشي بس هناكل فاكهه واجيب طبق الفاكهه واطلع وكدا يبقي مافيش مجال انهم يزعلو خالص..صح

مروان بابتسامه لطيبتها وحنيتها: صح

حوريه: اوك..هنزل اجيبه واطلع بس بشرط

مروان: اييه

حوريه بابتسامه: هتاكل معايا

مروان بنفس الابتسامه: وانا ماعنديش مانع..وينظر لها..انتى لسه واقفه يلاا ياانسه انزلي بسرعه

حوريه بسعاده: اوك..وتهبط للاسفل

هويدا: ايه يا حوريه ياحبيبتى مروان مانزلش معاكى ليه

حوريه: مروان مش هينزل يتعشي ياطنط

هويدا: لييه

حوريه: مالوش نفس وانا كمان والله ماليش نفس

هويدا: الله..انتو كدا هتزعلونى منكو بقي

حوريه: واحنا مانقدرش علي زعلك ياست الكل وعشان خاطرك انا هدخل اعمل طبق فاكهه واخده ناكل فيه فوق

هويدا: اممم اذا كان كدا ماشي سماح المره دى

حوريه: ههههه ماشي..انا هدخل المطبخ بقي اعمل طبق حلو كدا واخده واطلع

هويدا: ماشي ياحبيبتى..وتدخل هى المطبخ وتحضر طبقا من الفاكهه فيه جميع انواع الفاكهه مثل الموز والتفاح والبرتقال والكمثري..وتصعد له لتجده يتحدث مع ياسين ف الهاتف

مروان: يا ياسين اللي حصل ده مش هيعدى بالساهل……لالا اكيد ف خاين موجود ف الشركه هو اللي بينقل اخبارنا للشركه المنافسه

فتضع هى الطبق علي المنضده الصغيره وتشاور لمروان وتهاتفه بصوت منخفض

حوريه: مروااان

مروان ويبعد الهاتف عن اذنيه: نعم يا حوريه

حوريه:عما تخلص كلام مع ياسين هدخل اخد شاور لانى بهدومى دى من بدرى

مروان: اوك

ويكمل حديثه مع ياسين وتدخل هى المرحاض تستحم وترتدى بيجامه ستان باللون النبيتى وتخرج لتجده جالس علي الفراش وينظر للامام

حوريه: ماالك

مروان وينظر لها: هاا..مافي……وينظر لها ويبتسم

مروان: اييه ف اييه مالك

مروان بابتسامه: اصل البيجامه دى شكلها حلو عليكى اووى

وتنظر حوريه لملابسها: والله…ميرسي اووى

وتقف امام التسريحه وتمشط شعرها وتضع عطرها النفاذ..وتجلس علي الاريكه وتقرب طبق الفاكهه منها وتمسك بالسكين: ها..قولي بقي تحب تاكل ايه موز ولا تفاح ولا برتقال ولا كمترى

مروان: ياااه كل ده

حوريه: ااه قولي بقي اقولك انت تاخد من كل نوع واحده او اتنين

مروان: لا كدا كتير عليا اقولك قشريلي برتقاله وخلاص

حوريه: مااشي..وبدأت تقشر البرتقاله وتتحدث مع مروان

حوريه: بس قولي انت ماتعرفش مين اللي بيخونك ف شغلك

مروان: للاسف لا ودا اللي هيجننى انا مابتكلمش ف الشغل الا مع ياسين ويوسف بس وبنتكلم جوه مكتبي ومابنتكلمش فيه بره خالص
ازاى بقي عرف

حوريه: اكيد ف حد عارف عنك كل حاجه وهو اللي بيوصل اخبارك لاعدائك..لازم تاخد بالك من كل اللي بيشتغلو معاك..حتى لو مأمنهم ..حرص ولا تخون

مروان: هو ده اللي لازم يحصل فعلا

حوريه: وتحاول كمان ان..اااااااااااااااااه

فينتفض مروان ويذهب لها: اييه ف ايييه ايدك مالها..كانت يدها تنزف بشده

حوريه بألم شديد: مش عارفه انا كنت بتكلم معاك وماخدتش بالي والسكينه فتحت ايدى…اااه

مروان بخضه حقيقيه عليها: خلاص خلاص اهدى انا هدخل اجيب الاسعافات الاوليه عشان اداويلك الجرح..ويدخل المرحاض ويأتى بالاسعافات ويبدأ يداوى لها جرح يدها

حوريه: بالراحه يا مروان عشان خاطرى

فينظر لها مروان ويقول لها بحب: حااضر..ماتخافييش …وهو يعالج لها يدها كانت تنظر له بحب وابتسامه صغيره وهو هكذا كان ينظر لها ليس بحب ولكن بعشق ورومانسيه كانت هى جالسه علي الاريكه وهو جالس علي ركبتيه امامها وبعد ان لف يدها بالشاش نظر ف عينيها وقرب يدها لفمه ووضع عليها قبله بث فيها كل حبه وشوقه لها فكان اول مره يقبلها..فاستحيت منه ونظرت للاسفل

مروان: ايدك عامله ايه دلوقت لسه بتوجعك

حوريه بابتسامه حب: تؤ..مابقتش توجعنى خلاص

مروان: طيب هاتى بقي الفاكهه دى وقوليلي عاوزه تاكلي ايه

حوريه: مش عااوزه

مروان: لاا انتى نزفتى دم كتير ولازم تعوضي..قوليلي بقي عاوزه ايه

حوريه: انت اللي هتقشرلي

مروان: ياسلام وايه يعنى لا وانا اللي هأكلك كمان بايدى.. ها قوليلي اعملك ايه ..اقولك انا تفاااح اصل التفاح ماياكلش الا التفاح
..وبدأ يقطع لها قطع التفاح ويضعها ف فمها وهى تأكلها علي استحياء منه

حوريه بكسوف: كفايه كدا بقي

مروان: كفايه ايه انتى لسه كلتى حاجه..وبعدين انتى مكسوفه كدا ليه لا ماتتكسفيش منى دا انا حتى زى جوزك يعنى

حوريه برقه: ههههههه هههههه

كان ينظر لها بحب: ضحكتك حلوه اووى

حوريه بكسوف: ميرسي..وانت كمان

مروان بخبث: انا كمان ايه

وحوريه بارتباك: وو وانت وانت كمان يعنى ..ضحتك حلوه

مروان: والله العظيم

حوريه بابتسامه: والله العظيم

مروان: بركاتك يا ياسين

حوريه بعدم فهم: ياسين..ماله ياسين

مروان: ماتاخديش ف بالك…ها ناكل موز

حوريه بابتسامه: ناكل مووز

وظلو هكذا وقتا طويلا حتى اتى موعد نومهما

مروان: بقولك ايه انتى مش هينفع تروحى الشغل وايدك متعوره كدا

حوريه: اه فعلا..انا كدا هكلم بسنت الصبح واخليها تاخدلي اجازه اسبوع

مروان: طيب تمام كدا

حوريه: طيب انا هنام بقي تصبح ع خير

مروان: وانتى من اهله..انا هفضل صاحى شويه لانى مش جايلي نوم

حوريه: اوك….وذهبت نحو الفراش حيث حست بان شئ ما يلمس قدميها وما ان نظرت تحتها حتى صرخت وصعدت فوق الفراش: عاااااااااااااااا الحقنى يامرواااااااااااان
********************

 

الحلقة 19

وذهبت نحو الفراش حيث حست بان شئ ما يلمس قدميها وما ان نظرت تحتها حتى صرخت وصعدت فوق الفراش: عاااااااااااااااا الحقنى يامرواااااااااااان

مروان: ايييه ف ايييييه

حوريه بصراخ: فاااااااااااااااااااااااار

مروان بخوف: اييييييه فاااااااااار..فيجرى ناحيه الفراش ويصعد عليه

فتنظر حوريه له باستغراب: نعم!!

مروان خائف: اييييه

حوريه: هو ايه اللي ايه..انت هتقف جمبي انزل موته يامرواان

مروان: هو انا يا حوريه ماقولتلكيش انى بخاف من الفيراان

حوريه: ايييييه بتخاف من الفيران اومال انا اعمل ايه..يلا يا مروان عشان خاطرى انزل موته انا بخاف منهم اووى

مروان: طب هاتى حاجه اما اموته بيها

حوريه: طيب..وتناوله السكين…خد

مروان: ايه ده يا ماما هموته بالسكينه..يالهوووى هتشل

حوريه: اومال اجيب ايه بس يامروان

مروان بخبث حتى يجعلها تخاف اكثر: هاتى اى حاجه غير السكينه..ايييييه ده حاسبي ياحوريه الفار جاى عليكى

حوريه: عاااااااا..وتجرى ناحيه مروان بسرعه شديده حتى تعثرت قدميها ف ملايه السرير لتقع بين احضاااااااانه

ولحظاااااااااااات سكوووووووووووون

اما مروان فحاول ان يقترب منها ويقبلها من شفتيها..حتى ابعدت نفسها عنه قلييلا

مروان: اييييه

حوريه: احم…الفاااار

مروان: اه صحيح دا انا نسيته خالص..طيب بصي ناولينى اى حاجه طويله

حوريه: طب ينفع دى

مروان: اه تمام كدا حلو….ويبدأ بالبحث عنه ف انحاء الغرفه وعندما يجده ويحاول ان ينقض عليه يهرب منه وظلو هكذا طويلا حتى تعبو

مروان بتعب: خلاص ياحوريه معتش قاادر وعاوز انااااام

حوريه: لا يامرواان لا عشان خاطرى دور عليه حلو

مروان: والله لو لقيته قدامى ماهتحرك من مكانى انا معتش قاادر خلاص جاب اخرى

حوريه:طب انا كدا مش هعرف انام وف فار ف الاوضه

مروان: هو الفار دا دخل ازااى

حوريه: تقريبا كدا دخل من الشباك لما كنت فتحاه النهارده

مروان: اممم ..طيب ننام بقي والصباح رباح وبكره هجيبله مصيده واحطهاله..

حوريه: طيب احنا ف النهارده انا هنااام ازاااااى

مروان: كدا مافيش غير حل واحد

حوريه: ايه هو

مروان بخبث: انى انام جمبك النهارده عالسرير لحد بكره نجبله المصيده ونخلص منه

حوريه: ايه هتنام جمبي لا طبعا..لالا ماينفعش

مروان: خلاص انا عرضت عليكى وانتى رفضتى..مافيش مشكله..انام انا بقي..تصبحى علي خييير

واستلقي علي الاريكه واقنعها بانه ذهب ف النوم اما هى فكانت جالسه علي الفراش وهى خائفه بشده من ذاك الحيواان الصغير الضئيل ابو شنب كبير

وبعد ان فاض بها قررت بان تناديه

حوريه: مروان..يامروااااان

مروان بتمثيل: اممممم ايه ياحوريه عاوزه اييه

حوريه: هو انت نمت

مروان: اه نمت عاوزه حاجه

حوريه: طب بترد عليا ازاى وانت نايم

مروان: عاادى بتحصل..هاا ف حاجه

حوريه: ااه..تعالي نام جمبي

مروان بسعاده يخفيها: ما كان من الاول

حوريه: ماهو انا مش عارفه انام خالص من الخوف

مروان: ماشي ياستى…وذهب ناحيه الفراش واستلقي بجانبها

حوريه: بقولك ايه اتاخر شويه خليك علي طرف السرير

مروان: مانا كدا هقع

حوريه: هتقع ايه انت لسه صغير ثم انا كمان علي طرف السرير اهو

مروان: طيب حاسبي بقي لا الفار يطلعلك من تحت السرير يعضك وانتى نايمه علي الطرف كدا

حوريه بخوف: ايييييه يعضنى…فتتحرك وتذهب بجانب مروان وتمسك بيده

مروان: ايه ايه ماتخافيش انا جمبك اهو

حوريه: ماتبعدش عنى عشان خاطرى

مروان ويضغط علي يدها بشده: عمرى ف حياتى ماهبعد عنك المهم انتى اللي ماتبعديش عنى

حوريه: طيب ممكن ننام بقي

مروان: ممكن..يلا تصبحى علي خيير

حوريه: وانت من اهله…وذهب كل منهم ف ثبات عميق ولكن هذه المره غير اى مره كان كل منهم سعيد للغايه بان نصفه الاخر بجانبه لا يبعد عنه كان مروان سعيد وكان يتمنى هذا من قبل اما حوريه فكانت فرحه لذلك وشكرت ف نفسها هذا الفار الذي جمع بينها وبين حبيبها ف فراش واحد

ويمر الليل بسلاام وتشرق الشمس بخيوطها الذهبيه لتتسلل من فاتحه الشباك الصغيره لتنعكس علي وجه مروان فتويقظه فيفتح عينيه ببطئ ليندهش مما يشاهده وكأنه اعتقد انه كان ف حلم وعندما يستيقظ سيجد نفسه نائم علي الاريكه ولكن الحلم كان واقعا.. حيث وجد نفسه فارد احد ذراعيه لتنام حوريه برأسها عليه وواضعه يدها علي صدره وهو واضع يده عليها فكانت بين احضانه ..حتى ابتسم لذلك وتمنى انه يظل هكذا الباقي من عمره حيث تأملها وهى نائمه كانت تشبه الملائكه وكانت جميله ورقيقه..وهو سارح ف جمالها وجدها تبتسم..نعم تبتسم وهى نائمه بجانبه..وبعدها بدأت تفتح عينيها ببطئ وهى ايضا مبتسمه حتى تفاجئت بوجودها ف احضان مروان فتتلاشي ضحكتها وانتفضت من مكانها

حوريه: يانهاار اسود..مروان انت بتعمل ايه هنا وايه اللي حصل..اتكلم يامروان انت عملت ايه عملت ايه عملت اييييييه

مروان: اهدى يابنتى ادينى فرصه اتكلم

حوريه: لا مش ههدى غير لما تقول انت عملت فيا ايه

مروان حتى يغضبها فقال لها وهو يعض علي شفتيه السفلي: دا انا عملت عمايل امبارح ما اقولكييش

حوريه بصدمه: اييييييه انت بتقول ايه يامروان..انت تعمل كدا..ليه يامروان حرام عليك حرام عليك ليه تعمل كدا ليه..انت مش بنى ادم مش بنى ادم…وبدأت تبكى بشده

فيضحك مروان بشده عليها

مروان: هههههههههههههههههههههه..اهدى ياحوريه ماتعمليش ف نفسك كدا..هو اصلا ماماتش ماتزعليش نفسك بقي

فتوقفت حوريه عن البكاء وتقول باستغراب: اييه..هو ايه اللي ماماتش

مروان: الفار ياحبيبتى…ماماتش مش انتى زعلانه عشان كدا

حوريه: فار فار ايه انا اصدى ال…وتذكرت ليله امس وكل ماحدث فيها..اااه انت اصدك عالفار بتاع امبارح

مروان: ايوه طبعا..ويقول بخبث ..الله اومال انتى كنتى زعلانه وبتعيطى عشان ايه هااا

حوريه بارتباك: ها..لا ولا حاجه…..

مروان: طاايب علي راحتك…انا هقوم بقي اخد شاور عشان البس هدومى وانزل افطر واطيييييييير

حوريه: علي فين

مروان: عالشغل…

فيدخل المرحاض وتجلس هى مكانها وتتذكر منذ لحظات قليله وهى بين احضانه يالها من لحظات رومانسيه وجميله وكانت تقول لنفسها وهى مبتسمه: ياريتنى عملت عبيطه وفضلت ف حضنه كمان شويه

حيث هو ف الداخل كان لم يبدأ اخذ الشاور بعد وهو يعدل من ملابسه سمعها وهى تقول ذلك فابتسم بشده وقال: ماتخافيش مافيش اقرب من الايام وهتكونى ف حضنى ع طول ومش هسمحلك انك تخرجى منه ابدا وساعتها هتكونى مراتى بجد
***********************
كانت تقف امام المرأه تهندم من ملابسها وتضع الروج الخاص بها الذى تحبه وترش عطرها الانثوى الجذاب وبعدها تهبط للاسفل وتستقل سيارتها وتذهب بها الي عماره ف منطقه ليس بها سكان نوعا ما..فتصعد لاحدى الشقق وتنظر الي رقمها وتقول: اه هى الشقه.. فتخرج المرأه الخاصه بها من شنطتها وتنظر فيها لاخر مره وتهندم من ملابسها وتضرب جرس الشقه وهى قلبها ينبض بشده ..وبعد ثوانى ينفتح الباب ولا يوجد شخص واقف وكأنه انفتح وحده فتدخل وهى ف رهبه شديده جدا وما ان دلفت خطوه واحده حتى وجدت باب الشقه يغلق بشده وشخص يقف ورائه فانتفضت بشده وشهقت ووضعت يدها علي قلبها

المجهول:اييه مالك ياحلوه اتخضيتى ولا ايه

تاليا بخوف ويدها ترتعش بشده: هاا لا ولا حاجه انا بس مخضوضه شويه مش اكتر

المجهول: سلامتك من الخضه..وينظر لها.. ادخلي

تاليا برعب: اوك

المجهول: كنتى هتموتى ياتاليا وتشوفينى وانا بصراحه استخسرتك ف المووت ووافقت انك تجيلي

تاليا: وانا ليا الشرف يا باشا انك وافقت

المجهول: طب اقعدى واقفه ليه

تاليا: ماشي..بس انا مش عارفه ليه حاسه انى شوفتك قبل كدا

المجهول: لالا مااظنش

تاليا: بس انا متأكده انى شوفتك ف مكان قبل كدا بس فين مش فاكره

فنظر لها نظره غضب ارعبتها: وانا قوولت مااظنش انك شوفتينى قبل كدا

تاليا بخوف: اه اه ماشوفتكش قبل كدا

وينظر لها من احمص قدميها حتى شعر رأسها نظرات شهوانيه مقززه…..بس انا ماكنتش اعرف انك جامده اووى كدا دا مروان طلع مابيفهمش انه يسيب القمر ده ويروح لواحده تانيه

تاليا: مابيفهمش..بس بينى وبينك مراته برضو صاروخ ارض جو طول عمره محظوظ ابن الاييييه

المجهول: اول مره اشوف واحده بتمدح ف ضرتها

تاليا: كانت ضرتى وسابنى وراحلها

المجهول: بس تصدقي عمل خير..ها تشربي ايه بقي

تاليا: تؤ..مش عاوزه

المجهول: عندك حق خلينا ف المهم

تاليا: وايه المهم؟

لينظر لها نظرات هى تفهمها ويقف ويذهب لها ويأخذها من يدها ويتجه نحو غرفه النوم: المهم جوه هنا تعالي وانا اقولك عليه

تاليا بدلع: اوك..ويدلفون للداخل ويستمتعون سويا مع بعضهما بالحراام وليس بالغرام..
***************
اما عند عز وانجيلينا

عز بغضب:ازاى يعزمك يا انجيلينا علي الغدا وتقعدى تتغدى معاه وبعدها تطلعو تلفو بالعربيه ازااااااى انتى اتجننتى

انجيلينا: اييه از..فيها ايه يأنى..انت مكبر موضوء اووى

عز باستغراب: مكبر الموضوع!! يعنى تتغدى مع راجل غريب عادى وتلفو مع بعض بالعربيه عادى ودى كمان مش اول مره تعمليها..وعاوزانى اسكت وان اتكلمت يبقي بكبر الموضوع

انجيلينا بغضب: ايييييه از بقي انا ذهقت وتئبت منك هلااص مش قاادر استهمل اكتر من كدا

عز: يعنى ايه يا انجيلينا

انجيلينا بثبات: يأنى نطلق از هو ده الهل المناسب

عز: وتسبينى انجيلينا

انجيلينا: از هلاص اهنا مش ينفع نكمل مأ بأض والطلاق هو الهل المناسب

عز: دا اخر كلام عندك

انجيلينا: ايوه از..اهنا بقالنا فتره كبيير بتهصل مشاكل بينا كتيير ومش بتتهل از يبقي الطلاق هو الهل

عز: اوك…اختارى الوقت اللي يريحك

انجيلينا باصرار: دلوقتى از أشان ههضر شنطتى دلوقتى واسافر المانيا

عز: ياااه للدرجه دى دا انتى ماصدقتى بقي

انجيلينا: لا از بس انا هفضل هنا كتير ليه بقي هلاص كل هاجه انتهت..بلييز از اطلب شيخ مأزون دلوقتى هالا..أشان يهلصنا

عز: اوك..انجيلينا….وبعدها تصعد انجيلينا لتحضير شنطتها وعز يطلب المأزون ويتصل بيوسف ومروان ليشهدو علي عقد الطلاق

ويجتمع الجميع ف شقه عز

مروان: ما تراجع نفسك ياعز انت وانجيلينا

عز:خلاص يامروان مافيش فايده

المأزون: يا جماعه راجعو نفسكو ان ابغض الحلال عند الله الطلاق

انجيلينا: هلاص شيخ مأزون مش ينفع هالص نكمل انا واز سوا بلييييز يلااا

المأزون: بطايق الشهود لو سمحتو

ويبدأ المأزون باجراءات الطلاق حتى انتهى وذهب وتبقي مروان ويوسف وعز وانجيلينا كانت تستعد للرحيل

عز: هاجى اوصلك للمطار

انجيلينا: لا از ال boy friend بتائي مستنينى تهت

عز بغضب مكتوم: اوك علي راحتك

يوسف بصوت منخفض لمروان: ياااااااختتتى الحق يامروان دا الواد بتاعها واقفلها تحت

مروان: بس يايوسف اخرص مش وقتك خاالص وبعدين ده عندهم عادى حتى وهى متجوزه

انجيلينا: هلي بالك من نفسك از

عز: وانتى كمان انجيلينا

انجيلينا: الوداء از..وذهبت له واحتضنته بشده وبعدها تضع قبله علي شفتيه ولكن طويله جدا

مروان بصوت منخفض ليوسف: يااااختتتى الحق يايوسف دى بتبوسه بعد مااطلقو طب وربنا انا ما بوست مراتى لحد دلوقتى ياعينى علي حظك يامروان

يوسف: بس يامروان خلينا نتفرج ااقصد يعنى اسكت مش وقتك خاالص وبعدين ده عندهم عادى بعد مايطلقو…وبعدها يبتسم بشده..اتفرج اتفرج

حتى انتهت انجيلينا من تقبيل عز: بااى از

عز: باى انجيلينا..وتذهب انجيلينا ويجلس عز ومروان ويوسف

مروان: خلاص ياعز ماتزعلش دا نصيب

عز: لا يا مروان مش زعلان الحمدلله علي كل حال

يوسف: وانت هتعمل ايه دلوقتى ياعز

عز: هعمل ايه يعنى..هصفي كل حاجه هناك واستقر هنا..هقعد هناك ليه بقي انا اصلا كنت عاوز انزل مصر واستقر هنا بس لما اتجوزتها قعدت معاها هناك

مروان: واحنا هنفضل جمبك مش هنسيبك

عز: عاوز لما اخلص كل شغلي ف المانيا واصفيه اشتغل معاكو يامروان وهدخل بنسبه كبيره ونكبر الشركه والشغل يكتر

يوسف بفرح: بجد ياعز

عز: طبعا يايوسف هو الكلام ده ف هزاار

مروان: تمام ياعز…وربنا معانا جميعا

يوسف وعز: ونعم بالله
****************
ويعود مروان لمنزله

هويدا: ها ياحبيبي كنت فين قالو انك خرجت من الشركه بدرى يعنى

ويجلس مروان بجانبها ليرتاح قليلا

سهيله: مالك يامروان ف ايه ياحبيبي

مروان: مافيش ياحبيبتى…اصل خرجت من الشركه انا ويوسف وروحنا عند عز وانجيلينا

هويدا: عز…ليه ياترى خير

مروان: يعنى خير ومش خيير

هويدا: ماتقول يابنى بقي هتحيرنا معاك ليه

مروان: عز طلبنى ف التليفون انا ويوسف عشان نروح نشهد علي عقد طلاقه من انجيلينا

سهيله: طلااااااااق!! هو..هو عز وانجيلينا اطلقو

مروان بخبث: تصورى ياسوسو

هويدا: طب وماتعرفش ايه السبب يامروان

مروان: والله ياماما تقريبا كدا كان بينهم مشاكل وماكانش ينفع يكملو مع بعض

سهيله: طب..طب وهى راحت فين بعد ما اطلقو

مروان: سافرت علي بلدها

هويدا: طب وعز

مروان: هيصفي كل حاجه هناك وهيستقر هنا

سهيله: طب و..

مروان بزهق: يوووووووه دا انتو اسئلتكو كتير اووى ياريتنى ما قولتلكو من الاول ايييه ماسوره اسئله اتفتحت عليا

هويدا: ولد..

مروان: اسف ياماما اؤمرينى

هويدا: طب وهيشتغل فين لما يستقر هنا

مروان: هيدخل معانا ف الشركه بنسبه كبيره علشان نكبرها ونعوض الخساره

سهيله بفرح: يعنى عز هيشتغل معاك انت ويوسف وياسين

مروان: اااه

سهيله: ياحبيبي يامروان يا احلي اخ ف الدنيا كلها..وتضع قبله علي وجنتيه

مروان: ايه ياسهيله كميه الحنان اللي نزلت عليكى فجأه كدا

سهيله: هاا ولا حاجه مش انت اخويا حبيبي..انااا هطلع اوضتى بقي..سلاااام

هويدا: اخييرا رجعت اشوفك بتضحكى تانى من قلبك ياسهيله

مروان: سبحان الله فعلا كل حاجه ف الدنيا دى نصيب

هويدا: طبعا ياحبيبي

مروان: طيب انا طالع اوضتى بقي بعد اذنك

هويدا: اتفضل يا حبيبي

ويصعد لغرفته ويدخل ليتفاجئ وهو يشاهد حوريه وهى ملقاه علي الارض

مروان بلهفه: حوووووريه
************

———–———-———————-————

ونكمل في الحلقات القادمة ماتنسوش تعلقوا علي الحلقة في صفحة مدام طاسة والست حلة

 الى اللقاء في الحلقات القادمة

بقلم الكاتبة:سارة مجاهد

 

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى